Yoꞌoꞌ kaꞌán a̱ xaꞌa̱ꞌ sa̱a̱ ka̱sa̱ꞌa̱ Moisés altar miiꞌ ka̱ꞌmi̱ sutu̱ su̱xa̱ tyu̱ꞌma
30
’Ka̱sa̱ꞌa̱ tu̱ u̱nꞌ i̱nga̱ altar xiinꞌ mi̱iꞌ ndiꞌiꞌ tunꞌ acacia miiꞌ ka̱ꞌmi̱ sutu̱ su̱xa̱ tyu̱ꞌma.
2 Ka̱sa̱ꞌa̱ titutunꞌ u̱nꞌ nu̱ꞌ ña̱ nani̱ꞌ nu̱ꞌ ndii,
uvi̱ kuarta kanuꞌ uni̱ taꞌan nuu̱ꞌ nda̱ꞌaꞌ ku̱u̱ a̱,
te̱ sa̱kanꞌ tu̱ ña̱ ndiká nu̱ꞌ,
te̱ i̱i̱n metro kanuꞌ i̱i̱n to̱o̱ ña̱ sukun nu̱ꞌ,
te̱ ka̱sa̱ꞌa̱ tu̱ u̱nꞌ ndi̱kiꞌ nu̱ꞌ i̱ꞌi̱n ku̱miꞌ sa̱aꞌ xiki̱ꞌ nu̱ꞌ,
te̱ i̱i̱n nda̱a̱ꞌ kuní a̱ ku̱ndu̱u̱ a̱ xiinꞌ altar ja̱a̱nꞌ.
3 Te̱ sa̱kutyiꞌ u̱nꞌ mi̱iꞌ ndiꞌiꞌ oro ka̱niiꞌ xata̱ꞌ nu̱ꞌ xiinꞌ ku̱miꞌ sa̱aꞌ ndi̱kiꞌ nu̱ꞌ,
te̱ ka̱sa̱ꞌa̱ tu̱ u̱nꞌ ka̱a̱ ndiki̱ xiinꞌ mi̱iꞌ ndiꞌiꞌ oro sa̱a̱ xinunduu yu̱ꞌuꞌ nu̱ꞌ.
4 Ka̱sa̱ꞌa̱ tu̱ u̱nꞌ uvi̱ taꞌan ka̱a̱ tivi̱ xiinꞌ mi̱iꞌ ndiꞌiꞌ oro tyi̱ndo̱ndi̱a̱ u̱nꞌ ta̱taꞌviꞌ xi̱i̱nꞌ nu̱ꞌ ti̱xi̱n a̱ miiꞌ ndikún ka̱a̱ ndiki̱ ña̱ kuaꞌa̱n yu̱ꞌuꞌ nu̱ꞌ,
te̱ ti̱xi̱n ka̱a̱ tivi̱ ja̱a̱nꞌ sa̱xkaꞌndíá ndo̱ꞌ i̱tunꞌ te̱ ku̱vi̱ ko̱ni̱ꞌi̱ ndo̱ꞌ a̱ kuꞌu̱n ndo̱ꞌ.
5 Te̱ i̱tunꞌ,
tunꞌ ki̱ꞌi̱ ka̱a̱ ja̱a̱nꞌ ndii,
xiinꞌ i̱tunꞌ acacia ka̱sa̱ꞌa̱ u̱nꞌ nu̱ꞌ,
te̱ sa̱kutyiꞌ u̱nꞌ oro ka̱niiꞌ xata̱ꞌ nu̱ꞌ.
6 Ndi̱ꞌi̱ ja̱a̱nꞌ te̱ tyi̱nduꞌu̱ꞌ u̱nꞌ altar miiꞌ ka̱ꞌmi̱ sutu̱ su̱xa̱ tyu̱ꞌma ja̱a̱nꞌ xtoꞌniꞌ miiꞌ taaꞌ toto̱ ndiká xi̱i̱nꞌ a̱ miiꞌ iinꞌ xatu̱nꞌ miiꞌ naá kuento ña̱ ni̱ ndoo̱ yuꞌu̱,
Ndiosí,
xiinꞌ ndo̱ꞌ,
nuu̱ꞌ vitu̱ꞌ tunꞌ ndasi yu̱ꞌuꞌ xatu̱nꞌ ja̱a̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ,
miiꞌ ndu̱i̱i̱n yuꞌu̱ xiinꞌ yoꞌó.
