Yoꞌoꞌ kaꞌán Ndiosí xiinꞌ Moisés ti̱xi̱n vi̱ꞌe̱ toto̱
33
Te̱ ni̱ kaꞌa̱n Yahvé xiinꞌ Moisés ndii:
―Kuaꞌan ke̱ta̱ yoꞌoꞌ xiinꞌ sa̱kuuꞌ ne̱ yivi̱ꞌ,
ne̱ ni̱ ta̱va̱ꞌ u̱nꞌ nuu̱ꞌ ñu̱ꞌuꞌ Egipto,
te̱ kuꞌu̱n ndo̱ꞌ nuu̱ꞌ ñu̱ꞌuꞌ ña̱ ni̱ ta̱xi̱ kuento i̱ nuu̱ꞌ Abraham,
xiinꞌ nuu̱ꞌ Isaac,
xiinꞌ nuu̱ꞌ Jacob,
ña̱ ta̱xi̱ e̱ꞌ e̱ nda̱ꞌaꞌ si̱a̱niꞌ xikaꞌ ra̱.
2 Te̱ ti̱ꞌviꞌ i̱ i̱i̱n ángele xikaꞌ nuuꞌ nuu̱ꞌ i̱,
te̱ ki̱ꞌi̱n i̱tyiꞌ a̱ nuu̱ꞌ u̱nꞌ te̱ ta̱va̱ꞌ a̱ ne̱ vi̱ꞌe̱ cananeo,
xiinꞌ ne̱ vi̱ꞌe̱ amorreo,
xiinꞌ ne̱ vi̱ꞌe̱ heteo,
xiinꞌ ne̱ vi̱ꞌe̱ ferezeo,
xiinꞌ ne̱ vi̱ꞌe̱ heveo,
xiinꞌ ne̱ vi̱ꞌe̱ jebuseo.
3 Kuaꞌan ndo̱ꞌ nuu̱ꞌ ñu̱ꞌuꞌ va̱ꞌa̱ miiꞌ yoo kuaꞌa̱ꞌ letyin xiinꞌ ñuñu̱ꞌ.
Ndisu̱ küꞌu̱n yuꞌu̱ xiinꞌ ndo̱ꞌ,
ko̱to̱ ka̱ sa̱ndo̱ñuꞌuꞌ ndi̱ꞌi̱ i̱ ndoꞌó i̱tyiꞌ,
sa̱kanꞌ ña̱ ne̱ xi̱i̱ va̱ nimá nduuꞌ ndo̱ꞌ ―ni̱ katyi̱ a̱.
4 Te̱ kii̱ꞌ ni̱ xi̱ni̱ so̱ꞌo̱ ne̱ yivi̱ꞌ ja̱a̱nꞌ ña̱ xiꞌé va̱ Ndiosí xini ña̱ꞌaꞌ a̱ ndii,
ni̱ ku̱su̱tyiꞌ xa̱va̱ꞌa̱ i̱ni̱ ni̱a̱ nde̱e̱ i̱i̱n ni̱a̱ nï̱ tyu̱ꞌu̱n ka̱ siki̱ va̱ꞌa̱ suku̱nꞌ.
5 Sa̱kanꞌ ña̱ ni̱ kaꞌa̱n Yahvé xiinꞌ Moisés ndii:
“Kaꞌa̱n xiinꞌ ne̱ vi̱ꞌe̱ Israel ndii:
‘Ne̱ xi̱i̱ va̱ nimá nduuꞌ ndoꞌó,
tee̱ꞌ ndee i̱i̱n kani̱ꞌ ku̱i̱ti̱ꞌ ko̱o̱ i̱ xiinꞌ ndo̱ꞌ ndii,
i̱yo̱ sa̱ndo̱ñuꞌuꞌ i̱ sa̱kuuꞌ ndo̱ꞌ.
