So̱ꞌo̱ ni̱ xa̱a̱ a̱ kii̱ꞌ ni̱ ta̱xi̱ Ndiosí ña̱ xaxi̱ꞌ ña̱ naniꞌ maná xiinꞌ ndi̱ka̱ñuꞌu̱ꞌ ni̱ xi̱xi̱ ne̱ Israel
16
Ni̱ yaꞌa̱ te̱ ni̱ ki̱e̱e̱ sa̱kuuꞌ ne̱ Israel miiꞌ naniꞌ a̱ Elim,
te̱ kuaꞌa̱n ni̱a̱ miiꞌ i̱tyi kaaꞌ miiꞌ naniꞌ Sin ña̱ kanduꞌu̱ꞌ te̱i̱n miiꞌ kaaꞌ i̱tyi ña̱ naniꞌ Elim ja̱a̱nꞌ xiinꞌ i̱kuꞌ Sinaí.
Te̱ ni̱ xa̱a̱ ni̱a̱ kivi̱ꞌ ña̱ xaꞌu̱n xikaꞌ yoo̱ꞌ uvi̱ ña̱ kuuꞌ ni̱ ki̱e̱e̱ ni̱a̱ nuu̱ꞌ ñu̱ꞌuꞌ Egipto.
2 Te̱ miiꞌ i̱tyi kaaꞌ ja̱a̱nꞌ ni̱ xa̱ꞌaꞌ sa̱kuuꞌ ti̱ꞌvi̱ ne̱ Israel kani̱a̱ꞌa ni̱a̱ xaꞌa̱ꞌ Moisés xiinꞌ xaꞌa̱ꞌ Aarón,
3 kaꞌán ni̱a̱ ndii:
―Nde̱e̱ tyaaꞌ ka̱ na ni̱ xa̱ꞌni̱ꞌ Yahvé yooꞌ nuu̱ꞌ ñu̱ꞌuꞌ Egipto te̱ sa̱kanꞌ ña̱ ku̱ndi̱a̱ka̱ u̱nꞌ ndu̱ te̱ ki̱xi̱n ku̱vi̱ ndu̱ nde̱e̱ miiꞌ i̱tyi kaaꞌ yoꞌoꞌ.
I̱kanꞌ kii̱ꞌ xixiꞌ ndu̱ ndii,
xikundieé ndu̱ xi̱i̱nꞌ ki̱si̱ miiꞌ ñuꞌuꞌ tyituꞌ vi̱ꞌ nde̱i̱ꞌ,
te̱ xixiꞌ ndu̱ nde̱e̱ ndaꞌni ndu̱.
Ndisu̱ ndoꞌó ndii,
ni̱ ta̱va̱ꞌ ndo̱ꞌ ndu̱ i̱kanꞌ te̱ ku̱a̱xi̱ ka̱ꞌni̱ꞌ ndo̱ꞌ sa̱kuuꞌ ndu̱ so̱ko̱ miiꞌ i̱tyi kaaꞌ yoꞌoꞌ ―ni̱ katyi̱ ni̱a̱.
4 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Ko̱to̱ u̱nꞌ,
nde̱e̱ ndi̱viꞌ sa̱kuunꞌ i̱ ña̱ ka̱xi̱ꞌ ndo̱ꞌ.
Ki̱e̱e̱ ndo̱ꞌ sa̱a̱ ni̱a̱ꞌa̱ te̱ na̱ka̱ya̱ ndo̱ꞌ ña̱ kuní a̱ ka̱xi̱ꞌ ndo̱ꞌ i̱ꞌi̱n kivi̱ꞌ,
te̱ ko̱to̱ ku̱a̱ꞌa̱ i̱ ndoꞌó,
te̱ ku̱ni̱ i̱ naaꞌ sa̱xinu̱ ndo̱ꞌ ña̱ kaꞌán tyuunꞌ i̱ xiinꞌ ndo̱ꞌ uun sä̱xinu̱ ndo̱ꞌ a̱.
