So̱ꞌo̱ ni̱ xa̱a̱ a̱ kii̱ꞌ ni̱ ta̱ꞌviꞌ Moisés ka̱va̱ꞌ, te̱ ni̱ ki̱e̱e̱ ti̱kui ni̱ xi̱ꞌi̱ ne̱ Israel
17
Sa̱kuuꞌ ti̱ꞌvi̱ ne̱ Israel ni̱ ki̱e̱e̱ miiꞌ i̱tyi kaaꞌ miiꞌ naniꞌ Sin sa̱a̱ niiꞌ ni̱ kaꞌa̱n tyuunꞌ Yahvé xiinꞌ ni̱a̱,
te̱ kuaꞌa̱n ni̱a̱ kuiee kuiee ni̱ nde̱e̱ ni̱ xa̱a̱ ni̱a̱ miiꞌ naniꞌ Refidim,
te̱ ni̱ xi̱ku̱ndiee̱ ni̱a̱ i̱kanꞌ.
Ndisu̱ i̱kanꞌ ndii,
köo̱ꞌ ti̱kui ko̱ꞌo̱ ni̱a̱ ni̱ yoo̱.
2 Sa̱kanꞌ na kuiiꞌ ni̱ kaꞌa̱n ku̱a̱tyi̱ ni̱a̱ xiinꞌ Moisés ndii:
―Ta̱xi̱ ti̱kui ko̱ꞌo̱ ndu̱,
ityí va̱ i̱ni̱ ndu̱ ―ni̱ katyi̱ ni̱a̱.
Te̱ ni̱ kaꞌa̱n Moisés xiinꞌ ni̱a̱ ndii:
―¿Ndiotyun na kaꞌán ku̱a̱tyi̱ ndo̱ꞌ xiinꞌ yuꞌu̱?
¿Ndiotyun na xitoꞌ ku̱a̱ꞌa̱ ndo̱ꞌ Yahvé?
―ni̱ katyi̱ ra̱.
3 Ndisu̱ xaꞌa̱ꞌ a̱ ña̱ ityí xa̱va̱ꞌa̱ ne̱ ja̱a̱nꞌ ti̱kui na ni̱ na̱kaa̱ ni̱a̱ kaꞌán ku̱a̱tyi̱ ni̱a̱ xiinꞌ Moisés ndii:
―¿Ndiotyun na ni̱ ta̱va̱ꞌ u̱nꞌ ndu̱ nuu̱ꞌ ñu̱ꞌuꞌ Egipto?
¿Ñáá ni̱ ta̱va̱ꞌ u̱nꞌ ndu̱ i̱kanꞌ te̱ ka̱ꞌni̱ꞌ u̱nꞌ ndu̱ yoꞌoꞌ so̱ko̱ ti̱kui,
xiinꞌ siꞌe̱ ndu̱,
xiinꞌ ki̱tiꞌ sana̱ ndu̱?
―ni̱ katyi̱ ni̱a̱.
4 Sa̱kanꞌ te̱ ni̱ kaꞌa̱n ndaꞌvi Moisés nuu̱ꞌ Yahvé ndii:
―¿Sa̱a̱ sa̱a̱ i̱ xiinꞌ ne̱ kuaꞌa̱ꞌ kaa̱ꞌ?
Ndee siee ti̱o̱ꞌ kuní te̱ ka̱ꞌni̱ꞌ ni̱a̱ yuꞌu̱ xiinꞌ yuu̱ꞌ nda̱ꞌaꞌ ― ni̱ katyi̱ ra̱.
5 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Ki̱ꞌi̱n i̱tyiꞌ nuu̱ꞌ ne̱ Israel,
te̱ na̱ka̱ u̱nꞌ ndiaꞌviꞌ te̱ xi̱xa̱ nuu̱ꞌ ni̱a̱,
te̱ ko̱ni̱ꞌi̱ tu̱ u̱nꞌ ka̱roti,
tunꞌ ni̱ ku̱tunꞌ u̱nꞌ i̱ti̱a̱ Nilo,
te̱ kuaꞌan ndo̱ꞌ.
