So̱ꞌo̱ ni̱ xa̱a̱ a̱ kii̱ꞌ ni̱ xaꞌa̱n Moisés xiinꞌ Aarón, te̱ nda̱tuꞌunꞌ ra̱ xiinꞌ Faraón
5
Ni̱ yaꞌa̱ te̱ ni̱ xaꞌa̱n Moisés xiinꞌ Aarón nuu̱ꞌ Faraón,
te̱ ni̱ kaꞌa̱n ra̱ xiinꞌ te̱ ja̱a̱nꞌ ndii:
―Ña̱ yo̱ꞌo̱ꞌ kaꞌán Yahvé Ndiosí,
ña̱ xakaꞌnuꞌ nduꞌu̱,
ne̱ vi̱ꞌe̱ Israel:
“Ta̱xi̱ u̱nꞌ na kuꞌu̱n ne̱ nduuꞌ kuenta i̱ miiꞌ i̱tyi kaaꞌ te̱ ka̱sa̱ꞌa̱ ni̱a̱ vi̱koꞌ ña̱ xakaꞌnuꞌ ni̱a̱ yuꞌu̱”,
katyi̱ a̱ ―ni̱ katyi̱ ra̱.
2 Sa̱kanꞌ te̱ ni̱ kaꞌa̱n Faraón xiinꞌ ra̱ ndii:
―¿Yo̱o̱ nduuꞌ Yahvé na sa̱xinu̱ yuꞌu̱ ña̱ kaꞌán ra̱,
te̱ ta̱xi̱ i̱ kuꞌu̱n ndoꞌó,
ne̱ Israel?
Xïní yuꞌu̱ Yahvé ja̱a̱nꞌ,
ni̱ nde̱e̱ tä̱xi̱ tu̱ i̱ kuꞌu̱n ndoꞌó,
ne̱ Israel ―ni̱ katyi̱ ra̱.
3 Sa̱kanꞌ te̱ ni̱ kaꞌa̱n ra̱ xiinꞌ Faraón ndii:
―Yahvé,
Ndiosí nduꞌu̱,
ne̱ vi̱ꞌe̱ hebreo ndii,
ni̱ ki̱xi̱n na̱taꞌanꞌ a̱ xiinꞌ ndu̱.
Xaꞌa̱ꞌ a̱ ja̱a̱nꞌ na ta̱xi̱ u̱nꞌ na kuꞌu̱n ndu̱ i̱tyiꞌ ña̱ ku̱vi̱ na̱xaa̱ ndu̱ uni̱ taꞌan kivi̱ꞌ miiꞌ i̱tyi kaaꞌ,
te̱ na̱soko̱ꞌ ndu̱ ki̱tiꞌ nuu̱ꞌ Yahvé,
Ndiosí nduꞌ,
sa̱kanꞌ te̱ kä̱ni̱ a̱ ndu̱ xiinꞌ kuiꞌe̱ uun xiinꞌ ityi̱ naaꞌ sä̱a̱ ndu̱ ña̱ ja̱a̱nꞌ ―ni̱ katyi̱ ra̱.
4 Sa̱kanꞌ te̱ ni̱ kaꞌa̱n Faraón ndii:
―Ndoꞌó,
Moisés xiinꞌ Aarón,
¿ndiotyun na̱ savikuiín ndo̱ꞌ ne̱ yivi̱ꞌ nuu̱ꞌ tyu̱u̱n ña̱ xaaꞌ ni̱a̱?
Kuaꞌan kiꞌi̱ꞌ ndo̱ꞌ te̱ sa̱tyuunꞌ ndo̱ꞌ.
5 Te̱ ni̱ kaꞌa̱n tu̱ ra̱ ndii:
―Ko̱to̱ ndo̱ꞌ,
xa̱ kuaꞌa̱ꞌ xa̱va̱ꞌa̱ ne̱ Israel yoo ñu̱u̱ yoꞌoꞌ,
te̱ kuni sa̱vikuiín ña̱ꞌaꞌ ndoꞌó nuu̱ꞌ tyu̱u̱n ña̱ xaaꞌ ni̱a̱ ―ni̱ katyi̱ ra̱.
