So̱ꞌo̱ ni̱ xa̱a̱ a̱ kii̱ꞌ ni̱ xiꞌi̱ Sara
23
So̱ꞌo̱ taꞌan kuiya̱ ni̱ xika̱ Sara i̱i̱n yivi̱ꞌ, ciento oko̱ uxa̱ kuiya̱,
2 te̱ ni̱ xiꞌi̱ aꞌ ñu̱u̱ Quiriat-arba, ña̱ naniꞌ kivi̱ꞌ vi̱ti̱n Hebrón, ña̱ naá nuu̱ꞌ ñu̱ꞌuꞌ Canaán. Te̱ i̱kanꞌ ni̱ xa̱ku̱ Abraham xaꞌa̱ꞌ Sara, te̱ ni̱ ku̱su̱tyiꞌ va̱ i̱ni̱ ra̱ xaꞌa̱ꞌ aꞌ.
3 Ndi̱ꞌi̱ ja̱a̱nꞌ te̱ ni̱ ke̱ta̱ ra̱ miiꞌ kanduꞌu̱ꞌ ñu̱ꞌuꞌ ndeꞌi̱ aꞌ ja̱a̱nꞌ, te̱ ni̱ xaꞌa̱n nda̱tuꞌunꞌ ra̱ xiinꞌ te̱ vi̱ꞌe̱ Het, kaꞌán ra̱ ndii:
4 ―Te̱ tukuꞌ, te̱ ni̱ ki̱e̱e̱ tu̱ku̱ xaanꞌ, nduuꞌ i̱, te̱ nduꞌu̱ꞌ i̱ te̱i̱n ndo̱ꞌ yoꞌoꞌ, sa̱kanꞌ na sa̱a̱ ndo̱ꞌ ña̱ va̱ꞌa̱ te̱ xi̱ko̱ꞌ ndo̱ꞌ siee ñu̱ꞌuꞌ miiꞌ ku̱vi̱ na̱taa̱nꞌ i̱ ñu̱ꞌuꞌ ndeꞌi̱ ñaꞌ siꞌi i̱ ―ni̱ katyi̱ ra̱.
5 Te̱ ni̱ kaꞌa̱n te̱ vi̱ꞌe̱ Het ja̱a̱nꞌ xiinꞌ Abraham ndii:
6 ―Ku̱ni̱ so̱ꞌo̱ u̱nꞌ ña̱ kaꞌa̱n ndu̱ xiinꞌ u̱nꞌ, tákuiꞌe, yoꞌó ndii, i̱i̱n te̱ kaꞌnuꞌ kuuꞌ nuu̱ꞌ xikaꞌ nuuꞌ nuu̱ꞌ Ndiosí nduuꞌ u̱nꞌ, te̱ nduꞌu̱ꞌ u̱nꞌ miiꞌ ndieeꞌ ndu̱, sa̱kanꞌ na kuiiꞌ ku̱vi̱ tyi̱naá u̱nꞌ ñu̱ꞌuꞌ ndeꞌi̱ ñaꞌ siꞌi u̱nꞌ yavi̱ ndi̱i̱ ña̱ va̱ꞌa̱ ka̱, ña̱ yooꞌ nuu̱ꞌ ñu̱ꞌuꞌ kaa̱ꞌ. Te̱ nde̱e̱ i̱i̱n ndu̱ käꞌa̱n yu̱ꞌuꞌ te̱ ta̱xi̱ ndu̱ ña̱ ja̱a̱nꞌ, ni̱ nde̱e̱ köo̱ꞌ kaꞌa̱n tu̱ xiinꞌ u̱nꞌ ña̱ kü̱vi̱ na̱taa̱nꞌ ña̱ꞌaꞌ u̱nꞌ ―ni̱ katyi̱ ra̱.
