Yoꞌoꞌ kaꞌán a̱ xaꞌa̱ꞌ siꞌe̱ Abraham te̱ ni̱ yoo̱ xiinꞌ Cetura
25
Abraham ndii, ni̱ yoo̱ i̱nga̱ ñaꞌ siꞌi ra̱ ñaꞌ naniꞌ Cetura.
2 Te̱ siꞌe̱ ra̱, te̱ ni̱ yoo̱ xiinꞌ ñaꞌ ja̱a̱nꞌ ndii, ña̱ yo̱ꞌo̱ nduuꞌ kivi̱ꞌ ra̱: I̱i̱n ra̱ naniꞌ Zimran, te̱ i̱i̱n ra̱ naniꞌ Jocsán, te̱ i̱i̱n ra̱ naniꞌ Medán, te̱ i̱i̱n ra̱ naniꞌ Madián, te̱ i̱i̱n ra̱ naniꞌ Isbac, te̱ i̱i̱n ra̱ naniꞌ Súa.
3 Te̱ siꞌe̱ Jocsán ndii, ña̱ yo̱ꞌo̱ nduuꞌ kivi̱ꞌ ra̱: I̱i̱n ra̱ naniꞌ Seba, te̱ i̱i̱n ra̱ naniꞌ Dedán. Te̱ si̱a̱niꞌ xikaꞌ Dedán ja̱a̱nꞌ ndii, ña̱ yo̱ꞌo̱ nduuꞌ kivi̱ꞌ i̱ꞌi̱n ti̱ꞌvi̱ ra̱: I̱i̱n ti̱ꞌvi̱ ra̱ naniꞌ Asurím, te̱ i̱nga̱ ti̱ꞌvi̱ ra̱ naniꞌ Letusím, te̱ i̱nga̱ ka̱ ti̱ꞌvi̱ ra̱ naniꞌ Leumím.
4 Te̱ siꞌe̱ Madián ja̱a̱nꞌ ndii, ña̱ yo̱ꞌo̱ nduuꞌ kivi̱ꞌ ra̱: I̱i̱n ra̱ naniꞌ Efa, te̱ i̱i̱n ra̱ naniꞌ Efer, te̱ i̱i̱n ra̱ naniꞌ Hanoc, te̱ i̱i̱n ra̱ naniꞌ Abida, te̱ i̱i̱n ra̱ naniꞌ Elda. Te̱ sa̱kuuꞌ te̱ ja̱a̱nꞌ ni̱ nduu̱ si̱a̱niꞌ xikaꞌ Cetura ja̱a̱nꞌ.
5 Abraham ndii, sa̱kuuꞌ ña̱ vikaꞌ ra̱ ni̱ ta̱xi̱ ra̱ nda̱ꞌaꞌ Isaac.
6 Ndisu̱ siꞌe̱ ra̱, te̱ ni̱ yoo̱ xiinꞌ i̱nga̱ ña̱ꞌaꞌ ndii, ña̱ꞌa̱ kualiꞌ kuso̱ꞌo̱ ku̱i̱ti̱ꞌ ni̱ ta̱xi̱ ra̱ nda̱ꞌaꞌ te̱ ja̱a̱nꞌ, te̱ ni̱ xa̱ siinꞌ ña̱ꞌaꞌ ra̱ nuu̱ꞌ Isaac, te̱ ni̱ ti̱ꞌviꞌ ña̱ꞌaꞌ ra̱ xikaꞌ, xtoꞌniꞌ miiꞌ kuaxi̱ ke̱ta̱ ñu̱ꞌu̱.
Yoꞌoꞌ kaꞌán a̱ xaꞌa̱ꞌ kii̱ꞌ ni̱ xiꞌi̱ Abraham, xiinꞌ miiꞌ ni̱ na̱taa̱nꞌ ña̱ꞌaꞌ ne̱ yivi̱ꞌ
7 Ciento uni̱ xi̱ko̱ xaꞌu̱n kuiya̱ ni̱ tiaku̱ Abraham,
8 te̱ ni̱ ke̱ta̱ nimá ra̱, te̱ ni̱ xiꞌi̱ ra̱ kii̱ꞌ ni̱ xi̱xa̱ va̱ ra̱, te̱ kuaꞌa̱n ndu̱u̱ i̱i̱n nimá ra̱ xiinꞌ sa̱kuuꞌ ne̱ xii̱ꞌ ya̱taꞌ ra̱.
