Yoꞌoꞌ ku̱a̱xi̱ nde̱iꞌ ña̱ kaꞌán sa̱a̱ kuní a̱ sa̱tyuunꞌ nda̱ku e̱ꞌ
23
’Käꞌa̱n ndo̱ꞌ tu̱ꞌu̱n vixi̱ xaꞌa̱ꞌ i̱nga̱ ne̱ yivi̱ꞌ,
ni̱ nde̱e̱ tä̱xi̱ tu̱ ndo̱ꞌ na̱ka̱ ne̱ xaaꞌ ña̱ ni̱a̱ꞌa ndoꞌó te̱ kuꞌu̱n ndi̱e̱e̱ yu̱ꞌuꞌ ndo̱ꞌ tu̱ꞌu̱n vixi̱ xaꞌa̱ꞌ i̱nga̱ ne̱ yivi̱ꞌ xiinꞌ ni̱a̱ nuu̱ꞌ kuesí.
2 Sä̱a̱ ndo̱ꞌ ña̱ ni̱a̱ꞌa xaꞌa̱ꞌ a̱ ña̱ kuaꞌa̱ꞌ ne̱ yivi̱ꞌ xaaꞌ a̱,
ni̱ nde̱e̱ kï̱ꞌi̱n taꞌanꞌ tu̱ ndo̱ꞌ xiinꞌ ne̱ kuaꞌa̱ꞌ ja̱a̱nꞌ te̱ ndi̱e̱e̱ yu̱ꞌuꞌ ndo̱ꞌ tu̱ꞌu̱n vixi̱ nuu̱ꞌ kuesí xaꞌa̱ꞌ i̱i̱n ne̱ yivi̱ꞌ kii̱ꞌ yoo ni̱a̱ tu̱n kuiꞌe̱,
te̱ sa̱a̱ ndo̱ꞌ ña̱ ni̱a̱ꞌa xaꞌa̱ꞌ ne̱ yivi̱ꞌ,
ne̱ xatyuunꞌ nda̱ku.
3 Te̱ tyï̱ndi̱e̱eꞌ tu̱ ndo̱ꞌ xiinꞌ ña̱ ndieeꞌ yu̱ꞌuꞌ ndo̱ꞌ nuu̱ꞌ kuesí xaꞌa̱ꞌ tu̱n kuiꞌe̱ ña̱ ndoꞌoꞌ i̱i̱n ne̱ yivi̱ꞌ xaꞌa̱ꞌ a̱ ña̱ ne̱ ndaꞌvi kuuꞌ ku̱i̱ti̱ꞌ nduuꞌ ni̱a̱.
4 ’Naaꞌ ni̱ xi̱ni̱ ndo̱ꞌ ni̱ xita̱ i̱i̱n si̱ndiki̱ꞌ uun i̱i̱n mburru sana̱ ne̱ ndasi taꞌanꞌ xiinꞌ ndo̱ꞌ ndii,
sa̱na̱ndikoꞌ ndo̱ꞌ riꞌ nda̱ꞌaꞌ ni̱a̱.
5 Naaꞌ ni̱ xi̱ni̱ ndo̱ꞌ ni̱ ndu̱va̱ i̱i̱n mburru sana̱ i̱i̱n te̱ ndasiꞌ taꞌanꞌ xiinꞌ ndo̱ꞌ xiinꞌ ña̱ ndisoꞌ riꞌ ndii,
tyi̱ndi̱e̱eꞌ ña̱ꞌaꞌ ndo̱ꞌ te̱ ndo̱ni̱ꞌi̱ ra̱ riꞌ.
6 ’Kaꞌnu̱ nda̱ku ndo̱ꞌ ku̱a̱tyi̱ xaꞌa̱ꞌ i̱i̱n ne̱ ndaꞌvi kuuꞌ ne̱ ndieeꞌ ñu̱u̱ ndo̱ꞌ kii̱ꞌ tiinꞌ ku̱a̱tyi̱ ña̱ꞌaꞌ i̱i̱n ne̱ yivi̱ꞌ.
