Ña̱ yo̱ꞌo̱ nduuꞌ kivi̱ꞌ ne̱ si̱a̱niꞌ xikaꞌ Esaú, ne̱ ni̱ tuvi̱ nuu̱ꞌ ñu̱ꞌuꞌ Canaán
36
Yoꞌoꞌ kaꞌán xaꞌa̱ꞌ ne̱ si̱a̱niꞌ xikaꞌ Esaú, te̱ naniꞌ tu̱ Edom.
2 Esaú ndii, ni̱ tu̱ndaꞌa̱ꞌ ra̱ xiinꞌ ña̱ꞌaꞌ ne̱ ndieeꞌ nuu̱ꞌ ñu̱ꞌuꞌ Canaán, i̱i̱n aꞌ naniꞌ Ada, ñaꞌ siꞌe̱ Elón, te̱ vi̱ꞌe̱ het, te̱ i̱nga̱ aꞌ naniꞌ Aholibama, ñaꞌ siꞌe̱ Aná, ñaꞌ si̱a̱niꞌ Zibeón, te̱ vi̱ꞌe̱ heveo.
3 Te̱ ni̱ tu̱ndaꞌa̱ꞌ tu̱ ra̱ xiinꞌ Basemat, ñaꞌ siꞌe̱ xi̱to̱ ra̱ Ismael, ñaꞌ taꞌanꞌ Nebaiot.
4 Siꞌe̱ ra̱ xiinꞌ Ada ndii, Elifaz naniꞌ ra̱, te̱ siꞌe̱ ra̱ xiinꞌ Basemat ndii, Reuel naniꞌ ra̱.
5 Te̱ siꞌe̱ ra̱ xiinꞌ Aholibama ndii, i̱i̱n ra̱ naniꞌ Jeús, te̱ i̱nga̱ ra̱ naniꞌ Jaalam, te̱ i̱nga̱ ra̱ naniꞌ Coré. Te̱ sa̱kuuꞌ te̱ ja̱a̱nꞌ nduuꞌ siꞌe̱ Esaú, te̱ ni̱ tuvi̱ kii̱ꞌ nduꞌu̱ꞌ ra̱ nuu̱ꞌ ñu̱ꞌuꞌ Canaán.
6 Ni̱ yaꞌa̱ te̱ ni̱ na̱ka̱ Esaú sa̱kuuꞌ ñaꞌ siꞌi ra̱ xiinꞌ sa̱kuuꞌ siꞌe̱ ra̱, xiinꞌ sa̱kuuꞌ ne̱ ndieeꞌ vi̱ꞌe̱ ra̱, xiinꞌ si̱ndiki̱ꞌ sana̱ ra̱, xiinꞌ sa̱kuuꞌ ki̱tiꞌ, tiꞌ kumiꞌ ra̱, xiinꞌ sa̱kuuꞌ ña̱ ni̱ ka̱ya̱ ra̱ nuu̱ꞌ ñu̱ꞌuꞌ Canaán ja̱a̱nꞌ, te̱ ni̱ ke̱ta̱ ra̱ kuaꞌa̱n ra̱ tu̱ku̱ ñu̱ꞌuꞌ, te̱ ni̱ ku̱siinꞌ ra̱ nuu̱ꞌ Jacob, ña̱ni̱ ra̱.
7 Sa̱kanꞌ ña̱ xa̱ ni̱ ku̱vikaꞌ va̱ uvi̱ sa̱aꞌ ra̱, te̱ kü̱vi̱ ka̱ ku̱ndi̱e̱e̱ ingaꞌ ra̱, te̱ ni̱ä̱ni̱ ka̱ tu̱ nuu̱ꞌ ñu̱ꞌuꞌ ja̱a̱nꞌ sa̱tyuunꞌ ra̱, sa̱kanꞌ ña̱ kuaꞌa̱ꞌ xa̱va̱ꞌa̱ si̱ndiki̱ꞌ kumiꞌ uvi̱ sa̱aꞌ ra̱.
8 Sa̱kanꞌ na kuiiꞌ ni̱ ke̱ta̱ Esaú, te̱ naniꞌ tu̱ Edom, kuaꞌa̱n ku̱nduꞌu̱ꞌ ra̱ xiki̱ꞌ ña̱ naniꞌ Seir.
9 Yoꞌoꞌ kaꞌán a̱ xaꞌa̱ꞌ ne̱ si̱a̱niꞌ xikaꞌ Esaú, te̱ xii̱ꞌ ya̱taꞌ ne̱ vi̱ꞌe̱ Edom, ne̱ ni̱ ndiee̱ te̱i̱n xiki̱ꞌ ña̱ naniꞌ Seir.