7 Sa̱a̱ ni̱a̱ꞌa̱ kii̱ꞌ sa̱kooꞌ tu̱ꞌva̱ Aarón sa̱kuuꞌ ka̱a̱ ña̱ tuún ndii,
kuní a̱ ka̱ꞌmi̱ ra̱ su̱xa̱ tyu̱ꞌma ña̱ xavixínꞌ va̱ nuu̱ꞌ altar ja̱a̱nꞌ.
8 Te̱ sa̱kanꞌ tu̱ sa̱a̱ xa̱kuaa̱ꞌ kii̱ꞌ sakooꞌ tu̱ꞌva̱ ra̱ ka̱a̱ tuún ja̱a̱nꞌ ndii,
kuní a̱ ka̱ꞌmi̱ ra̱ su̱xa̱ tyu̱ꞌma ña̱ xavixínꞌ va̱ nuu̱ꞌ altar ja̱a̱nꞌ.
Te̱ nde̱e̱ ndiꞌiꞌ ni̱ kivi̱ꞌ kuní a̱ sa̱a̱ sa̱kuuꞌ ne̱ yivi̱ꞌ ña̱ ja̱a̱nꞌ nuu̱ꞌ yuꞌu̱,
Yahvé.
9 Te̱ nä̱soko̱ꞌ u̱nꞌ nuu̱ꞌ altar ja̱a̱nꞌ nde̱e̱ i̱i̱n nuu̱ꞌ i̱nga̱ su̱xa̱ tyu̱ꞌma ña̱ kuäsa̱ꞌ ni̱ ku̱u̱ ñuꞌuꞌ,
ni̱ nde̱e̱ kä̱ꞌmi̱ tu̱ u̱nꞌ nde̱e̱ i̱i̱n ki̱tiꞌ,
ni̱ nde̱e̱ nä̱soko̱ꞌ tu̱ u̱nꞌ nde̱e̱ i̱i̱n nuu̱ꞌ ndi̱kinꞌ,
ni̱ nde̱e̱ nä̱soko̱ꞌ tu̱ u̱nꞌ nde̱e̱ i̱i̱n nuu̱ꞌ vino.
10 Untaꞌ ku̱i̱ti̱ꞌ i̱ꞌi̱n kuiya̱ kuní a̱ sa̱ndo̱o̱ Aarón altar ja̱a̱nꞌ ka̱ki̱n ra̱ níiꞌ ki̱tiꞌ nuu̱ꞌ ndi̱kiꞌ a̱,
tiꞌ ni̱ xa̱ꞌni̱ꞌ ra̱ nasoko̱ꞌ ra̱ xaꞌa̱ꞌ ku̱a̱tyi̱ ne̱ yivi̱ꞌ,
te̱ ko̱o̱ kaꞌnuꞌ i̱ni̱ yuꞌu̱,
Ndiosí,
xaꞌa̱ꞌ ku̱a̱tyi̱ ni̱a̱.
Te̱ nde̱e̱ ndiꞌiꞌ ni̱ kivi̱ꞌ kuní a̱ na̱soko̱ꞌ ne̱ yivi̱ꞌ nuu̱ꞌ altar tyié ña iinꞌ ki̱ꞌe̱ ña̱ ja̱a̱nꞌ nuu̱ꞌ yuꞌu̱,
Ndiosí,
sa̱kanꞌ ña̱ altar siee ña̱ iinꞌ ti̱xi̱n vi̱ꞌe̱ toto̱ yoꞌoꞌ ndii,
ña̱ su̱ꞌu̱n va̱ nduuꞌ a̱ xaꞌa̱ꞌ yuꞌu̱,
Yahvé.
