So̱ꞌo̱ ni̱ xa̱a̱ a̱ kii̱ꞌ ni̱ ti̱ꞌviꞌ Ndiosí kuiꞌe̱, te̱ ni̱ xa̱ꞌni̱ꞌ a̱ sa̱kuuꞌ ki̱tiꞌ sana̱ ne̱ ndieeꞌ nuu̱ꞌ ñu̱ꞌuꞌ Egipto
9
Sa̱kanꞌ te̱ ni̱ kaꞌa̱n tyuunꞌ Yahvé xiinꞌ Moisés ndii:
―Kuaꞌan miiꞌ nduꞌu̱ꞌ Faraón te̱ kaꞌa̱n u̱nꞌ xiinꞌ ra̱ ndii:
“Yahvé,
Ndiosí nduꞌu̱,
ne̱ vi̱ꞌe̱ hebreo,
kaꞌán ndii:
‘Ta̱xi̱ u̱nꞌ na kuꞌu̱n ne̱ nduuꞌ kuenta i̱ te̱ sa̱kaꞌnuꞌ ni̱a̱ yuꞌu̱.
2 Sa̱kanꞌ ña̱ naaꞌ tä̱xi̱ u̱nꞌ kuꞌu̱n ni̱a̱,
te̱ na̱ka̱si̱ ka̱ u̱nꞌ ni̱a̱ ndii,
3 sa̱koyó yuꞌu̱,
Yahvé,
kuiꞌe̱ xatu̱ xa̱va̱ꞌa̱ ku̱ndo̱ꞌo̱ sa̱kuuꞌ nuu̱ꞌ ki̱tiꞌ sana̱ u̱nꞌ,
naa kuuꞌ kuei,
xiinꞌ mburru,
xiinꞌ camello,
xiinꞌ vaca,
xiinꞌ mbe̱e̱,
te̱ ku̱vi̱ ndo̱o̱ riꞌ,
katyi a̱.
4 Ndisu̱ ki̱tiꞌ sana̱ ne̱ Israel ndii,
köo̱ꞌ a̱ ku̱ndo̱ꞌo̱ tiꞌ ja̱a̱nꞌ,
süu̱ꞌ ja̱a̱nꞌ ndii,
ki̱tiꞌ sana̱ ne̱ ndieeꞌ nuu̱ꞌ ñu̱ꞌuꞌ Egipto ku̱i̱ti̱ꞌ ku̱vi̱,
te̱ ki̱tiꞌ sana̱ ne̱ Israel ndii,
nde̱e̱ i̱i̱n nda̱a̱ꞌ riꞌ kü̱vi̱.
5 Te̱ siinꞌ tu̱ku̱ ndii,
xa̱ ni̱ tyi̱nduꞌu̱ꞌ Yahvé kivi̱ꞌ a̱ma̱ sa̱a̱ a̱ ña̱ ja̱a̱nꞌ,
kaꞌán a̱ ndii:
Tiaa̱n sa̱a̱ i̱ tyu̱u̱n ja̱a̱nꞌ,
katyi a̱’” ―katyi̱ u̱nꞌ xiinꞌ ra̱.
6 Te̱ kii̱ꞌ ni̱ kitu̱ꞌ tu̱ku̱ kivi̱ꞌ ndii,
ni̱ xa̱a̱ xna̱ꞌa̱ Yahvé ña̱ ja̱a̱nꞌ,
te̱ ni̱ xiꞌi̱ ndo̱o̱ ki̱tiꞌ sana̱ ne̱ ndieeꞌ nuu̱ꞌ ñu̱ꞌuꞌ Egipto,
ndisu̱ nde̱e̱ i̱i̱n nda̱a̱ꞌ ki̱tiꞌ sana̱ ne̱ Israel nï̱ xiꞌi̱.
