So̱ꞌo̱ ni̱ xa̱a̱ a̱ kii̱ꞌ ni̱ xa̱a̱ Jacob nuu̱ꞌ ñu̱ꞌuꞌ Egipto
46
Sa̱kanꞌ te̱ ni̱ ke̱ta̱ Israel kuaꞌa̱n ra̱ ndisoꞌ ra̱ sa̱kuuꞌ ña̱ kumiꞌ ra̱, te̱ kii̱ꞌ ni̱ xa̱a̱ ra̱ miiꞌ naniꞌ a̱ Beerseba ndii, ni̱ na̱soko̱ꞌ ra̱ ki̱tiꞌ nuu̱ꞌ Ndiosí, ña̱ ni̱ xa̱kaꞌnuꞌ Isaac, yu̱vaꞌ ra̱.
2 Te̱ ni̱ tuvi̱ Ndiosí ñu̱u ja̱a̱nꞌ nuu̱ꞌ Israel kaꞌán a̱ xiinꞌ ra̱ ndii:
―Jacob, Jacob ―ni̱ katyi̱ a̱.
Te̱ ni̱ na̱ku̱i̱i̱n ra̱ ndii:
―Yoꞌoꞌ iinꞌ i̱ ―ni̱ katyi̱ ra̱.
3 Te̱ ni̱ kaꞌa̱n a̱ xiinꞌ ra̱ ndii:
―Yuꞌu̱ nduuꞌ Ndiosí, Ndiosí ña̱ ni̱ xa̱kaꞌnuꞌ yu̱vaꞌ u̱nꞌ. Kuäa̱n yiꞌvi u̱nꞌ na̱kaa̱ꞌ u̱nꞌ nuu̱ꞌ ñu̱ꞌuꞌ Egipto ku̱nduꞌu̱ꞌ u̱nꞌ, sa̱kanꞌ ña̱ i̱kanꞌ nda̱sa̱kuaꞌa̱ꞌ va̱ i̱ ne̱ i̱tyiꞌ u̱nꞌ.
4 Kuꞌu̱n i̱ xiinꞌ u̱nꞌ nuu̱ꞌ ñu̱ꞌuꞌ Egipto ja̱a̱nꞌ, te̱ mi̱iꞌ tu̱ i̱ ta̱va̱ꞌ ne̱ i̱tyiꞌ u̱nꞌ nuu̱ꞌ ñu̱ꞌuꞌ ja̱a̱nꞌ ki̱taꞌa̱n te̱ na̱ndi̱koꞌ ni̱a̱ sa̱a̱ i̱. Te̱ kii̱ꞌ ku̱vi̱ u̱nꞌ ndii, ko̱o̱ José xiinꞌ u̱nꞌ, te̱ nda̱si̱ nda̱ꞌaꞌ ra̱ ndu̱tyiꞌ nuu̱ꞌ u̱nꞌ ―ni̱ katyi̱ a̱ xiinꞌ ra̱.
5 Sa̱kanꞌ te̱ ni̱ ke̱ta̱ Jacob ñu̱u̱ Beerseba ja̱a̱nꞌ, te̱ kuaꞌa̱n ra̱ nde̱e̱ ñu̱ꞌuꞌ Egipto xiinꞌ siꞌe̱ ra̱. Sa̱kanꞌ na ni̱ sa̱kaaꞌ ña̱ꞌaꞌ siꞌe̱ ra̱ ja̱a̱nꞌ nuu̱ꞌ carreta, te̱ ni̱ sa̱kaaꞌ tu̱ ra̱ ne̱ kuatyi̱ꞌ kualiꞌ, xiinꞌ ñaꞌ siꞌi ra̱ nuu̱ꞌ carreta, tunꞌ ni̱ ti̱ꞌviꞌ Faraón kuꞌu̱n Jacob nuu̱ꞌ ñu̱ꞌuꞌ Egipto.
6 Sa̱kanꞌ na kuiiꞌ ni̱ ke̱ta̱ Jacob kuaꞌa̱n ra̱ xiinꞌ sa̱kuuꞌ ne̱ i̱i̱n kuuꞌ xiinꞌ ra̱ nuu̱ꞌ ñu̱ꞌuꞌ Egipto, te̱ kuaꞌa̱n tu̱ sa̱kuuꞌ si̱ndiki̱ꞌ sana̱ ra̱, xiinꞌ mbe̱e̱ sana̱ ra̱, xiinꞌ sa̱kuuꞌ ña̱ ni̱ ka̱ya̱ ra̱ nuu̱ꞌ ñu̱ꞌuꞌ Canaán ja̱a̱nꞌ xiinꞌ ra̱.
