So̱ꞌo̱ sa̱a̱ Moisés kii̱ꞌ sa̱ñuꞌuꞌ ra̱ Aarón xiinꞌ sa̱kuuꞌ tiaa̱ siꞌe̱ ra̱ te̱ ku̱ndu̱u̱ ra̱ sutu̱
29
Te̱ ni̱ na̱kaa̱ ka̱ Ndiosí kaꞌán a̱ xiinꞌ Moisés ndii:
―Kii̱ꞌ sa̱ñuꞌuꞌ u̱nꞌ sutu̱ te̱ ku̱ndu̱u̱ ra̱ ndi̱ti̱a̱ i̱ ndii,
ña̱ yo̱ꞌo̱ꞌ nduuꞌ ña̱ kuní a̱ sa̱a̱ u̱nꞌ:
ki̱ꞌi̱n u̱nꞌ i̱i̱n si̱ndiki̱ꞌ tiakiꞌ xiinꞌ uvi̱ taꞌan mbe̱e̱ tyiee̱,
tiꞌ va̱ꞌa̱ va̱ iinꞌ.
2 Te̱ ki̱ꞌi̱n tu̱ u̱nꞌ ndiaꞌviꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ,
xiinꞌ xita̱ꞌ va̱ꞌa̱ kukunꞌ ña̱ saká xa̱ꞌa̱n oliva xiinꞌ,
xiinꞌ tiki̱nꞌ,
tiꞌ ni̱ xa̱ki̱n ne̱ yivi̱ꞌ xa̱ꞌa̱n xata̱ꞌ.
3 Te̱ ta̱a̱nꞌ u̱nꞌ sa̱kuuꞌ ña̱ ja̱a̱nꞌ ti̱xi̱n i̱i̱n ika̱ꞌ siee,
te̱ na̱soko̱ꞌ u̱nꞌ u̱n nuu̱ꞌ i̱ yiꞌeꞌ yu̱kunꞌ,
xiinꞌ si̱ndiki̱ꞌ tiakiꞌ,
xiinꞌ uvi̱ sa̱aꞌ mbe̱e̱ tyiee̱.
4 ’Ndiꞌiꞌ ja̱a̱nꞌ te̱ kuꞌu̱n u̱nꞌ xiinꞌ Aarón xiinꞌ siꞌe̱ ra̱ ki̱ꞌe̱ yiꞌeꞌ yu̱kunꞌ toto̱ miiꞌ nduuꞌ iinꞌ xiinꞌ ndo̱ꞌ,
te̱ i̱kanꞌ sa̱kutyiꞌ ña̱ꞌaꞌ u̱nꞌ xiinꞌ ti̱kui.
5 Sa̱kanꞌ te̱ ki̱ꞌi̱n u̱nꞌ sa̱kuuꞌ toto̱ ña̱ niꞌnuꞌ sutu̱,
te̱ sa̱na̱kuiꞌnú u̱nꞌ u̱n Aarón naa kuuꞌ toto̱ ndiká ña̱ nakú nda̱ꞌaꞌ ña̱ nani̱ꞌ,
xiinꞌ toto̱ nani̱ꞌ ndi̱ꞌeꞌ,
xiinꞌ soo̱ꞌ ti̱koo̱ꞌ,
xiinꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ ra̱.
Ndi̱ꞌi̱ ja̱a̱nꞌ te̱ sa̱tiín u̱nꞌ to̱koꞌ ra̱ toto̱ nii̱ꞌ ña̱ taniꞌ yu̱ꞌuꞌ soo̱ꞌ ti̱koo̱ꞌ ja̱a̱nꞌ.
6 Te̱ tyi̱nduꞌu̱ꞌ tu̱ u̱nꞌ xini̱ꞌ siee xíniꞌ ra̱,
te̱ xata̱ꞌ xini̱ꞌ ja̱a̱nꞌ tyi̱nduꞌu̱ꞌ u̱nꞌ ka̱a̱ yaxinꞌ ña̱ su̱ꞌu̱n,
ña̱ niaꞌá ña̱ sutu̱ nduuꞌ ra̱.