10 Ña̱ yo̱ꞌo̱ nduuꞌ kivi̱ꞌ siꞌe̱ Esaú: Elifaz nduuꞌ siꞌe̱ ra̱ xiinꞌ Ada, te̱ Reuel nduuꞌ siꞌe̱ ra̱ xiinꞌ Basemat.
11 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Elifaz: I̱i̱n ra̱ naniꞌ Temán, te̱ i̱nga̱ ra̱ naniꞌ Omar, te̱ i̱nga̱ tu̱ku̱ ra̱ naniꞌ Zefo, te̱ i̱nga̱ ka̱ ra̱ naniꞌ Gatám, te̱ i̱nga̱ ra̱ naniꞌ Cenaz.
12 Te̱ ni̱ yoo̱ tu̱ siꞌe̱ Elifaz xiinꞌ i̱i̱n ñaꞌ ni̱ ku̱miꞌ ra̱, ñaꞌ naniꞌ Timna, te̱ siꞌe̱ ra̱ xiinꞌ ñaꞌ ja̱a̱nꞌ ndii, Amalec naniꞌ ra̱. Te̱ sa̱kuuꞌ te̱ ja̱a̱nꞌ ni̱ nduu̱ si̱a̱niꞌ Ada, ñaꞌ ni̱ nduu̱ i̱i̱n ñaꞌ siꞌi Esaú.
13 Ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Reuel: I̱i̱n ra̱ naniꞌ Nahat, te̱ i̱nga̱ ra̱ naniꞌ Zera, te̱ i̱nga̱ tu̱ku̱ ra̱ naniꞌ Sama, te̱ i̱nga̱ ka̱ ra̱ naniꞌ Miza. Te̱ sa̱kuuꞌ te̱ ja̱a̱nꞌ ni̱ nduu̱ si̱a̱niꞌ Basemat, ñaꞌ ni̱ nduu̱ i̱nga̱ ñaꞌ siꞌi Esaú.
14 Te̱ ni̱ yoo̱ tu̱ siꞌe̱ Esaú xiinꞌ i̱nga̱ ñaꞌ siꞌi ra̱, ñaꞌ ni̱ naniꞌ Aholibama, ñaꞌ siꞌe̱ Aná, te̱ nduuꞌ siꞌe̱ Zibeón. I̱i̱n ra̱ naniꞌ Jeús, te̱ i̱nga̱ ra̱ naniꞌ Jalaam, te̱ i̱nga̱ ka̱ ra̱ naniꞌ Coré.
15 Te̱ yo̱ꞌo̱ nduuꞌ te̱ kuuꞌ nu̱uꞌ nuu̱ꞌ ne̱ si̱a̱niꞌ Esaú. Siꞌe̱ Elifaz, te̱ nduuꞌ siꞌe̱ nu̱uꞌ Esaú ja̱a̱nꞌ ndii, ña̱ yo̱ꞌo̱ nduuꞌ kivi̱ꞌ ra̱: I̱i̱n ra̱ na̱niꞌ Temán, te̱ i̱nga̱ ra̱ na̱niꞌ Omar, te̱ i̱nga̱ ka̱ ra̱ naniꞌ Zefo, te̱ i̱nga̱ tu̱ku̱ ra̱ na̱niꞌ Cenaz,
16 te̱ i̱nga̱ ka̱ ra̱ naniꞌ Coré, te̱ i̱nga̱ tu̱ku̱ ra̱ naniꞌ Gatám, te̱ i̱nga̱ ka̱ ra̱ naniꞌ Amalec. Sa̱kuuꞌ te̱ ja̱a̱nꞌ ni̱ nduu̱ te̱ ni̱ xa̱ꞌndi̱a̱ tyuunꞌ nuu̱ꞌ ne̱ ni̱ ndiee̱ nuu̱ꞌ ñu̱ꞌuꞌ Edom, ne̱ nduuꞌ si̱a̱niꞌ xikaꞌ Elifaz. Te̱ sa̱kuuꞌ te̱ kuuꞌ nu̱uꞌ ja̱a̱nꞌ ni̱ nduu̱ꞌ si̱a̱niꞌ xikaꞌ Ada, ñaꞌ ni̱ nduu̱ ñaꞌ siꞌi Esaú.
