So̱ꞌo̱ ni̱ xa̱a̱ a̱ kii̱ꞌ ni̱ tuvi̱ Ismael, siꞌe̱ Agar
16
Sarai, ñaꞌ siꞌi Abram ndii, köo̱ꞌ siꞌe̱ aꞌ xiinꞌ ra̱, ndisu̱ ni̱ yoo̱ i̱i̱n ñaꞌ ni̱ ki̱e̱e̱ ñu̱ꞌuꞌ Egipto xikaꞌ nuuꞌ nuu̱ꞌ aꞌ, ñaꞌ naniꞌ Agar.
2 Sa̱kanꞌ na ni̱ kaꞌa̱n aꞌ xiinꞌ Abram ndii:
―Xa̱ xiní u̱nꞌ ndii, ñaꞌ kü̱vi̱ ko̱o̱ siꞌe̱ nduuꞌ i̱ ni̱ xa̱a̱ Yahvé, sa̱kanꞌ na kaꞌán ndaꞌvi i̱ xiinꞌ u̱nꞌ ña̱ ka̱nduꞌu̱ꞌ u̱nꞌ xiinꞌ Agar, ñaꞌ xikaꞌ nuuꞌ nuu̱ꞌ i̱, te̱ ko̱o̱ siꞌe̱ u̱nꞌ xiinꞌ aꞌ, te̱ siꞌe̱ u̱nꞌ ñaꞌ ko̱o̱ xiinꞌ ñaꞌ ja̱a̱nꞌ ku̱ndu̱u̱ siꞌe̱ i̱ ―ni̱ katyi̱ a̱.
Te̱ ni̱ sa̱xinú Abram ña̱ ni̱ xika̱n Sarai nuu̱ꞌ ra̱. 
3 Sa̱kanꞌ te̱ ni̱ ti̱i̱n aꞌ Agar, ñaꞌ ni̱ ki̱e̱e̱ ñu̱ꞌuꞌ Egipto, ñaꞌ xikaꞌ nuuꞌ nuu̱ꞌ aꞌ ja̱a̱nꞌ, te̱ ni̱ sa̱na̱kuaꞌa ña̱ꞌaꞌ aꞌ nda̱ꞌaꞌ Abram ku̱ndu̱u̱ ñaꞌ siꞌi ra̱. Te̱ sa̱kuuꞌ ña̱ ja̱a̱nꞌ ni̱ xkaꞌndi̱a̱ kii̱ꞌ xa̱ kuaꞌa̱n uxi̱ kuiya̱ ña̱ nduꞌu̱ꞌ Abram nuu̱ꞌ ñu̱ꞌuꞌ Canaán.
4 Sa̱kanꞌ te̱ ni̱ kixi̱n ra̱ xiinꞌ aꞌ, te̱ ni̱ na̱ku̱i̱so̱ aꞌ, ndisu̱ kii̱ꞌ ni̱ xi̱ni̱ aꞌ ña̱ xa̱ ni̱ na̱ku̱i̱so̱ aꞌ ndii, ni̱ xa̱ꞌaꞌ aꞌ kuuꞌ ityi̱ i̱ni̱ aꞌ xini aꞌ Sarai, ñaꞌ xiinꞌ ña̱ꞌa̱ ña̱ꞌaꞌ.
5 Sa̱kanꞌ te̱ ni̱ kaꞌa̱n Sarai xiinꞌ Abram ndii:
―Yoꞌó kumiꞌ ku̱a̱tyi̱, sa̱kanꞌ ña̱ mi̱iꞌ i̱ yuꞌu̱ ni̱ sa̱na̱kuaꞌa ñaꞌ xikaꞌ nuuꞌ nuu̱ꞌ i̱ kaa̱ꞌ nda̱ꞌaꞌ u̱nꞌ, te̱ kusu̱n u̱nꞌ xiinꞌ aꞌ, te̱ vi̱ti̱n xaꞌa̱ꞌ a̱ ña̱ ndisoꞌ aꞌ ndii, kuuꞌ ityi̱ i̱ni̱ aꞌ xini aꞌ yuꞌu̱. Mi̱iꞌ Yahvé Ndiosí na na̱tava̱ꞌ kuenta yo̱o̱ kumiꞌ ku̱a̱tyi̱, naaꞌ yoꞌó, uun naaꞌ yuꞌu̱ ―ni̱ katyi̱ aꞌ.
6 Te̱ ni̱ kaꞌa̱n Abram xiinꞌ aꞌ ndii:
―Ñaꞌ xikaꞌ nuuꞌ nuu̱ꞌ u̱nꞌ ndii, xa̱ nda̱ꞌaꞌ mi̱iꞌ u̱nꞌ yoo aꞌ, ku̱vi̱ sa̱a̱ u̱nꞌ xiinꞌ aꞌ sa̱a̱ ka̱ kuní mi̱iꞌ u̱nꞌ ―ni̱ katyi̱ ra̱.
Sa̱kanꞌ te̱ ni̱ xa̱ꞌaꞌ Sarai mi̱iꞌ xa̱va̱ꞌa̱ kuuꞌ aꞌ xiinꞌ ñaꞌ ja̱a̱nꞌ, xikaꞌ aꞌ nde̱e̱ ni̱ xi̱nu̱ ñaꞌ ja̱a̱nꞌ nuu̱ꞌ aꞌ soꞌo̱ꞌ ndiꞌiꞌ.