7 ’Ko̱to̱ va̱ ndo̱ꞌ te̱ tï̱i̱n ku̱a̱tyi̱ nianí ndo̱ꞌ nde̱e̱ i̱i̱n ne̱ yivi̱ꞌ nde̱e̱ i̱i̱n i̱tyiꞌ,
te̱ nde̱e̱ i̱i̱n kivi̱ꞌ tu̱ kä̱tunꞌ ndo̱ꞌ nde̱e̱ i̱i̱n ne̱ yivi̱ꞌ,
ne̱ köo̱ꞌ ku̱a̱tyi̱,
uun ne̱ xatyuunꞌ nda̱ku,
te̱ ka̱ꞌni̱ꞌ ña̱ꞌaꞌ te̱ yivi̱ꞌ.
Sa̱kanꞌ ña̱ yuꞌu̱ ndii,
köo̱ꞌ kivi̱ꞌ kaꞌa̱n i̱ ña̱ ne̱ xatyuunꞌ nda̱ku nduuꞌ ne̱ xaaꞌ ña̱ ni̱a̱ꞌa.
8 ’Nä̱ti̱i̱n ndo̱ꞌ tu̱mani̱ꞌ nda̱ꞌaꞌ nde̱e̱ i̱i̱n ne̱ yivi̱ꞌ,
te̱ kaꞌnu̱ ndo̱ꞌ ku̱a̱tyi̱ xaꞌa̱ꞌ ni̱a̱,
sa̱kanꞌ ña̱ tu̱mani̱ꞌ ja̱a̱nꞌ xaaꞌ sa̱kanꞌ te̱ nde̱e̱ te̱ xaꞌnú nda̱ku ku̱a̱tyi̱ ndii,
xätyuunꞌ nda̱ku ra̱ xaꞌa̱ꞌ ne̱ köo̱ꞌ ku̱a̱tyi̱.
9 ’Sä̱ndoꞌoꞌ ndo̱ꞌ ne̱ tukuꞌ,
ne̱ ndieeꞌ ñu̱u̱ ndo̱ꞌ,
sa̱kanꞌ ña̱ xa̱ ni̱ nduu̱ tu̱ mi̱iꞌ ndoꞌó ne̱ tukuꞌ nuu̱ꞌ ñu̱ꞌuꞌ Egipto,
sa̱kanꞌ na kuiiꞌ xa̱ xiní ndo̱ꞌ sa̱a̱ ndoꞌoꞌ i̱i̱n ne̱ tukuꞌ kii̱ꞌ ndieeꞌ ni̱a̱ tu̱ku̱ ñu̱ꞌuꞌ.
10 ’Iñu̱ kuiya̱ tyi̱ꞌi̱ ndo̱ꞌ nuu̱ꞌ ñu̱ꞌuꞌ ndo̱ꞌ te̱ na̱ka̱ya̱ ndo̱ꞌ ña̱ savi̱ꞌ,
11 ndisu̱ kuiya̱ ña̱ uxa̱ ndii,
na̱ko̱o̱ ndo̱ꞌ ñu̱ꞌuꞌ ja̱a̱nꞌ te̱ na̱ndiee̱ꞌ a̱,
te̱ ndi̱kinꞌ trigo ña̱ naku̱n mi̱iꞌ nuu̱ꞌ ñu̱ꞌuꞌ ja̱a̱nꞌ ndii,
ne̱ ndaꞌvi kuuꞌ ndieeꞌ ñu̱u̱ ndo̱ꞌ na̱tyiꞌi̱ꞌ a̱ ka̱xi̱ꞌ ni̱a̱.
Te̱ ki̱tiꞌ i̱kuꞌ ka̱xi̱ꞌ ña̱ ndoo̱ ndo̱so̱ꞌ nda̱ꞌaꞌ ni̱a̱,
te̱ sa̱kanꞌ tu̱ sa̱a̱ ndo̱ꞌ xiinꞌ ñu̱ꞌuꞌ miiꞌ tyiꞌiꞌ ndo̱ꞌ yo̱ꞌoꞌ uva xiinꞌ miiꞌ tyiꞌiꞌ ndo̱ꞌ i̱tunꞌ olivo.
