So̱ꞌo̱ ni̱ xa̱a̱ a̱ kii̱ꞌ ni̱ xa̱ꞌaꞌ nu̱uꞌ ne̱ yivi̱ꞌ xaꞌa ni̱a̱ vi̱koꞌ Pascua
12
Kii̱ꞌ ndieeꞌ ka̱ ne̱ Israel nuu̱ꞌ ñu̱ꞌuꞌ Egipto,
te̱ ni̱ kaꞌa̱n Yahvé xiinꞌ Moisés xiinꞌ Aarón ndii:
2 ―Yoo̱ꞌ yoꞌoꞌ ndii,
yoo̱ꞌ kuuꞌ nu̱uꞌ ku̱ndu̱u̱ riꞌ nuu̱ꞌ ndoꞌó,
sa̱kanꞌ ña̱ yoo̱ꞌ nu̱uꞌ xaꞌa̱ꞌ kuiya̱ ku̱ndu̱u̱ riꞌ nuu̱ꞌ ndo̱ꞌ.
3 Kaꞌa̱n xiinꞌ sa̱kuuꞌ ti̱ꞌvi̱ ne̱ Israel ña̱ yo̱ꞌo̱ꞌ:
“Kivi̱ꞌ ña̱ uxi̱ xikaꞌ yoo̱ꞌ yoꞌoꞌ ndii,
kuní a̱ ki̱ꞌi̱n ne̱ ndieeꞌ i̱ꞌi̱n vi̱ꞌe̱ i̱i̱n mbe̱e̱ uun i̱i̱n ti̱xuꞌu̱ꞌ na̱ndaa̱ꞌ riꞌ xaꞌa̱ꞌ i̱ꞌi̱n vi̱ꞌe̱ ndo̱ꞌ.
4 Te̱ naaꞌ kö̱o̱ꞌ kuaꞌa̱ꞌ xa̱tyiꞌ ne̱ yivi̱ꞌ ndieeꞌ i̱i̱n vi̱ꞌe̱,
te̱ tuu ni̱a̱ ña̱ sä̱ndiꞌiꞌ ni̱a̱ nde̱i̱ꞌ ka̱niiꞌ i̱i̱n mbe̱e̱ ku̱xi̱ ni̱a̱ ndii,
kuní a̱ na̱ta̱ꞌviꞌ ni̱a̱ riꞌ ku̱xi̱ ni̱a̱ xiinꞌ ne̱ ndieeꞌ ya̱ti̱n vi̱ꞌe̱ ni̱a̱.
Te̱ sa̱a̱ taꞌan kuuꞌ ni̱a̱ i̱ꞌi̱n ti̱ꞌvi̱ ndii,
i̱i̱n sa̱kanꞌ tu̱ nde̱i̱ꞌ kuní a̱ na̱ꞌi̱ ni̱a̱ ku̱xi̱ ni̱a̱ uun sa̱a̱ kuuꞌ a̱ xixiꞌ i̱ꞌi̱n ni̱a̱ i̱ꞌi̱n ti̱ꞌvi̱ ja̱a̱nꞌ.
5 Ki̱tiꞌ,
tiꞌ na̱ka̱xi̱n ndo̱ꞌ na̱soko̱ꞌ ndo̱ꞌ nuu̱ꞌ Yahvé ndii,
kuní a̱ ña̱ tiꞌ va̱ꞌa̱ kuni ku̱ndu̱u̱ riꞌ,
te̱ i̱i̱n tiꞌ tyiee̱,
tiꞌ kumiꞌ i̱i̱n kuiya̱ ku̱ndu̱u̱ riꞌ,
te̱ ku̱vi̱ ku̱ndu̱u̱ riꞌ i̱i̱n mbe̱e̱ uun i̱i̱n ti̱xuꞌu̱ꞌ siee.
6 ’Ko̱to̱ va̱ꞌa̱ ndo̱ꞌ ki̱tiꞌ,
tiꞌ ni̱ na̱ka̱xi̱n ndo̱ꞌ ja̱a̱nꞌ,
nde̱e̱ xaa̱ kivi̱ꞌ uxi̱ ku̱miꞌ xikaꞌ yoo̱ꞌ yoꞌoꞌ,
te̱ kivi̱ꞌ ja̱a̱nꞌ ndii,
ka̱ꞌni̱ꞌ sa̱kuuꞌ ti̱ꞌvi̱ ndoꞌó,
ne̱ Israel,
riꞌ xa̱kuaa̱ꞌ kivi̱ꞌ uxi̱ ku̱miꞌ xikaꞌ yoo̱ꞌ ja̱a̱nꞌ.
7 Te̱ ki̱ꞌi̱n ndo̱ꞌ níiꞌ riꞌ,
te̱ ka̱ki̱n ndo̱ꞌ a̱ sa̱a̱ xinunduu yiꞌeꞌ vi̱ꞌe̱ miiꞌ ku̱xi̱ ndo̱ꞌ nde̱i̱ꞌ riꞌ.