17 Ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Reuel, te̱ nduuꞌ siꞌe̱ Esaú: I̱i̱n ra̱ naniꞌ Nahat, te̱ i̱nga̱ ra̱ naniꞌ Zera, te̱ i̱nga̱ tu̱ku̱ ra̱ naniꞌ Sama, te̱ i̱nga̱ ka̱ ra̱ naniꞌ Miza. Sa̱kuuꞌ te̱ ja̱a̱nꞌ ni̱ nduu̱ te̱ ni̱ xa̱ꞌndi̱a̱ tyuunꞌ nuu̱ꞌ ne̱ ni̱ ndiee̱ nuu̱ꞌ ñu̱ꞌuꞌ Edom, ne̱ nduuꞌ si̱a̱niꞌ xikaꞌ Reuel. Te̱ sa̱kuuꞌ te̱ kuuꞌ nu̱uꞌ ja̱a̱nꞌ ni̱ nduu̱ꞌ si̱a̱niꞌ xikaꞌ Basemat, i̱nga̱ ñaꞌ ni̱ nduu̱ ñaꞌ siꞌi Esaú.
18 Te̱ tiaa̱ siꞌe̱ Esaú xiinꞌ i̱nga̱ ka̱ ñaꞌ siꞌi ra̱, ñaꞌ naniꞌ Aholibama, ñaꞌ siꞌe̱ Aná ndii: I̱i̱n ra̱ naniꞌ Jeús, te̱ i̱nga̱ ra̱ naniꞌ Jaalam, te̱ i̱nga̱ ka̱ ra̱ naniꞌ Coré. Te̱ sa̱kuuꞌ te̱ ja̱a̱nꞌ ni̱ nduu̱ꞌ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ mi̱iꞌ ra̱.
19 Sa̱kuuꞌ te̱ ja̱a̱nꞌ nduuꞌ siꞌe̱ Esaú, te̱ naniꞌ tu̱ Edom, te̱ i̱ꞌi̱n ra̱ ni̱ nduu̱ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ mi̱iꞌ ra̱.
20 Ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Seir, te̱ vi̱ꞌe̱ horeo, te̱ ni̱ ndiee̱ nuu̱ꞌ ñu̱ꞌuꞌ Edom ja̱a̱nꞌ. I̱i̱n ra̱ naniꞌ Lotán, te̱ i̱nga̱ ra̱ naniꞌ Sobal, te̱ i̱nga̱ ka̱ ra̱ naniꞌ Zibeón, te̱ i̱nga̱ tu̱ku̱ ra̱ na̱niꞌ Aná,
21 te̱ i̱nga̱ ra̱ naniꞌ Disón, te̱ i̱nga̱ ra̱ naniꞌ Ezer, te̱ i̱nga̱ ka̱ ra̱ naniꞌ Disán. Te̱ i̱ꞌi̱n te̱ ja̱a̱nꞌ ni̱ nduu̱ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ mi̱iꞌ ra̱, ne̱ nduuꞌ si̱a̱niꞌ xikaꞌ Seir, ne̱ ni̱ ndiee̱ nuu̱ꞌ ñu̱ꞌuꞌ Edom ja̱a̱nꞌ.
22 Ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Lotán, te̱ nduuꞌ siꞌe̱ Seir: I̱i̱n ra̱ naniꞌ Hori, te̱ i̱nga̱ ra̱ naniꞌ Hemam. Te̱ ni̱ yoo̱ i̱i̱n ñaꞌ taꞌanꞌ Lotán ja̱a̱nꞌ, ñaꞌ ni̱ naniꞌ Timna.
23 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Sobal: I̱i̱n ra̱ naniꞌ Alván, te̱ i̱nga̱ ra̱ naniꞌ Manahat, te̱ i̱nga̱ ka̱ ra̱ naniꞌ Ebal, te̱ i̱nga̱ tu̱ku̱ ra̱ naniꞌ Sefo, te̱ i̱nga̱ ra̱ naniꞌ Onam.
24 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Zibeón: I̱i̱n ra̱ naniꞌ Aja, te̱ i̱nga̱ ra̱ naniꞌ Aná, te̱ Aná ja̱a̱nꞌ nduuꞌ te̱ ni̱ xaꞌa̱n ku̱ni̱ miiꞌ yoo ti̱kui miiꞌ i̱tyi kaaꞌ kii̱ꞌ xitoꞌ ra̱ mburru sana̱ Zibeón, yu̱vaꞌ ra̱.
25 Te̱ ña̱ yo̱ꞌo̱ nduuꞌ kivi̱ꞌ siꞌe̱ Aná: I̱i̱n ra̱ naniꞌ Disón, te̱ i̱i̱n ñaꞌ siꞌe̱ ra̱ naniꞌ Aholibama.
26 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Disón: I̱i̱n ra̱ naniꞌ Hemdán, te̱ i̱nga̱ ra̱ naniꞌ Esbán, te̱ i̱nga̱ ka̱ ra̱ naniꞌ Itrán, te̱ i̱nga̱ tu̱ku̱ ra̱ naniꞌ Querán.
