So̱ꞌo̱ kuaꞌa̱n ya̱a̱ ña̱ ni̱ xi̱ta̱ Moisés nuu̱ꞌ Ndiosí kii̱ꞌ ni̱ ke̱ta̱ va̱ꞌa̱ ra̱ nuu̱ꞌ Faraón
15
Sa̱kanꞌ te̱ ni̱ xi̱ta̱ Moisés xiinꞌ sa̱kuuꞌ ne̱ Israel i̱i̱n ya̱a̱ ña̱ kuaꞌa̱n so̱ꞌo̱ nuu̱ꞌ Yahvé.
“Ka̱ta̱ i̱ nuu̱ꞌ Yahvé,
sa̱kanꞌ ña̱ nda̱tu̱nꞌ va̱ ni̱ ka̱nandoo a̱.
Ni̱ ko̱ꞌni̱ a̱ kuei xiinꞌ te̱ yoso̱ꞌ riꞌ mi̱ni̱.
2 Yahvé nduuꞌ ña̱ ndi̱e̱eꞌ i̱,
te̱ su̱vi̱ tu̱ a̱ nduuꞌ ya̱a̱ xitaꞌ i̱,
te̱ ni̱ sa̱kakú a̱ yuꞌu̱.
Su̱vi̱ a̱ nduuꞌ Ndiosí i̱,
te̱ xitaꞌ i̱ ya̱a̱ nuu̱ꞌ a̱,
ña̱ ja̱a̱nꞌ tu̱ nduuꞌ Ndiosí ña̱ ni̱ xa̱kaꞌnuꞌ ne̱ xii̱ꞌ ya̱taꞌ i̱,
sa̱kanꞌ na xa̱kaꞌnuꞌ ña̱ꞌaꞌ i̱.
3 Yahvé ndii,
i̱i̱n ña̱ tiinꞌ ñuꞌu̱ nduuꞌ a̱,
Yahvé nduuꞌ kivi̱ꞌ a̱.
4 Sa̱kuuꞌ carreta Faraón xiinꞌ te̱ xíinꞌ ra̱ ni̱ ko̱ꞌni̱ a̱ mi̱ni̱.
Te̱ xíinꞌ ra̱,
te̱ kooꞌ tyukuuꞌ ka̱ ndii,
ni̱ ko̱ꞌni̱ ña̱ꞌaꞌ a̱ mi̱ni̱ kuaꞌa.
5 Ni̱ koyo̱ ra̱ nde̱e̱ ma̱aꞌ ti̱xi̱n mi̱ni̱ nde̱e̱ naa koyó yuu̱ꞌ,
ni̱ ti̱saꞌvi̱ ña̱ꞌaꞌ mi̱ni̱ nde̱e̱ ma̱aꞌ ti̱xi̱n a̱.
6 Tákuiꞌe Yahvé,
nda̱ꞌaꞌ ku̱a̱ꞌa̱ u̱nꞌ nduuꞌ ña̱ ndi̱e̱eꞌ kooꞌ tyukuuꞌ.
Tákuiꞌe Yahvé,
nda̱ꞌaꞌ ku̱a̱ꞌa̱ u̱nꞌ nduuꞌ ña̱ ni̱ xa̱ꞌni̱ꞌ te̱ ndasiꞌ taꞌanꞌ xiinꞌ u̱nꞌ.
7 Te̱ xiinꞌ ña̱ ndi̱e̱eꞌ kooꞌ tyukuuꞌ u̱nꞌ ja̱a̱nꞌ
ni̱ xa̱ꞌni̱ꞌ u̱nꞌ sa̱kuuꞌ te̱ ndasiꞌ taꞌanꞌ xiinꞌ u̱nꞌ,
te̱ kii̱ꞌ ni̱ na̱saa̱ꞌ xa̱va̱ꞌa̱ u̱nꞌ ndii,
ni̱ xa̱ꞌmi̱ ña̱ꞌaꞌ u̱nꞌ nde̱e̱ naa mi̱ꞌiꞌ i̱tyi.