8 Te̱ ñu̱u ja̱a̱nꞌ ndii,
ta̱vi̱ ndo̱ꞌ nde̱i̱ꞌ riꞌ nuu̱ꞌ ñuꞌu̱,
te̱ ku̱xi̱ ndo̱ꞌ a̱ xiinꞌ kuꞌu̱ uva̱ xiinꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ.
9 Kä̱xi̱ꞌ iꞌiꞌ ndo̱ꞌ nde̱e̱ siee nde̱i̱ꞌ riꞌ,
ni̱ nde̱e̱ sä̱tyoꞌó tu̱ ndo̱ꞌ a̱.
Süu̱ꞌ ja̱a̱nꞌ ndii,
ta̱vi̱ ndo̱ꞌ ka̱niiꞌ riꞌ nuu̱ꞌ ñuꞌu̱,
naa kuuꞌ xíniꞌ riꞌ,
xiinꞌ xaꞌa̱ꞌ riꞌ,
xiinꞌ sa̱kuuꞌ xi̱ti̱ riꞌ.
10 Nä̱ko̱o̱ ndo̱ꞌ nde̱e̱ siee riꞌ xaꞌa̱ꞌ tu̱ku̱ kivi̱ꞌ.
Naaꞌ ni̱ ndoo̱ ndo̱so̱ꞌ siee riꞌ ndii,
ka̱ꞌmi̱ ndo̱ꞌ riꞌ ñu̱u sa̱kanꞌ.
11 ’Te̱ so̱ꞌo̱ kuní a̱ ko̱o̱ ndo̱ꞌ kii̱ꞌ ku̱xi̱ ndo̱ꞌ riꞌ:
ku̱i̱ꞌnu̱ ndo̱ꞌ toto̱ ndiká ndo̱ꞌ,
te̱ ko̱tii̱n to̱koꞌ ndo̱ꞌ,
te̱ ki̱ꞌi̱ tu̱ ndo̱ꞌ ndixa̱nꞌ ndo̱ꞌ,
te̱ ko̱ni̱ꞌi̱ tu̱ ndo̱ꞌ tunꞌ katuviꞌ ndo̱ꞌ,
te̱ kiꞌi̱ꞌ va̱ tu̱ ku̱xi̱ ndo̱ꞌ riꞌ,
sa̱kanꞌ ña̱ vi̱koꞌ Pascua,
ña̱ xakaꞌnuꞌ ndo̱ꞌ Yahvé,
nduuꞌ a̱.
12 Sa̱kanꞌ ña̱ ñu̱u kivi̱ꞌ ja̱a̱nꞌ xi̱kaꞌndi̱a̱ i̱ ka̱niiꞌ nuu̱ꞌ ñu̱ꞌuꞌ Egipto,
te̱ ka̱ꞌni̱ꞌ i̱ sa̱kuuꞌ tiaa̱ siꞌe̱ nu̱uꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ,
te̱ sa̱kanꞌ tu̱ ka̱ꞌni̱ꞌ i̱ siꞌe̱ nu̱uꞌ sa̱kuuꞌ ki̱tiꞌ sana̱ ni̱a̱.
Te̱ sa̱ndo̱ñuꞌuꞌ tu̱ i̱ sa̱kuuꞌ ndiosí saka ña̱ xakaꞌnuꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ.
Sa̱kanꞌ ña̱ i̱i̱n nda̱a̱ꞌ yuꞌu̱ ku̱i̱ti̱ꞌ nduuꞌ Yahvé.
13 Te̱ níiꞌ ja̱a̱nꞌ ku̱ndu̱u̱ ña̱ niaꞌa̱ ña̱ ndoꞌó ndieeꞌ vi̱ꞌe̱ ja̱a̱nꞌ,
sa̱kanꞌ te̱ kii̱ꞌ ka̱ꞌni̱ꞌ i̱ siꞌe̱ nu̱uꞌ ne̱ ndieeꞌ nuu̱ꞌ ñu̱ꞌuꞌ Egipto ndii,
nde̱e̱ i̱i̱n siꞌe̱ ndoꞌó kä̱ꞌni̱ꞌ i̱,
sa̱kanꞌ ña̱ ku̱ni̱ i̱ kaaꞌ níiꞌ ja̱a̱nꞌ yiꞌeꞌ ndo̱ꞌ,
te̱ xkaꞌndi̱a̱ nda̱ku i̱ kuꞌu̱n i̱.
14 ’Te̱ sa̱a̱ kuiya̱ kuní a̱ na̱ka̱ꞌanꞌ ndo̱ꞌ xaꞌa̱ꞌ kivi̱ꞌ kaa̱ꞌ,
te̱ sa̱kaꞌnuꞌ ndo̱ꞌ Yahvé xiinꞌ vi̱koꞌ kaꞌnuꞌ va̱,
te̱ ndoo̱ tu̱ a̱ ku̱ndu̱u̱ a̱ nde̱iꞌ nuu̱ꞌ siꞌe̱ ndo̱ꞌ,
te̱ sa̱a̱ ni̱a̱ a̱ nde̱e̱ ndiꞌiꞌ ni̱ kivi̱ꞌ.