5 Ndisu̱ kivi̱ꞌ ña̱ iñu̱ ndii,
ku̱vi̱ na̱ka̱ya̱ ndo̱ꞌ ña̱ ka̱xi̱ꞌ ndo̱ꞌ uvi̱ taꞌan kivi̱ꞌ,
te̱ sa̱kooꞌ tu̱ꞌva̱ tu̱ ndo̱ꞌ a̱ xaꞌa̱ꞌ uvi̱ taꞌan kivi̱ꞌ ―ni̱ katyi̱ a̱.
6 Sa̱kanꞌ te̱ Moisés xiinꞌ Aarón ni̱ kaꞌa̱n ra̱ nuu̱ꞌ sa̱kuuꞌ ne̱ Israel ndii:
―Xa̱kuaa̱ꞌ ku̱nda̱ni̱ ndo̱ꞌ ña̱ Yahvé nduuꞌ ña̱ ni̱ ta̱va̱ꞌ ndoꞌó nuu̱ꞌ ñu̱ꞌuꞌ Egipto,
7 te̱ ni̱a̱ꞌa̱ ku̱ni̱ ndo̱ꞌ ña̱ ña̱ kaꞌnuꞌ kooꞌ tyukuu nduuꞌ Yahvé,
sa̱kanꞌ ña̱ ni̱ xi̱ni̱ so̱ꞌo̱ a̱ ña̱ ni̱ kaꞌa̱n ki̱ni̱ ndo̱ꞌ xaꞌa̱ꞌ a̱.
¿Yo̱o̱ nduuꞌ a̱ ni̱ xa̱a̱ nduꞌu̱ na kaꞌán ki̱ni̱ ndo̱ꞌ xaꞌa̱ꞌ ndu̱?
―ni̱ katyi̱ Moisés.
8 Te̱ ni̱ kaꞌa̱n ka̱ ra̱ xiinꞌ ni̱a̱ ndii:
―Xa̱kuaa̱ꞌ ndii,
nde̱i̱ꞌ ta̱xi̱ Yahvé ku̱xi̱ ndo̱ꞌ,
te̱ ni̱a̱ꞌa̱ ndii,
ta̱xi̱ a̱ kuaꞌa̱ꞌ va̱ xita̱ꞌ va̱ꞌa̱ ku̱xi̱ ndo̱ꞌ nde̱e̱ nda̱ꞌni̱ ndo̱ꞌ,
sa̱kanꞌ ña̱ ni̱ xi̱ni̱ so̱ꞌo̱ a̱ ña̱ ni̱ kaꞌa̱n i̱ꞌni̱ ndo̱ꞌ xaꞌa̱ꞌ a̱,
te̱ nduꞌu̱ ndii,
¿yo̱o̱ nduuꞌ a̱ ni̱ xa̱a̱ nduꞌu̱ na kaꞌán ki̱ni̱ ndo̱ꞌ xaꞌa̱ꞌ ndu̱?
Ña̱ ni̱ kaꞌa̱n ki̱ni̱ ndo̱ꞌ ja̱a̱nꞌ ndii,
süu̱ꞌ xaꞌa̱ꞌ nduꞌu̱ ni̱ kaꞌa̱n ndo̱ꞌ a̱,
süu̱ꞌ ja̱a̱nꞌ ndii,
xaꞌa̱ꞌ Yahvé ni̱ kaꞌa̱n ki̱ni̱ ndo̱ꞌ ―ni̱ katyi̱ Moisés.
9 I̱kanꞌ te̱ ni̱ kaꞌa̱n Moisés xiinꞌ Aarón ndii:
―Kaꞌa̱n xiinꞌ sa̱kuuꞌ ne̱ taꞌanꞌ e̱ꞌ,
ne̱ Israel ndii:
“Ni̱a̱ꞌa̱ ndo̱ꞌ nuu̱ꞌ Yahvé,
sa̱kanꞌ ña̱ ni̱ xi̱ni̱ so̱ꞌo̱ a̱ ña̱ ni̱ kaꞌa̱n i̱ꞌni̱ ndo̱ꞌ xaꞌa̱ꞌ a̱” ―ni̱ katyi̱ ra̱.