9 Te̱ siꞌe̱ ra̱ Isaac, xiinꞌ Ismael ni̱ na̱taa̱nꞌ ñu̱ꞌuꞌ ndeꞌi̱ ra̱ i̱i̱n yavi̱, ña̱ iinꞌ Macpela, ña̱ kanduꞌu̱ꞌ nuu̱ꞌ ñu̱ꞌuꞌ Efrón, siꞌe̱ Zohar, te̱ vi̱ꞌe̱ Het, te̱ nduꞌu̱ꞌ xtoꞌniꞌ miiꞌ naniꞌ Manré.
10 Te̱ ña̱ ja̱a̱nꞌ nduuꞌ ñu̱ꞌuꞌ ña̱ ni̱ sa̱ta̱ꞌ Abraham nuu̱ꞌ te̱ vi̱ꞌe̱ Het, te̱ i̱kanꞌ ni̱ ndiee̱ tu̱ ñu̱ꞌuꞌ ndeꞌi̱ Abraham xi̱i̱nꞌ a̱ miiꞌ naá ñu̱ꞌuꞌ ndeꞌi̱ ñaꞌ siꞌi ra̱ Sara.
11 Te̱ kii̱ꞌ ni̱ yaꞌa̱ ña̱ ni̱ xiꞌi̱ Abraham ja̱a̱nꞌ ndii, ni̱ sa̱ñuꞌuꞌ Ndiosí Isaac. Te̱ Isaac ndii, ya̱ti̱n pozo ña̱ naniꞌ «ña̱ tiaku te̱ xini a̱ yuꞌu̱», ni̱ nduꞌu̱ꞌ ra̱.
Ña̱ yo̱ꞌo̱ nduuꞌ kivi̱ꞌ si̱a̱niꞌ Ismael
12 Te̱ yo̱ꞌo̱ nduuꞌ si̱a̱niꞌ xikaꞌ Ismael, siꞌe̱ Abraham xiinꞌ Agar, ñaꞌ ni̱ ki̱e̱e̱ ñu̱ꞌuꞌ Egipto, ñaꞌ ni̱ xika̱ nu̱u̱ nuu̱ꞌ Sara.
13 Ña̱ yo̱ꞌo̱ nduuꞌ kivi̱ꞌ siꞌe̱ Ismael, ni̱ xa̱ꞌaꞌ a̱ xiinꞌ kivi̱ꞌ te̱ ni̱ tuvi̱ nu̱uꞌ: I̱i̱n ra̱ naniꞌ Nebaiot, te̱ i̱i̱n ra̱ naniꞌ Cedar, te̱ i̱i̱n ra̱ naniꞌ Adbeel, te̱ i̱i̱n ra̱ naniꞌ Mibsam,
14 te̱ i̱i̱n ra̱ naniꞌ Misma, te̱ i̱i̱n ra̱ naniꞌ Duma, te̱ i̱i̱n ra̱ naniꞌ Massa,
15 te̱ i̱i̱n ra̱ naniꞌ Hadar, te̱ i̱i̱n ra̱ naniꞌ Tema, te̱ i̱i̱n ra̱ naniꞌ Jetur, te̱ i̱i̱n ra̱ naniꞌ Nafis, te̱ i̱i̱n ra̱ naniꞌ Cedema.
16 Te̱ sa̱kuuꞌ te̱ ja̱a̱nꞌ ni̱ nduu̱ꞌ siꞌe̱ Ismael, te̱ xa̱ kivi̱ꞌ mi̱iꞌ i̱ꞌi̱n te̱ ja̱a̱nꞌ ni̱ tyi̱nduꞌu̱ꞌ ra̱ kivi̱ꞌ ñu̱u̱ miiꞌ ndieeꞌ ra̱, xiinꞌ ñu̱ꞌuꞌ ra̱. Te̱ i̱ꞌi̱n te̱ uxi̱ uvi̱ taꞌan ja̱a̱nꞌ ni̱ nduu̱ꞌ te̱ ni̱ xa̱ꞌndi̱a̱ tyuunꞌ nuu̱ꞌ ñu̱u̱ mi̱iꞌ ra̱.