15 Te̱ niiꞌ uxa̱ kivi̱ꞌ kuní a̱ ku̱xi̱ ndo̱ꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ.
Xaꞌa̱ꞌ a̱ ja̱a̱nꞌ na kuiiꞌ nde̱e̱ kivi̱ꞌ nu̱uꞌ kii̱ꞌ xa̱ꞌaꞌ vi̱koꞌ ja̱a̱nꞌ ndii,
kuní a̱ ña̱ sa̱ndiꞌiꞌ xa̱tyiꞌ ndo̱ꞌ yu̱tyiꞌ levadura vi̱ꞌe̱ ndo̱ꞌ.
Sa̱kanꞌ ña̱ yo̱o̱ ka̱ ku̱xi̱ xita̱ꞌ va̱ꞌa̱ ña̱ saká yu̱tyiꞌ levadura xiinꞌ niiꞌ uxa̱ sa̱aꞌ kivi̱ꞌ ja̱a̱nꞌ ndii,
xta̱ꞌniꞌ xa̱tyiꞌ ña̱ꞌaꞌ ndo̱ꞌ te̱i̱n ndoꞌó,
ne̱ Israel.
16 Te̱ kivi̱ꞌ nu̱uꞌ ña̱ xa̱ꞌaꞌ vi̱koꞌ ja̱a̱nꞌ xiinꞌ kivi̱ꞌ uxa̱ kii̱ꞌ xkaꞌndíá vi̱koꞌ ja̱a̱nꞌ ndii,
kuní a̱ ña̱ ndu̱i̱i̱n ndo̱ꞌ te̱ sa̱kaꞌnuꞌ ndo̱ꞌ Ndiosí xiinꞌ nimá ndo̱o̱ ndo̱ꞌ.
Te̱ kivi̱ꞌ ja̱a̱nꞌ ndii,
ña̱ xaxi̱ꞌ ku̱i̱ti̱ꞌ ndo̱ꞌ ku̱vi̱ ka̱sa̱ꞌa̱ ndo̱ꞌ,
ndisu̱ kü̱vi̱ sa̱a̱ ndo̱ꞌ nde̱e̱ i̱i̱n ka̱ nuu̱ꞌ tyuunꞌ.
17 ’Vi̱koꞌ ña̱ xixiꞌ ndo̱ꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ ndii,
i̱i̱n vi̱koꞌ ña̱ kuní a̱ sa̱kaꞌnuꞌ ndo̱ꞌ nduuꞌ a̱,
te̱ sa̱na̱kaꞌanꞌ a̱ ndoꞌó ña̱ naa kivi̱ꞌ ja̱a̱nꞌ ni̱ ta̱va̱ꞌ ti̱ꞌvi̱ i̱ sa̱kuuꞌ ndo̱ꞌ nuu̱ꞌ ñu̱ꞌuꞌ Egipto.
Te̱ ndoo̱ tu̱ a̱ ku̱ndu̱u̱ a̱ nde̱iꞌ nuu̱ꞌ siꞌe̱ ndo̱ꞌ te̱ sa̱a̱ ni̱a̱ a̱ nde̱e̱ ndiꞌiꞌ ni̱ kivi̱ꞌ.
18 Nde̱e̱ xa̱kuaa̱ꞌ kivi̱ꞌ uxi̱ ku̱miꞌ xikaꞌ yoo̱ꞌ nu̱uꞌ xa̱ꞌaꞌ ndo̱ꞌ ku̱xi̱ ndo̱ꞌ xita̱ꞌ va̱ꞌa̱ ña̱ köo̱ꞌ yu̱tyiꞌ levadura saká xiinꞌ,
te̱ kuꞌu̱n ndi̱koꞌ ndo̱ꞌ nde̱e̱ xa̱kuaa̱ꞌ kivi̱ꞌ oko̱ i̱i̱n xikaꞌ yoo̱ꞌ ja̱a̱nꞌ.
19 Xaꞌa̱ꞌ a̱ ja̱a̱nꞌ na kuiiꞌ niiꞌ uxa̱ kivi̱ꞌ ja̱a̱nꞌ ndii,
nde̱e̱ siee yu̱tyiꞌ levadura köo̱ꞌ vi̱ꞌe̱ ndo̱ꞌ.
Sa̱kanꞌ ña̱ yo̱o̱ ka̱ ku̱xi̱ xita̱ꞌ va̱ꞌa̱ ña̱ saká yu̱tyiꞌ levadura xiinꞌ tee̱ꞌ i̱i̱n nda̱a̱ꞌ i̱tyiꞌ niiꞌ uxa̱ sa̱aꞌ kivi̱ꞌ ja̱a̱nꞌ naaꞌ ne̱ tukuꞌ nduuꞌ ni̱a̱,
uun naaꞌ i̱i̱n yooꞌ ne̱ Israel nduuꞌ ni̱a̱ ndii,
kuní a̱ xta̱ꞌniꞌ xa̱tyiꞌ ña̱ꞌaꞌ ndo̱ꞌ te̱i̱n ndoꞌó,
ne̱ Israel.
