So̱ꞌo̱ ni̱ xa̱a̱ a̱ kii̱ꞌ ni̱ xi̱ni̱ Moisés xixí i̱ñu̱ꞌ kuii̱ꞌ
3
Untaꞌ kii̱ꞌ naá Moisés xitoꞌ ra̱ mbe̱e̱ sana̱ Jetro,
ti̱so̱ ra̱,
te̱ naniꞌ tu̱ Reuel,
te̱ nduuꞌ sutu̱ nuu̱ꞌ ñu̱ꞌuꞌ Madián ndii,
ni̱ xkaꞌndi̱a̱ ra̱ xiinꞌ riꞌ nde̱e̱ miiꞌ i̱tyi kaaꞌ nde̱e̱ ni̱ xa̱a̱ ra̱ xaꞌa̱ꞌ i̱kuꞌ ña̱ naniꞌ Horeb,
ña̱ nduuꞌ i̱kuꞌ Ndiosí.
2 Te̱ i̱kanꞌ ni̱ tuvi̱ ángele ña̱ xikaꞌ nuuꞌ nuu̱ꞌ Yahvé te̱i̱n i̱ñu̱ꞌ kuii̱ꞌ ndatin nuu̱ꞌ ra̱,
te̱ ni̱ xi̱to̱ kaxiꞌ ra̱ ña̱ xixí i̱ñu̱ꞌ ja̱a̱nꞌ,
ndisu̱ kuäsa̱ꞌ ndiꞌiꞌ a̱ xixí.
3 Sa̱kanꞌ te̱ ni̱ kaꞌa̱n Moisés xiinꞌ nimá ra̱ ndii:
“Na kuꞌu̱n ya̱ti̱n i̱ te̱ ku̱ni̱ i̱ ña̱ nda̱tu̱nꞌ ña̱ satuví a̱ nuu̱ꞌ i̱ kaa̱ꞌ,
¿ndiotyun na xixí i̱ñu̱ꞌ kaa̱ꞌ te̱ kuäsa̱ꞌ ndiꞌiꞌ a̱ xixí?”,
ni̱ katyi̱ ra̱.
4 Te̱ kii̱ꞌ ni̱ xi̱ni̱ Yahvé ña̱ kuaꞌa̱n kuyatinꞌ Moisés i̱kanꞌ te̱ ko̱to̱ kaxiꞌ ra̱,
te̱ ni̱ kaꞌa̱n a̱ xiinꞌ ra̱ nde̱e̱ te̱i̱n i̱ñu̱ꞌ ja̱a̱nꞌ ndii:
―¡Moisés,
Moisés!
―ni̱ katyi̱ a̱.
Te̱ ni̱ na̱ku̱i̱i̱n ra̱ ndii:
―Yoꞌoꞌ iinꞌ i̱ ―ni̱ katyi̱ ra̱.
5 Sa̱kanꞌ te̱ ni̱ kaꞌa̱n Ndiosí xiinꞌ ra̱ ndii:
―Kü̱ya̱ti̱n ka̱ u̱nꞌ,
ta̱va̱ꞌ ndixa̱nꞌ xaꞌa̱ꞌ u̱nꞌ,
sa̱kanꞌ ña̱ ñu̱ꞌuꞌ miiꞌ iinꞌ u̱nꞌ ñaa̱ꞌ ndii,
ñu̱ꞌuꞌ su̱ꞌu̱n nduuꞌ a̱ ―ni̱ katyi̱ a̱.
6 Te̱ ni̱ kaꞌa̱n ka̱ a̱ xiinꞌ ra̱ ndii:
―Yuꞌu̱ nduuꞌ Ndiosí ña̱ xakaꞌnuꞌ te̱ xii̱ꞌ ya̱taꞌ u̱nꞌ.
Yuꞌu̱ nduuꞌ Ndiosí ña̱ xakaꞌnuꞌ Abraham,
te̱ yuꞌu̱ nduuꞌ tu̱ Ndiosí ña̱ xakaꞌnuꞌ Isaac,
te̱ yuꞌu̱ nduuꞌ tu̱ Ndiosí ña̱ xakaꞌnuꞌ Jacob ―ni̱ katyi̱ a̱.