7 Ndi̱ꞌi̱ ja̱a̱nꞌ te̱ sa̱ñuꞌuꞌ ña̱ꞌaꞌ u̱nꞌ sa̱kaaꞌ u̱nꞌ xa̱ꞌa̱n oliva ñuꞌuꞌ xíniꞌ ra̱.
8 Ndi̱ꞌi̱ ja̱a̱nꞌ te̱ sa̱ku̱yatinꞌ u̱nꞌ sa̱kuuꞌ tiaa̱ siꞌe̱ ra̱,
te̱ sa̱na̱kuiꞌnú tu̱ u̱nꞌ te̱ ja̱a̱nꞌ toto̱ ndiká nani̱ꞌ ja̱a̱nꞌ.
9 Te̱ sa̱tiín tu̱ u̱nꞌ toto̱ níiꞌ to̱koꞌ Aarón,
te̱ sa̱tiín tu̱ u̱nꞌ u̱n to̱koꞌ tiaa̱ siꞌe̱ ra̱,
te̱ tyi̱ndi̱e̱e̱ tu̱ u̱nꞌ xini̱ꞌ kualiꞌ xíniꞌ sa̱kuuꞌ ra̱.
Sa̱kanꞌ te̱ xiinꞌ ña̱ ja̱a̱nꞌ ta̱xi̱ u̱nꞌ ndi̱e̱e̱ꞌ ra̱ te̱ ku̱ndu̱u̱ ra̱ sutu̱ nde̱e̱ ndiꞌiꞌ ni̱ kivi̱ꞌ.
10 ’Sa̱ku̱yatinꞌ u̱nꞌ si̱ndiki̱ꞌ tiakiꞌ yiꞌeꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ,
sa̱kanꞌ te̱ tyi̱nduꞌu̱ꞌ Aarón xiinꞌ sa̱kuuꞌ tiaa̱ siꞌe̱ ra̱ nda̱ꞌaꞌ ra̱ xíniꞌ riꞌ
11 Ndi̱ꞌi̱ ja̱a̱nꞌ te̱ ka̱ꞌni̱ꞌ ra̱ si̱ndiki̱ꞌ ja̱a̱nꞌ nuu̱ꞌ yuꞌu̱,
Yahvé,
yiꞌeꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ ja̱a̱nꞌ.
12 Ki̱ꞌi̱n u̱nꞌ siee níiꞌ si̱ndiki̱ꞌ ja̱a̱nꞌ xiinꞌ nuu̱ꞌ nda̱ꞌaꞌ u̱nꞌ te̱ ka̱ki̱n u̱nꞌ u̱n xíniꞌ ndi̱kiꞌ ña̱ yoo nuu̱ꞌ altar ja̱a̱nꞌ,
te̱ sa̱kuuꞌ níiꞌ tiꞌ ja̱a̱nꞌ ndii,
xaꞌa̱ꞌ altar ja̱a̱nꞌ ka̱ti̱a̱ u̱nꞌ u̱n.
13 Te̱ nuu̱ꞌ altar ja̱a̱nꞌ tu̱ ka̱ꞌmi̱ u̱nꞌ sa̱kuuꞌ xa̱ꞌa̱n ña̱ ndisuku̱ꞌ xata̱ꞌ xi̱ti̱ riꞌ xiinꞌ xa̱ꞌa̱n ña̱ ndondia xata̱ꞌ xata̱ꞌ xa̱ꞌaꞌ riꞌ,
te̱ ka̱ꞌmi̱ tu̱ u̱nꞌ uvi̱ sa̱aꞌ mboki̱ riꞌ xiinꞌ xa̱ꞌa̱n ña̱ ndondia xata̱ꞌ a̱.
14 Ndisu̱ nde̱i̱ꞌ si̱ndiki̱ꞌ ja̱a̱nꞌ,
xiinꞌ i̱i̱nꞌ xata̱ꞌ riꞌ,
xiinꞌ si̱ꞌviꞌ riꞌ ndii,
ka̱ꞌmi̱ xa̱tyiꞌ u̱nꞌ sa̱kuuꞌ a̱ nuu̱ꞌ kuꞌu̱ ya̱ti̱n miiꞌ iinꞌ vi̱ꞌe̱ toto̱ ja̱a̱nꞌ,
sa̱kanꞌ ña̱ tu̱mani̱ꞌ ña̱ nasoko̱ꞌ ndo̱ꞌ xaꞌa̱ꞌ ku̱a̱tyi̱ ndo̱ꞌ nduuꞌ ña̱ ja̱a̱nꞌ.
