So̱ꞌo̱ ni̱ xa̱a̱ a̱ kii̱ꞌ ni̱ xa̱ꞌaꞌ nu̱uꞌ ne̱ Israel sanakuaꞌa ni̱a̱ tiaa̱ siꞌe̱ nuu̱ꞌ ni̱a̱ nuu̱ꞌ Ndiosí
13
I̱kanꞌ te̱ ni̱ kaꞌa̱n Yahvé xiinꞌ Moisés ndii:
2 ―Sa̱kuuꞌ ndoꞌó,
ne̱ Israel ndii,
sa̱na̱kuaꞌa ndo̱ꞌ sa̱kuuꞌ tiaa̱ siꞌe̱ nu̱uꞌ ndo̱ꞌ nuu̱ꞌ i̱.
Sa̱kanꞌ ña̱ sa̱kuuꞌ tiaa̱,
te̱ tuví nu̱uꞌ nuu̱ꞌ ña̱ꞌaꞌ ne̱ Israel ndii,
ndi̱ti̱a̱ yuꞌu̱ nduuꞌ ra̱.
Te̱ sa̱kanꞌ tu̱ sa̱kuuꞌ ki̱tiꞌ,
tiꞌ tyiee̱ siꞌe̱ nu̱uꞌ sa̱kuuꞌ ki̱tiꞌ sana̱ ndo̱ꞌ ndii,
ndi̱ti̱a̱ yuꞌu̱ nduuꞌ riꞌ ―ni̱ katyi̱ a̱.
3 Sa̱kanꞌ te̱ ni̱ kaꞌa̱n Moisés xiinꞌ ne̱ Israel ndii:
―Na̱ka̱ꞌanꞌ ndo̱ꞌ xaꞌa̱ꞌ kivi̱ꞌ kaa̱ꞌ,
sa̱kanꞌ ña̱ naa kivi̱ꞌ kaa̱ꞌ ni̱ xa̱a̱ Ndiosí kuaꞌa̱ꞌ va̱ tyu̱u̱n kaꞌnuꞌ,
te̱ ni̱ ta̱va̱ꞌ a̱ ndoꞌó nuu̱ꞌ ñu̱ꞌuꞌ Egipto miiꞌ ni̱ nduu̱ ndo̱ꞌ ne̱ xikaꞌ nuuꞌ so̱ꞌo̱.
Xaꞌa̱ꞌ a̱ ja̱a̱nꞌ na kü̱xi̱ ndo̱ꞌ xita̱ꞌ va̱ꞌa̱ ña̱ saká yu̱tyiꞌ levadura xiinꞌ.
4 Te̱ kivi̱ꞌ ña̱ kieeꞌ ndoꞌó yoꞌoꞌ vi̱ti̱n ndii,
yoo̱ꞌ Abib nduuꞌ a̱.
5 Xaꞌa̱ꞌ a̱ ja̱a̱nꞌ na kuiiꞌ kii̱ꞌ ko̱ꞌni̱ ndo̱ꞌ nuu̱ꞌ ñu̱ꞌuꞌ miiꞌ yoo kuaꞌa̱ꞌ ña̱ xaxi̱ꞌ,
te̱ yoo kuaꞌa̱ꞌ tu̱ ña̱ va̱ꞌa̱ nde̱e̱ naa letyin xiinꞌ ñuñu̱ꞌ ña̱ nduuꞌ ñu̱ꞌuꞌ miiꞌ ndieeꞌ te̱ cananeo,
xiinꞌ te̱ vi̱ꞌe̱ heteo,
xiinꞌ te̱ vi̱ꞌe̱ amorreo,
xiinꞌ te̱ vi̱ꞌe̱ heveo,
xiinꞌ te̱ vi̱ꞌe̱ jebuseo,
ñu̱ꞌuꞌ ña̱ ni̱ ta̱xi̱ Yahvé kuento a̱ nuu̱ꞌ te̱ xii̱ꞌ ya̱taꞌ ndo̱ꞌ ña̱ ta̱xi̱ a̱ nda̱ꞌaꞌ ndo̱ꞌ ndii,
naa yoo̱ꞌ kaa̱ꞌ kuní a̱ ka̱sa̱ꞌa̱ ndo̱ꞌ vi̱koꞌ Pascua,
te̱ sa̱kaꞌnuꞌ ndo̱ꞌ nuu̱ꞌ Ndiosí.