20 Sa̱kanꞌ na kuiiꞌ kü̱xi̱ xa̱tyiꞌ ndo̱ꞌ ña̱ saká yu̱tyiꞌ levadura xiinꞌ.
Miiꞌ ka̱ ndieeꞌ ndo̱ꞌ ndii,
xita̱ꞌ va̱ꞌa̱ ña̱ köo̱ꞌ yu̱tyiꞌ levadura xiinꞌ ku̱xi̱ ndo̱ꞌ”,
katyi̱ u̱nꞌ xiinꞌ ni̱a̱ ―ni̱ katyi̱ Yahvé xiinꞌ Moisés.
21 Sa̱kanꞌ te̱ ni̱ ka̱na̱ Moisés te̱ xi̱xa̱,
te̱ kuuꞌ nu̱uꞌ nuu̱ꞌ ne̱ Israel,
te̱ ni̱ kaꞌa̱n ra̱ xiinꞌ ra̱ ndii:
―Kuaꞌan ndo̱ꞌ te̱ na̱ka̱ ndo̱ꞌ i̱i̱n mbe̱e̱ uun i̱i̱n ti̱xuꞌu̱ꞌ xaꞌa̱ꞌ ne̱ ndieeꞌ i̱ꞌi̱n vi̱ꞌe̱,
te̱ ka̱ꞌni̱ꞌ ndo̱ꞌ riꞌ,
te̱ ka̱sa̱ꞌa̱ ndo̱ꞌ vi̱koꞌ Pascua.
22 Te̱ ki̱ꞌi̱n tu̱ ndo̱ꞌ i̱i̱n nu̱ꞌni̱ yuku̱ nda̱ꞌaꞌ tunꞌ hisopo,
te̱ sa̱tyiiꞌ ndooꞌ a̱ xiinꞌ níiꞌ tiꞌ ja̱a̱nꞌ ña̱ naá ti̱xi̱n xi̱koꞌoꞌ,
te̱ ka̱ki̱n ndo̱ꞌ a̱ tunꞌ taꞌnuꞌ ndi̱xi̱n xiinꞌ uvi̱ sa̱aꞌ ndu̱yu̱,
tunꞌ itaꞌ yiꞌeꞌ vi̱ꞌe̱ miiꞌ ndieeꞌ ndo̱ꞌ.
Te̱ nde̱e̱ i̱i̱n ndo̱ꞌ kï̱e̱e̱ ki̱ꞌe̱ nde̱e̱ kitu̱ꞌ.
23 Te̱ kii̱ꞌ xkaꞌndi̱a̱ Yahvé ka̱ꞌni̱ꞌ a̱ siꞌe̱ nu̱uꞌ ne̱ ndieeꞌ nuu̱ꞌ ñu̱ꞌuꞌ Egipto ndii,
ku̱ni̱ a̱ kaaꞌ níiꞌ ja̱a̱nꞌ ka̱niiꞌ yiꞌeꞌ sa̱kuuꞌ ndo̱ꞌ,
te̱ xkaꞌndi̱a̱ nda̱ku a̱ kuꞌu̱n a̱,
te̱ tä̱xi̱ a̱ xkaꞌndi̱a̱ ángele,
ña̱ xaꞌni̱ꞌ ja̱a̱nꞌ,
vi̱ꞌe̱ ndo̱ꞌ te̱ ka̱ꞌni̱ꞌ a̱ siꞌe̱ nu̱uꞌ ndo̱ꞌ.
24 ’Na̱ka̱ꞌanꞌ ndo̱ꞌ ña̱ tu̱ꞌu̱n nde̱iꞌ yoꞌoꞌ ndii,
ndoo̱ a̱ ku̱ndu̱u̱ a̱ nde̱iꞌ nuu̱ꞌ siꞌe̱ ndo̱ꞌ te̱ sa̱a̱ ni̱a̱ a̱ nde̱e̱ ndiꞌiꞌ ni̱ kivi̱ꞌ.
25 Kii̱ꞌ ko̱ꞌni̱ ndo̱ꞌ nuu̱ꞌ ñu̱ꞌuꞌ ña̱ ni̱ kaꞌa̱n Yahvé ta̱xi̱ a̱ nda̱ꞌaꞌ ndo̱ꞌ ndii,
kuní a̱ ña̱ sa̱kaꞌnuꞌ naa sa̱kaꞌnuꞌ ndo̱ꞌ vi̱koꞌ kaa̱ꞌ.
