So̱ꞌo̱ ni̱ xa̱a̱ a̱ kii̱ꞌ ni̱ na̱ma̱ Ndiosí kivi̱ꞌ Abram, te̱ ni̱ na̱ku̱na̱niꞌ ra̱ Abraham
17
Ku̱miꞌ xi̱ko̱ xaꞌu̱n ku̱miꞌ kuiya̱ ni̱ ku̱miꞌ Abram kii̱ꞌ ni̱ tuvi̱ Yahvé Ndiosí nuu̱ꞌ ra̱, te̱ ni̱ kaꞌa̱n a̱ xiinꞌ ra̱ ndii:
―Yuꞌu̱ nduuꞌ Ndiosí, ña̱ sa̱kuuꞌ a̱ ku̱vi̱, ka̱ka̱ ii̱ꞌ u̱nꞌ nuu̱ꞌ i̱, te̱ sä̱a̱ u̱nꞌ nde̱e̱ i̱i̱n ku̱a̱tyi̱.
2 Te̱ ta̱xi̱ i̱ kuento i̱ nuu̱ꞌ u̱nꞌ ña̱ nda̱sa̱kuaꞌa̱ꞌ xa̱va̱ꞌa̱ i̱ si̱a̱niꞌ xikaꞌ u̱nꞌ ―ni̱ katyi̱ a̱.
3 Te̱ kii̱ꞌ ni̱ xi̱ni̱ so̱ꞌo̱ Abram ña̱ ja̱a̱nꞌ ndii, ni̱ na̱ka̱nduꞌu̱ꞌ ndi̱e̱e̱ ra̱ nde̱e̱ nuu̱ꞌ ñu̱ꞌuꞌ, te̱ ni̱ kaꞌa̱n ka̱ Yahvé Ndiosí xiinꞌ ra̱ ndii:
4 ―Ña̱ yo̱ꞌo̱ nduuꞌ kuento i̱ ña̱ taxiꞌ i̱ nda̱ꞌaꞌ u̱nꞌ, ña̱ ku̱ndu̱u̱ u̱nꞌ yu̱vaꞌ kuaꞌa̱ꞌ xa̱va̱ꞌa̱ nuu̱ꞌ ti̱ꞌvi̱ ne̱ yivi̱ꞌ i̱i̱n yivi̱ꞌ.
5 Te̱ na̱ma̱ i̱ kivi̱ꞌ u̱nꞌ, kü̱na̱niꞌ ka̱ u̱nꞌ Abram, süu̱ꞌ ja̱a̱nꞌ ndii, Abraham ku̱na̱niꞌ u̱nꞌ, sa̱kanꞌ ña̱ yu̱vaꞌ kuaꞌa̱ꞌ xa̱va̱ꞌa̱ nuu̱ꞌ ti̱ꞌvi̱ ne̱ yivi̱ꞌ i̱i̱n yivi̱ꞌ ni̱ nda̱sa̱nduuꞌ i̱ yoꞌó.
6 Nda̱sa̱kuaꞌa̱ꞌ xa̱va̱ꞌa̱ i̱ si̱a̱niꞌ xikaꞌ u̱nꞌ, te̱ te̱i̱n ne̱ si̱a̱niꞌ xikaꞌ u̱nꞌ ja̱a̱nꞌ ki̱e̱e̱ kiꞌinꞌ te̱ ku̱ndu̱u̱ rey, xiinꞌ kiꞌinꞌ ñu̱u̱ naꞌnuꞌ.
7 Taxiꞌ i̱ kuento i̱ nda̱ꞌaꞌ u̱nꞌ, xiinꞌ nda̱ꞌaꞌ sa̱kuuꞌ ne̱ si̱a̱niꞌ xikaꞌ u̱nꞌ nde̱e̱ ndiꞌiꞌ ni̱ kivi̱ꞌ, ne̱ tuvi̱ nuu̱ꞌ kuꞌu̱n e̱ꞌ, sa̱kanꞌ te̱ ku̱ndu̱u̱ i̱ Ndiosí u̱nꞌ, te̱ ku̱ndu̱u̱ tu̱ i̱ Ndiosí ne̱ ja̱a̱nꞌ.
8 Te̱ nda̱ꞌaꞌ yoꞌó ta̱xi̱ i̱ ñu̱ꞌuꞌ Canaán miiꞌ nduꞌu̱ꞌ u̱nꞌ ñaa̱ꞌ vi̱ti̱n, te̱ ndoo̱ a̱ nda̱ꞌaꞌ si̱a̱niꞌ xikaꞌ u̱nꞌ kii̱ꞌ ku̱vi̱ u̱nꞌ, te̱ ku̱ndu̱u̱ a̱ ña̱ꞌa̱ ni̱a̱ nde̱e̱ ndiꞌiꞌ ni̱ kivi̱ꞌ, te̱ yuꞌu̱ ku̱ndu̱u̱ Ndiosí ni̱a̱ ―ni̱ katyi̱ a̱.