15 ’Te̱ ki̱ꞌi̱n tu̱ u̱nꞌ i̱i̱n mbe̱e̱ tyiee̱,
tiꞌ uvi̱,
sa̱kanꞌ te̱ tyi̱nduꞌu̱ꞌ Aarón xiinꞌ tiaa̱ siꞌe̱ ra̱ nda̱ꞌaꞌ ra̱ xíniꞌ riꞌ.
16 Ndi̱ꞌi̱ ja̱a̱nꞌ te̱ ka̱ꞌni̱ꞌ u̱nꞌ riꞌ,
te̱ ka̱ti̱a̱ liki̱nꞌ u̱nꞌ níiꞌ riꞌ sa̱a̱ xinunduu xi̱i̱nꞌ altar.
17 Sa̱kanꞌ te̱ sa̱kuatyiꞌ u̱nꞌ sa̱kuuꞌ nde̱i̱ꞌ mbe̱e̱ tyiee̱ ja̱a̱nꞌ,
te̱ na̱ti̱a̱ tu̱ u̱nꞌ xi̱ti̱ riꞌ,
xiinꞌ si̱ꞌi̱n riꞌ,
te̱ tyi̱ndi̱e̱e̱ u̱nꞌ sa̱kuuꞌ a̱ xi̱i̱nꞌ xíniꞌ riꞌ xiinꞌ sa̱kuuꞌ nde̱i̱ꞌ riꞌ ña̱ ni̱ sa̱kuatyiꞌ u̱nꞌ ja̱a̱nꞌ.
18 Ndi̱ꞌi̱ ja̱a̱nꞌ te̱ ka̱ꞌmi̱ u̱nꞌ ka̱niiꞌ riꞌ nuu̱ꞌ altar,
sa̱kanꞌ ña̱ i̱i̱n nuu̱ꞌ tu̱mani̱ꞌ xavixínꞌ va̱ nduuꞌ riꞌ nuu̱ꞌ yuꞌu̱,
Yahvé.
Te̱ xiinꞌ ña̱ ja̱a̱nꞌ kiꞌinꞌ kaꞌnuꞌ ndo̱ꞌ yuꞌu̱,
te̱ nduuꞌ tu̱ a̱ i̱i̱n ña̱ nasoko̱ꞌ,
ña̱ xaꞌmiꞌ ndo̱ꞌ xaꞌa̱ꞌ a̱ ña̱ kiꞌinꞌ kaꞌnuꞌ ndo̱ꞌ yuꞌu̱,
Yahvé.
19 ’Sa̱kanꞌ te̱ ki̱ꞌi̱n u̱nꞌ i̱nga̱ mbe̱e̱ tyiee̱ ja̱a̱nꞌ,
te̱ tyi̱nduꞌu̱ꞌ Aarón xiinꞌ sa̱kuuꞌ tiaa̱ siꞌe̱ ra̱ nda̱ꞌaꞌ ra̱ xíniꞌ riꞌ.
20 Ndi̱ꞌi̱ ja̱a̱nꞌ,
te̱ ka̱ꞌni̱ꞌ u̱nꞌ mbe̱e̱ tyiee̱ ja̱a̱nꞌ,
te̱ ki̱ꞌi̱n u̱nꞌ siee níiꞌ riꞌ,
te̱ ka̱ki̱n u̱nꞌ u̱n yu̱ꞌuꞌ so̱ꞌo̱ ku̱a̱ꞌa̱ Aarón xiinꞌ sa̱kuuꞌ tiaa̱ siꞌe̱ ra̱.
Te̱ ka̱ki̱n tu̱ u̱nꞌ níiꞌ ja̱a̱nꞌ nuu̱ꞌ nda̱ꞌaꞌ tyiee̱ ku̱a̱ꞌa̱ Aarón,
te̱ sa̱kanꞌ tu̱ sa̱kuuꞌ tiaa̱ siꞌe̱ ra̱.
Te̱ ka̱ki̱n tu̱ u̱nꞌ níiꞌ ja̱a̱nꞌ nuu̱ꞌ xaꞌa̱ꞌ tyiee̱ ku̱a̱ꞌa̱ sa̱kuuꞌ ra̱.
