So̱ꞌo̱ ni̱ xa̱a̱ a̱ kii̱ꞌ ni̱ ta̱xi̱ Ndiosí kuento a̱ nuu̱ꞌ Sara ña̱ ko̱o̱ i̱i̱n tiaa̱ siꞌe̱ aꞌ
18
Ni̱ yaꞌa̱ te̱ ni̱ tuvi̱ Yahvé Ndiosí nuu̱ꞌ Abraham ya̱ti̱n xiki̱ꞌ miiꞌ xikaꞌ i̱i̱n te̱ naniꞌ Mamré. Untaꞌ ndii, nduꞌu̱ꞌ Abraham yiꞌeꞌ vi̱ꞌe̱ toto̱ miiꞌ nduꞌu̱ꞌ ra̱, sa̱va̱ ni̱ i̱i̱n keꞌinꞌ.
2 Te̱ ni̱ ndo̱ni̱ꞌi̱ ra̱ nuu̱ꞌ ra̱, te̱ ni̱ xi̱ni̱ ra̱ itaꞌ uni̱ taꞌan te̱ yivi̱ꞌ ya̱ti̱n miiꞌ iinꞌ vi̱ꞌe̱ toto̱ nduꞌu̱ꞌ ra̱ ja̱a̱nꞌ. Te̱ kii̱ꞌ ni̱ xi̱ni̱ ña̱ꞌaꞌ ra̱ ndii, numi̱ꞌ va̱ te̱ ni̱ nda̱va̱ ra̱ ni̱ xaꞌa̱n na̱ti̱i̱n ña̱ꞌaꞌ ra̱, te̱ ni̱ na̱ka̱nduꞌu̱ꞌ ndi̱e̱e̱ ra̱ nde̱e̱ nuu̱ꞌ ñu̱ꞌuꞌ nuu̱ꞌ te̱ ja̱a̱nꞌ, ña̱ natiinꞌ va̱ꞌa̱ ña̱ꞌaꞌ ra̱,
3 kaꞌán ra̱ ndii:
―Tákuiꞌe, sa̱a̱ u̱nꞌ ña̱ va̱ꞌa̱, te̱ ndoo̱ u̱nꞌ vi̱ꞌe̱ i̱ i̱i̱n xaꞌaꞌ, naaꞌ tuu u̱nꞌ ña̱ i̱i̱n te̱ yivi̱ꞌ va̱ꞌa̱ nduuꞌ i̱.
4 Na̱ndiee̱ꞌ ndo̱ꞌ xaꞌa̱ꞌ i̱tunꞌ ka̱tiꞌ yoꞌoꞌ, na kaꞌa̱n tyuunꞌ i̱ te̱ ki̱xi̱n ndi̱a̱ka̱ ni̱a̱ ti̱kui te̱ na̱ti̱a̱ ndo̱ꞌ xaꞌa̱ꞌ ndo̱ꞌ.
5 Te̱ xaꞌa̱ꞌ a̱ ña̱ ni̱ xkaꞌndi̱a̱ ndo̱ꞌ ya̱ti̱n vi̱ꞌe̱ yuꞌu̱, te̱ ndaꞌvi so̱ꞌo̱ ndii, ta̱xi̱ i̱ ña̱ ku̱xi̱ ndo̱ꞌ, te̱ na̱ku̱naa̱ ndi̱e̱e̱ꞌ ndo̱ꞌ, te̱ na̱kaa̱ ndo̱ꞌ kuꞌu̱n ndo̱ꞌ i̱tyiꞌ ―ni̱ katyi̱ ra̱.
Te̱ ni̱ na̱ku̱i̱i̱n te̱ ja̱a̱nꞌ ndii:
―Va̱ꞌa̱ tu̱ sa̱kanꞌ naaꞌ xaaꞌ u̱nꞌ ña̱ va̱ꞌa̱ xiinꞌ ndu̱ ―ni̱ katyi̱ ra̱.
6 Te̱ numi̱ꞌ va̱ ni̱ xaꞌa̱n Abraham miiꞌ naá Sara, te̱ ni̱ kaꞌa̱n ra̱ xiinꞌ aꞌ ndii:
―Átyi̱ va̱ u̱nꞌ, ki̱ꞌi̱n kii̱ꞌ oko̱ kilo yu̱tyiꞌ, ña̱ kuaꞌa xita̱ꞌ va̱ꞌa̱, ña̱ va̱ꞌa̱ ka̱, te̱ ka̱sa̱ꞌa̱ u̱nꞌ ndiaꞌviꞌ xita̱ꞌ va̱ꞌa̱ ―ni̱ katyi̱ ra̱.