6 Te̱ xa̱ kivi̱ꞌ ja̱a̱nꞌ ni̱ kaꞌa̱n tyuunꞌ Faraón xiinꞌ te̱ xitoꞌ ne̱ xatyuunꞌ ja̱a̱nꞌ xiinꞌ te̱ xaꞌndia tyuunꞌ nuu̱ꞌ ni̱a̱ ndii:
7 ―Vi̱ti̱n ndii,
tä̱xi̱ ka̱ ndo̱ꞌ i̱ti̱a̱ nda̱ꞌaꞌ ne̱ Israel te̱ ka̱sa̱ꞌa̱ ni̱a̱ ndo̱ꞌo̱,
süu̱ꞌ ja̱a̱nꞌ ndii mi̱iꞌ ni̱a̱ na kuꞌu̱n ka̱ꞌndi̱a̱ a̱.
8 Nde̱e̱ sa̱a̱ ka̱ ni̱ ndii,
kaꞌa̱n ndo̱ꞌ xiinꞌ ni̱a̱ ña̱ i̱i̱n katyi kuuꞌ ndo̱ꞌo̱ kuní a̱ ka̱sa̱ꞌa̱ ni̱a̱ nde̱e̱ naa kii̱ꞌ ni̱ ta̱xi̱ ndo̱ꞌ i̱ti̱a̱ nda̱ꞌaꞌ ni̱a̱,
te̱ tä̱xi̱ ndo̱ꞌ ña̱ sa̱nuuꞌ ni̱a̱ nde̱e̱ i̱i̱n a̱.
Sa̱kanꞌ ña̱ ne̱ suxa̱nꞌ nduuꞌ ni̱a̱,
sa̱kanꞌ na kayuꞌuꞌ ni̱a̱ kaꞌán ni̱a̱ ndii:
“Ta̱xi̱ u̱nꞌ na kuꞌu̱n ndu̱ te̱ na̱soko̱ꞌ ndu̱ ki̱tiꞌ nuu̱ꞌ Ndiosí nduꞌ”,
katyi ni̱a̱.
9 Ta̱xi̱ kuaꞌa̱ꞌ ka̱ ndo̱ꞌ tyu̱u̱n sa̱a̱ ni̱a̱,
sa̱kanꞌ te̱ ko̱o̱ kuaꞌa̱ꞌ tyu̱u̱n nuu̱ꞌ ni̱a̱ te̱ kü̱ni̱a̱ꞌa̱ ni̱a̱ tyu̱nxaꞌaꞌ ni̱a̱ kuuꞌ tu̱ꞌu̱n vixi̱ ―ni̱ katyi̱ ra̱.
10 Sa̱kanꞌ te̱ ni̱ ki̱e̱e̱ te̱ xaꞌndia tyuunꞌ nuu̱ꞌ ne̱ xatyuunꞌ ja̱a̱nꞌ xiinꞌ te̱ xitoꞌ ña̱ꞌaꞌ,
te̱ ni̱ kaꞌa̱n ra̱ xiinꞌ sa̱kuuꞌ ni̱a̱ ndii:
―Xa̱ ni̱ kaꞌa̱n tyuunꞌ Faraón ña̱ tä̱xi̱ ka̱ ra̱ i̱ti̱a̱ nda̱ꞌaꞌ ndo̱ꞌ.
11 Sa̱kanꞌ na vi̱ti̱n ndii,
kuꞌu̱n ka̱ꞌndi̱a̱ mi̱iꞌ ndo̱ꞌ i̱ti̱a̱ miiꞌ ka̱ yoo a̱,
ndisu̱ süu̱ꞌ xaꞌa̱ꞌ ja̱a̱nꞌ na sa̱nuuꞌ ndo̱ꞌ ndo̱ꞌo̱ ña̱ kuní a̱ ka̱sa̱ꞌa̱ ndo̱ꞌ ―ni̱ katyi̱ ra̱.
12 Sa̱kanꞌ te̱ ni̱ kiku̱ ne̱ Israel ka̱niiꞌ nuu̱ꞌ ñu̱ꞌuꞌ Egipto nandukuꞌ ni̱a̱ kuꞌu̱ i̱tyi,
te̱ ti̱i̱n ni̱a̱ nde̱e̱ naa i̱ti̱a̱ ka̱sa̱ꞌa̱ ni̱a̱ ndo̱ꞌo̱.