Ndi̱ꞌi̱ ja̱a̱nꞌ te̱ ka̱ti̱a̱ liki̱nꞌ u̱nꞌ níiꞌ riꞌ sa̱a̱ xinunduu xi̱i̱nꞌ altar ja̱a̱nꞌ.
21 Sa̱kanꞌ te̱ ki̱ꞌi̱n u̱nꞌ siee níiꞌ ña̱ ni̱ ndoo̱ ndieeꞌ xata̱ꞌ altar ja̱a̱nꞌ,
te̱ ki̱ꞌi̱n tu̱ u̱nꞌ siee xa̱ꞌa̱n ñuꞌuꞌ oliva ña̱ ndieeꞌ xata̱ꞌ altar ja̱a̱nꞌ,
te̱ ko̱ndi̱a̱ liki̱nꞌ u̱nꞌ u̱n xata̱ꞌ Aarón,
xiinꞌ xata̱ꞌ tiaa̱ siꞌe̱ ra̱,
xiinꞌ xata̱ꞌ toto̱ ña̱ niꞌnuꞌ sa̱kuuꞌ ra̱,
sa̱kanꞌ te̱ ndoo̱ sa̱kuuꞌ ra̱ ku̱ndu̱u̱ ra̱ te̱ ñuꞌuꞌ ndi̱ti̱a̱ i̱,
te̱ sa̱kanꞌ tu̱ toto̱ Aarón xiinꞌ toto̱ tiaa̱ siꞌe̱ ra̱ ja̱a̱nꞌ.
22 ’Ndi̱ꞌi̱ ja̱a̱nꞌ te̱ ki̱ꞌi̱n u̱nꞌ xa̱ꞌa̱n ña̱ yoo suꞌma̱ꞌ riꞌ,
xiinꞌ xa̱ꞌa̱n ña̱ ndisuku̱ꞌ xata̱ꞌ xi̱ti̱ riꞌ,
xiinꞌ xa̱ꞌa̱n ña̱ ndisuku̱ꞌ xata̱ꞌ xata̱ꞌ xa̱ꞌaꞌ riꞌ,
te̱ ki̱ꞌi̱n tu̱ u̱nꞌ uvi̱ sa̱aꞌ mboki̱ riꞌ,
xiinꞌ xa̱ꞌa̱n ña̱ ndisuku̱ꞌ xata̱ꞌ a̱,
xiinꞌ si̱ꞌi̱n ku̱a̱ꞌa̱ riꞌ.
Sa̱kanꞌ ña̱ mbe̱e̱ ja̱a̱nꞌ nduuꞌ tiꞌ ni̱ ti̱i̱n u̱nꞌ,
te̱ ni̱ sa̱ñuꞌuꞌ u̱nꞌ Aarón te̱ ku̱ndu̱u̱ ra̱ sutu̱ ka̱ka̱ nu̱u̱ nuu̱ꞌ i̱.
23 Te̱ ti̱xi̱n ika̱ꞌ siee,
tunꞌ iinꞌ nuu̱ꞌ Yahvé ja̱a̱nꞌ xiinꞌ xita̱ꞌ va̱ꞌa̱ ki̱ꞌi̱n u̱nꞌ i̱i̱n nda̱a̱ꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ,
xiinꞌ i̱i̱n nda̱a̱ꞌ xita̱ꞌ va̱ꞌa̱ ña̱ kukunꞌ ña̱ saká xa̱ꞌa̱n oliva xiinꞌ,
xiinꞌ tiki̱nꞌ,
tiꞌ ni̱ xa̱ki̱n ne̱ yivi̱ꞌ xa̱ꞌa̱n xata̱ꞌ.
24 Te̱ ta̱a̱nꞌ u̱nꞌ sa̱kuuꞌ ña̱ ja̱a̱nꞌ nda̱ꞌaꞌ Aarón xiinꞌ nda̱ꞌaꞌ tiaa̱ siꞌe̱ ra̱,
te̱ se̱koꞌ u̱nꞌ ña̱ ja̱a̱nꞌ kii̱ꞌ taxiꞌ u̱nꞌ u̱n nda̱ꞌaꞌ ra̱,
sa̱kanꞌ ña̱ i̱i̱n tu̱mani̱ꞌ ña̱ sekoꞌ ndo̱ꞌ nuu̱ꞌ yuꞌu̱,
Yahvé,
nduuꞌ a̱.