7 Ndi̱ꞌi̱ ja̱a̱nꞌ te̱ ni̱ nda̱va̱ Abraham kuaꞌa̱n ra̱ miiꞌ ñuꞌuꞌ si̱ndiki̱ꞌ sana̱ ra̱, te̱ ni̱ na̱ka̱xi̱n ra̱ i̱i̱n si̱ndiki̱ꞌ tiakiꞌ siee nda̱tu̱nꞌ va̱, te̱ ni̱ ta̱xi̱ ra̱ riꞌ nda̱ꞌaꞌ te̱ xikaꞌ nuuꞌ nuu̱ꞌ ra̱, te̱ kiꞌi̱ꞌ va̱ ni̱ xa̱ꞌni̱ꞌ te̱ ja̱a̱nꞌ riꞌ, te̱ ni̱ xa̱va̱ꞌa̱ ra̱ riꞌ.
8 Te̱ kii̱ꞌ xa̱ yoo tu̱ꞌva̱ sa̱kuuꞌ a̱ ndii, ni̱ ki̱ꞌi̱n tu̱ Abraham keso iti̱a̱ꞌ, xiinꞌ letyin, xiinꞌ nde̱i̱ꞌ si̱ndiki̱ꞌ, ña̱ ni̱ xa̱va̱ꞌa̱ te̱ xikaꞌ nuuꞌ nuu̱ꞌ ra̱ ja̱a̱nꞌ, te̱ ni̱ xa̱ta̱ ra̱ a̱ nuu̱ꞌ te̱ yivi̱ꞌ ja̱a̱nꞌ ku̱xi̱ ra̱. Te̱ kii̱ꞌ ndieeꞌ te̱ ja̱a̱nꞌ xixiꞌ ra̱ ndii, i̱kanꞌ iinꞌ tu̱ mi̱iꞌ Abraham ka̱tiꞌ i̱tunꞌ ja̱a̱nꞌ, yoo tu̱ꞌva̱ ra̱ naaꞌ kuní yo̱o̱ ka̱ nduuꞌ ña̱ꞌa̱ nuu̱ꞌ te̱ yivi̱ꞌ ja̱a̱nꞌ.
9 Te̱ ni̱ kaꞌa̱n te̱ yivi̱ꞌ ja̱a̱nꞌ xiinꞌ ra̱ ndii:
―¿Miiꞌ yoo ñaꞌ siꞌi u̱nꞌ Sara? ―ni̱ katyi̱ ra̱.
Te̱ ni̱ na̱ku̱i̱i̱n Abraham ndii:
―Ti̱xi̱n vi̱ꞌe̱ toto̱ kaa̱ꞌ nduꞌu̱ꞌ aꞌ ―ni̱ katyi̱ ra̱.
10 Sa̱kanꞌ te̱ ni̱ kaꞌa̱n i̱i̱n te̱ ja̱a̱nꞌ xiinꞌ ra̱ ndii:
―Kuiya̱ ki̱ꞌi̱n ki̱xi̱n ndiꞌe̱ꞌ tu̱ku̱u̱ i̱ miiꞌ nduꞌu̱ꞌ u̱nꞌ, te̱ kii̱ꞌ sa̱kanꞌ ndii, xa̱ ni̱ tuvi̱ i̱i̱n tiaa̱ siꞌe̱ Sara, ñaꞌ siꞌi u̱nꞌ ―ni̱ katyi̱ ra̱.
Te̱ Sara ndii, iinꞌ aꞌ xata̱ꞌ yiꞌeꞌ vi̱ꞌe̱ toto̱ ja̱a̱nꞌ xini so̱ꞌo̱ aꞌ ña̱ kaꞌán te̱ ja̱a̱nꞌ xiinꞌ Abraham. 
11 Abraham, xiinꞌ Sara kii̱ꞌ sa̱kanꞌ ndii, ne̱ xi̱xa̱ xa̱va̱ꞌa̱ ni̱ nduu̱ꞌ ni̱a̱, te̱ siinꞌ tu̱ku̱ ndii, xa̱ kuaꞌa̱ꞌ kuiya̱ kuaꞌa̱n ña̱ ni̱ xi̱kuii̱n ña̱ ndoꞌoꞌ aꞌ kuiꞌe̱ yoo̱ꞌ.
