Yoꞌoꞌ ku̱a̱xi̱ nde̱iꞌ ña̱ kaꞌán xaꞌa̱ꞌ ña̱ kuní a̱ na̱tyaꞌvi̱ ne̱ yivi̱ꞌ xaꞌa̱ꞌ ña̱ ni̱ xa̱kuiꞌnaꞌ ni̱a̱
22
’Naaꞌ ni̱ xa̱kuiꞌnaꞌ yo̱o̱ ka̱ i̱i̱n si̱ndiki̱ꞌ uun i̱i̱n mbe̱e̱,
te̱ ni̱ xa̱ꞌni̱ꞌ ni̱a̱ riꞌ uun ni̱ xi̱ko̱ꞌ ni̱a̱ riꞌ ndii,
kuní a̱ na̱ta̱xi̱ ni̱a̱ uꞌu̱n taꞌan si̱ndiki̱ꞌ xaꞌa̱ꞌ i̱ꞌi̱n si̱ndiki̱ꞌ ja̱a̱nꞌ,
te̱ ku̱miꞌ taꞌan mbe̱e̱ kuní a̱ na̱ta̱xi̱ ni̱a̱ xaꞌa̱ꞌ i̱ꞌi̱n mbe̱e̱ ja̱a̱nꞌ.
2 ’Naaꞌ ni̱ na̱ꞌi̱ nda̱ꞌaꞌ i̱i̱n ne̱ yivi̱ꞌ i̱i̱n te̱ yivi̱ꞌ naá ra̱ xakuiꞌnaꞌ ra̱ vi̱ꞌe̱ ni̱a̱ ñu̱u,
te̱ ka̱ꞌni̱ꞌ ña̱ꞌaꞌ ni̱a̱ ndii,
köo̱ꞌ ku̱a̱tyi̱ kumiꞌ ne̱ ni̱ xa̱ꞌni̱ꞌ ña̱ꞌaꞌ ja̱a̱nꞌ xaꞌa̱ꞌ ña̱ ni̱ xa̱a̱ ni̱a̱ ja̱a̱nꞌ.
3 Ndisu̱ naaꞌ i̱i̱n keꞌinꞌ nduuꞌ a̱ te̱ ka̱ꞌni̱ꞌ ña̱ꞌaꞌ ni̱a̱ ndii,
kumiꞌ ku̱a̱tyi̱ ni̱a̱ xaꞌa̱ꞌ ña̱ ni̱ xa̱a̱ ni̱a̱ ja̱a̱nꞌ.
’Te̱ ni̱ xa̱kuiꞌnaꞌ ndii,
kuní a̱ tya̱ꞌvi̱ ra̱ xaꞌa̱ꞌ sa̱kuuꞌ ña̱ ni̱ xa̱kuiꞌnaꞌ ra̱,
te̱ naaꞌ köo̱ꞌ xu̱ꞌunꞌ ra̱ te̱ tya̱ꞌvi̱ꞌ ra̱ xaꞌa̱ꞌ a̱ ndii,
kuní a̱ keꞌvi̱ mi̱iꞌ ra̱ te̱ ku̱ndu̱u̱ ra̱ te̱ ka̱ka̱ nu̱u̱ so̱ꞌo̱,
te̱ xiinꞌ xu̱ꞌunꞌ ña̱ tya̱ꞌvi̱ꞌ ne̱ yivi̱ꞌ xaꞌa̱ꞌ ra̱ na̱tyaꞌvi̱ ra̱ xaꞌa̱ꞌ ña̱ ni̱ xa̱kuiꞌnaꞌ ra̱ ja̱a̱nꞌ.
4 Te̱ naaꞌ ni̱ na̱ꞌi̱ nda̱ꞌaꞌ ña̱ꞌaꞌ ne̱ yivi̱ꞌ xiinꞌ ki̱tiꞌ,
tiꞌ ni̱ xa̱kuiꞌnaꞌ ra̱,
naa kuuꞌ si̱ndiki̱ꞌ,
uun mburru,
uun mbe̱e̱,
te̱ tiaku ka̱ riꞌ ndii,
kuní a̱ na̱ta̱xi̱ ra̱ riꞌ,
te̱ na̱ta̱xi̱ siinꞌ ka̱ tu̱ ra̱ i̱nga̱ riꞌ xaꞌa̱ꞌ i̱ꞌi̱n tiꞌ ni̱ xa̱kuiꞌnaꞌ ra̱ ja̱a̱nꞌ.