26 Te̱ kii̱ꞌ nda̱tuꞌu̱nꞌ siꞌe̱ ndo̱ꞌ ndoꞌó ndii:
“¿Yo̱o̱ nduuꞌ a̱ xakaꞌnuꞌ e̱ꞌ naaꞌ xaꞌni̱ꞌ e̱ꞌ ki̱tiꞌ kaa̱ꞌ?”,
katyi̱ ni̱a̱.
27 Te̱ ndoꞌó na̱ku̱i̱i̱n nuu̱ꞌ ni̱a̱ ndii:
“Nasoko̱ꞌ e̱ꞌ ki̱tiꞌ kaa̱ꞌ xaꞌa̱ꞌ vi̱koꞌ Pascua ña̱ xakaꞌnuꞌ e̱ꞌ Yahvé.
Ku̱a̱tyi̱ ndii,
kii̱ꞌ ni̱ xa̱ꞌni̱ꞌ a̱ siꞌe̱ nu̱uꞌ ne̱ ndieeꞌ nuu̱ꞌ ñu̱ꞌuꞌ Egipto ndii,
ni̱ xkaꞌndi̱a̱ nda̱ku ku̱i̱ti̱ꞌ a̱ yiꞌeꞌ yooꞌ,
ne̱ Israel,
ne̱ ni̱ ndiee̱ nuu̱ꞌ ñu̱ꞌuꞌ ja̱a̱nꞌ,
te̱ ni̱ sa̱kakú a̱ yooꞌ”,
katyi̱ ndo̱ꞌ xiinꞌ ni̱a̱ ―ni̱ katyi̱ ra̱.
Te̱ kii̱ꞌ ndi̱ꞌi̱ ni̱ kaꞌa̱n Moisés sa̱kuuꞌ ña̱ kaa̱ꞌ xiinꞌ ne̱ Israel ndii,
ni̱ xi̱ku̱ndiee̱ ndi̱e̱e̱ ni̱a̱ nde̱e̱ nuu̱ꞌ ñu̱ꞌuꞌ,
te̱ ni̱ xakaꞌnuꞌ ni̱a̱ Ndiosí.
28 Sa̱kanꞌ te̱ ni̱ ki̱e̱e̱ ne̱ Israel kuaꞌa̱n ni̱a̱,
te̱ ni̱ xa̱a̱ ni̱a̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés xiinꞌ Aarón,
te̱ ni̱ sa̱yaꞌá ra̱ a̱ nuu̱ꞌ ni̱a̱.
So̱ꞌo̱ ni̱ xa̱a̱ a̱ kii̱ꞌ ni̱ xa̱ꞌni̱ꞌ Yahvé siꞌe̱ nu̱uꞌ ne̱ ndieeꞌ nuu̱ꞌ ñu̱ꞌuꞌ Egipto
29 Nañu̱u sa̱va̱ kivi̱ꞌ ja̱a̱nꞌ,
te̱ ni̱ xkaꞌndi̱a̱ Yahvé,
te̱ ni̱ xa̱ꞌni̱ꞌ ndooꞌ a̱ sa̱kuuꞌ siꞌe̱ nu̱uꞌ ne̱ ndieeꞌ nuu̱ꞌ ñu̱ꞌuꞌ Egipto nde̱e̱ siꞌe̱ nu̱uꞌ Faraón,
te̱ xinduꞌu̱ꞌ nuu̱ꞌ tei̱ kaꞌnuꞌ xiinꞌ ra̱,
te̱ nde̱e̱ siꞌe̱ nu̱uꞌ te̱ ndasi i̱ꞌnu̱ naá vi̱ꞌe̱ ka̱a̱,
te̱ ni̱ xa̱ꞌni̱ꞌ ndooꞌ tu̱ a̱ siꞌe̱ nu̱uꞌ ki̱tiꞌ sana̱ ne̱ ñu̱u̱ ja̱a̱nꞌ.
30 Te̱ xa̱ ñu̱u sa̱kanꞌ ni̱ ndo̱to̱ Faraón,
te̱ ni̱ ndo̱to̱ tu̱ sa̱kuuꞌ ne̱ xatyuunꞌ nuu̱ꞌ ra̱,
te̱ sa̱kanꞌ tu̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto,
te̱ ni̱ xa̱ꞌaꞌ xakuꞌ tiꞌeꞌ xa̱va̱ꞌa̱ ni̱a̱ ka̱niiꞌ nuu̱ꞌ ñu̱ꞌuꞌ Egipto ja̱a̱nꞌ,
sa̱kanꞌ ña̱ köo̱ꞌ nde̱e̱ i̱i̱n vi̱ꞌe̱ miiꞌ nï̱ xiꞌi̱ siꞌe̱ nu̱uꞌ ne̱ yivi̱ꞌ.
31 Xa̱ ñu̱u sa̱kanꞌ ni̱ ka̱na̱ Faraón Moisés xiinꞌ Aarón,
te̱ ni̱ kaꞌa̱n ra̱ xiinꞌ ra̱ ndii:
―Kuaꞌan ki̱e̱e̱ sa̱kuuꞌ ndoꞌó,
ne̱ Israel,
nuu̱ꞌ ñu̱ꞌuꞌ i̱,
te̱ kuꞌu̱n xikaꞌ ndo̱ꞌ,
te̱ sa̱kaꞌnuꞌ ndo̱ꞌ Yahvé naa ni̱ kaꞌa̱n ndo̱ꞌ xiinꞌ i̱ sa̱aꞌ.