7 Sa̱kanꞌ te̱ ni̱ ti̱ꞌviꞌ Faraón te̱ yivi̱ꞌ kuꞌu̱n ko̱to̱ ra̱ naaꞌ ni̱ xiꞌi̱ tu̱ ki̱tiꞌ sana̱ ne̱ Israel,
ndisu̱ ni̱ xi̱ni̱ ra̱ ña̱ nde̱e̱ i̱i̱n nda̱a̱ꞌ riꞌ nï̱ xiꞌi̱.
Nde̱e̱ sa̱a̱ ka̱ ni̱ ndii,
ni̱ xa̱xi̱i̱ naa ni̱ xa̱xi̱i̱ ra̱ nimá ra̱,
te̱ nï̱ ta̱xi̱ ra̱ kuꞌu̱n ne̱ Israel ja̱a̱nꞌ te̱ sa̱kaꞌnuꞌ ni̱a̱ Ndiosí.
So̱ꞌo̱ ni̱ xa̱a̱ a̱ kii̱ꞌ ni̱ ti̱ꞌviꞌ Ndiosí kuiꞌe̱ teꞌi, te̱ ni̱ ka̱ni̱ a̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto xiinꞌ ki̱tiꞌ sana̱ ni̱a̱
8 Sa̱kanꞌ te̱ ni̱ kaꞌa̱n Yahvé xiinꞌ Moisés xiinꞌ Aarón ndii:
―Ki̱ꞌi̱n ndo̱ꞌ yaa̱ꞌ nuꞌu̱ miiꞌ xixí ñuꞌu̱,
te̱ ka̱ti̱a̱ Moisés yaa̱ꞌ ja̱a̱nꞌ ndi̱viꞌ nuu̱ꞌ Faraón miiꞌ iinꞌ ra̱.
9 Te̱ kiku̱ yaa̱ꞌ nuꞌu̱ ja̱a̱nꞌ ka̱niiꞌ nuu̱ꞌ ñu̱ꞌuꞌ Egipto nde̱e̱ naa ya̱kaꞌ,
te̱ kii̱ꞌ koyo̱ a̱ i̱i̱nꞌ ne̱ yivi̱ꞌ ndii,
ka̱ni̱a̱ ndi̱ꞌi̱ teꞌi i̱i̱nꞌ sa̱kuuꞌ ni̱a̱ xiinꞌ sa̱kuuꞌ ki̱tiꞌ sana̱ ni̱a̱ ―ni̱ katyi̱ a̱.
10 Sa̱kanꞌ te̱ ni̱ ki̱ꞌi̱n Moisés xiinꞌ Aarón yaa̱ꞌ nuꞌu̱ i̱i̱n xaanꞌ miiꞌ xixí ñuꞌu̱,
te̱ ni̱ xaꞌa̱n ra̱ nuu̱ꞌ Faraón,
te̱ ni̱ xa̱ti̱a̱ Moisés yaa̱ꞌ ja̱a̱nꞌ ndi̱viꞌ,
te̱ ni̱ ka̱ni̱a̱ ndi̱ꞌi̱ teꞌi i̱i̱nꞌ sa̱kuuꞌ ne̱ yivi̱ꞌ xiinꞌ ki̱tiꞌ sana̱ ni̱a̱.
11 Te̱ sa̱kanꞌ tu̱ te̱ tu̱ꞌva̱ ndii,
nï̱ ku̱vi̱ ka̱ ka̱ti̱n taꞌanꞌ ra̱ xiinꞌ Moisés,
sa̱kanꞌ ña̱ ni̱ ka̱ni̱a̱ tu̱ ndi̱ꞌi̱ teꞌi ja̱a̱nꞌ i̱i̱nꞌ te̱ ja̱a̱nꞌ,
nde̱e̱ naa ni̱ ndo̱ꞌo̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ ña̱ tyituꞌ vi̱ꞌ i̱i̱nꞌ ni̱a̱ yoo ndi̱ꞌi̱ ja̱a̱nꞌ.
