So̱ꞌo̱ ni̱ xa̱a̱ a̱ kii̱ꞌ ni̱ ka̱ni̱ Ndiosí ne̱ ndieeꞌ nuu̱ꞌ ñu̱ꞌuꞌ Egipto ña̱ ni̱ xa̱ꞌni̱ꞌ a̱ sa̱kuuꞌ siꞌe̱ nu̱uꞌ ni̱a̱ xiinꞌ siꞌe̱ nu̱uꞌ sa̱kuuꞌ ki̱tiꞌ sana̱ ni̱a̱
11
Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Ndee i̱i̱n nda̱a̱ꞌ ka̱ kuiꞌe̱ ti̱ꞌviꞌ i̱ ku̱ndo̱ꞌo̱ Faraón xiinꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto,
te̱ kii̱ꞌ ndi̱ꞌi̱ xkaꞌndi̱a̱ ña̱ ja̱a̱nꞌ ndii,
süu̱ꞌ ta̱xi̱ ku̱i̱ti̱ꞌ ra̱ kuꞌu̱n ndo̱ꞌ,
süu̱ꞌ ja̱a̱nꞌ ndii,
mi̱iꞌ ra̱ ta̱va̱ꞌ ndi̱e̱eꞌ ndoꞌó nuu̱ꞌ ñu̱ꞌuꞌ ra̱ te̱ kuꞌu̱n xa̱tyiꞌ ndo̱ꞌ.
2 Sa̱kanꞌ na kuiiꞌ vi̱ti̱n ndii,
kaꞌa̱n xiinꞌ sa̱kuuꞌ ne̱ Israel,
tiaa̱ xiinꞌ ña̱ꞌaꞌ,
ña̱ na kaka̱n ni̱a̱ nuu̱ꞌ ne̱ ndieeꞌ ya̱ti̱n vi̱ꞌe̱ ni̱a̱ ña̱ꞌa̱ ña̱ ni̱ ku̱a̱ꞌa̱ xiinꞌ oro,
xiinꞌ ña̱ ni̱ ku̱a̱ꞌa̱ xiinꞌ plata ―ni̱ katyi̱ a̱.
3 Te̱ mi̱iꞌ Yahvé ni̱ xa̱a̱ sa̱kanꞌ xiinꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ,
te̱ va̱ꞌa̱ kuni ni̱a̱ ni̱ xi̱ni̱ ni̱a̱ ne̱ Israel,
te̱ sa̱kanꞌ tu̱ Moisés ndii,
ni̱ ki̱ꞌi̱n kaꞌnuꞌ va̱ ña̱ꞌaꞌ ne̱ xatyuunꞌ nuu̱ꞌ Faraón,
te̱ ni̱ ki̱ꞌi̱n kaꞌnuꞌ tu̱ ña̱ꞌaꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ.
4 Sa̱kanꞌ ña̱ xa̱ ni̱ kaꞌa̱n Moisés xiinꞌ Faraón ndii:
―Ña̱ yo̱ꞌo̱ꞌ kaꞌán Yahvé:
“Nañu̱u nunuꞌ xkaꞌndi̱a̱ i̱ ka̱niiꞌ nuu̱ꞌ ñu̱ꞌuꞌ Egipto,
5 te̱ ku̱vi̱ ndo̱o̱ siꞌe̱ nu̱uꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto,
ku̱vi̱ nde̱e̱ siꞌe̱ nu̱uꞌ Faraón,
te̱ xinduꞌu̱ꞌ nuu̱ꞌ tei̱ kaꞌnuꞌ xiinꞌ ra̱,
xiinꞌ nde̱e̱ siꞌe̱ nu̱uꞌ ña̱ꞌaꞌ ñaꞌ xikaꞌ nuuꞌ,
ñaꞌ ndikoꞌ xiinꞌ molino,
xiinꞌ siꞌe̱ nu̱uꞌ sa̱kuuꞌ ki̱tiꞌ sana̱ ndo̱ꞌ.
