Yoꞌoꞌ kaꞌán a̱ xaꞌa̱ꞌ Bezaleel xiinꞌ xaꞌa̱ꞌ Aholiab, te̱ tyu̱u̱n va̱ xatyuunꞌ xiinꞌ oro xiinꞌ plata
31
Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
2 ―Ko̱to̱ u̱nꞌ,
xa̱ ni̱ na̱ka̱xi̱n i̱ te̱ nduuꞌ Bezaleel,
siꞌe̱ Uri,
te̱ Uri ndii,
siꞌe̱ Hur nduuꞌ ra̱,
te̱ i̱tyiꞌ ne̱ vi̱ꞌe̱ Judá nduuꞌ Hur ja̱a̱nꞌ.
3 Te̱ ni̱ sa̱kutuꞌ ña̱ꞌaꞌ i̱ xiinꞌ Espíritu ña̱ nduuꞌ kuenta mi̱iꞌ yuꞌu̱,
Ndiosí,
te̱ ni̱ sa̱kutuꞌ tu̱ ña̱ꞌaꞌ i̱ xiinꞌ ña̱ xini tuní,
xiinꞌ ña̱ ndityi,
xiinꞌ ña̱ kundani̱,
xiinꞌ sa̱kuuꞌ ña̱ kooꞌ tyukuuꞌ xa̱va̱ꞌa̱ ra̱ nuu̱ꞌ ndiaa ka̱ tyu̱u̱n.
4 Sa̱kanꞌ te̱ ku̱ndu̱u̱ ra̱ i̱i̱n te̱ tyu̱u̱n xa̱va̱ꞌa̱ ka̱sa̱ꞌa̱ ndiaa ka̱ nuu̱ꞌ ka̱a̱ xiinꞌ oro,
xiinꞌ plata,
xiinꞌ bronce.
5 Te̱ tyu̱u̱n va̱ tu̱ ra̱ ka̱ꞌndi̱a̱ ra̱ yuu̱ꞌ nda̱tu̱nꞌ te̱ tyi̱ndo̱ndi̱a̱ ra̱ a̱ xata̱ꞌ ndiaa ka̱ ña̱ꞌa̱,
te̱ tyu̱u̱n va̱ tu̱ ra̱ nda̱sa̱ndi̱i̱ꞌ ra̱ i̱tunꞌ,
te̱ tyu̱u̱n va̱ tu̱ ra̱ sa̱a̱ ra̱ ndiaa ka̱ nuu̱ꞌ tyu̱u̱n.
6 Xa̱ ni̱ na̱ka̱xi̱n mi̱iꞌ tu̱ i̱ te̱ nduuꞌ Aholiab,
siꞌe̱ Ahisamac,
te̱ nduuꞌ te̱ i̱tyiꞌ ne̱ vi̱ꞌe̱ Dan,
te̱ tyi̱ndi̱e̱eꞌ ra̱ Bezaleel ja̱a̱nꞌ.
Te̱ sa̱kanꞌ tu̱ ni̱ sa̱ku̱ndityi va̱ i̱ sa̱kuuꞌ te̱ tyi̱ndi̱e̱eꞌ ña̱ꞌaꞌ xiinꞌ tyu̱u̱n ja̱a̱nꞌ,
sa̱kanꞌ te̱ ku̱vi̱ sa̱xinu̱ ra̱ sa̱kuuꞌ ña̱ꞌa̱,
ña̱ ni̱ kaꞌa̱n tyuunꞌ i̱ xiinꞌ u̱nꞌ ka̱sa̱ꞌa̱ u̱nꞌ ja̱a̱nꞌ.
7 Naa kuuꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ,
xiinꞌ xatu̱nꞌ miiꞌ naá kuento ña̱ ni ndoo̱ꞌ i̱ xiinꞌ ndo̱ꞌ,
xiinꞌ vitu̱ꞌ,
tunꞌ ndasi yu̱ꞌuꞌ xatu̱nꞌ ja̱a̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ,
xiinꞌ sa̱kuuꞌ nda̱tyuunꞌ ña̱ yoo ti̱xi̱n yu̱kunꞌ toto̱ ja̱a̱nꞌ.
