So̱ꞌo̱ ni̱ xa̱a̱ a̱ kii̱ꞌ ni̱ kaꞌa̱n José xiinꞌ ña̱ni̱ ra̱ yo̱o̱ nduuꞌ ra̱
45
Te̱ xaꞌa̱ꞌ a̱ ña̱ nï̱ ku̱ndi̱e̱ni ka̱ José ndii, ni̱ kaꞌa̱n tyuunꞌ ra̱ xiinꞌ te̱ xikaꞌ nuuꞌ nuu̱ꞌ ra̱ ndii:
―Kuaꞌan ki̱e̱e̱ sa̱kuuꞌ ndo̱ꞌ nuu̱ꞌ i̱ yoꞌoꞌ ―ni̱ katyi̱ ra̱.
Sa̱kanꞌ na nde̱e̱ i̱i̱n köo̱ꞌ ni̱ ndoo̱ ka̱ i̱kanꞌ xiinꞌ ra̱, kii̱ꞌ ni̱ kaꞌa̱n ra̱ xiinꞌ ña̱ni̱ ra̱ yo̱o̱ nduuꞌ ra̱. 
2 Sa̱kanꞌ te̱ ni̱ xa̱ꞌaꞌ ra̱ xakuꞌ tiꞌeꞌ va̱ ra̱, nde̱e̱ ni̱ xi̱ni̱ so̱ꞌo̱ sa̱kuuꞌ ne̱ Egipto, ne̱ ndieeꞌ vi̱ꞌe̱ ra̱ xatyuunꞌ nuu̱ꞌ ra̱ ña̱ ja̱a̱nꞌ, te̱ nde̱e̱ Faraón ni̱ xi̱ni̱ kuento xaꞌa̱ꞌ ña̱ ja̱a̱nꞌ.
3 Te̱ ni̱ kaꞌa̱n ra̱ xiinꞌ ña̱ni̱ ra̱ ndii:
―Yuꞌu̱ nduuꞌ José, ¿ñáá tiaku ka̱ yu̱vaꞌ i̱? ―ni̱ katyi̱ ra̱.
Te̱ xaꞌa̱ꞌ a̱ ña̱ ni̱ yi̱ꞌvi va̱ ña̱ni̱ ra̱ ja̱a̱nꞌ ndii, nï̱ ku̱vi̱ na̱ku̱i̱i̱n ra̱ ña̱ kaꞌán José ja̱a̱nꞌ.
4 Ndisu̱ ni̱ kaꞌa̱n José xiinꞌ ra̱ ndii:
―Sa̱a̱ ndo̱ꞌ ña̱ va̱ꞌa̱ te̱ ku̱ya̱ti̱n ndo̱ꞌ nuu̱ꞌ i̱ ―ni̱ katyi̱ ra̱.
Sa̱kanꞌ te̱ ni̱ ku̱ya̱ti̱n sa̱kuuꞌ te̱ ja̱a̱nꞌ nuu̱ꞌ ra̱, te̱ ni̱ kaꞌa̱n ra̱ xiinꞌ ra̱ ndii:
―Yuꞌu̱ nduuꞌ José, ña̱ni̱ ndo̱ꞌ, te̱ ni̱ xi̱ko̱ꞌ ndo̱ꞌ nuu̱ꞌ te̱ ñu̱ꞌuꞌ Egipto.
5 Ndisu̱ kü̱ndi̱ꞌni̱ ndo̱ꞌ, ni̱ nde̱e̱ kä̱siꞌe̱ tu̱ ndo̱ꞌ ku̱ni̱ taꞌanꞌ ndo̱ꞌ xaꞌa̱ꞌ a̱ ña̱ ni̱ xi̱ko̱ꞌ ndo̱ꞌ yuꞌu̱, sa̱kanꞌ ña̱ mi̱iꞌ Ndiosí nduuꞌ ña̱ ni̱ ti̱ꞌviꞌ xi̱ꞌna̱ ka̱ yuꞌu̱ yoꞌoꞌ te̱ sa̱kanꞌ ndoꞌó, te̱ sa̱kakú a̱ yooꞌ ña̱ kü̱vi̱ e̱ꞌ so̱ko̱ vi̱ti̱n.