6 Uxa̱ taꞌan kivi̱ꞌ ku̱xi̱ ndo̱ꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ,
te̱ kivi̱ꞌ ña̱ uxa̱ ka̱sa̱ꞌa̱ ndo̱ꞌ vi̱koꞌ nuu̱ꞌ Yahvé.
7 Sa̱kanꞌ na kuiiꞌ niiꞌ uxa̱ kivi̱ꞌ ja̱a̱nꞌ kü̱xi̱ ndo̱ꞌ xita̱ꞌ va̱ꞌa̱ ña̱ saká yu̱tyiꞌ levadura xiinꞌ,
ni̱ nde̱e̱ köo̱ꞌ tu̱ nde̱e̱ siee yu̱tyiꞌ levadura ja̱a̱nꞌ ko̱o̱ ka̱niiꞌ nuu̱ꞌ ñu̱ꞌuꞌ miiꞌ ndieeꞌ ndo̱ꞌ uun xita̱ꞌ va̱ꞌa̱ ña̱ saká ña̱ ja̱a̱nꞌ xiinꞌ.
8 ’Te̱ kivi̱ꞌ ña̱ uxa̱ ja̱a̱nꞌ kaꞌa̱n u̱nꞌ xiinꞌ siꞌe̱ u̱nꞌ ndii:
“Xaaꞌ i̱ ña̱ yo̱ꞌo̱ꞌ kivi̱ꞌ kaa̱ꞌ sa̱kanꞌ ña̱ nakaꞌanꞌ i̱ xaꞌa̱ꞌ ña̱ ni̱ xa̱a̱ Yahvé xiinꞌ i̱ kii̱ꞌ ni̱ xta̱ꞌniꞌ a̱ yuꞌu̱ nuu̱ꞌ ñu̱ꞌuꞌ Egipto”,
katyi̱ u̱nꞌ.
9 Te̱ vi̱koꞌ kaa̱ꞌ ku̱ndu̱u̱ nde̱e̱ naa tuni̱ ndo̱ꞌ ña̱ ni̱ tyi̱nduꞌu̱ꞌ Ndiosí xata̱ꞌ nda̱ꞌaꞌ ndo̱ꞌ uun tiꞌe̱ ndo̱ꞌ,
te̱ sa̱na̱kaꞌanꞌ a̱ ndoꞌó,
te̱ nä̱ndoso̱ꞌ ndo̱ꞌ ña̱ kaꞌa̱n ndo̱ꞌ xaꞌa̱ꞌ a̱ ndii:
“Xiinꞌ kuaꞌa̱ꞌ tyu̱u̱n kaꞌnuꞌ ni̱ ta̱va̱ꞌ Yahvé nduꞌu̱ nuu̱ꞌ ñu̱ꞌuꞌ Egipto”,
katyi̱ ndo̱ꞌ.