8 Sa̱kanꞌ tu̱ mesa xiinꞌ sa̱kuuꞌ nda̱tyuunꞌ ña̱ yoo nuu̱ꞌ nu̱ꞌ,
xiinꞌ kandelabro ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro,
xiinꞌ sa̱kuuꞌ nda̱tyuunꞌ ña̱ nitaꞌanꞌ xiinꞌ a̱,
xiinꞌ altar miiꞌ xixí su̱xa̱ tyu̱ꞌma.
9 Te̱ sa̱kanꞌ tu̱ altar tyie̱ ña̱ iinꞌ ki̱ꞌe̱ miiꞌ xaꞌmiꞌ sutu̱ ki̱tiꞌ,
xiinꞌ sa̱kuuꞌ nda̱tyuunꞌ ña̱ nitaꞌanꞌ xiinꞌ a̱,
xiinꞌ pila,
xiinꞌ xaꞌa̱ꞌ a̱ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ bronce miiꞌ naá ti̱kui teꞌ natiaꞌ ndo̱ꞌ nda̱ꞌaꞌ ndo̱ꞌ xiinꞌ xaꞌa̱ꞌ ndo̱ꞌ.
10 Te̱ sa̱kanꞌ tu̱ toto̱ su̱ꞌu̱n ña̱ va̱ꞌa̱ ni̱ naku̱ ña̱ niꞌnuꞌ sutu̱ Aarón xiinꞌ ña̱ niꞌnuꞌ siꞌe̱ ra̱ kii̱ꞌ xaaꞌ ra̱ tyu̱u̱n sutu̱ nuu̱ꞌ i̱.
11 Te̱ sa̱kanꞌ tu̱ xa̱ꞌa̱n su̱ꞌu̱n ña̱ tiinꞌ sutu̱ kii̱ꞌ sa̱ñuꞌuꞌ ra̱,
xiinꞌ su̱xa̱ tyu̱ꞌma xavixínꞌ ña̱ tiinꞌ sutu̱ ti̱xi̱n yu̱kunꞌ.
Te̱ sa̱kuuꞌ te̱ sa̱a̱ tyu̱u̱n ja̱a̱nꞌ ndii,
kuní a̱ sa̱a̱ ra̱ a̱ sa̱kuuꞌ a̱ sa̱a̱ niiꞌ ni̱ kaꞌa̱n tyuunꞌ i̱ xiinꞌ u̱nꞌ.
Yoꞌoꞌ kaꞌán a̱ xaꞌa̱ꞌ ña̱ kuní a̱ ki̱ꞌi̱n kaꞌnuꞌ e̱ꞌ kivi̱ꞌ ña̱ na̱ndiee̱ꞌ e̱ꞌ
12 Sa̱kanꞌ te̱ ni̱ kaꞌa̱n ka̱ Yahvé xiinꞌ Moisés ndii:
13 ―Kaꞌa̱n u̱nꞌ xiinꞌ sa̱kuuꞌ ne̱ vi̱ꞌe̱ Israel ña̱ kaꞌa̱n i̱ xiinꞌ u̱nꞌ vi̱ti̱n:
“Kuní a̱ ña̱ ko̱to̱ kaꞌnuꞌ ndo̱ꞌ kivi̱ꞌ ña̱ nandiee̱ꞌ ndo̱ꞌ ña̱ ni̱ tyi̱nduꞌu̱ i̱,
sa̱kanꞌ ña̱ ña̱ ja̱a̱nꞌ nduuꞌ ña̱ niaꞌá ña̱ ni̱ ndoo̱ i̱ kuento i̱ xiinꞌ ndo̱ꞌ xiinꞌ si̱a̱niꞌ xikaꞌ ndo̱ꞌ nde̱e̱ ndiꞌiꞌ ni̱ kivi̱ꞌ.
Ni̱ xa̱ꞌa̱ i̱ kivi̱ꞌ ña̱ nandiee̱ꞌ ja̱a̱nꞌ te̱ ku̱nda̱ni̱ ndo̱ꞌ ña̱ yuꞌu̱ nduuꞌ Yahvé,
ña̱ xasu̱ꞌu̱n ndoꞌó te̱ ka̱ka̱ nu̱u̱ ndo̱ꞌ nuu̱ꞌ i̱.
