So̱ꞌo̱ ni̱ xa̱a̱ a̱ kii̱ꞌ ni̱ nde̱ku̱i̱e̱e̱ ne̱ Israel miiꞌ iinꞌ i̱kuꞌ Sinaí
19
Sa̱va̱ ni̱ kivi̱ꞌ ña̱ ni̱ xinu̱ uni̱ yoo̱ꞌ ña̱ ni̱ ki̱e̱e̱ ne̱ Israel nuu̱ꞌ ñu̱ꞌuꞌ Egipto,
te̱ ni̱ nde̱ku̱i̱e̱e̱ ni̱a̱ miiꞌ i̱tyi kaaꞌ,
miiꞌ iinꞌ i̱kuꞌ Sinaí.
2 Te̱ ni̱ ki̱e̱e̱ ne̱ Israel miiꞌ naniꞌ Refidim,
te̱ ni̱ xa̱a̱ ni̱a̱ miiꞌ i̱tyi kaaꞌ miiꞌ iinꞌ i̱kuꞌ Sinaí ja̱a̱nꞌ,
te̱ ni̱ xi̱ku̱ndiee̱ ni̱a̱ xtoꞌniꞌ miiꞌ iinꞌ i̱kuꞌ ja̱a̱nꞌ.
3 Sa̱kanꞌ te̱ ni̱ ka̱a̱ Moisés xíniꞌ i̱kuꞌ ja̱a̱nꞌ te̱ na̱taꞌanꞌ ra̱ xiinꞌ Ndiosí,
te̱ ni̱ kaꞌa̱n Yahvé xiinꞌ ra̱ xíniꞌ i̱kuꞌ ja̱a̱nꞌ ndii:
―Ña̱ yo̱ꞌo̱ꞌ kaꞌa̱n u̱nꞌ xiinꞌ ne̱ taꞌanꞌ u̱nꞌ,
ne̱ vi̱ꞌe̱ Jacob,
ne̱ nduuꞌ ne̱ Israel:
4 “Ndoꞌó nduuꞌ ne̱ ni̱ xi̱ni̱ ña̱ ni̱ xa̱a̱ yuꞌu̱ xiinꞌ ne̱ ndieeꞌ nuu̱ꞌ ñu̱ꞌuꞌ Egipto,
te̱ ni̱ xi̱ni̱ tu̱ ndo̱ꞌ sa̱a̱ ni̱ xa̱a̱ i̱,
te̱ ni̱ xa̱a̱ ndo̱ꞌ nuu̱ꞌ i̱ yoꞌoꞌ,
ni̱ xa̱a̱ i̱ xiinꞌ ndo̱ꞌ nde̱e̱ naa xaaꞌ tasu̱ꞌ kii̱ꞌ ndisoꞌ riꞌ siꞌe̱ riꞌ xata̱ꞌ ndi̱xi̱n riꞌ.
5 Sa̱kanꞌ na kuiiꞌ naaꞌ sa̱xinu̱ ndo̱ꞌ sa̱kuuꞌ ña̱ kaꞌán i̱ xiinꞌ ndo̱ꞌ,
te̱ käꞌnu̱ ndo̱ꞌ kuento ña̱ ndoó i̱ xiinꞌ ndo̱ꞌ vi̱ti̱n ndii.
Ndoꞌó ku̱ndu̱u̱ ne̱ ku̱ndani ka̱ i̱ te̱ sa̱kanꞌ i̱nga̱ ti̱ꞌvi̱ ne̱ yivi̱ꞌ i̱i̱n yivi̱ꞌ,
sa̱kanꞌ ña̱ ka̱niiꞌ ñu̱ꞌuꞌ i̱i̱n yivi̱ꞌ nduuꞌ kuenta i̱.
6 Te̱ ndoꞌó tu̱ ku̱ndu̱u̱ sutu̱,
te̱ ka̱ꞌndi̱a̱ tyuunꞌ nuu̱ꞌ ne̱ yivi̱ꞌ i̱i̱n yivi̱ꞌ,
te̱ xa̱ ndi̱ti̱a̱ mi̱iꞌ ku̱i̱ti̱ꞌ i̱ ku̱ndu̱u̱ tu̱ ndo̱ꞌ”.
Sa̱kuuꞌ ña̱ kaa̱ꞌ kaꞌa̱n u̱nꞌ xiinꞌ ne̱ vi̱ꞌe̱ Israel ―ni̱ katyi̱ a̱.