7 Te̱ ni̱ xaꞌa̱n ku̱ni̱ i̱i̱n ángele Yahvé Ndiosí nduꞌu̱ꞌ Agar ja̱a̱nꞌ xi̱i̱nꞌ i̱i̱n ti̱ko̱ꞌyoꞌ miiꞌ kieeꞌ ti̱kui, ya̱ti̱n yu̱ꞌuꞌ i̱tyiꞌ. Te̱ ti̱ko̱ꞌyoꞌ ja̱a̱nꞌ ndii, iinꞌ a̱ yu̱ꞌuꞌ i̱tyiꞌ ña̱ xkaꞌndíá a̱ miiꞌ i̱tyi kaaꞌ ña̱ naniꞌ Shur.
8 Te̱ ni̱ nda̱tuꞌu̱nꞌ ña̱ꞌaꞌ ángele ja̱a̱nꞌ ndii:
―Agar, ñaꞌ xikaꞌ nuuꞌ so̱ꞌo̱ nuu̱ꞌ Sarai, ¿miiꞌ ku̱a̱xi̱ u̱nꞌ, te̱ miiꞌ kuaꞌa̱n u̱nꞌ? ―ni̱ katyi̱ a̱ xiinꞌ aꞌ.
Te̱ ni̱ na̱ku̱i̱i̱n aꞌ ndii:
―Nuu̱ꞌ Sarai, ñaꞌ xiinꞌ ña̱ꞌa̱ yuꞌu̱, xinuꞌ i̱ ―ni̱ katyi̱ aꞌ xiinꞌ ángele ja̱a̱nꞌ.
9 Te̱ ni̱ kaꞌa̱n ka̱ ángele Yahvé Ndiosí xiinꞌ aꞌ ndii:
―Na̱ndi̱koꞌ u̱nꞌ nuu̱ꞌ ñaꞌ xiinꞌ ña̱ꞌa̱ yoꞌó, te̱ sa̱xinú u̱nꞌ sa̱kuuꞌ ña̱ kaꞌán tyuunꞌ aꞌ xiinꞌ u̱nꞌ ―ni̱ katyi̱ ángele.
10 Te̱ ni̱ kaꞌa̱n ka̱ ángele Yahvé Ndiosí xiinꞌ aꞌ ndii:
―Nda̱sa̱kuaꞌa̱ꞌ xa̱va̱ꞌa̱ i̱ si̱a̱niꞌ xikaꞌ u̱nꞌ te̱ nde̱e̱ i̱i̱n ne̱ yivi̱ꞌ kü̱vi̱ ka̱ꞌvi̱ ña̱ꞌaꞌ xaꞌa̱ꞌ a̱ ña̱ kuaꞌa̱ꞌ va̱ ni̱a̱ ―ni̱ katyi̱ a̱.
11 Te̱ ni̱ kaꞌa̱n ka̱ ángele ja̱a̱nꞌ xiinꞌ aꞌ ndii:
―Ko̱to̱ u̱nꞌ, vi̱ti̱n ndii xa̱ ndisoꞌ u̱nꞌ, te̱ ko̱o̱ i̱i̱n tiaa̱ siꞌe̱ u̱nꞌ, te̱ tyi̱nduꞌu̱ꞌ u̱nꞌ kivi̱ꞌ ra̱ Ismael, sa̱kanꞌ ña̱ ni̱ xi̱ni̱ so̱ꞌo̱ Yahvé Ndiosí ña̱ ndoꞌoꞌ u̱nꞌ.
12 Te̱ ja̱a̱nꞌ ndii, te̱ kuiꞌe̱ va̱ ku̱ndu̱u̱ ra̱ nde̱e̱ naa i̱i̱n mburru i̱kuꞌ, ku̱ntaꞌanꞌ ra̱ xiinꞌ sa̱kuuꞌ ne̱ yivi̱ꞌ, te̱ sa̱kuuꞌ ne̱ yivi̱ꞌ ku̱ntaꞌanꞌ xiinꞌ ra̱. Te̱ ku̱nduꞌu̱ꞌ ra̱ ya̱ti̱n nuu̱ꞌ ñu̱ꞌuꞌ miiꞌ ndieeꞌ ne̱ i̱i̱n kuuꞌ xiinꞌ ra̱, tee̱ꞌ ndee ku̱nda̱siꞌ ña̱ꞌaꞌ ni̱a̱ ―ni̱ katyi̱ ángele xiinꞌ aꞌ.
13 Te̱ nde̱e̱ kii̱ꞌ sa̱kanꞌ ndii, ni̱ tyi̱nduꞌu̱ꞌ Agar i̱nga̱ kivi̱ꞌ Yahvé Ndiosí, ña̱ ni̱ kaꞌa̱n xiinꞌ aꞌ kaꞌán aꞌ ndii: «Yoꞌó nduuꞌ Ndiosí ña̱ xitoꞌ yuꞌu̱», ni̱ katyi̱ aꞌ. Te̱ ni̱ kaꞌa̱n tu̱ aꞌ ndii: «Xaꞌa̱ꞌ a̱ ka̱ ni̱ xi̱ni̱ Ndiosí ña̱ ku̱vi̱ xitoꞌ sa̱kuuꞌ ña̱ yoo yuꞌu̱», ni̱ katyi̱ aꞌ.
14 Sa̱kanꞌ na kuiiꞌ pozo ña̱ iinꞌ i̱kanꞌ ndii: «Pozo kuenta ña̱ tiaku, ña̱ xitoꞌ yuꞌu̱», naniꞌ a̱. Te̱ pozo ja̱a̱nꞌ ndii, iinꞌ ka̱ a̱ nde̱e̱ kivi̱ꞌ vi̱ti̱n te̱i̱n ñu̱u̱ Cades xiinꞌ ñu̱u̱ Bered.