12 ’Iñu̱ taꞌan kivi̱ꞌ ku̱i̱ti̱ꞌ kuní a̱ sa̱tyuunꞌ ndo̱ꞌ,
te̱ kivi̱ꞌ ña̱ uxa̱ na̱ndiee̱ꞌ sa̱kuuꞌ ndo̱ꞌ,
sa̱kanꞌ te̱ na̱ndiee̱ꞌ tu̱ si̱ndiki̱ꞌ sana̱ ndo̱ꞌ xiinꞌ mburru sana̱ ndo̱ꞌ,
te̱ na̱ku̱naa̱ tu̱ ndi̱e̱e̱ꞌ te̱ xikaꞌ nuuꞌ so̱ꞌo̱ nuu̱ꞌ ndo̱ꞌ xiinꞌ te̱ tukuꞌ,
te̱ ndieeꞌ nuu̱ꞌ ñu̱ꞌuꞌ ndo̱ꞌ.
13 ’Sa̱xinu̱ ndo̱ꞌ sa̱kuuꞌ ña̱ ni̱ kaꞌa̱n tyuunꞌ i̱ xiinꞌ ndo̱ꞌ,
te̱ nde̱e̱ i̱i̱n kivi̱ꞌ käka̱n ndo̱ꞌ nuu̱ꞌ i̱nga̱ ndiosí te̱ tyi̱ndi̱e̱eꞌ a̱ ndoꞌó,
ni̱ nde̱e̱ kivi̱ꞌ a̱ käꞌa̱n ndo̱ꞌ.
Yoꞌoꞌ ku̱a̱xi̱ ña̱ kaꞌán Ndiosí xaꞌa̱ꞌ uni̱ taꞌan vi̱koꞌ kaꞌnuꞌ va̱ ña̱ kuní a̱ ka̱sa̱ꞌa̱ ne̱ vi̱ꞌe̱ Israel
14 ’Uni̱ i̱tyiꞌ i̱ꞌi̱n kuiya̱ kuní a̱ ka̱sa̱ꞌa̱ ndo̱ꞌ vi̱koꞌ ña̱ kiꞌinꞌ kaꞌnuꞌ ndo̱ꞌ yuꞌu̱.
15 Ña̱ nu̱uꞌ ndii,
xi̱ꞌna̱ ka̱ vi̱koꞌ ña̱ xixiꞌ ne̱ yivi̱ꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ ka̱sa̱ꞌa̱ ndo̱ꞌ.
Te̱ uxa̱ kivi̱ꞌ kuní a̱ ku̱xi̱ ndo̱ꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ ja̱a̱nꞌ sa̱a̱ niiꞌ ni̱ kaꞌa̱n tyuunꞌ i̱ xiinꞌ ndo̱ꞌ.
Te̱ yoo̱ꞌ Abib kuní a̱ ka̱sa̱ꞌa̱ ndo̱ꞌ vi̱koꞌ ja̱a̱nꞌ,
sa̱kanꞌ ña̱ yoo̱ꞌ ja̱a̱nꞌ ni̱ ki̱e̱e̱ ne̱ xii̱ꞌ ya̱taꞌ ndo̱ꞌ nuu̱ꞌ ñu̱ꞌuꞌ Egipto xta̱ꞌanꞌ.
Te̱ nde̱e̱ i̱i̱n ne̱ yivi̱ꞌ kü̱vi̱ ki̱xi̱n ko̱to̱ nuu̱ꞌ i̱ naaꞌ köo̱ꞌ tu̱mani̱ꞌ niꞌiꞌ ni̱a̱ na̱soko̱ꞌni̱a̱ nuu̱ꞌ i̱.