7 Sa̱kanꞌ te̱ ni̱ na̱ndi̱koꞌ Moisés,
te̱ ni̱ na̱ka̱ya̱ ra̱ sa̱kuuꞌ te̱ xi̱xa̱,
te̱ kuuꞌ nu̱uꞌ nuu̱ꞌ ne̱ Israel,
te̱ ni̱ kaꞌa̱n ra̱ xiinꞌ te̱ ja̱a̱nꞌ sa̱kuuꞌ ña̱ ni̱ kaꞌa̱n tyuunꞌ Yahvé xiinꞌ ra̱.
8 Te̱ i̱i̱n ni̱ nda̱ꞌaꞌ ni̱ kaꞌa̱n sa̱kuuꞌ ne̱ Israel xiinꞌ ra̱ ndii:
―Sa̱xinu̱ ndu̱ sa̱kuuꞌ ña̱ ni̱ kaꞌa̱n tyuunꞌ Yahvé ―ni̱ katyi̱ ni̱a̱.
Sa̱kanꞌ te̱ ni̱ na̱ndi̱koꞌ Moisés xíniꞌ i̱kuꞌ ja̱a̱nꞌ,
te̱ ni̱ kaꞌa̱n ra̱ xiinꞌ Yahvé ña̱ ni̱ kaꞌa̱n ne̱ ja̱a̱nꞌ xiinꞌ ra̱.
9 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Nuu̱ꞌ i̱i̱n viko̱ꞌ nu̱ꞌuꞌ xaa̱ i̱ miiꞌ iinꞌ u̱nꞌ te̱ ku̱ni̱ so̱ꞌo̱ ne̱ yivi̱ꞌ ñaa̱ꞌ kii̱ꞌ kaꞌa̱n i̱ xiinꞌ u̱nꞌ,
sa̱kanꞌ te̱ ka̱ndi̱xaꞌ ni̱a̱ yoꞌó sa̱kuuꞌ i̱tyiꞌ kii̱ꞌ kaꞌa̱n u̱nꞌ xiinꞌ ni̱a̱ ―ni̱ katyi̱ a̱.
Sa̱kanꞌ te̱ ni̱ xaꞌa̱n kaꞌa̱n Moisés xiinꞌ Yahvé xaꞌa̱ꞌ ña̱ ni̱ ndoo̱ ni̱a̱ kuento sa̱xinu̱ ni̱a̱.
10 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Kuaꞌan miiꞌ ndieeꞌ ne̱ yivi̱ꞌ,
te̱ kaꞌa̱n u̱nꞌ xiinꞌ ni̱a̱ na nda̱sa̱ndo̱o̱ xiinꞌ mi̱iꞌ ni̱a̱ vi̱ti̱n xiinꞌ tiaa̱n,
na na̱ti̱a̱ ni̱a̱ toto̱ ni̱a̱,
11 te̱ ko̱o̱ tu̱ꞌva̱ ni̱a̱ kii̱ꞌ xaa̱ kivi̱ꞌ ña̱ uni̱,
sa̱kanꞌ ña̱ kivi̱ꞌ ja̱a̱nꞌ na̱kaa̱ꞌ yuꞌu̱,
Yahvé,
xto̱ꞌo̱ ni̱a̱,
xíniꞌ i̱kuꞌ Sinaí nuu̱ꞌ sa̱kuuꞌ ni̱a̱.
12 Te̱ niaꞌa̱ u̱nꞌ sa̱a̱ xinunduu xaꞌa̱ꞌ i̱kuꞌ miiꞌ kuꞌu̱n ndi̱koꞌ ni̱a̱,
te̱ kaꞌa̱n u̱nꞌ xiinꞌ ni̱a̱ ña̱ kä̱a̱ ni̱a̱ xíniꞌ i̱kuꞌ ja̱a̱nꞌ,
te̱ ni̱ nde̱e̱ kü̱ya̱ti̱n tu̱ ni̱a̱ xaꞌa̱ꞌ a̱.
Sa̱kanꞌ ña̱ yo̱o̱ ka̱ ku̱ya̱ti̱n xaꞌa̱ꞌ i̱kuꞌ ja̱a̱nꞌ ndii,
ku̱vi̱ ni̱a̱.
13 Sa̱kanꞌ na kuiiꞌ kü̱vi̱ tondi̱a̱ nda̱ꞌaꞌ ndo̱ꞌ ne̱ yivi̱ꞌ,
ne̱ xkaꞌndi̱a̱ xaꞌinꞌ ja̱a̱nꞌ,
süu̱ꞌ ja̱a̱nꞌ ndii,
ka̱ꞌni̱ꞌ ña̱ꞌaꞌ ndo̱ꞌ xiinꞌ yuu̱ꞌ nda̱ꞌaꞌ uun xiinꞌ kuxi̱.
