So̱ꞌo̱ ni̱ xa̱a̱ a̱ kii̱ꞌ ni̱ xkaꞌndi̱a̱ ne̱ Israel mi̱ni̱ kuaꞌa
14
Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
2 ―Kaꞌa̱n xiinꞌ ne̱ taꞌanꞌ u̱nꞌ,
ne̱ Israel,
na na̱ndi̱koꞌ ni̱a̱ te̱ kuꞌu̱n na̱ndiee̱ꞌ ni̱a̱ ya̱ti̱n Pi-hahirot,
ña̱ naá te̱i̱n Migdol xiinꞌ mi̱ni̱ kuaꞌa xtoꞌniꞌ miiꞌ kanduꞌu̱ꞌ ñu̱u̱ Baal-zefón.
3 Sa̱kanꞌ te̱ ka̱ni̱ni̱ Faraón xaꞌa̱ꞌ ne̱ Israel ndii:
“Ni̱ xiti̱a̱ i̱ꞌnu̱ ne̱ Israel xikaꞌ ni̱a̱ miiꞌ i̱tyi kaaꞌ,
te̱ köo̱ꞌ ka̱ miiꞌ ku̱vi̱ kuꞌu̱n ni̱a̱”,
katyi̱ ra̱.
4 Sa̱kanꞌ te̱ sa̱tiꞌeꞌ tu̱ku̱u̱ yuꞌu̱ nimá ra̱,
te̱ ku̱ndiku̱n ra̱ ndoꞌó sa̱a̱ i̱,
sa̱kanꞌ te̱ niaꞌa̱ i̱ ña̱ ndi̱e̱eꞌ i̱ nuu̱ꞌ ra̱ xiinꞌ nuu̱ꞌ sa̱kuuꞌ te̱ xíinꞌ ra̱,
te̱ ku̱nda̱ni̱ ne̱ ndieeꞌ nuu̱ꞌ ñu̱ꞌuꞌ Egipto ña̱ yuꞌu̱ nduuꞌ Yahvé ―ni̱ katyi̱ a̱.
Sa̱kanꞌ te̱ ni̱ sa̱xinu̱ ne̱ Israel ña̱ ni̱ kaꞌa̱n tyuunꞌ a̱ xiinꞌ ni̱a̱.
5 Kii̱ꞌ ni̱ xi̱ni̱ rey,
te̱ xaꞌndia tyuunꞌ nuu̱ꞌ ñu̱ꞌuꞌ Egipto,
xiinꞌ sa̱kuuꞌ te̱ xatyuunꞌ nuu̱ꞌ ra̱ kuento ña̱ ni̱ xi̱nu̱ ne̱ Israel ndii,
ni̱ na̱ma̱ ra̱ sa̱a̱ xanini ra̱ xaꞌa̱ꞌ ne̱ ja̱a̱nꞌ,
te̱ ni̱ kaꞌa̱n ra̱ ndii:
―¿Sa̱a̱ tu̱ na̱a̱ꞌ ni̱ ku̱u̱ e̱ꞌ,
na ni̱ ta̱xi̱ e̱ꞌ ni̱ na̱ko̱o̱ ne̱ Israel tyu̱u̱n ña̱ xaaꞌ ni̱a̱ nuu̱ꞌ e̱ꞌ,
te̱ ni̱ ki̱e̱e̱ ni̱a̱ kuaꞌa̱n ni̱a̱?
―ni̱ katyi̱ ra̱.
6 Sa̱kanꞌ te̱ numi̱ꞌ va̱ ni̱ sa̱kooꞌ tu̱ꞌva̱ Faraón carreta,
tunꞌ ñuꞌuꞌ ra̱ kii̱ꞌ kuaꞌa̱n ti̱i̱n ra̱ ñuꞌu̱,
te̱ kuaꞌa̱n tu̱ te̱ xíinꞌ xiinꞌ ra̱.
7 Te̱ ni̱ na̱ka̱ ra̱ iñu̱ siento carreta,
tunꞌ va̱ꞌa̱ ka̱,
te̱ kuaꞌa̱n tu̱ sa̱kuuꞌ carreta,
tunꞌ yoo nuu̱ꞌ ñu̱ꞌuꞌ Egipto ja̱a̱nꞌ,
xiinꞌ ra̱,
te̱ ti̱xi̱n i̱ꞌi̱n tunꞌ ja̱a̱nꞌ ndii,
naá i̱i̱n te̱ xíinꞌ kuuꞌ nu̱uꞌ xaꞌndia tyuunꞌ.