Te̱ kii̱ꞌ ni̱ xi̱ni̱ so̱ꞌo̱ Moisés ña̱ ja̱a̱nꞌ ndii,
ni̱ ti̱saꞌvi̱ ra̱ nuu̱ꞌ ra̱ xaꞌa̱ꞌ a̱ ña̱ ni̱ yi̱ꞌvi ra̱ ku̱ni̱ ra̱ nuu̱ꞌ Ndiosí.
7 Te̱ ni̱ kaꞌa̱n Yahvé xiinꞌ ra̱ ndii:
―Xa̱ ni̱ xi̱ni̱ kaxiꞌ i̱ ña̱ ndoꞌoꞌ ne̱ nduuꞌ kuenta i̱,
ne̱ ndieeꞌ nuu̱ꞌ ñu̱ꞌuꞌ Egipto.
Te̱ xa̱ ni̱ xi̱ni̱ so̱ꞌo̱ tu̱ i̱ ña̱ tanaꞌ ndi̱i ni̱a̱ xaꞌa̱ꞌ a̱ ña̱ sa̱ndoꞌoꞌ ña̱ꞌaꞌ te̱ xaꞌndia tyuunꞌ nuu̱ꞌ ni̱a̱,
sa̱kanꞌ ña̱ xiní kaxiꞌ i̱ ña̱ ndoꞌoꞌ ni̱a̱.
8 Sa̱kanꞌ na kuiiꞌ ni̱ nu̱u̱ i̱ te̱ sa̱kakú ña̱ꞌaꞌ i̱ nda̱ꞌaꞌ te̱ Egipto,
te̱ ta̱va̱ꞌ tu̱ ña̱ꞌaꞌ i̱ nuu̱ꞌ ñu̱ꞌuꞌ Egipto ja̱a̱nꞌ,
te̱ kuꞌu̱n ndi̱a̱ka̱ ña̱ꞌaꞌ i̱ ku̱ndi̱e̱e̱ ni̱a̱ nuu̱ꞌ i̱i̱n ñu̱ꞌuꞌ tyiee̱,
ñu̱ꞌuꞌ miiꞌ yoo kuaꞌa̱ꞌ ña̱ xaxi̱ꞌ,
te̱ yoo kuaꞌa̱ꞌ tu̱ ña̱ va̱ꞌa̱ nde̱e̱ naa letyin,
xiinꞌ ñuñu̱ꞌ.
Te̱ ñu̱ꞌuꞌ ja̱a̱nꞌ ndii,
miiꞌ ndieeꞌ te̱ vi̱ꞌe̱ cananeo,
xiinꞌ te̱ vi̱ꞌe̱ hitita,
xiinꞌ te̱ vi̱ꞌe̱ amorreo,
xiinꞌ te̱ vi̱ꞌe̱ ferezeo,
xiinꞌ te̱ vi̱ꞌe̱ heveo,
xiinꞌ te̱ vi̱ꞌe̱ jebuseo nduuꞌ a̱.
9 Ko̱to̱ u̱nꞌ,
xa̱ ni̱ xi̱ni̱ so̱ꞌo̱ i̱ ña̱ tanaꞌ ndi̱i ne̱ vi̱ꞌe̱ Israel,
te̱ xa̱ ni̱ xi̱ni̱ tu̱ i̱ ña̱ sandoꞌoꞌ uꞌvi̱ va̱ ña̱ꞌaꞌ te̱ Egipto.
10 Sa̱kanꞌ na kuiiꞌ ni̱a̱ꞌa̱ te̱ ti̱ꞌviꞌ i̱ yoꞌó nuu̱ꞌ Faraón,
te̱ ta̱va̱ꞌ u̱nꞌ ne̱ nduuꞌ kuenta i̱,
ne̱ vi̱ꞌe̱ Israel,
nuu̱ꞌ ñu̱ꞌuꞌ Egipto ja̱a̱nꞌ ―ni̱ katyi̱ a̱.