10 Sa̱kanꞌ na kuiiꞌ kuní a̱ ka̱sa̱ꞌa̱ ndo̱ꞌ vi̱koꞌ Pascua ja̱a̱nꞌ sa̱a̱ kuiya̱ kii̱ꞌ nakuiín kivi̱ꞌ ña̱ nasukú a̱.
11 ’Te̱ kii̱ꞌ ko̱ꞌni̱ Yahvé ndoꞌó nuu̱ꞌ ñu̱ꞌuꞌ miiꞌ ndieeꞌ te̱ vi̱ꞌe̱ cananeo,
miiꞌ ni̱ ta̱xi̱ a̱ kuento a̱ ña̱ ta̱xi̱ ña̱ꞌaꞌ nda̱ꞌaꞌ ndoꞌó xiinꞌ nda̱ꞌaꞌ te̱ xii̱ꞌ ya̱taꞌ ndo̱ꞌ ja̱a̱nꞌ ndii,
12 sa̱na̱kuaꞌa ndo̱ꞌ sa̱kuuꞌ tiaa̱ siꞌe̱ nu̱uꞌ ndo̱ꞌ nuu̱ꞌ Ndiosí,
te̱ sa̱kanꞌ tu̱ sa̱a̱ ndo̱ꞌ xiinꞌ sa̱kuuꞌ siꞌe̱ ki̱tiꞌ sana̱ ndo̱ꞌ,
tiꞌ tyiee̱,
tiꞌ tuví nu̱uꞌ,
sa̱kanꞌ ña̱ kuenta Yahvé nduuꞌ tu̱ tiꞌ ja̱a̱nꞌ.
13 Te̱ siꞌe̱ nu̱uꞌ mburra ndii,
kuní a̱ na̱soko̱ꞌ ndo̱ꞌ i̱i̱n mbe̱e̱ tyiee̱ uun i̱i̱n ti̱xuꞌu̱ꞌ xaꞌa̱ꞌ riꞌ nuu̱ꞌ Yahvé,
te̱ xiinꞌ tiꞌ ja̱a̱nꞌ tya̱ꞌvi̱ ndo̱ꞌ nuu̱ꞌ a̱ xaꞌa̱ꞌ riꞌ.
Te̱ naaꞌ nä̱soko̱ꞌ ndo̱ꞌ i̱i̱n mbe̱e̱ uun i̱i̱n ti̱xuꞌu̱ꞌ xaꞌa̱ꞌ riꞌ nuu̱ꞌ Ndiosí ndii,
kaꞌnu̱ ndo̱ꞌ suku̱nꞌ riꞌ.
Ndisu̱ tiaa̱ siꞌe̱ nu̱uꞌ ndo̱ꞌ uun siꞌe̱ nu̱uꞌ si̱a̱niꞌ ndo̱ꞌ ndii,
kuní a̱ na̱soko̱ꞌ ndo̱ꞌ i̱i̱n ki̱tiꞌ xaꞌa̱ꞌ ra̱,
te̱ xiinꞌ tiꞌ ja̱a̱nꞌ tya̱ꞌvi̱ ndo̱ꞌ xaꞌa̱ꞌ ra̱.
14 ’Nuu̱ꞌ kuꞌu̱n e̱ꞌ kii̱ꞌ nda̱tuꞌu̱nꞌ siꞌe̱ ndo̱ꞌ ndoꞌó ndii:
“¿Ndiotyun na xaꞌa e̱ꞌ vi̱koꞌ kaa̱ꞌ?”,
katyi̱ ni̱a̱ xiinꞌ ndo̱ꞌ.
Kaꞌa̱n ndo̱ꞌ xiinꞌ ni̱a̱ ndii:
“Xaꞌa e̱ꞌ vi̱koꞌ kaa̱ꞌ sa̱kanꞌ ña̱ vi̱ti̱n nakuiín kivi̱ꞌ ña̱ ni̱ ta̱va̱ꞌ Yahvé nduꞌu̱ kii̱ꞌ ni̱ xa̱a̱ a̱ kuaꞌa̱ꞌ tyu̱u̱n kaꞌnuꞌ xiinꞌ nda̱ꞌaꞌ a̱ nuu̱ꞌ ñu̱ꞌuꞌ Egipto miiꞌ ni̱ nduu̱ ndu̱ ne̱ xikaꞌ nuuꞌ so̱ꞌo̱.