12 Ndisu̱ ni̱ xa̱xi̱i̱ tu̱ku̱u̱ Faraón nimá ra̱ ni̱ xa̱a̱ Yahvé,
te̱ nï̱ ta̱xi̱ so̱ꞌo̱ ra̱ ña̱ kaꞌán Moisés,
ni̱ nde̱e̱ ña̱ kaꞌán Aarón sa̱a̱ niiꞌ xa̱ ni̱ kaꞌa̱n Yahvé xiinꞌ Moisés sa̱aꞌ.
So̱ꞌo̱ ni̱ xa̱a̱ a̱ kii̱ꞌ ni̱ sa̱kuunꞌ Ndiosí iꞌinꞌ, te̱ ni̱ xa̱ꞌni̱ꞌ a̱ ne̱ ndieeꞌ nuu̱ꞌ ñu̱ꞌuꞌ Egipto xiinꞌ ki̱tiꞌ sana̱ ni̱a̱
13 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Ni̱a̱ꞌa̱ va̱ tiaa̱n ndo̱koo̱ u̱nꞌ,
te̱ kuꞌu̱n u̱nꞌ nuu̱ꞌ Faraón,
te̱ kaꞌa̱n u̱nꞌ xiinꞌ ra̱ ndii:
“So̱ꞌo̱ kaꞌán Yahvé,
Ndiosí,
nduꞌu̱ ne̱ hebreo,
ndii:
‘Ta̱xi̱ un na kuꞌu̱n ne̱ Israel te̱ sa̱kaꞌnuꞌ ni̱a̱ yuꞌu̱.
14 Sa̱kanꞌ ña̱ vi̱ti̱n naaꞌ tä̱xi̱ u̱nꞌ kuꞌu̱n ni̱a̱ ndii,
ti̱ꞌviꞌ i̱ sa̱kuuꞌ nuu̱ꞌ kuiꞌe̱ ku̱ndo̱ꞌo̱ u̱nꞌ,
xiinꞌ ne̱ xatyuunꞌ nuu̱ꞌ u̱nꞌ,
xiinꞌ sa̱kuuꞌ ne̱ ñu̱u̱ u̱nꞌ,
sa̱kanꞌ te̱ ku̱nda̱ni̱ u̱nꞌ ña̱ köo̱ꞌ ka̱ nde̱e̱ i̱i̱n Ndiosí nde̱e̱ naa yuꞌu̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
15 Sa̱kanꞌ ña̱ naaꞌ ni̱ kuní yuꞌu̱ ndii,
ni̱ ku̱vi̱ ti̱ꞌviꞌ i̱ i̱i̱n nuu̱ꞌ kuiꞌe̱ ña̱ ka̱ꞌni̱ꞌ yoꞌó xiinꞌ sa̱kuuꞌ ne̱ ñu̱u̱ u̱nꞌ sa̱aꞌ vi̱ꞌ te̱ vi̱ti̱n ndii,
köo̱ꞌ nde̱e̱ i̱i̱n ndo̱ꞌ tiaku ka̱.
16 Ndisu̱ ni̱ ta̱xi̱ i̱ tiaku u̱nꞌ te̱ niaꞌa̱ i̱ yoꞌó ña̱ ndi̱e̱eꞌ i̱,
te̱ ku̱ni̱ tu̱ ne̱ yivi̱ꞌ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ña̱ ndi̱e̱eꞌ i̱.
17 Ndisu̱ kusaaꞌ xatyié xiinꞌ miiꞌ ka̱ u̱nꞌ nuu̱ꞌ ne̱ nduuꞌ kuenta i̱,
te̱ tä̱xi̱ u̱nꞌ kuꞌu̱n ni̱a̱.
18 Xaꞌa̱ꞌ a̱ ja̱a̱nꞌ na kuiiꞌ tiaa̱n sa̱va̱ ni̱ naa hora vi̱ti̱n,
sa̱kuunꞌ i̱ iꞌinꞌ naꞌnuꞌ va̱ ña̱ köo̱ꞌ kivi̱ꞌ ni̱ ku̱u̱n nuu̱ꞌ ñu̱ꞌuꞌ Egipto yoꞌoꞌ nde̱e̱ kuuꞌ ni̱ xi̱ka̱nduꞌu̱ꞌ a̱,
te̱ nde̱e̱ vi̱ti̱n.
