So̱ꞌo̱ ni̱ xa̱a̱ a̱ kii̱ꞌ ni̱ ta̱xi̱ Ndiosí uxi̱ taꞌan tu̱ꞌu̱n nde̱iꞌ nda̱ꞌaꞌ Moisés
(Dt. 5.1-21)
20
Sa̱kanꞌ te̱ ni̱ kaꞌa̱n Ndiosí sa̱kuuꞌ tu̱ꞌu̱n yoꞌoꞌ xiinꞌ ne̱ Israel ndii:
2 ―Yuꞌu̱ nduuꞌ Yahvé,
Ndiosí ndo̱ꞌ,
ña̱ ni̱ ta̱va̱ꞌ ndoꞌó nuu̱ꞌ ñu̱ꞌuꞌ Egipto,
ñu̱u̱ miiꞌ ni̱ nduu̱ ne̱ xikaꞌ nuuꞌ so̱ꞌo̱.
3 ’Yuꞌu̱ ku̱i̱ti̱ꞌ ku̱ndu̱u̱ Ndiosí ndo̱ꞌ,
te̱ kü̱miꞌ ndo̱ꞌ nde̱e̱ i̱i̱n i̱nga̱ ndiosí.
4 ’Kä̱sa̱ꞌa̱ ndo̱ꞌ ña̱ nianiaꞌ,
ña̱ nakuitá xiinꞌ nde̱e̱ i̱i̱n ña̱ ndieeꞌ ndi̱viꞌ,
ni̱ nde̱e̱ ña̱ nakuitá xiinꞌ ña̱ yoo nuu̱ꞌ ñu̱ꞌuꞌ i̱i̱n yivi̱ꞌ,
ni̱ nde̱e̱ ña̱ nakuitá xiinꞌ ña̱ ñuꞌuꞌ ti̱xi̱n ti̱kui mi̱ni̱ kunu.
5 Kü̱i̱ta̱ xitiꞌ ndo̱ꞌ nuu̱ꞌ ña̱ ja̱a̱nꞌ,
te̱ ni̱ nde̱e̱ sä̱kaꞌnuꞌ tu̱ ña̱ꞌaꞌ ndo̱ꞌ,
sa̱kanꞌ ña̱ yuꞌu̱,
Yahvé,
ña̱ nduuꞌ Ndiosí ndo̱ꞌ ndii,
Ndiosí ña̱ kuiñu va̱ nduuꞌ i̱.
Te̱ xaꞌa̱ꞌ sa̱kuuꞌ ña̱ ni̱a̱ꞌa ña̱ xaaꞌ yu̱vaꞌ siꞌiꞌ ndii,
ka̱ni̱ i̱ siꞌe̱ ni̱a̱,
xiinꞌ si̱a̱niꞌ ni̱a̱,
xiinꞌ si̱a̱niꞌ xikuaꞌ ni̱a̱ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱ ja̱a̱nꞌ.
6 Ndisu̱ ku̱vi̱ta i̱ni̱ i̱ xaꞌa̱ꞌ kuaꞌa̱ꞌ mií si̱a̱niꞌ xikuaꞌ,
ne̱ ndani̱ yuꞌu̱,
te̱ sa̱xinu̱ ni̱a̱ ña̱ kaꞌán tyuunꞌ i̱ xiinꞌ ni̱a̱.
7 ’Tï̱i̱n ndi̱a̱a̱ sikiꞌ ndo̱ꞌ kivi̱ꞌ yuꞌu̱,
ña̱ nduuꞌ Yahvé Ndiosí ndo̱ꞌ,
sa̱kanꞌ ña̱ ne̱ tiinꞌ ndiaa sikiꞌ kivi̱ꞌ i̱ ndii,
ka̱ni̱ ña̱ꞌaꞌ i̱.
8 ’Na̱ka̱ꞌanꞌ ndo̱ꞌ xaꞌa̱ꞌ kivi̱ꞌ ña̱ xinandiee̱ꞌ ndo̱ꞌ,
te̱ ki̱ꞌi̱nꞌ kaꞌnuꞌ ndo̱ꞌ a̱.
