So̱ꞌo̱ ni̱ xa̱a̱ a̱ kii̱ꞌ ni̱ sa̱na̱kuiníá Ndiosí ti̱ka̱
10
Te̱ ni̱ kaꞌa̱n Yahvé xiinꞌ Moisés ndii:
―Kuaꞌan miiꞌ nduꞌu̱ꞌ Faraón,
sa̱kanꞌ ña̱ yuꞌu̱ ni̱ xa̱xi̱i̱ nimá ra̱,
te̱ sa̱kanꞌ tu̱ nimá te̱ xatyuunꞌ nuu̱ꞌ ra̱,
te̱ niaꞌa̱ ña̱ꞌaꞌ i̱ tyu̱u̱n kaꞌnuꞌ ña̱ ku̱vi̱ sa̱a̱ i̱.
2 Ni̱ xa̱a̱ tu̱ i̱ sa̱kanꞌ te̱ nda̱tuꞌunꞌ ndoꞌó a̱ nuu̱ꞌ siꞌe̱ ndo̱ꞌ xiinꞌ nuu̱ꞌ ne̱ si̱a̱niꞌ xikaꞌ ndo̱ꞌ xaꞌa̱ꞌ sa̱a̱ ni̱ ku̱ndi̱ꞌi̱ i̱ xiinꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto xiinꞌ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ i̱ te̱i̱n ni̱a̱.
Sa̱kanꞌ te̱ ku̱nda̱ni̱ ndo̱ꞌ ña̱ yuꞌu̱ nduuꞌ Yahvé ―ni̱ katyi̱ a̱.
3 Sa̱kanꞌ te̱ ni̱ xaꞌa̱n Moisés xiinꞌ Aarón miiꞌ nduꞌu̱ꞌ Faraón,
te̱ ni̱ kaꞌa̱n ra̱ xiinꞌ ra̱ ndii:
―Ña̱ yo̱ꞌo̱ꞌ kaꞌán Yahvé,
Ndiosí,
ña̱ xakaꞌnuꞌ nduꞌu̱,
ne̱ hebreo:
“¿A̱ma̱ vi̱ꞌ na̱ku̱i̱i̱n yu̱ꞌuꞌ u̱nꞌ ña̱ sa̱xinu̱ u̱nꞌ ña̱ kaꞌán i̱?
Ta̱xi̱ kiꞌi̱ꞌ na kuꞌu̱n ne̱ nduuꞌ kuenta i̱ te̱ sa̱kaꞌnuꞌ ni̱a̱ yuꞌu̱.
4 Te̱ naaꞌ kusaaꞌ nakasi u̱nꞌ ne̱ nduuꞌ kuenta i̱,
te̱ tä̱xi̱ u̱nꞌ kuꞌu̱n ni̱a̱ ndii,
tiaa̱n ti̱ꞌviꞌ i̱ ti̱ka̱ xaa̱ riꞌ nuu̱ꞌ ñu̱ꞌuꞌ u̱nꞌ.
5 Kuaꞌa̱ꞌ xa̱va̱ꞌa̱ riꞌ ti̱ꞌviꞌ i̱ nde̱e̱ nda̱si̱ riꞌ ka̱niiꞌ nuu̱ꞌ ñu̱ꞌuꞌ,
te̱ ka̱xi̱ꞌ ndooꞌ riꞌ sa̱kuuꞌ ña̱ siee ña̱ ni̱ ndoo̱ na ni̱ xa̱a̱ iꞌinꞌ,
te̱ ka̱xi̱ꞌ tu̱ riꞌ i̱tunꞌ ta̱ta̱.
6 Ko̱ꞌni̱ riꞌ vi̱ꞌe̱ u̱nꞌ nde̱e̱ ku̱tuꞌ a̱,
xiinꞌ vi̱ꞌe̱ sa̱kuuꞌ ne̱ xatyuunꞌ nuu̱ꞌ u̱nꞌ,
xiinꞌ vi̱ꞌe̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto.
Yu̱vaꞌ u̱nꞌ xiinꞌ xii̱ꞌ u̱nꞌ ndii,
köo̱ꞌ kivi̱ꞌ ni̱ xi̱ni̱ ni̱a̱ naa ña̱ ja̱a̱nꞌ sa̱kuuꞌ kivi̱ꞌ ña̱ ni̱ xika̱ ni̱a̱ i̱i̱n yivi̱ꞌ te̱ nde̱e̱ vi̱ti̱n”,
katyi a̱ ―ni̱ katyi̱ ra̱.