7 Sa̱kanꞌ te̱ ni̱ na̱ka̱nduꞌu̱ꞌ ndi̱e̱e̱ Abraham nde̱e̱ nuu̱ꞌ ñu̱ꞌuꞌ, te̱ ni̱ ti̱i̱n kaꞌnuꞌ ra̱ te̱ vi̱ꞌe̱ Het ja̱a̱nꞌ,
8 kaꞌán ra̱ ndii:
―Xaꞌa̱ꞌ a̱ ña̱ kuni tyi̱ndi̱e̱eꞌ ndo̱ꞌ yuꞌu̱ te̱ taxiꞌ ndo̱ꞌ ñu̱ꞌuꞌ miiꞌ na̱taa̱nꞌ i̱ ñaꞌ siꞌi i̱ ndii, sa̱a̱ ndo̱ꞌ ña̱ va̱ꞌa̱ te̱ kaꞌa̱n ndaꞌvi ndo̱ꞌ xaꞌa̱ꞌ i̱ nuu̱ꞌ Efrón, siꞌe̱ Zohar,
9 te̱ xi̱ko̱ꞌ ra̱ yavi̱ ndi̱i̱, ña̱ itaꞌ nuu̱ꞌ ñu̱ꞌuꞌ Macpela, ña̱ kanduꞌu̱ꞌ ya̱ti̱n xeꞌinꞌ nuu̱ꞌ ñu̱ꞌuꞌ ra̱, te̱ tya̱ꞌvi̱ i̱ xaꞌa̱ꞌ a̱ i̱i̱n ya̱ꞌvi̱ va̱ꞌa̱ sa̱a̱ ndiaa yaꞌviꞌ a̱, te̱ ku̱ndu̱u̱ a̱ ñu̱ꞌuꞌ i̱ miiꞌ ndiee̱ ne̱ i̱i̱n kuuꞌ xiinꞌ i̱ te̱i̱n ndo̱ꞌ yoꞌoꞌ ―ni̱ katyi̱ ra̱.
10 Te̱ xaꞌa̱ꞌ a̱ ña̱ i̱kanꞌ nduꞌu̱ꞌ Efrón te̱i̱n te̱ ja̱a̱nꞌ na ni̱ na̱ku̱i̱i̱n ra̱ kaꞌán tiꞌeꞌ ra̱, te̱ ku̱ni̱ so̱ꞌo̱ sa̱kuuꞌ ne̱ ndieeꞌ ja̱a̱nꞌ xiinꞌ ne̱ xkaꞌndíá kuaꞌa̱n yiꞌeꞌ ñu̱u̱ ja̱a̱nꞌ ndii:
11 ―Kuäsa̱ꞌ xa̱tyiꞌ sa̱kanꞌ ranꞌ, tákuiꞌe kuaꞌa, sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌa̱n i̱ xiinꞌ u̱nꞌ. Ta̱xi̱ so̱ꞌo̱ i̱ ñu̱ꞌuꞌ ja̱a̱nꞌ nda̱ꞌaꞌ u̱nꞌ te̱ sa̱kanꞌ tu̱ yavi̱ ndi̱i̱ ña̱ itaꞌ nuu̱ꞌ a̱, nuu̱ꞌ sa̱kuuꞌ ne̱ yivi̱ꞌ, ne̱ itaꞌ yoꞌoꞌ vi̱ti̱n, kuaꞌan te̱ na̱taa̱nꞌ u̱nꞌ ñaꞌ siꞌi u̱nꞌ i̱kanꞌ ―ni̱ katyi̱ ra̱.
12 Sa̱kanꞌ te̱ tu̱ku̱ ni̱ ni̱ na̱ka̱nduꞌu̱ꞌ ndieeꞌ Abraham nde̱e̱ nuu̱ꞌ ñu̱ꞌuꞌ ña̱ kiꞌinꞌ kaꞌnuꞌ ra̱ te̱ ndieeꞌ i̱kanꞌ,
13 te̱ ni̱ kaꞌa̱n ra̱ xiinꞌ Efrón nuu̱ꞌ sa̱kuuꞌ ne̱ ndieeꞌ i̱kanꞌ ndii:
―Kuäsa̱ꞌ xa̱tyiꞌ sa̱kanꞌ ranꞌ, sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌa̱n i̱ xiinꞌ u̱nꞌ, tya̱ꞌvi̱ yuꞌu̱ xaꞌa̱ꞌ ñu̱ꞌuꞌ ja̱a̱nꞌ, kaꞌa̱n u̱nꞌ xiinꞌ i̱ sa̱a̱ ndiaa a̱ te̱ tya̱ꞌvi̱ i̱ xaꞌa̱ꞌ a̱, te̱ na̱taa̱nꞌ i̱ ñaꞌ siꞌi i̱ i̱kanꞌ ―ni̱ katyi̱ ra̱.