9 Iñu̱ taꞌan kivi̱ꞌ sa̱tyuunꞌ ndo̱ꞌ,
te̱ sa̱a̱ ndo̱ꞌ sa̱kuuꞌ tyu̱u̱n nuu̱ꞌ ndo̱ꞌ.
10 Ndisu̱ kivi̱ꞌ ña̱ uxa̱ ndii,
kivi̱ꞌ ña̱ na̱ndiee̱ꞌ ndo̱ꞌ nduuꞌ a̱,
te̱ ndi̱ti̱a̱ yuꞌu̱,
Yahvé,
Ndiosí ndo̱ꞌ,
nduuꞌ kivi̱ꞌ ja̱a̱nꞌ.
Sä̱a̱ ndo̱ꞌ nde̱e̱ i̱i̱n tyu̱u̱n kivi̱ꞌ ja̱a̱nꞌ,
ni̱ nde̱e̱ tiaa̱ siꞌe̱ ndo̱ꞌ,
ni̱ nde̱e̱ ña̱ꞌaꞌ siꞌe̱ ndo̱ꞌ,
ni̱ nde̱e̱ te̱ yivi̱ꞌ,
te̱ xikaꞌ nuuꞌ so̱ꞌo̱ nuu̱ꞌ ndo̱ꞌ,
ni̱ nde̱e̱ ña̱ꞌaꞌ,
ñaꞌ xikaꞌ nuuꞌ so̱ꞌo̱ nuu̱ꞌ ndo̱ꞌ,
ni̱ nde̱e̱ ki̱tiꞌ sana̱ ndo̱ꞌ,
ni̱ nde̱e̱ ne̱ tukuꞌ,
ne̱ ndieeꞌ ñu̱u̱ ndo̱ꞌ.
11 Sa̱kanꞌ ña̱ iñu̱ taꞌan kivi̱ꞌ ni̱ xa̱tyuunꞌ yuꞌu̱,
Yahvé,
te̱ ni̱ xa̱ꞌa̱ i̱ ndi̱viꞌ,
xiinꞌ ñu̱ꞌuꞌ i̱i̱n yivi̱ꞌ,
xiinꞌ mi̱ni̱ kaꞌnuꞌ,
xiinꞌ sa̱kuuꞌ ña̱ yoo nuu̱ꞌ sa̱kuuꞌ ña̱ ja̱a̱nꞌ,
te̱ ni̱ na̱ndiee̱ꞌ i̱ kivi̱ꞌ ña̱ uxa̱.
Sa̱kanꞌ na kuiiꞌ ni̱ sa̱ñuꞌuꞌ i̱ kivi̱ꞌ ja̱a̱nꞌ,
te̱ ni̱ sa̱na̱nduuꞌ e̱ ndi̱ti̱a̱ i̱.
12 ’Ko̱to̱ kaꞌnuꞌ ndo̱ꞌ yu̱vaꞌ ndo̱ꞌ,
te̱ ko̱to̱ kaꞌnuꞌ tu̱ ndo̱ꞌ si̱ꞌiꞌ ndo̱ꞌ,
sa̱kanꞌ te̱ na̱kaa̱ kivi̱ꞌ ñu̱u̱ ndo̱ꞌ nuu̱ꞌ ñu̱ꞌuꞌ miiꞌ ta̱xi̱ yuꞌu̱,
Yahvé Ndiosí ndo̱ꞌ,
ku̱ndi̱e̱e̱ ndo̱ꞌ.
13 ’Kä̱ꞌni̱ꞌ ndo̱ꞌ.
14 ’Kü̱miꞌ ndo̱ꞌ musa ndo̱ꞌ.
15 ’Sä̱kuiꞌnaꞌ ndo̱ꞌ.
16 ’Käꞌa̱n ndo̱ꞌ tu̱ꞌu̱n vixi̱ xaꞌa̱ꞌ ne̱ yivi̱ꞌ xiinꞌ ndo̱ꞌ.
17 ’Ndï̱o̱o̱ꞌ i̱ni̱ ndo̱ꞌ xaꞌa̱ꞌ vi̱ꞌe̱ te̱ yivi̱ꞌ xiinꞌ ndo̱ꞌ.
