30
Kii̱ꞌ ni̱ xi̱ni̱ Raquel ña̱ kü̱vi̱ ko̱o̱ siꞌe̱ aꞌ xiinꞌ Jacob ndii, ni̱ xa̱ꞌaꞌ aꞌ xakuiñu aꞌ Lea, taꞌanꞌ aꞌ, te̱ ni̱ kaꞌa̱n aꞌ xiinꞌ ra̱ ndii:
―Naaꞌ nä̱tyu̱ꞌu̱n u̱nꞌ siꞌe̱ i̱ ndii, nde̱e̱ tyaaꞌ ka̱ ku̱vi̱ i̱ ―ni̱ katyi̱ aꞌ.
2 Ndisu̱ ni̱ na̱saa̱ꞌ xa̱va̱ꞌa̱ Jacob ni̱ xi̱ni̱ ña̱ꞌaꞌ ra̱, te̱ ni̱ kaꞌa̱n ra̱ xiinꞌ aꞌ ndii:
―Süu̱ꞌ yuꞌu̱ kumiꞌ ku̱a̱tyi̱ xaꞌa̱ꞌ ña̱ ja̱a̱nꞌ, ñáá Ndiosí nduuꞌ yuꞌu̱ xanini u̱nꞌ, na kaꞌán u̱nꞌ ña̱ täxiꞌ i̱ na̱kuꞌu̱n siꞌe̱ u̱nꞌ ―ni̱ katyi̱ ra̱.
3 Sa̱kanꞌ te̱ ni̱ kaꞌa̱n aꞌ xiinꞌ ra̱ ndii:
―Yoꞌoꞌ nduꞌu̱ꞌ ñaꞌ xikaꞌ nuuꞌ nuu̱ꞌ i̱, ñaꞌ naniꞌ Bilha, ka̱nduꞌu̱ꞌ xiinꞌ ñaꞌ kaa̱ꞌ te̱ ko̱o̱ siꞌe̱ u̱nꞌ xiinꞌ aꞌ, te̱ siꞌe̱ u̱nꞌ ñaꞌ ko̱o̱ xiinꞌ aꞌ ja̱a̱nꞌ ku̱ndu̱u̱ siꞌe̱ i̱ ―ni̱ katyi̱ aꞌ.
4 Sa̱kanꞌ te̱ ni̱ ta̱xi̱ Raquel ñaꞌ xikaꞌ nuuꞌ nuu̱ꞌ aꞌ ja̱a̱nꞌ nda̱ꞌaꞌ Jacob ku̱ndu̱u̱ ñaꞌ siꞌi ra̱. Te̱ ni̱ kixi̱n ra̱ xiinꞌ ñaꞌ ja̱a̱nꞌ,
5 te̱ ni̱ na̱kuꞌu̱n siꞌe̱ aꞌ, te̱ ni̱ tuvi̱ i̱i̱n tiaa̱ siꞌe̱ aꞌ xiinꞌ ra̱.
6 Sa̱kanꞌ te̱ ni̱ kaꞌa̱n Raquel ndii:
―Te̱ kuañuꞌu̱ yoꞌoꞌ ndii, Dan ku̱na̱niꞌ ra̱, sa̱kanꞌ ña̱ ni̱ xi̱ni̱ so̱ꞌo̱ Ndiosí ña̱ ni̱ xika̱n i̱ nuu̱ꞌ a̱, te̱ ni̱ xa̱a̱ a̱ ña̱ va̱ꞌa̱ xiinꞌ i̱, te̱ ni̱ ta̱xi̱ a̱ te̱ kuañuꞌu̱ yoꞌoꞌ ku̱ndu̱u̱ siꞌe̱ i̱ ―ni̱ katyi̱ a̱.
―Te̱ lulu kaa̱ꞌ ndii, Neftalí ku̱na̱niꞌ ra̱, sa̱kanꞌ ña̱ xa̱ ni̱ ku̱ntaꞌanꞌ ndi̱e̱eꞌ xa̱va̱ꞌa̱ i̱ xiinꞌ ñaꞌ taꞌanꞌ i̱, ndisu̱ xa̱ ni̱ ke̱ta̱ va̱ꞌa̱ i̱ ―ni̱ katyi̱ aꞌ.