Yoꞌoꞌ kaꞌán Ndiosí ña̱ kuní a̱ tya̱ꞌvi̱ te̱ vi̱ꞌe̱ Israel xu̱ꞌunꞌ xaniꞌ xaꞌa̱ꞌ yu̱kunꞌ kaꞌnuꞌ
11 Sa̱kanꞌ te̱ ni̱ kaꞌa̱n ka̱ Yahvé xiinꞌ Moisés ndii:
12 ―Kii̱ꞌ ndiee̱ sa̱kuuꞌ te̱ vi̱ꞌe̱ Israel tu̱tu̱ sa̱a̱ u̱nꞌ ndii,
kuní a̱ tya̱ꞌvi̱ i̱ꞌi̱n te̱ yivi̱ꞌ,
te̱ ndiee̱ tu̱tu̱ nda̱ꞌaꞌ yuꞌu̱,
Yahvé,
xaꞌa̱ꞌ kivi̱ꞌ ñu̱u̱ ra̱ te̱ sa̱kakú ña̱ꞌaꞌ i̱,
saa̱ꞌ i̱i̱n kii̱ꞌ te̱ ti̱ꞌviꞌ i̱ kuiꞌe̱ xatu̱ ku̱ndo̱ꞌo̱ ra̱ xaꞌa̱ꞌ a̱ ña̱ ni̱ ndiee̱ ra̱ tu̱tu̱ ja̱a̱nꞌ.
13 I̱ꞌi̱n te̱ yivi̱ꞌ,
te̱ ni̱ ndiee̱ tu̱tu̱ ndii,
kuní a̱ tya̱ꞌvi̱ꞌ ra̱ nda̱ꞌaꞌ yuꞌu̱,
Yahvé,
xiinꞌ siee xu̱ꞌunꞌ plata.
Te̱ xu̱ꞌunꞌ ja̱a̱nꞌ ndii,
taꞌvi̱ꞌ sa̱va̱ ku̱i̱ti̱ꞌ xu̱ꞌunꞌ yoo̱ꞌ ña̱ tyaꞌvi̱ ra̱ xaꞌa̱ꞌ yu̱kunꞌ kuuꞌ a̱.
14 Sa̱kuuꞌ te̱ yivi̱ꞌ,
te̱ xa̱ kumiꞌ oko̱ kuiya̱,
te̱ ni̱ nako̱so̱ꞌ ra̱ ndii,
kuní a̱ tya̱ꞌvi̱ꞌ ra̱ nda̱ꞌaꞌ yuꞌu̱,
Yahvé,
xu̱ꞌunꞌ ja̱a̱nꞌ.
15 Te̱ kii̱ꞌ tya̱ꞌvi̱ i̱ꞌi̱n ndo̱ꞌ xu̱ꞌunꞌ ja̱a̱nꞌ nda̱ꞌaꞌ yuꞌu̱,
Yahvé,
xaꞌa̱ꞌ kivi̱ꞌ ñu̱u̱ ndo̱ꞌ ndii,
ni̱ nde̱e̱ te̱ vikaꞌ tyä̱ꞌvi̱ kuaꞌa̱ꞌ ka̱ xu̱ꞌunꞌ plata,
ni̱ nde̱e̱ te̱ ndaꞌvi kuuꞌ tyä̱ꞌvi̱ siee ka̱ xu̱ꞌunꞌ plata.
Süu̱ꞌ ja̱a̱nꞌ ndii,
i̱i̱n katyi kuuꞌ a̱ tya̱ꞌvi̱ sa̱kuuꞌ ndo̱ꞌ te̱ ko̱o̱ kaꞌnu̱ꞌ i̱ni̱ i̱ xaꞌa̱ꞌ ku̱a̱tyi̱ ndo̱ꞌ,
te nda̱sa̱ ndo̱o̱ i̱ ndoꞌó.