7 Te̱ kuaꞌa̱n tu̱ sa̱kuuꞌ tiaa̱ siꞌe̱ ra̱, xiinꞌ ña̱ꞌaꞌ siꞌe̱ ra̱ xiinꞌ ra̱, te̱ sa̱kanꞌ tu̱ kuaꞌa̱n sa̱kuuꞌ tiaa̱ si̱a̱niꞌ ra̱ xiinꞌ ña̱ꞌaꞌ si̱a̱niꞌ ra̱ xiinꞌ ra̱. Sa̱kanꞌ na kuiiꞌ sa̱kuuꞌ ne̱ nduuꞌ ne̱ vi̱ꞌe̱ ra̱ ni̱ xa̱a̱ xiinꞌ ra̱ nuu̱ꞌ ñu̱ꞌuꞌ Egipto ja̱a̱nꞌ.
8 Ña̱ yo̱ꞌo̱ nduuꞌ kivi̱ꞌ ne̱ vi̱ꞌe̱ Jacob, ne̱ ni̱ xa̱a̱ xiinꞌ ra̱ nuu̱ꞌ ñu̱ꞌuꞌ Egipto, ne̱ nduuꞌ siꞌe̱ ra̱ xiinꞌ si̱a̱niꞌ ra̱: Rubén nduuꞌ siꞌe̱ nu̱uꞌ Jacob.
9 Te̱ ña̱ yo̱ꞌo̱ nduuꞌ kivi̱ꞌ siꞌe̱ Rubén: I̱i̱n ra̱ ni̱ na̱niꞌ Hanoc, te̱ i̱nga̱ ra̱ ni̱ na̱niꞌ Falú, te̱ i̱nga̱ ra̱ ni̱ na̱niꞌ Hezrón, te̱ i̱nga̱ ra̱ ni̱ na̱niꞌ Carmi.
10 Ña̱ yo̱ꞌo̱ nduuꞌ kivi̱ꞌ siꞌe̱ Simeón: I̱i̱n ra̱ ni̱ na̱niꞌ Jemuel, te̱ i̱nga̱ ra̱ ni̱ na̱niꞌ Jamín, te̱ i̱nga̱ ra̱ ni̱ na̱niꞌ Ohad, te̱ i̱nga̱ ra̱ ni̱ na̱niꞌ Jaquín, te̱ i̱nga̱ ra̱ ni̱ na̱niꞌ Zohar, te̱ i̱nga̱ ra̱ ni̱ na̱niꞌ Saúl, te̱ nduuꞌ siꞌe̱ ra̱ xiinꞌ i̱i̱n ñaꞌ ni̱ ki̱e̱e̱ nuu̱ꞌ ñu̱ꞌuꞌ Canaán.
11 Ña̱ yo̱ꞌo̱ nduuꞌ kivi̱ꞌ siꞌe̱ Leví: I̱i̱n ra̱ ni̱ naniꞌ Gersón, i̱nga̱ ra̱ ni̱ na̱niꞌ Coat, te̱ i̱nga̱ ra̱ ni̱ na̱niꞌ Merari.
12 Ña̱ yo̱ꞌo̱ nduuꞌ kivi̱ꞌ siꞌe̱ Judá: I̱i̱n ra̱ ni̱ na̱niꞌ Er, te̱ i̱nga̱ ra̱ ni̱ na̱niꞌ Onán, te̱ i̱nga̱ ra̱ ni̱ na̱niꞌ Selá, te̱ i̱nga̱ ra̱ ni̱ na̱niꞌ Fares, te̱ i̱nga̱ ra̱ ni̱ na̱niꞌ Zara. Te̱ nduuꞌ Er xiinꞌ Onán ja̱a̱nꞌ ndii, nuu̱ꞌ ñu̱ꞌuꞌ Canaán ni̱ xiꞌi̱ ra̱. Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Fares: I̱i̱n ra̱ ni̱ na̱niꞌ Hezrón, te̱ i̱nga̱ ra̱ ni̱ na̱niꞌ Hamul.
