So̱ꞌo̱ ni̱ xa̱a̱ a̱ kii̱ꞌ ni̱ ta̱xi̱ Ndiosí ña̱ ndi̱e̱eꞌ nda̱ꞌaꞌ Moisés
4
Sa̱kanꞌ te̱ ni̱ na̱ku̱i̱i̱n Moisés kaꞌán ra̱ xiinꞌ Ndiosí ndii:
―Kä̱ndi̱xaꞌ ne̱ ja̱a̱nꞌ ña̱ kaꞌa̱n i̱,
ni̱ nde̱e̱ sä̱a̱ tu̱ ni̱a̱ kuenta kuuꞌ i̱,
sa̱kanꞌ ña̱ kaꞌa̱n ni̱a̱ ndii:
“Köo̱ꞌ Yahvé ni̱ tuvi̱ vi̱ꞌ nuu̱ꞌ yoꞌó”,
katyi̱ ni̱a̱ xiinꞌ i̱ ―ni̱ katyi̱ ra̱.
2 Sa̱kanꞌ te̱ ni̱ kaꞌa̱n Yahvé xiinꞌ ra̱ ndii:
―¿Yo̱o̱ nduuꞌ ña̱ niꞌniꞌ nda̱ꞌaꞌ u̱nꞌ ñaa̱ꞌ?
―ni̱ katyi̱ a̱.
Te̱ ni̱ kaꞌa̱n ra̱ ndii:
―I̱i̱n ka̱roti,
tunꞌ taxiꞌ i̱ mbe̱e̱ nduuꞌ nu̱ꞌ ―ni̱ katyi̱ ra̱.
3 Te̱ ni̱ kaꞌa̱n Ndiosí xiinꞌ ra̱ ndii:
―Sa̱kanaꞌ nu̱ꞌ ñu̱ꞌuꞌ ―ni̱ katyi̱ a̱.
Sa̱kanꞌ te̱ ni̱ sa̱kanaꞌ ra̱ nu̱ꞌ ñu̱ꞌuꞌ,
te̱ ni̱ na̱ndu̱u̱ nu̱ꞌ i̱i̱n koo̱ꞌ.
Te̱ Moisés ndii,
ni̱ xika̱ ra̱ nda̱va̱ ra̱ nuu̱ꞌ riꞌ xaꞌa̱ꞌ a̱ ña̱ yiꞌvi ra̱ riꞌ.
4 Ndisu̱ ni̱ kaꞌa̱n Yahvé xiinꞌ ra̱ ndii:
―Sa̱na̱kaá nda̱ꞌaꞌ u̱nꞌ te̱ ti̱i̱n u̱nꞌ suꞌma̱ꞌ riꞌ ―ni̱ katyi̱ a̱.
Sa̱kanꞌ te̱ ni̱ sa̱na̱kaá ra̱ nda̱ꞌaꞌ ra̱,
te̱ ni̱ ti̱i̱n ra̱ suꞌma̱ꞌ riꞌ,
te̱ xa̱kaꞌán e̱ꞌ te̱ ni̱ na̱ndu̱u̱ tu̱ku̱u̱ riꞌ ka̱roti nda̱ꞌaꞌ ra̱.
5 Te̱ ni̱ kaꞌa̱n Yahvé xiinꞌ ra̱ ndii:
―Ña̱ kaa̱ꞌ sa̱a̱ u̱nꞌ nuu̱ꞌ ne̱ ja̱a̱nꞌ te̱ ka̱ndi̱xaꞌ ni̱a̱ ña̱ ni̱ tuvi̱ xna̱ꞌa̱ yuꞌu̱,
Yahvé,
Ndiosí te̱ xii̱ꞌ ya̱taꞌ ndo̱ꞌ,
nuu̱ꞌ u̱nꞌ,
Ndiosí ña̱ xakaꞌnuꞌ Abraham,
ña̱ xakaꞌnuꞌ Isaac,
ña̱ xakaꞌnuꞌ Jacob ―ni̱ katyi̱ a̱.