8 Kii̱ꞌ ndi̱e̱eꞌ ni̱ ti̱vi̱ u̱nꞌ tatyi̱ꞌ xiti̱nꞌ u̱nꞌ ndii,
ni̱ na̱ku̱ndiee̱ ti̱ꞌvi̱ ti̱kui.
Ña̱ nduuꞌ ko̱o̱ nuu̱ꞌ mi̱ni̱ ndii,
ni̱ xi̱kuita̱ a̱ nde̱e̱ naa nama̱ ni̱ xa̱a̱ u̱nꞌ.
Ti̱kui ma̱ꞌiꞌ mi̱ni̱ miiꞌ kunu xa̱va̱ꞌa̱ ndii,
ni̱ ku̱u̱ tiꞌeꞌ raꞌ ni̱ xa̱a̱ u̱nꞌ,
te̱ nï̱ ka̱nda̱ ka̱ raꞌ.
9 Te̱ ndasiꞌ taꞌanꞌ xiinꞌ e̱ꞌ ni̱ kaꞌa̱n ñuñuꞌ xiinꞌ nimá ra̱ ndii:
“Ku̱ndiku̱n ña̱ꞌaꞌ i̱ nde̱e̱ na̱niꞌi̱ꞌ i̱ ni̱a̱,
te̱ na̱ta̱ꞌviꞌ i̱ sa̱kuuꞌ ña̱ tu̱ꞌu̱n i̱ nda̱ꞌaꞌ ni̱a̱ nde̱e̱ nda̱ꞌni̱ nimá i̱.
Xta̱ꞌniꞌ i̱ ityi̱ i̱ te̱ ka̱ꞌni̱ꞌ ña̱ꞌaꞌ i̱,”
ni̱ katyi̱ ra̱.
10 Ndisu̱ ni̱ ti̱vi̱ u̱nꞌ tatyi̱ꞌ nuu̱ꞌ mi̱ni̱,
te̱ ni̱ ti̱saꞌvi̱ ña̱ꞌaꞌ ti̱kui mi̱ni̱ ja̱a̱nꞌ,
ni̱ nde̱kaꞌnu̱ ra̱ ni̱ xa̱a̱ u̱nꞌ nde̱e̱ naa ndekaꞌnú nduu̱ꞌ tu̱nxi ti̱xi̱n ti̱kui mi̱ni̱ ña̱ i̱yo̱ va̱ kuuꞌ.
11 Tákuiꞌe Yahvé,
köo̱ꞌ nde̱e̱ i̱i̱n nda̱a̱ꞌ ndiosí ña̱ nakuitá xiinꞌ yoꞌó.
Köo̱ꞌ nde̱e̱ i̱i̱n nda̱a̱ꞌ ndiosí ña̱ su̱ꞌu̱n ka̱ te̱ sa̱kanꞌ yoꞌó.
Köo̱ꞌ nde̱e̱ i̱i̱n nda̱a̱ꞌ ndiosí ña̱ nda̱tu̱nꞌ ka̱ te̱ sa̱kanꞌ yoꞌó.
Te̱ ku̱vi̱ tu̱ xaaꞌ u̱nꞌ kuaꞌa̱ꞌ tyu̱u̱n kaꞌnuꞌ ña̱ i̱yo̱ xa̱va̱ꞌa̱.
12 Te̱ xiinꞌ ña̱ ndi̱e̱eꞌ u̱nꞌ ni̱ xa̱a̱ u̱nꞌ sa̱kanꞌ,
te̱ ni̱ ko̱koꞌ ñu̱ꞌuꞌ sa̱kuuꞌ te̱ ndasiꞌ taꞌanꞌ xiinꞌ e̱ꞌ.
13 Te̱ xaꞌa̱ꞌ a̱ ña̱ ndani̱ u̱nꞌ nduꞌu̱,
ne̱ ni̱ sa̱kakú u̱nꞌ ndii,
xiinꞌ ña̱ ndi̱e̱eꞌ u̱nꞌ ndiakaꞌ u̱nꞌ ndu̱ kuaꞌa̱n u̱nꞌ
nde̱e̱ nuu̱ꞌ ñu̱ꞌuꞌ su̱ꞌu̱n miiꞌ ku̱ndi̱e̱e̱ ndu̱ sa̱a̱ u̱nꞌ.