9 Kii̱ꞌ ni̱ xi̱ni̱ Lea ña̱ kü̱vi̱ ka̱ ko̱o̱ siꞌe̱ aꞌ ndii, ni̱ ti̱i̱n aꞌ Zilpa, ñaꞌ xikaꞌ nuuꞌ nuu̱ꞌ aꞌ, te̱ ni̱ sa̱na̱kuaꞌa ña̱ꞌaꞌ aꞌ nda̱ꞌaꞌ Jacob ku̱ndu̱u̱ ñaꞌ siꞌi ra̱.
10 Te̱ kii̱ꞌ ni̱ tuvi̱ i̱i̱n siꞌe̱ Zilpa xiinꞌ Jacob ndii,
11 ni̱ kaꞌa̱n Lea ndii:
―Kivi̱ꞌ xa̱va̱ꞌa̱ i̱ ―ni̱ katyi̱ aꞌ.
Sa̱kanꞌ na kuiiꞌ ni̱ tyi̱nduꞌu̱ꞌ aꞌ kivi̱ꞌ ra̱ Gad.
12 Ni̱ yaꞌa̱ te̱ ni̱ yoo̱ i̱nga̱ siꞌe̱ Zilpa ja̱a̱nꞌ xiinꞌ Jacob.
13 Sa̱kanꞌ na ni̱ kaꞌa̱n Lea ndii:
―Va̱ꞌa̱ xa̱va̱ꞌa̱ kuni i̱, te̱ vi̱ti̱n ndii, sa̱kuuꞌ ña̱ꞌaꞌ kaꞌa̱n ña̱ va̱ꞌa̱ va̱ kuni i̱, sa̱kanꞌ na kuiiꞌ Aser ku̱na̱niꞌ te̱ lulu kaa̱ꞌ ―ni̱ katyi̱ aꞌ.
14 Untaꞌ kii̱ꞌ nakuixaꞌ trigo ndii, ni̱ xaꞌa̱n Rubén xaꞌa̱ꞌ kuꞌu̱, te̱ i̱kanꞌ ni̱ xaꞌa̱n ku̱ni̱ ra̱ yoo ndo̱koꞌ ña̱ naniꞌ mandrágora, te̱ ni̱ ti̱so̱ ra̱ a̱ ni̱ ta̱xi̱ ra̱ nda̱ꞌaꞌ Lea, si̱ꞌiꞌ ra̱. Te̱ kii̱ꞌ ni̱ xi̱ni̱ Raquel ndo̱koꞌ ja̱a̱nꞌ, te̱ ni̱ kaꞌa̱n aꞌ xiinꞌ Lea ndii:
―Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ndiaꞌviꞌ ndo̱koꞌ mandrágora, ña̱ ni̱ ti̱so̱ te̱ lulu siꞌe̱ u̱nꞌ ñaa̱ꞌ, nda̱ꞌaꞌ i̱ ka̱xi̱ꞌ i̱ ―ni̱ katyi̱ aꞌ.
15 Ndisu̱ ni̱ kaꞌa̱n Lea xiinꞌ aꞌ ndii:
―¿Ñáá xïndoó nimá u̱nꞌ ña̱ ni̱ na̱ka̱ u̱nꞌ i̱i̱ꞌ ku̱i̱ti̱ꞌ i̱, te̱ vi̱ti̱n ndii nde̱e̱ ndo̱koꞌ mandrágora, ña̱ ni̱ ti̱so̱ te̱ lulu siꞌe̱ i̱ kaa̱ꞌ, kuni na̱ꞌi̱ u̱nꞌ nda̱ꞌaꞌ i̱? ―ni̱ katyi̱ aꞌ.
Sa̱kanꞌ te̱ ni̱ kaꞌa̱n Raquel xiinꞌ aꞌ ndii:
―Ñu̱u nunuꞌ kusu̱n Jacob xiinꞌ yoꞌó naaꞌ ta̱xi̱ u̱nꞌ ndo̱koꞌ mandrágora ñaa̱ꞌ nda̱ꞌaꞌ i̱ ka̱xi̱ꞌ i̱ ―ni̱ katyi̱ aꞌ.