17 Ciento oko̱ xaꞌu̱n uvi̱ kuiya̱ ni̱ tiaku̱ Ismael, te̱ ni̱ xiꞌi̱ ra̱, te̱ kuaꞌa̱n ndu̱u̱ i̱i̱n nimá ra̱ xiinꞌ sa̱kuuꞌ ne̱ xii̱ꞌ ya̱taꞌ ra̱ ñu̱u̱ ndi̱i.
18 Te̱ ne̱ si̱a̱niꞌ xikaꞌ ra̱ ndii, ni̱ ndiee̱ ni̱a̱ nuu̱ꞌ ñu̱ꞌuꞌ ña̱ naá te̱i̱n ñu̱u̱ Havila te̱ ni̱ xaꞌa̱n ndi̱koꞌ a̱ nde̱e̱ nuu̱ꞌ ñu̱ꞌuꞌ Shur, ña̱ kanduꞌu̱ꞌ ya̱ti̱n miiꞌ naá ñu̱ꞌuꞌ Egipto, ya̱ti̱n i̱tyiꞌ ña̱ kuaꞌa̱n ñu̱u̱ Asiria. I̱kanꞌ ni̱ ndiee̱ ra̱ tee̱ꞌ ndee ni̱ nda̱siꞌ va̱ ña̱ꞌaꞌ ne̱ i̱i̱n kuuꞌ xiinꞌ ra̱.
So̱ꞌo̱ ni̱ xa̱a̱ a̱ kii̱ꞌ ni̱ tuvi̱ Jacob xiinꞌ Esaú
19 Ña̱ yo̱ꞌo̱ nduuꞌ kivi̱ꞌ te̱ si̱a̱niꞌ xikaꞌ Isaac, siꞌe̱ Abraham.
20 Uvi̱ xi̱ko̱ kuiya̱ ni̱ ku̱miꞌ Isaac kii̱ꞌ ni̱ tu̱ndaꞌa̱ꞌ ra̱ xiinꞌ Rebeca. Te̱ Rebeca ja̱a̱nꞌ ndii, ñaꞌ siꞌe̱ Betuel nduuꞌ aꞌ, te̱ tiaa̱ taꞌanꞌ nduuꞌ Labán, te̱ uvi̱ sa̱aꞌ te̱ ja̱a̱nꞌ ndii, te̱ arameo nduuꞌ ra̱, te̱ ni̱ ndiee̱ ra̱ nuu̱ꞌ ñu̱ꞌuꞌ Padán-arám.
21 Rebeca ndii, ñaꞌ kü̱vi̱ ko̱o̱ siꞌe̱ nduuꞌ aꞌ, sa̱kanꞌ na ni̱ kaꞌa̱n Isaac xiinꞌ Yahvé xaꞌa̱ꞌ aꞌ, te̱ ni̱ xi̱ni̱ so̱ꞌo̱ Ndiosí ña̱ kaꞌán ra̱ xiinꞌ a̱, te̱ ni̱ na̱kuꞌu̱n siꞌe̱ aꞌ, te̱ kuate.
22 Ndisu̱ xaꞌa̱ꞌ a̱ ña̱ ku̱ntaꞌanꞌ uvi̱ sa̱aꞌ te̱ kuañuꞌu̱ ja̱a̱nꞌ ti̱xi̱n aꞌ na ni̱ kaꞌa̱n aꞌ xiinꞌ nimá aꞌ ndii: «Naaꞌ vï̱kuii̱n ña̱ uꞌvi̱ xini i̱ kaa̱ꞌ ndii, nde̱e̱ tyaaꞌ ka̱ na ku̱vi̱ i̱», ni̱ katyi̱ aꞌ. Te̱ ni̱ xaꞌa̱n nda̱tuꞌu̱nꞌ aꞌ xaꞌa̱ꞌ ña̱ ja̱a̱nꞌ nuu̱ꞌ Yahvé.