13 Te̱ i̱ꞌi̱n kivi̱ꞌ kuaꞌa̱n tiinꞌ uꞌvi̱ ña̱ꞌaꞌ te̱ Egipto,
te̱ xitoꞌ ña̱ꞌaꞌ,
kaꞌán ra̱ xiinꞌ ni̱a̱ ndii:
―Sa̱xinu̱ ndo̱ꞌ ndo̱ꞌo̱ ña̱ kuní a̱ ka̱sa̱ꞌa̱ ndo̱ꞌ i̱ꞌi̱n kivi̱ꞌ kuaꞌa̱n,
te̱ ka̱sa̱ꞌa̱ ndo̱ꞌ sa̱a̱ niiꞌ kuuꞌ a̱ ni̱ xa̱ꞌa̱ ndo̱ꞌ kii̱ꞌ ni̱ ta̱xi̱ ndu̱ i̱ti̱a̱ nda̱ꞌaꞌ ndo̱ꞌ ―ni̱ katyi̱ ra̱.
14 Xaꞌa̱ꞌ a̱ ja̱a̱nꞌ na ni̱ xa̱ꞌaꞌ te̱ ndisoꞌ tyuunꞌ nuu̱ꞌ ne̱ vi̱ꞌe̱ Israel ja̱a̱nꞌ kutunꞌ ña̱ꞌaꞌ ra̱,
kaꞌán ra̱ ndii:
―¿Ndiotyun na nï̱ sa̱xinu̱ ndo̱ꞌ ndo̱ꞌo̱ ña̱ kuní a̱ ka̱sa̱ꞌa̱ ndo̱ꞌ,
ni̱ nde̱e̱ i̱ku̱,
ni̱ nde̱e̱ vi̱ti̱n,
naa kuuꞌ a̱ ni̱ xa̱ꞌa̱ ndo̱ꞌ sa̱aꞌ?
―ni̱ katyi̱ ra̱.
15 Sa̱kanꞌ na kuiiꞌ ni̱ ki̱xi̱n te̱ Israel,
te̱ ndisoꞌ tyuunꞌ nuu̱ꞌ ne̱ xatyuunꞌ ja̱a̱nꞌ,
nuu̱ꞌ Faraón,
te̱ ni̱ kaꞌa̱n ku̱a̱tyi̱ ra̱ nuu̱ꞌ te̱ ja̱a̱nꞌ ndii:
―¿Ndiotyun na xaaꞌ u̱nꞌ sa̱kanꞌ xiinꞌ nduꞌu̱,
te̱ xikaꞌ nuuꞌ nuu̱ꞌ u̱nꞌ?
16 Köo̱ꞌ i̱ti̱a̱ taxiꞌ ka̱ u̱nꞌ nda̱ꞌaꞌ ndu̱,
ndisu̱ te̱ ndisoꞌ tyuunꞌ nuu̱ꞌ ndu̱ ndii,
tiinꞌ uꞌvi̱ ra̱ nduꞌu̱ ña̱ ka̱sa̱ꞌa̱ ndu̱ kuaꞌa̱ꞌ ndo̱ꞌo̱,
te̱ kutunꞌ ra̱ nduꞌu̱ nde̱e̱ naaꞌ mi̱iꞌ ndu̱ kumiꞌ ku̱a̱tyi̱,
ndisu̱ ku̱a̱tyi̱ mi̱iꞌ ra̱ nduuꞌ a̱ ―ni̱ katyi̱ ra̱.
17 Sa̱kanꞌ te̱ ni̱ kaꞌa̱n tiꞌeꞌ Faraón xiinꞌ ra̱ ndii:
―¡Ndoꞌó ndii,
te̱ suxa̱nꞌ nduuꞌ ndo̱ꞌ!
¡Ña̱ nda̱ku nduuꞌ a̱ ndii,
te̱ suxa̱nꞌ ndiaaꞌ vi̱ꞌ nduuꞌ ndo̱ꞌ!
Sa̱kanꞌ na kuiiꞌ kayuꞌuꞌ ndo̱ꞌ kaꞌán ndo̱ꞌ ndii:
“Ta̱xi̱ u̱nꞌ na kuꞌu̱n ndu̱ te̱ na̱soko̱ꞌ ndu̱ ki̱tiꞌ nuu̱ꞌ Yahvé”,
katyi̱ ndo̱ꞌ.