Te̱ kii̱ꞌ ndi̱ꞌi̱ ni̱ kaꞌa̱n Moisés ña̱ ja̱a̱nꞌ ndii,
ni̱ ndi̱ko̱ kuiín ra̱,
te̱ ni̱ ke̱ta̱ ra̱ vi̱ꞌe̱ Faraón ja̱a̱nꞌ kuaꞌa̱n ra̱.
7 Sa̱kanꞌ te̱ ni̱ kaꞌa̱n te̱ xatyuunꞌ nuu̱ꞌ Faraón ja̱a̱nꞌ xiinꞌ ra̱ ndii:
―¿A̱ma̱ vi̱ꞌ kuꞌu̱n ndi̱koꞌ te̱ yivi̱ꞌ kaa̱ꞌ ña̱ nduuꞌ ra̱ tu̱nkuiꞌe̱ nuu̱ꞌ e̱ꞌ?
Va̱ꞌa̱ ka̱ ta̱xi̱ u̱nꞌ na kuꞌu̱n ne̱ yivi̱ꞌ ja̱a̱nꞌ te̱ sa̱kaꞌnuꞌ ni̱a̱ Yahvé,
Ndiosí ni̱a̱.
¿Ñáá xäaꞌ u̱nꞌ kuenta ña̱ xa̱ ndiꞌiꞌ ndooꞌ nuu̱ꞌ ñu̱ꞌuꞌ Egipto nduxín?
―ni̱ katyi̱ ra̱.
8 Sa̱kanꞌ te̱ ni̱ ka̱na̱ tu̱ku̱u̱ Faraón Moisés xiinꞌ Aarón te̱ ni̱ kaꞌa̱n ra̱ xiinꞌ ra̱ ndii:
―Kuaꞌan ndo̱ꞌ te̱ sa̱kaꞌnuꞌ ndo̱ꞌ Yahvé Ndiosí ndo̱ꞌ.
Ndisu̱ ña̱ kuní ka̱ kuꞌu̱n ndo̱ꞌ ndii,
kuní i̱ kaꞌa̱n ndo̱ꞌ xiinꞌ i̱ ¿Yo̱o̱ nduuꞌ ndoꞌó ne̱ kuꞌu̱n?
―ni̱ katyi̱ ra̱.
9 Te̱ ni̱ kaꞌa̱n Moisés xiinꞌ ra̱ ndii:
―Sa̱kuuꞌ ndu̱ kuꞌu̱n,
ne̱ sa̱va̱,
xiinꞌ ne̱ xi̱xa̱ va̱,
tiaa̱ siꞌe̱ ndu̱,
xiinꞌ ña̱ꞌaꞌ siꞌe̱ ndu̱,
si̱ndiki̱ꞌ sana̱ ndu̱,
xiinꞌ mbe̱e̱ sana̱ ndu̱,
sa̱kanꞌ ña̱ vi̱koꞌ kaꞌnuꞌ va̱ nduuꞌ ña̱ ja̱a̱nꞌ xaꞌa̱ꞌ Yahvé nuu̱ꞌ ndu̱ ―ni̱ katyi̱ ra̱.
10 Sa̱kanꞌ te̱ ni̱ kaꞌa̱n Faraón xiinꞌ ra̱ ndii:
―Tee̱ꞌ ndee mi̱iꞌ Yahvé kuꞌu̱n xiinꞌ ndo̱ꞌ i̱kanꞌ ndii,
kä̱ni̱ni̱ ndo̱ꞌ na ta̱xi̱ yuꞌu̱ kuꞌu̱n ndo̱ꞌ i̱kanꞌ xiinꞌ sa̱kuuꞌ siꞌe̱ ndo̱ꞌ.
Tuviꞌ ndooꞌ ña̱ ne̱ xini xaꞌanꞌ nduuꞌ ndo̱ꞌ.
11 Kuäsa̱ꞌ xa̱tyiꞌ sa̱kanꞌ ra̱nꞌ,
kuaꞌan ndoꞌó,
te̱ yivi̱ꞌ,
te̱ xi̱xa̱ ku̱i̱ti̱ꞌ,
te̱ sa̱kaꞌnuꞌ ndo̱ꞌ Yahvé naaꞌ ña̱ ja̱a̱nꞌ nduuꞌ ña̱ xikán ndo̱ꞌ ―ni̱ katyi̱ ra̱.
