So̱ꞌo̱ ni̱ xa̱a̱ a̱ kii̱ꞌ ni̱ kaꞌa̱n tyuunꞌ Ndiosí xiinꞌ Abraham ña̱ na̱soko̱ꞌ ra̱ siꞌe̱ ra̱ Isaac nuu̱ꞌ a̱
22
Kii̱ꞌ ni̱ yaꞌa̱ ndiaꞌviꞌ kuiya̱, te̱ ni̱ xi̱to̱ ku̱a̱ꞌa̱ Ndiosí ña̱ ni̱ i̱ni̱ Abraham xini ña̱ꞌaꞌ ra̱, ni̱ kaꞌa̱n a̱ xiinꞌ ra̱ ndii:
―¡Abraham! ―ni̱ katyi̱ a̱.
Te̱ ni̱ na̱ku̱i̱i̱n ra̱ ndii:
―Yoꞌoꞌ iinꞌ i̱ ―ni̱ katyi̱ ra̱.
2 Te̱ ni̱ kaꞌa̱n ka̱ a̱ xiinꞌ ra̱ ndii:
―Na̱ka̱ Isaac, te̱ i̱i̱n nda̱a̱ꞌ tilu̱ꞌ siꞌe̱ u̱nꞌ, te̱ ndani̱ xa̱va̱ꞌa̱ u̱nꞌ, te̱ kuꞌu̱n ndo̱ꞌ nuu̱ꞌ ñu̱ꞌuꞌ ña̱ naniꞌ Moriah, te̱ i̱kanꞌ na̱soko̱ꞌ u̱nꞌ ra̱ nuu̱ꞌ i̱ nde̱e̱ naa ña̱ nasoko̱ꞌ ña̱ xixí, xíniꞌ i̱i̱n i̱kuꞌ ña̱ niaꞌa̱ i̱ yoꞌó ―ni̱ katyi̱ a̱.
3 Te̱ tu̱ku̱ kivi̱ꞌ ndii, ni̱a̱ꞌa̱ yaꞌa̱ ni̱ ndo̱koo̱ Abraham, te̱ ni̱ sa̱kaaꞌ ra̱ tei̱ xata̱ꞌ mburru sana̱ ra̱, te̱ ni̱ xa̱ka̱ ra̱ uvi̱ taꞌan te̱ xikaꞌ nuuꞌ nuu̱ꞌ ra̱, te̱ ni̱ na̱ka̱ tu̱ ra̱ Isaac, siꞌe̱ ra̱. Te̱ ni̱ sa̱kuatyiꞌ tu̱ ra̱ tu̱tunꞌ, tunꞌ ka̱ꞌmi̱ ra̱ ña̱ na̱soko̱ꞌ ra̱, te̱ ni̱ ki̱e̱e̱ ra̱ kuaꞌa̱n ra̱ miiꞌ ni̱ kaꞌa̱n Ndiosí xiinꞌ ra̱ kuꞌu̱n ra̱.
4 Te̱ kii̱ꞌ xa̱ kuaꞌa̱n uni̱ kivi̱ꞌ ñuꞌuꞌ ra̱ i̱tyiꞌ, te̱ ni̱ nda̱ni̱ꞌi̱ Abraham nuu̱ꞌ ra̱, te̱ ni̱ xi̱ni̱ ra̱ nde̱e̱ xikaꞌ kanduꞌu̱ꞌ xiki̱ꞌ miiꞌ kuaꞌa̱n ra̱ ja̱a̱nꞌ.
5 Sa̱kanꞌ te̱ ni̱ kaꞌa̱n Abraham xiinꞌ te̱ xikaꞌ nuuꞌ nuu̱ꞌ ra̱ ndii:
―Ndiatuꞌ ndo̱ꞌ yoꞌoꞌ xiinꞌ mburru, na kuꞌu̱n i̱ xiinꞌ te̱ lulu siꞌe̱ i̱ nde̱e̱ xiki̱ꞌ kaa̱ꞌ, te̱ sa̱kaꞌnuꞌ ndu̱ Ndiosí, ndi̱ꞌi̱ ja̱a̱nꞌ te̱ na̱ndi̱koꞌ tu̱ku̱u̱ ndu̱ yoꞌoꞌ ―ni̱ katyi̱ ra̱.