13 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Isacar: I̱i̱n ra̱ ni̱ na̱niꞌ Tolá, te̱ i̱nga̱ ra̱ ni̱ na̱niꞌ Fúa, te̱ i̱nga̱ ra̱ ni̱ naniꞌ Job, te̱ i̱nga̱ ra̱ ni̱ na̱niꞌ Simrón.
14 Ña̱ yo̱ꞌo̱ nduuꞌ kivi̱ꞌ siꞌe̱ Zabulón: I̱i̱n ra̱ ni̱ na̱niꞌ Sered, te̱ i̱nga̱ ra̱ ni̱ na̱niꞌ Elón, te̱ i̱nga̱ ra̱ ni̱ na̱niꞌ Jahleel.
15 Te̱ sa̱kuuꞌ te̱ ja̱a̱nꞌ nduuꞌ siꞌe̱ Jacob xiinꞌ Lea, te̱ ni̱ tuvi̱ nuu̱ꞌ ñu̱ꞌuꞌ Padán-arám, te̱ ni̱ yoo̱ tu̱ ña̱ꞌaꞌ siꞌe̱ ra̱, ñaꞌ na̱niꞌ Dina. Sa̱kanꞌ na kuiiꞌ ña̱ sa̱kuuꞌ siꞌe̱ ra̱ xiinꞌ Lea, tiaa̱ ni̱ xiinꞌ ña̱ꞌaꞌ ni̱ ndii, oko̱ uxi̱ uni̱ ni̱ ku̱u̱ ni̱a̱.
16 Ña̱ yo̱ꞌo̱ nduuꞌ kivi̱ꞌ siꞌe̱ Gad: I̱i̱n ra̱ ni̱ na̱niꞌ Zifión, te̱ i̱nga̱ ra̱ ni̱ na̱niꞌ Hagui, te̱ i̱nga̱ ra̱ ni̱ na̱niꞌ Ezbón, te̱ i̱nga̱ ra̱ ni̱ na̱niꞌ Suni, te̱ i̱nga̱ ra̱ ni̱ na̱niꞌ Eri, te̱ i̱nga̱ ni̱ na̱niꞌ Arodi, te̱ i̱nga̱ ra̱ ni̱ na̱niꞌ Areli.
17 Ña̱ yo̱ꞌo̱ nduuꞌ kivi̱ꞌ siꞌe̱ Aser: I̱i̱n ra̱ ni̱ na̱niꞌ Imna, te̱ i̱nga̱ ra̱ ni̱ na̱niꞌ Isúa, te̱ i̱nga̱ ra̱ ni̱ na̱niꞌ Isúi, te̱ i̱nga̱ ni̱ na̱niꞌ Bería, te̱ ni̱ yoo̱ i̱i̱n ñaꞌ taꞌanꞌ ra̱ ni̱ na̱niꞌ Sera. Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Bería ja̱a̱nꞌ: I̱i̱n ra̱ ni̱ na̱niꞌ Heber, te̱ i̱nga̱ ni̱ na̱niꞌ Malquiel.
18 Ña̱ yo̱ꞌo̱ nduuꞌ kivi̱ꞌ siꞌe̱ Jacob, te̱ ni̱ yoo̱ xiinꞌ Zilpa, ñaꞌ xikaꞌ nuuꞌ ñaꞌ ni̱ ta̱xi̱ Labán nda̱ꞌaꞌ Lea, siꞌe̱ ra̱, ka̱ka̱ nu̱u̱ nuu̱ꞌ aꞌ. Te̱ ña̱ sa̱kuuꞌ siꞌe̱ ra̱ xiinꞌ Zilpa ndii, xaꞌu̱n i̱i̱n ni̱ ku̱u̱ ni̱a̱.
19 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Jacob xiinꞌ ñaꞌ siꞌi ra̱ Raquel: I̱i̱n ra̱ ni̱ na̱niꞌ José, te̱ i̱nga̱ ra̱ ni̱ na̱niꞌ Benjamín.
20 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ José, te̱ ni̱ tuvi̱ nuu̱ꞌ ñu̱ꞌuꞌ Egipto: I̱i̱n ra̱ ni̱ na̱niꞌ Manasés, te̱ i̱nga̱ ra̱ ni̱ na̱niꞌ Efraín. Te̱ si̱ꞌiꞌ te̱ ja̱a̱nꞌ ndii, Asenat ni̱ na̱niꞌ aꞌ, te̱ ñaꞌ siꞌe̱ Potifera, te̱ ni̱ nduu̱ sutu̱ nuu̱ꞌ ñu̱ꞌuꞌ ña̱ naniꞌ On, ni̱ nduu̱ ñaꞌ ja̱a̱nꞌ.