6 Te̱ i̱kanꞌ ku̱i̱i̱n yuꞌu̱ ndiatuꞌ i̱ yoꞌó xata̱ꞌ ka̱va̱ꞌ ña̱ nduꞌu̱ꞌ miiꞌ naniꞌ Horeb,
te̱ kii̱ꞌ ku̱tunꞌ u̱nꞌ ka̱va̱ꞌ ja̱a̱nꞌ ndii,
ki̱e̱e̱ ti̱kui ko̱ꞌo̱ ne̱ yivi̱ꞌ ―ni̱ katyi̱ a̱.
Te̱ sa̱kanꞌ xna̱ꞌa̱ ni̱ xa̱a̱ Moisés kii̱ꞌ ni̱ xa̱a̱ ra̱ i̱kanꞌ,
te̱ ni̱ ku̱tunꞌ ra̱ ka̱va̱ꞌ ja̱a̱nꞌ nuu̱ꞌ sa̱kuuꞌ te̱ xi̱xa̱ ja̱a̱nꞌ itaꞌ ra̱ i̱kanꞌ.
7 Te̱ ni̱ tyi̱nduꞌu̱ꞌ Moisés kivi̱ꞌ miiꞌ nduꞌu̱ꞌ ka̱va̱ꞌ ja̱a̱nꞌ naniꞌ a̱ Meribá xaꞌa̱ꞌ a̱ ña̱ i̱kanꞌ ni̱ kaꞌa̱n ku̱a̱tyi̱ ne̱ Israel xiinꞌ ra̱.
Te̱ ni̱ tyi̱nduꞌu̱ꞌ tu̱ ra̱ kivi̱ꞌ a̱ naniꞌ a̱ Masah xaꞌa̱ꞌ a̱ ña̱ ni̱ xi̱to̱ ku̱a̱ꞌa̱ ni̱a̱ Yahvé kaꞌán ni̱a̱ ndii:
“¿Ñáá yoo Yahvé xiinꞌ e̱ꞌ uun ñáá köo̱ꞌ a̱ yoo?”,
ni̱ katyi̱ ni̱a̱.
So̱ꞌo̱ ni̱ xa̱a̱ a̱ kii̱ꞌ ni̱ kanandoo ne̱ Israel te̱ vi̱ꞌe̱ Amalec kii̱ꞌ ni̱ ku̱ntaꞌanꞌ ni̱a̱ xiinꞌ ra̱
8 Kii̱ꞌ ndieeꞌ ka̱ ne̱ Israel miiꞌ naniꞌ Refidim ndii,
ni̱ ki̱xi̱n te̱ vi̱ꞌe̱ Amalec,
te̱ ni̱ ku̱ntaꞌanꞌ ra̱ xiinꞌ ni̱a̱.
9 Sa̱kanꞌ te̱ ni̱ kaꞌa̱n Moisés xiinꞌ Josué ndii:
―Na̱ka̱xi̱n ndiaꞌviꞌ te̱ yivi̱ꞌ,
te̱ kuꞌu̱n ku̱ntaꞌanꞌ ndo̱ꞌ xiinꞌ te̱ xíinꞌ,
te̱ ni̱ ti̱ꞌviꞌ Amalec.
Tiaa̱n ko̱ni̱ꞌi̱ i̱ ka̱roti Ndiosí te̱ ku̱i̱i̱n i̱ xíniꞌ i̱kuꞌ ―ni̱ katyi̱ ra̱.
10 Te̱ ni̱ sa̱xinu̱ Josué ña̱ ni̱ kaꞌa̱n tyuunꞌ Moisés xiinꞌ ra̱,
sa̱kanꞌ na ni̱ xaꞌa̱n ku̱ntaꞌanꞌ ra̱ xiinꞌ te̱ xíinꞌ Amalec ja̱a̱nꞌ.