6 Xa̱ kuaꞌa̱n uvi̱ kuiya̱ ña̱ yoo so̱ko̱ nuu̱ꞌ ñu̱ꞌuꞌ i̱i̱n yivi̱ꞌ, ndisu̱ kuní ka̱ uꞌu̱n kuiya̱ ña̱ köo̱ꞌ a̱ ku̱vi̱ tyi̱ꞌi̱ ne̱ yivi̱ꞌ, ni̱ nde̱e̱ köo̱ꞌ tu̱ ña̱ savi̱ꞌ ku̱vi̱ na̱ka̱ya̱ ni̱a̱ naaꞌ tyi̱ꞌi̱ ni̱a̱.
7 Sa̱kanꞌ na xi̱ꞌna̱ ka̱ yuꞌu̱ ni̱ ti̱ꞌviꞌ Ndiosí yoꞌoꞌ ña̱ kuní ka̱ ki̱xi̱n ndoꞌó, te̱ sa̱kakú i̱ tyaaꞌ ndoꞌó te̱ kü̱vi̱ ndo̱ꞌ so̱ko̱, sa̱kanꞌ te̱ ndoo̱ ne̱ i̱tyiꞌ ndo̱ꞌ nuu̱ꞌ ñu̱ꞌuꞌ i̱i̱n yivi̱ꞌ, te̱ na̱ndu̱u̱ kuaꞌa̱ꞌ va̱ ndo̱ꞌ.
8 Xaꞌa̱ꞌ a̱ ja̱a̱nꞌ na süu̱ꞌ ndoꞌó ni̱ ti̱ꞌviꞌ yuꞌu̱ yoꞌoꞌ, süu̱ꞌ ja̱a̱nꞌ ndii mi̱iꞌ Ndiosí ni̱ xa̱a̱ ña̱ ja̱a̱nꞌ, te̱ ni̱ sa̱na̱nduuꞌ a̱ yuꞌu̱ te̱ taxiꞌ nde̱iꞌ nuu̱ꞌ Faraón, te̱ ni̱ sa̱na̱nduuꞌ tu̱ a̱ yuꞌu̱ te̱ ndisoꞌ tyuunꞌ vie̱ ka̱niiꞌ ti̱xi̱n vi̱ꞌe̱ ra̱, te̱ sa̱kanꞌ tu̱ ni̱ sa̱na̱nduuꞌ a̱ yuꞌu̱ te̱ xaꞌndia tyuunꞌ vie̱ ka̱niiꞌ nuu̱ꞌ ñu̱ꞌuꞌ Egipto yoꞌoꞌ.
9 Te̱ vi̱ti̱n ndii, kuaꞌan kiꞌi̱ꞌ ndo̱ꞌ vi̱ꞌe̱ yu̱vaꞌ i̱, te̱ kaꞌa̱n ndo̱ꞌ xiinꞌ a̱ ndii: “Ña̱ yo̱ꞌo̱ kaꞌán José siꞌe̱ u̱nꞌ: “Ndiosí ndii, ni̱ sa̱na̱nduuꞌ a̱ yuꞌu̱ te̱ xaꞌndia tyuunꞌ vie̱ i̱i̱n ka̱niiꞌ nuu̱ꞌ ñu̱ꞌuꞌ Egipto. Sa̱kanꞌ na kuiiꞌ sä̱ku̱kuatyí xiinꞌ miiꞌ u̱nꞌ te̱ ki̱xi̱n u̱nꞌ miiꞌ nduꞌu̱ꞌ i̱, te̱ ku̱ni̱ u̱nꞌ yuꞌu̱.
