Yoꞌoꞌ kaꞌán a̱ xaꞌa̱ꞌ sa̱a̱ kuní a̱ ka̱sa̱ꞌa̱ Moisés yu̱kunꞌ toto̱
26
’Ka̱sa̱ꞌa̱ u̱nꞌ yu̱kunꞌ xiinꞌ uxi̱ taꞌan tuꞌu̱nꞌ toto̱ ndiká ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ yuꞌva̱ lino va̱ꞌa̱ xa̱va̱ꞌa̱,
ña̱ ni̱ na̱keꞌi̱ xiinꞌ tiaku̱ ndu̱kunꞌ,
xiinꞌ ña̱ ni̱ na̱keꞌi̱ xiinꞌ tiaku̱ ndi̱ꞌeꞌ,
xiinꞌ ña̱ ni̱ na̱keꞌi̱ xiinꞌ tiaku̱ kuaꞌa.
Te̱ na̱ku̱ tu̱ u̱nꞌ uvi̱ taꞌan querubin nda̱tu̱nꞌ xa̱va̱ꞌa̱ xata̱ꞌ toto̱ ja̱a̱nꞌ.
2 Te̱ i̱i̱n nda̱a̱ꞌ ku̱ꞌva̱ kuní a̱ ku̱ndu̱u̱ sa̱kuuꞌ toto̱ ndiká ja̱a̱nꞌ,
uxi̱ ku̱miꞌ metro yoso̱ꞌ sa̱va̱ ña̱ nani̱ꞌ a̱,
te̱ uvi̱ metro ña̱ ndiká a̱.
3 Uꞌu̱n taꞌan toto̱ ndiká ja̱a̱nꞌ nda̱sa̱i̱i̱n u̱nꞌ te̱ na̱ku̱ u̱nꞌ u̱n,
te̱ sa̱kanꞌ tu̱ sa̱a̱ u̱nꞌ xiinꞌ i̱nga̱ uꞌu̱n taꞌan a̱.
4 Te̱ nde̱e̱ miiꞌ ni̱ xaꞌa̱n ndi̱ꞌi̱ yu̱ꞌuꞌ toto̱ ndiká ña̱ ni̱ na̱ku̱ nu̱uꞌ u̱nꞌ ndii,
tyi̱ndo̱ndi̱a̱ u̱nꞌ ndiaꞌviꞌ laso ña̱ ni̱ ku̱a̱ꞌa̱ xiinꞌ yuꞌva̱ ña̱ ni̱ na̱keꞌi̱ xiinꞌ tiaku̱ ndi̱ꞌeꞌ,
te̱ sa̱kanꞌ tu̱ sa̱a̱ u̱nꞌ xiinꞌ tu̱ku̱ taꞌviꞌ yu̱ꞌuꞌ toto̱ ndiká ña̱ ni̱ na̱ku̱ u̱nꞌ ña̱ uvi̱.
5 Te̱ ka̱sa̱ꞌa̱ u̱nꞌ uvi̱ xi̱ko̱ uxi̱ taꞌan nu̱ꞌni̱ laso tyi̱ndo̱ndi̱a̱ u̱nꞌ yu̱ꞌuꞌ toto̱ ndiká ña̱ ni̱ na̱ku̱ nu̱uꞌ u̱nꞌ ja̱a̱nꞌ,
te̱ sa̱kanꞌ tu̱ tyi̱ndo̱ndi̱a̱ u̱nꞌ uvi̱ xi̱ko̱ uxi̱ taꞌan laso yu̱ꞌuꞌ toto̱ ndiká,
ña̱ uvi̱,
te̱ kuní a̱ ko̱to̱ꞌni̱ nuu̱ꞌ taꞌanꞌ laso ña̱ ndieeꞌ yu̱ꞌuꞌ toto̱ ndiká ña̱ nu̱uꞌ xiinꞌ laso ña̱ ndieeꞌ yu̱ꞌuꞌ toto̱ ndiká ña̱ uvi̱.