Ndi̱ꞌi̱ ja̱a̱nꞌ te̱ ni̱ ta̱va̱ꞌ ña̱ꞌaꞌ te̱ yivi̱ꞌ nuu̱ꞌ Faraón.
12 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Sa̱na̱kaá nda̱ꞌaꞌ u̱nꞌ ka̱niiꞌ nuu̱ꞌ ñu̱ꞌuꞌ Egipto,
te̱ ki̱xi̱n ti̱ka̱,
te̱ nda̱si̱ riꞌ ka̱niiꞌ nuu̱ꞌ ñu̱ꞌuꞌ Egipto,
te̱ ka̱xi̱ꞌ riꞌ sa̱kuuꞌ ña̱ ni̱ ndoo̱ na kii̱ꞌ ni̱ xkaꞌndi̱a̱ iꞌinꞌ ―ni̱ katyi̱ a̱.
13 Sa̱kanꞌ te̱ ni̱ sa̱na̱kaá Moisés nda̱ꞌaꞌ ra̱ xiinꞌ ka̱roti ra̱ nuu̱ꞌ ñu̱ꞌuꞌ Egipto ja̱a̱nꞌ,
i̱kanꞌ te̱ ni̱ sa̱kakaꞌ Yahvé tatyi̱ꞌ ña̱ ku̱a̱xi̱ miiꞌ ketaꞌ ñu̱ꞌu̱ ndu̱viꞌ xiinꞌ niiꞌ ñu̱u kivi̱ꞌ ja̱a̱nꞌ,
te̱ kii̱ꞌ xa̱ kitúꞌ tu̱ku̱ kivi̱ꞌ ndii,
ni̱ nde̱ku̱i̱e̱e̱ kuaꞌa̱ꞌ ti̱ka̱ nuu̱ꞌ ñu̱ꞌuꞌ ja̱a̱nꞌ ni̱ xa̱a̱ tatyi̱ꞌ ja̱a̱nꞌ.
14 Te̱ ni̱ ko̱ꞌni̱ riꞌ ka̱niiꞌ nuu̱ꞌ ñu̱ꞌuꞌ Egipto,
te̱ ña̱ ja̱a̱nꞌ nduuꞌ i̱tyiꞌ nu̱uꞌ ña̱ ni̱ yoo̱ kuaꞌa̱ꞌ xa̱va̱ꞌa̱ ti̱ka̱ nuu̱ꞌ ñu̱ꞌuꞌ ja̱a̱nꞌ,
te̱ köo̱ꞌ kivi̱ꞌ ni̱ yoo̱ kuaꞌa̱ꞌ riꞌ ni̱ nde̱e̱ köo̱ꞌ ka̱ tu̱ riꞌ ko̱o̱ i̱kanꞌ nde̱e̱ naa ni̱ yoo̱ riꞌ kivi̱ꞌ ja̱a̱nꞌ.
15 Sa̱kanꞌ ña̱ kuaꞌa̱ꞌ xa̱va̱ꞌa̱ riꞌ ni̱ yoo̱ nde̱e̱ ni̱ nda̱si̱ riꞌ nuu̱ꞌ ñu̱ꞌu̱,
te̱ ni̱ ku̱u̱ i̱i̱n yaví nuu̱ꞌ ñu̱ꞌuꞌ ja̱a̱nꞌ ni̱ xa̱a̱ riꞌ,
te̱ ni̱ xa̱xi̱ꞌ riꞌ sa̱kuuꞌ ña̱ ni̱ tyi̱ꞌi̱ ne̱ yivi̱ꞌ xiinꞌ sa̱kuuꞌ nduu̱ꞌ ña̱ kuunꞌ nda̱ꞌaꞌ i̱tunꞌ,
tunꞌ ni̱ ndoo̱ ni̱ xa̱a̱ iꞌinꞌ.