Kaꞌa̱n tyuunꞌ u̱nꞌ xiinꞌ ni̱a̱ na ta̱va̱ꞌ kiꞌi̱ꞌ ni̱a̱ sa̱kuuꞌ siki̱ va̱ꞌa̱ ña̱ kumiꞌ ni̱a̱,
te̱ mi̱iꞌ yuꞌu̱ xiní ndee ña̱ sa̱a̱ i̱ xiinꞌ ndo̱ꞌ”’,
ni̱ katyi̱ a̱.
6 Sa̱kanꞌ na kuiiꞌ nde̱e̱ kii̱ꞌ ni̱ ki̱e̱e̱ ni̱a̱ xaꞌa̱ꞌ i̱kuꞌ Horeb kuaꞌa̱n ni̱a̱ ndii,
köo̱ꞌ kivi̱ꞌ ka̱ ni̱ xasiki̱ꞌ ni̱a̱ siki̱ va̱ꞌa̱.
7 Sa̱kanꞌ te̱ ni̱ na̱ꞌi̱ Moisés yu̱kunꞌ toto̱ ja̱a̱nꞌ,
te̱ ni̱ xa̱ni̱ ra̱ a̱ nde̱e̱ ndo̱so̱ꞌ va̱ miiꞌ ni̱ ii̱n a̱ ja̱a̱nꞌ,
te̱ ni̱ tyi̱nduꞌu̱ꞌ ra̱ kivi̱ꞌ a̱ naniꞌ a̱ yu̱kunꞌ toto̱ miiꞌ nduuꞌ iinꞌ Ndiosí xiinꞌ ne̱ yivi̱ꞌ.
Te̱ yo̱o̱ ka̱ kuni kaka̱n ndee ka̱ ña̱ꞌa̱ nuu̱ꞌ Yahvé ndii,
kuní a̱ kuꞌu̱n ni̱a̱ nde̱e̱ ndo̱so̱ꞌ miiꞌ iinꞌ yu̱kunꞌ toto̱ ja̱a̱nꞌ.
8 Te̱ kii̱ꞌ kuaꞌa̱n Moisés miiꞌ iinꞌ yu̱kunꞌ toto̱ ja̱a̱nꞌ ndii,
ni̱ xi̱kuita̱ ndi̱tyi̱ sa̱kuuꞌ ne̱ yivi̱ꞌ yiꞌeꞌ vi̱ꞌe̱ toto̱ miiꞌ ndieeꞌ ni̱a̱,
te̱ xitoꞌ ni̱a̱ miiꞌ kuaꞌa̱n Moisés nde̱e̱ ndiꞌví ra̱ ti̱xi̱n yu̱kunꞌ toto̱ ja̱a̱nꞌ.
9 Te̱ kii̱ꞌ ndiꞌví Moisés ti̱xi̱n yu̱kunꞌ toto̱ ja̱a̱nꞌ ndii,
nuuꞌ viko̱ꞌ te̱ xikuiín a̱ yiꞌeꞌ yu̱kunꞌ toto̱ ja̱a̱nꞌ,
te̱ ndatuꞌunꞌ Yahvé xiinꞌ Moisés ti̱xi̱n yu̱kunꞌ ja̱a̱nꞌ.
10 Te̱ kii̱ꞌ xini ne̱ yivi̱ꞌ xikuiín viko̱ꞌ ja̱a̱nꞌ yiꞌeꞌ yu̱kunꞌ toto̱ ja̱a̱nꞌ ndii,
xikuitá xitiꞌ i̱ꞌi̱n ni̱a̱ yiꞌeꞌ vi̱ꞌe̱ toto̱ miiꞌ ndieeꞌ ni̱a̱ kiꞌinꞌ kaꞌnuꞌ ni̱a̱ Ndiosí.
11 Te̱ ndatuꞌunꞌ Yahvé xiinꞌ Moisés xitoꞌniꞌ a̱ nuu̱ꞌ ra̱ nde̱e̱ naa xaaꞌ ne̱ yivi̱ꞌ kii̱ꞌ ndatuꞌunꞌ ni̱a̱ xiinꞌ i̱i̱n ne̱ ndiakaꞌ taꞌanꞌ kutu̱ꞌ xiinꞌ ni̱a̱.