18 Kuaꞌa̱n kiꞌi̱ꞌ ndo̱ꞌ,
te̱ sa̱tyuunꞌ ndo̱ꞌ,
tä̱xi̱ ndu̱ i̱ti̱a̱ nda̱ꞌaꞌ ndo̱ꞌ,
ndisu̱ i̱i̱n katyi kuuꞌ ndo̱ꞌo̱ kuní a̱ ka̱sa̱ꞌa̱ ndo̱ꞌ nde̱e̱ naa kuuꞌ a̱ ni̱ xa̱ꞌa̱ ndo̱ꞌ sa̱aꞌ ―ni̱ katyi̱ ra̱.
19 Sa̱kanꞌ te̱ ni̱ xi̱ni̱ te̱ Israel,
te̱ ndisoꞌ tyuunꞌ ja̱a̱nꞌ,
ña̱ yoo kuaꞌa̱ꞌ tu̱ndoꞌo̱ꞌ nuu̱ꞌ ra̱ xaꞌa̱ꞌ ña̱ ni̱ kaꞌa̱n te̱ ja̱a̱nꞌ xiinꞌ ra̱ ndii:
“I̱i̱n katyi kuuꞌ ndo̱ꞌo̱ kuní a̱ ka̱sa̱ꞌa̱ ndo̱ꞌ i̱ꞌi̱n kivi̱ꞌ kuaꞌa̱n nde̱e̱ naa kuuꞌ a̱ ni̱ xa̱ꞌa̱ ndo̱ꞌ sa̱aꞌ”,
ni̱ katyi̱ ra̱.
20 Kii̱ꞌ ni̱ ki̱e̱e̱ ra̱ vi̱ꞌe̱ Faraón ja̱a̱nꞌ kuaꞌa̱n ra̱ ndii,
xa̱ iinꞌ Moisés xiinꞌ Aarón ki̱ꞌe̱ ndiatuꞌ ña̱ꞌaꞌ ra̱.
21 Sa̱kanꞌ te̱ ni̱ kaꞌa̱n te̱ ndisoꞌ tyuunꞌ ja̱a̱nꞌ xiinꞌ ra̱ ndii:
―Yahvé na na̱tava̱ꞌ kuenta xaꞌa̱ꞌ ña̱ xaaꞌ ndo̱ꞌ kaa̱ꞌ,
te̱ ka̱ni̱ a̱ ndoꞌó.
Sa̱kanꞌ ña̱ ndoꞌó kumiꞌ ku̱a̱tyi̱,
te̱ vi̱ti̱n ndii,
ndasiꞌ va̱ Faraón xiinꞌ te̱ xatyuunꞌ nuu̱ꞌ ra̱ yooꞌ.
Xa̱ mi̱iꞌ ndo̱ꞌ ni̱ tyi̱ꞌni̱ ityi̱ nda̱ꞌaꞌ ra̱ te̱ ka̱ꞌni̱ꞌ ra̱ yooꞌ ―ni̱ katyi̱ ra̱.
Yoꞌoꞌ kaꞌán ku̱a̱tyi̱ Moisés nuu̱ꞌ Ndiosí
22 Sa̱kanꞌ te̱ ni̱ xaꞌa̱n Moisés nuu̱ꞌ Yahvé,
te̱ ni̱ kaꞌa̱n ra̱ xiinꞌ a̱ ndii:
―Tákuiꞌe,
¿ndiotyun na sandoꞌoꞌ u̱nꞌ nduꞌu̱,
ne̱ nduuꞌ kuenta u̱nꞌ?
¿Ndee xaꞌa̱ꞌ ni̱ ti̱ꞌviꞌ u̱nꞌ yuꞌu̱ ku̱a̱xi̱ i̱ yoꞌoꞌ?
23 Sa̱kanꞌ ña̱ nde̱e̱ kii̱ꞌ ni̱ xa̱a̱ i̱ te̱ kaꞌa̱n i̱ xiinꞌ Faraón xaꞌa̱ꞌ u̱nꞌ ndii,
ndi̱e̱eꞌ ka̱ sandoꞌoꞌ ra̱ nduꞌu̱,
ne̱ nduuꞌ kuenta u̱nꞌ.
Te̱ yoꞌó ndii,
köo̱ꞌ a̱ xaaꞌ xa̱tyiꞌ u̱nꞌ te̱ ta̱va̱ꞌ u̱nꞌ ndu̱ yoꞌoꞌ,
te̱ kaku̱ ndu̱ ―ni̱ katyi̱ ra̱.