Köo̱ꞌ a̱ xaaꞌ a̱ naaꞌ ne̱ yivi̱ꞌ nduuꞌ ni̱a̱ uun ki̱tiꞌ nduuꞌ riꞌ,
kü̱vi̱ ka̱ na̱ko̱o̱ tiaku ña̱ꞌaꞌ ndo̱ꞌ.
Ndisu̱ kii̱ꞌ ku̱ni̱ so̱ꞌo̱ ndo̱ꞌ na̱ꞌaꞌ ndeꞌí nda̱tyuunꞌ,
tunꞌ nityiꞌ ndii,
ku̱vi̱ ku̱ya̱ti̱n ndo̱ꞌ xaꞌa̱ꞌ i̱kuꞌ ja̱a̱nꞌ ―ni̱ katyi̱ a̱.
14 Te̱ ni̱ na̱kaa̱ꞌ Moisés xíniꞌ i̱kuꞌ ja̱a̱nꞌ,
te̱ ni̱ xa̱a̱ ra̱ miiꞌ ndieeꞌ ne̱ yivi̱ꞌ ja̱a̱nꞌ,
te̱ ni̱ sa̱kooꞌ tu̱ꞌva̱ ña̱ꞌaꞌ ra̱ te̱ sa̱kaꞌnuꞌ ni̱a̱ Ndiosí,
te̱ ni̱ na̱ti̱a̱ ne̱ ja̱a̱nꞌ toto̱ ni̱a̱.
15 Sa̱kanꞌ te̱ ni̱ kaꞌa̱n Moisés xiinꞌ ne̱ yivi̱ꞌ ja̱a̱nꞌ ndii:
―Sa̱kooꞌ tu̱ꞌva̱ xiinꞌ mi̱iꞌ ndo̱ꞌ xaꞌa̱ꞌ kivi̱ꞌ i̱sa,
te̱ küsu̱n nde̱e̱ i̱i̱n ndo̱ꞌ xiinꞌ ñaꞌ siꞌi ndo̱ꞌ nde̱e̱ ska̱tyiꞌ xkaꞌndi̱a̱ kivi̱ꞌ ja̱a̱nꞌ ―ni̱ katyi̱ ra̱.
16 Te̱ ku̱a̱xi̱ kitúꞌ kivi̱ꞌ ña̱ uni̱ ndii,
ni̱ xika̱ ñuꞌu̱ savi̱ꞌ,
te̱ ndeꞌí a̱,
te̱ ni̱ nda̱si̱ ndo̱o̱ i̱i̱n viko̱ꞌ nu̱ꞌuꞌ ndiaaꞌ xíniꞌ i̱kuꞌ ja̱a̱nꞌ.
Te̱ ni̱ ndeꞌi̱ tiꞌeꞌ tu̱ i̱i̱n nda̱tyuunꞌ,
tunꞌ nityiꞌ,
te̱ ni̱ yi̱ꞌvi xa̱va̱ꞌa̱ sa̱kuuꞌ ne̱ yivi̱ꞌ ne̱ ndieeꞌ vi̱ꞌe̱ toto̱ nde̱e̱ ni̱ ki̱si̱ vi̱ꞌ ña̱ꞌaꞌ a̱.
17 Sa̱kanꞌ te̱ ni̱ ta̱va̱ꞌ Moisés ne̱ yivi̱ꞌ ja̱a̱nꞌ ti̱xi̱n vi̱ꞌe̱ toto̱,
te̱ kuaꞌa̱n ra̱ xiinꞌ ni̱a̱,
te̱ kuꞌu̱n na̱taꞌanꞌ ni̱a̱ xiinꞌ Ndiosí,
te̱ ni̱ xi̱kuita̱ ni̱a̱ xaꞌa̱ꞌ i̱kuꞌ Sinaí ja̱a̱nꞌ.
18 Te̱ kieeꞌ ñuꞌma̱ ka̱niiꞌ i̱kuꞌ Sinaí ja̱a̱nꞌ,
sa̱kanꞌ ña̱ i̱kanꞌ ni̱ nu̱u̱ Yahvé te̱i̱n ñuꞌu̱.
Kuaꞌa̱ꞌ ñuꞌma̱ kieeꞌ ka̱niiꞌ i̱kuꞌ ja̱a̱nꞌ nde̱e̱ naa i̱i̱n xaanꞌ miiꞌ taviꞌ ne̱ yivi̱ꞌ tyo̱o̱,
te̱ ni̱ ka̱nda̱ ndi̱e̱eꞌ xa̱va̱ꞌa̱ ka̱niiꞌ i̱kuꞌ ja̱a̱nꞌ nde̱e̱ naa kii̱ꞌ taa̱n ndi̱e̱eꞌ va̱.