16 ’Te̱ vi̱koꞌ ña̱ uvi̱ ña̱ kuní a̱ ka̱sa̱ꞌa̱ ndo̱ꞌ ndii,
vi̱koꞌ ña̱ nasoko̱ꞌ ndo̱ꞌ ña̱ savi̱ꞌ ña̱ nakuixaꞌ nu̱uꞌ nuu̱ꞌ ñu̱ꞌuꞌ miiꞌ tyiꞌiꞌ ndo̱ꞌ nduuꞌ a̱.
’Te̱ vi̱koꞌ ña̱ soꞌo̱ꞌ ndiꞌiꞌ ña̱ kuní a̱ ka̱sa̱ꞌa̱ ndo̱ꞌ ndii,
vi̱koꞌ ña̱ xakaꞌnuꞌ ndo̱ꞌ kii̱ꞌ ndiꞌiꞌ kuiya̱ xaꞌa̱ꞌ ña̱ ni̱ ndi̱ꞌi̱ na̱ka̱ya̱ ndo̱ꞌ sa̱kuuꞌ ña̱ savi̱ꞌ ña̱ ni̱ tyi̱ꞌi̱ ndo̱ꞌ nuu̱ꞌ ñu̱ꞌuꞌ ndo̱ꞌ nduuꞌ a̱.
17 Uni̱ sa̱aꞌ i̱tyiꞌ kii̱ꞌ ka̱sa̱ꞌa̱ ndo̱ꞌ vi̱koꞌ ja̱a̱nꞌ ndii,
kuní a̱ ki̱xi̱n sa̱kuuꞌ tiaa̱ nuu̱ꞌ yuꞌu̱,
Tákuiꞌe Yahvé,
i̱ꞌi̱n kuiya̱.
18 ’Kii̱ꞌ nasoko̱ꞌ ndo̱ꞌ i̱i̱n ki̱tiꞌ nuu̱ꞌ i̱ ndii,
nä̱saka̱ꞌ ndo̱ꞌ xita̱ꞌ va̱ꞌa̱ ña̱ saká yu̱tyiꞌ levadura xiinꞌ,
xiinꞌ níiꞌ ki̱tiꞌ te̱ na̱soko̱ꞌ ndo̱ꞌ a̱ nuu̱ꞌ i̱,
ni̱ nde̱e̱ tä̱xa̱ꞌa̱ tu̱ ndo̱ꞌ xa̱ꞌa̱n ki̱tiꞌ,
tiꞌ ni̱ na̱soko̱ꞌ ndo̱ꞌ xaꞌa̱ꞌ vi̱koꞌ ja̱a̱nꞌ,
xaꞌa̱ꞌ tu̱ku̱ kivi̱ꞌ.
19 ’Sa̱kuuꞌ ña̱ savi̱ꞌ ña̱ tyiꞌiꞌ ndo̱ꞌ ña̱ nakuixaꞌ nu̱uꞌ nuu̱ꞌ ñu̱ꞌuꞌ ndo̱ꞌ kuní a̱ ki̱xi̱n ndi̱a̱ka̱ ndo̱ꞌ ña̱ nda̱tu̱nꞌ ka̱ ti̱xi̱n yu̱kunꞌ kaꞌnuꞌ nuu̱ꞌ yuꞌu̱,
Yahvé,
Ndiosí ña̱ xakaꞌnuꞌ ndo̱ꞌ.
’Sä̱tyoꞌó ndo̱ꞌ ti̱xuꞌu̱ꞌ tyiee̱ siee xiinꞌ letyin si̱ꞌiꞌ riꞌ.
