Yoꞌoꞌ natiinꞌ tukuuꞌ ne̱ vi̱ꞌe̱ Israel nda̱ꞌaꞌ Ndiosí kuento a̱ ña̱ ndoó a̱ xiinꞌ ni̱a̱ xíniꞌ i̱kuꞌ Sinaí
24
Ni̱ kaꞌa̱n ka̱ Yahvé xiinꞌ Moisés ndii:
―Kuaꞌan ka̱a̱ xíniꞌ i̱kuꞌ miiꞌ iinꞌ i̱ yoꞌoꞌ,
te̱ naka̱a̱ tu̱ Aarón xiinꞌ u̱nꞌ,
xiinꞌ Nadab,
xiinꞌ Abiú,
te̱ sa̱kanꞌ tu̱ ka̱a̱ uni̱ xi̱ko̱ uxi̱ sa̱aꞌ te̱ xi̱xa̱,
te̱ xaꞌndia tyuunꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel.
Te̱ sa̱kuuꞌ te̱ ja̱a̱nꞌ ndii,
nde̱e̱ ndo̱so̱ꞌ kuní a̱ ndoo̱ ra̱ ku̱i̱ta̱ xitiꞌ ra̱ te̱ sa̱kaꞌnuꞌ ra̱ yuꞌu̱.
2 I̱i̱n nda̱a̱ꞌ yoꞌó ku̱i̱ti̱ꞌ ku̱vi̱ ku̱ya̱ti̱n nuu̱ꞌ yuꞌu̱,
Yahvé,
Moisés.
Te̱ sa̱kuuꞌ te̱ ku̱a̱xi̱ xiinꞌ u̱nꞌ ndii,
kü̱vi̱ ku̱ya̱ti̱n ra̱,
te̱ ni̱ nde̱e̱ kü̱vi̱ tu̱ ka̱a̱ nde̱e̱ i̱i̱n ne̱ yivi̱ꞌ,
ne̱ kuaꞌa̱ꞌ ñaa̱ꞌ,
xiinꞌ u̱nꞌ yoꞌoꞌ ―ni̱ katyi̱ a̱.
3 Sa̱kanꞌ te̱ ni̱ na̱kaa̱ꞌ Moisés miiꞌ itaꞌ ne̱ yivi̱ꞌ ja̱a̱nꞌ,
te̱ ni̱ kaꞌa̱n ra̱ xiinꞌ ni̱a̱ sa̱kuuꞌ ña̱ ni̱ kaꞌa̱n Yahvé Ndiosí xiinꞌ ra̱ xiinꞌ sa̱kuuꞌ ña̱ ni̱ kaꞌa̱n tyuunꞌ a̱.
Te̱ i̱i̱n ni̱ nda̱ꞌaꞌ ni̱ kaꞌa̱n sa̱kuuꞌ ni̱a̱ ndii:
―Sa̱xinu̱ ndu̱ sa̱kuuꞌ ña̱ ni̱ kaꞌa̱n tyuunꞌ Yahvé xiinꞌ u̱nꞌ ―ni̱ katyi̱ ni̱a̱.
4 Sa̱kanꞌ te̱ ni̱ ke̱ꞌi̱ Moisés sa̱kuuꞌ ña̱ ni̱ kaꞌa̱n tyuunꞌ Yahvé xiinꞌ ra̱.
Te̱ ni̱a̱ꞌa̱ va̱ kii̱ꞌ ni̱ kitu̱ꞌ tu̱ku̱ kivi̱ꞌ ndii,
ni̱ ndo̱koo̱ ra̱,
te̱ ni̱ xa̱ꞌa̱ ra̱ i̱i̱n altar xaꞌa̱ꞌ i̱kuꞌ Sinaí ja̱a̱nꞌ miiꞌ sa̱kaꞌnuꞌ ra̱ Ndiosí.
Te̱ ni̱ xa̱ta̱ ndi̱tyi̱ tu̱ ra̱ uxi̱ uvi̱ taꞌan yuu̱ꞌ na̱ndaa̱ꞌ a̱ xaꞌa̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel ja̱a̱nꞌ,
sa̱kanꞌ ña̱ uxi̱ uvi̱ ti̱ꞌvi̱ kuuꞌ ne̱ ja̱a̱nꞌ.
5 Ndi̱ꞌi̱ ja̱a̱nꞌ te̱ ni̱ ti̱ꞌviꞌ Moisés ndiaꞌviꞌ te̱ sa̱va̱,
te̱ vi̱ꞌe̱ Israel ja̱a̱nꞌ,
te̱ ka̱ꞌni̱ꞌ ra̱ si̱ndiki̱ꞌ,
te̱ na̱soko̱ꞌ ra̱ riꞌ nuu̱ꞌ Yahvé Ndiosí ku̱ndu̱u̱ riꞌ tu̱mani̱ꞌ ña̱ nakoó ra̱ ña̱ mani̱ꞌ xiinꞌ a̱.
