6
Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
―Vi̱ti̱n ku̱ni̱ u̱nꞌ ña̱ sa̱a̱ i̱ xiinꞌ Faraón.
Sa̱kanꞌ ña̱ kii̱ꞌ ku̱ni̱ uꞌvi̱ ra̱ nuu̱ꞌ ña̱ sa̱ndoꞌoꞌ ña̱ꞌaꞌ i̱ ndii,
ta̱xi̱ ra̱ ki̱e̱e̱ ndo̱ꞌ kuꞌu̱n ndo̱ꞌ,
te̱ xa̱ yu̱ꞌuꞌ mi̱iꞌ ra̱ kaꞌa̱n ra̱ xiinꞌ ndo̱ꞌ te̱ ki̱e̱e̱ ndo̱ꞌ nuu̱ꞌ ñu̱ꞌuꞌ ra̱ ja̱a̱nꞌ ―ni̱ katyi̱ a̱.
2 Te̱ ni̱ kaꞌa̱n ka̱ Ndiosí xiinꞌ Moisés ndii:
―Yuꞌu̱ nduuꞌ Yahvé.
3 Ni̱ sa̱tuví xiinꞌ miiꞌ i̱ nuu̱ꞌ Abraham,
xiinꞌ nuu̱ꞌ Isaac,
xiinꞌ nuu̱ꞌ Jacob,
ña̱ nduuꞌ i̱ Ndiosí ña̱ sa̱kuuꞌ a̱ ku̱vi̱,
ndisu̱ nï̱ kaꞌa̱n i̱ xiinꞌ nde̱e̱ i̱i̱n te̱ ja̱a̱nꞌ kivi̱ꞌ i̱ ña̱ nduuꞌ Yahvé.
4 Ni̱ ta̱xi̱ tu̱ i̱ kuento i̱ nuu̱ꞌ ra̱ ña̱ ta̱xi̱ i̱ ñu̱ꞌuꞌ Canaán ku̱ndu̱u̱ ña̱ꞌa̱ ra̱ miiꞌ ni̱ ndiee̱ ra̱ nde̱e̱ naa te̱ tukuꞌ.
5 Te̱ vi̱ti̱n ña̱ xini so̱ꞌo̱ i̱ ña̱ tanaꞌ ndi̱i ne̱ Israel xaꞌa̱ꞌ a̱ ña̱ sa̱ndoꞌoꞌ ña̱ꞌaꞌ te̱ Egipto ndii,
ni̱ na̱ka̱ꞌanꞌ i̱ kuento ña̱ ni̱ ndoo̱ i̱ nuu̱ꞌ ni̱a̱ ja̱a̱nꞌ.
6 Sa̱kanꞌ na kuiiꞌ kuaꞌan te̱ kaꞌa̱n u̱nꞌ xiinꞌ ne̱ Israel ña̱ yuꞌu̱ nduuꞌ Yahvé,
ña̱ sa̱kakú ña̱ꞌaꞌ miiꞌ ñuꞌuꞌ ni̱a̱ nduuꞌ ni̱a̱ ne̱ xikaꞌ nuuꞌ so̱ꞌo̱,
te̱ xaaꞌ ni̱a̱ tyu̱u̱n vie̱ va̱ xaaꞌ te̱ Egipto.
Te̱ xiinꞌ kuaꞌa̱ꞌ ña̱ niaꞌá kaꞌnuꞌ sa̱kakú i̱ ndoꞌó nda̱ꞌaꞌ ra̱,
te̱ xiinꞌ kuaꞌa̱ꞌ tu̱ ña̱ sa̱ndoꞌoꞌ i̱ ne̱ Egipto ja̱a̱nꞌ ta̱va̱ꞌ i̱ ndoꞌó nuu̱ꞌ ñu̱ꞌuꞌ ja̱a̱nꞌ.
7 Te̱ na̱ti̱i̱n i̱ ndoꞌó ku̱ndu̱u̱ ndo̱ꞌ kuenta mi̱iꞌ i̱,
te̱ yuꞌu̱ ku̱ndu̱u̱ Ndiosí ndo̱ꞌ.
Te̱ xiinꞌ ña̱ ja̱a̱nꞌ ku̱nda̱ni̱ ndo̱ꞌ ña̱ yuꞌu̱ nduuꞌ Ndiosí ña̱ ni̱ ta̱va̱ꞌ ndoꞌó nuu̱ꞌ tyu̱u̱n vie̱ ña̱ ni̱ ti̱i̱n uꞌvi̱ te̱ Egipto ndoꞌó sa̱a̱ ndo̱ꞌ.
