So̱ꞌo̱ ni̱ xa̱a̱ a̱ kii̱ꞌ ni̱ ndoo̱ Ndiosí kuento a̱ xiinꞌ Noé
9
Te̱ xiinꞌ kuento yoꞌoꞌ ni̱ sa̱ñuꞌuꞌ Ndiosí Noé kaꞌán a̱ xiinꞌ ra̱ ndii:
―Na̱taꞌvi̱ꞌ va̱ ndo̱ꞌ, te̱ na̱ndu̱u̱ kuaꞌa̱ꞌ ndo̱ꞌ nde̱e̱ sa̱kutuꞌ ndo̱ꞌ nuu̱ꞌ ñu̱ꞌuꞌ i̱i̱n yivi̱ꞌ.
2 Te̱ sa̱kuuꞌ nuu̱ꞌ ki̱tiꞌ, tiꞌ yoo nuu̱ꞌ ñu̱ꞌuꞌ i̱i̱n yivi̱ꞌ ndii, ku̱yi̱ꞌvi riꞌ ndoꞌó, te̱ ka̱ndi̱xaꞌ tu̱ riꞌ ndoꞌó, sa̱kanꞌ tu̱ sa̱kuuꞌ nuu̱ꞌ sa̱a̱ tiꞌ taꞌnuꞌ ndi̱viꞌ, sa̱kanꞌ tu̱ sa̱kuuꞌ nuu̱ꞌ tiꞌ yoo nuu̱ꞌ ñu̱ꞌuꞌ i̱i̱n yivi̱ꞌ, xiinꞌ sa̱kuuꞌ nuu̱ꞌ ti̱a̱kaꞌ tiꞌ ñuꞌuꞌ mi̱ni̱. Sa̱kuuꞌ tiꞌ ja̱a̱nꞌ ni̱ sa̱na̱kuaꞌa i̱ nda̱ꞌaꞌ ndoꞌó, te̱ ku̱miꞌ ndo̱ꞌ ndi̱e̱e̱ꞌ nuu̱ꞌ riꞌ.
3 Te̱ sa̱kuuꞌ ki̱tiꞌ tiꞌ kanda kuaꞌa̱n ndii, taxiꞌ i̱ riꞌ ku̱xi̱ ndo̱ꞌ, naa ni̱ xa̱a̱ i̱ ni̱ ta̱xi̱ i̱ ku̱xi̱ ndo̱ꞌ yu̱va̱ kuii̱ꞌ.
4 Ndisu̱ köo̱ꞌ kivi̱ꞌ ka̱xi̱ꞌ ndo̱ꞌ nde̱i̱ꞌ naaꞌ yoo níiꞌ a̱, sa̱kanꞌ ña̱ níiꞌ ja̱a̱nꞌ nduuꞌ ña̱ taxiꞌ kivi̱ꞌ ñu̱u a̱.
5 Ku̱a̱tyi̱ ndii, naka̱n i̱ kuenta xaꞌa̱ꞌ níiꞌ ndoꞌó nuu̱ꞌ sa̱kuuꞌ ki̱tiꞌ, te̱ naka̱n tu̱ i̱ kuenta nuu̱ꞌ ndoꞌó xaꞌa̱ꞌ níiꞌ te̱ yivi̱ꞌ xiinꞌ ndo̱ꞌ naaꞌ ka̱ꞌni̱ꞌ ña̱ꞌaꞌ ndo̱ꞌ.
6 Naaꞌ ka̱ꞌni̱ꞌ yo̱o̱ ka̱ i̱i̱n ne̱ yivi̱ꞌ ndii, ka̱ꞌni̱ꞌ tu̱ ne̱ yivi̱ꞌ mi̱iꞌ ni̱a̱, sa̱kanꞌ ña̱ ni̱ xa̱ꞌa̱ Ndiosí ne̱ yivi̱ꞌ sa̱a̱ niiꞌ kaaꞌ mi̱iꞌ a̱.
7 Ndisu̱ ndoꞌó ndii, na̱taꞌvi̱ꞌ va̱ ndo̱ꞌ te̱ na̱ndu̱u̱ kuaꞌa̱ꞌ ndo̱ꞌ nde̱e̱ sa̱kutuꞌ tu̱ku̱u̱ ndo̱ꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ―ni̱ katyi̱ Ndiosí xiinꞌ ra̱.
8 Te̱ ni̱ kaꞌa̱n ka̱ Ndiosí xiinꞌ Noé, xiinꞌ siꞌe̱ ra̱ ndii:
9 ―Ko̱to̱ ndo̱ꞌ, kivi̱ꞌ vi̱ti̱n ndoó i̱ kuento xiinꞌ ndo̱ꞌ, te̱ sa̱kanꞌ tu̱ xiinꞌ si̱a̱niꞌ xikaꞌ ndo̱ꞌ, ne̱ ki̱xi̱n nuu̱ꞌ kuꞌu̱n e̱ꞌ,
10 xiinꞌ sa̱kuuꞌ nuu̱ꞌ ki̱tiꞌ, tiꞌ ni̱ ñuꞌu̱ xiinꞌ ndo̱ꞌ ti̱xi̱n tunꞌ ndo̱oꞌ: Naa kuuꞌ sa̱a̱, xiinꞌ tiꞌ sakuaꞌnuꞌ ne̱ yivi̱ꞌ xiinꞌ tiꞌ i̱kuꞌ, xiinꞌ sa̱kuuꞌ nuu̱ꞌ ki̱tiꞌ, tiꞌ yoo i̱i̱n yivi̱ꞌ.