23 Te̱ ni̱ kaꞌa̱n Ndiosí xiinꞌ aꞌ ndii:
―Siꞌe̱ u̱nꞌ, te̱ ndisoꞌ u̱nꞌ ñaa̱ꞌ ndii, uvi̱ taꞌan ñu̱u̱ naꞌnuꞌ ña̱ ku̱nda̱siꞌ taꞌanꞌ, ku̱ndu̱u̱ ne̱ si̱a̱niꞌ xikaꞌ ra̱, sa̱kanꞌ na xa̱ kuntaꞌanꞌ ra̱ ti̱xi̱n u̱nꞌ nde̱e̱ ña̱ kuní ka̱ tuvi̱ ra̱. I̱i̱n ra̱ ku̱ndu̱u̱ te̱ kooꞌ tyukuuꞌ ka̱ te̱ sa̱kanꞌ i̱nga̱ ra̱, te̱ te̱ xkuaꞌa̱ꞌ ka̱ka̱ nu̱u̱ nuu̱ꞌ te̱ xanuuꞌ ―ni̱ katyi̱ a̱.
24 Te̱ kii̱ꞌ ni̱ xa̱a̱ kivi̱ꞌ ña̱ tuvi̱ siꞌe̱ Rebeca ndii, te̱ kuate nduuꞌ ra̱ ni̱ tuvi̱ nuu̱ꞌ aꞌ.
25 Te̱ ni̱ tuvi̱ ña̱ nu̱uꞌ ndii, kuaꞌa ku̱ñu̱ ra̱, te̱ i̱xiꞌ va̱ tu̱ ka̱niiꞌ i̱i̱nꞌ ra̱. Sa̱kanꞌ na ni̱ tyi̱nduꞌu̱ꞌ ni̱a̱ kivi̱ꞌ ra̱ Esaú.
26 Ndi̱ꞌi̱ ja̱a̱nꞌ te̱ ni̱ tuvi̱ ña̱ni̱ ra̱ tiinꞌ ra̱ siꞌndi̱ xaꞌa̱ꞌ Esaú ja̱a̱nꞌ xiinꞌ i̱i̱n nda̱a̱ꞌ nda̱ꞌaꞌ ra̱, xaꞌa̱ꞌ a̱ ja̱a̱nꞌ na ni̱ tyi̱nduꞌu̱ꞌ ni̱a̱ kivi̱ꞌ ra̱ Jacob. Uni̱ xi̱ko̱ kuiya̱ ni̱ ku̱miꞌ Isaac kii̱ꞌ ni̱ tuvi̱ te̱ kuate ja̱a̱nꞌ.
So̱ꞌo̱ ni̱ xa̱a̱ a̱ kii̱ꞌ ni̱ xi̱ko̱ꞌ Esaú nde̱iꞌ ña̱ kumiꞌ ra̱ xaꞌa̱ꞌ a̱ ña̱ nduuꞌ ra̱ te̱ nu̱uꞌ
27 Te̱ ni̱ xa̱ꞌnu̱ te̱ kualiꞌ ja̱a̱nꞌ, Esaú ndii, i̱i̱n te̱ tyu̱u̱n va̱ ka̱ꞌni̱ꞌ ki̱tiꞌ ni̱ nduu̱ ra̱, te̱ ni̱ xta̱ni̱ va̱ tu̱ ra̱ ka̱ka̱ ra̱ xaꞌa̱ꞌ kuꞌu̱. Ndisu̱ Jacob ndii, i̱i̱n te̱ ii̱ꞌ kuuꞌ ni̱ nduu̱ ra̱, te̱ xa̱nuu̱ꞌ vi̱ꞌe̱ ku̱i̱ti̱ꞌ ni̱ xta̱ni̱ va̱ ra̱ ku̱nduꞌu̱ꞌ ra̱.
28 Te̱ Isaac ndii, ni̱ ku̱ndani̱ ka̱ ra̱ Esaú, sa̱kanꞌ ña̱ ni̱ xi̱xi̱ ra̱ ki̱tiꞌ, tiꞌ ni̱ xa̱ꞌni̱ꞌ te̱ ja̱a̱nꞌ, ndisu̱ Rebeca ndii, ni̱ ku̱ndani̱ ka̱ aꞌ Jacob.
