Yoꞌoꞌ ku̱a̱xi̱ nde̱iꞌ ña̱ kaꞌán sa̱a̱ kuní a̱ na̱soko̱ꞌ ne̱ vi̱ꞌe̱ Israel ña̱ꞌa̱ ti̱xi̱n yu̱kunꞌ toto̱ nuu̱ꞌ Ndiosí
25
Ni̱ kaꞌa̱n Yahvé xiinꞌ Moisés ndii:
2 ―Kaꞌa̱n xiinꞌ ne̱ vi̱ꞌe̱ Israel na ki̱xi̱n na̱soko̱ꞌ ni̱a̱ tu̱mani̱ꞌ nuu̱ꞌ i̱.
Te̱ na̱ti̱i̱n ndo̱ꞌ tu̱mani̱ꞌ ña̱ nasoko̱ꞌ ni̱a̱ ja̱a̱nꞌ nda̱ꞌaꞌ ne̱ taxiꞌ a̱ xaꞌa̱ꞌ a̱ ña̱ sa̱kanꞌ kuní mi̱iꞌ ni̱a̱,
te̱ taxiꞌ tu̱ ni̱a̱ a̱ xiinꞌ i̱i̱n ka̱niiꞌ nimá ni̱a̱.
3 Te̱ ña̱ yo̱ꞌo̱ꞌ ku̱i̱ti̱ꞌ nduuꞌ tu̱mani̱ꞌ ña̱ kuní a̱ na̱ti̱i̱n ndo̱ꞌ nda̱ꞌaꞌ ni̱a̱:
oro,
xiinꞌ plata,
xiinꞌ cobre,
4 xiinꞌ toto̱ ndi̱ꞌeꞌ,
xiinꞌ toto̱ ndu̱kunꞌ,
xiinꞌ toto̱ kuaꞌa,
xiinꞌ toto̱ ña̱ ni̱ ku̱a̱ꞌa̱ xiinꞌ yuꞌva̱ lino va̱ꞌa̱,
xiinꞌ i̱xiꞌ ti̱xuꞌu̱ꞌ,
5 xiinꞌ i̱i̱nꞌ xata̱ꞌ mbe̱e̱ tyie̱e,
ña̱ ni̱ na̱keꞌi̱ xiinꞌ tiaku̱ kuaꞌa,
xiinꞌ i̱i̱nꞌ xata̱ꞌ ti̱xuꞌu̱ꞌ ña̱ nda̱tu̱nꞌ va̱,
xiinꞌ i̱tunꞌ tunꞌ naniꞌ acacia,
6 xiinꞌ xa̱ꞌa̱n oliva ña̱ kieé ti̱xi̱n ka̱a̱ tuún,
xiinꞌ xa̱ꞌa̱n xavixínꞌ ña̱ tiinꞌ sutu̱ te̱ sañuꞌuꞌ ra̱ ne̱ yivi̱ꞌ,
te̱ tiinꞌ tu̱ ra̱ a̱ te̱ xa xavixínꞌ ra̱ ti̱xi̱n yu̱kunꞌ,
7 xiinꞌ yuu̱ꞌ ña̱ naniꞌ ónice,
xiinꞌ i̱nga̱ ka̱ yuu̱ꞌ nda̱tu̱nꞌ ña̱ ndieeꞌ nuu̱ꞌ ka̱a̱ yaxinꞌ soko̱ soo̱ꞌ ti̱koo̱ꞌ ña̱ niꞌnuꞌ sutu̱ kaꞌnuꞌ,
xiinꞌ nuu̱ꞌ toto̱ kukunꞌ ña̱ ndianduꞌu̱ꞌ ti̱a̱ꞌni̱ ra̱.
8 Ka̱sa̱ꞌa̱ tu̱ u̱nꞌ i̱i̱n yu̱kunꞌ toto̱ miiꞌ sa̱kaꞌnuꞌ ndo̱ꞌ yuꞌu̱,
te̱ i̱kanꞌ ko̱o̱ i̱ te̱i̱n ndo̱ꞌ.
9 Te̱ yu̱kunꞌ toto̱ ja̱a̱nꞌ xiinꞌ sa̱kuuꞌ nda̱tyuunꞌ ña̱ yoo ti̱xi̱n a̱ ndii,
kuní a̱ ka̱sa̱ꞌa̱ u̱nꞌ u̱n sa̱a̱ niiꞌ kaaꞌ ña̱ ni̱ saniaꞌá i̱ nuu̱ꞌ u̱nꞌ.