9 Te̱ tu̱ku̱ ni̱ ni̱ kaꞌa̱n Ndiosí xiinꞌ Abraham ndii:
―Sa̱xinú u̱nꞌ kuento ña̱ ta̱xi̱ i̱ nda̱ꞌaꞌ u̱nꞌ, te̱ na sa̱xinú tu̱ ña̱ꞌaꞌ si̱a̱niꞌ xikaꞌ u̱nꞌ nde̱e̱ ndiꞌiꞌ ni̱ kivi̱ꞌ.
10 Ña̱ yo̱ꞌo̱ nduuꞌ kuento ña̱ taxiꞌ i̱ nuu̱ꞌ u̱nꞌ, ña̱ kuní i̱ sa̱xinú u̱nꞌ, te̱ kuní tu̱ i̱ ña̱ sa̱xinú ña̱ꞌaꞌ si̱a̱niꞌ xikaꞌ u̱nꞌ: Sa̱kuuꞌ tiaa̱ siꞌe̱ ndo̱ꞌ ndii, kuní a̱ ña̱ tiaꞌndi̱a̱ i̱i̱nꞌ xíniꞌ limaꞌ ra̱.
11 Kuní a̱ ka̱ꞌndi̱a̱ ndo̱ꞌ i̱i̱nꞌ xíniꞌ limaꞌ sa̱kuuꞌ tiaa̱ siꞌe̱ ndo̱ꞌ, te̱ ku̱ndu̱u̱ a̱ ña̱ niaꞌá ña̱ ni̱ ta̱xi̱ i̱ kuento i̱ nda̱ꞌaꞌ ndo̱ꞌ.
12 Kii̱ꞌ xinu̱ uni̱a̱ kivi̱ꞌ ña̱ tuví te̱ kuañuꞌu̱ siꞌe̱ ndo̱ꞌ ndii, kuní a̱ ka̱ꞌndi̱a̱ ndo̱ꞌ i̱i̱n xíniꞌ limaꞌ ra̱, te̱ i̱i̱n sa̱kanꞌ sa̱a̱ ndo̱ꞌ nde̱e̱ ndiꞌiꞌ ni̱ kivi̱ꞌ. Te̱ ña̱ ja̱a̱nꞌ ndii, süu̱ꞌ xiinꞌ tiaa̱ siꞌe̱ mi̱iꞌ ku̱i̱ti̱ꞌ ndo̱ꞌ kuní a̱ sa̱a̱ ndo̱ꞌ a̱, süu̱ꞌ ja̱a̱nꞌ ndii, sa̱kanꞌ tu̱ tiaa̱ siꞌe̱ ne̱ xikaꞌ nuuꞌ nuu̱ꞌ ndo̱ꞌ, ne̱ ni̱ ka̱ku̱ vi̱ꞌe̱ ndo̱ꞌ, xiinꞌ tiaa̱ siꞌe̱ ne̱ tukuꞌ, ne̱ ni̱ sa̱ta̱ꞌ ndo̱ꞌ xikaꞌ nuuꞌ nuu̱ꞌ ndo̱ꞌ.
13 Sa̱kuuꞌ ndo̱ꞌ kuní a̱ tiaꞌndi̱a̱ i̱i̱nꞌ xíniꞌ limaꞌ, sa̱kanꞌ sa̱a̱ ndo̱ꞌ te̱ ko̱o̱ tuni̱ ja̱a̱nꞌ i̱i̱nꞌ ndo̱ꞌ, ña̱ niaꞌá ña̱ ni̱ ta̱xi̱ i̱ kuento i̱ nda̱ꞌaꞌ ndo̱ꞌ nde̱e̱ ndiꞌiꞌ ni̱ kivi̱ꞌ.
14 Ndisu̱ te̱ yivi̱ꞌ, te̱ nï̱ tiaꞌndi̱a̱ i̱i̱nꞌ xíniꞌ limaꞌ ndii, xta̱ꞌniꞌ xa̱tyiꞌ ña̱ꞌaꞌ ndo̱ꞌ te̱i̱n ndo̱ꞌ xaꞌa̱ꞌ a̱ ña̱ ni̱ xaꞌnu̱ ra̱ kuento ña̱ ni̱ ta̱xi̱ i̱ nda̱ꞌaꞌ ndo̱ꞌ ―ni̱ katyi̱ Ndiosí, xiinꞌ Abraham.