Nde̱e̱ i̱i̱n yuku̱ kuii̱ꞌ nï̱ ndoo̱ ka̱ nda̱ꞌaꞌ nde̱e̱ i̱i̱n i̱tunꞌ,
ni̱ nde̱e̱ nda̱ꞌaꞌ kuꞌu̱ ña̱ yoo ka̱niiꞌ nuu̱ꞌ ñu̱ꞌuꞌ Egipto ja̱a̱nꞌ
16 Sa̱kanꞌ te̱ numi̱ꞌ va̱ ni̱ ka̱na̱ Faraón Moisés xiinꞌ Aarón,
te̱ ni̱ kaꞌa̱n ra̱ xiinꞌ ra̱ ndii:
―Ni̱ xa̱a̱ i̱ ku̱a̱tyi̱ nuu̱ꞌ Yahvé Ndiosí ndo̱ꞌ xiinꞌ nuu̱ꞌ ndoꞌó.
17 Xaꞌa̱ꞌ a̱ ja̱a̱nꞌ na kaꞌán ndaꞌvi i̱ xiinꞌ ndo̱ꞌ ña̱ ko̱o̱ kaꞌnuꞌ i̱ni̱ ndo̱ꞌ xaꞌa̱ꞌ i̱ ndee vi̱ti̱n ku̱i̱ti̱ꞌ,
te̱ kaꞌa̱n ndo̱ꞌ xiinꞌ Yahvé Ndiosí ndo̱ꞌ na ta̱va̱ꞌ a̱ kuiꞌe̱ xatu̱ kaa̱ꞌ nuu̱ꞌ ñu̱ꞌuꞌ i̱ ―ni̱ katyi̱ ra̱.
18 Ni̱ ke̱ta̱ so̱ꞌo̱ Moisés nuu̱ꞌ Faraón,
te̱ ni̱ kaꞌa̱n ra̱ xiinꞌ Yahvé xaꞌa̱ꞌ te̱ ja̱a̱nꞌ.
19 Sa̱kanꞌ te̱ ni̱ na̱ma̱ Yahvé miiꞌ kuaꞌa̱n tatyi̱ꞌ ja̱a̱nꞌ,
te̱ ni̱ ti̱ꞌviꞌ a̱ tatyi̱ꞌ ña̱ ku̱a̱xi̱ miiꞌ ketá ñu̱ꞌu̱,
te̱ ni̱ na̱ka̱ya̱ ndo̱o̱ a̱ ti̱ka̱ ja̱a̱nꞌ,
te̱ ni̱ ko̱ꞌni̱ ña̱ꞌaꞌ a̱ mi̱ni̱ kuaꞌa tyiee̱,
te̱ i̱kanꞌ ni̱ xiꞌi̱ ndo̱o̱ riꞌ,
te̱ nde̱e̱ i̱i̱n nda̱a̱ꞌ riꞌ nï̱ ndoo̱ ka̱ i̱i̱n ka̱niiꞌ nuu̱ꞌ ñu̱ꞌuꞌ Egipto ja̱a̱nꞌ.
20 Ndisu̱ ni̱ sa̱xi̱i̱ Yahvé nimá Faraón,
te̱ nï̱ ta̱xi̱ ra̱ kuꞌu̱n ne̱ Israel.
So̱ꞌo̱ ni̱ xa̱a̱ a̱ kii̱ꞌ ni̱ sa̱ku̱u̱ i̱i̱nyaví Ndiosí nuu̱ꞌ ñu̱ꞌuꞌ Egipto, te̱ ni̱ ka̱ni̱ a̱ sa̱kuuꞌ ne̱ ndieeꞌ i̱kanꞌ
21 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Sa̱na̱kaá nda̱ꞌaꞌ u̱nꞌ ndi̱viꞌ,
sa̱kanꞌ te̱ ku̱u̱ i̱i̱nyaví ndiaaꞌ ti̱kei̱ vi̱ꞌ ka̱niiꞌ nuu̱ꞌ ñu̱ꞌuꞌ Egipto nde̱e̱ ku̱vi̱ ti̱i̱n xa̱tyiꞌ vi̱ꞌ e̱ꞌ ña̱ ja̱a̱nꞌ ―ni̱ katyi̱ a̱.
22 Sa̱kanꞌ te̱ ni̱ sa̱na̱kaá Moisés nda̱ꞌaꞌ ra̱ ndi̱viꞌ,
te̱ ni̱ ku̱u̱ i̱i̱nyaví ndiaaꞌ ti̱kei̱ vi̱ꞌ ka̱niiꞌ nuu̱ꞌ ñu̱ꞌuꞌ Egipto niiꞌ uni̱ taꞌan kivi̱ꞌ.