14 Kuní a̱ ña̱ ko̱to̱ kaꞌnuꞌ ndo̱ꞌ kivi̱ꞌ ña̱ nandiee̱ꞌ ndo̱ꞌ ja̱a̱nꞌ,
sa̱kanꞌ ña̱ i̱i̱n kivi̱ꞌ su̱ꞌu̱n va̱ nduuꞌ a̱ nuu̱ꞌ ndoꞌó,
te̱ yo̱o̱ ka̱ ku̱u̱ xeꞌnaꞌ xiinꞌ kivi̱ꞌ ja̱a̱nꞌ ndii,
kuní a̱ ka̱ꞌni̱ꞌ ña̱ꞌaꞌ ndo̱ꞌ,
te̱ yo̱o̱ ka̱ sa̱tyuunꞌ kivi̱ꞌ ja̱a̱nꞌ ndii,
kuní a̱ xta̱ꞌniꞌ ña̱ꞌaꞌ ndo̱ꞌ te̱i̱n ndo̱ꞌ.
15 Iñu̱ taꞌan kivi̱ꞌ ku̱i̱ti̱ꞌ ku̱vi̱ sa̱tyuunꞌ ndo̱ꞌ,
ndisu̱ kivi̱ꞌ ña̱ uxa̱ ndii,
i̱i̱n kivi̱ꞌ ndi̱ti̱a̱ yuꞌu̱,
Yahvé,
ña̱ na̱ndiee̱ꞌ ndo̱ꞌ nduuꞌ a̱.
Te̱ yo̱o̱ ka̱ sa̱tyuunꞌ kivi̱ꞌ ña̱ nandiee̱ꞌ ndo̱ꞌ ja̱a̱nꞌ ndii,
kuní a̱ ka̱ꞌni̱ꞌ ña̱ꞌaꞌ ndo̱ꞌ.
16 Sa̱kuuꞌ ndoꞌó,
ne̱ vi̱ꞌe̱ Israel ndii,
kuní a̱ ko̱to̱ kaꞌnuꞌ ndo̱ꞌ ña̱ xixaá ne̱ xitoꞌ kaꞌnuꞌ kivi̱ꞌ ña̱ nandiee̱ꞌ ndo̱ꞌ ja̱a̱nꞌ,
sa̱kanꞌ ña̱ sa̱kanꞌ kaꞌán kuento ña̱ ni̱ ndoo̱ i̱ xiinꞌ ndo̱ꞌ,
ña̱ ko̱to̱ kaꞌnuꞌ ndo̱ꞌ a̱ nde̱e̱ ndiꞌiꞌ ni̱ kivi̱ꞌ.
17 Te̱ ku̱ndu̱u̱ tu̱ a̱ i̱i̱n ña̱ niaꞌá nuu̱ꞌ ndoꞌó,
ne̱ vi̱ꞌe̱ Israel,
ña̱ ni ndoo̱ꞌ e̱ꞌ kuento xiinꞌ nuu̱ꞌ yuꞌu̱ nde̱e̱ ndiꞌiꞌ ni̱ kivi̱ꞌ.
Sa̱kanꞌ ña̱ yuꞌu̱,
Yahvé ndii,
iñu̱ taꞌan kivi̱ꞌ ku̱i̱ti̱ꞌ,
te̱ ni̱ xa̱ꞌa̱ i̱ ndi̱viꞌ xiinꞌ ñu̱ꞌuꞌ i̱i̱n yivi̱ꞌ,
te̱ kivi̱ꞌ ña̱ uxa̱ ni̱ sa̱ndiꞌiꞌ i̱ tyu̱u̱n nuu̱ꞌ i̱,
te̱ ni̱ na̱ndiee̱ꞌ i̱” ―ni̱ katyi̱ Ndiosí.
18 Te̱ kii̱ꞌ ndi̱ꞌi̱ ni̱ kaꞌa̱n Yahvé xiinꞌ Moisés xíniꞌ i̱kuꞌ Sinaí ndii,
ni̱ ta̱xi̱ a̱ uvi̱ taꞌan yuu̱ꞌ xaꞌndiaꞌ nda̱ꞌaꞌ ra̱ miiꞌ yoso̱ꞌ kuento a̱ ña̱ ni̱ ndoo̱ xiinꞌ e̱ꞌ,
ña̱ ni̱ ke̱ꞌi̱ a̱ xiinꞌ nda̱ꞌaꞌ mi̱iꞌ a̱.