8 Kuꞌu̱n ndi̱a̱ka̱ i̱ ndoꞌó nuu̱ꞌ ñu̱ꞌuꞌ ña̱ ni̱ kaꞌa̱n i̱ ta̱xi̱ i̱ nda̱ꞌaꞌ Abraham,
xiinꞌ Isaac,
xiinꞌ Jacob ku̱ndu̱u̱ ña̱ꞌa̱ ndo̱ꞌ.
Yuꞌu̱ nduuꞌ Yahvé ―ni̱ katyi̱ a̱.
9 Ni̱ kaꞌa̱n Moisés sa̱kuuꞌ ña̱ ni̱ kaꞌa̱n Ndiosí ja̱a̱nꞌ xiinꞌ ra̱ nuu̱ꞌ ne̱ Israel,
ndisu̱ nï̱ xi̱i̱n ne̱ ja̱a̱nꞌ ku̱ni̱ so̱ꞌo̱ ña̱ꞌaꞌ ni̱a̱,
sa̱kanꞌ ña̱ ndi̱i va̱ kuni ni̱a̱ xaꞌa̱ꞌ a̱ ña̱ uꞌvi̱ va̱ ndoꞌoꞌ ni̱a̱ ña̱ nduuꞌ ni̱a̱ ne̱ xikaꞌ nuuꞌ so̱ꞌo̱.
10 Sa̱kanꞌ te̱ ni̱ kaꞌa̱n Yahvé xiinꞌ Moisés ndii:
11 ―Ndiꞌvi̱ vi̱ꞌe̱ Faraón,
te̱ xaꞌndia tyuunꞌ nuu̱ꞌ ñu̱ꞌuꞌ Egipto,
te̱ kaꞌa̱n u̱nꞌ xiinꞌ ra̱ na ta̱xi̱ ra̱ ki̱e̱e̱ ne̱ vi̱ꞌe̱ Israel nuu̱ꞌ ñu̱ꞌuꞌ ra̱ te̱ kuꞌu̱n ni̱a̱ ―ni̱ katyi̱ a̱.
12 Sa̱kanꞌ te̱ ni̱ kaꞌa̱n Moisés xiinꞌ Yahvé ndii:
―Ndisu̱ ni̱ nde̱e̱ ne̱ taꞌanꞌ i̱,
ne̱ Israel,
nï̱ ta̱xi̱ so̱ꞌo̱ ña̱ kaꞌán i̱,
¿sa̱a̱ ku̱vi̱ ndiatuꞌ i̱ni̱ i̱ ña̱ ku̱ni̱ so̱ꞌo̱ Faraón ña̱ kaꞌa̱n i̱ xiinꞌ ra̱?
Te̱ siinꞌ tukuꞌ ndii,
ni̱ nde̱e̱ kü̱vi̱ kaꞌa̱n va̱ꞌa̱ i̱ ―ni̱ katyi̱ ra̱.
13 Sa̱kanꞌ te̱ ni̱ kaꞌa̱n tyuunꞌ Yahvé xiinꞌ Moisés xiinꞌ Aarón ña̱ kaꞌa̱n ra̱ xiinꞌ ne̱ Israel,
te̱ kaꞌa̱n tu̱ ra̱ xiinꞌ Faraón ña̱ xa̱ ni̱ kaꞌa̱n tyuunꞌ Yahvé xiinꞌ ra̱ ña̱ kuní a̱ ta̱va̱ꞌ ra̱ ne̱ Israel nuu̱ꞌ ñu̱ꞌuꞌ Egipto.
Yoꞌoꞌ ku̱a̱xi̱ kivi̱ꞌ ne̱ xii̱ꞌ ya̱taꞌ Moisés xiinꞌ Aarón
14 Ña̱ yo̱ꞌo̱ꞌ ni̱ nduu̱ kivi̱ꞌ te̱ kuuꞌ nu̱uꞌ,
te̱ ni̱ nduu̱ kuenta yu̱vaꞌ ne̱ vi̱ꞌe̱ Israel.
Siꞌe̱ Rubén,
te̱ ni̱ nduu̱ siꞌe̱ nu̱uꞌ Israel ndii,
ña̱ yo̱ꞌo̱ꞌ ni̱ nduu̱ kivi̱ꞌ ra̱:
I̱i̱n ra̱ ni̱ na̱niꞌ Hanoc,
te̱ i̱nga̱ ra̱ ni̱ na̱niꞌ Falú,
te̱ i̱nga̱ ra̱ ni̱ na̱niꞌ Hezrón,
te̱ i̱nga̱ ra̱ ni̱ na̱niꞌ Carmí.
Te̱ sa̱kuuꞌ te̱ ja̱a̱nꞌ ni̱ nduu̱ siꞌe̱ Rubén.