14 Kii̱ꞌ ku̱ni̱ so̱ꞌo̱ ne̱ yivi̱ꞌ i̱i̱n yivi̱ꞌ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ u̱nꞌ kaa̱ꞌ ndii,
ku̱yi̱ꞌvi ni̱a̱ nde̱e̱ ki̱si̱ vi̱ꞌ ña̱ꞌaꞌ a̱.
Te̱ sa̱kanꞌ tu̱ ne̱ ndieeꞌ nuu̱ꞌ ñu̱ꞌuꞌ Filistea ndii,
ku̱ndi̱ꞌni̱ xa̱va̱ꞌa̱ nimá ni̱a̱ kii̱ꞌ ku̱ni̱ ni̱a̱ kuento xaꞌa̱ꞌ ña̱ kaa̱ꞌ.
15 Te̱ kuuꞌ nu̱uꞌ nuu̱ꞌ ñu̱ꞌuꞌ Edom ndii,
ku̱ndi̱ꞌni̱ xa̱va̱ꞌa̱ ra̱ kii̱ꞌ ku̱ni̱ ra̱ kuento xaꞌa̱ꞌ ña̱ kaa̱ꞌ.
Te̱ kuuꞌ nu̱uꞌ nuu̱ꞌ ñu̱ꞌuꞌ Moab ndii,
ki̱si̱ vi̱ꞌ ña̱ꞌaꞌ a̱ ña̱ yiꞌvi ra̱ kii̱ꞌ ku̱ni̱ ra̱ kuento xaꞌa̱ꞌ ña̱ kaa̱ꞌ.
Sa̱kuuꞌ ne̱ ndieeꞌ nuu̱ꞌ ñu̱ꞌuꞌ Canaán ndii,
ki̱si̱ vi̱ꞌ ña̱ꞌaꞌ a̱ ña̱ yiꞌvi ni̱a̱ kii̱ꞌ ku̱ni̱ ni̱a̱ kuento xaꞌa̱ꞌ ña̱ kaa̱ꞌ.
16 Tákuiꞌe Yahvé,
sa̱kuuꞌ ti̱ꞌvi̱ ne̱ ja̱a̱nꞌ ndii,
na ku̱yi̱ꞌvi xa̱va̱ꞌa̱ ni̱a̱,
nde̱e̱ ki̱si̱ vi̱ꞌ ña̱ꞌaꞌ a̱.
Te̱ na ndoo̱ ni̱a̱ ku̱ndi̱e̱e̱ taxi̱nꞌ ni̱a̱ nde̱e̱ naa yuu̱ꞌ xaꞌa̱ꞌ a̱ ña̱ yiꞌvi ni̱a̱ ña̱ ndi̱e̱eꞌ u̱nꞌ,
nde̱e̱ ska̱tyiꞌ xkaꞌndi̱a̱ ne̱ nduuꞌ kuenta u̱nꞌ,
nde̱e̱ ska̱tyiꞌ xkaꞌndi̱a̱ ne̱ nduuꞌ kuenta u̱nꞌ,
ne̱ ni̱ sa̱kakú u̱nꞌ yoꞌoꞌ.
17 Tákuiꞌe Yahvé,
na̱ka̱ ndu̱ te̱ kuꞌu̱n ku̱ndi̱e̱e̱ ndu̱ i̱kuꞌ su̱ꞌu̱n ña̱ nduuꞌ kuenta u̱nꞌ,
miiꞌ ni̱ na̱ka̱xi̱n u̱nꞌ ku̱ndi̱e̱e̱ ndu̱,
miiꞌ ni̱ xa̱ꞌa̱ u̱nꞌ yu̱kunꞌ xiinꞌ nda̱ꞌaꞌ u̱nꞌ ku̱nduꞌu̱ꞌ u̱nꞌ.
