28
Sa̱kanꞌ te̱ ni̱ ka̱na̱ Isaac Jacob, te̱ ni̱ sa̱ñuꞌuꞌ ña̱ꞌaꞌ ra̱, te̱ ni̱ kaꞌa̱n tyuunꞌ tu̱ ra̱ xiinꞌ ra̱ ndii:
―Tü̱ndaꞌa̱ꞌ u̱nꞌ xiinꞌ nde̱e̱ i̱i̱n ña̱ꞌaꞌ, ne̱ ndieeꞌ nuu̱ꞌ ñu̱ꞌuꞌ Canaán yoꞌoꞌ.
2 Kuaꞌan nuu̱ꞌ ñu̱ꞌuꞌ Padán-arám vi̱ꞌe̱ xii̱ꞌ u̱nꞌ Betuel, yu̱vaꞌ si̱ꞌiꞌ u̱nꞌ, te̱ i̱kanꞌ tu̱ndaꞌa̱ꞌ u̱nꞌ xiinꞌ i̱i̱n ñaꞌ siꞌe̱ Labán, tiaa̱ taꞌanꞌ si̱ꞌiꞌ u̱nꞌ.
3 Te̱ Ndiosí, ña̱ sa̱kuuꞌ a̱ ku̱vi̱, na sa̱ñuꞌuꞌ yoꞌó, te̱ na ta̱xi̱ tu̱ a̱ ña̱ ko̱o̱ kuaꞌa̱ꞌ va̱ siꞌe̱ u̱nꞌ, te̱ na ta̱xi̱ tu̱ a̱ ña̱ ko̱o̱ kuaꞌa̱ꞌ va̱ ne̱ si̱a̱niꞌ xikaꞌ u̱nꞌ, nde̱e̱ na̱xaa̱ ni̱a̱ ku̱ndu̱u̱ ni̱a̱ kiꞌinꞌ ti̱ꞌvi̱ naꞌnuꞌ.
4 Te̱ na sa̱ñuꞌuꞌ Ndiosí yoꞌó, te̱ sa̱kanꞌ tu̱ ne̱ si̱a̱niꞌ xikaꞌ u̱nꞌ, ña̱ ta̱xi̱ a̱ nda̱ꞌaꞌ ndo̱ꞌ ña̱ ni̱ ndoo̱ a̱ kuento a̱ xaꞌa̱ꞌ nuu̱ꞌ Abraham ta̱xi̱ a̱ nda̱ꞌaꞌ ra̱. Sa̱kanꞌ te̱ ku̱ndu̱u̱ ndo̱ꞌ ne̱ xiinꞌ ña̱ꞌa̱ ñu̱ꞌuꞌ miiꞌ ndieeꞌ e̱ꞌ yoꞌoꞌ vi̱ti̱n nde̱e̱ naa ne̱ tukuꞌ, sa̱kanꞌ ña̱ xa̱ mi̱iꞌ Ndiosí ni̱ ndoo̱ kuento a̱ nuu̱ꞌ Abraham ña̱ ta̱xi̱ ña̱ꞌaꞌ a̱ nda̱ꞌaꞌ ra̱ ―ni̱ katyi̱ Isaac.
5 Sa̱kanꞌ ni̱ xa̱a̱ a̱, te̱ ni̱ ti̱ꞌviꞌ Isaac Jacob kuaꞌa̱n ra̱ nuu̱ꞌ ñu̱ꞌuꞌ Padán-arám, te̱ i̱kanꞌ ndoo̱ ra̱ vi̱ꞌe̱ xi̱to̱ ra̱ Labán, tiaa̱ taꞌanꞌ si̱ꞌiꞌ ra̱ Rebeca, te̱ nduuꞌ siꞌe̱ Betuel, te̱ vi̱ꞌe̱ arameo.
6 Te̱ ni̱ xi̱ni̱ Esaú kuento ña̱ ni̱ sa̱ñuꞌuꞌ Isaac Jacob, te̱ ni̱ ti̱ꞌviꞌ ña̱ꞌaꞌ ra̱ nuu̱ꞌ ñu̱ꞌuꞌ Padán-arám te̱ tu̱ndaꞌa̱ꞌ ra̱ i̱kanꞌ. Te̱ ni̱ xi̱ni̱ tu̱ ra̱ kuento ña̱ ni̱ kaꞌa̱n Isaac xiinꞌ Jacob ndii: "Tü̱ndaꞌa̱ꞌ u̱nꞌ xiinꞌ nde̱e̱ i̱i̱n ña̱ꞌaꞌ ne̱ ndieeꞌ nuu̱ꞌ ñu̱ꞌuꞌ Canaán yoꞌoꞌ", ni̱ katyi̱ ra̱.
7 Te̱ ni̱ xi̱ni̱ tu̱ Esaú kuento ña̱ ni̱ sa̱xinú Jacob ña̱ ni̱ kaꞌa̱n tyuunꞌ yu̱vaꞌ siꞌiꞌ ra̱ xiinꞌ ra̱ te̱ kuaꞌa̱n ra̱ nuu̱ꞌ ñu̱ꞌuꞌ Padán-arám.