15 Ña̱ yo̱ꞌo̱ꞌ ni̱ nduu̱ kivi̱ꞌ siꞌe̱ Simeón:
I̱i̱n ra̱ ni̱ na̱niꞌ Jemuel,
te̱ i̱nga̱ ra̱ ni̱ na̱niꞌ Jamín,
te̱ i̱nga̱ ra̱ ni̱ na̱niꞌ Ohad,
te̱ i̱nga̱ ra̱ ni̱ na̱niꞌ Jaquín,
te̱ i̱nga̱ ra̱ ni̱ na̱niꞌ Zohar,
te̱ i̱nga̱ ra̱ ni̱ na̱niꞌ Saúl,
te̱ siꞌe̱ i̱i̱n ñaꞌ cananea ni̱ nduu̱ Saúl ja̱a̱nꞌ.
Te̱ sa̱kuuꞌ te̱ ja̱a̱nꞌ ni̱ nduu̱ siꞌe̱ Simeón.
16 Leví ndii,
siento oko̱ xaꞌu̱n uvi̱ kuiya̱ ni̱ tiaku̱ ra̱,
te̱ ña̱ yo̱ꞌo̱ꞌ ni̱ nduu̱ kivi̱ꞌ tiaa̱ siꞌe̱ ra̱:
I̱i̱n ra̱ ni̱ na̱niꞌ Gersón,
te̱ i̱nga̱ ra̱ ni̱ na̱niꞌ Coat,
te̱ i̱nga̱ ra̱ ni̱ na̱niꞌ Merari.
17 Te̱ ña̱ yo̱ꞌo̱ꞌ ni̱ nduu̱ kivi̱ꞌ tiaa̱ siꞌe̱ Gersón:
I̱i̱n ra̱ ni̱ na̱niꞌ Libni,
te̱ i̱nga̱ ra̱ ni̱ na̱niꞌ Simei.
Te̱ i̱ꞌi̱n te̱ ja̱a̱nꞌ ndii,
xa̱ ni̱ yoo̱,
xa̱ ni̱ yoo̱ ne̱ si̱a̱niꞌ xikaꞌ ra̱.
18 Coat ndii,
siento oko̱ uxi̱ uni̱ kuiya̱ ni̱ tiaku̱ ra̱,
te̱ ña̱ yo̱ꞌo̱ꞌ ni̱ nduu̱ kivi̱ꞌ tiaa̱ siꞌe̱ ra̱:
I̱i̱n ra̱ ni̱ na̱niꞌ Amram,
te̱ i̱nga̱ ra̱ ni̱ na̱niꞌ Izhar,
te̱ i̱nga̱ ra̱ ni̱ na̱niꞌ Hebrón,
te̱ i̱nga̱ ra̱ ni̱ na̱niꞌ Uziel.
19 Te̱ ña̱ yo̱ꞌo̱ꞌ ni̱ nduu̱ kivi̱ꞌ tiaa̱ siꞌe̱ Merari:
I̱i̱n ra̱ ni̱ na̱niꞌ Mahli,
te̱ i̱nga̱ ra̱ ni̱ na̱niꞌ Musi.
Te̱ sa̱kuuꞌ ne̱ kaa̱ꞌ nduuꞌ ne̱ vi̱ꞌe̱ Leví ña̱ xa̱ꞌaꞌ a̱ nde̱e̱ ne̱ xi̱xa̱ ka̱ te̱ sa̱kanꞌ nde̱e̱ ne̱ sa̱va̱.
20 Amram ndii,
xiinꞌ xi̱xi̱ ra̱ ñaꞌ naniꞌ Jocabed ni̱ tu̱ndaꞌa̱ꞌ ra̱,
te̱ ni̱ yoo̱ uvi̱ taꞌan tiaa̱ siꞌe̱ ra̱ xiinꞌ aꞌ:
I̱i̱n ra̱ ni̱ na̱niꞌ Aarón,
te̱ i̱nga̱ ra̱ ni̱ na̱niꞌ Moisés.
Te̱ Amram ja̱a̱nꞌ ndii,
siento oko̱ xaꞌu̱n uvi̱ kuiya̱ ni̱ xika̱ ra̱ i̱i̱n yivi̱ꞌ.
21 Ña̱ yo̱ꞌo̱ꞌ nduuꞌ kivi̱ꞌ tiaa̱ siꞌe̱ Izhar:
I̱i̱n ra̱ ni̱ na̱niꞌ Coré,
te̱ i̱nga̱ ra̱ ni̱ na̱niꞌ Nefeg,
te̱ i̱nga̱ ra̱ ni̱ na̱niꞌ Zicri.
22 Ña̱ yo̱ꞌo̱ꞌ ni̱ nduu̱ kivi̱ꞌ tiaa̱ siꞌe̱ Uziel:
I̱i̱n ra̱ ni̱ na̱niꞌ Misael,
te̱ i̱nga̱ ra̱ ni̱ naniꞌ Elzafán,
te̱ i̱nga̱ ra̱ ni̱ naniꞌ Sitri.