25 Ndi̱ꞌi̱ ja̱a̱nꞌ te̱ na̱ta̱xi̱ ra̱ sa̱kuuꞌ ña̱ ja̱a̱nꞌ nda̱ꞌaꞌ u̱nꞌ te̱ ka̱ꞌmi̱ u̱nꞌ u̱n nuu̱ꞌ altar,
te̱ ka̱ꞌmi̱ ingaꞌ u̱nꞌ xiinꞌ tu̱mani̱ꞌ ña̱ xavixínꞌ xa̱va̱ꞌa̱ nuu̱ꞌ yuꞌu̱,
Yahvé.
Ña̱ ja̱a̱nꞌ nduuꞌ tu̱mani̱ꞌ ña̱ xaꞌmiꞌ ndo̱ꞌ te̱ ki̱ꞌi̱n kaꞌnuꞌ ndo̱ꞌ yuꞌu̱,
Yahvé.
26 ’Te̱ ki̱ꞌi̱n tu̱ u̱nꞌ ti̱a̱ꞌni̱ mbe̱e̱ tyiee̱ ja̱a̱nꞌ ña̱ ni̱ ti̱i̱n u̱nꞌ,
te̱ ni̱ sa̱ñuꞌuꞌ u̱nꞌ Aarón,
te̱ se̱koꞌ u̱nꞌ tu̱mani̱ꞌ ja̱a̱nꞌ nuu̱ꞌ yuꞌu̱,
Yahvé,
sa̱kanꞌ ña̱ xa̱ ndi̱ti̱a̱ mi̱iꞌ yuꞌu̱,
Yahvé,
nduuꞌ ña̱ ja̱a̱nꞌ.
Te̱ ña̱ ja̱a̱nꞌ nduuꞌ tu̱ ña̱ ndoo̱ nda̱ꞌaꞌ mi̱iꞌ u̱nꞌ ku̱xi̱ u̱nꞌ.
27 Te̱ sa̱siinꞌ u̱nꞌ ti̱a̱ꞌni̱ mbe̱e̱ tyiee̱ ña̱ ni̱ na̱soko̱ꞌ u̱nꞌ,
ña̱ ni̱ se̱koꞌ u̱nꞌ nuu̱ꞌ i̱ ja̱a̱nꞌ,
te̱ ni̱ ta̱xi̱ u̱nꞌ ndi̱e̱e̱ꞌ Aarón,
te̱ sa̱kanꞌ tu̱ si̱ꞌi̱n riꞌ ña̱ ni̱ na̱soko̱ꞌ u̱nꞌ nuu̱ꞌ i̱.
Sa̱kanꞌ ña̱ ña̱ ja̱a̱nꞌ ku̱i̱ti̱ꞌ nduuꞌ ña̱ ndoo̱ nda̱ꞌaꞌ te̱ ja̱a̱nꞌ ku̱xi̱ ra̱ xiinꞌ siꞌe̱ ra̱.
28 Te̱ sa̱kuuꞌ ña̱ ja̱a̱nꞌ ta̱xi̱ u̱nꞌ nda̱ꞌaꞌ Aarón ku̱xi̱ ra̱ xiinꞌ siꞌe̱ ra̱.
Te̱ ña̱ ja̱a̱nꞌ nduuꞌ nde̱iꞌ ña̱ kuní a̱ sa̱xinu̱ ne̱ vi̱ꞌe̱ Israel nde̱e̱ ndiꞌiꞌ ni̱ kivi̱ꞌ.
Te̱ i̱ꞌi̱n i̱tyiꞌ kii̱ꞌ na̱soko̱ꞌ ne̱ vi̱ꞌe̱ Israel tu̱mani̱ꞌ ja̱a̱nꞌ nuu̱ꞌ yuꞌu̱,
Yahvé,
xaꞌa̱ꞌ a̱ ña̱ nakoó ni̱a̱ ña̱ mani̱ꞌ xiinꞌ i̱ ndii,
kuní a̱ ta̱xi̱ ni̱a̱ ti̱a̱ꞌni̱ mbe̱e̱ tyiee̱ xiinꞌ si̱ꞌi̱n riꞌ ja̱a̱nꞌ nda̱ꞌaꞌ Aarón ku̱xi̱ ra̱ xiinꞌ tiaa̱ siꞌe̱ ra̱.