6 Sa̱kanꞌ te̱ ni̱ ki̱ꞌi̱n Moisés taꞌvi̱ꞌ sa̱va̱ níiꞌ si̱ndiki̱ꞌ ja̱a̱nꞌ,
te̱ ni̱ ta̱a̱nꞌ ra̱ a̱ ti̱xi̱n ya̱xinꞌ naꞌnuꞌ,
te̱ taꞌvi̱ꞌ sa̱va̱ tu̱ku̱ a̱ ni̱ koso̱ liki̱nꞌ ra̱ nuu̱ꞌ altar ña̱ ni̱ xa̱ꞌa̱ ra̱ xaꞌa̱ꞌ i̱kuꞌ ja̱a̱nꞌ.
7 I̱kanꞌ te̱ ni̱ na̱ꞌi̱ ra̱ tu̱tu̱ miiꞌ yoso̱ꞌ kuento ña̱ ni̱ ndoo̱ Ndiosí xiinꞌ ne̱ yivi̱ꞌ ja̱a̱nꞌ,
te̱ ni̱ ka̱ꞌvi̱ ra̱ a̱ nuu̱ꞌ sa̱kuuꞌ ni̱a̱,
te̱ ni̱ kaꞌa̱n ni̱a̱ xiinꞌ ra̱ ndii:
―Sa̱a̱ ndu̱ sa̱kuuꞌ ña̱ ni̱ kaꞌa̱n tyuunꞌ Yahvé xiinꞌ ndu̱,
te̱ sa̱xinu̱ tu̱ ndu̱ ña̱ kuní a̱ ―ni̱ katyi̱ ni̱a̱.
8 Sa̱kanꞌ te̱ ni̱ ki̱ꞌi̱n Moisés níiꞌ ki̱tiꞌ ja̱a̱nꞌ,
te̱ ni̱ koso̱ liki̱nꞌ ra̱ a̱ xata̱ꞌ ne̱ yivi̱ꞌ kuaꞌa̱ꞌ ja̱a̱nꞌ kaꞌán ra̱ ndii:
―Ña̱ yo̱ꞌo̱ꞌ nduuꞌ níiꞌ ki̱tiꞌ ña̱ niaꞌá ña̱ xa̱ ni̱ ndoo̱ Ndiosí kuento xiinꞌ ndoꞌó sa̱a̱ niiꞌ kaꞌán tu̱ꞌu̱n nde̱iꞌ ña̱ ni̱ ta̱xi̱ a̱ nda̱ꞌaꞌ i̱ ni̱ ka̱ꞌvi̱ i̱ nuu̱ꞌ ndo̱ꞌ ja̱a̱nꞌ ―ni̱ katyi̱ ra̱.
9 Te̱ ni̱ ka̱a̱ Moisés xíniꞌ i̱kuꞌ Sinaí ja̱a̱nꞌ xiinꞌ Aarón,
xiinꞌ Nadab,
xiinꞌ Abiú,
xiinꞌ sa̱kuuꞌ te̱ xi̱xa̱,
te̱ uni̱ xi̱ko̱ uxi̱,
te̱ xaꞌndia tyuunꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel.
10 Te̱ i̱kanꞌ ni̱ xi̱ni̱ ni̱a̱ Ndiosí ña̱ xakaꞌnuꞌ ni̱a̱.
Nuu̱ꞌ ñu̱ꞌuꞌ miiꞌ itaꞌ xaꞌa̱ꞌ ni̱a̱ ndii,
nda̱tu̱nꞌ yiꞌé a̱ nde̱e̱ naa yuu̱ꞌ ña̱ naniꞌ zafiro,
yiꞌé a̱ nde̱e̱ naa ndi̱viꞌ vi̱ꞌ.
11 Tee̱ꞌ ndee ni̱ xi̱ni̱ ndu̱tyiꞌ nuu̱ꞌ te̱ xi̱xa̱,
te̱ xaꞌndia tyuunꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ Israel ja̱a̱nꞌ,
ña̱ yiꞌé nda̱tu̱nꞌ xaaꞌ Ndiosí ja̱a̱nꞌ ndii,
nï̱ xa̱ꞌni̱ꞌ ña̱ꞌaꞌ a̱.
Ni̱ xi̱xi̱ ra̱,
te̱ ni̱ xi̱ꞌi̱ tu̱ ra̱ nuu̱ꞌ Ndiosí i̱kanꞌ xaꞌa̱ꞌ a̱ ña̱ xakaꞌnuꞌ ra̱ xaꞌa̱ꞌ kuento ña̱ ni̱ ndoo̱ꞌ a̱ xiinꞌ ra̱.