8 Sa̱kanꞌ te̱ ni̱ ku̱nda̱ni̱ Esaú ña̱ xtäni̱ Isaac, yu̱vaꞌ ra̱, ña̱ꞌaꞌ ne̱ ndieeꞌ nuu̱ꞌ ñu̱ꞌuꞌ Canaán ja̱a̱nꞌ ku̱ndu̱u̱ xa̱nu̱ ra̱.
9 Sa̱kanꞌ na ni̱ xaꞌa̱n Esaú miiꞌ ndieeꞌ ne̱ i̱i̱n kuuꞌ xiinꞌ Ismael, siꞌe̱ Abraham, te̱ tee̱ꞌ ndee xa̱ yoo uvi̱ taꞌan ñaꞌ siꞌi ra̱ ne̱ ñu̱ꞌuꞌ Canaán ndii, ni̱ tu̱ndaꞌa̱ꞌ ra̱ xiinꞌ i̱i̱n ñaꞌ siꞌe̱ Ismael ja̱a̱nꞌ, ñaꞌ naniꞌ Mahalat, ñaꞌ taꞌanꞌ Nebaiot.
So̱ꞌo̱ ni̱ xa̱ni Jacob kii̱ꞌ kanduꞌu̱ꞌ ra̱ kixín ra̱ miiꞌ naniꞌ a̱ Betel
10 Te̱ ni̱ ke̱ta̱ Jacob ñu̱u̱ Beerseba, te̱ kuaꞌa̱n ra̱ nde̱e̱ ñu̱u̱ Harán.
11 Te̱ kii̱ꞌ xa̱ kuaꞌa̱n ketá ñu̱ꞌu̱ ndii, ni̱ xa̱a̱ ra̱ i̱i̱n xaanꞌ, te̱ i̱kanꞌ ni̱ ndoo̱ ra̱ ni̱ kixi̱n ra̱, te̱ ni̱ ki̱ꞌi̱n ra̱ i̱i̱n yuu̱ꞌ ña̱ ndieeꞌ i̱kanꞌ ni̱ tyi̱ꞌi̱ ra̱ siki̱ꞌ ra̱, te̱ ni̱ na̱ka̱nduꞌu̱ꞌ ra̱ ni̱ kixi̱n ra̱.
12 Te̱ ni̱ xa̱ni ra̱ ña̱ ni̱ xi̱ni̱ ra̱ yoo kuato̱ ña̱ xaꞌaꞌ nde̱e̱ nuu̱ꞌ ñu̱ꞌuꞌ, te̱ kuaꞌa̱n ka̱a̱ a̱ naxaá a̱ nde̱e̱ ndi̱viꞌ, te̱ ni̱ xi̱ni̱ tu̱ ra̱ ña̱ kuaꞌa̱n kaaꞌ kiꞌinꞌ ángele Ndiosí, te̱ kuaꞌa̱n nuuꞌ tu̱ a̱ nuu̱ꞌ kuato̱ ja̱a̱nꞌ.
13 Te̱ ni̱ xi̱ni̱ tu̱ ra̱ iinꞌ ndi̱tyi̱ Yahvé nde̱e̱ nuu̱ꞌ kuato̱ ja̱a̱nꞌ miiꞌ sukun, te̱ ni̱ kaꞌa̱n a̱ xiinꞌ ra̱ ndii:
―Yuꞌu̱ nduuꞌ Yahvé, ña̱ nduuꞌ Ndiosí xii̱ꞌ u̱nꞌ Abraham, te̱ su̱vi̱ tu̱ i̱ nduuꞌ Ndiosí yu̱vaꞌ u̱nꞌ Isaac. Te̱ nda̱ꞌaꞌ yoꞌó, xiinꞌ nda̱ꞌaꞌ ne̱ si̱a̱niꞌ xikaꞌ u̱nꞌ ta̱xi̱ i̱ ñu̱ꞌuꞌ miiꞌ kanduꞌu̱ꞌ u̱nꞌ ñaa̱ꞌ.
14 Te̱ ne̱ ja̱a̱nꞌ ndii, nda̱sa̱kuaꞌa̱ꞌ xa̱va̱ꞌa̱ i̱ ni̱a̱ nde̱e̱ naa kuaꞌa̱ꞌ ya̱kaꞌ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ, te̱ kiku̱ ni̱a̱ ku̱ndi̱e̱e̱ ni̱a̱ sa̱a̱ kuaꞌa̱n nuu̱ꞌ ñu̱ꞌuꞌ i̱i̱n yivi̱ꞌ, xa̱ꞌaꞌ a̱ nde̱e̱ miiꞌ ketaꞌ ñu̱ꞌu̱, te̱ kuꞌu̱n ndi̱koꞌ a̱ nde̱e̱ miiꞌ ketá a̱, te̱ sa̱kanꞌ tu̱ xa̱ꞌaꞌ a̱ nde̱e̱ nuu̱ꞌ ñu̱ꞌuꞌ norte, te̱ kuꞌu̱n ndi̱koꞌ a̱ nde̱e̱ nuu̱ꞌ ñu̱ꞌuꞌ sur, te̱ xiinꞌ nda̱ꞌaꞌ yoꞌó sa̱ñuꞌuꞌ i̱ sa̱kuuꞌ ne̱ yivi̱ꞌ i̱i̱n yivi̱ꞌ, te̱ sa̱kanꞌ tu̱ xiinꞌ nda̱ꞌaꞌ ne̱ si̱a̱niꞌ xikaꞌ u̱nꞌ sa̱ñuꞌuꞌ i̱ ni̱a̱.