29 ’Toto̱ su̱ꞌu̱n ña̱ niꞌnuꞌ Aarón ndii,
nda̱ꞌaꞌ siꞌe̱ ra̱ ndoo̱ a̱ kii̱ꞌ ku̱ñuꞌuꞌ ra̱ te̱ na̱ti̱i̱n ra̱ sa̱kuuꞌ ndi̱e̱e̱ꞌ te̱ ku̱ndu̱u̱ ra̱ sutu̱.
30 Tiaa̱ siꞌe̱ Aarón,
te̱ ndoo̱ nuu̱ꞌ ra̱ ku̱ndu̱u̱ sutu̱ nduuꞌ te̱ ku̱i̱ꞌnu̱ toto̱ su̱ꞌu̱n ja̱a̱nꞌ niiꞌ uxa̱ kivi̱ꞌ i̱ꞌi̱n i̱tyiꞌ kii̱ꞌ ndiꞌvi̱ ra̱ ti̱xi̱n yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ ja̱a̱nꞌ,
te̱ sa̱a̱ ra̱ tyu̱u̱n nuu̱ꞌ i̱.
31 ’Ndi̱ꞌi̱ ja̱a̱nꞌ te̱ ki̱ꞌi̱n u̱nꞌ nde̱i̱ꞌ mbe̱e̱ tyiee̱,
tiꞌ ni̱ ti̱i̱n u̱nꞌ kii̱ꞌ ni̱ sa̱ñuꞌuꞌ u̱nꞌ Aarón,
te̱ sa̱tyoꞌó u̱nꞌ u̱n i̱i̱n xaanꞌ miiꞌ su̱ꞌu̱n.
32 Ndi̱ꞌi̱ ja̱a̱nꞌ te̱ ku̱xi̱ Aarón nde̱i̱ꞌ ja̱a̱nꞌ xiinꞌ xita̱ꞌ va̱ꞌa̱ ña̱ ñuꞌuꞌ ti̱xi̱n ika̱ꞌ siee,
te̱ ku̱xi̱ tu̱ sa̱kuuꞌ tiaa̱ siꞌe̱ ra̱ nde̱i̱ꞌ ja̱a̱nꞌ xiinꞌ ra̱ yiꞌeꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ ja̱a̱nꞌ.
33 Ku̱xi̱ ra̱ nde̱i̱ꞌ ña̱ ni̱ ti̱i̱n u̱nꞌ te̱ ni̱ sa̱ñuꞌuꞌ ña̱ꞌaꞌ u̱nꞌ ja̱a̱nꞌ xiinꞌ ña̱ ni̱ sa̱ndoyoꞌ u̱nꞌ ku̱a̱tyi̱ ra̱ kii̱ꞌ ni̱ sa̱ñuꞌuꞌ ña̱ꞌaꞌ u̱nꞌ,
te̱ ni̱ ta̱xi̱ u̱nꞌ ndi̱e̱e̱ꞌ ra̱ te̱ ku̱ndu̱u̱ ra̱ sutu̱ ndi̱ti̱a̱ yuꞌu̱.
Te̱ xa̱ te̱ ja̱a̱nꞌ ku̱i̱ti̱ꞌ kuní a̱ ku̱xi̱ nde̱i̱ꞌ ja̱a̱nꞌ,
te̱ vä̱ꞌa̱ ku̱xi̱ nde̱e̱ i̱i̱n ne̱ yivi̱ꞌ a̱,
sa̱kanꞌ ña̱ nde̱i̱ꞌ ña̱ ni̱ ku̱ñuꞌuꞌ nduuꞌ a̱.
34 Naaꞌ ndoo̱ ndo̱so̱ꞌ siee nde̱i̱ꞌ uun xita̱ꞌ va̱ꞌa̱ ña̱ ni̱ ti̱i̱n u̱nꞌ te̱ ni̱ sa̱ñuꞌuꞌ Aarón ja̱a̱nꞌ xaꞌa̱ꞌ tu̱ku̱ kivi̱ꞌ ndii,
kuní a̱ ka̱ꞌmi̱ u̱nꞌ u̱n,
te̱ na kä̱xi̱ꞌ nde̱e̱ i̱i̱n ne̱ yivi̱ꞌ a̱ sa̱kanꞌ ña̱ nde̱i̱ꞌ ña̱ ni̱ ku̱ñuꞌuꞌ nduuꞌ a̱.