15 Te̱ ni̱ kaꞌa̱n tu̱ Ndiosí xiinꞌ Abraham ndii:
―Ñaꞌ siꞌi u̱nꞌ ndii, kü̱na̱niꞌ ka̱ aꞌ Sarai, süu̱ꞌ ja̱a̱nꞌ ndii, Sara ku̱i̱ti̱ꞌ ku̱na̱niꞌ aꞌ.
16 Te̱ sa̱ñuꞌuꞌ ña̱ꞌaꞌ i̱, te̱ ko̱o̱ tu̱ i̱i̱n siꞌe̱ ñaꞌ ja̱a̱nꞌ xiinꞌ u̱nꞌ. U̱u̱n ndo̱ꞌ sa̱ñuꞌuꞌ xna̱ꞌa̱ ña̱ꞌaꞌ i̱, te̱ ku̱ndu̱u̱ aꞌ si̱ꞌiꞌ kuaꞌa̱ꞌ xa̱va̱ꞌa̱ ne̱ yivi̱ꞌ, ne̱ ku̱ndi̱e̱e̱ kiꞌinꞌ ñu̱u̱ kaꞌnuꞌ i̱i̱n yivi̱ꞌ, te̱ te̱i̱n siꞌe̱ aꞌ ja̱a̱nꞌ ki̱e̱e̱ te̱ ku̱ndu̱u̱ rey nuu̱ꞌ ne̱ yivi̱ꞌ i̱i̱n yivi̱ꞌ ―ni̱ katyi̱ a̱.
17 Sa̱kanꞌ te̱ ni̱ na̱ka̱nduꞌu̱ꞌ ndieeꞌ Abraham nde̱e̱ nuu̱ꞌ ñu̱ꞌuꞌ, te̱ ni̱ xaku̱ ra̱ kaꞌán ra̱ xiinꞌ nimá ra̱ ndii: «¿Sa̱a̱ ku̱vi̱ ko̱o̱ siꞌe̱ i̱i̱n te̱ yivi̱ꞌ, te̱ xa̱ kumiꞌ ciento kuiya̱?» «¿Te̱ sa̱a̱ tu̱ ku̱vi̱ ko̱o̱ siꞌe̱ Sara, ñaꞌ xa̱ kumiꞌ ku̱miꞌ xi̱ko̱ uxi̱ kuiya̱?», ni̱ katyi̱ ra̱.
18 Te̱ ni̱ kaꞌa̱n Abraham xiinꞌ Ndiosí ndii:
―Xa̱ va̱ꞌa̱ yaꞌa̱ kuni i̱ naaꞌ sa̱ñuꞌuꞌ u̱nꞌ tee̱ꞌ Ismael ku̱i̱ti̱ꞌ xiinꞌ ña̱ kaꞌán u̱nꞌ ja̱a̱nꞌ ―ni̱ katyi̱ ra̱.
19 Te̱ ni̱ kaꞌa̱n Ndiosí xiinꞌ ra̱ ndii:
―Ña̱ kuni kaꞌa̱n i̱ xiinꞌ u̱nꞌ ndii, Sara, ñaꞌ siꞌi u̱nꞌ, nduuꞌ ñaꞌ ko̱o̱ i̱i̱n tiaa̱ siꞌe̱ xiinꞌ u̱nꞌ, te̱ tyi̱nduꞌu̱ꞌ u̱nꞌ kivi̱ꞌ ra̱ Isaac. Te̱ xiinꞌ te̱ ja̱a̱nꞌ sa̱xinú i̱ kuento i̱ ña̱ ni̱ ta̱xi̱ i̱ nda̱ꞌaꞌ u̱nꞌ ja̱a̱nꞌ, te̱ sa̱xinú tu̱ e̱ꞌ e̱ xiinꞌ si̱a̱niꞌ xikaꞌ ra̱ nde̱e̱ ndiꞌiꞌ ni̱ kivi̱ꞌ.