19 Te̱ nda̱tyuunꞌ ja̱a̱nꞌ ndii,
so̱ꞌo̱ tiꞌeꞌ ka̱ ndeꞌí nu̱ꞌ i̱ꞌi̱n i̱tyiꞌ kuaꞌa̱n.
Kii̱ꞌ ndatuꞌunꞌ Moisés xiinꞌ Ndiosí ndii,
xiinꞌ ña̱ ndeꞌí savi̱ꞌ nakuiinꞌ a̱.
20 Te̱ ni̱ nu̱u̱ Yahvé xíniꞌ i̱kuꞌ Sinaí miiꞌ sukun ka̱,
te̱ ni̱ kaꞌa̱n a̱ xiinꞌ Moisés ña̱ ka̱a̱ ra̱ xíniꞌ i̱kuꞌ miiꞌ ni̱ nu̱u̱ a̱ ja̱a̱nꞌ.
Sa̱kanꞌ na ni̱ ka̱a̱ ra̱ i̱kanꞌ,
21 te̱ ni̱ kaꞌa̱n a̱ xiinꞌ ra̱ ndii:
―Kuaꞌan na̱kaa̱ꞌ te̱ kaꞌa̱n tyuunꞌ u̱nꞌ xiinꞌ ne̱ yivi̱ꞌ ña̱ na xkäꞌndi̱a̱ ni̱a̱ xaꞌinꞌ,
ni̱ nde̱e̱ sä̱a̱ tu̱ ni̱a̱ ña̱ nduxa̱ꞌ te̱ ku̱ni̱ ni̱a̱ nuu̱ꞌ i̱,
sa̱kanꞌ ña̱ ne̱ sa̱a̱ sa̱kanꞌ ndii,
ku̱vi̱ ni̱a̱.
22 Te̱ kaꞌa̱n tyuunꞌ tu̱ u̱nꞌ xiinꞌ sutu̱ ña̱ na sa̱ndo̱o̱ xiinꞌ mi̱iꞌ ra̱,
te̱ ku̱ya̱ti̱n ra̱ nuu̱ꞌ i̱,
sa̱kanꞌ te̱ kä̱ꞌni̱ꞌ ña̱ꞌaꞌ i̱ ―ni̱ katyi̱ a̱.
23 Te̱ ni̱ kaꞌa̱n Moisés xiinꞌ Yahvé ndii:
―Kü̱vi̱ ka̱a̱ ne̱ yivi̱ꞌ xíniꞌ i̱kuꞌ yoꞌoꞌ,
sa̱kanꞌ ña̱ mi̱iꞌ yoꞌó ni̱ kaꞌa̱n tyuunꞌ xiinꞌ i̱ ña̱ ka̱sa̱ꞌa̱ i̱ i̱i̱n xaꞌinꞌ xaꞌa̱ꞌ i̱kuꞌ yoꞌoꞌ,
te̱ ni̱ kaꞌa̱n i̱ xiinꞌ ne̱ yivi̱ꞌ ña̱ ñu̱ꞌuꞌ su̱ꞌu̱n nduuꞌ a̱ ―ni̱ katyi̱ ra̱.
24 Te̱ ni̱ kaꞌa̱n Yahvé xiinꞌ Moisés ndii:
―Kuaꞌan,
na̱kaa̱ꞌ te̱ ka̱a̱ u̱nꞌ xiinꞌ Aarón,
ndisu̱ sutu̱ xiinꞌ ne̱ yivi̱ꞌ ndii,
na sä̱a̱ ni̱a̱ ña̱ nduxa̱ꞌ te̱ xkaꞌndi̱a̱ ni̱a̱ xaꞌinꞌ te̱ ka̱a̱ ni̱a̱ miiꞌ nduꞌu̱ꞌ i̱ yoꞌoꞌ,
sa̱kanꞌ ña̱ yo̱o̱ ka̱ xkaꞌndi̱a̱ xaꞌinꞌ ja̱a̱nꞌ ndii,
ka̱ꞌni̱ꞌ ña̱ꞌaꞌ i̱ ―ni̱ katyi̱ a̱.
25 Sa̱kanꞌ te̱ ni̱ na̱kaa̱ꞌ Moisés,
te̱ ni̱ kaꞌa̱n ra̱ sa̱kuuꞌ ña̱ ja̱a̱nꞌ xiinꞌ ne̱ yivi̱ꞌ ja̱a̱nꞌ.