6 Te̱ ka̱sa̱ꞌa̱ tu̱ u̱nꞌ uvi̱ xi̱ko̱ uxi̱ ka̱a̱ ki̱ꞌiꞌ xiinꞌ mi̱iꞌ ndiꞌiꞌ oro,
te̱ xiinꞌ ña̱ ja̱a̱nꞌ tyu̱ꞌu̱n taꞌanꞌ u̱nꞌ uvi̱ sa̱aꞌ toto̱ ndiká ja̱a̱nꞌ,
sa̱kanꞌ na kuiiꞌ yu̱kunꞌ toto̱ ja̱a̱nꞌ ndii,
i̱i̱n nda̱a̱ꞌ ku̱ndu̱u̱ ka̱niiꞌ a̱.
7 ’Ka̱sa̱ꞌa̱ tu̱ u̱nꞌ uxi̱ i̱i̱n taꞌan toto̱ ndiká xiinꞌ i̱xiꞌ xata̱ꞌ ti̱xuꞌu̱ꞌ,
te̱ xiinꞌ ña̱ ja̱a̱nꞌ nda̱si̱ u̱nꞌ xata̱ꞌ yu̱kun toto̱ jaanꞌ.
8 Te̱ sa̱kuuꞌ toto̱ ndiká ja̱a̱nꞌ ndii,
i̱i̱n ni̱ nda̱ꞌaꞌ kuní a̱ ko̱o̱ a̱,
uxi̱ ku̱miꞌ metro ña̱ nani̱ꞌ a̱,
te̱ uvi̱ metro kanuꞌ i̱i̱n to̱o̱ ña̱ ndiká a̱.
9 Na̱tyu̱ꞌu̱n taꞌanꞌ u̱nꞌ uꞌu̱n taꞌan toto̱ ndiká ja̱a̱nꞌ i̱i̱n taꞌviꞌ,
te̱ tu̱ku̱ taꞌviꞌ na̱tyu̱ꞌu̱n taꞌanꞌ u̱nꞌ iñu̱ taꞌan toto̱ ndiká ja̱a̱nꞌ,
te̱ na̱kaꞌnu̱ u̱nꞌ i̱i̱n toto̱ ndiká ña̱ iñu̱ ja̱a̱nꞌ te̱ ku̱ta̱xkoꞌ a̱ yiꞌeꞌ yu̱kunꞌ toto̱ ja̱a̱nꞌ sa̱a̱ u̱nꞌ.
10 Ka̱sa̱ꞌa̱ u̱nꞌ uvi̱ xi̱ko̱ uxi̱ taꞌan laso tyi̱ndo̱ndi̱a̱ u̱nꞌ yu̱ꞌuꞌ toto̱ ndiká ña̱ uꞌu̱n taꞌan ña̱ ni̱ tyu̱ꞌu̱n taꞌanꞌ u̱nꞌ ja̱a̱nꞌ,
te̱ sa̱kanꞌ tu̱ tyi̱ndo̱ndi̱a̱ u̱nꞌ uvi̱ xi̱ko̱ uxi̱ taꞌan laso yu̱ꞌuꞌ toto̱ ndiká ña̱ iñu̱,
ña̱ ni̱ tyu̱ꞌu̱n taꞌanꞌ u̱nꞌ.
11 Te̱ ka̱sa̱ꞌa̱ tu̱ u̱nꞌ uvi̱ xi̱ko̱ uxi̱ taꞌan ka̱a̱ tivi̱ xiinꞌ mi̱iꞌ ndiꞌiꞌ bronce,
te̱ ka̱ta̱xkoꞌ u̱nꞌ i̱ꞌi̱n a̱ yavi̱ laso ña̱ ndondia yu̱ꞌuꞌ toto̱ ndiká ja̱a̱nꞌ,
te̱ tyi̱ꞌi̱ u̱nꞌ ka̱a̱ ja̱a̱nꞌ sa̱a̱ kuaꞌa̱n yu̱ꞌuꞌ toto̱ ndiká ja̱a̱nꞌ,
te̱ xiinꞌ ña̱ ja̱a̱nꞌ ndu̱i̱i̱n uvi̱ sa̱aꞌ toto̱ ndiká nani̱ꞌ ja̱a̱nꞌ.
12 Te̱ xaꞌa̱ꞌ a̱ ña̱ nani̱ꞌ ka̱ sa̱kuuꞌ toto̱ ndiká ña̱ ndoso̱ꞌ xata̱ꞌ yu̱kunꞌ ja̱a̱nꞌ ndii,
xi̱i̱nꞌ yu̱kunꞌ ku̱ta̱xkoꞌ yu̱ꞌuꞌ a̱ ña̱ ndoo̱ ndo̱so̱ꞌ.