20 Te̱ sa̱kanꞌ tu̱ Ismael ndii, xa̱ ni̱ xi̱ni̱ so̱ꞌo̱ i̱ ña̱ ni̱ xika̱n u̱nꞌ nuu̱ꞌ i̱ xaꞌa̱ꞌ ra̱, sa̱kanꞌ na sa̱ñuꞌuꞌ ña̱ꞌaꞌ i̱, te̱ ta̱xi̱ i̱ ko̱o̱ kuaꞌa̱ꞌ siꞌe̱ ra̱, te̱ ko̱o̱ kuaꞌa̱ꞌ xa̱va̱ꞌa̱ tu̱ si̱a̱niꞌ xikaꞌ ra̱. Te̱ ko̱o̱ uxi̱ uvi̱ taꞌan tiaa̱ siꞌe̱ ra̱, te̱ sa̱kuuꞌ te̱ ja̱a̱nꞌ ku̱ndu̱u̱ te̱ ka̱ꞌndi̱a̱ tyuunꞌ kuuꞌ nu̱uꞌ, te̱ ku̱ndu̱u̱ Ismael ja̱a̱nꞌ xii̱ꞌ ya̱taꞌ kuaꞌa̱ꞌ xa̱va̱ꞌa̱ ne̱ yivi̱ꞌ, ne̱ ku̱ndi̱e̱e̱ kiꞌinꞌ ñu̱u̱ kaꞌnuꞌ i̱i̱n yivi̱ꞌ.
21 Ndisu̱ kuento ña̱ ni̱ ta̱xi̱ i̱ nda̱ꞌaꞌ u̱nꞌ ja̱a̱nꞌ ndii, sa̱xinú e̱ꞌ e̱ xiinꞌ siꞌe̱ u̱nꞌ Isaac, te̱ ko̱o̱ xiinꞌ Sara, tu̱ku̱ kuiya̱, kivi̱ꞌ naa vi̱ti̱n ―ni̱ katyi̱ a̱.
22 Kii̱ꞌ ndi̱ꞌi̱ ni̱ kaꞌa̱n Ndiosí ña̱ ja̱a̱nꞌ xiinꞌ Abraham te̱ kuaꞌa̱n a̱.
23 Xa̱ kivi̱ꞌ ja̱a̱nꞌ ni̱ ti̱i̱n Abraham siꞌe̱ ra̱ Ismael, te̱ sa̱kanꞌ tu̱ sa̱kuuꞌ te̱ xikaꞌ nuuꞌ nuu̱ꞌ ra̱, te̱ ni̱ tuvi̱ vi̱ꞌe̱ ra̱, xiinꞌ sa̱kuuꞌ te̱ ni̱ sa̱ta̱ꞌ ra̱ xiinꞌ xu̱ꞌunꞌ ra̱, xiinꞌ sa̱kuuꞌ te̱ ndieeꞌ vi̱ꞌe̱ ra̱ xatyuunꞌ nuu̱ꞌ ra̱, te̱ ni̱ xa̱ꞌndi̱a̱ ra̱ i̱i̱n xíniꞌ limaꞌ sa̱kuuꞌ te̱ ja̱a̱nꞌ, sa̱a̱ niiꞌ ni̱ kaꞌa̱n tyuunꞌ Ndiosí xiinꞌ ra̱.
24 Ku̱miꞌ xi̱ko̱ xaꞌu̱n ku̱miꞌ kuiya̱ ni̱ ku̱miꞌ Abraham kii̱ꞌ ni̱ xa̱ꞌndi̱a̱ ra̱ i̱i̱nꞌ xíniꞌ limaꞌ ra̱.
25 Te̱ Ismael siꞌe̱ ra̱ ndii, uxi̱ uni̱ kuiya̱ ni̱ ku̱miꞌ te̱ ja̱a̱nꞌ kii̱ꞌ sa̱kanꞌ, te̱ ni̱ tiaꞌndi̱a̱ i̱i̱nꞌ xíniꞌ limaꞌ ra̱.
26 Abraham xiinꞌ Ismael siꞌe̱ ra̱ ndii, xa̱ kivi̱ꞌ ña̱ ni̱ kaꞌa̱n tyuunꞌ Ndiosí xiinꞌ ra̱ ja̱a̱nꞌ ni̱ tiaꞌndi̱a̱ i̱i̱nꞌ xíniꞌ limaꞌ uvi̱ sa̱aꞌ ra̱.
27 Te̱ xa̱ kivi̱ꞌ ja̱a̱nꞌ tu̱ ni̱ ti̱i̱n ra̱ sa̱kuuꞌ te̱ ni̱ tuvi̱ vi̱ꞌe̱ ra̱, xiinꞌ sa̱kuuꞌ te̱ xatyuunꞌ nuu̱ꞌ ra̱ ndieeꞌ vi̱ꞌe̱ ra̱, xiinꞌ sa̱kuuꞌ te̱ ni̱ sa̱ta̱ꞌ ra̱ nuu̱ꞌ te̱ tu̱ku̱ xiinꞌ xu̱ꞌunꞌ ra̱, te̱ ni̱ xa̱ꞌndi̱a̱ tu̱ ra̱ i̱i̱nꞌ xíniꞌ limaꞌ te̱ ja̱a̱nꞌ xiinꞌ ra̱.