Ndi̱ꞌi̱ ja̱a̱nꞌ te̱ nandikoꞌ Moisés vi̱ꞌe̱ toto̱ miiꞌ nduꞌu̱ꞌ ra̱,
ndisu̱ Josué,
te̱ tyindieeꞌ ña̱ꞌaꞌ,
te̱ nduuꞌ siꞌe̱ Nun ndii,
köo̱ꞌ kivi̱ꞌ ni̱ ke̱ta̱ ra̱ ti̱xi̱n yu̱kunꞌ toto̱ ja̱a̱nꞌ.
Yoꞌoꞌ xini Moisés ña̱ nda̱tu̱nꞌ xa̱va̱ꞌa̱ kaaꞌ Ndiosí
12 Sa̱kanꞌ te̱ ni̱ kaꞌa̱n Moisés xiinꞌ Yahvé ndii:
―Kaꞌán ndi̱e̱eꞌ yoꞌó xiinꞌ i̱ ña̱ kuní a̱ ku̱ndi̱a̱ka̱ i̱ ne̱ yivi̱ꞌ kaa̱ꞌ kuꞌu̱n i̱,
ndisu̱ tiäꞌa̱an kaꞌa̱n u̱nꞌ xiinꞌ i̱ yo̱o̱ ki̱ꞌi̱n i̱tyiꞌ nuu̱ꞌ i̱ kuꞌu̱n i̱.
Te̱ kaꞌán tu̱ u̱nꞌ xiinꞌ i̱ ña̱ xiní kaxiꞌ u̱nꞌ yuꞌu̱,
te̱ xiní tu̱ u̱nꞌ kivi̱ꞌ i̱,
te̱ va̱ꞌa̱ kuni u̱nꞌ xini u̱nꞌ yuꞌu̱.
13 Naaꞌ ndi̱xa̱ xna̱ꞌa̱ ña̱ sa̱kanꞌ nduuꞌ a̱ ndii,
sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ yuꞌu̱ ndee ña̱ tyituní u̱nꞌ sa̱a̱ u̱nꞌ.
Sa̱kanꞌ te̱ ku̱nda̱ni̱ i̱ ña̱ xanini u̱nꞌ sa̱a̱ u̱nꞌ,
te̱ ku̱ni̱ i̱ ña̱ va̱ꞌa̱ kuni u̱nꞌ xini u̱nꞌ yuꞌu̱.
Te̱ xa̱ xiní u̱nꞌ ña̱ ne̱ vi̱ꞌe̱ i̱ Israel kaa̱ꞌ ndii,
kuenta mi̱iꞌ u̱nꞌ nduuꞌ ni̱a̱ ―ni̱ katyi̱ ra̱.
14 Te̱ ni̱ kaꞌa̱n Yahvé xiinꞌ ra̱ ndii:
―Mi̱iꞌ yuꞌu̱ kuꞌu̱n xiinꞌ u̱nꞌ,
te̱ ta̱xi̱ i̱ na̱ndiee̱ꞌ u̱nꞌ ―ni̱ katyi̱ a̱.
15 Te̱ ni̱ kaꞌa̱n Moisés xiinꞌ a̱ ndii:
―Naaꞌ küꞌu̱n yoꞌó xiinꞌ ndu̱ ndii,
nde̱e̱ tyaaꞌ ka̱ tä̱va̱ꞌ u̱nꞌ ndu̱ yoꞌoꞌ.
16 Naaꞌ küꞌu̱n yoꞌó xiinꞌ ndu̱ ndii,
¿sa̱a̱ ku̱vi̱ ku̱nda̱ni̱ yuꞌu̱ xiinꞌ i̱nga̱ ne̱ nduuꞌ kuenta u̱nꞌ ña̱ va̱ꞌa̱ ka̱ kuni u̱nꞌ xini u̱nꞌ ndu̱?