Ndï̱o̱o̱ꞌ i̱ni̱ tu̱ ndo̱ꞌ xaꞌa̱ꞌ ñaꞌ siꞌi ra̱,
ni̱ nde̱e̱ xaꞌa̱ꞌ te̱ yivi̱ꞌ,
te̱ xikaꞌ nuuꞌ so̱ꞌo̱ nuu̱ꞌ ra̱,
ni̱ nde̱e̱ xaꞌa̱ꞌ ña̱ꞌaꞌ,
ñaꞌ xikaꞌ nuuꞌ so̱ꞌo̱ nuu̱ꞌ ra̱,
ni̱ nde̱e̱ xaꞌa̱ꞌ si̱ndiki̱ꞌ sana̱ ra̱,
ni̱ nde̱e̱ xaꞌa̱ꞌ mburru sana̱ ra̱,
ni̱ nde̱e̱ xaꞌa̱ꞌ nde̱e̱ i̱i̱n ña̱ꞌa̱ ña̱ kumiꞌ ra̱ ―ni̱ katyi̱ a̱ xiinꞌ ni̱a̱.
So̱ꞌo̱ ni̱ xa̱a̱ a̱ kii̱ꞌ ni̱ yi̱ꞌvi va̱ ne̱ Israel ku̱ni̱ ni̱a̱ nuu̱ꞌ Ndiosí
18 Ni̱ xi̱ni̱ so̱ꞌo̱ sa̱kuuꞌ ne̱ Israel ndeꞌí savi̱ꞌ,
xiinꞌ ña̱ xikaꞌ ñuꞌu̱ a̱,
xiinꞌ ña̱ ndeꞌí nda̱tyuunꞌ tunꞌ nityiꞌ,
te̱ ni̱ xi̱ni̱ tu̱ ni̱a̱ ña̱ kieeꞌ ñuꞌma̱ ka̱niiꞌ i̱kuꞌ ja̱a̱nꞌ.
Te̱ kii̱ꞌ ni̱ xi̱ni̱ ni̱a̱ sa̱kuuꞌ ña̱ ja̱a̱nꞌ ndii,
ni̱ yi̱ꞌvi ni̱a̱ nde̱e̱ ni̱ ki̱si̱ ña̱ꞌaꞌ a̱,
te̱ ni̱ xi̱kuita̱ xikaꞌ ni̱a̱.
19 Sa̱kanꞌ te̱ ni̱ kaꞌa̱n ni̱a̱ xiinꞌ Moisés ndii:
―Va̱ꞌa̱ ka̱ yoꞌó kaꞌa̱n xiinꞌ ndu̱ ña̱ kaꞌán Ndiosí xiinꞌ u̱nꞌ,
ndisu̱ küní ndu̱ ña̱ kaꞌa̱n mi̱iꞌ Ndiosí xiinꞌ ndu̱,
sa̱kanꞌ ña̱ naaꞌ sa̱a̱ a̱ sa̱kanꞌ ndii,
i̱yo̱ ku̱vi̱ ndu̱ ―ni̱ katyi̱ ni̱a̱.
20 Te̱ ni̱ kaꞌa̱n Moisés xiinꞌ ni̱a̱ ndii:
―Kü̱yiꞌvi ndo̱ꞌ,
sa̱kanꞌ ña̱ ku̱a̱xi̱ Ndiosí te̱ ko̱to̱ ku̱a̱ꞌa̱ a̱ ndoꞌó,
te̱ ku̱a̱xi̱ tu̱ a̱ te̱ ku̱yi̱ꞌvi ña̱ꞌaꞌ ndo̱ꞌ,
sa̱kanꞌ te̱ sä̱a̱ ka̱ ndo̱ꞌ ku̱a̱tyi̱ ―ni̱ katyi̱ ra̱.
