7
Te̱ ni̱ kaꞌa̱n Yahvé xiinꞌ Moisés ndii:
―Tyu̱u̱n xaꞌaꞌ u̱nꞌ,
yoꞌó sa̱na̱nduuꞌ i̱ nde̱e̱ naa Ndiosí nuu̱ꞌ Faraón,
te̱ Aarón,
ña̱ni̱ u̱nꞌ,
ku̱ndu̱u̱ te̱ kaꞌa̱n tiakú xaꞌa̱ꞌ u̱nꞌ nuu̱ꞌ Faraón ja̱a̱nꞌ.
2 Ña̱ kande̱iꞌ sa̱a̱ yoꞌó ndii,
kaꞌa̱n u̱nꞌ xiinꞌ Aarón sa̱kuuꞌ ña̱ ni̱ kaꞌa̱n tyuunꞌ i̱ xiinꞌ u̱nꞌ,
te̱ te̱ ja̱a̱nꞌ kaꞌa̱n xiinꞌ Faraón ja̱a̱nꞌ te̱ ta̱xi̱ ra̱ ki̱e̱e̱ ne̱ vi̱ꞌe̱ Israel nuu̱ꞌ ñu̱ꞌuꞌ ra̱.
3 Ndisu̱ mi̱iꞌ yuꞌu̱ sa̱xi̱i̱ nimá Faraón ja̱a̱nꞌ,
te̱ sa̱a̱ tu̱ i̱ tyuunꞌ kaꞌnuꞌ xiinꞌ tyu̱u̱n ña̱ nandani̱ ne̱ yivi̱ꞌ nuu̱ꞌ ñu̱ꞌuꞌ Egipto.
4 Faraón ndii,
tä̱xi̱ so̱ꞌo̱ ra̱ ña̱ kaꞌa̱n ndo̱ꞌ xiinꞌ ra̱,
sa̱kanꞌ na kuiiꞌ sa̱ndoꞌoꞌ kuaꞌa̱ꞌ i̱ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ xiinꞌ ña̱ ndi̱e̱eꞌ i̱,
ndi̱ꞌi̱ ja̱a̱nꞌ te̱ ta̱va̱ꞌ i̱ ne̱ Israel,
ne̱ nduuꞌ nde̱e̱ naa te̱ xíinꞌ i̱,
nuu̱ꞌ ñu̱ꞌuꞌ Egipto ja̱a̱nꞌ,
te̱ ta̱va̱ꞌ i̱ ni̱a̱ xiinꞌ kuaꞌa̱ꞌ va̱ ña̱ sa̱ndoꞌoꞌ ña̱ꞌaꞌ i̱.
5 Te̱ kii̱ꞌ sa̱na̱kuiníá i̱ ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Egipto,
te̱ ta̱va̱ꞌ i̱ ne̱ Israel i̱kanꞌ ndii,
ku̱nda̱ni̱ ne̱ ndieeꞌ nuu̱ꞌ ñu̱ꞌuꞌ Egipto ja̱a̱n ña̱ yuꞌu̱ nduuꞌ Yahvé ―ni̱ katyi̱ a̱.
So̱ꞌo̱ ni̱ xa̱a̱ a̱ kii̱ꞌ ni̱ ni̱a̱ni̱a̱ yuku̱ nda̱ꞌaꞌ tunꞌ katuviꞌ Aarón
6 Xaꞌa̱ꞌ a̱ ja̱a̱nꞌ na ni̱ xa̱a̱ Moisés xiinꞌ Aarón sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱.
7 Moisés ndii,
ku̱miꞌ xi̱ko̱ kuiya̱ ni̱ ku̱miꞌ ra̱,
te̱ Aarón,
ña̱ni̱ ra̱ ndii,
ku̱miꞌ xi̱ko̱ uni̱ kuiya̱ ni̱ ku̱miꞌ ra̱ kii̱ꞌ ni̱ xaꞌa̱n kaꞌa̱n ra̱ xiinꞌ Faraón ña̱ ta̱xi̱ ra̱ ki̱e̱e̱ ne̱ Israel nuu̱ꞌ ñu̱ꞌuꞌ Egipto ja̱a̱nꞌ.