10 Ta̱xi̱ i̱ ku̱nduꞌu̱ꞌ u̱nꞌ nuu̱ꞌ ñu̱ꞌuꞌ Gosén, sa̱kanꞌ te̱ ku̱nduꞌu̱ꞌ u̱nꞌ ya̱ti̱n miiꞌ nduꞌu̱ꞌ yuꞌu̱, xiinꞌ siꞌe̱ u̱nꞌ, xiinꞌ si̱a̱niꞌ u̱nꞌ, xiinꞌ si̱ndiki̱ꞌ sana̱ u̱nꞌ, xiinꞌ sa̱kuuꞌ ña̱ kumiꞌ u̱nꞌ.
11 Te̱ yoꞌoꞌ ta̱xi̱ i̱ ña̱ ku̱ti̱a̱ku̱ u̱nꞌ, xiinꞌ sa̱kuuꞌ ne̱ i̱i̱n kuuꞌ xiinꞌ u̱nꞌ ndieeꞌ vi̱ꞌe̱ u̱nꞌ te̱ kü̱vi̱ ndo̱ꞌ so̱ko̱, sa̱kanꞌ ña̱ kuní ka̱ uꞌu̱n kuiya̱ ña̱ ko̱o̱ so̱ko̱,” katyi̱ ndo̱ꞌ xiinꞌ a̱.
12 Te̱ siinꞌ tu̱ku̱ ndii, mi̱iꞌ ndoꞌó xiinꞌ ña̱ni̱ i̱ Benjamín nduuꞌ te̱ ni̱ xi̱ni̱ so̱ꞌo̱ ña̱ yuꞌu̱ xna̱ꞌa̱ nduuꞌ te̱ ni̱ kaꞌa̱n ña̱ yo̱ꞌo̱.
13 Kaꞌa̱n ndo̱ꞌ xiinꞌ yu̱vaꞌ i̱ ña̱ i̱i̱n te̱ xaꞌndia tyuunꞌ vie̱ va̱ nduuꞌ i̱ nuu̱ꞌ ñu̱ꞌuꞌ Egipto yoꞌoꞌ, te̱ kaꞌa̱n tu̱ ndo̱ꞌ xiinꞌ a̱ sa̱kuuꞌ ña̱ ni̱ xi̱ni̱ ndo̱ꞌ. Te̱ kuaꞌan na̱ka̱ kiꞌi̱ꞌ ndo̱ꞌ yu̱vaꞌ i̱ te̱ xaa̱ a̱ yoꞌoꞌ ―ni̱ katyi̱ ra̱.
14 Te̱ xaꞌa̱ꞌ a̱ ña̱ va̱ꞌa̱ va̱ kuni José ndii, ni̱ nu̱mi̱ ra̱ Benjamín, ña̱ni̱ ra̱, te̱ ni̱ xa̱ꞌaꞌ xakuꞌ ra̱, te̱ ni̱ nu̱mi̱ tu̱ ña̱ꞌaꞌ Benjamín ja̱a̱nꞌ xakuꞌ tu̱ te̱ ja̱a̱nꞌ xiinꞌ ra̱.
15 Te̱ ni̱ tyi̱to ra̱ nuu̱ꞌ sa̱kuuꞌ ña̱ni̱ ra̱ ja̱a̱nꞌ, te̱ ni̱ xa̱ku̱ tu̱ ra̱ kii̱ꞌ ni̱ nu̱mi̱ ra̱ te̱ ja̱a̱nꞌ, ndi̱ꞌi̱ ja̱a̱nꞌ te̱ ni̱ xa̱ndi̱e̱ni xiinꞌ miiꞌ ña̱ni̱ ra̱ ja̱a̱nꞌ, te̱ ni̱ xa̱ꞌaꞌ ndatuꞌunꞌ ra̱ xiinꞌ José.