5 ’Naaꞌ kuaꞌa̱n i̱i̱n te̱ yivi̱ꞌ xiinꞌ ki̱tiꞌ sana̱ ra̱ te̱ ko̱ꞌni̱ ra̱ riꞌ ka̱xi̱ꞌ riꞌ kuꞌu̱ uun yo̱ꞌoꞌ uva nuu̱ꞌ ñu̱ꞌuꞌ i̱nga̱ te̱ yivi̱ꞌ ndii,
kuní a̱ tya̱ꞌvi̱ꞌ ra̱ xiinꞌ ña̱ savi̱ꞌ va̱ꞌa̱ ka̱ ña̱ ni̱ na̱ku̱i̱xa̱ nuu̱ꞌ ñu̱ꞌuꞌ mi̱iꞌ ra̱ uun uva ña̱ nda̱tu̱nꞌ va̱ ña̱ yoo miiꞌ xikaꞌ mi̱iꞌ ra̱ nda̱ꞌaꞌ te̱ xiinꞌ ña̱ꞌa̱ ñu̱ꞌuꞌ miiꞌ ni̱ xa̱xi̱ꞌ ki̱tiꞌ sana̱ ra̱ kuꞌu̱ ja̱a̱nꞌ.
6 ’Naaꞌ ni̱ na̱ꞌmi̱ i̱i̱n ne̱ yivi̱ꞌ ñuꞌu̱,
te̱ nda̱va̱ a̱ te̱ ka̱ꞌmi̱ a̱ i̱ñu̱ꞌ kuii̱ꞌ,
te̱ ka̱ꞌmi̱ tu̱ a̱ ndi̱kinꞌ trigo ña̱ xa̱ ni̱ na̱ta̱ndi̱e̱e̱ nu̱ꞌni̱ te̱ yivi̱ꞌ te̱ sa̱kuunꞌ ra̱ a̱ uun ña̱ itaꞌ niiꞌ ka̱ ndii,
kuní a̱ na̱tyaꞌvi̱ ne̱ ni̱ na̱ꞌmi̱ ñuꞌu̱ ja̱a̱nꞌ xaꞌa̱ꞌ sa̱kuuꞌ ña̱ ni̱ xa̱ꞌmi̱ ni̱a̱ ja̱a̱nꞌ.
7 ’Sa̱a̱ e̱ꞌ kuenta ndii,
ni̱ ta̱xi̱ i̱i̱n ne̱ yivi̱ꞌ xu̱ꞌunꞌ ni̱a̱ uun ña̱ vikaꞌ ni̱a̱ nda̱ꞌaꞌ i̱nga̱ ne̱ yivi̱ꞌ te̱ ta̱xa̱ꞌa̱ ne̱ ja̱a̱nꞌ ña̱ ja̱a̱nꞌ vi̱ꞌe̱ ni̱a̱,
te̱ kiꞌvi̱ i̱i̱n ne̱ kuiꞌnaꞌ vi̱ꞌe̱ ne̱ ja̱a̱nꞌ te̱ sa̱kuiꞌna ni̱a̱ ña̱ꞌ ja̱a̱nꞌ.
Ndisu̱ sa̱a̱ tu̱ e̱ꞌ kuenta ña̱ na̱ti̱i̱n ni̱a̱ ne̱ kuiꞌna̱ꞌ ja̱a̱nꞌ ndii,
kuní a̱ na̱tyaꞌvi̱ ni̱a̱ uvi̱ i̱tyiꞌ ya̱ꞌvi̱ ña̱ ni̱ xa̱kuiꞌnaꞌ ni̱a̱ ja̱a̱nꞌ.
8 Ndisu̱ naaꞌ nï̱ xi̱ni̱ ni̱a̱ miiꞌ kuaꞌa̱n te̱ ni̱ xakuiꞌnaꞌ ña̱ꞌa̱ ja̱a̱nꞌ ndii,
te̱ xiinꞌ vi̱ꞌe̱ kuní a̱ kuꞌu̱n nuu̱ꞌ kuesí te̱ sa̱naꞌmá ña̱ꞌaꞌ kuesí te̱ ku̱ni̱ ra̱ naaꞌ nï̱ xa̱kuiꞌnaꞌ mi̱iꞌ ra̱ ña̱ vikaꞌ ña̱ ni̱ ta̱xi̱ te̱ yivi̱ꞌ ja̱a̱nꞌ nda̱ꞌaꞌ ra̱ ta̱xa̱ꞌa̱ ra̱.