16 Te̱ xa̱kuaa̱ꞌ kii̱ꞌ ni̱ na̱ndi̱koꞌ Jacob ña̱ ni̱ xaꞌa̱n xatyuunꞌ ra̱ xaꞌa̱ꞌ kuꞌu̱ ndii, ni̱ xaꞌa̱n ku̱ndi̱a̱tu̱ ña̱ꞌaꞌ Lea, te̱ ni̱ kaꞌa̱n aꞌ xiinꞌ ra̱ ndii:
―Toꞌo̱ꞌ kii̱ꞌ te̱ ka̱nduꞌu̱ꞌ u̱nꞌ xiinꞌ i̱ ñu̱u vi̱ti̱n, sa̱kanꞌ ña̱ xa̱ ni̱ tya̱ꞌvi̱ i̱ xaꞌa̱ꞌ u̱nꞌ xiinꞌ ndo̱koꞌ mandrágora ña̱ ni̱ ti̱so̱ siꞌe̱ i̱ ―ni̱ katyi̱ aꞌ.
Te̱ ñu̱u ja̱a̱nꞌ ndii, ni̱ kixi̱n ra̱ xiinꞌ Lea.
17 Te̱ ni̱ xi̱ni̱ so̱ꞌo̱ Ndiosí ña̱ kaꞌán Lea xiinꞌ a̱, sa̱kanꞌ na ni̱ na̱ku̱i̱so̱ aꞌ, te̱ ni̱ tuvi̱ siꞌe̱ aꞌ, te̱ uꞌu̱n, xiinꞌ Jacob.
18 Sa̱kanꞌ te̱ ni̱ kaꞌa̱n aꞌ ndii:
―Te̱ lulu yoꞌoꞌ ndii, Isacar ku̱na̱niꞌ ra̱, sa̱kanꞌ ña̱ Ndiosí ni̱ xa̱mani̱ꞌ ra̱ yuꞌu̱ xaꞌa̱ꞌ a̱ ña̱ ni̱ ta̱xi̱ ñaꞌ xikaꞌ nuuꞌ nuu̱ꞌ i̱ ku̱ndu̱u̱ ñaꞌ siꞌi i̱i̱ꞌ i̱ ―ni̱ katyi̱ aꞌ.
19 Ni̱ yaꞌa̱ te̱ tu̱ku̱ sa̱kanꞌ ni̱ na̱ku̱i̱so̱ Lea, te̱ ni̱ tuvi̱ siꞌe̱ aꞌ, te̱ iñu̱, xiinꞌ Jacob.
20 Te̱ ni̱ kaꞌa̱n aꞌ ndii:
―Ni̱ ta̱xi̱ Ndiosí i̱i̱n tu̱mani̱ꞌ va̱ꞌa̱ nda̱ꞌaꞌ i̱, te̱ vi̱ti̱n ndii, ko̱to̱ kaꞌnuꞌ ka̱ i̱i̱ꞌ i̱ yuꞌu̱, sa̱kanꞌ ña̱ xa̱ iñu̱ taꞌan kuuꞌ siꞌe̱ i̱ yoo xiinꞌ ra̱ ―ni̱ katyi̱ aꞌ.
Te̱ ni̱ tyi̱nduꞌu̱ꞌ aꞌ kivi̱ꞌ te̱ lulu ja̱a̱nꞌ Zabulón.
21 Soꞌo̱ꞌ ndiꞌiꞌ te̱ ni̱ yoo̱ i̱i̱n ña̱ꞌaꞌ siꞌe̱ aꞌ, te̱ ni̱ tyi̱nduꞌu̱ꞌ aꞌ kivi̱ꞌ ñaꞌ ja̱a̱nꞌ Dina.
22 Te̱ ni̱ na̱ka̱ꞌanꞌ tu̱ Ndiosí xaꞌa̱ꞌ Raquel, te̱ ni̱ xi̱ni̱ so̱ꞌo̱ a̱ ña̱ xikán aꞌ nuu̱ꞌ a̱, te̱ ni̱ ta̱xi̱ a̱ ña̱ ko̱o̱ siꞌe̱ aꞌ.
23 Te̱ kii̱ꞌ ni̱ tuvi̱ siꞌe̱ aꞌ te̱ nu̱uꞌ, te̱ ni̱ kaꞌa̱n aꞌ ndii:
―Ni̱ xta̱ꞌniꞌ Ndiosí ña̱ kaꞌanꞌ nuu̱ꞌ i̱ ña̱ kü̱vi̱ ko̱o̱ siꞌe̱ i̱ ―ni̱ katyi̱ aꞌ.
24 Te̱ ni̱ tyi̱nduꞌu̱ꞌ aꞌ kivi̱ꞌ ra̱ José kaꞌán aꞌ ndii:
―Xa̱va̱ꞌa̱ naaꞌ xiinꞌ Ndiosí ta̱xi̱ a̱ i̱nga̱ siꞌe̱ i̱ ―ni̱ katyi̱ aꞌ.