15 Kii̱ꞌ ni̱ xa̱xi̱i̱ Faraón nimá ra̱,
te̱ nï̱ xi̱i̱n ra̱ ta̱xi̱ ra̱ ki̱e̱e̱ ndu̱ nuu̱ꞌ ñu̱ꞌuꞌ Egipto ndii,
ni̱ xa̱ꞌni̱ꞌ Yahvé sa̱kuuꞌ tiaa̱ siꞌe̱ nu̱uꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ ja̱a̱nꞌ,
te̱ ni̱ xa̱ꞌni̱ꞌ tu̱ a̱ sa̱kuuꞌ ki̱tiꞌ tyiee̱ siꞌe̱ nu̱uꞌ ki̱tiꞌ sana̱ ni̱a̱.
Xaꞌa̱ꞌ a̱ ja̱a̱nꞌ na nasoko̱ꞌ ndu̱ sa̱kuuꞌ tiꞌ tyiee̱ siꞌe̱ nu̱uꞌ sa̱kuuꞌ ki̱tiꞌ sana̱ ndu̱ nuu̱ꞌ Yahvé,
te̱ xiinꞌ tiꞌ ja̱a̱nꞌ tyaꞌvi̱ ndu̱ xaꞌa̱ꞌ siꞌe̱ nu̱uꞌ ndu̱,
te̱ tuví,
te̱ sa̱kakú ña̱ꞌaꞌ ndu̱.
16 Xaꞌa̱ꞌ a̱ ja̱a̱nꞌ na ña̱ nasoko̱ꞌ e̱ꞌ kaa̱ꞌ ku̱ndu̱u̱ nde̱e̱ naa tuni̱ ndo̱ꞌ ña̱ ni̱ tyi̱nduꞌu̱ꞌ Yahvé xata̱ꞌ nda̱ꞌaꞌ ndo̱ꞌ uun tiꞌe̱ꞌ ndo̱ꞌ,
te̱ sa̱na̱kaꞌanꞌ a̱ ndoꞌó ña̱ xiinꞌ kuaꞌa̱ꞌ tyu̱u̱n kaꞌnuꞌ ni̱ ta̱va̱ꞌ Yahvé nduꞌu̱ nuu̱ꞌ ñu̱ꞌuꞌ Egipto”,
katyi̱ ndo̱ꞌ xiinꞌ ni̱a̱ ―ni̱ katyi̱ Moisés.
So̱ꞌo̱ ni̱ xa̱a̱ a̱ kii̱ꞌ ni̱ xkaꞌndi̱a̱ ne̱ Israel mi̱ni̱ kuaꞌa
17 Te̱ soꞌo̱ꞌ ndiꞌiꞌ kii̱ꞌ ni̱ ta̱xi̱ faraón ki̱e̱e̱ ne̱ Israel nuu̱ꞌ ñu̱ꞌuꞌ Egipto ndii,
nï̱ xaꞌa̱n Ndiosí xiinꞌ ni̱a̱ i̱tyiꞌ nda̱ku ña̱ xkaꞌndíá nuu̱ꞌ ñu̱ꞌuꞌ te̱ vi̱ꞌe̱ filisteo,
sa̱kanꞌ ña̱ ni̱ kaꞌa̱n a̱ ndii:
“Naaꞌ kuaꞌa̱n sa̱kanꞌ ku̱ntaꞌanꞌ te̱ filisteo xiinꞌ ne̱ Israel ndii,
i̱yo̱ ku̱yi̱ꞌvi ni̱a̱,
te̱ kaꞌa̱n nimá ni̱a̱ na̱ndi̱koꞌ ni̱a̱ ñu̱ꞌuꞌ Egipto”,
ni̱ katyi̱ a̱.
18 Sa̱kanꞌ na kuiiꞌ ni̱ xaꞌa̱n se̱koꞌ a̱ xiinꞌ ni̱a̱ i̱tyiꞌ ña̱ kuaꞌa̱n miiꞌ i̱tyi kaaꞌ,
ña̱ xkaꞌndíá Mi̱ni̱ Kuaꞌa.