9 ’Naaꞌ kuntaꞌanꞌ uvi̱ taꞌan ne̱ yivi̱ꞌ xaꞌa̱ꞌ i̱i̱n si̱ndiki̱ꞌ,
uun i̱i̱n mburru,
uun i̱i̱n mbe̱e̱,
uun i̱i̱n toto̱ ña̱ niꞌnuꞌ ni̱a̱,
uun xaꞌa̱ꞌ ndiaa ka̱ i̱nga̱ nuu̱ꞌ ña̱ꞌa̱ ña̱ ni̱ xita̱,
te̱ uvi̱ sa̱aꞌ ni̱a̱ kaꞌán ña̱ ña̱ꞌa̱ mi̱iꞌ ni̱a̱ nduuꞌ a̱ ndii,
uvi̱ sa̱aꞌ ni̱a̱ kuní a̱ kuꞌu̱n nuu̱ꞌ kuesí te̱ sa̱naꞌmá ña̱ꞌaꞌ ra̱,
te̱ ne̱ kaꞌa̱n te̱ ja̱a̱nꞌ nduuꞌ ne̱ ni̱ xa̱kuiꞌnaꞌ ndii,
ne̱ ja̱a̱nꞌ kuní a̱ na̱tyaꞌvi̱ uvi̱ i̱tyiꞌ xaꞌa̱ꞌ sa̱kuuꞌ ña̱ ni̱ xa̱kuiꞌnaꞌ ni̱a̱ ja̱a̱nꞌ nda̱ꞌaꞌ i̱nga̱ ne̱ xiinꞌ ña̱ꞌa̱ ña̱ ja̱a̱nꞌ.
10 ’Naaꞌ yoo sa̱va̱ ne̱ yivi̱ꞌ,
ne̱ ni̱ na̱ko̱o̱ i̱i̱n mburru,
uun i̱i̱n si̱ndiki̱ꞌ,
uun i̱i̱n mbe̱e̱,
uun ndiaaꞌ ka̱ i̱nga̱ nuu̱ꞌ ki̱tiꞌ sana̱ ni̱a̱ nda̱ꞌaꞌ te̱ xiní taꞌanꞌ xiinꞌ ni̱a̱ te̱ ko̱to̱ ra̱ riꞌ,
te̱ ni̱ xiꞌi̱ riꞌ,
uun te̱ ni̱ sa̱tu̱xuꞌví te̱ yivi̱ꞌ riꞌ,
uun ni̱ xa̱kuiꞌnaꞌ te̱ yivi̱ꞌ riꞌ,
te̱ nde̱e̱ i̱i̱n köo̱ꞌ ni̱ xi̱ni̱ ndii,
11 te̱ xiní taꞌanꞌ xiinꞌ te̱ xiinꞌ sana̱ ki̱tiꞌ ja̱a̱nꞌ ndii,
kuní a̱ ta̱xi̱ ra̱ kuento ra̱ nuu̱ꞌ Yahvé ña̱ köo̱ꞌ a̱ ni̱ xa̱a̱ ra̱ xiinꞌ ki̱tiꞌ sana̱ te̱ xiní taꞌanꞌ xiinꞌ ra̱ ja̱a̱nꞌ,
te̱ kuní a̱ ka̱ndi̱xaꞌ te̱ xiinꞌ sana̱ ki̱tiꞌ ja̱a̱nꞌ ña̱ kaꞌán ra̱,
te̱ tyä̱ꞌvi̱ ra̱ nde̱e̱ siee xaꞌa̱ꞌ ki̱tiꞌ ja̱a̱nꞌ.
12 Ndisu̱ naaꞌ nuu̱ꞌ niꞌnuꞌ ra̱ iinꞌ ra̱ i̱kanꞌ,
te̱ ni̱ xa̱kuiꞌnaꞌ te̱ yivi̱ꞌ ki̱tiꞌ ja̱a̱nꞌ ndii,
kuní a̱ na̱tyaꞌvi̱ ra̱ xaꞌa̱ꞌ riꞌ nda̱ꞌaꞌ te̱ xiinꞌ sana̱ riꞌ.
