Yoꞌoꞌ kaꞌán Ndiosí xiinꞌ Moisés sa̱a̱ ka̱sa̱ꞌa̱ ra̱ altar miiꞌ ka̱ꞌmi̱ sutu̱ ki̱tiꞌ, tiꞌ na̱soko̱ꞌ ra̱ nuu̱ꞌ a̱
27
’Ka̱sa̱ꞌa̱ tu̱ u̱nꞌ i̱i̱n altar titutunꞌ xiinꞌ mi̱iꞌ ndiꞌiꞌ i̱tunꞌ acacia.
Uvi̱ metro yoso̱ꞌ sa̱va̱ ña̱ ndiká nu̱ꞌ,
te̱ uvi̱ metro yoso̱ꞌ sa̱va̱ ña̱ nani̱ꞌ nu̱ꞌ,
te̱ i̱i̱n metro kanuꞌ uvi̱ kuarta yoso̱ꞌ sa̱va̱ ña̱ sukun nu̱ꞌ.
2 Te̱ ka̱sa̱ꞌa̱ tu̱ u̱nꞌ ku̱miꞌ taꞌan ndi̱kiꞌ altar ja̱a̱nꞌ,
i̱i̱n nda̱a̱ꞌ i̱i̱n nda̱a̱ꞌ a̱ i̱ꞌi̱n ku̱miꞌ sa̱aꞌ xiki̱ꞌ a̱.
Te̱ i̱i̱n nda̱a̱ꞌ ku̱ndu̱u̱ ka̱niiꞌ altar ja̱a̱nꞌ xiinꞌ ndi̱kiꞌ a̱ ja̱a̱nꞌ,
te̱ sa̱kutyiꞌ u̱nꞌ ka̱a̱ bronce ka̱niiꞌ xata̱ꞌ a̱.
3 Te̱ xiinꞌ ka̱a̱ bronce ja̱a̱nꞌ ka̱sa̱ꞌa̱ tu̱ u̱nꞌ sa̱kuuꞌ nda̱tyuunꞌ ña̱ kuní a̱ ti̱i̱n te̱ yivi̱ꞌ nuu̱ꞌ altar ja̱a̱nꞌ,
naa kuuꞌ miiꞌ ku̱ꞌu̱n yaa̱ꞌ nuꞌu̱,
xiinꞌ xinda̱ꞌ ña̱ ti̱i̱n ra̱ ñuꞌu̱ ti̱keí,
xiinꞌ ka̱a̱ pala,
xiinꞌ ka̱a̱ ña̱ uni̱ taꞌan nu̱ꞌu̱,
xiinꞌ koꞌo̱ꞌ siee miiꞌ ku̱ꞌu̱n ñuꞌu̱ ti̱keí.
4 Te̱ ña̱ nda̱si̱ i̱ꞌnu̱ altar ja̱a̱nꞌ ndii,
ka̱sa̱ꞌa̱ u̱nꞌ i̱i̱n ka̱a̱ ndiki̱ xiinꞌ mi̱iꞌ ndiꞌiꞌ bronce.
Te̱ nde̱e̱ to̱koꞌ altar xa̱ꞌaꞌ ka̱a̱ ja̱a̱nꞌ te̱ kuꞌu̱n ndi̱koꞌ a̱ nde̱e̱ yu̱ꞌuꞌ altar ja̱a̱nꞌ,
te̱ tyi̱ndo̱ndi̱a̱ tu̱ u̱nꞌ ka̱a̱ tivi̱ ku̱miꞌ sa̱aꞌ xiki̱ꞌ ka̱a̱ ndiki̱ ja̱a̱nꞌ.
5 Te̱ ka̱a̱ ndiki̱ ja̱a̱nꞌ ndii,
nde̱e̱ to̱koꞌ altar xa̱ꞌaꞌ tyi̱ndo̱ndi̱a̱ u̱nꞌ u̱n te̱ kuꞌu̱n ndi̱koꞌ a̱ nde̱e̱ yu̱ꞌuꞌ altar ja̱a̱nꞌ ku̱i̱ti̱ꞌ.
6 Te̱ ka̱sa̱ꞌa̱ tu̱ u̱nꞌ ndiaꞌviꞌ ka̱roti xiinꞌ i̱tunꞌ acacia,
tunꞌ kuní ku̱i̱ꞌni̱ so̱ꞌo̱ altar ja̱a̱nꞌ,
te̱ sa̱kutyiꞌ u̱nꞌ ka̱a̱ bronce xata̱ꞌ nu̱ꞌ.