15 Te̱ yoo i̱ xiinꞌ u̱nꞌ, te̱ ko̱to̱ i̱ yoꞌó miiꞌ ka̱ kuꞌu̱n u̱nꞌ, te̱ sa̱na̱ndikoꞌ tu̱ku̱u̱ i̱ yoꞌó nuu̱ꞌ ñu̱ꞌuꞌ yoꞌoꞌ, sa̱kanꞌ ña̱ nä̱ko̱o̱ i̱ yoꞌó nde̱e̱ sa̱xinu̱ i̱ kuento ña̱ ni̱ ta̱xi̱ i̱ nda̱ꞌaꞌ u̱nꞌ ―ni̱ katyi̱ a̱.
16 Te̱ kii̱ꞌ ni̱ ndo̱to̱ Jacob, te̱ ni̱ kaꞌa̱n ra̱ xiinꞌ nimá ra̱ ndii:
―Ña̱ nda̱ku nduuꞌ a̱ ndii, yoo Yahvé yoꞌoꞌ, te̱ xïní yuꞌu̱ ―ni̱ katyi̱ ra̱.
17 Te̱ ni̱ yi̱ꞌvi va̱ ra̱, te̱ ni̱ kaꞌa̱n tu̱ ra̱ ndii:
―Yoꞌoꞌ ndii, i̱i̱n xaanꞌ miiꞌ su̱ꞌu̱n va̱ nduuꞌ a̱, sa̱kanꞌ ña̱ yiꞌeꞌ ndi̱viꞌ, ña̱ nduuꞌ vi̱ꞌe̱ Ndiosí, nduuꞌ a̱ ―ni̱ katyi̱ ra̱.
18 Te̱ ni̱ ndo̱koo̱ Jacob ni̱a̱ꞌa̱ va̱ tu̱ku̱ kivi̱ꞌ, te̱ ni̱ ki̱ꞌi̱n ra̱ yuu̱ꞌ ña̱ ni̱ kiꞌi̱ siki̱ꞌ ra̱ ni̱ kixi̱n ra̱ i̱kanꞌ, te̱ ni̱ xa̱ni̱ ndi̱tyi̱ ra̱ a̱ nde̱e̱ naa i̱i̱n ndu̱yu̱, ndi̱ꞌi̱ ja̱a̱nꞌ te̱ ni̱ sa̱kaaꞌ ra̱ xa̱ꞌa̱n oliva xata̱ꞌ a̱.
19 Te̱ ni̱ tyi̱nduꞌu̱ꞌ Jacob kivi̱ꞌ i̱kanꞌ naniꞌ a̱ Betel, tee̱ꞌ ndee xta̱ꞌanꞌ ndii, Luz ni̱ na̱niꞌ miiꞌ ni̱ ka̱nduꞌu̱ꞌ ra̱ ja̱a̱nꞌ. (Te̱ ña̱ ja̱a̱nꞌ kuni katyi̱ a̱, i̱tunꞌ almendro.)
20 Te̱ ni̱ ta̱xi̱ Jacob kuento ra̱ i̱kanꞌ kaꞌán ra̱ ndii:
―Naaꞌ kuꞌu̱n Ndiosí xiinꞌ i̱, te̱ ko̱to̱ a̱ yuꞌu̱ i̱tyiꞌ miiꞌ kuꞌu̱n i̱ yoꞌoꞌ, te̱ naaꞌ ta̱xi̱ a̱ ña̱ ka̱xi̱ꞌ i̱, te̱ ta̱xi̱ tu̱ a̱ toto̱ ku̱i̱ꞌnu̱ i̱,
21 te̱ naaꞌ na̱ndi̱koꞌ va̱ꞌa̱ i̱ vi̱ꞌe̱ yu̱vaꞌ i̱ ndii, Yahvé ja̱a̱nꞌ ku̱ndu̱u̱ Ndiosí nuu̱ꞌ i̱.
22 Te̱ yuu̱ꞌ, ña̱ ni̱ xa̱ni̱ i̱ yoꞌoꞌ, ku̱ndu̱u̱ nde̱e̱ naa vi̱ꞌe̱ Ndiosí, te̱ sa̱kuuꞌ ña̱ꞌa̱ ña̱ ta̱xi̱ a̱ nda̱ꞌaꞌ i̱ ndii, tya̱ꞌvi̱ i̱ ña̱ꞌaꞌ i̱ uxi̱ taꞌan ña̱ꞌa̱ nuu̱ꞌ i̱ꞌi̱n ciento ña̱ ka̱nandoo i̱ ―ni̱ katyi̱ ra̱.