13 Sa̱kanꞌ te̱ va̱ꞌa̱ va̱ nda̱si̱ xi̱i̱nꞌ yu̱kunꞌ toto̱ ja̱a̱nꞌ xiinꞌ yu̱ꞌuꞌ toto̱ ña̱ ndoo̱ ndo̱so̱ꞌ ja̱a̱nꞌ,
te̱ uvi̱ taꞌan kuarta kanuꞌ i̱i̱n to̱o̱ ku̱ta̱xkoꞌ ta̱taꞌviꞌ xi̱i̱nꞌ yu̱kunꞌ ja̱a̱nꞌ.
14 Ka̱sa̱ꞌa̱ tu̱ u̱nꞌ ña̱ ku̱saꞌvi̱ xata̱ꞌ yu̱kunꞌ toto̱ ja̱a̱nꞌ xiinꞌ i̱i̱nꞌ mbe̱e̱ tyiee̱ ña̱ ni̱ na̱keꞌi̱ xiinꞌ tiaku kuaꞌa,
te̱ ka̱sa̱ꞌa̱ tu̱ u̱nꞌ i̱nga̱ i̱i̱nꞌ va̱ꞌa̱ va̱ xiinꞌ i̱i̱nꞌ tixuꞌuꞌ ña̱ ka̱nuꞌ xata̱ꞌ yu̱kunꞌ ja̱a̱nꞌ.
15 ’Ka̱sa̱ꞌa̱ tu̱ u̱nꞌ kiꞌinꞌ vitu̱ꞌ kukunꞌ nda̱ku va̱ xiinꞌ mi̱iꞌ ndiꞌiꞌ i̱tunꞌ acacia,
te̱ tunꞌ ja̱a̱nꞌ ku̱ndu̱u̱ ndu̱yu̱ ti̱xi̱n yu̱kunꞌ toto̱ ja̱a̱nꞌ.
16 I̱ꞌi̱n vitu̱ꞌ ja̱a̱nꞌ ndii,
ku̱miꞌ metro yoso̱ꞌ sa̱va̱ kuní a̱ ko̱o̱ nu̱ꞌ ña̱ nani̱ꞌ nu̱ꞌ,
te̱ uni̱ kuarta kanuꞌ i̱i̱n to̱o̱ ña̱ ndiká nu̱ꞌ,
17 te̱ ka̱ꞌndi̱a̱ i̱ꞌnu̱ u̱nꞌ yu̱ꞌuꞌ i̱ꞌi̱n vitu̱ꞌ ja̱a̱nꞌ miiꞌ na̱kuꞌu̱n taꞌanꞌ nu̱ꞌ xiinꞌ i̱nga̱ vitu̱ꞌ.
Te̱ sa̱kanꞌ sa̱a̱ u̱nꞌ xiinꞌ sa̱kuuꞌ vitu̱ꞌ,
tunꞌ kuꞌu̱n ti̱xi̱n yu̱kunꞌ toto̱ ja̱a̱nꞌ.
18 Te̱ xi̱i̱nꞌ yu̱kunꞌ toto̱ ninu̱ ka̱ta̱ u̱nꞌ oko̱ taꞌan vitu̱ꞌ,
tunꞌ ti̱i̱n ndi̱a̱a̱ toto̱ ndiká ja̱a̱nꞌ,
19 te̱ ka̱sa̱ꞌa̱ tu̱ u̱nꞌ uvi̱ xi̱ko̱ taꞌan xaꞌa̱ꞌ sa̱kuuꞌ vitu̱ꞌ ja̱a̱nꞌ xiinꞌ mi̱iꞌ ndiꞌiꞌ plata,
te̱ tyi̱ndi̱e̱e̱ u̱nꞌ i̱ꞌi̱n a̱ miiꞌ ku̱i̱ta̱ xaꞌa̱ꞌ vitu̱ꞌ ja̱a̱nꞌ,
uvi̱ taꞌan a̱ uvi̱ taꞌan a̱ xaꞌa̱ꞌ i̱ꞌi̱n nu̱ꞌ,
sa̱kanꞌ te̱ miiꞌ ni̱ xa̱ꞌndi̱a̱ i̱ꞌnu̱ u̱nꞌ yu̱ꞌuꞌ i̱ꞌi̱n vitu̱ꞌ ja̱a̱nꞌ ndii,
na̱kuꞌu̱n taꞌanꞌ a̱ xiinꞌ ka̱a̱ xaꞌa̱ꞌ nu̱ꞌ ja̱a̱nꞌ.