So̱ꞌo̱ ni̱ xa̱a̱ a̱ te̱ ni̱ ku̱vikaꞌ va̱ Jacob
25 Kii̱ꞌ ndi̱ꞌi̱ ni̱ tuvi̱ José nuu̱ꞌ Raquel, te̱ ni̱ kaꞌa̱n Jacob xiinꞌ Labán ndii:
―Sa̱a̱ u̱nꞌ ña̱ va̱ꞌa̱, te̱ ta̱xi̱ u̱nꞌ na̱ndi̱koꞌ i̱ ñu̱u̱ i̱ nuu̱ꞌ ñu̱ꞌuꞌ miiꞌ ni̱ ki̱e̱e̱ i̱.
26 Ta̱xi̱ u̱nꞌ na na̱ka̱ i̱ ñaꞌ siꞌi i̱ xiinꞌ siꞌe̱ i̱ te̱ kuꞌu̱n i̱, sa̱kanꞌ ña̱ xa̱ ni̱ xatyuunꞌ i̱ nuu̱ꞌ u̱nꞌ xaꞌa̱ꞌ ñaꞌ siꞌi i̱ kaa̱ꞌ, te̱ xa̱ xiní u̱nꞌ ña̱ ni̱ xa̱tyuunꞌ ndi̱e̱eꞌ va̱ i̱ nuu̱ꞌ u̱nꞌ xaꞌa̱ꞌ ni̱a̱ ―ni̱ katyi̱ ra̱.
27 Ndisu̱ ni̱ na̱ku̱i̱i̱n Labán ndii:
―Naaꞌ va̱ꞌa̱ te̱ yivi̱ꞌ nduuꞌ i̱ xtuu u̱nꞌ ndii, ndoo̱ ka̱ u̱nꞌ ku̱nduꞌu̱ꞌ u̱nꞌ yoꞌoꞌ, sa̱kanꞌ ña̱ ni̱ na̱ku̱ni̱ i̱ ña̱ ni̱ ku̱vikaꞌ i̱ xaꞌa̱ꞌ a̱ ña̱ nduꞌu̱ꞌ yoꞌó vi̱ꞌe̱ i̱ xiinꞌ i̱.
28 Te̱ ni̱ kaꞌa̱n ka̱ ra̱ xiinꞌ Jacob ndii:
―Kaꞌa̱n xiinꞌ i̱ sa̱a̱ kuní u̱nꞌ ku̱ndu̱u̱ ya̱ꞌvi̱ u̱nꞌ, te̱ tya̱ꞌvi̱ i̱ yoꞌó ―ni̱ katyi̱ ra̱.
29 Sa̱kanꞌ te̱ ni̱ na̱ku̱i̱i̱n Jacob ndii.
―Xa̱ xiní yoꞌó ña̱ ni̱ xa̱tyuunꞌ ndi̱e̱eꞌ va̱ i̱ nuu̱ꞌ u̱nꞌ, te̱ xiní tu̱ u̱nꞌ ña̱ ni̱ ku̱kuaꞌa̱ꞌ ka̱ ki̱tiꞌ sana̱ u̱nꞌ nde̱e̱ kii̱ꞌ ni̱ xa̱ꞌaꞌ xi̱to̱ yuꞌu̱ riꞌ.
30 Ku̱a̱tyi̱ ndii, köo̱ꞌ kuaꞌa̱ꞌ riꞌ ni̱ ku̱miꞌ u̱nꞌ kii̱ꞌ tiäꞌa̱an xaa̱ yuꞌu̱, ndisu̱ vi̱ti̱n ndii, xa̱ ni̱ ku̱u̱ kuaꞌa̱ꞌ xa̱va̱ꞌa̱ riꞌ, sa̱kanꞌ ña̱ nde̱e̱ kii̱ꞌ ni̱ xa̱a̱ i̱ ndii, ni̱ xa̱ꞌaꞌ Yahvé sañuꞌuꞌ a̱ yoꞌó, ndisu̱ vi̱ti̱n ndii, kuni xa̱ꞌaꞌ i̱ sa̱tyuunꞌ i̱ xaꞌa̱ꞌ ne̱ ndieeꞌ vi̱ꞌe̱ mi̱iꞌ i̱ ―ni̱ katyi̱ ra̱.