Yoꞌoꞌ kaꞌán Ndiosí xiinꞌ Moisés sa̱a̱ ko̱o̱ xatu̱nꞌ miiꞌ ku̱naa̱ tu̱ꞌu̱n nde̱iꞌ a̱ ña̱ ni̱ ndoo̱ a̱ xiinꞌ ne̱ vi̱ꞌe̱ Israel
10 ’Ka̱sa̱ꞌa̱ tu̱ u̱nꞌ i̱i̱n xatu̱nꞌ xiinꞌ mi̱iꞌ ndiꞌiꞌ tunꞌ acacia ña̱ nani̱ꞌ nu̱ꞌ ndii,
i̱i̱n metro kanuꞌ i̱i̱n to̱o̱ ku̱miꞌ nu̱ꞌ,
te̱ uni̱ kuarta kanuꞌ i̱i̱n to̱o̱ ña̱ ndiká nu̱ꞌ,
te̱ sa̱kanꞌ tu̱ ña̱ sukun nu̱ꞌ.
11 Xata̱ꞌ nu̱ꞌ xiinꞌ ti̱xi̱n nu̱ꞌ ndii,
ko̱ndi̱a̱ u̱nꞌ mi̱iꞌ ndiꞌiꞌ oro,
te̱ sa̱a̱ kuaꞌa̱n yu̱ꞌuꞌ xatu̱nꞌ ja̱a̱nꞌ tyi̱ndo̱ndi̱a̱ tu̱ u̱nꞌ ndi̱kiꞌ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro.
12 Te̱ ka̱sa̱ꞌa̱ tu̱ u̱nꞌ ku̱miꞌ taꞌan ka̱a̱ tivi̱ xiinꞌ mi̱iꞌ ndiꞌiꞌ oro,
te̱ tyi̱ndo̱ndi̱a̱ u̱nꞌ ku̱miꞌ sa̱aꞌ a̱ xaꞌa̱ꞌ xatu̱nꞌ ja̱a̱nꞌ,
uvi̱ taꞌan,
uvi̱ taꞌan ta̱taꞌviꞌ xi̱i̱nꞌ nu̱ꞌ.
13 Te̱ ka̱sa̱ꞌa̱ tu̱ u̱nꞌ i̱i̱n uvi̱ tunꞌ nani̱ꞌ xiinꞌ tunꞌ acacia,
te̱ ti̱saꞌvi̱ u̱nꞌ ka̱niiꞌ nu̱ꞌ xiinꞌ oro.
14 Tyi̱ꞌni̱ u̱nꞌ tunꞌ nani̱ꞌ ja̱a̱nꞌ yavi̱ ka̱a̱ tivi̱ ña̱ ni̱ tyi̱ndo̱ndi̱a̱ u̱nꞌ ta̱taꞌviꞌ xi̱i̱nꞌ xatu̱nꞌ ja̱a̱nꞌ,
sa̱kanꞌ te̱ ku̱vi̱ ko̱ni̱ꞌi̱ ndo̱ꞌ nu̱ꞌ kuꞌu̱n ndo̱ꞌ.
15 Te̱ na ndoo̱ mi̱iꞌ tunꞌ nani̱ꞌ ja̱a̱nꞌ ku̱i̱ꞌni̱ nu̱ꞌ ti̱xi̱n ka̱a̱ tivi̱ ña̱ ndondia xata̱ꞌ xatu̱nꞌ ja̱a̱nꞌ,
te̱ tä̱va̱ꞌ ndo̱ꞌ nu̱ꞌ.
16 Ti̱xi̱n xatu̱nꞌ ja̱a̱nꞌ ta̱a̱nꞌ u̱nꞌ yuu̱ꞌ miiꞌ yoso̱ꞌ tu̱ꞌu̱n nde̱iꞌ i̱ ña̱ ni̱ ta̱xi̱ i̱ nda̱ꞌaꞌ u̱nꞌ.
17 Ka̱sa̱ꞌa̱ tu̱ u̱nꞌ i̱i̱n tunꞌ nda̱si̱ xatu̱nꞌ ja̱a̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ,
te̱ xiinꞌ mi̱iꞌ ndiꞌiꞌ oro ka̱sa̱ꞌa̱ u̱nꞌ tunꞌ ja̱a̱nꞌ,
te̱ i̱i̱n metro kanuꞌ i̱i̱n to̱o̱ ku̱miꞌ nu̱ꞌ ña̱ nani̱ꞌ nu̱ꞌ,
te̱ uni̱ kuarta kanuꞌ i̱i̱n to̱o̱ ña̱ ndiká nu̱ꞌ.