8 Te̱ ni̱ xa̱xi̱i̱ Yahvé nimá Faraón,
te̱ xaꞌndia tyuunꞌ nuu̱ꞌ ñu̱ꞌuꞌ Egipto,
sa̱kanꞌ na ni̱ xi̱ku̱ndiku̱n ra̱ ne̱ Israel,
te̱ kuatiaꞌ va̱ ne̱ ja̱a̱nꞌ kuaꞌa̱n ni̱a̱ xaꞌa̱ꞌ a̱ ña̱ ni̱ tyi̱ndi̱e̱eꞌ ña̱ꞌaꞌ Ndiosí.
9 Sa̱kanꞌ te̱ ni̱ xi̱ku̱ndiku̱n ña̱ꞌaꞌ te̱ xíinꞌ te̱ Egipto,
te̱ xíinꞌ te̱ yoso̱ꞌ kuei,
xiinꞌ te̱ kuaꞌa̱n xiinꞌ carreta,
xiinꞌ sa̱kuuꞌ ti̱ꞌvi̱ te̱ xíinꞌ te̱ kumiꞌ Faraón.
Te̱ ni̱ xaꞌa̱n na̱niꞌi̱ꞌ ña̱ꞌaꞌ ra̱ miiꞌ ndieeꞌ ni̱a̱ nandiee̱ꞌ ni̱a̱ yu̱ꞌuꞌ mi̱ni̱ ya̱ti̱n ñu̱ꞌuꞌ Pi-hahirot xtoꞌniꞌ miiꞌ kanduꞌu̱ꞌ ñu̱u̱ Baal-zefón.
10 Te̱ kii̱ꞌ ni̱ xi̱ni̱ ne̱ Israel ña̱ kuyatinꞌ Faraón ndikún ra̱ xiinꞌ te̱ xíinꞌ ra̱ ku̱a̱xi̱ ra̱ xata̱ꞌ ni̱a̱ ndii,
ni̱ yi̱ꞌvi xa̱va̱ꞌa̱ ni̱a̱,
sa̱kanꞌ na ni̱ xa̱ꞌaꞌ kaꞌán ni̱a̱ xiinꞌ Yahvé te̱ tyi̱ndi̱e̱eꞌ ña̱ꞌaꞌ a̱.
11 Te̱ ni̱ kaꞌa̱n ni̱a̱ xiinꞌ Moisés ndii:
―¿Ñáá köo̱ꞌ yavi̱ ndi̱i̱ miiꞌ ndiee̱ e̱ꞌ nuu̱ꞌ ñu̱ꞌuꞌ Egipto na ni̱ ta̱va̱ꞌ u̱nꞌ nduꞌu̱ i̱kanꞌ,
te̱ ki̱xi̱n ku̱vi̱ ndu̱ miiꞌ i̱tyi kaaꞌ yoꞌoꞌ?
¿Ndiotyun na ni̱ xa̱a̱ u̱nꞌ ña̱ kaa̱ꞌ xiinꞌ ndu̱?
¿Ndiotyun na ni̱ ta̱va̱ꞌ uꞌvi̱ u̱nꞌ nduꞌu̱ nuu̱ꞌ ñu̱ꞌuꞌ Egipto?
12 ¿Ñáá näkaꞌanꞌ u̱nꞌ ña̱ ni̱ kaꞌa̱n ndu̱ xaꞌa̱ꞌ ña̱ kaa̱ꞌ xiinꞌ u̱nꞌ kii̱ꞌ ndieeꞌ ka̱ e̱ꞌ nuu̱ꞌ ñu̱ꞌuꞌ Egipto?
Ni̱ kaꞌa̱n ndu̱ ndii:
“Na̱ko̱o̱ u̱nꞌ ndu̱ na ko̱o̱ mi̱iꞌ ndu̱ sa̱kanꞌ te̱ sa̱tyuunꞌ na sa̱tyuunꞌ ndu̱ nuu̱ꞌ ne̱ Egipto.
Sa̱kanꞌ ña̱ va̱ꞌa̱ ka̱ kuni ndu̱ nduuꞌ ndu̱ ne̱ xatyuunꞌ so̱ꞌo̱ nuu̱ꞌ ne̱ Egipto ja̱a̱nꞌ,
te̱ sa̱kanꞌ ña̱ kuꞌu̱n ku̱vi̱ ndu̱ miiꞌ i̱tyi kaaꞌ”,
ni̱ katyi̱ ndu̱ xiinꞌ u̱nꞌ ―ni̱ katyi̱ ni̱a̱ xiinꞌ Moisés.