6 Sa̱kanꞌ te̱ ni̱ ti̱a̱a̱ Abraham tu̱tunꞌ, tunꞌ ka̱ꞌmi̱ ra̱ ña̱ na̱soko̱ꞌ ja̱a̱nꞌ, xata̱ꞌ Isaac, siꞌe̱ ra̱, te̱ mi̱iꞌ ra̱ niꞌiꞌ ñuꞌu̱ ti̱kei̱, xiinꞌ tyilo kuaꞌa̱n ra̱. Te̱ kii̱ꞌ ñuꞌuꞌ uvi̱ sa̱aꞌ ra̱ i̱tyiꞌ kuaꞌa̱n ra̱ ndii,
7 ni̱ ndi̱ko̱kuiín Isaac, te̱ ni̱ nda̱tuꞌu̱nꞌ ra̱ Abraham kaꞌán ra̱ ndii:
―¡Tataa̱! ―ni̱ katyi̱ ra̱.
Te̱ ni̱ na̱ku̱i̱i̱n Abraham ndii:
―¿Yo̱o̱ nduuꞌ a̱ kuní u̱nꞌ, yu̱vaꞌ i̱? ―ni̱ katyi̱ ra̱.
Te̱ ni̱ kaꞌa̱n Isaac xiinꞌ ra̱ ndii:
―Xa̱ kumiꞌ e̱ꞌ ñuꞌu̱, xiinꞌ tu̱tunꞌ, ndisu̱, te̱ mbe̱e̱, tiꞌ ka̱ꞌmi̱ e̱ꞌ te̱ na̱soko̱ꞌ e̱ꞌ, ¿miiꞌ ki̱ꞌi̱n e̱ꞌ riꞌ? ―ni̱ katyi̱ ra̱.
8 Te̱ ni̱ na̱ku̱i̱i̱n Abraham ndii:
―Mi̱iꞌ Ndiosí sa̱ñuꞌuꞌ yooꞌ xiinꞌ i̱i̱n mbe̱e̱, tiꞌ ka̱ꞌmi̱ e̱ꞌ te̱ na̱soko̱ꞌ e̱ꞌ, yu̱vaꞌ i̱ ―ni̱ katyi̱ ra̱.
Te̱ kuaꞌa̱n na kuaꞌa̱n uvi̱ sa̱aꞌ ra̱ i̱kanꞌ. 
9 Te̱ kii̱ꞌ ni̱ xa̱a̱ ra̱ miiꞌ ni̱ kaꞌa̱n Ndiosí xiinꞌ ra̱ ja̱a̱nꞌ ndii, ni̱ xa̱ꞌa̱ Abraham i̱i̱n altar, te̱ ni̱ ta̱ndi̱e̱e̱ ra̱ tu̱tunꞌ nuu̱ꞌ ña̱ ja̱a̱nꞌ, te̱ ni̱ sa̱tiín ra̱ Isaac, siꞌe̱ ra̱, te̱ ni̱ tyi̱ka̱nuꞌ ña̱ꞌaꞌ ra̱ nuu̱ꞌ altar xata̱ꞌ tu̱tunꞌ ja̱a̱nꞌ.
10 sa̱kanꞌ te̱ ni̱ ki̱ꞌi̱n ra̱ tyilo te̱ ke̱ndoso̱ꞌ ra̱ suku̱nꞌ siꞌe̱ ra̱ ja̱a̱nꞌ.