23 Nde̱e̱ i̱i̱n ne̱ yivi̱ꞌ nï̱ ku̱vi̱ ku̱ni̱ taꞌanꞌ ni̱a̱ uni̱ sa̱aꞌ kivi̱ꞌ ja̱a̱nꞌ,
te̱ nde̱e̱ nï̱ ku̱vi̱ tu̱ kuꞌu̱n ni̱a̱ nde̱e̱ i̱i̱n xaanꞌ.
Ndisu̱ sa̱kuuꞌ vi̱ꞌe̱ miiꞌ ndieeꞌ ne̱ Israel ndii,
ni̱ yoo̱ ñuꞌu̱ tuún nuu̱ꞌ ne̱ ja̱a̱nꞌ.
24 Sa̱kanꞌ te̱ ni̱ ka̱na̱ Faraón Moisés,
te̱ ni̱ kaꞌa̱n ra̱ xiinꞌ ra̱ ndii:
―Kuaꞌan ndo̱ꞌ te̱ sa̱kaꞌnuꞌ ndo̱ꞌ Yahvé,
Ndiosí ndo̱ꞌ,
te̱ na kuꞌu̱n tu̱ siꞌe̱ ndo̱ꞌ xiinꞌ ndo̱ꞌ,
ndisu̱ na ndoo̱ mbe̱e̱ sana̱ ndo̱ꞌ xiinꞌ vaca sana̱ ndo̱ꞌ ―ni̱ katyi̱ ra̱.
25 Sa̱kanꞌ te̱ ni̱ kaꞌa̱n Moisés xiinꞌ ra̱ ndii:
―Kuní a̱ ña̱ ta̱xi̱ tu̱ yoꞌó ki̱tiꞌ sana̱ u̱nꞌ kuꞌu̱n xiinꞌ ndu̱,
te̱ na̱soko̱ꞌ ndu̱ riꞌ nuu̱ꞌ Yahvé Ndiosí ndu̱,
te̱ ka̱ꞌmi̱ ndu̱ riꞌ.
26 Te̱ siinꞌ tukuꞌ ndii,
kuꞌu̱n sa̱kuuꞌ ki̱tiꞌ sana̱ ndu̱ xiinꞌ ndu̱,
te̱ nde̱e̱ i̱i̱n riꞌ ndöo̱,
sa̱kanꞌ ña̱ kuní a̱ na̱ka̱xi̱n ndu̱ sa̱va̱ tiꞌ ja̱a̱nꞌ na̱soko̱ꞌ ndu̱ nuu̱ꞌ Yahvé,
Ndiosí ndu̱.
Te̱ xïní ndu̱ yo̱o̱ nduuꞌ a̱ kuni̱ nuu̱ꞌ ndu̱ na̱soko̱ꞌ ndu̱ nuu̱ꞌ Yahvé vi̱ti̱n nde̱e̱ ska̱tyiꞌ na̱xaa̱ ndu̱ ndi̱a̱kanꞌ vi̱ꞌ te̱ ku̱nda̱ni̱ va̱ꞌa̱ ndu̱ ndee ña̱ ndu̱kuꞌ a̱ nuu̱ꞌ ndu̱ ―ni̱ katyi̱ ra̱.
27 Ndisu̱ ni̱ sa̱xi̱i̱ Yahvé nimá Faraón,
te̱ nï̱ ta̱xi̱ ra̱ kuꞌu̱n ni̱a̱.
28 Te̱ ni̱ kaꞌa̱n tu̱ ra̱ xiinꞌ Moisés ndii:
―Kuaꞌan ke̱ta̱ nuu̱ꞌ i̱ yoꞌoꞌ,
te̱ nä̱ndi̱koꞌ ka̱ u̱nꞌ,
sa̱kanꞌ ña̱ naaꞌ ki̱xi̱n ka̱ u̱nꞌ ndii,
ka̱ꞌni̱ꞌ i̱ yoꞌó ―ni̱ katyi̱ ra̱.
29 Te̱ ni̱ na̱ku̱i̱i̱n Moisés ndii:
―Va̱ꞌa̱ tu̱ sa̱kanꞌ,
köo̱ꞌ kivi̱ꞌ ki̱xi̱n ko̱to̱ꞌni̱ ka̱ i̱ nuu̱ꞌ u̱nꞌ ―ni̱ katyi̱ ra̱.