6 Te̱ ni̱ kaꞌa̱n ka̱ a̱ xiinꞌ ra̱ ndii:
―Se̱ꞌvi nda̱ꞌaꞌ u̱nꞌ ti̱xi̱n toto̱ u̱nꞌ ti̱a̱ꞌni̱ u̱nꞌ ―ni̱ katyi̱ a̱.
Sa̱kanꞌ te̱ ni̱ se̱ꞌvi ra̱ nda̱ꞌaꞌ ra̱ ti̱xi̱n toto̱ ra̱ ti̱a̱ꞌni̱ ra̱,
te̱ kii̱ꞌ ni̱ xta̱ꞌniꞌ ra̱ a̱ ndii,
ni̱ ku̱ya̱a̱ katyi̱ vi̱ꞌ a̱ ndisoꞌ ña̱ꞌaꞌ kuiꞌe̱ teꞌi.
7 Te̱ tu̱ku̱ ni̱ ni̱ kaꞌa̱n Ndiosí xiinꞌ ra̱ ndii:
―Tu̱ku̱ sa̱kanꞌ se̱ꞌvi u̱nꞌ nda̱ꞌaꞌ u̱nꞌ ti̱xi̱n toto̱ u̱nꞌ ti̱a̱ꞌni̱ u̱nꞌ ―ni̱ katyi̱ a̱.
Te̱ tu̱ku̱ sa̱kanꞌ ni̱ se̱ꞌvi ra̱ nda̱ꞌaꞌ ra̱ ti̱xi̱n toto̱ ra̱ ti̱a̱ꞌni̱ ra̱,
te̱ kii̱ꞌ ni̱ xta̱ꞌniꞌ ra̱ a̱ ndii,
xa̱ ni̱ nda̱ꞌa̱ a̱ nde̱e̱ naa kaaꞌ ka̱niiꞌ i̱i̱nꞌ ra̱.
8 I̱kanꞌ te̱ ni̱ kaꞌa̱n ka̱ Ndiosí xiinꞌ Moisés ndii:
―Naaꞌ kä̱ndi̱xaꞌ ni̱a̱ ña̱ kaꞌa̱n u̱nꞌ kii̱ꞌ ku̱ni̱ ni̱a̱ ña̱ niaꞌa̱ u̱nꞌ nuu̱ꞌ ni̱a̱ ña̱ nu̱uꞌ ndii,
ka̱ndi̱xaꞌ ni̱a̱ kii̱ꞌ ku̱ni̱ ni̱a̱ ña̱ niaꞌa̱ u̱nꞌ nuu̱ꞌ ni̱a̱ ña̱ uvi̱.
9 Ndisu̱ naaꞌ tä̱xi̱ so̱ꞌo̱ tu̱ ni̱a̱ ña̱ kaꞌa̱n u̱nꞌ,
te̱ ni̱ nde̱e̱ kä̱ndi̱xaꞌ tu̱ ni̱a̱ kii̱ꞌ ku̱ni̱ ni̱a̱ sa̱a̱ u̱nꞌ uvi̱ sa̱aꞌ ña̱ niaꞌa̱ u̱nꞌ ja̱a̱nꞌ ndii,
ki̱ꞌi̱n u̱nꞌ ti̱kui i̱ti̱a̱ Nilo,
te̱ ka̱ti̱a̱ u̱nꞌ raꞌ nuu̱ꞌ ñu̱ꞌuꞌ i̱tyi,
te̱ kii̱ꞌ koyo̱ raꞌ nuu̱ꞌ ñu̱ꞌuꞌ ja̱a̱nꞌ ndii,
numi̱ꞌ va̱ te̱ na̱ndu̱u̱ raꞌ níiꞌ ―ni̱ katyi̱ a̱.