31 Te̱ ni̱ nda̱tuꞌu̱nꞌ ña̱ꞌaꞌ Labán ndii:
―¿Sa̱a̱ kuní u̱nꞌ tya̱ꞌvi̱ i̱ yoꞌó? ―ni̱ katyi̱ ra̱.
Te̱ ni̱ kaꞌa̱n Jacob ndii:
―Tyä̱ꞌvi̱ u̱nꞌ yuꞌu̱ nde̱e̱ siee. Naaꞌ sa̱a̱ u̱nꞌ ña̱ kaka̱n i̱ nuu̱ꞌ u̱nꞌ vi̱ti̱n ndii, ko̱to̱ na xitoꞌ i̱ mbe̱e̱ sana̱ u̱nꞌ.
32 Ta̱xi̱ u̱nꞌ xkaꞌndi̱a̱ i̱ vi̱ti̱n miiꞌ ñuꞌuꞌ mbe̱e̱ sana̱ u̱nꞌ, te̱ sa̱siinꞌ i̱ sa̱kuuꞌ mbe̱e̱ kualiꞌ tiꞌ ndiaaꞌ, xiinꞌ sa̱kuuꞌ ti̱xuꞌu̱ꞌ kualiꞌ tiꞌ me̱ko̱, xiinꞌ tiꞌ kuiin, te̱ tiꞌ ja̱a̱nꞌ ku̱ndu̱u̱ ya̱ꞌvi̱ i̱.
33 Sa̱kanꞌ te̱ nuu̱ꞌ kuꞌu̱n e̱ꞌ kii̱ꞌ ki̱xi̱n ko̱to̱ u̱nꞌ tiꞌ ni̱ ka̱nandoo i̱ ndii, ku̱nda̱ni̱ u̱nꞌ ña̱ ni̱ xa̱tyuunꞌ nda̱ku i̱ xiinꞌ u̱nꞌ. Ndisu̱ naaꞌ ku̱ni̱ u̱nꞌ saká ti̱xuꞌu̱ꞌ tiꞌ kuäsa̱ꞌ kuiin, uun tiꞌ kuäsa̱ꞌ me̱ko̱, uun mbe̱e̱ tiꞌ kuäsa̱ꞌ ndiaaꞌ ndii, ku̱nda̱ni̱ u̱nꞌ ña̱ ni̱ xa̱kuiꞌnaꞌ i̱ ki̱tiꞌ sana̱ u̱nꞌ na sa̱kanꞌ ―ni̱ katyi̱ ra̱.
34 Sa̱kanꞌ te̱ ni̱ na̱ku̱i̱i̱n Labán ndii:
―Va̱ꞌa̱ tu̱ sa̱kanꞌ, nakuiinꞌ yu̱ꞌuꞌ i̱ ña̱ kaꞌán u̱nꞌ ―ni̱ katyi̱ ra̱.
35 Te̱ xa̱ kivi̱ꞌ sa̱kanꞌ ni̱ xa̱ siinꞌ Labán sa̱kuuꞌ ti̱xuꞌu̱ꞌ kuiin, xiinꞌ tiꞌ me̱ko̱, xiinꞌ tiꞌ i̱ta̱, xiinꞌ sa̱kuuꞌ mbe̱e̱ ndiaaꞌ, te̱ ni̱ sa̱na̱kuaꞌa ra̱ riꞌ nda̱ꞌaꞌ siꞌe̱ ra̱, te̱ ko̱to̱ te̱ ja̱a̱nꞌ riꞌ.
36 Ndi̱ꞌi̱ ja̱a̱nꞌ te̱ ni̱ na̱ka̱ siꞌe̱ ra̱ ja̱a̱nꞌ tiꞌ ja̱a̱nꞌ te̱ kuaꞌa̱n ra̱ xiinꞌ riꞌ tu̱ku̱ xaanꞌ xikaꞌ miiꞌ naá Jacob ja̱a̱nꞌ, uni̱ kivi̱ꞌ ni̱ ñuꞌu̱ ra̱ i̱tyiꞌ, te̱ ni̱ na̱xaa̱ ra̱ i̱kanꞌ. Te̱ Jacob ndii, ni̱ ndoo̱ te̱ ja̱a̱nꞌ xitoꞌ na xitoꞌ ra̱ i̱nga̱ ti̱ꞌvi̱ mbe̱e̱ sana̱ Labán ja̱a̱nꞌ.