Te̱ xa̱ ti̱ꞌvi̱ xa̱ ti̱ꞌvi̱ yoo ne̱ Israel ja̱a̱nꞌ ni̱ ki̱e̱e̱ ni̱a̱ nuu̱ꞌ ñu̱ꞌuꞌ Egipto ja̱a̱nꞌ ni̱ xa̱a̱ a̱.
19 Te̱ ni̱ na̱ꞌi̱ Moisés i̱kiꞌ José ndisoꞌ ra̱ kuaꞌa̱n ra̱,
sa̱kanꞌ ña̱ xa̱ sa̱kanꞌ ni̱ kaꞌa̱n José xiinꞌ ne̱ Israel ña̱ ta̱xi̱ ni̱a̱ kuento ni̱a̱ nuu̱ꞌ ra̱ ña̱ na̱ꞌi̱ ni̱a̱ i̱kiꞌ ra̱ kii̱ꞌ ki̱e̱e̱ ni̱a̱ nuu̱ꞌ ñu̱ꞌuꞌ ja̱a̱nꞌ,
ni̱ kaꞌa̱n ra̱ ndii:
“Ña̱ nda̱ku kaꞌán i̱ xiinꞌ ndo̱ꞌ ña̱ ki̱xi̱n Ndiosí tyi̱ndi̱e̱eꞌ a̱ ndoꞌó,
te̱ kii̱ꞌ xkaꞌndi̱a̱ ña̱ ja̱a̱nꞌ ndii,
na̱ꞌi̱ ndo̱ꞌ i̱kiꞌ i̱ kii̱ꞌ ki̱e̱e̱ ndo̱ꞌ nuu̱ꞌ ñu̱ꞌuꞌ yoꞌoꞌ”,
ni̱ katyi̱ ra̱.
20 Te̱ ni̱ ki̱e̱e̱ ne̱ Israel ñu̱u̱ Sucot,
te̱ ni̱ xaꞌa̱n na̱ndiee̱ꞌ ni̱a̱ i̱i̱n xaanꞌ miiꞌ naniꞌ Etam,
ya̱ti̱n miiꞌ xa̱ꞌaꞌ ñu̱ꞌuꞌ miiꞌ i̱tyi kaaꞌ.
21 Te̱ i̱i̱n keꞌinꞌ ndii,
nuu̱ꞌ i̱i̱n viko̱ꞌ nduꞌu̱ꞌ Yahvé niꞌiꞌ i̱tyiꞌ a̱ nuu̱ꞌ ni̱a̱ kuaꞌa̱n a̱,
te̱ niaꞌa̱ ña̱ꞌaꞌ a̱ i̱tyiꞌ.
Te̱ ñu̱u ndii,
xiinꞌ ñuꞌu̱ niꞌiꞌ i̱tyiꞌ a̱ nuu̱ꞌ ni̱a̱ kuaꞌa̱n a̱,
te̱ tuviꞌ nuu̱ꞌ ni̱a̱ kuaꞌa̱n ni̱a̱.
Sa̱kanꞌ ni̱ xa̱a̱ a̱ te̱ ku̱vi̱ yaꞌa̱ ni̱a̱ kuꞌu̱n ni̱a̱ i̱i̱n keꞌinꞌ xiinꞌ ñu̱u.
22 Te̱ viko̱ꞌ ja̱a̱nꞌ ndii,
sa̱a̱ kivi̱ꞌ niꞌiꞌ i̱tyiꞌ a̱ nuu̱ꞌ ni̱a̱ kuaꞌa̱n ni̱a̱ i̱i̱n keꞌinꞌ,
te̱ sa̱kanꞌ tu̱ ñuꞌu̱ ndii,
sa̱a̱ ñu̱u niꞌiꞌ i̱tyiꞌ a̱ nuu̱ꞌ ni̱a̱ kuaꞌa̱n ni̱a̱.