20 ’Te̱ tu̱ku̱ taꞌviꞌ xi̱i̱nꞌ yu̱kunꞌ toto̱ ni̱nu̱ ndii,
oko̱ taꞌan vitu̱ꞌ ka̱sa̱ꞌa̱ u̱nꞌ ka̱ta̱ u̱nꞌ te̱ ti̱i̱n ndi̱a̱a̱ nu̱ꞌ toto̱ ndiká ja̱a̱nꞌ.
21 Te̱ ka̱sa̱ꞌa̱ tu̱ u̱nꞌ uvi̱ xi̱ko̱ taꞌan a̱ xaꞌa̱ꞌ sa̱kuuꞌ vitu̱ꞌ ja̱a̱nꞌ xiinꞌ mi̱iꞌ ndiꞌiꞌ plata,
te̱ tyi̱ndi̱e̱e̱ u̱nꞌ i̱ꞌi̱n a̱ miiꞌ ku̱i̱ta̱ xaꞌa̱ꞌ vitu̱ꞌ ja̱a̱nꞌ uvi̱ taꞌan a̱ uvi̱ taꞌan a̱ xaꞌa̱ꞌ i̱ꞌi̱n nu̱ꞌ.
22 Te̱ tu̱ku̱ taꞌviꞌ xata̱ꞌ yu̱kunꞌ toto̱ ja̱a̱nꞌ xtoꞌniꞌ miiꞌ ketaꞌ ñu̱ꞌu̱ ndii,
ka̱sa̱ꞌa̱ u̱nꞌ iñu̱ taꞌan vitu̱ꞌ ku̱i̱ta̱ i̱kanꞌ te̱ ti̱i̱n ndi̱a̱a̱ nu̱ꞌ toto̱ ndiká ja̱a̱nꞌ.
23 Te̱ ka̱sa̱ꞌa̱ tu̱ u̱nꞌ i̱nga̱ uvi̱ taꞌan ka̱ vitu̱ꞌ te̱ ku̱i̱ta̱ i̱i̱n nda̱a̱ꞌ i̱i̱n nda̱a̱ꞌ nu̱ꞌ xiki̱ꞌ yu̱kunꞌ toto̱ ja̱a̱nꞌ xata̱ꞌ a̱.
24 Te̱ uvi̱ sa̱aꞌ tunꞌ ku̱i̱ta̱ xiki̱ꞌ yu̱kunꞌ ja̱a̱nꞌ ndii,
kuní a̱ i̱i̱n katyi ko̱o̱ nuu̱ꞌ nu̱ꞌ nuu̱ꞌ ñu̱ꞌuꞌ,
te̱ kutu̱ꞌ ku̱i̱ta̱ nu̱ꞌ ko̱tii̱n nuu̱ꞌ nu̱ꞌ ni̱nu̱ xiinꞌ i̱i̱n nda̱a̱ꞌ ka̱a̱ tivi̱.
Te̱ tunꞌ ja̱a̱nꞌ ndii,
i̱i̱n nda̱a̱ꞌ ku̱i̱ti̱ꞌ xiki̱ꞌ yu̱kunꞌ ja̱a̱nꞌ ku̱i̱i̱n nu̱ꞌ,
te̱ sa̱kanꞌ sa̱a̱ u̱nꞌ xiinꞌ uvi̱ sa̱aꞌ tunꞌ ku̱i̱ta̱ xiki̱ꞌ yu̱kunꞌ ja̱a̱nꞌ.