37 Sa̱kanꞌ te̱ ni̱ xa̱ꞌndi̱a̱ Jacob nda̱ꞌaꞌ tunꞌ naniꞌ álamo, xiinꞌ nda̱ꞌaꞌ tunꞌ almendro, xiinꞌ tunꞌ tyi̱tia ñu̱ꞌu̱, te̱ ni̱ xa̱ꞌa̱ ra̱ tyi̱tyi̱ xata̱ꞌ sa̱kuuꞌ nu̱ꞌ, te̱ ku̱vi̱ tuviꞌ miiꞌ ya̱a̱ ku̱ñu̱ nu̱ꞌ.
38 Te̱ ni̱ tyi̱ndi̱e̱e̱ ra̱ sa̱kuuꞌ tunꞌ ni̱ xa̱ꞌa̱ ra̱ tyi̱tyi̱ xata̱ꞌ ja̱a̱nꞌ yu̱ꞌuꞌ tundo̱oꞌ miiꞌ xiꞌiꞌ ki̱tiꞌ ti̱kui. Sa̱kanꞌ ña̱ i̱kanꞌ nduuꞌ miiꞌ xtata̱ riꞌ, kii̱ꞌ ku̱a̱xi̱ riꞌ xiꞌiꞌ riꞌ ti̱kui.
39 Sa̱kanꞌ na kuiiꞌ kii̱ꞌ xtata̱ riꞌ miiꞌ ni̱ tyi̱ndi̱e̱e̱ ra̱ tunꞌ ni̱ xa̱ꞌa̱ ra̱ tyi̱tyi̱ xata̱ꞌ ja̱a̱nꞌ ndii, ni̱ tuvi̱ siꞌe̱ riꞌ tiꞌ kuiin, xiinꞌ tiꞌ me̱ko̱, xiinꞌ tiꞌ i̱ta̱.
40 Sa̱kanꞌ te̱ ni̱ xa̱siinꞌ Jacob mbe̱e̱ sana̱ Labán, te̱ ni̱ ta̱a̱nꞌ ra̱ riꞌ xtoꞌniꞌ miiꞌ ñuꞌuꞌ tiꞌ kuiin, xiinꞌ tiꞌ ndiaaꞌ sana̱ mi̱iꞌ ra̱. Sa̱kanꞌ ni̱ xa̱a̱ Jacob, te̱ ni̱ na̱koo̱ mbe̱e̱ sana̱ mi̱iꞌ ra̱, ni̱ xa̱ siinꞌ ra̱ riꞌ miiꞌ ñuꞌuꞌ mbe̱e̱ sana̱ Labán.
41 Sa̱kuuꞌ i̱tyiꞌ kii̱ꞌ xtata̱ tiꞌ xa̱ꞌan ka̱ ndii, ni̱ tyi̱ndi̱e̱e̱ Jacob tunꞌ ni̱ xa̱ꞌa̱ ra̱ tyi̱tyi̱ xata̱ꞌ ja̱a̱nꞌ nuu̱ꞌ riꞌ yu̱ꞌuꞌ tundo̱oꞌ te̱ ko̱to̱ ndo̱so̱ꞌ riꞌ nu̱ꞌ kii̱ꞌ xtata̱ riꞌ.
42 Ndisu̱ kii̱ꞌ xtata̱ tiꞌ kuiꞌe ndii, tyïndieeꞌ ra̱ tunꞌ ni̱ xa̱ꞌa̱ ra̱ tyi̱tyi̱ xata̱ꞌ ja̱a̱nꞌ, sa̱kanꞌ na kuiiꞌ tiꞌ kuiꞌe ka̱ ndii, sana̱ Labán nduuꞌ riꞌ, te̱ tiꞌ xa̱ꞌan ka̱ ndii, sana̱ mi̱iꞌ Jacob nduuꞌ riꞌ.
43 Sa̱kanꞌ ni̱ xa̱a̱ Jacob, te̱ ni̱ ku̱vikaꞌ xa̱va̱ꞌa̱ ra̱, te̱ ni̱ ku̱kuaꞌa̱ꞌ xa̱va̱ꞌa̱ mbe̱e̱ sana̱ ra̱, te̱ ni̱ yoo̱ tu̱ kuaꞌa̱ꞌ va̱ te̱ xikaꞌ nuuꞌ nuu̱ꞌ ra̱, xiinꞌ ne̱ xikaꞌ nuuꞌ nuu̱ꞌ ra̱, xiinꞌ kuaꞌa̱ꞌ tu̱ camello, xiinꞌ kuaꞌa̱ꞌ tu̱ mburru sana̱ ra̱.