7 Te̱ ti̱xi̱n ka̱a̱ tivi̱ ja̱a̱nꞌ tyi̱ꞌni̱ ndo̱ꞌ ka̱roti ja̱a̱nꞌ,
te̱ xa̱ i̱kanꞌ ndoo̱ mi̱iꞌ nu̱ꞌ ku̱i̱ꞌni̱ nu̱ꞌ uvi̱ sa̱aꞌ taꞌviꞌ xi̱i̱nꞌ altar ja̱a̱nꞌ,
te̱ ku̱vi̱ ko̱ni̱ꞌi̱ ndo̱ꞌ a̱ kuꞌu̱n ndo̱ꞌ.
8 Altar ja̱a̱nꞌ ndii xiinꞌ vitu̱ꞌ ka̱sa̱ꞌa̱ u̱nꞌ u̱n,
te̱ xatu̱nꞌ ku̱i̱ti̱ꞌ ku̱ndu̱u̱ nu̱ꞌ sa̱a̱ niiꞌ kaaꞌ ña̱ ni̱ sa̱niaꞌá i̱ nuu̱ꞌ u̱nꞌ xíniꞌ i̱kuꞌ Sinaí.
Yoꞌoꞌ kaꞌán a̱ sa̱a̱ ko̱o̱ nuu̱ꞌ ki̱ꞌe̱ yu̱kunꞌ toto̱
9 ’Te̱ ka̱sa̱ꞌa̱ u̱nꞌ nuu̱ꞌ ki̱ꞌe̱ yu̱kunꞌ toto̱ ja̱a̱nꞌ,
te̱ nda̱si̱ i̱ꞌnu̱ u̱nꞌ u̱n xiinꞌ toto̱ ndiká ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ yuꞌva̱ lino va̱ꞌa̱ va̱.
Toto̱ ndiká ña̱ ku̱ta̱xkoꞌ nuu̱ꞌ ki̱ꞌe̱ ninu̱ ndii,
uvi̱ xi̱ko̱ iñu̱ metro kuní a̱ ña̱ nani̱ꞌ ko̱o̱ a̱.
10 Te̱ oko̱ sa̱aꞌ ndu̱yu̱ yu̱kunꞌ,
xiinꞌ oko̱ sa̱aꞌ ka̱a̱ ña̱ kiꞌiꞌ xaꞌa̱ꞌ nu̱ꞌ ndii,
xiinꞌ mi̱iꞌ ndiꞌiꞌ bronce ka̱sa̱ꞌa̱ u̱nꞌ u̱n,
te̱ yu̱ꞌuꞌ ndu̱yu̱ ja̱a̱nꞌ miiꞌ nakuꞌún taꞌanꞌ nu̱ꞌ,
xiinꞌ ka̱a̱ ki̱ꞌiꞌ,
xiinꞌ ka̱a̱ tivi̱ꞌ ña̱ ndisoꞌ nu̱ꞌ ndii,
xiinꞌ mi̱iꞌ ndiꞌiꞌ plata ka̱sa̱ꞌa̱ u̱nꞌ u̱n.
11 Te̱ tu̱ku̱ taꞌviꞌ nuu̱ꞌ ki̱ꞌe̱ yu̱kunꞌ ni̱nu̱ ndii,
ka̱ta̱xkoꞌ u̱nꞌ i̱nga̱ toto̱ ndiká,
te̱ ña̱ nani̱ꞌ toto̱ ja̱a̱nꞌ ndii,
uvi̱ xi̱ko̱ iñu̱ metro kuní a̱ ko̱o̱ a̱.
Te̱ ku̱miꞌ tu̱ ña̱ ja̱a̱nꞌ oko̱ sa̱aꞌ ndu̱yu̱ xiinꞌ oko̱ sa̱aꞌ ka̱a̱ ña̱ kiꞌiꞌ xaꞌa̱ꞌ nu̱ꞌ.
Te̱ xiinꞌ mi̱iꞌ ndiꞌiꞌ bronce ka̱sa̱ꞌa̱ u̱nꞌ ña̱ ja̱a̱nꞌ,
te̱ yu̱ꞌuꞌ ndu̱yu̱ ja̱a̱nꞌ miiꞌ nakuꞌún taꞌanꞌ nu̱ꞌ,
xiinꞌ ka̱a̱ ki̱ꞌiꞌ,
xiinꞌ ka̱a̱ tivi̱ ña̱ ndisoꞌ nu̱ꞌ ndii,
xiinꞌ mi̱iꞌ ndiꞌiꞌ plata ka̱sa̱ꞌa̱ u̱nꞌ u̱n.