13 Te̱ naaꞌ ni̱ xa̱xi̱ꞌ ña̱ꞌaꞌ i̱i̱n ki̱tiꞌ i̱kuꞌ ndii,
kuní a̱ sa̱niaꞌá ra̱ ki̱tiꞌ,
tiꞌ ni̱ xiꞌi̱ ja̱a̱nꞌ,
nuu̱ꞌ te̱ xiinꞌ sana̱ riꞌ,
te̱ tyä̱ꞌvi̱ ra̱ nde̱e̱ siee xaꞌa̱ꞌ riꞌ.
14 ’Naaꞌ ni̱ ta̱tu̱ i̱i̱n ne̱ yivi̱ꞌ i̱i̱n ki̱tiꞌ sana̱ ne̱ ndieeꞌ ya̱ti̱n vi̱ꞌe̱ ni̱a̱,
te̱ ni̱ tu̱xuꞌví riꞌ uun ni̱ xiꞌi̱ riꞌ kii̱ꞌ köo̱ꞌ te̱ xiinꞌ sana̱ riꞌ nduꞌu̱ꞌ ndii,
kuní a̱ tya̱ꞌvi̱ ne̱ ni̱ ta̱tu̱ riꞌ ja̱a̱nꞌ xaꞌa̱ꞌ riꞌ nda̱ꞌaꞌ ne̱ xiinꞌ sana̱ riꞌ.
15 Ndisu̱ naaꞌ nduꞌu̱ꞌ te̱ xiinꞌ sana̱ riꞌ te̱ ni̱ ndo̱kueinꞌ riꞌ ndii,
küní a̱ tya̱ꞌvi̱ꞌ te̱ ni̱ ta̱tu̱ riꞌ ja̱a̱nꞌ xaꞌa̱ꞌ riꞌ.
Naa ni̱ ta̱tu̱ ra̱ riꞌ ndii,
xaꞌa̱ꞌ ña̱ ja̱a̱nꞌ ku̱i̱ti̱ꞌ kuní a̱ tya̱ꞌvi̱ ra̱.
Yoꞌoꞌ ku̱a̱xi̱ nde̱iꞌ ña̱ kaꞌán xaꞌa̱ꞌ sa̱a̱ kuní a̱ ku̱u̱ e̱ꞌ te̱ ka̱ka̱ e̱ꞌ i̱i̱n yivi̱ꞌ
16 ’Naaꞌ ni̱ xi̱ni̱ xaꞌanꞌ i̱i̱n te̱ yivi̱ꞌ i̱i̱n ñaꞌ sa̱va̱,
ñaꞌ nduꞌu̱ꞌ siee,
te̱ ka̱nduꞌu̱ꞌ ra̱ xiinꞌ aꞌ ndii,
kuní a̱ tya̱ꞌvi̱ꞌ ra̱ xaꞌa̱ꞌ aꞌ nda̱ꞌaꞌ yu̱vaꞌ aꞌ xu̱ꞌunꞌ ña̱ kande̱iꞌ tya̱ꞌvi̱ te̱ yivi̱ꞌ xaꞌa̱ꞌ i̱i̱n ña̱ꞌaꞌ nduꞌu̱ꞌ siee,
te̱ kuní a̱ tu̱ndaꞌa̱ꞌ tu̱ ra̱ xiinꞌ aꞌ.
17 Tee̱ꞌ ndee naaꞌ xïinꞌ yu̱vaꞌ ñaꞌ sa̱va̱ ja̱a̱nꞌ ta̱xi̱ ña̱ꞌaꞌ ra̱ te̱ tu̱ndaꞌa̱ꞌ xiinꞌ te̱ yivi̱ꞌ ja̱a̱nꞌ ndii,
kuní a̱ tya̱ꞌvi̱ꞌ ra̱ nda̱ꞌaꞌ yu̱vaꞌ ñaꞌ ja̱a̱nꞌ xu̱ꞌunꞌ ña̱ kande̱iꞌ tya̱ꞌvi̱ te̱ yivi̱ꞌ xaꞌa̱ꞌ i̱i̱n ña̱ꞌaꞌ ñaꞌ nduꞌu̱ꞌ siee.
18 ’Kuní a̱ ka̱ꞌni̱ꞌ ndo̱ꞌ sa̱kuuꞌ ña̱ꞌaꞌ ne̱ xaaꞌ ña̱ kuini̱ꞌ.