10 Te̱ kii̱ꞌ iinꞌ Aarón kaꞌán ra̱ xiinꞌ ne̱ Israel ndii,
ni̱ xi̱to̱ sa̱kuuꞌ ni̱a̱ miiꞌ i̱tyi kaaꞌ,
te̱ ni̱ xi̱ni̱ ni̱a̱ ni̱ tuvi̱ ña̱ kaꞌnuꞌ kooꞌ tyukuuꞌ Yahvé nuu̱ꞌ i̱i̱n viko̱ꞌ.
11 Te̱ ni̱ kaꞌa̱n Yahvé xiinꞌ Moisés ndii:
12 ―Xa̱ ni̱ xi̱ni̱ so̱ꞌo̱ yuꞌu̱ ña̱ kaꞌán i̱ꞌni̱ ne̱ Israel xaꞌa̱ꞌ i̱.
Ña̱ yo̱ꞌo̱ꞌ kaꞌa̱n u̱nꞌ xiinꞌ ni̱a̱:
“Xa̱kuaa̱ꞌ ndii,
nde̱i̱ꞌ ta̱xi̱ Yahvé ku̱xi̱ ndo̱ꞌ,
te̱ ni̱a̱ꞌa̱ ndii,
ta̱xi̱ a̱ kuaꞌa̱ꞌ va̱ xita̱ꞌ va̱ꞌa̱ ku̱xi̱ ndo̱ꞌ nde̱e̱ nda̱ꞌni̱ ndo̱ꞌ,
te̱ ku̱nda̱ni̱ ndo̱ꞌ ña̱ yuꞌu̱ nduuꞌ Yahvé,
ña̱ nduuꞌ Ndiosí ndo̱ꞌ” ―ni̱ katyi̱ a̱.
13 Xa̱ xa̱kuaa̱ꞌ sa̱kanꞌ ni̱ nde̱ku̱i̱e̱e̱ kuaꞌa̱ꞌ ndi̱ka̱ñuꞌu̱ꞌ nde̱e̱ ni̱ nda̱si̱ riꞌ nuu̱ꞌ ñu̱ꞌuꞌ miiꞌ ndieeꞌ ni̱a̱ ja̱a̱nꞌ,
te̱ ni̱a̱ꞌa̱ tu̱ku̱ kivi̱ꞌ ni̱ ku̱u̱n ka̱xi̱n sa̱a̱ xinunduu miiꞌ itaꞌ vi̱ꞌe̱ toto̱ ndieeꞌ ni̱a̱.
14 Te̱ kii̱ꞌ ni̱ ndu̱ti̱a̱ ka̱xi̱n nuu̱ꞌ ñu̱ꞌuꞌ miiꞌ i̱tyi kaaꞌ ja̱a̱nꞌ ndii,
ni̱ na̱tuvi̱ ndieeꞌ ña̱ ya̱a̱ ña̱ iinꞌ nde̱e̱ naa xiꞌe̱ xita̱ꞌ va̱ꞌa̱ nuu̱ꞌ ñu̱ꞌuꞌ ja̱a̱nꞌ.
15 Te̱ kii̱ꞌ ni̱ xi̱ni̱ ne̱ Israel ndieeꞌ ña̱ ja̱a̱nꞌ,
te̱ ni̱ xa̱ꞌaꞌ ni̱a̱ ndatuꞌúnꞌ taꞌanꞌ ni̱a̱ ndii:
― ¿Yo̱o̱ nduuꞌ a̱ kaa̱ꞌ?
―ni̱ katyi̱ ni̱a̱.
Ni̱ kaꞌa̱n ni̱a̱ sa̱kanꞌ ku̱a̱tyi̱ ndii,
xïní xa̱tyiꞌ ni̱a̱ yo̱o̱ nduuꞌ ña̱ ja̱a̱nꞌ.