12 Sa̱kanꞌ na ni̱ xaku̱ Sara kaꞌán aꞌ xiinꞌ nimá aꞌ ndii: "Va̱ꞌa̱ yaꞌa̱ ja̱a̱nꞌ na sa̱kanꞌ te̱ ku̱vi̱ xna̱ꞌa̱ ko̱o̱ i̱i̱n tiaa̱ siꞌe̱ ndu̱, ndisu̱ yuꞌu̱ xiinꞌ i̱i̱ꞌ i̱ ndii, xi̱xa̱ yaꞌa̱ ndu̱", ni̱ katyi̱ aꞌ.
13 Sa̱kanꞌ te̱ ni̱ kaꞌa̱n Yahvé Ndiosí xiinꞌ Abraham ndii:
―¿Ndiotyun na xakú Sara, te̱ kaꞌán aꞌ xiinꞌ nimá aꞌ ndii: “Va̱ꞌa̱ yaꞌa̱ ja̱a̱nꞌ na sa̱kanꞌ te̱ ku̱vi̱ xna̱ꞌa̱ ko̱o̱ i̱i̱n tiaa̱ siꞌe̱ i̱ tee̱ꞌ ndee ñaꞌ xi̱xa̱ va̱ nduuꞌ i̱”, ni̱ katyi̱ aꞌ?
14 Köo̱ꞌ nde̱e̱ i̱i̱n ña̱ vixi nuu̱ꞌ Ndiosí. Naa ni̱ kaꞌa̱n i̱ xiinꞌ u̱nꞌ ndii, sa̱kanꞌ xna̱ꞌa̱ xkaꞌndi̱a̱ a̱ kuiya̱ ki̱ꞌi̱n ki̱xi̱n ndiꞌe̱ꞌ tu̱ku̱u̱ i̱ miiꞌ nduꞌu̱ꞌ u̱nꞌ, te̱ kii̱ꞌ sa̱kanꞌ ndii, xa̱ ni̱ tuvi̱ i̱i̱n tiaa̱ siꞌe̱ Sara ―ni̱ katyi̱ a̱.
15 Kii̱ꞌ ni̱ xi̱ni̱ so̱ꞌo̱ Sara ña̱ ja̱a̱nꞌ ndii, ni̱ yi̱ꞌvi aꞌ, sa̱kanꞌ na ni̱ ti̱a̱si̱ yu̱ꞌuꞌ aꞌ kaꞌán aꞌ ndii:
―Kuäsa̱ꞌ ni̱ xaku̱ yuꞌu̱ ―ni̱ katyi̱ aꞌ.
Ndisu̱ ni̱ kaꞌa̱n Ndiosí xiinꞌ aꞌ ndii:
―Süu̱ꞌ sa̱kanꞌ nduuꞌ a̱, ña̱ ndi̱xa̱ nduuꞌ a̱ ndii, ni̱ xaku̱ xna̱ꞌa̱ u̱nꞌ ―ni̱ katyi̱ a̱.
So̱ꞌo̱ ni̱ xa̱a̱ a̱ kii̱ꞌ ni̱ xkuiꞌni̱ Abraham nuu̱ꞌ Ndiosí xaꞌa̱ꞌ ne̱ ndieeꞌ ñu̱u̱ Sodoma
16 Ndi̱ꞌi̱ ni̱ xi̱xi̱ te̱ yivi̱ꞌ ja̱a̱nꞌ, te̱ ni̱ ndo̱ndi̱tyi̱ ra̱, te̱ ni̱ na̱ko̱to̱ ra̱ miiꞌ naá ñu̱u̱ Sodoma. Te̱ kii̱ꞌ ni̱ ki̱e̱e̱ ra̱ kuaꞌa̱n ra̱ ndii, ni̱ xaꞌa̱n tu̱ Abraham siee xiinꞌ ra̱, te̱ nde̱iꞌ ña̱ꞌaꞌ ra̱.
17 Sa̱kanꞌ te̱ ni̱ kaꞌa̱n Yahvé Ndiosí xiinꞌ nimá a̱ ndii: «Va̱ꞌa̱ ka̱ naaꞌ kaꞌa̱n i̱ xiinꞌ Abraham xaꞌa̱ꞌ ña̱ xitoꞌ sa̱a̱ i̱.