21 Sa̱kanꞌ na ni̱ ndoo̱ ne̱ ja̱a̱nꞌ itaꞌ ni̱a̱ nde̱e̱ ndo̱so̱ꞌ i̱kanꞌ,
te̱ Moisés ni̱ ku̱ya̱ti̱n nuu̱ꞌ viko̱ꞌ nu̱ꞌuꞌ ndiaaꞌ miiꞌ yoo Ndiosí.
So̱ꞌo̱ ni̱ xa̱a̱ a̱ kii̱ꞌ ni̱ xa̱ꞌa̱ ne̱ Israel i̱i̱n altar miiꞌ na̱soko̱ꞌ ni̱a̱ ki̱tiꞌ nuu̱ꞌ Ndiosí
22 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Ña̱ yo̱ꞌo̱ꞌ kaꞌa̱n u̱nꞌ xiinꞌ ne̱ Israel:
“Xa̱ ni̱ xi̱ni̱ so̱ꞌo̱ ndo̱ꞌ ña̱ ni̱ kaꞌa̱n i̱ xiinꞌ ndo̱ꞌ nde̱e̱ ndi̱viꞌ.
23 Kä̱sa̱ꞌa̱ ndo̱ꞌ ña̱ nianiaꞌ xiinꞌ oro uun xiinꞌ plata,
te̱ sa̱kaꞌnuꞌ ndo̱ꞌ a̱ nde̱e̱ naa xakaꞌnuꞌ ndo̱ꞌ yuꞌu̱.
24 Ka̱sa̱ꞌa̱ ndo̱ꞌ i̱i̱n altar xaꞌa̱ꞌ i̱ xiinꞌ ñu̱ꞌuꞌ,
te̱ nuu̱ꞌ ña̱ ja̱a̱nꞌ na̱soko̱ꞌ ndo̱ꞌ ki̱tiꞌ,
tiꞌ xixí,
te̱ ko̱o̱ kaꞌnuꞌ i̱ni̱ i̱ xaꞌa̱ꞌ ku̱a̱tyi̱ ndo̱ꞌ,
xiinꞌ tu̱mani̱ꞌ ña̱ kuní ndo̱ꞌ na̱koo̱ ndo̱ꞌ ña̱ mani̱ꞌ xiinꞌ i̱,
mbe̱e̱,
xiinꞌ si̱ndiki̱ꞌ ku̱ndu̱u̱ a̱.
Te̱ ki̱xi̱n yuꞌu̱ miiꞌ ka̱ kaꞌa̱n i̱ xiinꞌ ndo̱ꞌ ka̱sa̱ꞌa̱ ndo̱ꞌ altar ja̱a̱nꞌ te̱ na̱ka̱ꞌanꞌ ndo̱ꞌ xaꞌa̱ꞌ i̱,
te̱ sa̱ñuꞌuꞌ i̱ ndoꞌó.
25 Te̱ naaꞌ ka̱sa̱ꞌa̱ ndo̱ꞌ i̱i̱n altar yuu̱ꞌ xaꞌa̱ꞌ i̱ ndii,
kä̱sa̱ꞌa̱ ndo̱ꞌ a̱ xiinꞌ yuu̱ꞌ ña̱ taꞌviꞌ xiinꞌ nda̱ꞌaꞌ ndo̱ꞌ,
sa̱kanꞌ ña̱ kii̱ꞌ taꞌviꞌ ndo̱ꞌ yuu̱ꞌ ja̱a̱nꞌ xiinꞌ ka̱a̱ ndii,
vä̱ꞌa̱ ka̱ a̱ ku̱ndu̱u̱ altar.
26 Te̱ altar ña̱ ka̱sa̱ꞌa̱ ndo̱ꞌ xaꞌa̱ꞌ i̱ ja̱a̱nꞌ ndii,
kä̱sa̱ꞌa̱ ndo̱ꞌ kuato̱ miiꞌ kueꞌni̱ ndo̱ꞌ ka̱a̱ ndo̱ꞌ nuu̱ꞌ a̱,
ko̱to̱ ka̱ na̱tuvi̱ ka̱ꞌaꞌ ndo̱ꞌ kii̱ꞌ ka̱a̱ ndo̱ꞌ i̱kanꞌ” ―ni̱ katyi̱ a̱.