27 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Ezer: I̱i̱n ra̱ naniꞌ Bilhán, te̱ i̱nga̱ ra̱ naniꞌ Zaaván, te̱ i̱nga̱ ka̱ ra̱ naniꞌ Acán.
28 Te̱ ña̱ yo̱ꞌo̱ nduuꞌ kivi̱ꞌ tiaa̱ siꞌe̱ Disán: I̱i̱n ra̱ naniꞌ Uz, te̱ i̱nga̱ ra̱ naniꞌ Arán.
29 Ña̱ yo̱ꞌo̱ nduuꞌ kivi̱ꞌ te̱ ni̱ nduu̱ te̱ kuuꞌ nu̱uꞌ nuu̱ꞌ te̱ vi̱ꞌe̱ horeo: I̱i̱n ra̱ naniꞌ Lotán, te̱ i̱nga̱ ra̱ naniꞌ Sobal, te̱ i̱nga̱ ka̱ ra̱ naniꞌ Zibeón, te̱ i̱nga̱ tu̱ku̱ ra̱ naniꞌ Aná,
30 te̱ i̱nga̱ ra̱ naniꞌ Disón, te̱ i̱nga̱ ra̱ naniꞌ Ezer, te̱ i̱nga̱ ka̱ ra̱ naniꞌ Disán. Te̱ i̱ꞌi̱n te̱ ja̱a̱nꞌ ni̱ nduu̱ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ mi̱iꞌ ra̱.
Yoꞌoꞌ yoso̱ꞌ kivi̱ꞌ te̱ ni̱ nduu̱ rey nuu̱ꞌ ñu̱ꞌuꞌ Edom
31 Ña̱ yo̱ꞌo̱ nduuꞌ kivi̱ꞌ i̱ꞌi̱n rey, te̱ ni̱ xa̱ꞌndi̱a̱ tyuunꞌ nuu̱ꞌ ne̱ ndieeꞌ nuu̱ꞌ ñu̱ꞌuꞌ Edom kii̱ꞌ kuní ka̱ ko̱o̱ rey, te̱ ka̱ꞌndi̱a̱ tyuunꞌ nuu̱ꞌ ne̱ vi̱ꞌe̱ Israel.
32 Te̱ naniꞌ Bela, siꞌe̱ Beor, nduuꞌ te̱ ni̱ xa̱ꞌndi̱a̱ tyuunꞌ nuu̱ꞌ ñu̱ꞌuꞌ Edom, te̱ kivi̱ꞌ ñu̱u̱ miiꞌ ni̱ nduꞌu̱ꞌ ra̱ ndii, Dinabá nduuꞌ a̱.
33 Te̱ kii̱ꞌ ni̱ xiꞌi̱ Bela ndii, Johab, siꞌe̱ Zera, ni̱ na̱ꞌi̱ tyuunꞌ nuu̱ꞌ ra̱, te̱ kivi̱ꞌ ñu̱u̱ miiꞌ ni̱ nduꞌu̱ꞌ Johab ja̱a̱nꞌ ndii, Bosra nduuꞌ a̱.
34 Te̱ kii̱ꞌ ni̱ xiꞌi̱ Johab ja̱a̱nꞌ ndii, Husam, te̱ ni̱ nduꞌu̱ꞌ nuu̱ꞌ ñu̱ꞌuꞌ Temán, ni̱ na̱ꞌi̱ tyuunꞌ nuu̱ꞌ ra̱.
35 Te̱ kii̱ꞌ ni̱ xiꞌi̱ Husam ndii, Hadad, siꞌe̱ Bedad, ni̱ na̱ꞌi̱ tyuunꞌ nuu̱ꞌ ra̱. Te̱ Bedad ja̱a̱nꞌ nduuꞌ te̱ ni̱ ka̱nandoo te̱ vi̱ꞌe̱ Madián kii̱ꞌ ni̱ ku̱ntaꞌanꞌ ra̱ yo̱soꞌ nuu̱ꞌ ñu̱ꞌuꞌ, ñu̱u̱ ña̱ naniꞌ Moab. Te̱ kivi̱ꞌ ñu̱u̱ miiꞌ ni̱ nduꞌu̱ꞌ Hadad ja̱a̱nꞌ ndii, Avit nduuꞌ a̱.