12 Te̱ nuu̱ꞌ ki̱ꞌe̱ xtoꞌniꞌ miiꞌ ketá ñu̱ꞌu̱ ndii,
ka̱ta̱xkoꞌ u̱nꞌ ndiaꞌviꞌ toto̱ ndiká ña̱ kumiꞌ oko̱ uvi̱ metro yoso̱ꞌ sa̱va̱ ña̱ nani̱ꞌ a̱,
te̱ ko̱o̱ tu̱ uxi̱ taꞌan ndu̱yu̱ xiinꞌ uxi̱ taꞌan ka̱a̱ miiꞌ ku̱i̱ta̱ xaꞌa̱ꞌ nu̱ꞌ.
13 Te̱ nuu̱ꞌ ki̱ꞌe̱ xtoꞌniꞌ miiꞌ ketaꞌ ñu̱ꞌu̱ ndii,
ka̱ta̱xkoꞌ tu̱ u̱nꞌ i̱i̱n toto̱ ndiká,
te̱ oko̱ uvi̱ metro yoso̱ꞌ sa̱va̱ tu̱ ko̱o̱ ña̱ ja̱a̱nꞌ sa̱a̱ u̱nꞌ ña̱ nani̱ꞌ a̱.
14 Te̱ i̱i̱n taꞌviꞌ xi̱i̱nꞌ yiꞌeꞌ miiꞌ koꞌniꞌ ndo̱ꞌ ndii,
ka̱ta̱xkoꞌ u̱nꞌ ndiaꞌviꞌ toto̱ ndiká ña̱ ku̱miꞌ uxa̱ metro yoso̱ꞌ sa̱va̱,
te̱ ka̱ta̱ tu̱ u̱nꞌ uni̱ taꞌan ndu̱yu̱,
te̱ tyi̱ndi̱e̱e̱ tu̱ u̱nꞌ uni̱ taꞌan ka̱a̱ ña̱ ki̱ꞌi̱ xaꞌa̱ꞌ ndu̱yu̱ ja̱a̱nꞌ.
15 Te̱ i̱nga̱ taꞌviꞌ xi̱i̱nꞌ yiꞌeꞌ ndii,
ka̱ta̱xkoꞌ tu̱ u̱nꞌ ndiaꞌviꞌ toto̱ ndiká ña̱ ku̱miꞌ uxa̱ metro yoso̱ꞌ sa̱va̱,
te̱ ka̱ta̱ tu̱ u̱nꞌ uni̱ taꞌan ndu̱yu̱,
te̱ tyi̱ndi̱e̱e̱ tu̱ u̱nꞌ uni̱ taꞌan ka̱a̱ ña̱ ki̱ꞌi̱ xaꞌa̱ꞌ ndu̱yu̱ ja̱a̱nꞌ.
16 ’Te̱ ka̱sa̱ꞌa̱ u̱nꞌ i̱i̱n toto̱ ndiká ña̱ ku̱ta̱xkoꞌ yiꞌeꞌ nuu̱ꞌ ki̱ꞌe̱ yu̱kunꞌ.
Te̱ íin metro ko̱o̱ a̱ ña̱ nani̱ꞌ a̱,
te̱ xiinꞌ mi̱iꞌ ndiꞌiꞌ yuꞌva̱ lino va̱ꞌa̱ va̱ ka̱sa̱ꞌa̱ u̱nꞌ toto̱ ja̱a̱nꞌ,
xiinꞌ yuꞌva̱ ndi̱ꞌeꞌ,
xiinꞌ yuꞌva̱ ndu̱kunꞌ,
xiinꞌ yuꞌva̱ kuaꞌa.
Te̱ na̱ku̱ tu̱ u̱nꞌ uvi̱ taꞌan ña̱ nianiaꞌ sa̱a̱ kuaꞌa̱n yu̱ꞌuꞌ toto̱ ja̱a̱nꞌ.
Te̱ ka̱ta̱ tu̱ u̱nꞌ ku̱miꞌ taꞌan ndu̱yu̱ miiꞌ ku̱i̱ta̱xkoꞌ toto̱ ja̱a̱nꞌ xiinꞌ ku̱miꞌ taꞌan ka̱a̱ miiꞌ ku̱i̱ta̱ xaꞌa̱ꞌ ndu̱yu̱ ja̱a̱nꞌ.
17 Te̱ sa̱kuuꞌ ndu̱yu̱,
tunꞌ ku̱i̱ta̱ sa̱a̱ kuaꞌa̱n nuu̱ꞌ ki̱ꞌe̱ yu̱kunꞌ ja̱a̱nꞌ ndii,
kuní a̱ ko̱o̱ ka̱a̱ tivi̱ ña̱ ku̱a̱ꞌa̱ xiinꞌ mi̱iꞌ ndiꞌiꞌ plata nuu̱ꞌ nu̱ꞌ,
te̱ ko̱o̱ tu̱ ka̱a̱ ki̱ꞌiꞌ ña̱ ku̱a̱ꞌa̱ xiinꞌ mi̱iꞌ ndiꞌiꞌ plata nuu̱ꞌ nu̱ꞌ,
te̱ xiinꞌ bronce ka̱sa̱ꞌa̱ u̱nꞌ ka̱a̱ ña̱ ki̱ꞌi̱ xaꞌa̱ꞌ nu̱ꞌ.