Yoꞌoꞌ kaꞌán Ndiosí ña̱ ti̱ꞌviꞌ a̱ i̱i̱n ángele te̱ ko̱to̱ a̱ ne̱ vi̱ꞌe̱ Israel te̱ na̱xaa̱ va̱ꞌa̱ ni̱a̱ nuu̱ꞌ ñu̱ꞌuꞌ Canaán
20 ’Ko̱to̱ ndo̱ꞌ,
ti̱ꞌviꞌ i̱ i̱i̱n ángele ña̱ xikaꞌ nuuꞌ nuu̱ꞌ i̱ te̱ ko̱to̱ a̱ ndoꞌó i̱tyiꞌ miiꞌ kuꞌu̱n ndo̱ꞌ,
te̱ ku̱ndi̱a̱ka̱ a̱ ndoꞌó nde̱e̱ na̱xaa̱ ndo̱ꞌ nde̱e̱ nuu̱ꞌ ñu̱ꞌuꞌ miiꞌ ni̱ sa̱kooꞌ tu̱ꞌva̱ i̱ ku̱ndi̱e̱e̱ ndo̱ꞌ.
21 Ta̱xi̱ so̱ꞌo̱ ndo̱ꞌ ña̱ kaꞌa̱n ángele ja̱a̱nꞌ xiinꞌ ndo̱ꞌ,
te̱ sa̱xinu̱ ndo̱ꞌ sa̱kuuꞌ ña̱ kaꞌa̱n a̱.
Kü̱ndu̱u̱ ndo̱ꞌ ne̱ so̱ꞌo̱ nuu̱ꞌ a̱,
sa̱kanꞌ ña̱ xiinꞌ ña̱ ndi̱e̱eꞌ yuꞌu̱ kuaꞌa̱n a̱ te̱ köo̱ꞌ kaꞌnuꞌ i̱ni̱ a̱ xaꞌa̱ꞌ ku̱a̱tyi̱ ndo̱ꞌ naaꞌ sa̱so̱ꞌo̱ ndo̱ꞌ nuu̱ꞌ a̱.
22 Naaꞌ ta̱xi̱ so̱ꞌo̱ ndo̱ꞌ nuu̱ꞌ a̱,
te̱ sa̱xinu̱ ndo̱ꞌ sa̱kuuꞌ ña̱ kaꞌán tyuunꞌ i̱ ña̱ kaꞌa̱n i̱ xiinꞌ a̱ kaꞌa̱n a̱ xiinꞌ ndo̱ꞌ ndii,
ku̱nda̱siꞌ tu̱ yuꞌu̱ te̱ ndasiꞌ taꞌanꞌ xiinꞌ ndo̱ꞌ,
te̱ yo̱o̱ ka̱ mi̱iꞌ ku̱u̱ xiinꞌ ndo̱ꞌ ndii,
mi̱iꞌ tu̱ ku̱u̱ yuꞌu̱ xiinꞌ ni̱a̱.
23 Sa̱kanꞌ ña̱ ti̱ꞌviꞌ i̱ ángele,
ña̱ xikaꞌ nuuꞌ nuu̱ꞌ i̱,
te̱ ki̱ꞌi̱n i̱tyiꞌ a̱ nuu̱ꞌ ndo̱ꞌ ku̱ndi̱a̱ka̱ a̱ ndoꞌó te̱ kuꞌu̱n ndo̱ꞌ nuu̱ꞌ ñu̱ꞌuꞌ miiꞌ ndieeꞌ ne̱ vi̱ꞌe̱ amorreo,
xiinꞌ ne̱ vi̱ꞌe̱ heteo,
xiinꞌ ne̱ vi̱ꞌe̱ ferezeo,
xiinꞌ ne̱ vi̱ꞌe̱ cananeo,
xiinꞌ ne̱ vi̱ꞌe̱ heveo,
xiinꞌ ne̱ vi̱ꞌe̱ jebuseo,
te̱ ndoo̱ ndo̱ꞌ ku̱ndi̱e̱e̱ ndo̱ꞌ nuu̱ꞌ ñu̱ꞌuꞌ ja̱a̱nꞌ.
Te̱ mi̱iꞌ yuꞌu̱ sa̱ndo̱ñuꞌuꞌ xa̱tyiꞌ sa̱kuuꞌ ti̱ꞌvi̱ ne̱ ja̱a̱nꞌ.