Sa̱kanꞌ te̱ ni̱ kaꞌa̱n Moisés xiinꞌ ni̱a̱ ndii:
―Ña̱ kaa̱ꞌ nduuꞌ xita̱ꞌ va̱ꞌa̱ ña̱ taxiꞌ Yahvé ku̱xi̱ ndo̱ꞌ.
16 Te̱ ña̱ yo̱ꞌo̱ꞌ nduuꞌ ña̱ kaꞌán tyuunꞌ a̱ xiinꞌ ndo̱ꞌ:
I̱ꞌi̱n ndo̱ꞌ kuní a̱ na̱ka̱ya̱ sa̱a̱ kuuꞌ a̱ kuní ku̱xi̱ ndo̱ꞌ xiinꞌ sa̱a̱ kuuꞌ ne̱ ndieeꞌ vi̱ꞌe̱ ndo̱ꞌ,
te̱ na̱ka̱ya̱ ndo̱ꞌ uvi̱ litro a̱ xaꞌa̱ꞌ i̱ꞌi̱n ne̱ ndieeꞌ vi̱ꞌe̱ toto̱ xiinꞌ ndo̱ꞌ ―ni̱ katyi̱ ra̱.
17 Te̱ niiꞌ sa̱kanꞌ ni̱ xa̱a̱ ne̱ Israel,
sa̱va̱ ni̱a̱ kuaꞌa̱ꞌ a̱ ni̱ na̱ka̱ya̱,
te̱ sa̱va̱ tu̱ku̱ ni̱a̱ siee ku̱i̱ti̱ꞌ a̱ ni̱ na̱ka̱ya̱.
18 Ndisu̱ kii̱ꞌ ni̱ tyu̱ꞌu̱n ni̱a̱ xiinꞌ litro ndii,
nï̱ ndoo̱ ndo̱so̱ꞌ a̱ nuu̱ꞌ ne̱ ni̱ na̱ka̱ya̱ kuaꞌa̱ꞌ a̱,
ni̱ nde̱e̱ nï̱ kuni̱ tu̱ a̱ nuu̱ꞌ ne̱ ni̱ na̱ka̱ya̱ xa̱ku̱ꞌ a̱.
Sa̱kanꞌ ña̱ i̱ꞌi̱n ni̱a̱ ni̱ na̱ka̱ya̱ sa̱a̱ kuuꞌ a̱ kuní nuu̱ꞌ ni̱a̱ ku̱xi̱ ku̱i̱ti̱ꞌ ni̱a̱.
19 Sa̱kanꞌ te̱ ni̱ kaꞌa̱n Moisés xiinꞌ ni̱a̱ ndii:
―Nde̱e̱ i̱i̱n ndo̱ꞌ nä̱ko̱o̱ ña̱ kaa̱ꞌ ku̱xi̱ ndo̱ꞌ tiaa̱n ―ni̱ katyi̱ ra̱.
20 Ndisu̱ nï̱ ka̱ndi̱xaꞌ sa̱va̱ ni̱a̱ ña̱ ni̱ kaꞌa̱n Moisés xiinꞌ ni̱a̱ ja̱a̱nꞌ,
sa̱kanꞌ na ni̱ ta̱xa̱ꞌa̱ ni̱a̱ tyaaꞌ a̱ xaꞌa̱ꞌ i̱nga̱ kivi̱ꞌ,
ndisu̱ ni̱ ku̱u̱ ti̱ku̱xiꞌ ña̱ ni̱ ta̱xa̱ꞌa̱ ni̱a̱,
te̱ ni̱ ku̱u̱ xaꞌa̱n xa̱va̱ꞌa̱ a̱ tu̱ a̱.
Xaꞌa̱ꞌ a̱ ja̱a̱nꞌ na ni̱ na̱saa̱ꞌ Moisés ni̱ xi̱ni̱ ña̱ꞌaꞌ ra̱.