35 ’Te̱ niiꞌ uxa̱ kivi̱ꞌ kuní a̱ te̱ sa̱kuisoꞌ tyuunꞌ u̱nꞌ Aarón xiinꞌ tiaa̱ siꞌe̱ ra̱ te̱ ta̱xi̱ u̱nꞌ ndi̱e̱e̱ꞌ ra̱ te̱ ku̱ndu̱u̱ ra̱ sutu̱.
Sa̱xinu̱ u̱nꞌ sa̱a̱ niiꞌ kaꞌán nde̱iꞌ ña̱ ni̱ ta̱xi̱ i̱ nda̱ꞌaꞌ u̱nꞌ.
36 Te̱ i̱ꞌi̱n kivi̱ꞌ ja̱a̱nꞌ kuní a̱ na̱soko̱ꞌ u̱nꞌ i̱i̱n si̱ndiki̱ꞌ tiakiꞌ te̱ ko̱o̱ kaꞌnuꞌ i̱ni̱ i̱ xaꞌa̱ꞌ ku̱a̱tyi̱ mi̱iꞌ Aarón xiinꞌ xaꞌa̱ꞌ ku̱a̱tyi̱ tiaa̱ siꞌe̱ ra̱ nda̱sa̱ndo̱o̱ ña̱ꞌaꞌ u̱nꞌ.
Na̱soko̱ꞌ u̱nꞌ nuu̱ꞌ altar ja̱a̱nꞌ i̱i̱n tu̱mani̱ꞌ te̱ sañuꞌuꞌ i̱ ña̱ ja̱a̱nꞌ,
te̱ ka̱ti̱a̱ tu̱ u̱nꞌ xa̱ꞌa̱n oliva nuu̱ꞌ a̱ te̱ sa̱ñuꞌuꞌ u̱nꞌ u̱n.
37 Niiꞌ uxa̱ kivi̱ꞌ na̱soko̱ꞌ u̱nꞌ ki̱tiꞌ nuu̱ꞌ altar xaꞌa̱ꞌ ku̱a̱tyi̱ ndo̱ꞌ,
te̱ ka̱ti̱a̱ liki̱nꞌ tu̱ u̱nꞌ níiꞌ nuu̱ꞌ a̱,
te̱ xiinꞌ ña̱ ja̱a̱nꞌ sa̱ñuꞌuꞌ u̱nꞌ u̱n nuu̱ꞌ i̱,
te̱ ku̱ndu̱u̱ a̱ i̱i̱n altar su̱ꞌu̱n xa̱va̱ꞌa̱.
Yo̱o̱ ka̱ nduuꞌ ña̱ꞌa̱ ña̱ ku̱nduꞌu̱ꞌ nuu̱ꞌ altar ja̱a̱nꞌ ndii,
ku̱su̱ꞌu̱n tu̱ ña̱ ja̱a̱nꞌ.
Yoꞌoꞌ kaꞌán a̱ xaꞌa̱ꞌ tu̱mani̱ꞌ ña̱ kuní a̱ na̱soko̱ꞌ sutu̱ nuu̱ꞌ Ndiosí sa̱a̱ kivi̱ꞌ
38 ’Ña̱ yo̱ꞌo̱ꞌ nduuꞌ tu̱mani̱ꞌ ña̱ kuní a̱ na̱soko̱ꞌ u̱nꞌ nuu̱ꞌ altar sa̱a̱ kivi̱ꞌ kuaꞌa̱n:
uvi̱ taꞌan mbe̱e̱,
tiꞌ i̱i̱n kuiya̱.
39 I̱i̱n riꞌ na̱soko̱ꞌ u̱nꞌ ni̱a̱ꞌa̱,
te̱ i̱nga̱ riꞌ na̱soko̱ꞌ u̱nꞌ xa̱kuaa̱ꞌ.
40 Xiinꞌ mbe̱e̱,
tiꞌ na̱soko̱ꞌ nu̱uꞌ u̱nꞌ nuu̱ꞌ i̱ ni̱a̱ꞌa̱ ndii,
kuní a̱ na̱soko̱ꞌ tu̱ u̱nꞌ uvi̱ kilo yu̱tyiꞌ harina ña̱ va̱ꞌa̱ va̱,
ña̱ saká i̱i̱n litro xa̱ꞌa̱n oliva xiinꞌ,
te̱ na̱soko̱ꞌ tu̱ u̱nꞌ i̱i̱n litro vino nuu̱ꞌ i̱.