Te̱ kii̱ꞌ kuntaꞌanꞌ te̱ ja̱a̱nꞌ ndii,
Moisés,
xiinꞌ Aarón,
xiinꞌ Hur kuaꞌa̱n ka̱a̱ miiꞌ sukun ka̱ xíniꞌ i̱i̱n i̱kuꞌ ña̱ iinꞌ ya̱ti̱n i̱kanꞌ.
11 Kii̱ꞌ ndaniꞌiꞌ Moisés nda̱ꞌaꞌ ra̱ ndii,
te̱ Israel kanandoo,
ndisu̱ kii̱ꞌ sanuuꞌ ra̱ nda̱ꞌaꞌ ra̱ ndii,
te̱ xíinꞌ Amalec kanandoo.
12 Ndisu̱ kii̱ꞌ ni̱ ku̱na̱ꞌaꞌ ndii,
ni̱ xa̱vi xa̱va̱ꞌa̱ nda̱ꞌaꞌ Moisés,
sa̱kanꞌ na ni̱ ki̱ꞌi̱n Aarón xiinꞌ Hur i̱i̱n yuu̱ꞌ,
te̱ ni̱ tyi̱nduꞌu̱ꞌ ra̱ a̱ te̱ ku̱nduꞌu̱ꞌ Moisés.
Ndi̱ꞌi̱ ja̱a̱nꞌ,
te̱ ni̱ xi̱kuita̱ na̱ndaa̱ꞌ ra̱ ta̱taꞌviꞌ xi̱i̱nꞌ ra̱,
te̱ ni̱ ti̱i̱n ra̱ nda̱ꞌaꞌ te̱ ja̱a̱nꞌ.
Sa̱kanꞌ ni̱ xa̱a̱ ra̱,
te̱ ni̱ ku̱ndi̱e̱ni na nda̱ꞌaꞌ Moisés nde̱e̱ ni̱ keta̱ ñu̱ꞌu̱.
13 Sa̱kanꞌ ni̱ xa̱a̱ a̱,
te̱ ni̱ ka̱nandoo Josué te̱ xíinꞌ Amalec,
te̱ ni̱ xa̱ꞌni̱ꞌ ña̱ꞌaꞌ ra̱ xiinꞌ ityi̱.
14 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Ke̱ꞌi̱ u̱nꞌ nuu̱ꞌ i̱i̱n tu̱tu̱ sa̱kuuꞌ ña̱ ni̱ xkaꞌndi̱a̱ kaa̱ꞌ,
te̱ na̱ka̱ꞌanꞌ ne̱ yivi̱ꞌ nuu̱ꞌ kuꞌu̱n e̱ꞌ ña̱ ni̱ yoo̱.
Te̱ kaꞌa̱n u̱nꞌ xiinꞌ Josué ña̱ sa̱ndo̱ñuꞌuꞌ xa̱tyiꞌ i̱ ne̱ vi̱ꞌe̱ Amalec kaa̱ꞌ nuu̱ꞌ ñu̱ꞌuꞌ i̱i̱n yivi̱ꞌ ―ni̱ katyi̱ a̱.
15 Te̱ ni̱ xa̱ꞌa̱ Moisés i̱i̱n altar i̱kanꞌ,
te̱ ni̱ tyi̱nduꞌu̱ꞌ ra̱ kivi̱ꞌ a̱ naniꞌ a̱ Yahvé-nisi.
Te̱ ña̱ ja̱a̱nꞌ kuni katyi̱ a̱ ndii:
Yahvé nduuꞌ nde̱e̱ naa ta̱tunꞌ nuu̱ꞌ i̱.
16 Te̱ ni̱ kaꞌa̱n ra̱ ndii:
―Xaꞌa̱ꞌ a̱ ña̱ ni̱ nda̱ni̱ꞌi̱ nda̱ꞌaꞌ Amalec nuu̱ꞌ Yahvé ndii,
nde̱e̱ ndiꞌiꞌ ni̱ kivi̱ꞌ ku̱ntaꞌanꞌ a̱ xiinꞌ ne̱ si̱a̱niꞌ xikaꞌ ra̱ nuu̱ꞌ kuꞌu̱n e̱ꞌ ―ni̱ katyi̱ ra̱.