21 Ña̱ yo̱ꞌo̱ nduuꞌ kivi̱ꞌ siꞌe̱ Benjamín: I̱i̱n ra̱ ni̱ na̱niꞌ Bela, te̱ i̱nga̱ ra̱ ni̱ na̱niꞌ Bequer, te̱ i̱nga̱ ra̱ ni̱ na̱niꞌ Asbel, te̱ i̱nga̱ ra̱ ni̱ na̱niꞌ Gera, te̱ i̱nga̱ ra̱ ni̱ na̱niꞌ Naamán, te̱ i̱nga̱ ra̱ ni̱ na̱niꞌ Ehi, te̱ i̱nga̱ ra̱ ni̱ na̱niꞌ Ros, te̱ i̱nga̱ ra̱ ni̱ na̱niꞌ Mupim, te̱ i̱nga̱ ra̱ ni̱ na̱niꞌ Hupim, te̱ i̱nga̱ ra̱ ni̱ na̱niꞌ Ard.
22 Sa̱kuuꞌ te̱ ja̱a̱nꞌ nduuꞌ si̱a̱niꞌ Jacob xiinꞌ Raquel, te̱ uxi̱ ku̱miꞌ kuuꞌ ni̱a̱ ña̱ sa̱kuuꞌ ni̱a̱.
23 Ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Dan: Husim ni̱ na̱niꞌ ra̱.
24 Ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Neftalí: I̱i̱n ra̱ ni̱ na̱niꞌ Jahzeel, te̱ i̱nga̱ ra̱ ni̱ na̱niꞌ Guni, te̱ i̱nga̱ ra̱ ni̱ na̱niꞌ Jezer, te̱ i̱nga̱ ra̱ ni̱ na̱niꞌ Silem.
25 Te̱ ja̱a̱nꞌ nduuꞌ siꞌe̱ Jacob xiinꞌ Bilha, ñaꞌ xikaꞌ nuuꞌ ñaꞌ ni̱ ta̱xi̱ Labán nda̱ꞌaꞌ Raquel, siꞌe̱ ra̱, ka̱ka̱ nu̱u̱ nuu̱ꞌ aꞌ. Te̱ ña̱ sa̱kuuꞌ siꞌe̱ ra̱ xiinꞌ Bilha ja̱a̱nꞌ ndii, uxa̱ taꞌan ni̱ ku̱u̱ ni̱a̱ ña̱ sa̱kuuꞌ ni̱a̱.
26 Te̱ ña̱ sa̱kuuꞌ ne̱ i̱i̱n kuuꞌ xiinꞌ Jacob, ne̱ ni̱ xa̱a̱ xiinꞌ ra̱ nuu̱ꞌ ñu̱ꞌuꞌ Egipto ndii, uni̱ xi̱ko̱ iñu̱ ni̱ ku̱u̱ ni̱a̱, ña̱ kä̱ꞌvi̱ e̱ꞌ ñaꞌ siꞌi tiaa̱ siꞌe̱ ra̱.
27 Te̱ siinꞌ tukuꞌ ndii, uvi̱ taꞌan tiaa̱ siꞌe̱ José ni̱ tuvi̱ nuu̱ꞌ ñu̱ꞌuꞌ Egipto ja̱a̱nꞌ, sa̱kanꞌ na kuiiꞌ ña̱ sa̱kuuꞌ ne̱ i̱i̱n kuuꞌ xiinꞌ Jacob, ne̱ ni̱ xa̱a̱ nuu̱ꞌ ñu̱ꞌuꞌ Egipto ja̱a̱nꞌ ndii, uni̱ xi̱ko̱ uxi̱ ni̱ ku̱u̱ ni̱a̱
28 Te̱ kii̱ꞌ xa̱ kuyatinꞌ Jacob nuu̱ꞌ ñu̱ꞌuꞌ Gosén xiinꞌ sa̱kuuꞌ ne̱ kuaꞌa̱n xiinꞌ ra̱ ndii, ni̱ ti̱ꞌviꞌ ra̱ Judá, te̱ kaꞌa̱n ra̱ xiinꞌ José ña̱ xa̱ kuyatinꞌ ni̱a̱ nuu̱ꞌ ñu̱ꞌuꞌ Gosén ja̱a̱nꞌ.