10 Sa̱kanꞌ te̱ ni̱ kaꞌa̱n Moisés xiinꞌ Yahvé ndii:
―Tákuiꞌe,
kü̱vi̱ nda̱tuꞌunꞌ va̱ꞌa̱ yuꞌu̱,
köo̱ꞌ kivi̱ꞌ ni̱ ku̱vi̱ nda̱tuꞌunꞌ va̱ꞌa̱ mi̱iꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
te̱ süu̱ꞌ vi̱ti̱n ña̱ kaꞌán u̱nꞌ xiinꞌ ku̱i̱ti̱ꞌ i̱ ndoꞌoꞌ i̱ sa̱kanꞌ,
süu̱ꞌ ja̱a̱nꞌ ndii,
xa̱ sa̱kanꞌ ndoꞌoꞌ i̱ nde̱e̱ sa̱aꞌ vi̱ꞌ.
Kii̱ꞌ kaꞌán i̱ ndii,
nasuku̱ꞌ taꞌanꞌ i̱i̱n yu̱ꞌuꞌ i̱,
te̱ tiati̱a̱ i̱ ―ni̱ katyi̱ ra̱.
11 Sa̱kanꞌ te̱ ni̱ kaꞌa̱n Yahvé xiinꞌ ra̱ ndii:
―¿Yo̱o̱ ni̱ xa̱ꞌa̱ yu̱ꞌuꞌ ne̱ yivi̱ꞌ?
Uun,
¿yo̱o̱ ni̱ xa̱ꞌa̱ ne̱ iꞌinꞌ,
uun ne̱ soꞌoꞌ,
uun ne̱ ku̱vi̱ xitoꞌ,
uun ne̱ kü̱vi̱ ko̱to̱?
¿Ñáá süu̱ꞌ yuꞌu̱,
Yahvé,
ni̱ xa̱ꞌa̱ ne̱ ja̱a̱nꞌ sa̱kanꞌ?
12 Sa̱kanꞌ na kuiiꞌ kuaꞌan,
te̱ yuꞌu̱ ko̱o̱ xiinꞌ u̱nꞌ kii̱ꞌ kaꞌa̱n u̱nꞌ,
te̱ sa̱niaꞌá i̱ yoꞌó ndee ña̱ kuní a̱ kaꞌa̱n u̱nꞌ ―ni̱ katyi̱ a̱.
13 Sa̱kanꞌ te̱ ni̱ na̱ku̱i̱i̱n Moisés kaꞌán ra̱ xiinꞌ a̱ ndii:
―Tákuiꞌe,
sa̱a̱ u̱nꞌ ña̱ va̱ꞌa̱ te̱ ti̱ꞌviꞌ u̱nꞌ i̱nga̱ ne̱ yivi̱ꞌ ―ni̱ katyi̱ ra̱.
14 Sa̱kanꞌ te̱ ni̱ na̱saa̱ꞌ Yahvé ni̱ xi̱ni̱ a̱ Moisés,
te̱ ni̱ kaꞌa̱n a̱ xiinꞌ ra̱ ndii:
―Va̱ꞌa̱,
ta̱xi̱ i̱ i̱i̱n te̱ kuꞌu̱n xiinꞌ u̱nꞌ te̱ tyi̱ndi̱e̱eꞌ ra̱ yoꞌó,
te̱ ja̱a̱nꞌ nduuꞌ ña̱ni̱ u̱nꞌ Aarón,
kuenta te̱ vi̱ꞌe̱ Leví.
Te̱ ja̱a̱nꞌ ndii,
va̱ꞌa̱ va̱ ndatuꞌunꞌ ra̱,
te̱ xa̱ i̱tyiꞌ naá ra̱ ku̱a̱xi̱ na̱taꞌanꞌ ra̱ xiinꞌ u̱nꞌ.
Te̱ kii̱ꞌ ku̱ni̱ ra̱ yoꞌó ndii,
va̱ꞌa̱ va̱ ku̱ni̱ ra̱.
15 Kaꞌa̱n u̱nꞌ xiinꞌ te̱ ja̱a̱nꞌ,
te̱ sa̱na̱kuatyiꞌ u̱nꞌ nuu̱ꞌ ra̱ ndee ña̱ kuní a̱ kaꞌa̱n ra̱.