21 I̱ꞌi̱n ni̱a̱ ni̱ na̱ka̱ya̱ xaꞌa̱ꞌ i̱ꞌi̱n kivi̱ꞌ sa̱a̱ ni̱a̱ꞌa̱ ña̱ kuní ku̱xi̱ ni̱a̱ kivi̱ꞌ ja̱a̱nꞌ ku̱i̱ti̱ꞌ,
te̱ kii̱ꞌ ketaꞌ ñu̱ꞌu̱ te̱ nasaáꞌ i̱i̱n yivi̱ꞌ ndii,
ni̱ ndu̱ti̱a̱ ndo̱o̱ ña̱ xaxi̱ꞌ ña̱ ni̱ ndoo̱ ndieeꞌ ñu̱ꞌuꞌ nda̱ꞌaꞌ ni̱a̱ ja̱a̱nꞌ.
22 Te̱ kivi̱ꞌ ña̱ iñu̱ ndii,
uvi̱ i̱tyiꞌ ka̱ kuaꞌa̱ꞌ a̱ ni̱ na̱ka̱ya̱ i̱ꞌi̱n ni̱a̱,
sa̱kanꞌ na kuiiꞌ ku̱miꞌ litro a̱ ni̱ na̱tyiꞌi̱ꞌ i̱ꞌi̱n ni̱a̱.
Xaꞌa̱ꞌ a̱ ja̱a̱nꞌ na kii̱ꞌ ni̱ xi̱ni̱ te̱ kuuꞌ nu̱uꞌ nuu̱ꞌ ni̱a̱ ña̱ ni̱ xa̱a̱ ni̱a̱ ña̱ ja̱a̱nꞌ ndii,
ni̱ xaꞌa̱n kaꞌa̱n sa̱kuuꞌ ra̱ xiinꞌ Moisés xaꞌa̱ꞌ ña̱ ja̱a̱nꞌ.
23 Te̱ ni̱ kaꞌa̱n Moisés xiinꞌ ra̱ ndii:
―Ña̱ yo̱ꞌo̱ꞌ nduuꞌ ña̱ ni̱ kaꞌa̱n tyuunꞌ Yahvé:
“Tiaa̱n ndii,
kivi̱ꞌ ña̱ nandiee̱ꞌ e̱ꞌ nduuꞌ a̱,
ña̱ nduuꞌ ndi̱ti̱a̱ Yahvé,
sa̱kanꞌ na kuiiꞌ na kuni sa̱tyoꞌó ndo̱ꞌ ña̱ꞌa̱ ndii,
vi̱ti̱n sa̱tyoꞌó ndo̱ꞌ a̱.
Te̱ na̱ kuni ta̱vi̱ ndo̱ꞌ ña̱ꞌa̱ ndii,
vi̱ti̱n ta̱vi̱ ndo̱ꞌ a̱.
Te̱ sa̱kuuꞌ ña̱ ndoo̱ ndo̱so̱ꞌ ndii,
ta̱xa̱ꞌa̱ ndo̱ꞌ a̱ ku̱xi̱ ndo̱ꞌ tiaa̱n” ―ni̱ katyi̱ ra̱.
24 Sa̱kanꞌ na ni̱ ta̱xa̱ꞌa̱ ni̱a̱ tyaaꞌ ña̱ xaxi̱ꞌ ja̱a̱nꞌ xaꞌa̱ꞌ tu̱ku̱ kivi̱ꞌ naa ni̱ kaꞌa̱n tyuunꞌ Moisés xiinꞌ ni̱a̱,
te̱ nï̱ ku̱ti̱ku̱xiꞌ a̱,
ni̱ nde̱e̱ nï̱ ku̱xaꞌa̱n tu̱ a̱.