11 Ña̱ yo̱ꞌo̱ nduuꞌ kuento ña̱ ndoó i̱ xiinꞌ ndo̱ꞌ: Köo̱ꞌ kivi̱ꞌ ka̱ sa̱kuunꞌ ndi̱e̱eꞌ i̱ savi̱ꞌ te̱ sa̱ndo̱ñuꞌuꞌ i̱ ne̱ yivi̱ꞌ i̱i̱n yivi̱ꞌ, ni̱ nde̱e̱ sä̱kuunꞌ kuiꞌe̱ ka̱ tu̱ i̱ savi̱ꞌ te̱ sa̱ndo̱ñuꞌuꞌ raꞌ i̱i̱n yivi̱ꞌ ―ni̱ katyi̱ a̱ xiinꞌ ra̱.
12 Te̱ ni̱ kaꞌa̱n ka̱ Ndiosí xiinꞌ Noé ndii:
―Ña̱ yo̱ꞌo̱ nduuꞌ ña̱ niaꞌá ña̱ ndoó yuꞌu̱ kuento i̱ xiinꞌ ndoꞌó, xiinꞌ sa̱kuuꞌ ki̱tiꞌ, tiꞌ ñuꞌuꞌ xiinꞌ ndo̱ꞌ ti̱xi̱n tunꞌ ndo̱oꞌ ñaa̱ꞌ, te̱ kuento i̱ ja̱a̱nꞌ ndii, ka̱nduꞌu̱ꞌ a̱ nde̱e̱ ndiꞌiꞌ ni̱ kivi̱ꞌ.
13 Xa̱ ni̱ tyi̱nduꞌu̱ꞌ i̱ koo̱ꞌ yankiꞌ i̱ nuu̱ꞌ viko̱ꞌ, te̱ tiꞌ ja̱a̱nꞌ ku̱ndu̱u̱ tiꞌ niaꞌa̱ ña̱ xa̱ ni̱ ndoo̱ i̱ kuento i̱ xiinꞌ sa̱kuuꞌ ndoꞌó, ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ.
14 Kii̱ꞌ nda̱ki̱n i̱ viko̱ꞌ nuu̱ꞌ ñu̱ꞌuꞌ i̱i̱n yivi̱ꞌ ndii, na̱tuvi̱ i̱i̱n koo̱ꞌ yankiꞌ tiꞌ nduuꞌ kuenta i̱ te̱i̱n viko̱ꞌ ja̱a̱nꞌ.
15 Te̱ na̱ka̱ꞌanꞌ i̱ kuento ña̱ ni̱ ndoo̱ i̱ xiinꞌ ndo̱ꞌ ja̱a̱nꞌ, xiinꞌ sa̱kuuꞌ nuu̱ꞌ ki̱tiꞌ, tiꞌ yoo i̱i̱n yivi̱ꞌ, te̱ kü̱u̱n kuiꞌe̱ ka̱ tu̱ savi̱ꞌ, te̱ sa̱ndo̱ñuꞌuꞌ raꞌ sa̱kuuꞌ ne̱ yivi̱ꞌ i̱i̱n yivi̱ꞌ.
16 Te̱ i̱ꞌi̱n i̱tyiꞌ kii̱ꞌ ku̱ni̱ i̱ koo̱ꞌ yankiꞌ ja̱a̱nꞌ ndii, na̱ka̱ꞌanꞌ i̱ kuento ña̱ ni̱ ndoo̱ i̱ xiinꞌ ndo̱ꞌ nde̱e̱ ndiꞌiꞌ ni̱ kivi̱ꞌ ja̱a̱nꞌ, te̱ ni̱ ndoo̱ tu̱ e̱ xiinꞌ sa̱kuuꞌ ki̱tiꞌ, tiꞌ yoo nuu̱ꞌ ñu̱ꞌuꞌ i̱i̱n yivi̱ꞌ ―ni̱ katyi̱ a̱ xiinꞌ ra̱.
17 Te̱ ni̱ kaꞌa̱n ka̱ Ndiosí xiinꞌ Noé ndii:
―Koo̱ꞌ yankiꞌ yoꞌoꞌ nduuꞌ tiꞌ niaꞌá ña̱ ni̱ ndoo̱ i̱ kuento xiinꞌ sa̱kuuꞌ ña̱ yoo nuu̱ꞌ ñu̱ꞌuꞌ i̱i̱n yivi̱ꞌ ―ni̱ katyi̱ a̱.