25 Sa̱kanꞌ na kuiiꞌ uni̱a̱ taꞌan vitu̱ꞌ kuní a̱ ka̱sa̱ꞌa̱ u̱nꞌ,
te̱ xaꞌu̱n i̱i̱n taꞌan xaꞌa̱ꞌ vitu̱ꞌ ja̱a̱nꞌ ka̱sa̱ꞌa̱ u̱nꞌ xiinꞌ mi̱iꞌ ndiꞌiꞌ plata,
sa̱kanꞌ te̱ uvi̱ taꞌan a̱ uvi̱ taꞌan ki̱ꞌi̱ xaꞌa̱ꞌ i̱ꞌi̱n vitu̱ꞌ ja̱a̱nꞌ.
26 ’Ka̱sa̱ꞌa̱ tu̱ u̱nꞌ uꞌu̱n taꞌan vitu̱ꞌ xiinꞌ miiꞌ ndiꞌiꞌ i̱tunꞌ acacia,
tunꞌ ku̱i̱ta̱ꞌnu̱ ndi̱xi̱n xaꞌa̱ꞌ yu̱kunꞌ toto̱ ni̱nu̱,
27 te̱ uꞌu̱n taꞌan nu̱ꞌ ku̱i̱ta̱ꞌnu̱ xaꞌa̱ꞌ yu̱kunꞌ toto̱ ninu̱,
te̱ uꞌu̱n taꞌan tu̱ku̱ nu̱ꞌ ku̱i̱ta̱ꞌnu̱ xaꞌa̱ꞌ yu̱kunꞌ toto̱ xata̱ꞌ a̱ xtoꞌniꞌ miiꞌ ketá ñu̱ꞌu̱.
28 Te̱ tunꞌ kaso̱ꞌ ma̱ꞌiꞌ yu̱kunꞌ ndii,
kuní a̱ xkaꞌndi̱a̱ nuu̱ꞌ nu̱ꞌ nde̱e̱ ki̱ꞌe̱ ya̱ti̱n nuu̱ꞌ vitu̱ꞌ,
tunꞌ itaꞌ xi̱i̱nꞌ yu̱kunꞌ ja̱a̱nꞌ.
29 Te̱ sa̱kuuꞌ vitu̱ꞌ ja̱a̱nꞌ ndii,
kuní a̱ sa̱kutyiꞌ u̱nꞌ oro xata̱ꞌ nu̱ꞌ,
te̱ ka̱sa̱ꞌa̱ tu̱ u̱nꞌ ndiaꞌviꞌ ka̱a̱ tivi̱ xiinꞌ mi̱iꞌ ndiꞌiꞌ oro miiꞌ xkaꞌndi̱a̱ nuu̱ꞌ tunꞌ taꞌnuꞌ i̱ꞌnu̱ ti̱xi̱n yu̱kunꞌ ja̱a̱nꞌ.
Te̱ kuní a̱ sa̱kutyiꞌ u̱nꞌ oro xata̱ꞌ sa̱kuuꞌ tunꞌ ja̱a̱nꞌ.
30 Ka̱sa̱ꞌa̱ u̱nꞌ yu̱kunꞌ toto̱ ja̱a̱nꞌ sa̱a̱ niiꞌ kaaꞌ ña̱ ni̱ sa̱niaꞌá i̱ nuu̱ꞌ u̱nꞌ xíniꞌ i̱kuꞌ Sinaí.
31 ’Ka̱sa̱ꞌa̱ u̱nꞌ i̱i̱n toto̱ ndiká ña̱ ni̱ ku̱a̱ꞌa̱ xiinꞌ yuꞌva lino va̱ꞌa̱ va̱,
xiinꞌ tiaku̱ ndi̱ꞌeꞌ,
xiinꞌ tiaku̱ ndu̱kunꞌ,
xiinꞌ tiaku̱ kuaꞌa.
Te̱ na̱ku̱ tu̱ u̱nꞌ uvi̱ taꞌan querubin nda̱tu̱nꞌ xa̱va̱ꞌa̱ xata̱ꞌ toto̱ ja̱a̱nꞌ.