32 Te̱ na̱ka̱ tu̱ ndo̱ꞌ mbe̱e̱ xiinꞌ si̱ndiki̱ꞌ sana̱ ndo̱ꞌ,
te̱ kuꞌu̱n ndo̱ꞌ.
Te̱ kaꞌa̱n na̱ ndo̱ꞌ xiinꞌ Yahvé xaꞌa̱ꞌ i̱ ―ni̱ katyi̱ ra̱.
33 Te̱ ni̱ ta̱va̱ꞌ kiꞌi̱ꞌ va̱ ña̱ꞌaꞌ ne̱ ndieeꞌ nuu̱ꞌ ñu̱ꞌuꞌ Egipto nuu̱ꞌ ñu̱ꞌuꞌ ja̱a̱nꞌ,
sa̱kanꞌ ña̱ kaꞌán xiinꞌ taꞌanꞌ ni̱a̱ ndii:
―Naaꞌ küꞌu̱n ne̱ kaa̱ꞌ ndii,
ku̱vi̱ sa̱kuuꞌ e̱ꞌ ―ni̱ katyi̱ ni̱a̱.
34 Sa̱kanꞌ te̱ ni̱ ki̱ꞌi̱n ne̱ Israel i̱xanꞌ ña̱ ka̱sa̱ꞌa̱ ni̱a̱ xita̱ꞌ va̱ꞌa̱,
te̱ nde̱e̱ nï̱ ke̱ta̱ ni̱a̱ sa̱ka̱ꞌ ni̱a̱ yu̱tyiꞌ levadura xiinꞌ a̱,
sa̱kanꞌ na kuiiꞌ ni̱ ki̱ꞌi̱n ni̱a̱ sa̱kanꞌ yoo nde̱e̱ i̱tunꞌ miiꞌ satyiiꞌ ni̱a̱ i̱xanꞌ ja̱a̱nꞌ,
te̱ ni̱ ti̱suku̱ꞌ ni̱a̱ a̱ sa̱ꞌmaꞌ,
te̱ ni̱ ta̱ndi̱e̱e̱ ni̱a̱ soko̱ ni̱a̱.
35 Te̱ ni̱ xa̱a̱ tu̱ ni̱a̱ sa̱a̱ niiꞌ ni̱ kaꞌa̱n tyuunꞌ Moisés xiinꞌ ni̱a̱,
ni̱ xika̱n ni̱a̱ nuu̱ꞌ ne̱ ndieeꞌ nuu̱ꞌ ñu̱ꞌuꞌ Egipto sa̱kuuꞌ ña̱ꞌa̱ ña̱ ni̱ ku̱a̱ꞌa̱ xiinꞌ oro xiinꞌ ña̱ ni̱ ku̱a̱ꞌa̱ xiinꞌ plata,
te̱ ni̱ xika̱n tu̱ ni̱a̱ kuaꞌa̱ꞌ toto̱ nuu̱ꞌ ne̱ ja̱a̱nꞌ.
36 Te̱ mi̱iꞌ Yahvé ni̱ xa̱a̱ sa̱kanꞌ,
te̱ va̱ꞌa̱ kuni ne̱ ndieeꞌ nuu̱ꞌ ñu̱ꞌuꞌ Egipto xini ni̱a̱ ne̱ Israel,
te̱ ni̱ ta̱xi̱ ni̱a̱ nda̱ꞌaꞌ ne̱ ja̱a̱nꞌ sa̱kuuꞌ ña̱ ni̱ xika̱n ni̱a̱ nuu̱ꞌ ni̱a̱,
sa̱kanꞌ ni̱ xa̱a̱ ne̱ Israel,
te̱ ni̱ tu̱ꞌu̱n ndo̱o̱ ni̱a̱ ña̱ꞌa̱ nda̱ꞌaꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ.
So̱ꞌo̱ ni̱ xa̱a̱ a̱ kii̱ꞌ ni̱ ki̱e̱e̱ ne̱ Israel nuu̱ꞌ ñu̱ꞌuꞌ Egipto
37 Te̱ xa̱ ñu̱u sa̱kanꞌ ni̱ ki̱e̱e̱ ne̱ Israel ñu̱u̱ kaꞌnuꞌ Ramsés,
te̱ kuaꞌa̱n ni̱a̱ nde̱e̱ ñu̱u̱ Sucot.
Te̱ ña̱ mi̱iꞌ ndiꞌiꞌ te̱ yivi̱ꞌ,
te̱ kuaꞌa̱n xaꞌaꞌ ku̱i̱ti̱ꞌ ndii,
ndee tyaaꞌ te̱ iñu̱ siento mií kuuꞌ ra̱,
uun kuaꞌa̱ꞌ ka̱ ra̱ siee naaꞌ kä̱ꞌvi̱ e̱ꞌ ña̱ꞌaꞌ xiinꞌ ne̱ kuatyi̱ꞌ kualiꞌ.