6 Te̱ ka̱niiꞌ nuu̱ꞌ ñu̱ꞌuꞌ Egipto ku̱a̱aꞌ ne̱ yivi̱ꞌ ku̱a̱ku̱ ni̱a̱ xaꞌa̱ꞌ a̱ ña̱ sutyiꞌ i̱ni̱ ni̱a̱ ña̱ ni̱ xiꞌi̱ siꞌe̱ ni̱a̱,
te̱ köo̱ꞌ kivi̱ꞌ ni̱ xa̱ku̱ ne̱ yivi̱ꞌ nde̱e̱ naa sa̱kanꞌ,
ni̱ nde̱e̱ köo̱ꞌ ku̱a̱ku̱ ka̱ tu̱ sa̱kanꞌ ñu̱u̱ ja̱a̱nꞌ.
7 Ndisu̱ ne̱ Israel ndii,
te̱ köo̱ꞌ a̱ ku̱ndo̱ꞌo̱ xa̱tyiꞌ ne̱ ja̱a̱nꞌ,
te̱ köo̱ꞌ a̱ ku̱ndo̱ꞌo̱ tu̱ nde̱e̱ i̱i̱n ki̱tiꞌ sana̱ ni̱a̱,
ni̱ nde̱e̱ i̱i̱n naya̱ꞌ ndëꞌi̱ xakuꞌ riꞌ miiꞌ ndieeꞌ ne̱ ja̱a̱nꞌ.
Sa̱kanꞌ te̱ ku̱nda̱ni̱ ndo̱ꞌ sa̱a̱ kuuꞌ Yahvé xiinꞌ ne̱ ndieeꞌ nuu̱ꞌ ñu̱ꞌuꞌ Egipto,
te̱ ku̱nda̱ni̱ tu̱ ndo̱ꞌ sa̱a̱ kuuꞌ a̱ xiinꞌ ne̱ Israel.
8 Sa̱kanꞌ te̱ ki̱xi̱n sa̱kuuꞌ te̱ xatyuunꞌ nuu̱ꞌ u̱nꞌ miiꞌ nduꞌu̱ꞌ i̱,
te̱ ku̱i̱ta̱ xitiꞌ ra̱ nuu̱ꞌ i̱ te̱ kaꞌa̱n ra̱ xiinꞌ i̱ ndii:
‘Na̱ka̱ kiꞌi̱ꞌ sa̱kuuꞌ ne̱ ndikún xata̱ꞌ u̱nꞌ te̱ kuꞌu̱n ndo̱ꞌ’,
katyi̱ te̱ ja̱a̱nꞌ xiinꞌ i̱.
Nde̱e̱ ska̱tyiꞌ xkaꞌndi̱a̱ sa̱kuuꞌ ña̱ ja̱a̱nꞌ te̱ kuꞌu̱n ndu̱” ―ni̱ katyi̱ Moisés.
Te̱ xiꞌé xa̱va̱ꞌa̱ Moisés ni̱ ke̱ta̱ ra̱ nuu̱ꞌ Faraón ja̱a̱nꞌ kuaꞌa̱n ra̱.
9 Sa̱kanꞌ ña̱ xa̱ ni̱ kaꞌa̱n Yahvé xiinꞌ Moisés ndii:
―Kü̱ni̱ so̱ꞌo̱ xa̱tyiꞌ Faraón ña̱ ni̱ kaꞌa̱n u̱nꞌ xiinꞌ ra̱ ja̱a̱nꞌ,
sa̱kanꞌ te̱ ku̱vi̱ sa̱a̱ ka̱ i̱ tyu̱u̱n kaꞌnuꞌ kooꞌ tyukuuꞌ nuu̱ꞌ ñu̱ꞌuꞌ Egipto yoꞌoꞌ ―ni̱ katyi̱ a̱.
10 Sa̱kanꞌ ña̱ xa̱ ni̱ xa̱a̱ Moisés xiinꞌ Aarón kiꞌinꞌ tyu̱u̱n kaꞌnuꞌ ja̱a̱nꞌ nuu̱ꞌ Faraón,
ndisu̱ xaꞌa̱ꞌ a̱ ña̱ mi̱iꞌ Yahvé ni̱ xa̱xi̱i̱ nimá ra̱ ndii,
̱ nï̱ ta̱xi̱ te̱ nï̱ taxiꞌ ra̱ ki̱e̱e̱ ne̱ Israel ja̱a̱nꞌ nuu̱ꞌ ñu̱ꞌuꞌ ra̱.