32 Ndiꞌiꞌ ja̱a̱nꞌ te̱ sa̱tiín u̱nꞌ yu̱ꞌuꞌ toto̱ ja̱a̱nꞌ ka̱a̱ tivi̱ ña̱ ni̱ ku̱a̱ꞌa̱ xiinꞌ oro,
ña̱ ndondia nuu̱ꞌ ku̱miꞌ sa̱aꞌ ndu̱yu̱,
tunꞌ acacia tunꞌ itaꞌ nuu̱ꞌ ku̱miꞌ sa̱aꞌ ka̱a̱ kiꞌiꞌ xaꞌa̱ꞌ nu̱ꞌ ña̱ ni̱ ku̱a̱ꞌa̱ xiinꞌ plata,
te̱ ka̱ta̱xkoꞌ u̱nꞌ toto̱ ja̱a̱nꞌ ti̱xi̱n yu̱kunꞌ.
33 Sa̱kanꞌ te̱ ka̱ta̱xkoꞌ u̱nꞌ toto̱ ndiká ti̱xi̱n ka̱a̱ tivi̱ ja̱a̱nꞌ,
te̱ xata̱ꞌ toto̱ ja̱a̱nꞌ ka̱ni̱ u̱nꞌ xatu̱nꞌ miiꞌ naá kuento ña̱ ni̱ ndoo̱ yuꞌu̱,
Ndiosí,
xiinꞌ ndo̱ꞌ,
te̱ toto̱ ja̱a̱nꞌ ku̱ndu̱u̱ ña̱ ti̱a̱si̱ miiꞌ su̱ꞌu̱n,
xiinꞌ miiꞌ su̱ꞌu̱n xa̱va̱ꞌa̱.
34 Te̱ tunꞌ ndasi xatu̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ ndii,
tyi̱nduꞌu̱ꞌ u̱nꞌ nu̱ꞌ yu̱ꞌuꞌ xatu̱nꞌ miiꞌ naá kuento ña̱ ni̱ ndoo̱ yuꞌu̱,
Ndiosí,
xiinꞌ ndo̱ꞌ,
te̱ tyi̱nduꞌu̱ꞌ u̱nꞌ nu̱ꞌ miiꞌ su̱ꞌu̱n va̱ ja̱a̱nꞌ.
35 Te̱ mesa miiꞌ ku̱ndi̱e̱e̱ xita̱ꞌ va̱ꞌa̱ ndii,
miiꞌ su̱ꞌu̱n ka̱ni̱ u̱nꞌ tunꞌ ja̱a̱nꞌ xi̱i̱nꞌ yu̱kunꞌ toto̱ ni̱nu̱,
te̱ kandelabro ndii,
ya̱ti̱n nuu̱ꞌ a̱ miiꞌ iinꞌ mesa ja̱a̱nꞌ ka̱ni̱ ña̱ ja̱a̱nꞌ xi̱i̱nꞌ yu̱kunꞌ toto̱ ninu̱.
36 ’Te̱ ka̱sa̱ꞌa̱ u̱nꞌ i̱i̱n toto̱ ndiká ña̱ nda̱si̱ yiꞌeꞌ yu̱kunꞌ toto̱ ja̱a̱nꞌ,
xiinꞌ yuꞌva̱ ndi̱ꞌeꞌ,
xiinꞌ yuꞌva̱ ndu̱kunꞌ,
xiinꞌ yuꞌva̱ kuaꞌa,
xiinꞌ yuꞌva̱ lino ña̱ va̱ꞌa̱ va̱ ni̱ na̱keꞌi̱.
37 Te̱ ka̱sa̱ꞌa̱ tu̱ u̱nꞌ uꞌu̱n taꞌan ndu̱yu̱ xiinꞌ tunꞌ acacia,
te̱ sa̱kutyiꞌ u̱nꞌ nu̱ꞌ xiinꞌ mi̱iꞌ ndiꞌiꞌ oro,
te̱ nuu̱ꞌ tunꞌ ja̱a̱nꞌ ka̱ta̱a̱ u̱nꞌ toto̱ ndiká,
xiinꞌ ka̱a̱ ki̱ꞌiꞌ ña̱ ka̱sa̱ꞌa̱ u̱nꞌ xiinꞌ mi̱iꞌ ndiꞌiꞌ oro.
Te̱ ka̱sa̱ꞌa̱ tu̱ u̱nꞌ uꞌu̱n taꞌan ka̱a̱ xiinꞌ mi̱iꞌ ndiꞌiꞌ bronce miiꞌ ku̱i̱ta̱ xaꞌa̱ꞌ uꞌu̱n sa̱aꞌ ndu̱yu̱ ja̱a̱nꞌ.