So̱ꞌo̱ ni̱ xa̱a̱ a̱ kii̱ꞌ ni̱ ta̱xi̱ Ndiosí kuento a̱ nuu̱ꞌ Abram ña̱ ko̱o̱ i̱i̱n siꞌe̱ ra̱
15
Kii̱ꞌ ni̱ xkaꞌndi̱a̱ sa̱kuuꞌ ña̱ ja̱a̱nꞌ ndii, ni̱ sa̱tuví Yahvé Ndiosí nuu̱ꞌ Abram, ña̱ ni̱ xi̱ni̱ ña̱ꞌaꞌ ra̱, te̱ ni̱ kaꞌa̱n a̱ xiinꞌ ra̱ ndii:
―Kuäa̱n yiꞌvi u̱nꞌ Abram, sa̱kanꞌ ña̱ yuꞌu̱ xitoꞌ yoꞌó, te̱ tyie̱ va̱ ña̱ sa̱niꞌíꞌ i̱ yoꞌó ―ni̱ katyi̱ a̱.
2 Te̱ ni̱ na̱ku̱i̱i̱n Abram kaꞌán ra̱ ndii:
―Tákuiꞌe Yahvé, kuäsa̱ꞌ tyi̱ndi̱e̱eꞌ a̱ tee̱ꞌ ndee ta̱xi̱ u̱nꞌ kuaꞌa̱ꞌ ña̱ vikaꞌ nda̱ꞌaꞌ i̱ naaꞌ köo̱ꞌ siꞌe̱ i̱. Sa̱kanꞌ na kuiiꞌ xaꞌa̱ꞌ a̱ ña̱ köo̱ꞌ siꞌe̱ i̱ taxiꞌ u̱nꞌ ndii, Eliezer, te̱ xikaꞌ nuuꞌ nuu̱ꞌ i̱, te̱ ni̱ ki̱e̱e̱ ñu̱u̱ Damasco, ku̱ndu̱u̱ te̱ xiinꞌ ña̱ꞌa̱ sa̱kuuꞌ ña̱ ta̱xi̱ u̱nꞌ nda̱ꞌaꞌ i̱ ja̱a̱nꞌ.
3 Köo̱ꞌ siꞌe̱ mi̱iꞌ i̱ taxiꞌ u̱nꞌ nda̱ꞌaꞌ i̱, sa̱kanꞌ na kuiiꞌ nda̱ꞌaꞌ i̱i̱n te̱ xikaꞌ nuuꞌ nuu̱ꞌ i̱, te̱ ni̱ tuvi̱ vi̱ꞌe̱ i̱ ku̱i̱ti̱ꞌ ndoo̱ sa̱kuuꞌ ña̱ kumiꞌ i̱ ―ni̱ katyi̱ ra̱.
4 Sa̱kanꞌ te̱ ni̱ kaꞌa̱n Yahvé Ndiosí xiinꞌ ra̱ ndii:
―Üꞌu̱nꞌ, kü̱ndu̱u̱ te̱ xikaꞌ nuuꞌ nuu̱ꞌ u̱nꞌ, te̱ xiinꞌ ña̱ꞌa̱ sa̱kuuꞌ ña̱ kumiꞌ u̱nꞌ, süu̱ꞌ ja̱a̱nꞌ ndii, i̱i̱n siꞌe̱ mi̱iꞌ u̱nꞌ ku̱ndu̱u̱ te̱ xiinꞌ ña̱ꞌa̱ ña̱ ja̱a̱nꞌ ―ni̱ katyi̱ a̱.
5 Sa̱kanꞌ te̱ ni̱ xta̱ꞌniꞌ ña̱ꞌaꞌ Ndiosí ki̱ꞌe̱, te̱ ni̱ kaꞌa̱n a̱ xiinꞌ ra̱ ndii:
―Ndo̱ni̱ꞌi̱ nuu̱ꞌ u̱nꞌ te̱ ko̱to̱ u̱nꞌ ndi̱viꞌ, te̱ ka̱ꞌvi̱ u̱nꞌ tiuu̱nꞌ naaꞌ ku̱vi̱ ka̱ꞌvi̱ u̱nꞌ riꞌ. Sa̱kanꞌ vi̱ꞌ kuaꞌa̱ꞌ ku̱ndu̱u̱ ne̱ si̱a̱niꞌ xikaꞌ u̱nꞌ ―ni̱ katyi̱ a̱.
6 Te̱ ni̱ ka̱ndi̱xaꞌ ra̱ ña̱ ni̱ kaꞌa̱n Yahvé Ndiosí xiinꞌ ra̱, te̱ ni̱ kaꞌa̱n a̱ ña̱ te̱ nda̱ku nimá nduuꞌ ra̱ nuu̱ꞌ a̱ xaꞌa̱ꞌ a̱ ña̱ i̱ni̱ ra̱ xini ña̱ꞌaꞌ ra̱.