36 Te̱ kii̱ꞌ ni̱ xiꞌi̱ Hadad ndii, Samla, te̱ ni̱ nduꞌu̱ꞌ ñu̱u̱ Masreca, ni̱ na̱ꞌi̱ tyuunꞌ nuu̱ꞌ ra̱.
37 Te̱ kii̱ꞌ ni̱ xiꞌi̱ Samla ndii, Saúl, te̱ ni̱ nduꞌu̱ꞌ nuu̱ꞌ ñu̱ꞌuꞌ Rehobot, ña̱ naá ya̱ti̱n xi̱i̱nꞌ i̱ti̱a̱ ña̱ naniꞌ Éufrates, ni̱ na̱ꞌi̱ tyuunꞌ nuu̱ꞌ ra̱.
38 Te̱ kii̱ꞌ ni̱ xiꞌi̱ Saúl ndii, Baal-hanán, siꞌe̱ Acbor, ni̱ na̱ꞌi̱ tyuunꞌ nuu̱ꞌ ra̱.
39 Te̱ kii̱ꞌ ni̱ xiꞌi̱ Baal-hanán, siꞌe̱ Acbor ndii, Hadar ni̱ na̱ꞌi̱ tyuunꞌ nuu̱ꞌ ra̱. Te̱ kivi̱ꞌ ñu̱u̱ miiꞌ ni̱ nduꞌu̱ꞌ Hadar ja̱a̱nꞌ ndii, Pau nduuꞌ a̱. Te̱ ñaꞌ siꞌe̱ ra̱ ndii, Mehetabel naniꞌ aꞌ, te̱ yu̱vaꞌ ñaꞌ ja̱a̱nꞌ ndii, Matred naniꞌ ra̱, te̱ xii̱ꞌ aꞌ ndii, Mezaab naniꞌ ra̱.
40 Ña̱ yo̱ꞌo̱ nduuꞌ kivi̱ꞌ te̱ ni̱ nduu̱ te̱ kuuꞌ nu̱uꞌ nuu̱ꞌ te̱ si̱a̱niꞌ xikaꞌ Esaú. Te̱ i̱ꞌi̱n te̱ ja̱a̱nꞌ ni̱ nduu̱ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ mi̱iꞌ ra̱, xiinꞌ nuu̱ꞌ ñu̱ꞌuꞌ miiꞌ ndieeꞌ mi̱iꞌ ra̱, te̱ i̱ꞌi̱n ti̱ꞌvi̱ ra̱ ndii, xa̱ kivi̱ꞌ mi̱iꞌ te̱ kuuꞌ nu̱uꞌ ja̱a̱nꞌ nduuꞌ kivi̱ꞌ ñu̱u̱ miiꞌ ndieeꞌ ra̱. I̱i̱n ra̱ naniꞌ Timna, te̱ i̱nga̱ ra̱ naniꞌ Alvá, te̱ i̱nga̱ ka̱ ra̱ naniꞌ Jetet,
41 te̱ i̱nga̱ ra̱ naniꞌ Aholibama, te̱ i̱nga̱ tu̱ku̱ ra̱ naniꞌ Elá, te̱ tu̱ku̱ ra̱ naniꞌ Pinón,
42 te̱ i̱nga̱ ra̱ naniꞌ Quenaz, te̱ i̱nga̱ ka̱ ra̱ naniꞌ Temán, te̱ i̱nga̱ tu̱ku̱ ra̱ naniꞌ Mibzar,
43 te̱ i̱nga̱ ka̱ ra̱ naniꞌ Magdiel, te̱ i̱nga̱ tu̱ku̱ ra̱ naniꞌ Irám. Te̱ sa̱kuuꞌ te̱ ja̱a̱nꞌ nduuꞌ si̱a̱niꞌ xikaꞌ Esaú. Te̱ mi̱iꞌ tu̱ ra̱ ni̱ xa̱ꞌndi̱a̱ tyuunꞌ nuu̱ꞌ ne̱ ni̱ ndiee̱ nuu̱ꞌ ñu̱ꞌuꞌ Edom, te̱ Edom ja̱a̱nꞌ nduuꞌ i̱nga̱ kivi̱ꞌ Esaú. Te̱ i̱ꞌi̱n te̱ ja̱a̱nꞌ ni̱ nduu̱ te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ vi̱ꞌe̱ mi̱iꞌ ra̱, xiinꞌ nuu̱ꞌ ñu̱ꞌuꞌ miiꞌ ndieeꞌ mi̱iꞌ ra̱, te̱ i̱ꞌi̱n ti̱ꞌvi̱ ra̱ ndii, xa̱ kivi̱ꞌ mi̱iꞌ te̱ kuuꞌ nu̱uꞌ ja̱a̱nꞌ nduuꞌ kivi̱ꞌ ñu̱u̱ miiꞌ ndieeꞌ ra̱.