11 Sa̱kanꞌ te̱ ni̱ kaꞌa̱n Moisés xiinꞌ Ndiosí ndii:
―Köo̱ꞌ nduuꞌ xa̱tyiꞌ yuꞌu̱ na sa̱kuisoꞌ tyuunꞌ u̱nꞌ yuꞌu̱ te̱ kuꞌu̱n i̱ nuu̱ꞌ Faraón,
te̱ ta̱va̱ꞌ i̱ ne̱ vi̱ꞌe̱ i̱ Israel nuu̱ꞌ ñu̱ꞌuꞌ Egipto ra̱nꞌ,
Tákuiꞌe ―ni̱ katyi̱ ra̱.
12 Te̱ ni̱ kaꞌa̱n Ndiosí xiinꞌ ra̱ ndii:
―Kuaꞌan,
sa̱kanꞌ ña̱ yuꞌu̱ kuꞌu̱n xiinꞌ u̱nꞌ,
te̱ xiinꞌ ña̱ yo̱ꞌo̱ꞌ niaꞌa̱ u̱nꞌ ña̱ yuꞌu̱ tiꞌviꞌ yoꞌó.
Te̱ kii̱ꞌ ndi̱ꞌi̱ ta̱va̱ꞌ u̱nꞌ ne̱ nduuꞌ kuenta i̱ ja̱a̱nꞌ nuu̱ꞌ ñu̱ꞌuꞌ Egipto ndii,
sa̱kaꞌnuꞌ sa̱kuuꞌ ndo̱ꞌ yuꞌu̱ xíniꞌ i̱kuꞌ yoꞌoꞌ ―ni̱ katyi̱ a̱.
13 Ndisu̱ tu̱ku̱ ni̱ ni̱ kaꞌa̱n Moisés xiinꞌ Ndiosí ndii:
―Sa̱a̱ e̱ꞌ kuenta ndii,
kuꞌu̱n i̱ nuu̱ꞌ ne̱ Israel ja̱a̱nꞌ,
te̱ kaꞌa̱n i̱ xiinꞌ ni̱a̱ ndii:
“Ndiosí,
ña̱ xakaꞌnuꞌ te̱ xii̱ꞌ ya̱taꞌ e̱ꞌ,
ni̱ ti̱ꞌviꞌ yuꞌu̱ ku̱a̱xi̱ i̱ nuu̱ꞌ ndo̱ꞌ”,
katyi̱ i̱ xiinꞌ ni̱a̱.
Te̱ naaꞌ nda̱tuꞌu̱nꞌ ne̱ ja̱a̱nꞌ yuꞌu̱ ndii:
“¿Sa̱a̱ naniꞌ Ndiosí ja̱a̱nꞌ?”,
katyi̱ ni̱a̱ xiinꞌ i̱.
¿Yo̱o̱ nduuꞌ a̱ kaꞌa̱n i̱ xiinꞌ ni̱a̱?
―ni̱ katyi̱ ra̱.
14 Te̱ ni̱ kaꞌa̱n Ndiosí xiinꞌ ra̱ ndii:
―YUꞌU̱ NDUUꞌ ÑA̱ NDUUꞌ I̱.
Sa̱kanꞌ na kuiiꞌ kaꞌa̱n u̱nꞌ xiinꞌ ne̱ Israel ndii:
“Ña̱ nduuꞌ YUꞌU̱ NDUUꞌ I̱ ni̱ ti̱ꞌviꞌ yuꞌu̱,
te̱ ku̱a̱xi̱ i̱ nuu̱ꞌ ndo̱ꞌ”,
katyi̱ u̱nꞌ xiinꞌ ni̱a̱ ―ni̱ katyi̱ a̱.