25 Te̱ ni̱ kaꞌa̱n ka̱ ra̱ xiinꞌ ni̱a̱ ndii:
―Ku̱xi̱ ndo̱ꞌ a̱ vi̱ti̱n,
sa̱kanꞌ ña̱ kivi̱ꞌ ña̱ nduuꞌ ndi̱ti̱a̱ Yahvé nduuꞌ a̱,
sa̱kanꞌ ña̱ naaꞌ kuꞌu̱n na̱ndu̱kuꞌ ndo̱ꞌ a̱ vi̱ti̱n ndii,
köo̱ꞌ xa̱tyiꞌ a̱ ku̱ni̱ ndo̱ꞌ ndieeꞌ ñu̱ꞌuꞌ xaꞌa̱ꞌ kuꞌu̱ kivi̱ꞌ vi̱ti̱n.
26 Iñu̱ taꞌan kivi̱ꞌ nduuꞌ ña̱ kande̱iꞌ na̱ka̱ya̱ ndo̱ꞌ ña̱ xaxi̱ꞌ ja̱a̱nꞌ,
ndisu̱ kivi̱ꞌ ña̱ uxa̱,
ña̱ nduuꞌ ndi̱ti̱a̱ Yahvé ndii,
köo̱ꞌ xa̱tyiꞌ a̱ ku̱ni̱ ndo̱ꞌ ndieeꞌ xaꞌa̱ꞌ kuꞌu̱ kivi̱ꞌ ja̱a̱nꞌ ―ni̱ katyi̱ ra̱.
27 Ndisu̱ tee̱ꞌ ndee ni̱ kaꞌa̱n ra̱ sa̱kanꞌ xiinꞌ ni̱a̱ ndii,
ni̱ ki̱e̱e̱ sa̱va̱ ni̱a̱ ni̱ na̱ndukuꞌ ni̱a̱ ña̱ xaxi̱ꞌ ja̱a̱nꞌ kii̱ꞌ ni̱ xa̱a̱ kivi̱ꞌ ja̱a̱nꞌ,
te̱ ndii köo̱ꞌ xa̱tyiꞌ a̱ ni̱ xi̱ni̱ ni̱a̱ ndieeꞌ.
28 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―¿A̱ma̱ vi̱ꞌ kuꞌu̱n ndi̱koꞌ ndoꞌó ña̱ sä̱xinu̱ ndo̱ꞌ ña̱ kaꞌán tyuunꞌ i̱ xiinꞌ ña̱ saniaꞌá i̱ ndoꞌó?
29 Na̱ka̱ꞌanꞌ ndo̱ꞌ ña̱ ni̱ ta̱xi̱ yuꞌu̱,
Yahvé,
i̱i̱n kivi̱ꞌ nuu̱ꞌ ndo̱ꞌ ña̱ na̱ndiee̱ꞌ ndo̱ꞌ,
sa̱kanꞌ na kuiiꞌ kivi̱ꞌ ña̱ iñu̱ ndii,
ni̱ ta̱xi̱ i̱ ña̱ na̱ka̱ya̱ ndo̱ꞌ uvi̱ i̱tyiꞌ kuaꞌa̱ꞌ ka̱ ña̱ xaxi̱ꞌ xaꞌa̱ꞌ kivi̱ꞌ ja̱a̱nꞌ.
Xaꞌa̱ꞌ a̱ ja̱a̱nꞌ na kivi̱ꞌ ña̱ uxa̱ ndii,
nde̱e̱ i̱i̱n ndo̱ꞌ kï̱e̱e̱ vi̱ꞌe̱ ndo̱ꞌ,
taxi̱nꞌ ku̱ndi̱e̱e̱ sa̱kuuꞌ ndo̱ꞌ vi̱ꞌe̱ ndo̱ꞌ ―ni̱ katyi̱ a̱.
30 Sa̱kanꞌ na kuiiꞌ ni̱ na̱ndiee̱ꞌ ne̱ Israel kivi̱ꞌ ña̱ uxa̱ ja̱a̱nꞌ.
31 Te̱ ña̱ xaxi̱ꞌ ña̱ ni̱ na̱ka̱ya̱ ni̱a̱ ja̱a̱nꞌ ndii,
maná ni̱ tyi̱nduꞌu̱ꞌ ni̱a̱ kivi̱ꞌ a̱.