Te̱ yuꞌu̱ tyi̱ndi̱e̱eꞌ uvi̱ sa̱aꞌ ndo̱ꞌ kii̱ꞌ kaꞌa̱n ndo̱ꞌ,
te̱ ko̱o̱ tu̱ i̱ xiinꞌ ndo̱ꞌ,
te̱ niaꞌa̱ i̱ ndoꞌó ndee ña̱ va̱ꞌa̱ sa̱a̱ ndo̱ꞌ.
16 Te̱ ja̱a̱nꞌ kaꞌa̱n xiinꞌ ne̱ yivi̱ꞌ nuu̱ꞌ yoꞌó,
te̱ ku̱ndu̱u̱ ra̱ nde̱e̱ naa yu̱ꞌuꞌ u̱nꞌ nuu̱ꞌ ne̱ yivi̱ꞌ ja̱a̱nꞌ,
te̱ yoꞌó ku̱ndu̱u̱ nde̱e̱ naa Ndiosí nuu̱ꞌ ra̱.
17 Ko̱ni̱ꞌi̱ u̱nꞌ ka̱roti ñaa̱ꞌ kuꞌu̱n u̱nꞌ,
sa̱kanꞌ ña̱ xiinꞌ tunꞌ ñaa̱ꞌ sa̱a̱ u̱nꞌ ña̱ niaꞌá ña̱ ni̱ kaꞌa̱n i̱ xiinꞌ u̱nꞌ sa̱a̱ u̱nꞌ ja̱a̱nꞌ ―ni̱ katyi̱ a̱.
So̱ꞌo̱ ni̱ xa̱a̱ a̱ kii̱ꞌ ni̱ na̱ndi̱koꞌ Moisés nuu̱ꞌ ñu̱ꞌuꞌ Egipto
18 Sa̱kanꞌ te̱ ni̱ na̱ndi̱koꞌ Moisés vi̱ꞌe̱ Jetro,
ti̱so̱ ra̱,
te̱ ni̱ kaꞌa̱n ra̱ xiinꞌ te̱ ja̱a̱nꞌ ndii:
―Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ na kuꞌu̱n ndiꞌe̱ꞌ i̱ nuu̱ꞌ ñu̱ꞌuꞌ Egipto miiꞌ ndieeꞌ ne̱ i̱i̱n kuuꞌ xiinꞌ i̱,
kuni ku̱ni̱ i̱ naaꞌ ndieeꞌ va̱ꞌa̱ ni̱a̱ ―ni̱ katyi̱ ra̱.
Te̱ ni̱ kaꞌa̱n Jetro xiinꞌ ra̱ ndii:
―Va̱ꞌa̱ tu̱ sa̱kanꞌ,
kuaꞌan ndo̱ꞌ,
Ndiosí na kuꞌu̱n na xiinꞌ u̱nꞌ ―ni̱ katyi̱ ra̱.
19 Kii̱ꞌ iinꞌ ka̱ Moisés nuu̱ꞌ ñu̱ꞌuꞌ Madián,
te̱ ni̱ kaꞌa̱n Yahvé xiinꞌ ra̱ ndii:
―Xa̱ ku̱vi̱ na̱ndi̱koꞌ u̱nꞌ nuu̱ꞌ ñu̱ꞌuꞌ Egipto,
sa̱kanꞌ ña̱ xa̱ ni̱ xiꞌi̱ sa̱kuuꞌ te̱ ni̱ kuni̱ ka̱ꞌni̱ꞌ yoꞌó ―ni̱ katyi̱ a̱.
20 Sa̱kanꞌ na kuiiꞌ ni̱ xa̱ka̱ Moisés ñaꞌ siꞌi ra̱ xiinꞌ sa̱kuuꞌ siꞌe̱ ra̱,
te̱ ni̱ sa̱kaaꞌ ña̱ꞌaꞌ ra̱ xata̱ꞌ mburru,
te̱ ni̱ na̱ndi̱koꞌ ra̱ nuu̱ꞌ ñu̱ꞌuꞌ Egipto.