18 Te̱ ka̱sa̱ꞌa̱ tu̱ u̱nꞌ uvi̱ taꞌan ña̱ naniꞌ querubin xiinꞌ mi̱iꞌ ndiꞌiꞌ oro,
te̱ xiinꞌ ka̱a̱ vie̱ tu̱xiꞌ u̱nꞌ ña̱ ja̱a̱nꞌ,
te̱ i̱i̱n nda̱a̱ꞌ i̱i̱n nda̱a̱ꞌ a̱ ka̱ta̱ u̱nꞌ ta̱taꞌviꞌ xiki̱ꞌ tunꞌ ndasi xatu̱nꞌ ja̱a̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ.
19 Ta̱taꞌviꞌ xiki̱ꞌ tunꞌ ndasi xatu̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ ja̱a̱nꞌ ndii,
ka̱ta̱ u̱nꞌ i̱ꞌi̱n ña̱ naniꞌ querubin,
te̱ i̱i̱n nda̱a̱ꞌ ku̱ndu̱u̱ uvi̱ sa̱aꞌ a̱ xiinꞌ tunꞌ ndasi xatu̱nꞌ ja̱a̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ.
20 Te̱ querubin ja̱a̱nꞌ ndii,
xata̱ꞌ tunꞌ ndasi xatu̱nꞌ miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ,
ko̱to̱ ndo̱so̱ꞌ a̱ ku̱ndi̱e̱e̱ a̱,
te̱ ti̱saꞌvi̱ a̱ xatu̱nꞌ ja̱a̱nꞌ xiinꞌ ndi̱xi̱n a̱.
21 Ti̱xi̱n xatu̱nꞌ ja̱a̱nꞌ ta̱a̱nꞌ u̱nꞌ uvi̱ sa̱aꞌ yuu̱ꞌ miiꞌ yoso̱ꞌ tu̱ꞌu̱n nde̱iꞌ ña̱ ta̱xi̱ i̱ nda̱ꞌaꞌ u̱nꞌ,
i̱kanꞌ te̱ nda̱si̱ u̱nꞌ nu̱ꞌ.
22 Te̱ te̱i̱n querubin,
ña̱ ndieeꞌ xata̱ꞌ tunꞌ ndasi xatu̱nꞌ ja̱a̱nꞌ,
miiꞌ xatia sutu̱ níiꞌ ki̱tiꞌ xaꞌa̱ꞌ ku̱a̱tyi̱ ne̱ yivi̱ꞌ,
kaꞌa̱n i̱ xiinꞌ u̱nꞌ.
Te̱ i̱kanꞌ ta̱xi̱ i̱ sa̱kuuꞌ tu̱ꞌu̱n nde̱iꞌ ña̱ kuní i̱ kaꞌa̱n u̱nꞌ xiinꞌ ne̱ vi̱ꞌe̱ Israel,
ne̱ taꞌanꞌ u̱nꞌ,
sa̱a̱ ni̱a̱.
Yoꞌoꞌ kaꞌán a̱ xaꞌa̱ꞌ mesa miiꞌ ku̱ndi̱e̱e̱ xita̱ꞌ va̱ꞌa̱ ña̱ nasoko̱ꞌ sutu̱ nuu̱ꞌ Ndiosí
23 ’Ka̱sa̱ꞌa̱ u̱nꞌ i̱i̱n mesa xiinꞌ mi̱iꞌ ndiꞌiꞌ i̱tunꞌ acacia.
I̱i̱n metro kanuꞌ i̱i̱n to̱o̱ ña̱ nani̱ꞌ nu̱ꞌ,
te̱ uvi̱ taꞌan kuarta kanuꞌ uni̱ taꞌan nuu̱ꞌ nda̱ꞌaꞌ ña̱ ndiká nu̱ꞌ,
te̱ uni̱ taꞌan kuarta kanuꞌ i̱i̱n to̱o̱ ña̱ sukun nu̱ꞌ sa̱a̱ u̱nꞌ.
24 Ko̱ndi̱a̱ u̱nꞌ mi̱iꞌ ndiꞌiꞌ oro ka̱niiꞌ nu̱ꞌ,
te̱ tyi̱ndo̱ndi̱a̱ tu̱ u̱nꞌ sa̱a̱ xinunduu yu̱ꞌuꞌ mesa ja̱a̱nꞌ ndi̱kiꞌ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro.
25 Nda̱sa̱nda̱tu̱nꞌ u̱nꞌ sa̱a̱ kuaꞌa̱n yu̱ꞌuꞌ mesa xiinꞌ i̱i̱n tuꞌu̱nꞌ oro,
te̱ i̱i̱n to̱o̱ ña̱ ndiká ko̱o̱ a̱ sa̱a̱ u̱nꞌ,
te̱ tyi̱ndo̱ndi̱a̱ u̱nꞌ tivi̱ oro xata̱ꞌ ña̱ ja̱a̱nꞌ.