Te̱ ya̱a̱ katyi̱ꞌ vi̱ꞌ a̱ nde̱e̱ naa iinꞌ ndi̱kinꞌ cilantro,
te̱ vixi̱ a̱ nde̱e̱ naaꞌ xita̱ꞌ va̱ꞌa̱ ña̱ kaaꞌ ñuñu̱ꞌ xata̱ꞌ.
32 Ndi̱ꞌi̱ ja̱a̱nꞌ te̱ ni̱ kaꞌa̱n Moisés xiinꞌ ni̱a̱ ndii:
―Ña̱ yo̱ꞌo̱ꞌ nduuꞌ ña̱ kaꞌán tyuunꞌ Yahvé:
“Tyu̱ꞌu̱n ndo̱ꞌ uvi̱ litro maná,
te̱ ta̱xa̱ꞌa̱ ndo̱ꞌ a̱,
te̱ ku̱ni̱ ne̱ si̱a̱niꞌ xikaꞌ ndo̱ꞌ sa̱a̱ iinꞌ xita̱ꞌ va̱ꞌa̱ ña̱ ni̱ ta̱xi̱ yuꞌu̱,
Yahvé,
ni̱ xi̱xi̱ ndo̱ꞌ miiꞌ i̱tyi kaaꞌ kii̱ꞌ ni̱ ta̱va̱ꞌ i̱ ndoꞌó nuu̱ꞌ ñu̱ꞌuꞌ Egipto”,
katyi a̱ ―ni̱ katyi̱ Moisés xiinꞌ ni̱a̱.
33 Sa̱kanꞌ te̱ ni̱ kaꞌa̱n Moisés xiinꞌ Aarón ndii:
―Ki̱ꞌi̱n i̱i̱n xi̱koꞌoꞌ,
te̱ ta̱a̱nꞌ u̱nꞌ uvi̱ litro maná ti̱xi̱n a̱,
ndi̱ꞌi̱ ja̱a̱nꞌ te̱ ka̱ni̱ u̱nꞌ nuu̱ꞌ Yahvé,
te̱ i̱kanꞌ ndoo̱ a̱ ku̱i̱i̱n a̱ nde̱e̱ ndiꞌiꞌ ni̱ kivi̱ꞌ,
sa̱kanꞌ te̱ ku̱ni̱ ne̱ si̱a̱niꞌ xikaꞌ ndo̱ꞌ nuu̱ꞌ kuꞌu̱n e̱ꞌ sa̱a̱ iinꞌ a̱ ―ni̱ katyi̱ ra̱.
34 Te̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés ña̱ ta̱xa̱ꞌa̱ ra̱ tyaaꞌ maná ja̱a̱nꞌ ndii,
ni̱ xa̱ni̱ Aarón xi̱koꞌoꞌ miiꞌ ñuꞌuꞌ a̱ nuu̱ꞌ xatu̱nꞌ miiꞌ naá yuu̱ꞌ ña̱ yoso̱ꞌ tu̱ꞌu̱n nde̱iꞌ ña̱ ni̱ ta̱xi̱ Ndiosí nda̱ꞌaꞌ Moisés.
35 Sa̱kanꞌ na kuiiꞌ niiꞌ uvi̱ xi̱ko̱ kuiya̱ ni̱ xi̱xi̱ ne̱ Israel maná ja̱a̱nꞌ.
Ña̱ ja̱a̱nꞌ xixiꞌ ni̱a̱ nde̱e̱ ni̱ xa̱a̱ ni̱a̱ xaꞌinꞌ nuu̱ꞌ ñu̱ꞌuꞌ Canaán.
36 Te̱ ku̱ꞌva̱ ña̱ naniꞌ gomer,
ña̱ ni̱ ti̱i̱n ni̱a̱,
te̱ ni̱ tyu̱ꞌu̱n ni̱a̱ maná ja̱a̱nꞌ ndii,
i̱i̱n ku̱ꞌva̱ ña̱ niani naá uvi̱ litro,
ña̱ꞌa̱ nduuꞌ a̱.