29 Untaꞌ ndii, nduꞌu̱ꞌ Jacob xava̱ꞌa̱ ra̱ i̱i̱n nuu̱ꞌ ña̱ xaxi̱ꞌ, te̱ tani̱ ña̱ ja̱a̱nꞌ xaaꞌ ra̱ te̱ ni̱ na̱ndi̱koꞌ Esaú, ni̱ xa̱vi va̱ ra̱ ni̱ xaꞌa̱n ra̱ xaꞌa̱ꞌ kuꞌu̱,
30 te̱ ni̱ kaꞌa̱n ra̱ xiinꞌ Jacob ndii:
―Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ ña̱ xaxi̱ꞌ kuaꞌa, ña̱ ni̱ xa̱ꞌa̱ u̱nꞌ ñaa̱ꞌ ka̱xi̱ꞌ i̱, sa̱kanꞌ ña̱ xiꞌí xa̱va̱ꞌa̱ i̱ so̱ko̱ ―ni̱ katyi̱ ra̱.
Sa̱kanꞌ na ni̱ tyi̱nduꞌu̱ꞌ tu̱ ni̱a̱ kivi̱ꞌ ra̱ naniꞌ ra̱ Edom.
31 Te̱ ni̱ kaꞌa̱n Jacob xiinꞌ ra̱ ndii:
―Xi̱ꞌna̱ ka̱ ta̱xi̱ u̱nꞌ kuento u̱nꞌ nuu̱ꞌ i̱ ña̱ ta̱xi̱ u̱nꞌ nda̱ꞌaꞌ i̱ ña̱ nde̱iꞌ, ña̱ kumiꞌ u̱nꞌ xaꞌa̱ꞌ a̱ ña̱ nduuꞌ u̱nꞌ te̱ nu̱uꞌ ―ni̱ katyi̱ ra̱.
32 Sa̱kanꞌ te̱ ni̱ kaꞌa̱n Esaú xiinꞌ ra̱ ndii:
―Yuꞌu̱ ndii, xa̱ yoo i̱ ku̱vi̱ i̱ ña̱ xiꞌí so̱ko̱, sa̱kanꞌ na kuiiꞌ kuäsa̱ꞌ ka̱ kuní ña̱ nde̱iꞌ ña̱ kumiꞌ i̱ xaꞌa̱ꞌ a̱ ña̱ nduuꞌ i̱ te̱ nu̱uꞌ ―ni̱ katyi̱ ra̱.
33 Sa̱kanꞌ te̱ ni̱ kaꞌa̱n tu̱ku̱u̱ Jacob xiinꞌ ra̱ ndii:
―Ta̱xi̱ kii̱ꞌ kuento u̱nꞌ nuu̱ꞌ i̱ vi̱ti̱n ―ni̱ katyi̱ ra̱.
Te̱ ni̱ ta̱xi̱ Esaú kuento ra̱ nuu̱ꞌ Jacob xaꞌa̱ꞌ ña̱ ja̱a̱nꞌ. Sa̱kanꞌ ni̱ xa̱a̱ ra̱, te̱ ni̱ sa̱yaꞌá ra̱ nda̱ꞌaꞌ Jacob ña̱ nde̱iꞌ ña̱ kumiꞌ ra̱ xaꞌa̱ꞌ a̱ ña̱ nduuꞌ ra̱ te̱ nu̱uꞌ. 
34 Sa̱kanꞌ te̱ ni̱ ta̱xi̱ Jacob ndu̱tyiꞌ kualiꞌ ña̱ ni̱ sa̱kasun ra̱ ja̱a̱nꞌ xiinꞌ xita̱ꞌ va̱ꞌa̱ nda̱ꞌaꞌ Esaú, te̱ ni̱ xi̱xi̱ ra̱ a̱, te̱ ni̱ xi̱ꞌi̱ ra̱, i̱kanꞌ te̱ ni̱ nu̱ta̱ ra̱ te̱ kuaꞌa̱n ra̱. Te̱ xiinꞌ ña̱ ja̱a̱nꞌ ni̱ niaꞌa̱ ra̱ ña̱ nuu̱ꞌ mi̱iꞌ ra̱ ndii, kuäsa̱ꞌ kuní xa̱tyiꞌ ña̱ nde̱iꞌ ña̱ kumiꞌ ra̱ xaꞌa̱ꞌ a̱ ña̱ nduuꞌ ra̱ te̱ nu̱uꞌ.