19 Sa̱kanꞌ na kuiiꞌ ti̱ꞌviꞌ kiꞌi̱ꞌ te̱ yivi̱ꞌ te̱ na̱ka̱ ra̱ sa̱kuuꞌ ki̱tiꞌ sana̱ u̱nꞌ,
tiꞌ ñuꞌuꞌ xaꞌa̱ꞌ kuꞌu̱,
te̱ ko̱ꞌni̱ ra̱ riꞌ ti̱xi̱n vi̱ꞌe̱,
te̱ sa̱kanꞌ tu̱ sa̱kuuꞌ ne̱ yivi̱ꞌ,
ne̱ ñuꞌuꞌ xaꞌa̱ꞌ kuꞌu̱ ndii,
na na̱ka̱ tu̱ ra̱ ne̱ ja̱a̱nꞌ te̱ na̱koo̱ va̱ꞌa̱ ni̱a̱ ti̱xi̱n vi̱ꞌe̱,
sa̱kanꞌ ña̱ kii̱ꞌ ku̱u̱n iꞌinꞌ ja̱a̱nꞌ ndii,
ka̱ꞌni̱ꞌ ndo̱o̱ a̱ sa̱kuuꞌ ne̱ yivi̱ꞌ uun ki̱tiꞌ naaꞌ ñuꞌuꞌ ni̱a̱,
uun ñuꞌuꞌ riꞌ xaꞌa̱ꞌ kuꞌu̱ kii̱ꞌ koyo̱ a̱,
katyi Yahvé’”,
katyi̱ u̱nꞌ xiinꞌ ra̱ ―ni̱ katyi̱ a̱.
20 Sa̱va̱ te̱ xikaꞌ nuuꞌ nuu̱ꞌ Faraón ndii,
ni̱ yi̱ꞌvi ra̱ ña̱ ni̱ kaꞌa̱n Yahvé xiinꞌ Faraón ja̱a̱nꞌ,
sa̱kanꞌ na ni̱ ko̱ꞌni̱ ra̱ te̱ xikaꞌ nuuꞌ nuu̱ꞌ ra̱ xiinꞌ ki̱tiꞌ sana̱ ra̱ ti̱xi̱n vi̱ꞌe̱ ra̱.
21 Ndisu̱ te̱ nï̱ ka̱ndi̱xaꞌ ña̱ ni̱ kaꞌa̱n Yahvé xiinꞌ Faraón ja̱a̱nꞌ ndii,
ni̱ na̱ko̱o̱ ra̱ te̱ xikaꞌ nuuꞌ nuu̱ꞌ ra̱ xiinꞌ ki̱tiꞌ sana̱ ra̱ xaꞌa̱ꞌ kuꞌu̱.
22 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Nda̱ni̱ꞌi̱ nda̱ꞌaꞌ u̱nꞌ ndi̱viꞌ,
te̱ koyo̱ iꞌinꞌ xíniꞌ ne̱ yivi̱ꞌ,
xiinꞌ xata̱ꞌ ki̱tiꞌ,
xiinꞌ nuu̱ꞌ kuꞌu̱ ña̱ yoo i̱i̱n ka̱niiꞌ nuu̱ꞌ ñu̱ꞌuꞌ Egipto ―ni̱ katyi̱ a̱.
23 Sa̱kanꞌ na ni̱ nda̱ni̱ꞌi̱ Moisés ka̱roti ra̱ ndi̱viꞌ,
te̱ ni̱ sa̱ndeꞌí Yahvé savi̱ꞌ,
te̱ ni̱ sa̱kuunꞌ tu̱ a̱ iꞌinꞌ,
te̱ ni̱ sa̱kayó tu̱ a̱ ñuꞌu̱ savi̱ꞌ nuu̱ꞌ ñu̱ꞌuꞌ Egipto.