11 Xa̱ sa̱kanꞌ ni̱ te̱ ni̱ ka̱na̱ ña̱ꞌaꞌ ángele Yahvé Ndiosí nde̱e̱ ndi̱viꞌ, kaꞌán a̱ xiinꞌ ra̱ ndii:
―¡Abraham! ¡Abraham! ―ni̱ katyi̱ a̱.
Te̱ ni̱ na̱ku̱i̱i̱n ra̱ ndii:
―Yoꞌoꞌ iinꞌ i̱ ―ni̱ katyi̱ ra̱.
12 Sa̱kanꞌ te̱ ni̱ kaꞌa̱n ka̱ ángele xiinꞌ ra̱ ndii:
―Ndiatuꞌ u̱nꞌ, sä̱tu̱xuꞌví u̱nꞌ te̱ siee ñaa̱ꞌ, sa̱kanꞌ ña̱ xa̱ xiní i̱ ña̱ i̱ni̱ xna̱ꞌa̱ u̱nꞌ xini u̱nꞌ Ndiosí. Sa̱kanꞌ su̱u̱ nï̱ kaꞌa̱n yu̱ꞌuꞌ u̱nꞌ ña̱ ta̱xi̱ u̱nꞌ siꞌe̱ u̱nꞌ, te̱ i̱i̱n nda̱a̱ꞌ tilu̱ꞌ ñaa̱ꞌ nda̱ꞌaꞌ i̱ ―ni̱ katyi̱ a̱.
13 Sa̱kanꞌ te̱ ni̱ na̱ko̱to̱ xata̱ꞌ Abraham, te̱ ni̱ xi̱ni̱ ra̱ i̱i̱n mbe̱e̱ ni̱ xi̱kuꞌu̱n ndi̱kiꞌ riꞌ yo̱ꞌoꞌ ti̱ka naá riꞌ xaꞌa̱ꞌ kuꞌu̱ xiti̱nꞌ ya̱ti̱n i̱kanꞌ. Sa̱kanꞌ te̱ ni̱ ti̱i̱n ra̱ tiꞌ ja̱a̱nꞌ, te̱ ni̱ xa̱ꞌmi̱ ra̱ riꞌ nasoko̱ꞌ ra̱ riꞌ nuu̱ꞌ Ndiosí, te̱ nï̱ na̱soko̱ꞌ ka̱ ra̱ Isaac siꞌe̱ ra̱ ja̱a̱nꞌ.
14 Te̱ ni̱ tyi̱nduꞌu̱ꞌ Abraham kivi̱ꞌ i̱kuꞌ ja̱a̱nꞌ ndii: «Mi̱iꞌ Yahvé ta̱xi̱ ña̱ kuní nuu̱ꞌ e̱ꞌ». Sa̱kanꞌ na kuiiꞌ nde̱e̱ kivi̱ꞌ vi̱ti̱n kaꞌán ne̱ yivi̱ꞌ ña̱ i̱kuꞌ miiꞌ taxiꞌ Yahvé, ña̱ kuní nuu̱ꞌ e̱ꞌ naniꞌ a̱, katyi ni̱a̱.
―Xaꞌa̱ꞌ a̱ ña̱ ni̱ sa̱xinú u̱nꞌ ña̱ ni̱ kaꞌa̱n tyuunꞌ i̱ xiinꞌ u̱nꞌ, te̱ nï̱ kaꞌa̱n yu̱ꞌuꞌ u̱nꞌ ña̱ na̱soko̱ꞌ u̱nꞌ siꞌe̱ u̱nꞌ, te̱ i̱i̱n nda̱a̱ꞌ tilu̱ꞌ ja̱a̱nꞌ nuu̱ꞌ i̱ ndii, tiinꞌ ndiaa i̱ kivi̱ꞌ mi̱iꞌ i̱, te̱ taxiꞌ i̱ kuento i̱ nuu̱ꞌ u̱nꞌ ña̱,
17 sa̱ñuꞌuꞌ kuaꞌa̱ꞌ i̱ yoꞌó, te̱ nda̱sa̱kuaꞌa̱ꞌ tu̱ i̱ ne̱ si̱a̱niꞌ xikaꞌ u̱nꞌ nde̱e̱ naa kuaꞌa̱ꞌ tiuu̱nꞌ ndieeꞌ ndi̱viꞌ, uun nde̱e̱ naa kuaꞌa̱ꞌ ñu̱tiꞌ ndieeꞌ yu̱ꞌuꞌ mi̱ni̱. Te̱ ka̱nandoo tu̱ ni̱a̱ ne̱ ndasiꞌ taꞌanꞌ xiinꞌ ni̱a̱ sa̱a̱ i̱.