13 Ndisu̱ ni̱ kaꞌa̱n Moisés xiinꞌ ni̱a̱ ndii:
―Kü̱yiꞌvi ndo̱ꞌ,
i̱ni̱ naa i̱ni̱ ndo̱ꞌ ku̱ni̱ ndo̱ꞌ Yahvé,
te̱ ku̱ni̱ ndo̱ꞌ sa̱a̱ sa̱a̱ a̱ te̱ sa̱kakú a̱ ndoꞌó vi̱ti̱n,
sa̱kanꞌ ña̱ köo̱ꞌ kivi̱ꞌ ka̱ ku̱ni̱ ndo̱ꞌ nuu̱ꞌ ne̱ ñu̱ꞌuꞌ Egipto,
te̱ xitoꞌ ndo̱ꞌ ku̱a̱xi̱ kaa̱ꞌ vi̱ti̱n.
14 Mi̱iꞌ Yahvé ku̱ntaꞌanꞌ xiinꞌ te̱ xíinꞌ kaa̱ꞌ xaꞌa̱ꞌ ndo̱ꞌ,
te̱ ndoꞌó ndii,
ku̱i̱ta̱ taxi̱nꞌ ndo̱ꞌ ―ni̱ katyi̱ ra̱.
15 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―¿Ndiotyun na xikán u̱nꞌ ña̱ tyi̱ndi̱e̱eꞌ i̱ yoꞌó?
Kaꞌa̱n xiinꞌ ne̱ Israel na na̱kaa̱ ni̱a̱ kuꞌu̱n ni̱a̱.
16 Te̱ yoꞌó ndii,
nda̱ni̱ꞌi̱ nda̱ꞌaꞌ u̱nꞌ xiinꞌ ka̱roti u̱nꞌ nuu̱ꞌ mi̱ni̱,
te̱ na̱ta̱ꞌviꞌ ma̱ꞌiꞌ u̱nꞌ u̱nꞌ,
sa̱kanꞌ te̱ ku̱vi̱ xkaꞌndi̱a̱ ne̱ Israel ma̱ꞌiꞌ a̱ ja̱a̱nꞌ nde̱e̱ naa ñu̱ꞌuꞌ i̱tyi.
17 Te̱ yuꞌu̱ ndii,
sa̱xi̱i̱ i̱ nimá te̱ ndieeꞌ nuu̱ꞌ ñu̱ꞌuꞌ Egipto,
te̱ ku̱ndiku̱n ra̱ ndoꞌó,
sa̱kanꞌ te̱ niaꞌa̱ i̱ ña̱ ndi̱e̱eꞌ i̱ kii̱ꞌ ka̱nandoo i̱ Faraón,
xiinꞌ te̱ xíinꞌ ra̱,
xiinꞌ te̱ sa̱tuvi̱ꞌ carreta,
tunꞌ ñuꞌuꞌ ra̱ kii̱ꞌ tiinꞌ ra̱ ñuꞌu̱,
xiinꞌ kuei,
tiꞌ yoso̱ꞌ ra̱.
18 Te̱ kii̱ꞌ niaꞌa̱ i̱ ña̱ ndi̱e̱eꞌ i̱ ña̱ ka̱nandoo i̱ Faraón,
xiinꞌ carreta,
tunꞌ ñuꞌuꞌ ra̱ kii̱ꞌ tiinꞌ ra̱ ñuꞌu̱,
xiinꞌ kuei,
tiꞌ yoso̱ꞌ ra̱ ndii,
xiinꞌ ña̱ ja̱a̱nꞌ ku̱nda̱ni̱ ne̱ ndieeꞌ nuu̱ꞌ ñu̱ꞌuꞌ Egipto ña̱ yuꞌu̱ nduuꞌ Yahvé ―ni̱ katyi̱ a̱.
19 Te̱ ángele Ndiosí ña̱ niꞌiꞌ i̱tyiꞌ nuu̱ꞌ ne̱ Israel kuaꞌa̱n ni̱a̱ ndii,
xata̱ꞌ ni̱a̱ ni̱ xi̱ku̱ndiku̱n a̱,
te̱ sa̱kanꞌ tu̱ ni̱ xa̱a̱ viko̱ꞌ ña̱ niꞌiꞌ i̱tyiꞌ nuu̱ꞌ ni̱a̱ kuaꞌa̱n ni̱a̱ ndii,
xata̱ꞌ ni̱a̱ ni̱ xi̱ku̱ndiku̱n tu̱ ña̱ ja̱a̱nꞌ.