15 Te̱ ni̱ kaꞌa̱n ka̱ Ndiosí xiinꞌ Moisés ndii:
―Kaꞌa̱n tu̱ u̱nꞌ xiinꞌ ne̱ Israel ndii:
“Yahvé Ndiosí,
ña̱ xakaꞌnuꞌ te̱ xii̱ꞌ ya̱taꞌ ndo̱ꞌ,
Ndiosí ña̱ xakaꞌnuꞌ Abraham,
ña̱ xakaꞌnuꞌ Isaac,
ña̱ xakaꞌnuꞌ Jacob,
ni̱ ti̱ꞌviꞌ yuꞌu̱ ku̱a̱xi̱ i̱ nuu̱ꞌ ndo̱ꞌ”,
katyi̱ u̱nꞌ xiinꞌ ni̱a̱.
Sa̱kanꞌ naniꞌ i̱ nde̱e̱ ndiꞌiꞌ ni̱ kivi̱ꞌ,
te̱ ña̱ kaa̱ꞌ nduuꞌ kivi̱ꞌ i̱ ña̱ kuní a̱ na̱ka̱ꞌanꞌ ne̱ yivi̱ꞌ yuꞌu̱ nde̱e̱ a̱ma̱ ka̱ ni̱.
16 ’Kuaꞌan te̱ na̱ka̱ya̱ u̱nꞌ te̱ xi̱xa̱ nuu̱ꞌ ne̱ Israel,
te̱ kaꞌa̱n u̱nꞌ xiinꞌ ra̱ ndii:
“Yahvé Ndiosí,
ña̱ xakaꞌnuꞌ te̱ xii̱ꞌ ya̱taꞌ ndo̱ꞌ,
Ndiosí ña̱ xakaꞌnuꞌ Abraham,
ña̱ xakaꞌnuꞌ Isaac,
ña̱ xakaꞌnuꞌ Jacob,
ni̱ tuvi̱ nuu̱ꞌ i̱,
te̱ ni̱ kaꞌa̱n a̱ xiinꞌ i̱ ndii:
‘Sa̱aꞌ va̱ tyunxaꞌaꞌ i̱ ndoꞌó,
te̱ xa̱ ni̱ xi̱ni̱ i̱ ña̱ sandoꞌoꞌ va̱ te̱ Egipto ndoꞌó’,
ni̱ katyi̱ a̱.
17 Te̱ ni̱ kaꞌa̱n tu̱ a̱ ndii:
‘Xa̱ ni̱ ta̱xi̱ i̱ kuento i̱ ña̱ ta̱va̱ꞌ ndoꞌó nuu̱ꞌ ñu̱ꞌuꞌ Egipto miiꞌ sa̱ndoꞌoꞌ te̱ Egipto ja̱a̱nꞌ ndoꞌó,
te̱ kuꞌu̱n ndi̱a̱ka̱ i̱ ndoꞌó ku̱ndi̱e̱e̱ ndo̱ꞌ nuu̱ꞌ ñu̱ꞌuꞌ miiꞌ ndieeꞌ te̱ vi̱ꞌe̱ cananeo,
xiinꞌ te̱ vi̱ꞌe̱ hitita,
xiinꞌ te̱ vi̱ꞌe̱ amorreo,
xiinꞌ te̱ vi̱ꞌe̱ ferezeo,
xiinꞌ te̱ vi̱ꞌe̱ heveo,
xiinꞌ te̱ vi̱ꞌe̱ jebuseo.
Te̱ nuu̱ꞌ ñu̱ꞌuꞌ ja̱a̱nꞌ ndii,
yoo kuaꞌa̱ꞌ ña̱ xaxi̱ꞌ,
te̱ yoo kuaꞌa̱ꞌ tu̱ ña̱ va̱ꞌa̱ nde̱e̱ naa letyin xiinꞌ ñuñu̱ꞌ’”,
katyi̱ u̱nꞌ.