18 Ku̱a̱tyi̱ ndii, xiní kaxiꞌ i̱ ña̱ te̱ kaa̱ꞌ ku̱ndu̱u̱ te̱ xii̱ꞌ ya̱taꞌ kuaꞌa̱ꞌ xa̱va̱ꞌa̱ ne̱ yivi̱ꞌ i̱i̱n yivi̱ꞌ, ne̱ kooꞌ tyukuuꞌ, te̱ xiinꞌ nda̱ꞌaꞌ te̱ kaa̱ꞌ tu̱ sa̱ñuꞌuꞌ i̱ sa̱kuuꞌ ne̱ yivi̱ꞌ i̱i̱n yivi̱ꞌ.
19 Sa̱kanꞌ ña̱ ni̱ na̱ka̱xi̱n ña̱ꞌaꞌ i̱ te̱ kaꞌa̱n tyuunꞌ ra̱ xiinꞌ siꞌe̱ ra̱, xiinꞌ si̱a̱niꞌ ra̱, ña̱ sa̱xinu̱ ni̱a̱ ña̱ kaꞌán tyuunꞌ i̱, te̱ sa̱a̱ ni̱a̱ sa̱kuuꞌ ña̱ va̱ꞌa̱, te̱ sa̱tyuunꞌ nda̱ku tu̱ ni̱a̱, te̱ sa̱xinú i̱ sa̱kuuꞌ ña̱ ni̱ ta̱xi̱ kuento i̱ nuu̱ꞌ Abraham ta̱xi̱ i̱ nda̱ꞌaꞌ ra̱», ni̱ katyi̱ a̱.
20 Sa̱kanꞌ te̱ ni̱ kaꞌa̱n Yahvé Ndiosí xiinꞌ Abraham ndii:
―Kuaꞌa̱ꞌ va̱ ña̱ kaꞌán ku̱a̱tyi̱ ku̱a̱xi̱ nuu̱ꞌ i̱ xaꞌa̱ꞌ ñu̱u̱ Sodoma xiinꞌ xaꞌa̱ꞌ ñu̱u̱ Gomorra, te̱ kuaꞌa̱ꞌ xa̱va̱ꞌa̱ tu̱ ku̱a̱tyi̱ xaaꞌ ni̱a̱.
21 Sa̱kanꞌ na, na̱kaa̱ꞌ i̱ i̱kanꞌ vi̱ti̱n te̱ ku̱ni̱ i̱ ndu̱tyiꞌ nuu̱ꞌ i̱ naaꞌ ndi̱xa̱ xna̱ꞌa̱ nduuꞌ a̱ ña̱ ki̱ni̱ yaꞌa̱ kuuꞌ ni̱a̱. Te̱ naaꞌ süu̱ꞌ sa̱kanꞌ nduuꞌ a̱ ndii, ku̱ni̱ mi̱iꞌ i̱ ―ni̱ katyi̱ a̱.
22 Uvi̱ taꞌan te̱ yivi̱ꞌ ja̱a̱nꞌ ni̱ ki̱e̱e̱ kuaꞌa̱n ra̱ ñu̱u̱ Sodoma, ndisu̱ ni̱ ndoo̱ Yahvé Ndiosí ndatuꞌunꞌ a̱ xiinꞌ Abraham.
23 Te̱ ni̱ ku̱ya̱ti̱n Abraham nuu̱ꞌ Ndiosí, te̱ ni̱ kaꞌa̱n ra̱ xiinꞌ a̱ ndii:
―¿Ñáá ka̱ꞌni̱ꞌ tu̱ u̱nꞌ nde̱e̱ ne̱ xatyuunꞌ nda̱ku xiinꞌ ne̱ xaaꞌ ña̱ ni̱a̱ꞌa?
24 Sa̱a̱ e̱ꞌ kuenta ndii, yoo uvi̱ xi̱ko̱ uxi̱ ne̱ xatyuunꞌ nda̱ku ñu̱u̱ ja̱a̱nꞌ. ¿Ñáá sa̱ndo̱ñuꞌuꞌ tu̱ u̱nꞌ ñu̱u̱ ja̱a̱nꞌ, te̱ köo̱ꞌ kaꞌnuꞌ i̱ni̱ u̱nꞌ xaꞌa̱ꞌ a̱, xaꞌa̱ꞌ ne̱ uvi̱ xi̱ko̱ uxi̱, ne̱ xatyuunꞌ nda̱ku ndieeꞌ i̱kanꞌ?