20 Sa̱kanꞌ na kuiiꞌ ni̱ xi̱kuita̱ uvi̱ sa̱aꞌ a̱ te̱i̱n te̱ xíinꞌ te̱ Egipto xiinꞌ ne̱ Israel ja̱a̱nꞌ nuu̱ꞌ te̱ xíinꞌ te̱ Egipto ndii,
ni̱ xa̱ i̱i̱nyaví viko̱ꞌ ja̱a̱nꞌ,
ndisu̱ nuu̱ꞌ ne̱ Israel ndii,
ni̱ yiꞌe̱ a̱.
Xaꞌa̱ꞌ a̱ ja̱a̱nꞌ na niiꞌ ñu̱u ja̱a̱nꞌ ndii,
nï̱ ku̱vi̱ na̱niꞌi̱ꞌ te̱ xíinꞌ te̱ Egipto ja̱a̱nꞌ ne̱ vi̱ꞌe̱ Israel.
21 Te̱ ni̱ sa̱na̱kaá Moisés nda̱ꞌaꞌ ra̱ nuu̱ꞌ mi̱ni̱ ja̱a̱nꞌ,
te̱ ni̱ xa̱ꞌaꞌ xikaꞌ tatyi̱ꞌ ña̱ ku̱a̱xi̱ miiꞌ ketaꞌ ñu̱ꞌu̱ niiꞌ ñu̱u,
te̱ ni̱ na̱ta̱ꞌviꞌ ma̱ꞌiꞌ a̱ mi̱ni̱ ja̱a̱nꞌ,
te̱ ni̱ ndoo̱ ñu̱ꞌuꞌ i̱tyi,
22 te̱ nuu̱ꞌ ñu̱ꞌuꞌ i̱tyi ja̱a̱nꞌ ni̱ xkaꞌndi̱a̱ ne̱ Israel te̱i̱n ti̱kui,
te̱ ta̱taꞌviꞌ xiinꞌ ni̱a̱ ni̱ yoo̱ ti̱kui nde̱e̱ naa nama̱,
i̱i̱n a̱ nda̱ꞌaꞌ ku̱a̱ꞌa̱ ni̱a̱,
te̱ i̱nga̱ a̱ nda̱ꞌaꞌ i̱ti̱n ni̱a̱.
23 Sa̱kanꞌ te̱ ni̱ ko̱ꞌni̱ tu̱ sa̱kuuꞌ te̱ xíinꞌ te̱ Egipto ndikún ra̱ xata̱ꞌ ni̱a̱ xiinꞌ kuei xiinꞌ sa̱kuuꞌ carreta,
tunꞌ ñuꞌuꞌ ra̱ kii̱ꞌ tiinꞌ ra̱ ñuꞌu̱,
ni̱ ndiku̱n ña̱ꞌaꞌ ra̱ nde̱e̱ ma̱ꞌiꞌ mi̱ni̱.
24 Ndisu̱ kii̱ꞌ xa̱ ku̱a̱xi̱ kitúꞌ ndii,
ni̱ xi̱to̱ Yahvé nde̱e̱ te̱i̱n viko̱ꞌ ja̱a̱nꞌ xiinꞌ te̱i̱n ñuꞌu̱ nde̱e̱ miiꞌ ndieeꞌ te̱ xíinꞌ ja̱a̱nꞌ,
i̱kanꞌ te̱ ni̱ sa̱sanaꞌ ña̱ꞌaꞌ a̱,
te̱ ni̱ xa̱ꞌaꞌ yiꞌvi va̱ ra̱,
25 te̱ ni̱ ta̱ni̱ tu̱ a̱ ndixa̱nꞌ carreta ra̱,
xaꞌa̱ꞌ a̱ ja̱a̱nꞌ na ni̱ ku̱tu̱ndoꞌo̱ꞌ xa̱va̱ꞌa̱ nuu̱ꞌ ra̱,
te̱ ku̱vi̱ kuꞌu̱n ra̱,
sa̱kanꞌ na ni̱ kaꞌa̱n xiinꞌ taꞌanꞌ ra̱ ndii:
―Toꞌo̱ꞌ ndo̱ꞌ,
va̱ꞌa̱ ka̱ ku̱nu̱ e̱ꞌ nuu̱ꞌ ne̱ Israel kaa̱ꞌ,
sa̱kanꞌ ña̱ Yahvé kuntaꞌanꞌ xiinꞌ e̱ꞌ xaꞌa̱ꞌ ni̱a̱ ―ni̱ katyi̱ ra̱.