38 Te̱ kii̱ꞌ ni̱ ki̱e̱e̱ ne̱ Israel ñu̱u̱ ja̱a̱nꞌ ndii,
ni̱ ki̱e̱e̱ tu̱ kiꞌinꞌ nuu̱ꞌ i̱nga̱ ne̱ yivi̱ꞌ,
ne̱ ni̱ ki̱e̱e̱ tu̱ku̱ ñu̱ꞌuꞌ xiinꞌ ni̱a̱,
te̱ ni̱ ki̱e̱e̱ tu̱ mbe̱e̱ xiinꞌ kuaꞌa̱ꞌ si̱ndiki̱ꞌ xiinꞌ ni̱a̱.
39 Te̱ ni̱ xa̱ꞌa̱ ni̱a̱ xita̱ꞌ va̱ꞌa̱ tiꞌeꞌ xiinꞌ i̱xanꞌ ña̱ köo̱ꞌ yu̱tyiꞌ levadura saká xiinꞌ ña̱ ni̱ na̱tyiꞌi̱ꞌ ni̱a̱ nuu̱ꞌ ñu̱ꞌuꞌ Egipto ja̱a̱nꞌ ni̱ xi̱xi̱ ni̱a̱.
Sa̱kanꞌ ña̱ kiꞌi̱ꞌ va̱ ni̱ ta̱va̱ꞌ ña̱ꞌaꞌ ne̱ ndieeꞌ nuu̱ꞌ ñu̱ꞌuꞌ Egipto,
te̱ nde̱e̱ nï̱ ku̱ni̱a̱ꞌa̱ ni̱a̱ sa̱va̱ꞌa̱ ni̱a̱ ña̱ xaxi̱ꞌ ko̱ni̱ꞌi̱ ni̱a̱ kuꞌu̱n ni̱a̱ ku̱xi̱ ni̱a̱ i̱tyiꞌ.
40 Ne̱ Israel ndii,
kumiꞌ siento oko̱ uxi̱ kuiya̱ ni̱ ndiee̱ ni̱a̱ nuu̱ꞌ ñu̱ꞌuꞌ Egipto ja̱a̱nꞌ.
41 Te̱ sa̱va̱ ni̱ kivi̱ꞌ ña̱ ni̱ xinu̱ ku̱miꞌ siento oko̱ uxi̱ kuiya̱ ña̱ ndieeꞌ ni̱a̱ i̱kanꞌ,
te̱ ni̱ ki̱e̱e̱ sa̱kuuꞌ ti̱ꞌvi̱ ne̱ nduuꞌ kuenta Yahvé nuu̱ꞌ ñu̱ꞌuꞌ ja̱a̱nꞌ.
42 Te̱ xaꞌa̱ꞌ a̱ ña̱ ñu̱u ni̱ ta̱va̱ꞌ Yahvé ne̱ Israel nuu̱ꞌ ñu̱ꞌuꞌ Egipto ja̱a̱nꞌ ndii,
kuní a̱ ña̱ ku̱ndi̱to̱ sa̱kuuꞌ ne̱ Israel niiꞌ ñu̱u kii̱ꞌ nakuiín kivi̱ꞌ ja̱a̱nꞌ xaꞌa̱ꞌ a̱ ña̱ tiinꞌ kaꞌnuꞌ ni̱a̱ Yahvé,
te̱ sa̱kanꞌ tu̱ kuní a̱ sa̱a̱ sa̱kuuꞌ si̱a̱niꞌ xikaꞌ ni̱a̱ nde̱e̱ ndiꞌiꞌ ni̱ kivi̱ꞌ.
Yoꞌoꞌ taxiꞌ Yahvé nde̱iꞌ sa̱a̱ kuní a̱ sa̱kaꞌnuꞌ e̱ꞌ vi̱koꞌ Pascua
43 Sa̱kanꞌ te̱ ni̱ kaꞌa̱n Yahvé xiinꞌ Moisés xiinꞌ Aarón ndii:
―Ña̱ yo̱ꞌo̱ꞌ nduuꞌ nde̱iꞌ ña̱ kaꞌán sa̱a̱ kuní a̱ sa̱kaꞌnuꞌ ndo̱ꞌ vi̱koꞌ Pascua:
Nde̱e̱ i̱i̱n ne̱ tukuꞌ kü̱vi̱ ku̱xi̱ nde̱i̱ꞌ ki̱tiꞌ,
tiꞌ nasoko̱ꞌ ndo̱ꞌ nuu̱ꞌ Yahvé xaꞌa̱ꞌ vi̱koꞌ Pascua ja̱a̱nꞌ,
44 ndisu̱ te̱ ni̱ sa̱ta̱ꞌ ndo̱ꞌ xikaꞌ nuuꞌ so̱ꞌo̱ nuu̱ꞌ ndo̱ꞌ ndii,
ku̱vi̱ ku̱xi̱ ra̱ nde̱i̱ꞌ tiꞌ ja̱a̱nꞌ naaꞌ xa̱ ni̱ tiaꞌndi̱a̱ i̱i̱nꞌ xíniꞌ limaꞌ ra̱ ña̱ kuní ka̱ xaa̱ kivi̱ꞌ ja̱a̱nꞌ.