25 Tuu yuꞌu̱ ndii, köo̱ꞌ kivi̱ꞌ ka̱ꞌni̱ꞌ ingaꞌ yoꞌó ne̱ köo̱ꞌ ku̱a̱tyi̱, xiinꞌ ne̱ xaaꞌ ña̱ ni̱a̱ꞌa, nde̱e̱ naa ni̱ xa̱a̱ tu̱ ne̱ ja̱a̱nꞌ ña̱ ni̱a̱ꞌa ja̱a̱nꞌ. Sä̱a̱ u̱nꞌ ña̱ ja̱a̱nꞌ. Yoꞌó, ña̱ nduuꞌ kuesí kaꞌnuꞌ kuuꞌ nu̱uꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ndii, ¿ñáá sä̱a̱ u̱nꞌ ña̱ nda̱ku? ―ni̱ katyi̱ ra̱.
26 Sa̱kanꞌ te̱ ni̱ na̱ku̱i̱i̱n Yahvé Ndiosí ndii:
―Naaꞌ ku̱ni̱ i̱ yoo uvi̱ xi̱ko̱ uxi̱ ne̱ xatyuunꞌ nda̱ku ñu̱u̱ Sodoma ndii, ko̱o̱ kaꞌnuꞌ i̱ni̱ i̱ xaꞌa̱ꞌ sa̱kuuꞌ ne̱ ndieeꞌ ñu̱u̱ ja̱a̱nꞌ, xaꞌa̱ꞌ a̱ ña̱ ndani̱ i̱ ne̱ uvi̱ xi̱ko̱ uxi̱ ne̱ xatyuunꞌ nda̱ku ja̱a̱nꞌ ―ni̱ katyi̱ a̱.
27 Sa̱kanꞌ te̱ tu̱ku̱ ni̱ ni̱ kaꞌa̱n Abraham xiinꞌ Ndiosí ndii:
―Xaꞌa̱ꞌ a̱ ña̱ xa̱ ni̱ xa̱ꞌaꞌ i̱ ndatuꞌunꞌ i̱ xiinꞌ u̱nꞌ, Tákuiꞌe ndii, tee̱ꞌ nde̱e̱ te̱ yivi̱ꞌ, te̱ ni̱ ku̱a̱ꞌa̱ xiinꞌ ñu̱ꞌuꞌ ku̱i̱ti̱ꞌ, nduuꞌ i̱,
28 sa̱a̱ e̱ꞌ kuenta ndii, yoo uvi̱ xi̱ko̱ uꞌu̱n taꞌan ne̱ xatyuunꞌ nda̱ku ñu̱u̱ ja̱a̱nꞌ ndii, ¿ñáá sa̱ndo̱ñuꞌuꞌ u̱nꞌ ka̱niiꞌ ñu̱u̱ ja̱a̱nꞌ kaaꞌ sa̱kanꞌ, tee̱ꞌ ndee uꞌu̱n taꞌan ku̱i̱ti̱ꞌ ni̱a̱ kuní te̱ xinu̱ uvi̱ xi̱ko̱ uxi̱ ni̱a̱? ―ni̱ katyi̱ ra̱.
Te̱ ni̱ kaꞌa̱n Ndiosí xiinꞌ ra̱ ndii:
―Naaꞌ yoo tee̱ꞌ uvi̱ xi̱ko̱ uꞌu̱n ku̱i̱ti̱ꞌ ne̱ xatyuunꞌ nda̱ku ñu̱u̱ ja̱a̱nꞌ ndii, sä̱ndo̱ñuꞌuꞌ e̱ꞌ a̱ ―ni̱ katyi̱ a̱.
29 Ndisu̱ ni̱ xa̱ndi̱e̱eꞌ ka̱ Abraham kaꞌán ra̱ xiinꞌ Ndiosí ndii:
―Te̱ naaꞌ sa̱a̱ e̱ꞌ kuenta ndii, yoo uvi̱ xi̱ko̱ ku̱i̱ti̱ꞌ ne̱ xatyuunꞌ nda̱ku ñu̱u̱ ja̱a̱nꞌ ―ni̱ katyi̱ ra̱.
Te̱ ni̱ kaꞌa̱n Ndiosí xiinꞌ ra̱ ndii:
―Xaꞌa̱ꞌ a̱ ña̱ ndani̱ i̱ ne̱ uvi̱ xi̱ko̱, ne̱ xatyuunꞌ nda̱ku ndieeꞌ ñu̱u̱ ja̱a̱nꞌ ndii, sä̱ndo̱ñuꞌuꞌ e̱ꞌ a̱ ―ni̱ katyi̱ a̱.