24 Kü̱i̱ta̱ xitiꞌ ndo̱ꞌ nuu̱ꞌ nde̱e̱ i̱i̱n ndiosí ña̱ xakaꞌnuꞌ ne̱ ndieeꞌ nde̱e̱ i̱i̱n ñu̱u̱ ja̱a̱nꞌ,
ni̱ nde̱e̱ kä̱ka̱ nu̱u̱ tu̱ ndo̱ꞌ nuu̱ꞌ ña̱ ja̱a̱nꞌ nde̱e̱ naa xaaꞌ ne̱ ja̱a̱nꞌ.
Süu̱ꞌ ja̱a̱nꞌ ndii,
sa̱nduxín ndo̱ꞌ sa̱kuuꞌ ndiosí saka ja̱a̱nꞌ,
te̱ sa̱kuatyiꞌ xiꞌe̱ ndo̱ꞌ sa̱kuuꞌ yuu̱ꞌ ña̱ kiꞌinꞌ kaꞌnuꞌ ni̱a̱,
ña̱ nduuꞌ nde̱e̱ naa ndiosí nuu̱ꞌ ni̱a̱.
25 ’Nuu̱ꞌ yuꞌu̱,
Yahvé,
Ndiosí ndo̱ꞌ ku̱i̱ti̱ꞌ sa̱kaꞌnuꞌ ndo̱ꞌ,
te̱ sa̱ñuꞌuꞌ i̱ ña̱ xaxi̱ꞌ ndo̱ꞌ xiinꞌ ti̱kui xiꞌiꞌ ndo̱ꞌ.
Te̱ sa̱xi̱o̱o̱ i̱ sa̱kuuꞌ nuu̱ꞌ kuiꞌe̱ nuu̱ꞌ ndo̱ꞌ,
te̱ köo̱ꞌ a̱ ku̱ndo̱ꞌo̱ ndo̱ꞌ.
26 Ñu̱u̱ miiꞌ ku̱ndi̱e̱e̱ ndoꞌó ndii,
nde̱e̱ i̱i̱n ña̱ꞌaꞌ nü̱u̱ iti̱a̱ꞌ siꞌe̱,
te̱ ni̱ nde̱e̱ köo̱ꞌ tu̱ ña̱ꞌaꞌ ñaꞌ kü̱vi̱ na̱kuꞌu̱n siꞌe̱.
Te̱ ta̱xi̱ tu̱ i̱ kuaꞌa̱ꞌ va̱ kivi̱ꞌ ñu̱u̱ ndo̱ꞌ te̱ ka̱ka̱ ndo̱ꞌ i̱i̱n yivi̱ꞌ.
27 ’Te̱ mi̱iꞌ yuꞌu̱ sa̱a̱ sa̱kanꞌ,
te̱ ku̱yi̱ꞌvi xa̱va̱ꞌa̱ ne̱ yivi̱ꞌ ndoꞌó nde̱e̱ ña̱ kuní ka̱ ko̱ꞌni̱ ndo̱ꞌ ñu̱u̱ miiꞌ ndieeꞌ ni̱a̱,
te̱ mi̱iꞌ tu̱ i̱ sa̱a̱ sa̱kanꞌ te̱ sa̱na̱ xíniꞌ sa̱kuuꞌ te̱ ndasiꞌ taꞌanꞌ xiinꞌ ndo̱ꞌ,
te̱ ku̱nu̱ ndo̱o̱ ra̱ nuu̱ꞌ ndo̱ꞌ kii̱ꞌ ku̱ni̱ ra̱ ku̱a̱xi̱ ndo̱ꞌ.
28 Mi̱iꞌ yuꞌu̱ ti̱ꞌviꞌ ña̱ ku̱yi̱ꞌvi ne̱ vi̱ꞌe̱ heveo,
xiinꞌ ne̱ vi̱ꞌe̱ cananeo,
xiinꞌ ne̱ vi̱ꞌe̱ heteo ku̱ni̱ ni̱a̱ ndoꞌó ña̱ kuní ka̱ ko̱ꞌni̱ ndo̱ꞌ ñu̱u̱ ni̱a̱.