16 Te̱ numi̱ꞌ va̱ ni̱ xa̱a̱ kuento nde̱e̱ vi̱ꞌe̱ Faraón ña̱ ni̱ nde̱ku̱i̱e̱e̱ ña̱ni̱ José i̱kanꞌ. Te̱ va̱ꞌa̱ va̱ ni̱ ku̱ni̱ Faraón xaꞌa̱ꞌ ña̱ ja̱a̱nꞌ, te̱ sa̱kanꞌ tu̱ sa̱kuuꞌ te̱ xatyuunꞌ nuu̱ꞌ ra̱.
17 Te̱ ni̱ kaꞌa̱n ra̱ xiinꞌ José ndii:
―Kaꞌa̱n tyuunꞌ u̱nꞌ xiinꞌ ña̱ni̱ u̱nꞌ na sa̱kaaꞌ ra̱ ña̱ꞌa̱ xata̱ꞌ ki̱tiꞌ sana̱ ra̱ te̱ na̱ndi̱koꞌ ra̱ ñu̱ꞌuꞌ Canaán.
18 Te̱ na na̱ka̱ ra̱ yu̱vaꞌ u̱nꞌ xiinꞌ sa̱kuuꞌ ne̱ ndieeꞌ vi̱ꞌe̱ ra̱, te̱ ki̱xi̱n ra̱ yoꞌoꞌ xiinꞌ ni̱a̱, te̱ ta̱xi̱ i̱ ñu̱ꞌuꞌ miiꞌ va̱ꞌa̱ nuu̱ꞌ ñu̱ꞌuꞌ Egipto yoꞌoꞌ ku̱ndi̱e̱e̱ ni̱a̱, te̱ ka̱xi̱ꞌ ni̱a̱ ña̱ va̱ꞌa̱ ka̱, ña̱ yoo nuu̱ꞌ ñu̱ꞌuꞌ yoꞌoꞌ.
19 Te̱ kaꞌa̱n tyuunꞌ tu̱ u̱nꞌ xiinꞌ ra̱ na kuꞌu̱n karreta xiinꞌ ra̱ miiꞌ ku̱ꞌu̱n siꞌe̱ ra̱, xiinꞌ ñaꞌ siꞌi ra̱, xiinꞌ yu̱vaꞌ ndo̱ꞌ ki̱xi̱n ni̱a̱.
20 Te̱ na kü̱ndi̱ꞌni̱ ni̱a̱ xaꞌa̱ꞌ ña̱ kumiꞌ ni̱a̱ i̱kanꞌ naaꞌ ndoo̱ a̱, sa̱kanꞌ ña̱ va̱ꞌa̱ ka̱ miiꞌ va̱ꞌa̱ va̱ kaaꞌ nuu̱ꞌ ñu̱ꞌuꞌ Egipto ku̱ndu̱u̱ ña̱ꞌa̱ ni̱a̱ ―ni̱ katyi̱ ra̱.
21 Te̱ niiꞌ sa̱kanꞌ ni̱ xa̱a̱ tiaa̱ siꞌe̱ Israel. Ni̱ ta̱xi̱ José carreta sa̱a̱ ni̱ kaꞌa̱n tyuunꞌ Faraón xiinꞌ ra̱, te̱ ni̱ ta̱xi̱ tu̱ ra̱ ña̱ xaxi̱ꞌ ña̱ ku̱xi̱ te̱ ja̱a̱nꞌ i̱tyiꞌ.
22 Te̱ ni̱ ta̱xi̱ tu̱ ra̱ i̱i̱n na̱ꞌa̱ toto̱ nda̱ꞌaꞌ i̱ꞌi̱n te̱ ja̱a̱nꞌ ku̱i̱ꞌnu̱ ra̱, ndisu̱ Benjamín ndii, uꞌu̱n na̱ꞌa̱ toto̱ ni̱ ta̱xi̱ ra̱ nda̱ꞌaꞌ te̱ ja̱a̱nꞌ, te̱ ni̱ ta̱xi̱ tu̱ ra̱ uni̱ ciento xu̱ꞌunꞌ yuu̱ꞌ plata nda̱ꞌaꞌ ra̱.