18 Yahvé xaꞌndia tyuunꞌ nde̱e̱ ndiꞌiꞌ ni̱ kivi̱ꞌ,
te̱ nde̱e̱ a̱ma̱ ka̱ ni̱.”
Sa̱kanꞌ ni̱ xi̱ta̱ Moisés xiinꞌ sa̱kuuꞌ ne̱ Israel.
Ña̱ yo̱ꞌo̱ꞌ nduuꞌ ya̱a̱ ña̱ ni̱ xi̱ta̱ María nuu̱ꞌ Ndiosí
19 Kii̱ꞌ ni̱ ko̱ꞌni̱ carreta Faraón xiinꞌ kuei sana̱ ra̱ mi̱ni̱ kuaꞌa ndii,
ni̱ sa̱koyó Yahvé ti̱kui mi̱ni̱ ja̱a̱nꞌ siki̱ꞌ ra̱,
ndisu̱ kii̱ꞌ ni̱ xkaꞌndi̱a̱ ne̱ Israel ma̱ꞌiꞌ mi̱ni̱ ja̱a̱nꞌ ndii,
ni̱ xkaꞌndi̱a̱ ni̱a̱ nde̱e̱ naa nuu̱ꞌ ñu̱ꞌuꞌ i̱tyi.
20 Sa̱kanꞌ te̱ María,
ñaꞌ taꞌanꞌ Aarón,
ñaꞌ kaꞌán tiakú tu̱ꞌu̱n Ndiosí ndii,
ni̱ ki̱ꞌi̱n aꞌ i̱i̱n ti̱ko̱ko̱,
te̱ ni̱ xi̱ku̱ndiku̱n tu̱ sa̱kuuꞌ i̱nga̱ ña̱ꞌaꞌ ndisoꞌ sa̱kuuꞌ ni̱a̱ ti̱ko̱ko̱,
taxaꞌaꞌ ni̱a̱ te̱ sa̱kaxanꞌ ni̱a̱ ti̱ko̱ko̱ ja̱a̱nꞌ.
21 Te̱ ni̱ xi̱ta̱ María ya̱a̱ yoꞌoꞌ nuu̱ꞌ Ndiosí xiinꞌ ni̱a̱ kaꞌán aꞌ ndii:
Na ka̱ta̱ e̱ꞌ ya̱a̱ nuu̱ꞌ Yahvé,
sa̱kanꞌ ña̱ kaꞌnuꞌ xa̱va̱ꞌa̱ ña̱ nduuꞌ a̱.
Te̱ ni̱ ko̱ꞌni̱ a̱ kuei xiinꞌ te̱ yoso̱ꞌ riꞌ mi̱ni̱ kuaꞌa.
Ni̱ katyi̱ aꞌ.
So̱ꞌo̱ ni̱ xa̱a̱ a̱ kii̱ꞌ ni̱ nda̱sa̱vixi̱ Ndiosí ti̱kui uva̱
22 Sa̱kanꞌ te̱ ni̱ xa̱ka̱ Moisés ne̱ Israel,
ne̱ taꞌanꞌ ra̱,
te̱ kuaꞌa̱n ra̱ xiinꞌ ni̱a̱ miiꞌ i̱tyi kaaꞌ xikaꞌ yu̱ꞌuꞌ mi̱ni̱ kuaꞌa ja̱a̱nꞌ,
te̱ ni̱ ko̱ꞌni̱ ni̱a̱ miiꞌ i̱tyi kaaꞌ miiꞌ naniꞌ Shur.
Te̱ niiꞌ uni̱ kivi̱ꞌ ni̱ xika̱ ni̱a̱ i̱kanꞌ,
te̱ köo̱ꞌ ti̱kui ni̱ xi̱ni̱ ni̱a̱ yoo i̱kanꞌ ko̱ꞌo̱ ni̱a̱.