29 Sa̱kanꞌ na ni̱ kaꞌa̱n tyuunꞌ José ña̱ sa̱kooꞌ tu̱ꞌva̱ te̱ yivi̱ꞌ carreta ra̱, te̱ kuꞌu̱n na̱taꞌanꞌ ra̱ xiinꞌ yu̱vaꞌ ra̱. Kii̱ꞌ ni̱ na̱taꞌanꞌ ra̱ xiinꞌ yu̱vaꞌ ra̱ ndii, ni̱ nu̱mi̱ ra̱ suku̱nꞌ te̱ ja̱a̱nꞌ, te̱ na̱ꞌaꞌ va̱ ni̱ xa̱ku̱ ra̱ soko̱ ra̱.
30 Sa̱kanꞌ te̱ ni̱ kaꞌa̱n Israel xiinꞌ José ndii:
―Vi̱ti̱n ndii, xa̱ yoo tu̱ꞌva̱ i̱ te̱ ku̱vi̱ i̱, sa̱kanꞌ ña̱ xa̱ ni̱ xi̱ni̱ i̱ yoꞌó, te̱ xiní i̱ ña̱ tiaku ka̱ u̱nꞌ ―ni̱ katyi̱ ra̱.
31 Sa̱kanꞌ te̱ ni̱ kaꞌa̱n José xiinꞌ ña̱ni̱ ra̱, te̱ ni̱ kaꞌa̱n tu̱ ra̱ xiinꞌ sa̱kuuꞌ ne̱ vi̱ꞌe̱ yu̱vaꞌ ra̱ ndii:
―Na kuꞌu̱n ko̱to̱ i̱ Faraón, te̱ kaꞌa̱n i̱ xiinꞌ ra̱ ndii: “Xa̱ ni̱ xa̱a̱ ña̱ni̱ i̱ xiinꞌ yu̱vaꞌ i̱, xiinꞌ sa̱kuuꞌ ne̱ i̱i̱n kuuꞌ xiinꞌ a̱, ne̱ ndieeꞌ nuu̱ꞌ ñu̱ꞌuꞌ Canaán, ni̱ xa̱a̱ ni̱a̱ te̱ ndoo̱ ni̱a̱ ku̱ndi̱e̱e̱ ni̱a̱ yoꞌoꞌ xiinꞌ i̱.
32 Ne̱ ja̱a̱nꞌ ndii, ne̱ xitoꞌ mbe̱e̱ nduuꞌ ni̱a̱, te̱ nduuꞌ tu̱ ni̱a̱ ne̱ sataꞌvíꞌ ki̱tiꞌ, sa̱kanꞌ na kuiiꞌ ni̱ xa̱a̱ mbe̱e̱ xiinꞌ ni̱a̱, xiinꞌ si̱ndiki̱ꞌ, xiinꞌ sa̱kuuꞌ ña̱ kumiꞌ ni̱a̱”, katyi̱ i̱ xiinꞌ ra̱.
33 Te̱ kii̱ꞌ ka̱na̱ Faraón ndoꞌó, te̱ nda̱tuꞌu̱nꞌ ra̱ ndoꞌó ndee nuu̱ꞌ tyu̱u̱n xaaꞌ ndo̱ꞌ ndii,
34 kaꞌa̱n ndo̱ꞌ xiinꞌ ra̱ ña̱ te̱ sataꞌvíꞌ ki̱tiꞌ nduuꞌ ndo̱ꞌ nde̱e̱ xta̱ꞌanꞌ vi̱ꞌ, nde̱e̱ naa ni̱ xa̱a̱ te̱ xii̱ꞌ ya̱taꞌ ndo̱ꞌ. Sa̱kanꞌ te̱ ta̱xi̱ ra̱ ndoo̱ ndo̱ꞌ ku̱ndi̱e̱e̱ ndo̱ꞌ nuu̱ꞌ ñu̱ꞌuꞌ Gosén, ku̱a̱tyi̱ ndii, täxiꞌ tu̱ꞌu̱n nde̱iꞌ te̱ Egipto ña̱ ku̱ndi̱e̱e̱ ingaꞌ ra̱ xiinꞌ te̱ pa̱xto ―ni̱ katyi̱ José.