Yoꞌoꞌ kaꞌán xaꞌa̱ꞌ kii̱ꞌ ni̱ xaꞌa̱n na̱ti̱i̱n Moisés tu̱ꞌu̱n nde̱iꞌ nda̱ꞌaꞌ Ndiosí xíniꞌ i̱kuꞌ Sinaí
12 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Kuaꞌan ka̱a̱ xíniꞌ i̱kuꞌ miiꞌ yoo i̱,
te̱ ndiatuꞌ u̱nꞌ yuꞌu̱ i̱kanꞌ,
sa̱kanꞌ ña̱ i̱kanꞌ ta̱xi̱ i̱ i̱i̱n yuu̱ꞌ xaꞌndiaꞌ nda̱ꞌaꞌ u̱nꞌ miiꞌ ni̱ ke̱ꞌi̱ i̱ tu̱ꞌu̱n nde̱iꞌ i̱ xiinꞌ ña̱ kaꞌán tuní i̱,
te̱ ña̱ ja̱a̱nꞌ sa̱niaꞌá u̱nꞌ ne̱ vi̱ꞌe̱ Israel ―ni̱ katyi̱ a̱.
13 Sa̱kanꞌ te̱ ni̱ ke̱ta̱ Moisés xiinꞌ Josué,
te̱ tyindieeꞌ taꞌanꞌ xiinꞌ ra̱,
te̱ kuaꞌa̱n ra̱,
te̱ ni̱ ka̱a̱ ra̱ xíniꞌ i̱kuꞌ miiꞌ yoo Ndiosí ja̱a̱nꞌ.
14 Ni̱ kaꞌa̱n ra̱ xiinꞌ te̱ xi̱xa̱ te̱ kuaꞌa̱n xiinꞌ ra̱ ndii:
―Ndoo̱ ndo̱ꞌ yoꞌoꞌ nde̱e̱ na̱ndi̱koꞌ ndu̱.
Na kuꞌu̱n ndu̱ nde̱e̱ xíniꞌ i̱kuꞌ kaa̱ꞌ.
Te̱ nduuꞌ Aarón xiinꞌ Hur ndoo̱ xiinꞌ ndo̱ꞌ.
Naaꞌ yoo tu̱ꞌu̱n kuiꞌe̱ ndoꞌoꞌ yo̱o̱ ka̱ nduuꞌ ndoꞌó ndii,
nuu̱ꞌ te̱ kaa̱ꞌ kuꞌu̱n ndo̱ꞌ xiinꞌ a̱ ―ni̱ katyi̱ ra̱.
15 Kii̱ꞌ ndi̱ꞌi̱ ni̱ kaꞌa̱n Moisés sa̱kuuꞌ ña̱ ja̱a̱nꞌ xiinꞌ te̱ yivi̱ꞌ ja̱a̱nꞌ,
te̱ ni̱ ka̱a̱ ra̱ xíniꞌ i̱kuꞌ ja̱a̱nꞌ kuaꞌa̱n ra̱.
Te̱ i̱kuꞌ ja̱a̱nꞌ ndii,
ni̱ nda̱si̱ ndo̱o̱ a̱ ni̱ xa̱a̱ viko̱ꞌ nu̱ꞌuꞌ.
16 Sa̱kanꞌ te̱ ni̱ ku̱ya̱ti̱n ña̱ nda̱tu̱nꞌ kooꞌ tyukuuꞌ Yahvé xíniꞌ i̱kuꞌ Sinaí ja̱a̱nꞌ.
Te̱ niiꞌ iñu̱ taꞌan kivi̱ꞌ ni̱ nda̱si̱ viko̱ꞌ nu̱ꞌuꞌ xíniꞌ i̱kuꞌ ja̱a̱nꞌ.
Te̱ kii̱ꞌ ni̱ xa̱a̱ kivi̱ꞌ ña̱ uxa̱,
te̱ ni̱ ka̱na̱ Ndiosí Moisés nde̱e̱ te̱i̱n viko̱ꞌ nu̱ꞌuꞌ ja̱a̱nꞌ.
17 Te̱ nuu̱ꞌ ne̱ vi̱ꞌe̱ Israel ña̱ itaꞌ ni̱a̱ nde̱e̱ xaꞌa̱ꞌ i̱kuꞌ ja̱a̱nꞌ ndienu̱ ndii,
yiꞌé nda̱tu̱nꞌ xa̱va̱ꞌa̱ ña̱ kaꞌnuꞌ Yahvé xíniꞌ i̱kuꞌ ja̱a̱nꞌ.
Te̱ nduuꞌ a̱ nde̱e̱ naa ñuꞌu̱ ña̱ ku̱vi̱ xaꞌmiꞌ sa̱kuuꞌ nuu̱ꞌ ña̱ꞌa̱.
18 Te̱ ni̱ nda̱ꞌni̱ Moisés te̱i̱n viko̱ꞌ ja̱a̱nꞌ,
te̱ ni̱ ka̱a̱ ka̱ ra̱ xíniꞌ i̱kuꞌ Sinaí ja̱a̱nꞌ.
Te̱ ni̱ ndoo̱ ra̱ i̱kanꞌ niiꞌ uvi̱ xi̱ko̱ kivi̱ꞌ xiinꞌ niiꞌ uvi̱ xi̱ko̱ ñu̱u.