16 Yoꞌó na̱ti̱i̱n xu̱ꞌunꞌ ña̱ tya̱ꞌvi̱ te̱ vi̱ꞌe̱ Israel xaꞌa̱ꞌ kivi̱ꞌ ñu̱u̱ ra̱,
te̱ na̱ta̱xi̱ u̱nꞌ u̱nꞌ nda̱ꞌaꞌ sutu̱,
te̱ xatyuunꞌ ti̱xi̱n yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ,
te̱ xa̱ ndi̱ti̱a̱ yu̱kunꞌ ja̱a̱nꞌ ku̱ndu̱u̱ sa̱kuuꞌ a̱.
Te̱ ña̱ ja̱a̱nꞌ sa̱a̱ sa̱kanꞌ te̱ na̱ka̱ꞌanꞌ yuꞌu̱,
Yahvé,
xaꞌa̱ꞌ ña̱ ni̱ tya̱ꞌvi̱ te̱ vi̱ꞌe̱ Israel ja̱a̱nꞌ nda̱ꞌaꞌ i̱ xaꞌa̱ꞌ kivi̱ꞌ ñu̱u̱ ra̱.
Yoꞌoꞌ kaꞌán xaꞌa̱ꞌ xi̱koꞌoꞌ ña̱ ku̱a̱ꞌa̱ xiinꞌ mi̱iꞌ ndiꞌiꞌ ka̱a̱ bronce miiꞌ ku̱naa̱ ti̱kui natiaꞌ ne̱ yivi̱ꞌ nda̱ꞌaꞌ ni̱a̱ xiinꞌ xaꞌa̱ꞌ ni̱a̱
17 Sa̱kanꞌ te̱ ni̱ kaꞌa̱n ka̱ Yahvé xiinꞌ Moisés ndii:
18 ―Ka̱sa̱ꞌa̱ tu̱ u̱nꞌ i̱i̱n pila xiinꞌ mi̱iꞌ ndiꞌiꞌ ka̱a̱ bronce miiꞌ ku̱naa̱ ti̱kui na̱ti̱a̱ ndo̱ꞌ nda̱ꞌaꞌ ndo̱ꞌ xiinꞌ xaꞌa̱ꞌ ndo̱ꞌ,
te̱ ka̱sa̱ꞌa̱ tu̱ u̱nꞌ xaꞌa̱ꞌ a̱ xiinꞌ mi̱iꞌ ndiꞌiꞌ ka̱a̱ bronce.
Te̱ ka̱ni̱ u̱nꞌ u̱n ma̱ꞌiꞌ miiꞌ iinꞌ yiꞌeꞌ vi̱ꞌe̱ toto̱ miiꞌ nduuꞌ iinꞌ i̱ xiinꞌ ndo̱ꞌ xiinꞌ miiꞌ iinꞌ altar,
te̱ ta̱a̱nꞌ u̱nꞌ ti̱kui ti̱xi̱n a̱.
19 Te̱ ti̱kui,
teꞌ naá i̱kanꞌ,
na̱ti̱a̱ Aarón xiinꞌ tiaa̱ siꞌe̱ ra̱ nda̱ꞌaꞌ ra̱ xiinꞌ xaꞌa̱ꞌ ra̱.
20 Te̱ i̱ꞌi̱n i̱tyiꞌ kii̱ꞌ ndiꞌvi̱ ra̱ ti̱xi̱n yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ uun kii̱ꞌ kuꞌu̱n ra̱ nuu̱ꞌ altar te̱ ka̱ꞌmi̱ ra̱ tu̱mani̱ꞌ ña̱ nasoko̱ꞌ ra̱ nuu̱ꞌ yuꞌu̱,
Yahvé,
ndii,
kuní a̱ na̱ti̱a̱ ra̱ nda̱ꞌaꞌ ra̱ xiinꞌ xaꞌa̱ꞌ ra̱,
sa̱kanꞌ ña̱ naaꞌ nä̱ti̱a̱ ra̱ a̱ ndii,
ku̱vi̱ ra̱.