26 Te̱ ka̱sa̱ꞌa̱ tu̱ u̱nꞌ ku̱miꞌ taꞌan ka̱a̱ tivi̱ xiinꞌ mi̱iꞌ ndiꞌiꞌ oro,
te̱ tyi̱ndo̱ndi̱a̱ u̱nꞌ u̱n ku̱miꞌ sa̱aꞌ xiki̱ꞌ mesa miiꞌ yoo xaꞌa̱ꞌ nu̱ꞌ.
27 Ka̱a̱ tivi̱ ja̱a̱nꞌ ndii,
ti̱xi̱n a̱ miiꞌ ndondia ka̱a̱ ndiki̱ ña̱ xanda̱tu̱nꞌ mesa ja̱a̱nꞌ ku̱ndo̱ndi̱a̱ a̱,
sa̱kanꞌ te̱ ti̱xi̱n ka̱a̱ tivi̱ ja̱a̱nꞌ xkaꞌndi̱a̱ ka̱roti,
tunꞌ ti̱i̱n te̱ yivi̱ꞌ,
te̱ ko̱ni̱ꞌi̱ ra̱ mesa ja̱a̱nꞌ kuꞌu̱n ra̱.
28 Ka̱roti ja̱a̱nꞌ ndii xiinꞌ tunꞌ acacia ka̱sa̱ꞌa̱ u̱nꞌ nu̱ꞌ,
te̱ ko̱ndi̱a̱ u̱nꞌ oro ka̱niiꞌ xata̱ꞌ nu̱ꞌ,
te̱ xiinꞌ tunꞌ ja̱a̱nꞌ ko̱ni̱ꞌi̱ te̱ yivi̱ꞌ mesa ja̱a̱nꞌ kuꞌu̱n ra̱.
29 Te̱ ka̱sa̱ꞌa̱ tu̱ u̱nꞌ kiꞌinꞌ nda̱tyuunꞌ ña̱ ku̱i̱ta̱ nuu̱ꞌ mesa ja̱a̱nꞌ xiinꞌ mi̱iꞌ ndiꞌiꞌ oro,
naa kuuꞌ koꞌo̱ꞌ,
xiinꞌ ti̱ka̱si̱,
xiinꞌ ya̱xinꞌ,
xiinꞌ yo̱o̱,
te̱ i̱kanꞌ ku̱ꞌu̱n ña̱ yoo ti̱kui,
ña̱ nasoko̱ꞌ sutu̱ nuu̱ꞌ Ndiosí.
30 Te̱ nuu̱ꞌ mesa ja̱a̱nꞌ tyi̱ndi̱e̱e̱ u̱nꞌ xita̱ꞌ va̱ꞌa̱ ña̱ na̱soko̱ꞌ ndo̱ꞌ nuu̱ꞌ i̱ ña̱ niaꞌá ña̱ yoo i̱ xiinꞌ ndo̱ꞌ,
te̱ sa̱kuuꞌ i̱tyiꞌ kii̱ꞌ nasoko̱ꞌ ndo̱ꞌ ndii,
nuu̱ꞌ mesa ja̱a̱nꞌ ku̱ndi̱e̱e̱ xita̱ꞌ va̱ꞌa̱ ña̱ nasoko̱ꞌ ndo̱ꞌ nuu̱ꞌ i̱.
Yoꞌoꞌ kaꞌán xaꞌa̱ꞌ kandelabro tyiee̱ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro
31 ’Ka̱sa̱ꞌa̱ tu̱ u̱nꞌ i̱i̱n kandelabro xiinꞌ mi̱iꞌ ndiꞌiꞌ oro,
te̱ xiinꞌ ka̱a̱ vie̱ tu̱xiꞌ u̱nꞌ u̱n kii̱ꞌ ka̱sa̱ꞌa̱ u̱nꞌ xaꞌa̱ꞌ a̱,
xiinꞌ to̱koꞌ a̱,
xiinꞌ copa ña̱ ku̱i̱ta̱ nda̱ꞌaꞌ a̱,
xiinꞌ i̱ta̱ a̱ ndii,
i̱i̱n nda̱a̱ꞌ ku̱i̱ti̱ꞌ kuní a̱ ku̱ndu̱u̱ ka̱niiꞌ a̱.
32 Te̱ ko̱o̱ iñu̱ taꞌan nda̱ꞌaꞌ a̱,
uni̱ taꞌan uni̱ taꞌan a̱ ku̱ndo̱ndi̱a̱ ta̱taꞌviꞌ xi̱i̱nꞌ a̱.