45 Nde̱e̱ i̱i̱n te̱ tukuꞌ,
te̱ nduꞌu̱ꞌ nuuꞌ,
uun te̱ xatyuunꞌ nuu̱ꞌ ndo̱ꞌ,
te̱ xikuꞌún yaꞌviꞌ ra̱ ndii,
kü̱vi̱ ku̱xi̱ ra̱ nde̱i̱ꞌ ki̱tiꞌ ja̱a̱nꞌ.
46 Te̱ nde̱i̱ꞌ ja̱a̱nꞌ ndii,
i̱i̱n nda̱a̱ꞌ ku̱i̱ti̱ꞌ vi̱ꞌe̱ ku̱xi̱ ndo̱ꞌ a̱,
te̱ kü̱vi̱ xa̱tyiꞌ kuꞌu̱n ndo̱ꞌ ki̱ꞌe̱ xiinꞌ nde̱e̱ siee a̱,
ni̱ nde̱e̱ käꞌnu̱ tu̱ ndo̱ꞌ nde̱e̱ i̱i̱n nda̱a̱ꞌ i̱kiꞌ riꞌ.
47 Sa̱kuuꞌ ti̱ꞌvi̱ ndoꞌó,
ne̱ Israel,
kuní a̱ sa̱kaꞌnuꞌ ndo̱ꞌ vi̱koꞌ Pascua ja̱a̱nꞌ.
48 ’Ndisu̱ naaꞌ ndieeꞌ te̱ tukuꞌ te̱i̱n ndo̱ꞌ,
te̱ kuni sa̱kaꞌnuꞌ ra̱ vi̱koꞌ ja̱a̱nꞌ xiinꞌ ndo̱ꞌ xaꞌa̱ꞌ Yahvé ndii,
xi̱ꞌna̱ ka̱ kuní a̱ ka̱ꞌndi̱a̱ mi̱iꞌ ra̱ i̱i̱nꞌ xíniꞌ limaꞌ ra̱,
te̱ ka̱ꞌndi̱a̱ tu̱ ra̱ i̱i̱nꞌ xíniꞌ limaꞌ sa̱kuuꞌ tiaa̱,
te̱ ndieeꞌ vi̱ꞌe̱ ra̱.
Sa̱kanꞌ vi̱ꞌ te̱ ku̱vi̱ sa̱kaꞌnuꞌ ra̱ vi̱koꞌ Pascua ja̱a̱nꞌ xiinꞌ ndo̱ꞌ,
te̱ ndoo̱ ra̱ ku̱ndu̱u̱ ra̱ nde̱e̱ naa i̱i̱n te̱ Israel,
te̱ ni̱ ka̱ku̱ te̱i̱n ndo̱ꞌ.
Ndisu̱ te̱ nï̱ tiaꞌndi̱a̱ i̱i̱nꞌ xíniꞌ limaꞌ ndii,
kü̱vi̱ xa̱tyiꞌ ku̱xi̱ te̱ ja̱a̱nꞌ nde̱i̱ꞌ tiꞌ ja̱a̱nꞌ.
49 I̱i̱n nda̱a̱ꞌ nde̱iꞌ kaa̱ꞌ kuní a̱ sa̱xinu̱ ndoꞌó,
te̱ Israel,
te̱ sa̱kanꞌ tu̱ te̱ tukuꞌ,
te̱ ndieeꞌ te̱i̱n ndo̱ꞌ ―ni̱ katyi̱ a̱ xiinꞌ ra̱.
50 Sa̱kanꞌ te̱ ni̱ xa̱a̱ sa̱kuuꞌ ni̱a̱ sa̱a̱ niiꞌ ni̱ kaꞌa̱n tyuunꞌ Yahvé xiinꞌ Moisés xiinꞌ Aarón,
te̱ ni̱ sa̱yaꞌá ra̱ a̱ nuu̱ꞌ ni̱a̱.
51 Te̱ sa̱va̱ ni̱ kivi̱ꞌ ja̱a̱nꞌ ni̱ ta̱va̱ꞌ Yahvé sa̱kuuꞌ ne̱ Israel nuu̱ꞌ ñu̱ꞌuꞌ Egipto ja̱a̱nꞌ,
te̱ xa̱ ti̱ꞌvi̱,
xa̱ ti̱ꞌvi̱ yoo ni̱a̱ ni̱ ki̱e̱e̱ ni̱a̱ ni̱ xa̱a̱ a̱.