Te̱ naá ka̱roti Ndiosí nda̱ꞌaꞌ ra̱ kuaꞌa̱n ra̱.
21 Te̱ ni̱ kaꞌa̱n Yahvé xiinꞌ Moisés ndii:
―Kii̱ꞌ na̱xaa̱ u̱nꞌ nuu̱ꞌ ñu̱ꞌuꞌ Egipto ndii,
nä̱ndoso̱ꞌ u̱nꞌ sa̱a̱ u̱nꞌ nuu̱ꞌ Faraón sa̱kuuꞌ ña̱ niaꞌá ña̱ ni̱ ta̱xi̱ i̱ nda̱ꞌaꞌ u̱nꞌ sa̱a̱ u̱nꞌ nuu̱ꞌ ra̱.
Ndisu̱ sa̱xi̱i̱ yuꞌu̱ nimá ra̱,
te̱ tä̱xi̱ ra̱ ki̱e̱e̱ ne̱ vi̱ꞌe̱ Israel ñu̱u̱ ja̱a̱nꞌ.
22 Sa̱kanꞌ na kaꞌa̱n u̱nꞌ xiinꞌ Faraón ndii:
“Ña̱ yo̱ꞌo̱ꞌ kaꞌán Yahvé:
‘Israel nduuꞌ siꞌe̱ i̱,
te̱ nu̱uꞌ.
23 Xa̱ ni̱ kaꞌa̱n i̱ xiinꞌ u̱nꞌ ña̱ ta̱xi̱ u̱nꞌ ke̱ta̱ siꞌe̱ i̱,
te̱ kuꞌu̱n sa̱kaꞌnuꞌ ra̱ yuꞌu̱,
ndisu̱ xaꞌa̱ꞌ a̱ ña̱ nï̱ ta̱xi̱ u̱nꞌ ke̱ta̱ ra̱ ndii,
ka̱ꞌni̱ꞌ i̱ siꞌe̱ u̱nꞌ te̱ nu̱uꞌ”’,
katyi̱ u̱nꞌ ―ni̱ katyi̱ a̱.
24 Kii̱ꞌ naá Moisés i̱tyiꞌ kuaꞌa̱n ra̱ nuu̱ꞌ ñu̱ꞌuꞌ Egipto,
te̱ ni̱ xa̱a̱ ra̱ i̱i̱n xaanꞌ miiꞌ kusu̱n ra̱ ñu̱u ja̱a̱nꞌ ndii,
ni̱ ki̱xi̱n na̱taꞌanꞌ Yahvé xiinꞌ ra̱,
te̱ ndee tyaaꞌ va̱ ka̱ꞌni̱ꞌ ña̱ꞌaꞌ a̱.
25 Ndisu̱ ñaꞌ siꞌi ra̱ Séfora ndii,
ni̱ ki̱ꞌi̱n aꞌ i̱i̱n yuu̱ꞌ xíinꞌ,
te̱ ni̱ xa̱ꞌndi̱a̱ aꞌ i̱i̱nꞌ xíniꞌ limaꞌ tiaa̱ siꞌe̱ aꞌ.
Ndi̱ꞌi̱ ja̱a̱nꞌ,
te̱ ni̱ sa̱kanaꞌ aꞌ a̱ te̱i̱n xaꞌa̱ꞌ Moisés,
te̱ ni̱ kaꞌa̱n aꞌ xiinꞌ ra̱ ndii:
“Vi̱ti̱n ndii,
i̱i̱ꞌ mi̱iꞌ xa̱tyiꞌ i̱ nduuꞌ u̱nꞌ xaꞌa̱ꞌ níiꞌ kaa̱ꞌ”,
ni̱ katyi̱ aꞌ.