33 Te̱ i̱ꞌi̱n nda̱ꞌaꞌ a̱ ña̱ iñu̱ taꞌan ja̱a̱nꞌ ndii,
kuní a̱ ka̱ta̱ u̱nꞌ uni̱ taꞌan copa ña̱ iinꞌ nde̱e̱ naa i̱ta̱ tunꞌ mendra nuu̱ꞌ a̱ miiꞌ ku̱i̱ta̱ ka̱a̱ tuún,
te̱ ko̱o̱ a̱ nde̱e̱ naa iinꞌ i̱ta̱ lu̱tuꞌ,
te̱ ko̱o̱ tu̱ yuku̱ a̱ nde̱e̱ naa yuku̱ i̱ta̱.
34 Te̱ xaꞌa̱ꞌ kandelabro ja̱a̱nꞌ ndii,
kuní a̱ ka̱sa̱ꞌa̱ u̱nꞌ ku̱miꞌ taꞌan copa ña̱ iinꞌ nde̱e̱ naa i̱ta̱ tunꞌ mendra ku̱i̱ta̱ nuu̱ꞌ a̱ miiꞌ ku̱i̱ta̱ ka̱a̱ tuún,
te̱ ko̱o̱ a̱ nde̱e̱ naa iinꞌ i̱ta̱ lu̱tuꞌ,
te̱ ko̱o̱ tu̱ yuku̱ a̱ nde̱e̱ naa yuku̱ i̱ta̱.
35 Te̱ kuní a̱ ka̱sa̱ꞌa̱ u̱nꞌ copa ku̱i̱ta̱ xaꞌa̱ꞌ i̱ꞌi̱n uni̱ sa̱aꞌ na̱ꞌa̱ nda̱ꞌaꞌ kandelabro ja̱a̱nꞌ miiꞌ nduuꞌ iinꞌ nda̱ꞌaꞌ kandelabro ja̱a̱nꞌ xiinꞌ xaꞌa̱ꞌ a̱,
te̱ naa iinꞌ i̱ta̱ tunꞌ mendra ko̱o̱ copa ja̱a̱nꞌ sa̱a̱ u̱nꞌ.
36 Ña̱ nduuꞌ copa ja̱a̱nꞌ xiinꞌ nda̱ꞌaꞌ a̱ ndii,
i̱i̱n nda̱a̱ꞌ ku̱ndu̱u̱ a̱ xiinꞌ ka̱niiꞌ kandelabro ja̱a̱nꞌ,
te̱ xa̱ mi̱iꞌ ndiꞌiꞌ oro ku̱ndu̱u̱ a̱,
te̱ xiinꞌ ka̱a̱ vie̱ kuní a̱ ka̱sa̱ꞌa̱ u̱nꞌ.
37 Ka̱sa̱ꞌa̱ tu̱ u̱nꞌ uxa̱ taꞌan ka̱a̱ tuún ka̱ta̱ u̱nꞌ nuu̱ꞌ kandelabro ja̱a̱nꞌ,
te̱ kii̱ꞌ na̱ku̱nꞌ u̱nꞌ u̱n ndii,
kuní a̱ so̱ꞌo̱ ndi̱ko̱niꞌiꞌ u̱nꞌ u̱n miiꞌ yoo yiꞌeꞌ.
38 Te̱ xinda̱ꞌ ña̱ tiinꞌ ndo̱ꞌ ñuꞌu̱ ti̱keí,
xiinꞌ koꞌo̱ꞌ miiꞌ ñuꞌuꞌ yaa̱ꞌ nuꞌu̱ ndii,
xiinꞌ mi̱iꞌ ndiꞌiꞌ oro kuní a̱ ka̱sa̱ꞌa̱ u̱nꞌ u̱n.
39 Oko̱ uxi̱ ku̱miꞌ kilo mi̱iꞌ ndiꞌiꞌ oro kuní a̱ ti̱i̱n u̱nꞌ te̱ ka̱sa̱ꞌa̱ u̱nꞌ kandelabro ja̱a̱nꞌ xiinꞌ sa̱kuuꞌ nda̱tyuunꞌ ña̱ kuaꞌa̱n xiinꞌ a̱.
40 Ko̱to̱ kaxiꞌ va̱ u̱nꞌ te̱ ka̱sa̱ꞌa̱ u̱nꞌ kandelabro ja̱a̱nꞌ sa̱a̱ niiꞌ kaaꞌ ña̱ ni̱ sa̱niaꞌá i̱ nuu̱ꞌ u̱nꞌ xíniꞌ i̱kuꞌ Sinaí yoꞌoꞌ.