30 Ndisu̱ tu̱ku̱ ni̱ ni̱ xa̱ndi̱e̱eꞌ ka̱ Abraham kaꞌán ndaꞌvi ra̱ xiinꞌ Ndiosí ndii:
―Tákuiꞌe, nä̱saa̱ꞌ u̱nꞌ ku̱ni̱ u̱nꞌ yuꞌu̱ naaꞌ kaꞌa̱n ni̱ tu̱ku̱u̱ i̱ xiinꞌ u̱nꞌ xaꞌa̱ꞌ ña̱ ja̱a̱nꞌ. Sa̱a̱ e̱ꞌ kuenta ndii, yoo oko̱ uxi̱ ku̱i̱ti̱ꞌ ne̱ xatyuunꞌ nda̱ku ñu̱u̱ ja̱a̱nꞌ ―ni̱ katyi̱ ra̱.
Te̱ ni̱ kaꞌa̱n Ndiosí xiinꞌ ra̱ ndii:
―Sä̱ndo̱ñuꞌuꞌ i̱ ni̱a̱ naaꞌ yoo oko̱ uxi̱ ne̱ xatyuunꞌ nda̱ku ñu̱u̱ ja̱a̱nꞌ ―ni̱ katyi̱ a̱.
31 Sa̱kanꞌ te̱ ni̱ kaꞌa̱n ni̱ tu̱ku̱u̱ Abraham xiinꞌ Ndiosí ndii:
―Ko̱o̱ kaꞌnuꞌ i̱ni̱ u̱nꞌ, Tákuiꞌe, xa̱ ndiꞌe̱ꞌ va̱ kayuꞌuꞌ i̱ nuu̱ꞌ u̱nꞌ, ndisu̱ kuni kaꞌa̱n ka̱ i̱ xiinꞌ u̱nꞌ ña̱, tee̱ꞌ kueinꞌ yoo na oko̱ taꞌan ne̱ xatyuunꞌ nda̱ku ñu̱u̱ ja̱a̱nꞌ ―ni̱ katyi̱ ra̱.
Te̱ ni̱ kaꞌa̱n Ndiosí xiinꞌ ra̱ ndii:
―Sä̱ndo̱ñuꞌuꞌ i̱ ni̱a̱ naaꞌ yoo oko̱ taꞌan ne̱ xatyuunꞌ nda̱ku ñu̱u̱ ja̱a̱nꞌ, xaꞌa̱ꞌ a̱ ña̱ ndani̱ i̱ ne̱ xatyuunꞌ nda̱ku ja̱a̱nꞌ ―ni̱ katyi̱ a̱.
32 Te̱ soꞌo̱ꞌ ndiꞌiꞌ ni̱ kaꞌa̱n ka̱ Abraham ndii:
―Tákuiꞌe, sa̱a̱ u̱nꞌ ña̱ va̱ꞌa̱ te̱ nä̱saa̱ꞌ u̱nꞌ ku̱ni̱ yuꞌu̱ naaꞌ kaꞌa̱n ka̱ i̱ xiinꞌ u̱nꞌ ndee untaꞌ ku̱i̱ti̱ꞌ, te̱ käyuꞌuꞌ ka̱ i̱ nuu̱ꞌ u̱nꞌ, te̱ naaꞌ yoo uxi̱ taꞌan ku̱i̱ti̱ꞌ ne̱ xatyuunꞌ nda̱ku ñu̱u̱ ja̱a̱nꞌ ¿ndee ña̱ sa̱a̱ u̱nꞌ? ―ni̱ katyi̱ ra̱.
Te̱ ni̱ kaꞌa̱n Ndiosí xiinꞌ ra̱ ndii:
―Sä̱ndo̱ñuꞌuꞌ i̱ ni̱a̱ naaꞌ yoo uxi̱ taꞌan ne̱ xatyuunꞌ nda̱ku ñu̱u̱ ja̱a̱nꞌ, xaꞌa̱ꞌ a̱ ña̱ ndani̱ i̱ ne̱ xatyuunꞌ nda̱ku ja̱a̱nꞌ ―ni̱ katyi̱ a̱.
33 Kii̱ꞌ ndi̱ꞌi̱ ni̱ nda̱tuꞌunꞌ Yahvé Ndiosí xiinꞌ Abraham, te̱ ni̱ ke̱ta̱ a̱ kuaꞌa̱n a̱, te̱ Abraham ni̱ na̱ndi̱koꞌ vi̱ꞌe̱ ra̱.