29 Ndisu̱ süu̱ꞌ i̱i̱n kuiya̱ ku̱i̱ti̱ꞌ te̱ ta̱va̱ꞌ i̱ sa̱kuuꞌ ti̱ꞌvi̱ ne̱ ndieeꞌ nuu̱ꞌ ñu̱ꞌuꞌ ja̱a̱nꞌ,
sa̱kanꞌ ña̱ i̱yo̱ na̱kuini̱a̱ kuaꞌa̱ꞌ va̱ ki̱tiꞌ i̱kuꞌ naaꞌ kutaxi̱nꞌ kaaꞌ ka̱niiꞌ nuu̱ꞌ ñu̱ꞌuꞌ ja̱a̱nꞌ te̱ i̱yo̱ ka̱xi̱ꞌ riꞌ ndoꞌó.
30 Kuiee kuiee ku̱i̱ti̱ꞌ ta̱va̱ꞌ i̱ ni̱a̱ nuu̱ꞌ ñu̱ꞌuꞌ ja̱a̱nꞌ nde̱e̱ ku̱kuaꞌa̱ꞌ ndoꞌó,
te̱ ku̱vi̱ na̱ꞌi̱ ndo̱ꞌ ka̱niiꞌ ñu̱ꞌuꞌ ni̱a̱ ku̱ndu̱u̱ ña̱ꞌa̱ ndo̱ꞌ.
31 Te̱ xeꞌinꞌ ñu̱ꞌuꞌ ndo̱ꞌ ndii,
nde̱e̱ yu̱ꞌuꞌ mi̱ni̱ kuaꞌa xa̱ꞌaꞌ a̱ sa̱a̱ i̱,
te̱ kuꞌu̱n ndi̱koꞌ a̱ nde̱e̱ yu̱ꞌuꞌ mi̱ni̱ ña̱ naniꞌ Mediterraneo,
te̱ xa̱ꞌaꞌ tu̱ a̱ nde̱e̱ miiꞌ i̱tyi kaaꞌ te̱ kuꞌu̱n ndi̱koꞌ a̱ nde̱e̱ yu̱ꞌuꞌ i̱ti̱a̱ Éufrates.
Te̱ sa̱na̱kuaꞌa i̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ ja̱a̱nꞌ nda̱ꞌaꞌ ndo̱ꞌ,
te̱ mi̱iꞌ ndoꞌó ta̱xiꞌ sa̱kuuꞌ ni̱a̱ kii̱ꞌ xkaꞌndi̱a̱ ndo̱ꞌ kuꞌu̱n ndo̱ꞌ.
32 ’Köo̱ꞌ kivi̱ꞌ ndoo̱ ndo̱ꞌ kuento ndo̱ꞌ xiinꞌ nde̱e̱ i̱i̱n ne̱ ndieeꞌ nuu̱ꞌ ñu̱ꞌuꞌ ja̱a̱nꞌ,
ni̱ nde̱e̱ xiinꞌ nde̱e̱ i̱i̱n tu̱ ndiosí ña̱ xakaꞌnuꞌ ni̱a̱.
33 Ni̱ nde̱e̱ tä̱xi̱ tu̱ ndo̱ꞌ ndoo̱ ne̱ ja̱a̱nꞌ ku̱ndi̱e̱e̱ ni̱a̱ nuu̱ꞌ ñu̱ꞌuꞌ ndo̱ꞌ,
ko̱to̱ ka̱ sa̱koyó ni̱a̱ ndoꞌó te̱ sa̱a̱ ndo̱ꞌ ku̱a̱tyi̱ nuu̱ꞌ i̱,
te̱ ka̱ka̱ nu̱u̱ ndo̱ꞌ nuu̱ꞌ ndiosí ña̱ xakaꞌnuꞌ mi̱iꞌ ni̱a̱.
Te̱ ña̱ ja̱a̱nꞌ sa̱a̱ sa̱kanꞌ te̱ ndo̱ñuꞌuꞌ xa̱tyiꞌ ndo̱ꞌ sa̱a̱ i̱.