19 ’Te̱ yo̱o̱ ka̱ ti̱i̱n ki̱tiꞌ te̱ ku̱u̱ xeꞌnaꞌ ni̱a̱ xiinꞌ riꞌ ndii,
kuní a̱ ka̱ꞌni̱ꞌ ndo̱ꞌ sa̱kuuꞌ ne̱ ja̱a̱nꞌ.
20 ’Yo̱o̱ ka̱ nasoko̱ꞌ ki̱tiꞌ nuu̱ꞌ i̱nga̱ ndiosí,
te̱ süu̱ꞌ nuu̱ꞌ yuꞌu̱ Yahvé nasoko̱ꞌ ni̱a̱ riꞌ ndii,
kuní a̱ ka̱ꞌni̱ꞌ ndo̱ꞌ sa̱kuuꞌ ni̱a̱.
21 ’Mï̱iꞌ ku̱u̱ ndo̱ꞌ xiinꞌ ne̱ tukuꞌ,
ne̱ ndieeꞌ nu̱uꞌ ñu̱ꞌuꞌ ndo̱ꞌ,
te̱ ni̱ nde̱e̱ sä̱ndoꞌoꞌ tu̱ ña̱ꞌaꞌ ndo̱ꞌ,
sa̱kanꞌ ña̱ ne̱ tukuꞌ ni̱ nduu̱ tu̱ mi̱iꞌ ndoꞌó xta̱ꞌanꞌ nuu̱ꞌ ñu̱ꞌuꞌ Egipto.
22 ’Kä̱vi̱koꞌ uꞌvi̱ ndo̱ꞌ ña̱ꞌaꞌ kuaa̱nꞌ te̱ sa̱tyuunꞌ ni̱a̱,
ni̱ nde̱e̱ ne̱ ndaꞌvi köo̱ꞌ yu̱vaꞌ siꞌiꞌ.
23 Sa̱kanꞌ ña̱ naaꞌ mi̱iꞌ kuuꞌ ndo̱ꞌ xiinꞌ ne̱ ja̱a̱nꞌ te̱ kaka̱n ni̱a̱ nuu̱ꞌ i̱ ña̱ tyi̱ndi̱e̱eꞌ ña̱ꞌaꞌ i̱ ndii,
kaꞌán nda̱ku i̱ xiinꞌ ndo̱ꞌ ña̱ ku̱ni̱ so̱ꞌo̱ i̱ ña̱ kaꞌán ni̱a̱ xiinꞌ i̱,
te̱ tyi̱ndi̱e̱eꞌ xna̱ꞌa̱ ña̱ꞌaꞌ i̱.
24 Na̱saa̱ꞌ i̱ ku̱ni̱ i̱ ndoꞌó,
te̱ ka̱ꞌni̱ꞌ i̱ sa̱kuuꞌ ndo̱ꞌ xiinꞌ ityi̱ i̱,
te̱ ndoo̱ kuaa̱nꞌ ñaꞌ siꞌi sa̱kuuꞌ ndo̱ꞌ,
te̱ ndoo̱ ndaꞌvi tu̱ siꞌe̱ sa̱kuuꞌ ndo̱ꞌ.
25 ’Naaꞌ sa̱tatu i̱i̱n ndoꞌó xu̱ꞌunꞌ sa̱va̱ ne̱ nduuꞌ kuenta i̱,
ne̱ ndaꞌvi kuuꞌ,
ne̱ ndieeꞌ ñu̱u̱ ndo̱ꞌ ndii,
sä̱a̱ ndo̱ꞌ xiinꞌ ni̱a̱ nde̱e̱ naa xaaꞌ i̱nga̱ te̱ satatu xu̱ꞌunꞌ,
ni̱ nde̱e̱ kë̱ndiaa̱ꞌ yaꞌviꞌ tu̱ ña̱ꞌaꞌ ndo̱ꞌ xata̱ꞌ xu̱ꞌunꞌ ja̱a̱nꞌ.
26 Te̱ naaꞌ ni̱ tyi̱ka̱ndi̱a̱ ne̱ ni̱ sa̱tatu ndo̱ꞌ xu̱ꞌunꞌ ja̱a̱nꞌ toto̱ ni̱a̱ nda̱ꞌaꞌ ndo̱ꞌ xaꞌa̱ꞌ xu̱ꞌunꞌ ja̱a̱nꞌ ndii,
na̱ta̱xi̱ ndo̱ꞌ toto̱ ni̱a̱ ja̱a̱nꞌ nda̱ꞌaꞌ ni̱a̱ ña̱ kuní ka̱ keta̱ ñu̱ꞌu̱.