8 Sa̱kanꞌ te̱ ni̱ kaꞌa̱n Yahvé xiinꞌ Moisés xiinꞌ Aarón ndii:
9 ―Naaꞌ kaꞌa̱n Faraón xiinꞌ ndo̱ꞌ ña̱ sa̱a̱ ndo̱ꞌ i̱i̱n tyu̱u̱n kaꞌnuꞌ ndii,
kaꞌa̱n u̱nꞌ xiinꞌ Aarón ndii:
“Ki̱ꞌi̱n tunꞌ ka̱roti u̱nꞌ te̱ sa̱kanaꞌ u̱nꞌ nu̱ꞌ nuu̱ꞌ Faraón,
te̱ na̱ndu̱u̱ nu̱ꞌ koo̱ꞌ”,
katyi̱ u̱nꞌ xiinꞌ ra̱ ―ni̱ katyi̱ a̱.
10 Sa̱kanꞌ te̱ ni̱ xaꞌa̱n Moisés xiinꞌ Aarón miiꞌ nduꞌu̱ꞌ Faraón,
te̱ ni̱ kaꞌa̱n ra̱ xiinꞌ te̱ ja̱a̱nꞌ sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱.
Ni̱ ska̱naꞌ Aarón tunꞌ ka̱roti ra̱ nuu̱ꞌ Faraón xiinꞌ nuu̱ꞌ te̱ xikaꞌ nuuꞌ nuu̱ꞌ ra̱,
te̱ ni̱ na̱ndu̱u̱ nu̱ꞌ koo̱ꞌ.
11 Sa̱kanꞌ te̱ ni̱ ka̱na̱ tu̱ Faraón te̱ xini tuní xiinꞌ te̱ tu̱ꞌva̱,
te̱ ndieeꞌ nuu̱ꞌ ñu̱ꞌuꞌ Egipto,
te̱ ni̱ xa̱a̱ tu̱ te̱ ja̱a̱nꞌ sa̱kanꞌ xiinꞌ ña̱ tu̱ꞌva̱ ra̱.
12 Ni̱ xa̱ti̱a̱ i̱ꞌi̱n ra̱ ka̱roti ra̱,
te̱ ni̱ na̱ndu̱u̱ nu̱ꞌ koo̱ꞌ,
ndisu̱ ka̱roti Aarón ndii,
ni̱ ko̱koꞌ nu̱ꞌ ka̱roti te̱ tu̱ꞌva̱ ja̱a̱nꞌ.
13 Nde̱e̱ sa̱a̱ ka̱ ni̱ ndii,
ni̱ ku̱xi̱i̱ va̱ nimá Faraón,
te̱ nï̱ kuni̱ ra̱ ku̱ni̱ so̱ꞌo̱ ra̱ Moisés xiinꞌ Aarón sa̱a̱ niiꞌ xa̱ ni̱ kaꞌa̱n Yahvé sa̱aꞌ a̱.
So̱ꞌo̱ ni̱ xa̱a̱ a̱ kii̱ꞌ ni̱ sa̱na̱nduuꞌ Ndiosí ti̱kui níiꞌ, te̱ ni̱ ka̱ni̱ a̱ ne̱ ndieeꞌ nuu̱ꞌ ñu̱ꞌuꞌ Egipto
14 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Ni̱ ku̱xi̱i̱ va̱ nimá Faraón,
te̱ tä̱xi̱ ra̱ ki̱e̱e̱ ne̱ taꞌanꞌ ndo̱ꞌ Israel.
15 Sa̱kanꞌ na ni̱a̱ꞌa̱ tiaa̱n kuꞌu̱n u̱nꞌ miiꞌ nduꞌu̱ꞌ ra̱,
te̱ ndiatuꞌ ña̱ꞌaꞌ u̱nꞌ yu̱ꞌuꞌ i̱ti̱a̱ Nilo kii̱ꞌ kuꞌu̱n ra̱ i̱kanꞌ,
te̱ ko̱ni̱ꞌi̱ u̱nꞌ ka̱roti,
tunꞌ ni̱ na̱ndu̱u̱ koo̱ꞌ,
kuꞌu̱n u̱nꞌ.