18 Te̱ xiinꞌ nda̱ꞌaꞌ ne̱ ja̱a̱nꞌ sa̱ñuꞌuꞌ i̱ sa̱kuuꞌ ne̱ yivi̱ꞌ i̱i̱n yivi̱ꞌ, sa̱kanꞌ ña̱ ni̱ sa̱xinu̱ u̱nꞌ ña̱ ni̱ kaꞌa̱n tyuunꞌ i̱ xiinꞌ u̱nꞌ, katyi Yahvé ―ni̱ katyi̱ ángele.
19 Sa̱kanꞌ te̱ ni̱ na̱ndi̱koꞌ Abraham xiinꞌ siꞌe̱ ra̱ miiꞌ ni̱ na̱ko̱o̱ ra̱ te̱ xikaꞌ nuuꞌ nuu̱ꞌ ra̱, te̱ ni̱ na̱ndi̱koꞌ ingaꞌ sa̱kuuꞌ ra̱ ñu̱u̱ Beerseba, te̱ i̱kanꞌ ni̱ ndoo̱ Abraham nduꞌu̱ꞌ ra̱.
20 Ni̱ yaꞌa̱ ndiaꞌviꞌ kivi̱ꞌ, te̱ ni̱ xaꞌa̱n kaꞌa̱n ne̱ yivi̱ꞌ xiinꞌ Abraham ña̱ yoo siꞌe̱ Milca, ñaꞌ siꞌi ña̱ni̱ ra̱ Nacor.
21 Te̱ nu̱uꞌ ndii, Uz naniꞌ ra̱, te̱ i̱nga̱ ra̱ naniꞌ Buz, te̱ i̱nga̱ ra̱ naniꞌ Kemuel, te̱ ja̱a̱nꞌ ni̱ nduu̱ yu̱vaꞌ Aram.
22 I̱kanꞌ te̱ ni̱ tuvi̱ te̱ naniꞌ Quesed, te̱ i̱nga̱ ra̱ naniꞌ Hazo, te̱ i̱nga̱ ra̱ naniꞌ Pildas, te̱ i̱nga̱ ra̱ naniꞌ Jidlaf, te̱ i̱nga̱ ra̱ naniꞌ Betuel.
23 Te̱ Betuel ja̱a̱nꞌ ni̱ nduu̱ yu̱vaꞌ Rebeca. Te̱ sa̱kuuꞌ te̱ uni̱a̱ taꞌan ja̱a̱nꞌ ni̱ nduu̱ siꞌe̱ Milca xiinꞌ Nacor, ña̱ni̱ Abraham.
24 Te̱ ni̱ yoo̱ ka̱ tu̱ siꞌe̱ Nacor ja̱a̱nꞌ xiinꞌ Reumá, ñaꞌ ni̱ nduu̱ i̱nga̱ ñaꞌ siꞌi ra̱, te̱ ña̱ yo̱ꞌo̱ nduuꞌ kivi̱ꞌ ra̱. I̱i̱n ra̱ naniꞌ Teba, te̱ i̱nga̱ ra̱ naniꞌ Gaham, te̱ i̱nga̱ ra̱ naniꞌ Tahas, te̱ i̱nga̱ ra̱ naniꞌ Maaca.