21 Kuní a̱ na̱ti̱a̱ ra̱ nda̱ꞌaꞌ ra̱ xiinꞌ xaꞌa̱ꞌ ra̱ te̱ kü̱vi̱ ra̱,
te̱ nde̱iꞌ ja̱a̱nꞌ ku̱ndiku̱n Aarón sa̱a̱ ra̱ xiinꞌ tiaa̱ siꞌe̱ ra̱ nde̱e̱ ndiꞌiꞌ ni̱ kivi̱ꞌ ―ni̱ katyi̱ a̱.
Yoꞌoꞌ kaꞌán xaꞌa̱ꞌ xa̱ꞌa̱n oliva su̱ꞌu̱n ña̱ tiinꞌ sutu̱ te̱ sañuꞌuꞌ ra̱
22 Te̱ ni̱ kaꞌa̱n ka̱ Yahvé xiinꞌ Moisés ndii:
23 ―Na̱ndu̱kuꞌ ndiaꞌviꞌ nuu̱ꞌ kuꞌu̱ xavixínꞌ ña̱ va̱ꞌa̱ xa̱va̱ꞌa̱:
yatinꞌ iñu̱ kilo xa̱ꞌa̱n mirra,
xiinꞌ yatinꞌ uni̱ kilo canela xavixínꞌ,
xiinꞌ yatinꞌ uni̱ kilo tu̱ i̱ti̱a̱ xavixínꞌ ña̱ naniꞌ calamo,
ña̱ yoo ndo̱ꞌyo̱,
24 xiinꞌ iñu̱ kilo soo̱ꞌ i̱tunꞌ casia,
xiinꞌ ku̱miꞌ litro xa̱ꞌa̱n oliva sa̱a̱ niiꞌ kuuꞌ a̱ xikuitá kuaꞌa̱n yu̱kunꞌ kaꞌnuꞌ.
25 Te̱ xiinꞌ sa̱kuuꞌ ña̱ ja̱a̱nꞌ ka̱sa̱ꞌa̱ u̱nꞌ i̱i̱n nuu̱ꞌ xa̱ꞌa̱n su̱ꞌu̱n xavixínꞌ xa̱va̱ꞌa̱ nde̱e̱ naa xaaꞌ te̱ tyu̱u̱n va̱ xaꞌa xa̱ꞌa̱n xavixínꞌ.
Te̱ ña̱ ja̱a̱nꞌ ku̱ndu̱u̱ xa̱ꞌa̱n su̱ꞌu̱n ña̱ ti̱i̱n u̱nꞌ te̱ sa̱ñuꞌuꞌ u̱nꞌ.
26 Te̱ xiinꞌ xa̱ꞌa̱n ja̱a̱nꞌ sa̱ñuꞌuꞌ u̱nꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ,
xiinꞌ xatu̱nꞌ miiꞌ naá kuento ña̱ ni̱ ndoo̱ i̱ xiinꞌ ndo̱ꞌ,
27 xiinꞌ xa̱ꞌa̱n ja̱a̱nꞌ sa̱ñuꞌuꞌ tu̱ u̱nꞌ mesa,
xiinꞌ sa̱kuuꞌ nda̱tyuunꞌ ña̱ ndieeꞌ nuu̱ꞌ nu̱ꞌ,
xiinꞌ kandelabro,
xiinꞌ sa̱kuuꞌ nda̱tyuunꞌ ña̱ nitaꞌanꞌ xiinꞌ a̱,
xiinꞌ xa̱ꞌa̱n ja̱a̱nꞌ sa̱ñuꞌuꞌ tu̱ u̱nꞌ altar miiꞌ xixí su̱xa̱ tyu̱ꞌma.
28 Xiinꞌ xa̱ꞌa̱n ja̱a̱nꞌ sa̱ñuꞌuꞌ tu̱ u̱nꞌ altar miiꞌ nasoko̱ꞌ ndo̱ꞌ ki̱tiꞌ,
tiꞌ xixí xa̱tyiꞌ,
te̱ sa̱ñuꞌuꞌ tu̱ u̱nꞌ sa̱kuuꞌ nda̱tyuunꞌ ña̱ nitaꞌanꞌ xiinꞌ a̱,
te̱ sa̱ñuꞌuꞌ tu̱ u̱nꞌ pila xiinꞌ xaꞌa̱ꞌ a̱ miiꞌ naá ti̱kui natiaꞌ ndo̱ꞌ nda̱ꞌaꞌ ndo̱ꞌ xiinꞌ xaꞌa̱ꞌ ndo̱ꞌ.