18 ’Te̱ ta̱xi̱ so̱ꞌo̱ ni̱a̱ ña̱ kaꞌa̱n u̱nꞌ,
te̱ kuꞌu̱n yoꞌó xiinꞌ te̱ xi̱xa̱ nuu̱ꞌ ne̱ vi̱ꞌe̱ Israel ja̱a̱nꞌ miiꞌ nduꞌu̱ꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ Egipto ja̱a̱nꞌ,
te̱ kaꞌa̱n u̱nꞌ xiinꞌ ra̱ ndii:
“Yahvé,
Ndiosí nduꞌu̱,
ne̱ vi̱ꞌe̱ hebreo ndii,
ni̱ ki̱xi̱n na̱taꞌanꞌ a̱ xiinꞌ ndu̱.
Xaꞌa̱ꞌ a̱ ja̱a̱nꞌ na ta̱xi̱ u̱nꞌ na kuꞌu̱n ndu̱ i̱tyiꞌ ña̱ ku̱vi̱ na̱xaa̱ ndu̱ uni̱ taꞌan kivi̱ꞌ miiꞌ i̱tyi kaaꞌ,
te̱ na̱soko̱ꞌ ndu̱ ki̱tiꞌ nuu̱ꞌ Yahvé,
Ndiosí ndu̱,”
katyi̱ ndo̱ꞌ.
19 Ndisu̱ xiní yuꞌu̱ ña̱ tä̱xi̱ ra̱ kuꞌu̱n ndo̱ꞌ naaꞌ sä̱a̱ i̱ ña̱ ndi̱e̱eꞌ xiinꞌ ra̱.
20 Xaꞌa̱ꞌ a̱ ja̱a̱nꞌ na niaꞌa̱ yuꞌu̱ ne̱ Egipto ña̱ kumiꞌ i̱ ndi̱e̱e̱ꞌ,
te̱ sa̱ndoꞌoꞌ i̱ ne̱ ja̱a̱nꞌ xiinꞌ sa̱kuuꞌ nuu̱ꞌ ña̱ i̱yo̱,
ña̱ sa̱a̱ i̱ ñu̱u̱ ni̱a̱,
ndi̱ꞌi̱ ja̱a̱nꞌ te̱ ta̱xi̱ ra̱ ki̱e̱e̱ ndo̱ꞌ.
21 ’Te̱ siinꞌ tu̱ku̱ ndii,
mi̱iꞌ yuꞌu̱ sa̱a̱ sa̱kanꞌ,
te̱ va̱ꞌa̱ kuni ne̱ Egipto ja̱a̱nꞌ ku̱ni̱ ni̱a̱ ndoꞌó,
te̱ sa̱mani̱ꞌ ni̱a̱ ndoꞌó kuaꞌa̱ꞌ ña̱ꞌa̱,
sa̱kanꞌ te̱ kï̱e̱e̱ nda̱ꞌaꞌ xikoꞌ ndo̱ꞌ nuu̱ꞌ ñu̱ꞌuꞌ ja̱a̱nꞌ.
22 I̱ꞌi̱n ña̱ꞌaꞌ ndii,
kaka̱n ni̱a̱ nuu̱ꞌ ne̱ ndieeꞌ ya̱ti̱n vi̱ꞌe̱ ndo̱ꞌ,
uun nuu̱ꞌ ndee ka̱ i̱nga̱ ña̱ꞌaꞌ,
ne̱ ndieeꞌ xiinꞌ ni̱a̱,
ña̱ ta̱xi̱ ne̱ ja̱a̱nꞌ ndee ka̱ ña̱ꞌa̱ ña̱ ni̱ ku̱a̱ꞌa̱ xiinꞌ plata,
uun xiinꞌ oro,
uun toto̱ ña̱ ku̱i̱ꞌnu̱ tiaa̱ siꞌe̱ ndo̱ꞌ,
uun ña̱ꞌaꞌ siꞌe̱ ndo̱ꞌ sa̱a̱ ndo̱ꞌ.
Te̱ xiinꞌ ña̱ ja̱a̱nꞌ na̱ko̱o̱ ndaꞌvi xa̱tyiꞌ ndo̱ꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ ―ni̱ katyi̱ a̱.