7 Te̱ ni̱ kaꞌa̱n tu̱ Ndiosí xiinꞌ ra̱ ndii:
―Yuꞌu̱ nduuꞌ Yahvé, ña̱ ni̱ xta̱ꞌniꞌ yoꞌó nuu̱ꞌ ñu̱ꞌuꞌ Ur, ñu̱ꞌuꞌ te̱ vi̱ꞌe̱ Caldeo, te̱ ta̱xi̱ i̱ ñu̱ꞌuꞌ yoꞌoꞌ nda̱ꞌaꞌ u̱nꞌ ku̱ndu̱u̱ ña̱ꞌa̱ u̱nꞌ ―ni̱ katyi̱ a̱.
8 Ndisu̱ ni̱ na̱ku̱i̱i̱n Abram nuu̱ꞌ a̱ ndii:
―Tákuiꞌe Yahvé, ¿sa̱a̱ ku̱vi̱ ku̱nda̱ni̱ i̱ ña̱ na̱ti̱i̱n xna̱ꞌa̱ i̱ ñu̱ꞌuꞌ kaa̱ꞌ ku̱ndu̱u̱ ña̱ꞌa̱ i̱ ―ni̱ katyi̱ ra̱.
9 Te̱ ni̱ kaꞌa̱n ka̱ Ndiosí xiinꞌ ra̱ ndii:
―Kuaꞌan te̱ na̱ka̱ u̱nꞌ i̱i̱n vaca tiakiꞌ, tiꞌ uni̱ kuiya̱, xiinꞌ i̱i̱n ti̱xuꞌu̱ꞌ tiakiꞌ, tiꞌ uni̱ kuiya̱, xiinꞌ i̱i̱n mbe̱e̱ tiakiꞌ, tiꞌ uni̱ kuiya̱, xiinꞌ i̱i̱n ndi̱kukú, xiinꞌ i̱i̱n paloma siee ―ni̱ katyi̱ a̱.
10 Sa̱kanꞌ te̱ ni̱ ki̱xi̱n ndi̱a̱ka̱ ra̱ sa̱kuuꞌ tiꞌ ja̱a̱nꞌ nuu̱ꞌ Ndiosí, te̱ ni̱ xa̱ꞌndi̱a̱ ma̱ꞌinꞌ ra̱ sa̱kuuꞌ riꞌ, te̱ ni̱ ta̱ndi̱e̱e̱ ra̱ ta̱taꞌviꞌ ku̱ñu̱ riꞌ ja̱a̱nꞌ xtoꞌniꞌ nuu̱ꞌ taꞌan a̱, ndisu̱ paloma xiinꞌ ndi̱kukú ndii, nï̱ xa̱ꞌndi̱a̱ ma̱ꞌinꞌ ra̱ tiꞌ ja̱a̱nꞌ.
11 Te̱ ni̱ nu̱u̱ ti̱ko̱xií tuviꞌ tiꞌe̱ꞌ riꞌ ku̱ñu̱ ki̱tiꞌ, tiꞌ ni̱ xiꞌi̱ ja̱a̱nꞌ, ndisu̱ ni̱ ta̱xiꞌ Abram ti̱ko̱xií ja̱a̱nꞌ.
12 Kii̱ꞌ xa̱ ketá ñu̱ꞌu̱ kuaꞌa̱n a̱ ndii, ni̱ kixi̱n xiꞌí xa̱tyiꞌ Abram, te̱ ni̱ yi̱ꞌvi xa̱va̱ꞌa̱ ra̱ kii̱ꞌ ni̱ ku̱u̱ i̱i̱n yaví ndiaaꞌ xa̱tyiꞌ miiꞌ kanduꞌu̱ꞌ ra̱ kixín ra̱ ja̱a̱nꞌ.
13 Sa̱kanꞌ te̱ ni̱ kaꞌa̱n Yahvé Ndiosí xiinꞌ ra̱ ndii:
―Kuní a̱ ña̱ ku̱nda̱ni̱ u̱nꞌ ña̱ ne̱ si̱a̱niꞌ xikaꞌ u̱nꞌ ndii, kuꞌu̱n ku̱ndi̱e̱e̱ ni̱a̱ nuu̱ꞌ ñu̱ꞌuꞌ ne̱ tukuꞌ, te̱ i̱kanꞌ ku̱ndu̱u̱ ni̱a̱ ne̱ ka̱ka̱ nu̱u̱ so̱ꞌo̱ nuu̱ꞌ ne̱ ñu̱u̱ ja̱a̱nꞌ, te̱ mi̱iꞌ ku̱u̱ ne̱ ja̱a̱nꞌ xiinꞌ ni̱a̱ niiꞌ ku̱miꞌ ciento kuiya̱.