Te̱ xiinꞌ ña̱ yoo u̱nꞌ xiinꞌ ndu̱ ku̱vi̱ ku̱ni̱ i̱nga̱ ne̱ yivi̱ꞌ i̱i̱n yivi̱ꞌ ña̱ siinꞌ kuuꞌ ndu̱ te̱ sa̱kanꞌ ne̱ ja̱a̱nꞌ ―ni̱ katyi̱ ra̱.
17 Te̱ ni̱ kaꞌa̱n Yahvé xiinꞌ Moisés ndii:
―Sa̱a̱ i̱ ña̱ xikán u̱nꞌ nuu̱ꞌ i̱ ja̱a̱nꞌ xaꞌa̱ꞌ a̱ ña̱ va̱ꞌa̱ kuni i̱ xini i̱ yoꞌó,
te̱ xiní i̱ kivi̱ꞌ u̱nꞌ ―ni̱ katyi̱ a̱.
18 Te̱ ni̱ kaꞌa̱n Moisés xiinꞌ Yahvé ndii:
―Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ku̱ni̱ i̱ ña̱ kaꞌnuꞌ u̱nꞌ ―ni̱ katyi̱ ra̱.
19 Te̱ ni̱ kaꞌa̱n Yahvé xiinꞌ ra̱ ndii:
―Ta̱xi̱ yuꞌu̱ ku̱ni̱ u̱nꞌ sa̱kuuꞌ ña̱ kuvita i̱ni̱ i̱ xaꞌa̱ꞌ u̱nꞌ,
te̱ kaꞌa̱n tu̱ i̱ kivi̱ꞌ i̱,
Yahvé,
xiinꞌ u̱nꞌ.
Sa̱kanꞌ ña̱ ku̱nda̱ni̱ u̱nꞌ ña̱ kuvita i̱ni̱ i̱ xaꞌa̱ꞌ ne̱ kuní mi̱iꞌ i̱ ku̱vi̱ta i̱ni̱ i̱ xaꞌa̱ꞌ,
te̱ va̱ꞌa̱ ña̱ nduuꞌ i̱ xiinꞌ yo̱o̱ kuní mi̱iꞌ ku̱i̱ti̱ꞌ i̱.
20 Ndisu̱ kü̱vi̱ xa̱tyiꞌ ku̱ni̱ u̱nꞌ nuu̱ꞌ i̱,
sa̱kanꞌ ña̱ köo̱ꞌ nde̱e̱ i̱i̱n ne̱ yivi̱ꞌ ku̱vi̱ ku̱ti̱a̱ku̱ ka̱ naaꞌ ku̱ni̱ ni̱a̱ nuu̱ꞌ i̱.
21 Xi̱i̱nꞌ i̱ yoꞌoꞌ yoo i̱i̱n xaanꞌ xata̱ꞌ yuu̱ꞌ miiꞌ ku̱vi̱ ku̱i̱i̱n u̱nꞌ,
yoꞌoꞌ ku̱i̱i̱n u̱nꞌ
22 kii̱ꞌ xkaꞌndi̱a̱ i̱ xiinꞌ sa̱kuuꞌ ña̱ kaꞌnuꞌ i̱,
tyi̱naá i̱ yoꞌó miiꞌ ni̱ ndata̱ꞌ yuu̱ꞌ,
te̱ ti̱saꞌvi̱ nda̱ꞌaꞌ i̱ yoꞌó nde̱e̱ ska̱tyiꞌ ndi̱ꞌi̱ xkaꞌndi̱a̱ i̱.
23 Ndi̱ꞌi̱ ja̱a̱nꞌ te̱ sa̱nu̱ndiaꞌá i̱ nda̱ꞌaꞌ i̱,
te̱ ku̱vi̱ ku̱ni̱ u̱nꞌ xata̱ꞌ ku̱i̱ti̱ꞌ i̱,
ndisu̱ kü̱vi̱ ku̱ni̱ u̱nꞌ nuu̱ꞌ i̱ ―ni̱ katyi̱ a̱.