16 Te̱ kaꞌa̱n u̱nꞌ xiinꞌ ra̱ ndii:
“Yahvé,
Ndiosí ña̱ xakaꞌnuꞌ ndu̱,
ne̱ vi̱ꞌe̱ Israel,
ni̱ ti̱ꞌviꞌ yuꞌu̱ ku̱a̱xi̱ i̱ miiꞌ nduꞌu̱ꞌ u̱nꞌ te̱ kaꞌa̱n i̱ xiinꞌ u̱nꞌ ndii:
‘Ta̱xi̱ u̱nꞌ na ki̱e̱e̱ ne̱ nduuꞌ kuenta i̱,
te̱ kuꞌu̱n ni̱a̱ miiꞌ i̱tyi kaaꞌ te̱ sa̱kaꞌnuꞌ ni̱a̱ yuꞌu̱.
Ndisu̱ yoꞌó,
nde̱e̱ vi̱ti̱n ndii,
küni ta̱xi̱ so̱ꞌo̱ u̱nꞌ ña̱ kaꞌán a̱ xiinꞌ u̱nꞌ,
katyi a̱’,
katyi̱ u̱nꞌ xiinꞌ ra̱.”
17 Sa̱kanꞌ na kuiiꞌ kaꞌán Yahvé ndii:
“Vi̱ti̱n ndii,
ku̱nda̱ni̱ u̱nꞌ ña̱ yuꞌu̱ nduuꞌ Yahvé.
Kii̱ꞌ ku̱tunꞌ yuꞌu̱ Moisés ti̱kui i̱ti̱a̱ Nilo xiinꞌ ka̱roti tunꞌ niꞌiꞌ i̱ yoꞌoꞌ,
te̱ ti̱kui ndii,
na̱ndu̱u̱ ra̱ níiꞌ.
18 Te̱ ku̱vi̱ ti̱a̱kaꞌ,
tiꞌ yoo i̱ti̱a̱ ja̱a̱nꞌ,
te̱ ku̱xaꞌa̱n xa̱va̱ꞌa̱ ti̱kui,
te̱ ku̱nda̱siꞌ ne̱ ndieeꞌ nuu̱ꞌ ñu̱ꞌuꞌ Egipto ko̱ꞌo̱ ni̱a̱ raꞌ,
katyi̱ u̱nꞌ xiinꞌ ra̱” ―ni̱ katyi̱ a̱ xiinꞌ Moisés.
19 Sa̱kanꞌ te̱ ni̱ kaꞌa̱n ka̱ Yahvé xiinꞌ Moisés ndii:
―Kaꞌa̱n xiinꞌ Aarón na na̱ꞌi̱ ra̱ ka̱roti ra̱,
te̱ sa̱na̱kaá ra̱ nda̱ꞌaꞌ ra̱ miiꞌ kuaꞌa̱n sa̱kuuꞌ i̱ti̱a̱,
xiinꞌ sa̱kuuꞌ yivi̱,
xiinꞌ sa̱kuuꞌ mi̱ni̱ kualiꞌ,
xiinꞌ sa̱kuuꞌ ti̱ko̱ꞌyoꞌ ña̱ yoo nuu̱ꞌ ñu̱ꞌuꞌ Egipto,
xiinꞌ sa̱kuuꞌ xaanꞌ miiꞌ yoo ti̱kui,
te̱ na̱ndu̱u̱ raꞌ níiꞌ.
Te̱ nde̱e̱ sa̱kuuꞌ ti̱kui,
teꞌ ñuꞌuꞌ ti̱xi̱n xi̱koꞌoꞌ,
xiinꞌ teꞌ ñuꞌuꞌ ti̱xi̱n yo̱o̱ ndii,
na̱ndu̱u̱ ndo̱o̱ tu̱ teꞌ ja̱a̱nꞌ níiꞌ ―ni̱ katyi̱ a̱.