27 Sa̱kanꞌ ña̱ xa̱ toto̱ ja̱a̱nꞌ ku̱i̱ti̱ꞌ kumiꞌ ni̱a̱,
te̱ xiinꞌ ña̱ ja̱a̱nꞌ ku̱saꞌvi̱ ni̱a̱ kii̱ꞌ ku̱ni̱ vi̱xi̱n ni̱a̱,
te̱ naaꞌ nä̱ta̱xi̱ ndo̱ꞌ a̱ nda̱ꞌaꞌ ni̱a̱ ndii,
köo̱ꞌ ña̱ ku̱saꞌvi̱ ni̱a̱ te̱ kusu̱n ni̱a̱.
Te̱ naaꞌ kaꞌa̱n ku̱a̱tyi̱ ni̱a̱ nuu̱ꞌ i̱ xaꞌa̱ꞌ ña̱ ja̱a̱nꞌ ndii,
tyi̱ndi̱e̱eꞌ ña̱ꞌaꞌ i̱,
sa̱kanꞌ ña̱ Ndiosí,
ña̱ kuvita i̱ni̱ xaꞌa̱ꞌ ne̱ yivi̱ꞌ,
nduuꞌ i̱.
28 ’Käꞌa̱n ki̱ni̱ ndo̱ꞌ xaꞌa̱ꞌ yuꞌu̱,
Ndiosí,
ni̱ nde̱e̱ kä̱ni̱a̱ꞌa tu̱ ndo̱ꞌ xaꞌa̱ꞌ te̱ xaꞌndia tyuunꞌ nuu̱ꞌ ñu̱u̱ ndo̱ꞌ.
29 ’Kii̱ꞌ nakaya ndo̱ꞌ ña̱ savi̱ꞌ ndii,
kü̱u̱ kuatyí ndo̱ꞌ te̱ ki̱xi̱n na̱soko̱ꞌ ndo̱ꞌ ña̱ ni̱ na̱ku̱i̱xa̱ nu̱uꞌ nuu̱ꞌ i̱,
te̱ sa̱kanꞌ tu̱ ki̱xi̱n na̱soko̱ꞌ ndo̱ꞌ vino,
teꞌ nu̱uꞌ nuu̱ꞌ i̱.
’Te̱ kuní tu̱ a̱ ña̱ sa̱na̱kuaꞌa ndo̱ꞌ tiaa̱ siꞌe̱ nu̱uꞌ ndo̱ꞌ nda̱ꞌaꞌ i̱.
30 Te̱ sa̱kanꞌ tu̱ kuní a̱ ña̱ sa̱na̱kuaꞌa ndo̱ꞌ siꞌe̱ nu̱uꞌ si̱ndiki̱ꞌ,
xiinꞌ siꞌe̱ nu̱uꞌ mbe̱e̱ sana̱ ndo̱ꞌ nda̱ꞌaꞌ i̱.
Uxa̱ kivi̱ꞌ ku̱i̱ti̱ꞌ kuní a̱ ko̱o̱ riꞌ xiinꞌ si̱ꞌiꞌ riꞌ,
te̱ kii̱ꞌ xkaꞌndi̱a̱ ña̱ uxa̱ kivi̱ꞌ ja̱a̱nꞌ ndii,
sa̱na̱kuaꞌa ndo̱ꞌ riꞌ nda̱ꞌaꞌ i̱.
31 ’Ndoꞌó ndii,
ne̱ su̱ꞌu̱n ndi̱ti̱a̱ mi̱iꞌ xa̱tyiꞌ i̱ nduuꞌ sa̱kuuꞌ ndo̱ꞌ.
Xaꞌa̱ꞌ a̱ ja̱a̱nꞌ na kü̱xi̱ ndo̱ꞌ nde̱i̱ꞌ nde̱e̱ i̱i̱n ki̱tiꞌ,
tiꞌ ni̱ xiꞌi̱ ni̱ xa̱a̱ ki̱tiꞌ i̱kuꞌ,
süu̱ꞌ ja̱a̱nꞌ ndii nuu̱ꞌ naya̱ꞌ ko̱ꞌni̱ ndo̱ꞌ nde̱i̱ꞌ tiꞌ ja̱a̱nꞌ.