41 Te̱ niiꞌ sa̱kanꞌ tu̱ sa̱a̱ u̱nꞌ xiinꞌ mbe̱e̱,
tiꞌ na̱soko̱ꞌ u̱nꞌ nuu̱ꞌ i̱ xa̱kuaa̱ꞌ,
kuní a̱ na̱soko̱ꞌ tu̱ u̱nꞌ uvi̱ kilo yu̱tyiꞌ harina ña̱ va̱ꞌa̱ va̱,
te̱ na̱soko̱ꞌ tu̱ u̱nꞌ i̱i̱n litro vino nuu̱ꞌ i̱.
Te̱ ku̱ndu̱u̱ ña̱ ja̱a̱nꞌ i̱i̱n tu̱mani̱ꞌ ña̱ xavixínꞌ va̱ nuu̱ꞌ i̱,
ña̱ xtani̱ va̱ i̱,
ña̱ nduuꞌ ndi̱ti̱a̱ yuꞌu̱ ku̱i̱ti̱ꞌ.
42 Te̱ tu̱mani̱ꞌ ña̱ xaꞌmiꞌ ndo̱ꞌ nuu̱ꞌ yuꞌu̱,
Yahvé,
yoꞌoꞌ vi̱ti̱n xaꞌa̱ꞌ a̱ ña̱ kiꞌinꞌ kaꞌnuꞌ ndo̱ꞌ yuꞌu̱ ndii,
i̱ꞌi̱n kivi̱ꞌ kuaꞌa̱n nde̱e̱ ndiꞌiꞌ ni̱ kivi̱ꞌ kuní a̱ sa̱a̱ ndo̱ꞌ a̱ yiꞌeꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ.
Sa̱kanꞌ ña̱ i̱kanꞌ nduuꞌ miiꞌ ndu̱u̱ i̱i̱n i̱ xiinꞌ u̱nꞌ te̱ kaꞌa̱n i̱ xiinꞌ u̱nꞌ.
43 Te̱ i̱kanꞌ tu̱ nduuꞌ miiꞌ ndu̱u̱ i̱i̱n i̱ xiinꞌ ne̱ vi̱ꞌe̱ Israel,
te̱ i̱i̱n xaanꞌ miiꞌ su̱ꞌu̱n va̱ ku̱ndu̱u̱ yiꞌeꞌ ja̱a̱nꞌ xaꞌa̱ꞌ a̱ ña̱ ko̱o̱ i̱ i̱kanꞌ.
44 Sa̱ñuꞌuꞌ i̱ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ ja̱a̱nꞌ,
te̱ sa̱ñuꞌuꞌ tu̱ i̱ altar ña̱ iinꞌ ti̱xi̱n a̱,
te̱ sa̱ñuꞌuꞌ tu̱ i̱ Aarón xiinꞌ sa̱kuuꞌ tiaa̱ siꞌe̱ ra̱,
te̱ ku̱ndu̱u̱ ra̱ sutu̱,
te̱ ka̱ka̱ nu̱u̱ nuu̱ꞌ i̱.
45 Ku̱nduꞌu̱ꞌ i̱ te̱i̱n ndoꞌó,
ne̱ vi̱ꞌe̱ Israel,
te̱ yuꞌu̱ ku̱ndu̱u̱ Ndiosí ña̱ xakaꞌnuꞌ ndo̱ꞌ.
46 Sa̱kanꞌ te̱ ku̱nda̱ni̱ ndo̱ꞌ ña̱ yuꞌu̱ nduuꞌ Yahvé,
Ndiosí ña̱ xakaꞌnuꞌ ndo̱ꞌ,
ña̱ ni̱ ta̱va̱ꞌ ndoꞌó nuu̱ꞌ ñu̱ꞌuꞌ Egipto,
te̱ ku̱nduꞌu̱ꞌ i̱ te̱i̱n ndo̱ꞌ.
Yuꞌu̱,
Yahvé,
ku̱i̱ti̱ꞌ nduuꞌ Ndiosí ña̱ kuní a̱ sa̱kaꞌnuꞌ ndo̱ꞌ.