20 Te̱ ni̱ sa̱xinu̱ Moisés xiinꞌ Aarón sa̱a̱ niiꞌ ni̱ kaꞌa̱n tyuunꞌ Yahvé xiinꞌ ra̱.
Sa̱kanꞌ te̱ ni̱ ndo̱ni̱ꞌi̱ Aarón ka̱roti ra̱,
te̱ ni̱ ku̱tunꞌ ra̱ ti̱kui i̱ti̱a̱ Nilo nuu̱ꞌ Faraón xiinꞌ nuu̱ꞌ sa̱kuuꞌ te̱ xatyuunꞌ nuu̱ꞌ ra̱ itaꞌ ra̱ i̱kanꞌ,
te̱ ni̱ na̱ndu̱u̱ sa̱kuuꞌ ti̱kui ja̱a̱nꞌ níiꞌ.
21 Te̱ ni̱ xiꞌi̱ ndo̱o̱ tu̱ ti̱a̱kaꞌ,
tiꞌ ñuꞌuꞌ i̱kanꞌ,
te̱ ni̱ ku̱xaꞌa̱n xa̱va̱ꞌa̱ i̱ti̱a̱.
Xaꞌa̱ꞌ a̱ ja̱a̱nꞌ na nï̱ ku̱vi̱ ka̱ ko̱ꞌo̱ ne̱ ndieeꞌ nuu̱ꞌ ñu̱ꞌuꞌ Egipto ti̱kui i̱kanꞌ,
sa̱kanꞌ ña̱ níiꞌ ndooꞌ ni̱ na̱ndu̱u̱ ti̱kui sa̱a̱ kuaꞌa̱n nuu̱ꞌ ñu̱ꞌuꞌ Egipto.
22 Te̱ sa̱kanꞌ tu̱ te̱ tu̱ꞌva̱,
te̱ ndieeꞌ nuu̱ꞌ ñu̱ꞌuꞌ Egipto ndii,
ni̱ nda̱sa̱nduuꞌ tu̱ te̱ ja̱a̱nꞌ ti̱kui níiꞌ xiinꞌ ña̱ tu̱ꞌva̱ ra̱.
Xaꞌa̱ꞌ a̱ ja̱a̱nꞌ naa ni̱ xa̱xi̱i̱ Faraón nimá ra̱,
te̱ nï̱ ta̱xi̱ so̱ꞌo̱ ra̱ ña̱ ni̱ kaꞌa̱n Moisés xiinꞌ ña̱ ni̱ kaꞌa̱n Aarón sa̱a̱ niiꞌ xa̱ ni̱ kaꞌa̱n Yahvé xiinꞌ Moisés sa̱aꞌ.
23 Sa̱kanꞌ te̱ ni̱ na̱ndi̱koꞌ Faraón kuaꞌa̱n nuꞌu̱ꞌ ra̱ vi̱ꞌe̱ ra̱,
te̱ nï̱ xaaꞌ tu̱ ra̱ kuenta kuuꞌ ña̱ kaa̱ꞌ.
24 Te̱ sa̱a̱ kuaꞌa̱n yu̱ꞌuꞌ i̱ti̱a̱ ni̱ xa̱ꞌa̱ ne̱ ndieeꞌ nuu̱ꞌ ñu̱ꞌuꞌ Egipto poso miiꞌ ta̱va̱ꞌ ni̱a̱ ti̱kui ko̱ꞌo̱ ni̱a̱,
sa̱kanꞌ ña̱ ti̱kui i̱ti̱a̱ Nilo ndii,
vä̱ꞌa̱ ka̱ raꞌ ko̱ꞌo̱ ni̱a̱.
25 Xa̱ ni̱ xinu̱ uxa̱ taꞌan kivi̱ꞌ ña̱ ni̱ nda̱sa̱nduuꞌ Yahvé ti̱kui ja̱a̱nꞌ níiꞌ.