So̱ꞌo̱ ni̱ xa̱a̱ kii̱ꞌ ni̱ xi̱ꞌi̱ va̱ Noé vino
18 Tiaa̱ siꞌe̱ Noé, te̱ ni̱ ki̱e̱e̱ xiinꞌ ra̱ ti̱xi̱n tunꞌ ndo̱oꞌ ndii, i̱i̱n ra̱ naniꞌ Sem, te̱ i̱i̱n ra̱ naniꞌ Cam, te̱ i̱nga̱ ra̱ naniꞌ Jafet, te̱ Cam ni̱ nduu̱ yu̱vaꞌ Canaán.
19 Te̱ uni̱ sa̱aꞌ ra̱ ni̱ nduu̱ꞌ siꞌe̱ Noé, te̱ xiinꞌ siꞌe̱ te̱ ja̱a̱nꞌ ku̱i̱ti̱ꞌ ni̱ sa̱kutuꞌ Ndiosí ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
20 Kii̱ꞌ ndi̱ꞌi̱ ni̱ xkaꞌndi̱a̱ ña̱ ni̱ ku̱u̱n kuiꞌe̱ savi̱ꞌ ja̱a̱nꞌ, te̱ ni̱ xa̱ꞌaꞌ Noé taꞌviꞌ ra̱ ñu̱ꞌuꞌ, te̱ ni̱ tyi̱ꞌi̱ ra̱ yo̱ꞌoꞌ uva.
21 Untaꞌ ndii, ni̱ xi̱ꞌi̱ ra̱ vino nde̱e̱ ni̱ xi̱ni̱ va̱ ra̱, te̱ ni̱ ku̱u̱ i̱i̱nꞌ vityiꞌ tiꞌeꞌ ra̱ kanduꞌu̱ꞌ ra̱ ma̱ꞌiꞌ vi̱ꞌe̱ toto̱ miiꞌ ni̱ nduꞌu̱ꞌ ra̱.
22 Te̱ Cam, te̱ nduuꞌ yu̱vaꞌ Canaán ndii, ni̱ xi̱ni̱ ra̱ kavityiꞌ yu̱vaꞌ ra̱ ja̱a̱nꞌ, te̱ ni̱ kaꞌa̱n ra̱ xiinꞌ uvi̱ sa̱aꞌ ña̱ni̱ ra̱, te̱ itaꞌ ki̱ꞌe̱ xaꞌa̱ꞌ ña̱ ja̱a̱nꞌ.
23 Sa̱kanꞌ na ni̱ ki̱ꞌi̱n Sem, xiinꞌ Jafet i̱i̱n toto̱ ndiká, te̱ ni̱ tyi̱nduꞌu̱ꞌ ra̱ a̱ soko̱ ra̱, te̱ ni̱ xa̱ꞌaꞌ kuaꞌa̱n xataꞌ ra̱ miiꞌ kanduꞌu̱ꞌ yu̱vaꞌ ra̱ ja̱a̱nꞌ, te̱ ni̱ ti̱saꞌvi̱ ña̱ꞌaꞌ ra̱. Te̱ xaꞌa̱ꞌ a̱ ña̱ küni ku̱ni̱ ra̱ kavityiꞌ yu̱vaꞌ ra̱ ja̱a̱nꞌ, sa̱kanꞌ na tu̱ku̱ xaanꞌ xitoꞌ ra̱ kuaꞌa̱n ra̱.
24 Te̱ kii̱ꞌ ni̱ ndo̱to̱ Noé ña̱ ni̱ xi̱ꞌi̱ ra̱ vino ja̱a̱nꞌ ndii, ni̱ xi̱ni̱ ra̱ kuento ña̱ ni̱ xa̱a̱ siꞌe̱ ra̱, te̱ xa̱ siee ka̱,
25 te̱ ni̱ kaꞌa̱n ra̱ ndii:
―Na na̱tya̱ꞌa̱n Canaán, te̱ ku̱ndu̱u̱ ra̱ te̱ ka̱ka̱ nu̱u̱ suꞌma̱ꞌ tiꞌeꞌ xa̱tyiꞌ a̱ nuu̱ꞌ uvi̱ sa̱aꞌ ña̱ni̱ ra̱ ―ni̱ katyi̱ ra̱.
26 Te̱ ni̱ kaꞌa̱n ka̱ ra̱ ndii:
―Na sa̱ñuꞌuꞌ Yahvé Ndiosí ña̱ xakaꞌnuꞌ i̱ Sem, te̱ na ku̱ndu̱u̱ Canaán te̱ ka̱ka̱ nu̱u̱ nuu̱ꞌ ra̱.
27 Te̱ na ko̱o̱ kuaꞌa̱ꞌ siꞌe̱ Jafet sa̱a̱ Ndiosí, te̱ na ku̱ndi̱e̱e̱ ra̱ vi̱ꞌe̱ toto̱, ña̱ ka̱sa̱ꞌa̱ Sem, te̱ Canaán ku̱ndu̱u̱ te̱ ka̱ka̱ nu̱u̱ nuu̱ꞌ ra̱ ―ni̱ katyi̱ Noé.