Te̱ ni̱ sa̱kuunꞌ Yahvé iꞌinꞌ i̱i̱n ka̱niiꞌ nuu̱ꞌ ñu̱ꞌuꞌ Egipto ja̱a̱nꞌ.
24 Ni̱ ku̱u̱n te̱ ni̱ ku̱u̱n iꞌinꞌ naꞌnuꞌ va̱ ja̱a̱nꞌ,
te̱ saká tu̱ ñuꞌu̱ savi̱ꞌ xiinꞌ a̱.
Nde̱e̱ ña̱ kuuꞌ ni̱ xi̱ku̱ndiee̱ ne̱ yivi̱ꞌ nuu̱ꞌ ñu̱ꞌuꞌ Egipto ja̱a̱nꞌ ndii,
köo̱ꞌ kivi̱ꞌ ni̱ ku̱u̱n iꞌinꞌ nde̱e̱ naa ña̱ ja̱a̱nꞌ.
25 Te̱ ni̱ sa̱ndo̱ñuꞌuꞌ iꞌinꞌ ja̱a̱nꞌ sa̱kuuꞌ ña̱ yoo nuu̱ꞌ ñu̱ꞌuꞌ Egipto,
naa kuuꞌ ne̱ yivi̱ꞌ,
xiinꞌ ki̱tiꞌ,
xiinꞌ sa̱kuuꞌ ña̱ ni̱ tyi̱ꞌi̱ ne̱ yivi̱ꞌ xaꞌa̱ꞌ kuꞌu̱ ka̱xi̱ꞌ ni̱a̱,
te̱ ni̱ sa̱kuatyiꞌ a̱ nde̱e̱ nda̱ꞌaꞌ i̱tunꞌ naꞌnuꞌ,
tunꞌ itaꞌ nuu̱ꞌ ñu̱ꞌuꞌ Egipto.
26 Ndisu̱ nuu̱ꞌ ñu̱ꞌuꞌ Gosén miiꞌ ndieeꞌ ne̱ vi̱ꞌe̱ Israel ndii,
köo̱ꞌ nde̱e̱ i̱i̱n nda̱a̱ꞌ iꞌinꞌ ni̱ na̱ma̱ i̱kanꞌ.
27 Sa̱kanꞌ te̱ ni̱ ti̱ꞌviꞌ Faraón te̱ yivi̱ꞌ,
te̱ ni̱ ka̱na̱ ra̱ Moisés xiinꞌ Aarón,
te̱ ni̱ kaꞌa̱n ra̱ xiinꞌ ra̱ ndii:
―Vi̱ti̱n ndii,
yuꞌu̱ ni̱ xa̱a̱ ku̱a̱tyi̱,
sa̱kanꞌ ña̱ Yahvé ndii,
ña̱ xatyuunꞌ nda̱ku nduuꞌ ña̱ ja̱a̱nꞌ,
te̱ yuꞌu̱ xiinꞌ ne̱ ñu̱u̱ i̱ ndii,
ne̱ xaaꞌ ña̱ ni̱a̱ꞌa nduuꞌ ndu̱.
28 Kaꞌa̱n ndo̱ꞌ xiinꞌ Yahvé na sa̱i̱i̱n kuiín a̱ ña̱ ndeꞌí savi̱ꞌ kaa̱ꞌ xiinꞌ iꞌinꞌ,
te̱ ta̱xi̱ i̱ kuꞌu̱n ndo̱ꞌ,
te̱ nä̱ka̱si̱ ka̱ i̱ ndoꞌó ―ni̱ katyi̱ ra̱.
29 Te̱ ni̱ kaꞌa̱n Moisés xiinꞌ ra̱ ndii:
―Ke̱ta̱ so̱ꞌo̱ i̱ nuu̱ꞌ ñu̱u̱ yoꞌoꞌ,
te̱ ka̱ta̱ni̱ nda̱ꞌaꞌ i̱ nuu̱ꞌ Yahvé,
te̱ vi̱kuii̱n ña̱ ndeꞌí savi̱ꞌ kaa̱ꞌ,
te̱ kü̱u̱n ka̱ tu̱ iꞌinꞌ kaa̱ꞌ,
sa̱kanꞌ te̱ ku̱nda̱ni̱ u̱nꞌ ndii,
ña̱ꞌa̱ Yahvé nduuꞌ ñu̱ꞌuꞌ i̱i̱n yivi̱ꞌ.