23 Aarón ndii,
xiinꞌ Elisabet,
ñaꞌ taꞌanꞌ Naasón,
ñaꞌ siꞌe̱ Aminadab,
ni̱ tu̱ndaꞌa̱ꞌ ra̱.
Te̱ ña̱ yo̱ꞌo̱ꞌ ni̱ nduu̱ kivi̱ꞌ tiaa̱ siꞌe̱ ra̱,
te̱ ni̱ yoo̱ xiinꞌ aꞌ:
I̱i̱n ra̱ ni̱ na̱niꞌ Nadab,
te̱ i̱nga̱ ra̱ ni̱ na̱niꞌ Abiú,
te̱ i̱nga̱ ra̱ ni̱ na̱niꞌ Eleazar,
te̱ i̱nga̱ ra̱ ni̱ na̱niꞌ Itamar.
24 Ña̱ yo̱ꞌo̱ꞌ nduuꞌ kivi̱ꞌ tiaa̱ siꞌe̱ Coré:
I̱i̱n ra̱ ni̱ na̱niꞌ Asir,
te̱ i̱nga̱ ra̱ ni̱ na̱niꞌ Elcana,
te̱ i̱nga̱ ra̱ ni̱ na̱niꞌ Abiasaf.
Te̱ sa̱kuuꞌ te̱ ja̱a̱nꞌ ni̱ nduu̱ si̱a̱niꞌ xikaꞌ Coré.
25 Te̱ Eleazar,
siꞌe̱ Aarón ndii,
ni̱ tu̱ndaꞌa̱ꞌ ra̱ xiinꞌ ñaꞌ siꞌe̱ te̱ naniꞌ Futiel,
te̱ ni̱ yoo̱ i̱i̱n tiaa̱ siꞌe̱ ra̱,
te̱ ni̱ na̱niꞌ Finees xiinꞌ ñaꞌ ja̱a̱nꞌ.
Sa̱kuuꞌ te̱ ja̱a̱nꞌ ni̱ nduu̱ si̱a̱niꞌ xikaꞌ Leví,
te̱ i̱ꞌi̱n te̱ ja̱a̱nꞌ ni̱ nduu̱ te̱ kuuꞌ nu̱uꞌ nuu̱ꞌ ne̱ vi̱ꞌe̱ mi̱iꞌ ra̱.
26 Te̱ ja̱a̱nꞌ nduuꞌ Aarón xiinꞌ Moisés,
te̱ nduuꞌ te̱ ni̱ kaꞌa̱n Yahvé xiinꞌ ña̱ ta̱va̱ꞌ ra̱ ne̱ vi̱ꞌe̱ Israel nuu̱ꞌ ñu̱ꞌuꞌ Egipto ko̱o̱ ti̱ꞌvi̱ ni̱a̱ nde̱e̱ naa te̱ xíinꞌ.
27 Te̱ su̱vi̱ tu̱ Moisés xiinꞌ Aarón ja̱a̱nꞌ nduuꞌ te̱ ni̱ xaꞌa̱n nuu̱ꞌ Faraón,
te̱ nduuꞌ rey nuu̱ꞌ ñu̱ꞌuꞌ Egipto ja̱a̱nꞌ,
te̱ ni̱ kaꞌa̱n ra̱ xiinꞌ te̱ ja̱a̱nꞌ ña̱ ta̱va̱ꞌ ra̱ ne̱ vi̱ꞌe̱ Israel nuu̱ꞌ ñu̱ꞌuꞌ Egipto ja̱a̱nꞌ.
28 Kii̱ꞌ nduꞌu̱ꞌ Moisés nuu̱ꞌ ñu̱ꞌuꞌ Egipto,
te̱ ni̱ ka̱na̱ ña̱ꞌaꞌ Yahvé,
29 te̱ ni̱ kaꞌa̱n a̱ xiinꞌ ra̱ ndii:
―Yuꞌu̱ nduuꞌ Yahvé.
Kaꞌa̱n xiinꞌ Faraón,
te̱ nduuꞌ rey nuu̱ꞌ ñu̱ꞌuꞌ Egipto,
sa̱kuuꞌ ña̱ kaꞌa̱n i̱ xiinꞌ u̱nꞌ ―ni̱ katyi̱ a̱.
30 Ndisu̱ ni̱ kaꞌa̱n Moisés xiinꞌ Ndiosí ndii:
―Tákuiꞌe,
yuꞌu̱ ndii,
kü̱vi̱ kaꞌa̱n va̱ꞌa̱ i̱,
sa̱kanꞌ na kuiiꞌ,
¿ndee xaꞌa̱ꞌ na ku̱ni̱ so̱ꞌo̱ Faraón ña̱ kaꞌa̱n i̱ xiinꞌ ra̱?
―ni̱ katyi̱ ra̱.