29 Te̱ xiinꞌ ña̱ ja̱a̱nꞌ sa̱ñuꞌuꞌ u̱nꞌ u̱n te̱ ku̱ndu̱u̱ a̱ ña̱ su̱ꞌu̱n xa̱va̱ꞌa̱,
te̱ yo̱o̱ ka̱ tondi̱a̱ nda̱ꞌaꞌ ña̱ ja̱a̱nꞌ ndii,
na̱ndu̱u̱ su̱ꞌu̱n ni̱a̱.
30 ’Te̱ sa̱kaaꞌ tu̱ u̱nꞌ xa̱ꞌa̱n ja̱a̱nꞌ xíniꞌ Aarón,
ña̱ni̱ u̱nꞌ,
xiinꞌ siꞌe̱ ra̱,
te̱ sa̱ñuꞌuꞌ ña̱ꞌaꞌ u̱nꞌ te̱ ku̱ndu̱u̱ ra̱ sutu̱ ka̱ka̱ nu̱u̱ nuu̱ꞌ i̱.
31 Te̱ ña̱ yo̱ꞌo̱ꞌ kaꞌa̱n u̱nꞌ xiinꞌ ne̱ vi̱ꞌe̱ Israel ndii:
“Nde̱e̱ vi̱ti̱n,
te̱ nde̱e̱ nuu̱ꞌ kuꞌu̱n e̱ꞌ ndii,
ña̱ yo̱ꞌo̱ꞌ ku̱ndu̱u̱ xa̱ꞌa̱n su̱ꞌu̱n ña̱ ti̱i̱n ndo̱ꞌ te̱ sa̱ñuꞌuꞌ ndo̱ꞌ.
32 Ndisu̱ köo̱ꞌ kivi̱ꞌ ti̱i̱n ndo̱ꞌ xa̱ꞌa̱n kaa̱ꞌ te̱ koso̱ ndo̱ꞌ a̱ i̱i̱nꞌ ndiaaꞌ ka̱ te̱ yivi̱ꞌ,
ni̱ nde̱e̱ kä̱sa̱ꞌa̱ tu̱ ndo̱ꞌ i̱nga̱ xa̱ꞌa̱n xavixínꞌ ña̱ nakuitá xiinꞌ ña̱ kaa̱ꞌ.
Sa̱kanꞌ ña̱ i̱i̱n nuu̱ꞌ xa̱ꞌa̱n su̱ꞌu̱n va̱ nduuꞌ a̱,
te̱ sa̱kanꞌ kuní a̱ ku̱u̱ ndo̱ꞌ xiinꞌ a̱.
33 Te̱ yo̱o̱ ka̱ ka̱sa̱ꞌa̱ xa̱ꞌa̱n naa ña̱ kaa̱ꞌ uun yo̱o̱ ka̱ koso̱ xa̱ꞌa̱n kaa̱ꞌ i̱i̱nꞌ te̱ yivi̱ꞌ,
te̱ kuäsa̱ꞌ nduuꞌ sutu̱ ndii,
kuní a̱ ka̱ꞌni̱ꞌ ña̱ꞌaꞌ ne̱ ñu̱u̱ ra̱” ― ni̱ katyi̱ a̱.