30 Ndisu̱ xiní yuꞌu̱ ña̱ ni̱ nde̱e̱ yoꞌó,
te̱ ni̱ nde̱e̱ te̱ xatyuunꞌ nuu̱ꞌ u̱nꞌ ndii,
kusaaꞌ yïꞌvi ndo̱ꞌ Yahvé Ndiosí ―ni̱ katyi̱ ra̱.
31 Ni̱ ti̱viꞌ lino xiinꞌ cebada ña̱ ni̱ tyi̱ꞌi̱ ne̱ yivi̱ꞌ,
sa̱kanꞌ ña̱ cebada ndii,
sa̱va̱ ni̱ kivi̱ꞌ ña̱ tyityí a̱ nduuꞌ a̱ kii̱ꞌ sa̱kanꞌ,
te̱ lino ndii,
sa̱va̱ ni̱ kivi̱ꞌ ña̱ xaaꞌ i̱ta̱ a̱ nduuꞌ a̱.
32 Ndisu̱ ndi̱kinꞌ trigo xiinꞌ ndi̱kinꞌ centeno ndii,
köo̱ꞌ a̱ ni̱ ndoꞌoꞌ ña̱ ja̱a̱nꞌ,
sa̱kanꞌ ña̱ tiäꞌa̱an naku̱n a̱ kii̱ꞌ sa̱kanꞌ.
33 Te̱ ni̱ ke̱ta̱ so̱ꞌo̱ Moisés nuu̱ꞌ Faraón ja̱a̱nꞌ te̱ kuaꞌa̱n ra̱ nuu̱ꞌ ñu̱u̱ ja̱a̱nꞌ.
Te̱ kii̱ꞌ iinꞌ ra̱ nuu̱ꞌ ñu̱u̱ ja̱a̱nꞌ,
te̱ ni̱ ka̱ta̱ni̱ nda̱ꞌaꞌ ra̱ nuu̱ꞌ Yahvé,
te̱ ni̱ kaꞌa̱n ra̱ xiinꞌ a̱ ña̱ sa̱i̱i̱n kuiín a̱ iꞌinꞌ ja̱a̱nꞌ.
Te̱ xa̱kaꞌán e̱ꞌ,
te̱ ni̱ xi̱kuii̱n a̱,
te̱ ni̱ xi̱kuii̱n tu̱ ña̱ ndeꞌí savi̱ꞌ,
te̱ ni̱ xi̱kuii̱n tu̱ ña̱ kuunꞌ savi̱ꞌ nuu̱ꞌ ñu̱ꞌuꞌ ja̱a̱nꞌ.
34 Ndisu̱ kii̱ꞌ ni̱ xi̱ni̱ Faraón ña̱ ni̱ xi̱kuii̱n ña̱ kuunꞌ savi̱ꞌ xiinꞌ ña̱ kuunꞌ iꞌinꞌ,
te̱ köo̱ꞌ ka̱ tu̱ savi̱ꞌ ndeꞌí ndii,
ni̱ xa̱a̱ tu̱ku̱u̱ ra̱ ku̱a̱tyi̱ nuu̱ꞌ Ndiosí,
te̱ niiꞌ sa̱kanꞌ tu̱ ni̱ xa̱a̱ te̱ xatyuunꞌ nuu̱ꞌ ra̱.
35 Te̱ ni̱ xa̱xi̱i̱ ni̱ tu̱ku̱u̱ ra̱ nimá ra̱,
te̱ nï̱ ta̱xi̱ ra̱ kuꞌu̱n ne̱ Israel naa xa̱ ni̱ kaꞌa̱n ka̱ Yahvé xiinꞌ Moisés sa̱aꞌ.