23 Kii̱ꞌ ni̱ xa̱a̱ ni̱a̱ miiꞌ naniꞌ Mara miiꞌ yoo ti̱kui ndii,
nï̱ ku̱vi̱ ko̱ꞌo̱ ni̱a̱ raꞌ,
sa̱kanꞌ ña̱ ti̱kui uva̱ nduuꞌ raꞌ,
sa̱kanꞌ na kuiiꞌ naniꞌ a̱ Mara.
24 Sa̱kanꞌ te̱ ni̱ xa̱ꞌaꞌ ne̱ yivi̱ꞌ kaꞌán ki̱ni̱ ni̱a̱ xaꞌa̱ꞌ Moisés,
te̱ ndatuꞌúnꞌ ña̱ꞌaꞌ ni̱a̱ ndii:
―¿Yo̱o̱ nduuꞌ a̱ ko̱ꞌo̱ e̱ꞌ vi̱ti̱n?
―katyi ni̱a̱.
25 I̱kanꞌ te̱ ni̱ kaꞌa̱n ndaꞌvi Moisés xiinꞌ Yahvé,
te̱ ni̱ niaꞌa̱ ña̱ꞌaꞌ a̱ i̱i̱n ti̱kundu̱ i̱tunꞌ iinꞌ ya̱ti̱n i̱kanꞌ,
te̱ ni̱ na̱ꞌi̱ ra̱ nu̱ꞌ,
te̱ ni̱ sko̱ꞌniꞌ ra̱ nu̱ꞌ ti̱kui uva̱ ja̱a̱nꞌ,
te̱ ni̱ na̱ndu̱u̱ raꞌ ti̱kui va̱ꞌa̱ ko̱ꞌo̱ e̱ꞌ.
I̱kanꞌ ni̱ xi̱to̱ ku̱a̱ꞌa̱ Yahvé ne̱ Israel,
te̱ ni̱ ta̱xi̱ tu̱ a̱ i̱i̱n tu̱ꞌu̱n nde̱iꞌ nuu̱ꞌ ni̱a̱ xiinꞌ sa̱a̱ kuní a̱ ka̱ka̱ ni̱a̱ i̱i̱n yivi̱ꞌ.
26 Ni̱ kaꞌa̱n a̱ xiinꞌ ni̱a̱ ndii:
―Naaꞌ tyu̱nxaꞌaꞌ va̱ ndo̱ꞌ ña̱ kaꞌán yuꞌu̱,
Yahvé,
ña̱ nduuꞌ Ndiosí ndo̱ꞌ,
xiinꞌ ndo̱ꞌ,
te̱ sa̱tyuunꞌ nda̱ku ndo̱ꞌ nuu̱ꞌ i̱,
te̱ sa̱xinu̱ tu̱ ndo̱ꞌ tu̱ꞌu̱n nde̱iꞌ i̱,
te̱ sa̱a̱ ndo̱ꞌ sa̱kuuꞌ nde̱iꞌ ña̱ kaꞌán i̱ ndii,
tï̱ꞌviꞌ i̱ nde̱e̱ i̱i̱n nuu̱ꞌ kuiꞌe̱ ña̱ ni̱ ti̱ꞌviꞌ i̱ ni̱ ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Egipto ku̱ndo̱ꞌo̱ ndo̱ꞌ,
sa̱kanꞌ ña̱ yuꞌu̱ nduuꞌ Yahvé,
ña̱ sandaꞌaꞌ ndoꞌó ―ni̱ katyi̱ a̱.
27 Ni̱ yaꞌa̱ ña̱ ja̱a̱nꞌ,
te̱ ni̱ xa̱a̱ ne̱ Israel miiꞌ naniꞌ a̱ Elim,
te̱ i̱kanꞌ ndii,
yoo uxi̱ uvi̱ taꞌan ti̱ko̱ꞌyoꞌ,
te̱ yoo tu̱ uni̱ xi̱ko̱ uxi̱ i̱tunꞌ koko,
te̱ i̱kanꞌ ni̱ xi̱ku̱ndiee̱ ni̱a̱ nandiee̱ꞌ ni̱a̱ yu̱ꞌuꞌ ti̱ko̱ꞌyoꞌ ja̱a̱nꞌ.