26 Ni̱ kaꞌa̱n Séfora ña̱ i̱i̱ꞌ mi̱iꞌ xa̱tyiꞌ aꞌ nduuꞌ Moisés xaꞌa̱ꞌ níiꞌ ja̱a̱nꞌ,
ko̱to̱ ka̱ ni̱ xa̱ꞌndi̱a̱ aꞌ i̱i̱nꞌ xíniꞌ limaꞌ tiaa̱ siꞌe̱ aꞌ ja̱a̱nꞌ.
Te̱ kii̱ꞌ ndi̱ꞌi̱ ni̱ xkaꞌndi̱a̱ sa̱kuuꞌ ña̱ ja̱a̱nꞌ ndii,
ni̱ na̱ko̱o̱ Ndiosí Moisés,
te̱ kuaꞌa̱n a̱.
27 Sa̱kanꞌ te̱ ni̱ kaꞌa̱n Yahvé xiinꞌ Aarón ndii:
―Kuaꞌan te̱ na̱taꞌanꞌ u̱nꞌ xiinꞌ ña̱ni̱ u̱nꞌ Moisés miiꞌ i̱tyi kaaꞌ ―ni̱ katyi̱ a̱.
Te̱ ni̱ xaꞌa̱n na̱taꞌanꞌ Aarón xiinꞌ Moisés xaꞌa̱ꞌ i̱kuꞌ Ndiosí,
te̱ ni̱ tyi̱to ra̱ nuu̱ꞌ te̱ ja̱a̱nꞌ nakuatuꞌ ña̱ꞌaꞌ ra̱.
28 Sa̱kanꞌ te̱ ni̱ kaꞌa̱n Moisés xiinꞌ ra̱ xaꞌa̱ꞌ sa̱kuuꞌ ña̱ ni̱ kaꞌa̱n tyuunꞌ Ndiosí xiinꞌ ra̱ kaꞌa̱n ra̱,
te̱ ni̱ kaꞌa̱n tu̱ ra̱ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ ni̱ kaꞌa̱n tyuunꞌ a̱ xiinꞌ ra̱ sa̱a̱ ra̱.
29 I̱kanꞌ te̱ ni̱ xaꞌa̱n uvi̱ sa̱aꞌ ra̱,
te̱ ni̱ na̱ka̱ya̱ ra̱ sa̱kuuꞌ te̱ kuuꞌ nu̱uꞌ nuu̱ꞌ ne̱ vi̱ꞌe̱ Israel.
30 Te̱ ni̱ kaꞌa̱n Aarón xiinꞌ ni̱a̱ xaꞌa̱ꞌ sa̱kuuꞌ ña̱ ni̱ kaꞌa̱n tyuunꞌ Ndiosí xiinꞌ Moisés sa̱a̱ ra̱,
te̱ ni̱ xa̱a̱ tu̱ Moisés sa̱kuuꞌ tyu̱u̱n kaꞌnuꞌ ña̱ ni̱ kaꞌa̱n tyuunꞌ Ndiosí xiinꞌ ra̱ sa̱a̱ ra̱ nuu̱ꞌ ni̱a̱.
31 Sa̱kanꞌ na ni̱ ka̱ndi̱xaꞌ ne̱ Israel ña̱ Ndiosí xna̱ꞌa̱ ni̱ ti̱ꞌviꞌ Moisés xiinꞌ Aarón.
Te̱ kii̱ꞌ ni̱ xi̱ni̱ so̱ꞌo̱ ni̱a̱ ña̱ ndiꞌni̱ Ndiosí xaꞌa̱ꞌ ni̱a̱,
te̱ xa̱ ni̱ xi̱ni̱ tu̱ a̱ sa̱a̱ vi̱ꞌ ndoꞌoꞌ ni̱a̱ ndii,
ni̱ xi̱ku̱ndiee̱ ndi̱e̱e̱ sa̱kuuꞌ ni̱a̱,
te̱ ni̱ xa̱kaꞌnuꞌ ña̱ꞌaꞌ ni̱a̱.