23 Te̱ nda̱ꞌaꞌ yu̱vaꞌ ra̱ ni̱ ti̱ꞌviꞌ ra̱ uxi̱ taꞌan mburru ndisoꞌ riꞌ mi̱iꞌ ndiꞌiꞌ ña̱ va̱ꞌa̱ ña̱ yoo nuu̱ꞌ ñu̱ꞌuꞌ Egipto, xiinꞌ uxi̱ taꞌan mburra ndisoꞌ riꞌ ndi̱kinꞌ trigo xiinꞌ xita̱ꞌ va̱ꞌa̱, te̱ ndisoꞌ tu̱ riꞌ ña̱ xaxi̱ꞌ ña̱ ku̱xi̱ yu̱vaꞌ ra̱ kii̱ꞌ ki̱xi̱n ra̱ i̱tyiꞌ.
24 Te̱ ni̱ nde̱iꞌ ña̱ꞌaꞌ José kaꞌán xiinꞌ ra̱ ndii:
―Kü̱ntaꞌanꞌ ndo̱ꞌ i̱tyiꞌ kii̱ꞌ kuꞌu̱n ndo̱ꞌ ―ni̱ katyi̱ ra̱.
25 Te̱ ni̱ ki̱e̱e̱ te̱ ja̱a̱nꞌ ñu̱ꞌuꞌ Egipto ja̱a̱nꞌ kuaꞌa̱n ka̱a̱ ra̱ nde̱e̱ ni̱ na̱xa̱a̱ ra̱ ñu̱ꞌuꞌ Canaán miiꞌ nduꞌu̱ꞌ yu̱vaꞌ ra̱ Jacob.
26 Te̱ kii̱ꞌ ni̱ kaꞌa̱n ra̱ xiinꞌ Jacob ja̱a̱nꞌ ña̱ tiaku José, te̱ su̱vi̱ ra̱ nduuꞌ te̱ xaꞌndia tyuunꞌ vie̱ ka̱niiꞌ nuu̱ꞌ ñu̱ꞌuꞌ Egipto ndii, ni̱ na̱nda̱ni̱ va̱ ra̱, te̱ nï̱ ku̱vi̱ na̱ku̱i̱i̱n ra̱ nde̱e̱ i̱i̱n yu̱ꞌuꞌ, sa̱kanꞌ ña̱ küni ka̱ndi̱xaꞌ ra̱ ña̱ ni̱ kaꞌa̱n te̱ ja̱a̱nꞌ xiinꞌ ra̱.
27 Ndisu̱ kii̱ꞌ ni̱ nda̱tuꞌunꞌ te̱ ja̱a̱nꞌ nuu̱ꞌ ra̱ sa̱kuuꞌ ña̱ ni̱ kaꞌa̱n José, te̱ ni̱ xi̱ni̱ tu̱ ra̱ sa̱kuuꞌ carreta, tunꞌ ni̱ ti̱ꞌviꞌ te̱ ja̱a̱nꞌ te̱ ku̱naa̱ ra̱ kuꞌu̱n ra̱ ndii, ni̱ na̱ku̱naa̱ va̱ꞌa̱ nimá ra̱.
28 Sa̱kanꞌ te̱ ni̱ kaꞌa̱n ra̱ ndii:
―Xa̱ ni̱ ka̱ndi̱xaꞌ i̱ ña̱ kaꞌán ndo̱ꞌ ña̱ tiaku José siꞌe̱ i̱, va̱ꞌa̱ ka̱ kuꞌu̱n i̱ te̱ ku̱ni̱ i̱ nuu̱ꞌ ra̱, ña̱ kuní ka̱ ku̱vi̱ i̱ ―ni̱ katyi̱ ra̱.