Yoꞌoꞌ kaꞌán a̱ xaꞌa̱ꞌ sa̱a̱ ku̱va̱ꞌa̱ su̱xa̱ tyu̱ꞌma
34 Sa̱kanꞌ te̱ ni̱ kaꞌa̱n ka̱ Yahvé xiinꞌ Moisés ndii:
―Na̱ka̱ya̱ tu̱ u̱nꞌ kiꞌinꞌ nuu̱ꞌ kuꞌu̱ xavixínꞌ,
naa kuuꞌ su̱xa̱ xavixínꞌ,
xiinꞌ tiꞌe̱ꞌ xata̱ꞌ ti̱ꞌva,
xiinꞌ si̱ku̱i̱,
tunꞌ naniꞌ gálbano,
te̱ na̱saka̱ꞌ u̱nꞌ sa̱kuuꞌ ña̱ ja̱a̱nꞌ xiinꞌ mi̱iꞌ ndiꞌiꞌ su̱xa̱ tyu̱ꞌma ña̱ va̱ꞌa̱ xa̱va̱ꞌa̱,
te̱ i̱i̱n katyi kuuꞌ i̱ꞌi̱n nuu̱ꞌ a̱ na̱saka̱ꞌ u̱nꞌ.
35 Te̱ nda̱sa̱i̱i̱n u̱nꞌ sa̱kuuꞌ a̱ xiinꞌ ii̱nꞌ,
te̱ ka̱sa̱ꞌa̱ u̱nꞌ i̱i̱n nuu̱ꞌ xa̱ꞌa̱n su̱ꞌu̱n ña̱ ndo̱o̱ va̱,
te̱ xavixínꞌ xa̱va̱ꞌa̱ ko̱o̱ a̱.
Sa̱a̱ u̱nꞌ nde̱e̱ naa xaaꞌ i̱i̱n te̱ xaꞌa ti̱kui xavixínꞌ kii̱ꞌ xa̱va̱ꞌa̱ ra̱ ti̱kui xavixínꞌ.
36 Te̱ ndi̱ko̱ ndiꞌi̱ xa̱va̱ꞌa̱ u̱nꞌ tyaaꞌ su̱xa̱ tyu̱ꞌma ja̱a̱nꞌ,
te̱ tyi̱ndi̱e̱e̱ u̱nꞌ u̱n ya̱ti̱n miiꞌ iinꞌ xatu̱nꞌ miiꞌ naá kuento ña̱ ni̱ ndoo̱ yuꞌu̱,
Yahvé,
xiinꞌ ndo̱ꞌ,
ti̱xi̱n yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ,
te̱ ikanꞌ tu̱ ndu̱i̱i̱n i̱ xiinꞌ yoꞌó.
Te̱ su̱xa̱ tyu̱ꞌma ja̱a̱nꞌ ndii,
i̱i̱n ña̱ su̱ꞌu̱n xa̱va̱ꞌa̱ nduuꞌ a̱ nuu̱ꞌ ndo̱ꞌ.
37 Sa̱kanꞌ na kuiiꞌ nde̱e̱ i̱i̱n ndo̱ꞌ tï̱i̱n kuꞌu̱ xavixínꞌ ja̱a̱nꞌ te̱ ka̱sa̱ꞌa̱ ndo̱ꞌ xa̱ꞌa̱n xavixínꞌ naa ña̱ ja̱a̱nꞌ xaꞌa̱ꞌ mi̱iꞌ ndo̱ꞌ,
sa̱kanꞌ ña̱ i̱i̱n nuu̱ꞌ xa̱ꞌa̱n su̱ꞌu̱n va̱ ndi̱ti̱a̱ yuꞌu̱,
Yahvé ku̱i̱ti̱ꞌ,
nduuꞌ a̱,
te̱ ña̱ su̱ꞌu̱n va̱ kuní a̱ ku̱ndu̱u̱ a̱ nuu̱ꞌ ndoꞌó.
38 Te̱ yo̱o̱ ka̱ ka̱sa̱ꞌa̱ xa̱ꞌa̱n xavixínꞌ naa ña̱ ja̱a̱nꞌ xaꞌa̱ꞌ mi̱iꞌ ni̱a̱ ndii,
kuní a̱ ka̱ꞌni̱ꞌ ña̱ꞌaꞌ ne̱ ñu̱u̱ ni̱a̱ ― ni̱ katyi̱ a̱.