14 Ndisu̱ mi̱iꞌ yuꞌu̱ sa̱ndoꞌoꞌ ne̱ mi̱iꞌ ku̱u̱ xiinꞌ ne̱ ja̱a̱nꞌ, te̱ soꞌo̱ꞌ ndiꞌiꞌ te̱ ki̱e̱e̱ ni̱a̱ i̱kanꞌ xiinꞌ kuaꞌa̱ꞌ ña̱ vikaꞌ.
15 Te̱ yoꞌó ndii, ku̱vi̱ mani̱ꞌ u̱nꞌ, te̱ ndu̱u̱ i̱i̱n u̱nꞌ xiinꞌ te̱ xii̱ꞌ ya̱taꞌ u̱nꞌ kii̱ꞌ xa̱ te̱ xi̱xa̱ va̱ nduuꞌ u̱nꞌ, sa̱kanꞌ te̱ ndiee̱ u̱nꞌ.
16 Te̱ kii̱ꞌ xkaꞌndi̱a̱ ña̱ ku̱miꞌ ciento kuiya̱ ja̱a̱nꞌ ndii, na̱ndi̱koꞌ ne̱ si̱a̱niꞌ xikaꞌ u̱nꞌ ja̱a̱nꞌ yoꞌoꞌ, sa̱kanꞌ ña̱ vi̱ti̱n ndii, kuní ka̱ xaa̱ kivi̱ꞌ ña̱ xataꞌa̱n sa̱ndo̱ñuꞌuꞌ i̱ ne̱ amorreo ja̱a̱nꞌ xaꞌa̱ꞌ ku̱a̱tyi̱ ña̱ xaaꞌ ni̱a̱ ―ni̱ katyi̱ a̱.
17 Te̱ kii̱ꞌ ni̱ keta̱ ñu̱ꞌu̱, te̱ xa̱ ñu̱u nduuꞌ a̱ ndii, ni̱ xi̱ni̱ Abram i̱i̱n ña̱ kaaꞌ nde̱e̱ naa miiꞌ yatanꞌ xita̱ꞌ va̱ꞌa̱, te̱ kieeꞌ ñuꞌma̱ ti̱xi̱n a̱, te̱ ni̱ xi̱ni̱ tu̱ ra̱ i̱i̱n tyoon ña̱ ndatin, te̱ kuaꞌa̱n ku̱a̱xi̱ a̱ xikaꞌ a̱ te̱i̱n ki̱tiꞌ, tiꞌ ni̱ xa̱ꞌndi̱a̱ ma̱ꞌinꞌ ra̱ ndieeꞌ i̱kanꞌ.
18 Sa̱kanꞌ te̱ kivi̱ꞌ ja̱a̱nꞌ ni̱ ta̱xi̱ Yahvé Ndiosí kuento a̱ nuu̱ꞌ Abram, kaꞌán a̱ xiinꞌ ra̱ ndii:
―Nda̱ꞌaꞌ si̱a̱niꞌ xikaꞌ u̱nꞌ ta̱xi̱ i̱ ñu̱ꞌuꞌ yoꞌoꞌ, xa̱ꞌaꞌ a̱ nde̱e̱ i̱ti̱a̱ ña̱ kuaꞌa̱n xeꞌinꞌ xiinꞌ ñu̱ꞌuꞌ Egipto, te̱ kuꞌu̱n ndi̱koꞌ a̱ nde̱e̱ i̱ti̱a̱ tyie̱, ña̱ naniꞌ Éufrates.
19 Ñu̱ꞌuꞌ miiꞌ ndieeꞌ ne̱ vi̱ꞌe̱ ceneo, xiinꞌ ne̱ vi̱ꞌe̱ cenezeo, xiinꞌ ne̱ vi̱ꞌe̱ cadmoneo,
20 xiinꞌ ne̱ vi̱ꞌe̱ heteo, xiinꞌ ne̱ vi̱ꞌe̱ ferezeo, xiinꞌ ne̱ vi̱ꞌe̱ refaíta,
21 xiinꞌ ne̱ vi̱ꞌe̱ amorreo, xiinꞌ ne̱ vi̱ꞌe̱ cananeo, xiinꞌ ne̱ vi̱ꞌe̱ gergeseo, xiinꞌ ne̱ vi̱ꞌe̱ jebuseo ndii, ka̱niiꞌ ja̱a̱nꞌ ta̱xi̱ i̱ nda̱ꞌaꞌ si̱a̱niꞌ xikaꞌ u̱nꞌ ―ni̱ katyi̱ Yahvé Ndiosí xiinꞌ Abram.