26 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Sa̱na̱kaá nda̱ꞌaꞌ u̱nꞌ nuu̱ꞌ mi̱ni̱ kaa̱ꞌ,
te̱ nda̱si̱ ti̱kui miiꞌ ni̱ xkaꞌndi̱a̱ ndo̱ꞌ,
te̱ koyo̱ raꞌ xata̱ꞌ te̱ xíinꞌ,
te̱ Egipto kaa̱ꞌ,
xiinꞌ xata̱ꞌ carreta ra̱,
xiinꞌ xata̱ꞌ kuei,
tiꞌ yoso̱ꞌ ra̱ ―ni̱ katyi̱ a̱.
27 Sa̱kanꞌ na ni̱ sa̱na̱kaá Moisés nda̱ꞌaꞌ ra̱ nuu̱ꞌ mi̱ni̱,
te̱ kii̱ꞌ xa̱ kitúꞌ ndii,
xa̱ ni̱ na̱ku̱naa̱ ti̱kui mi̱ni̱ ja̱a̱nꞌ miiꞌ ni̱ xkaꞌndi̱a̱ ni̱a̱ ja̱a̱nꞌ.
Te̱ kii̱ꞌ ni̱ kuni̱ te̱ xíinꞌ te̱ Egipto ja̱a̱nꞌ na̱ndi̱koꞌ ra̱ ndii,
ni̱ na̱ka̱si̱ ti̱kui nuu̱ꞌ ra̱,
te̱ sa̱kanꞌ ni̱ xa̱a̱ Yahvé,
te̱ ni̱ xa̱ꞌni̱ꞌ a̱ sa̱kuuꞌ te̱ ja̱a̱nꞌ ti̱xi̱n mi̱ni̱ nde̱e̱ ma̱aꞌ.
28 Sa̱kanꞌ na kuiiꞌ kii̱ꞌ ni̱ na̱ndi̱koꞌ ti̱kui ja̱a̱nꞌ miiꞌ naá ra̱ ndii,
ni̱ tavi̱ ndo̱o̱ raꞌ sa̱kuuꞌ carreta te̱ xíinꞌ Faraón,
xiinꞌ kuei,
tiꞌ yoso̱ꞌ ra̱,
xiinꞌ sa̱kuuꞌ te̱ xíinꞌ,
te̱ ni̱ ko̱ꞌni̱ mi̱ni̱ ja̱a̱nꞌ ña̱ ndikún ra̱ ne̱ Israel,
ni̱ xiꞌi̱ ndo̱o̱ ra̱ nde̱e̱ i̱i̱n nda̱a̱ꞌ ra̱ nï̱ kaku̱.
29 Ndisu̱ ne̱ Israel ndii,
ni̱ xkaꞌndi̱a̱ ni̱a̱ mi̱ni̱ ja̱a̱nꞌ nde̱e̱ naa nuu̱ꞌ ñu̱ꞌuꞌ i̱tyi te̱i̱n ti̱kui,
te̱ ta̱taꞌviꞌ xiinꞌ ni̱a̱ ni̱ yoo̱ ti̱kui nde̱e̱ naa nama̱,
i̱i̱n a̱ nda̱ꞌaꞌ ku̱a̱ꞌa̱ ni̱a̱,
te̱ i̱nga̱ a̱ nda̱ꞌaꞌ i̱ti̱n ni̱a̱.
30 Sa̱kanꞌ ni̱ xa̱a̱ Yahvé kivi̱ꞌ ja̱a̱nꞌ,
te̱ ni̱ sa̱kakú a̱ ne̱ Israel nda̱ꞌaꞌ te̱ ndieeꞌ nuu̱ꞌ ñu̱ꞌuꞌ Egipto,
te̱ ni̱ xi̱ni̱ ne̱ Israel ndieeꞌ ñu̱ꞌuꞌ ndeꞌi̱ te̱ xíinꞌ te̱ Egipto yu̱ꞌuꞌ mi̱ni̱ ja̱a̱nꞌ.
31 Te̱ kii̱ꞌ ni̱ xi̱ni̱ ne̱ Israel tyu̱u̱n kaꞌnuꞌ ña̱ ni̱ xa̱a̱ Yahvé,
te̱ ni̱ ka̱nandoo a̱ te̱ xíinꞌ te̱ Egipto ja̱a̱nꞌ ndii,
ni̱ yi̱ꞌvi ni̱a̱ Yahvé,
te̱ ni̱ xi̱to̱ kaꞌnuꞌ ña̱ꞌaꞌ ni̱a̱,
te̱ ni̱ xi̱to̱ kaꞌnuꞌ tu̱ ni̱a̱ Moisés,
te̱ xikaꞌ nuuꞌ nuu̱ꞌ a̱.