14 Sa̱kanꞌ te̱ ni̱ kaꞌa̱n Efrón xiinꞌ ra̱ ndii:
15 ―Tákuiꞌe, sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌa̱n i̱ xiinꞌ u̱nꞌ, ñu̱ꞌuꞌ ja̱a̱nꞌ ndii, ku̱miꞌ ciento xu̱ꞌunꞌ yuu̱ꞌ plata ndiaa a̱, te̱ ya̱ꞌvi̱ ñu̱ꞌuꞌ ja̱a̱nꞌ ndii, kuäsa̱ꞌ kuaꞌa̱ꞌ xa̱tyiꞌ a̱ nuu̱ꞌ yoꞌó xiinꞌ nuu̱ꞌ yuꞌu̱, kuaꞌa̱n kii̱ꞌ te̱ na̱taa̱nꞌ u̱nꞌ ñaꞌ siꞌi u̱nꞌ i̱kanꞌ ―ni̱ katyi̱ ra̱.
16 Te̱ ni̱ ndoo̱ Abraham kuento ña̱ tya̱ꞌvi̱ ra̱ xaꞌa̱ꞌ ñu̱ꞌuꞌ ja̱a̱nꞌ sa̱kuuꞌ xu̱ꞌunꞌ ña̱ ni̱ xika̱n Efrón ja̱a̱nꞌ nuu̱ꞌ ra̱, sa̱kanꞌ na ni̱ tya̱ꞌvi̱ xinu̱ ra̱ xaꞌa̱ꞌ a̱ nuu̱ꞌ sa̱kuuꞌ te̱ vi̱ꞌe̱ Het, te̱ itaꞌ i̱kanꞌ, sa̱a̱ nakuitá xiinꞌ nde̱iꞌ ña̱ xixaá te̱ sata̱ꞌ, uun te̱ xiko̱ꞌ ña̱ꞌa̱ kii̱ꞌ sa̱kanꞌ.
17 Sa̱kanꞌ ni̱ xa̱a̱ a̱, te̱ ni̱ na̱ndu̱u̱ Abraham te̱ xiinꞌ ña̱ꞌa̱ ñu̱ꞌuꞌ Efrón, ña̱ kanduꞌu̱ꞌ Macpela ya̱ti̱n ñu̱u̱ Mamré. Xaꞌa̱ꞌ a̱ ja̱a̱nꞌ na ñu̱ꞌuꞌ ja̱a̱nꞌ xiinꞌ yavi̱ ña̱ itaꞌ nuu̱ꞌ a̱, xiinꞌ sa̱kuuꞌ i̱tunꞌ, tunꞌ yoo nuu̱ꞌ a̱ ndii,
18 ña̱ꞌa̱ Abraham ni̱ na̱ndu̱u̱ a̱. Te̱ te̱ vi̱ꞌe̱ Het xiinꞌ sa̱kuuꞌ ne̱ xkaꞌndíá kuaꞌa̱n yiꞌeꞌ ñu̱u̱ ja̱a̱nꞌ ni̱ nduu̱ ne̱ ni̱ xi̱ni̱ sa̱a̱ ni̱ sa̱ta̱ꞌ ra̱ ñu̱ꞌuꞌ ja̱a̱nꞌ.
19 Ni̱ yaꞌa̱ ña̱ ja̱a̱nꞌ, te̱ ni̱ na̱taa̱nꞌ Abraham ñaꞌ siꞌi ra̱ Sara yavi̱ ña̱ itaꞌ Macpela ya̱ti̱n Mamré. Te̱ naniꞌ tu̱ a̱ Hebrón, te̱ kanduꞌu̱ꞌ a̱ nuu̱ꞌ ñu̱ꞌuꞌ Canaán.
20 Sa̱kanꞌ ni̱ xa̱a̱ a̱, te̱ ni̱ na̱ndu̱u̱ Abraham te̱ xiinꞌ ña̱ꞌa̱ ñu̱ꞌuꞌ, ña̱ ni̱ sa̱ta̱ꞌ ra̱ nuu̱ꞌ te̱ vi̱ꞌe̱ Het xiinꞌ yavi̱ ña̱ itaꞌ nuu̱ꞌ a̱, te̱ ku̱ndu̱u̱ a̱ miiꞌ ndiee̱ ne̱ i̱i̱n kuuꞌ xiinꞌ ra̱.