18 Te̱ ña̱ ka̱niiꞌ nuu̱ꞌ ki̱ꞌe̱ yu̱kunꞌ ja̱a̱nꞌ ndii,
uvi̱ xi̱ko̱ iñu̱ metro ña̱ nani̱ꞌ a̱,
te̱ oko̱ uni̱ metro ña̱ ndiká a̱,
te̱ sa̱kuuꞌ toto̱ ndiká ña̱ nda̱si̱ xaꞌa̱ꞌ a̱ ndii,
uvi̱ metro kanuꞌ uni̱ kuarta ña̱ sukun a̱,
te̱ ka̱sa̱ꞌa̱ u̱nꞌ toto̱ ja̱a̱nꞌ xiinꞌ mi̱iꞌ ndiꞌiꞌ yuꞌva̱ lino va̱ꞌa̱ va̱,
te̱ ka̱a̱ miiꞌ ku̱i̱ta̱ xaꞌa̱ꞌ ndu̱yu̱ ja̱a̱nꞌ ndii,
xiinꞌ ka̱a̱ bronce ka̱sa̱ꞌa̱ u̱nꞌ u̱n.
19 ’Sa̱kuuꞌ nuu̱ꞌ nda̱tyuunꞌ ña̱ tiinꞌ te̱ yivi̱ꞌ,
te̱ xatyuunꞌ ti̱xi̱n yu̱kunꞌ toto̱ ja̱a̱nꞌ xiinꞌ sa̱kuuꞌ ndu̱yu̱,
tunꞌ ku̱i̱so̱ yu̱kunꞌ ja̱a̱nꞌ,
xiinꞌ ndu̱yu̱,
tunꞌ ku̱i̱ta̱ nuu̱ꞌ ki̱ꞌe̱ ja̱a̱nꞌ ndii,
xiinꞌ bronce ku̱a̱ꞌa̱ a̱.
Yoꞌoꞌ kaꞌán a̱ xaꞌa̱ꞌ xa̱ꞌa̱n oliva, ña̱ ku̱ꞌu̱n ti̱xi̱n ka̱a̱ tuún
20 ’Kaꞌa̱n tyuunꞌ u̱nꞌ xiinꞌ sa̱kuuꞌ ne̱ vi̱ꞌe̱ u̱nꞌ Israel na ki̱xi̱n ndi̱a̱ka̱ ni̱a̱ xa̱ꞌa̱n oliva ña̱ ku̱ꞌu̱n ti̱xi̱n ka̱a̱ tuún,
sa̱kanꞌ te̱ ko̱tuu̱n ka̱a̱ ja̱a̱nꞌ sa̱a̱ kivi̱ꞌ.
21 Aarón xiinꞌ sa̱kuuꞌ tiaa̱ siꞌe̱ ra̱ nduuꞌ te̱ na̱ku̱nꞌ ka̱a̱ tuún ja̱a̱nꞌ,
te̱ ko̱tuu̱n a̱ nuu̱ꞌ yuꞌu̱ꞌ,
Yahvé,
niiꞌ ñu̱u xiinꞌ i̱i̱n keꞌinꞌ.
Te̱ ja̱a̱nꞌ ndii,
ku̱ndi̱e̱e̱ ra̱ kuarto nu̱uꞌ ña̱ iinꞌ tu̱ku̱ taꞌviꞌ xata̱ꞌ yu̱kunꞌ toto̱ miiꞌ nduuꞌ iinꞌ i̱ xiinꞌ ndo̱ꞌ,
miiꞌ taaꞌ toto̱ ndiká ña̱ ndasiꞌ miiꞌ iinꞌ xatu̱nꞌ,
miiꞌ naá kuento ña̱ ni̱ ndoo̱ i̱ xiinꞌ ndoꞌó,
ne̱ vi̱ꞌe̱ Israel.
Te̱ ña̱ nde̱iꞌ,
ña̱ ni̱ kaꞌa̱n i̱ xiinꞌ u̱nꞌ yoꞌoꞌ vi̱ti̱n ndii,
kuní a̱ sa̱xinu̱ sa̱kuuꞌ ña̱ꞌaꞌ ndoꞌóꞌ,
ne̱ vi̱ꞌe̱ Israel,
nde̱e̱ ndiꞌiꞌ ni̱ kivi̱ꞌ.