So̱ꞌo̱ ni̱ xa̱a̱ a̱ kii̱ꞌ ni̱ xa̱ꞌaꞌ nataꞌvíꞌ tu̱ku̱u̱ ne̱ yivi̱ꞌ i̱i̱n yivi̱ꞌ
10
Yoꞌoꞌ yoso̱ꞌ ña̱ kaꞌán xaꞌa̱ꞌ siꞌe̱ Noé, te̱ nduuꞌ Sem, xiinꞌ Cam, xiinꞌ Jafet, te̱ ja̱a̱nꞌ, kii̱ꞌ ni̱ yaꞌa̱ ña̱ ni̱ ku̱u̱n kuiꞌe̱ savi̱ꞌ ndii, ni̱ xa̱ꞌaꞌ nataꞌvíꞌ ra̱.
2 Siꞌe̱ Jafet ni̱ nduu̱ Gomer, xiinꞌ Magog, xiinꞌ Madai, xiinꞌ Javán, xiinꞌ Tubal, xiinꞌ Mesec, xiinꞌ Tiras.
3 Te̱ siꞌe̱ Gomer ni̱ nduu̱ Askenaz, xiinꞌ Rifat, xiinꞌ Togarma.
4 Te̱ siꞌe̱ Javán ni̱ nduu̱ Elisá, xiinꞌ Tarsis, xiinꞌ Quitim, xiinꞌ Dodanim.
5 Te̱ sa̱kuuꞌ te̱ ja̱a̱nꞌ ni̱ xi̱ku̱ndiee̱ yu̱ꞌuꞌ mi̱ni̱ kaꞌnuꞌ, kiꞌinꞌ ti̱ꞌvi̱ ni̱ ku̱u̱ ra̱, te̱ i̱ꞌi̱n ti̱ꞌvi̱ ra̱ ndii, xa̱ yoo xa̱ yoo tu̱ꞌu̱n ndatuꞌunꞌ mi̱iꞌ ra̱.
6 Te̱ siꞌe̱ Cam ni̱ nduu̱ Cus, xiinꞌ Mizraim, xiinꞌ Fut, xiinꞌ Canaán.
7 Te̱ siꞌe̱ Cus ni̱ nduu̱ Seba, xiinꞌ Havila, xiinꞌ Sabta, xiinꞌ Raama, xiinꞌ Sabteca. Te̱ siꞌe̱ Raama ni̱ nduu̱ Seba xiinꞌ Dedán.
8 Te̱ siꞌe̱ Cus ja̱a̱nꞌ tu̱ ni̱ nduu̱ Nimrod, te̱ xi̱ꞌna̱ te̱ ja̱a̱nꞌ ni̱ xa̱ꞌaꞌ nduuꞌ te̱ kooꞌ tyukuuꞌ va̱ nuu̱ꞌ ñu̱ꞌuꞌ i̱i̱n yivi̱ꞌ kii̱ꞌ sa̱kanꞌ.
9 Te̱ xaꞌa̱ꞌ a̱ ña̱ i̱i̱n te̱ tyu̱u̱n va̱ xaꞌni̱ꞌ ki̱tiꞌ ni̱ nduu̱ ra̱ ndii, nde̱e̱ mi̱iꞌ Yahvé ni̱ na̱ku̱ni̱ ña̱ i̱i̱n te̱ ndityi va̱ ni̱ nduu̱ ra̱, xaꞌa̱ꞌ a̱ ja̱a̱nꞌ na ni̱ ndoo̱ i̱i̱n ña̱ kaꞌán ne̱ yivi̱ꞌ xaꞌa̱ꞌ ra̱ ndii: «Te̱ yivi̱ꞌ kaa̱ꞌ ndii, nde̱e̱ naa Nimrod nduuꞌ ra̱, sa̱kanꞌ ña̱ tyu̱u̱n va̱ ra̱ ka̱ꞌni̱ꞌ ra̱ ki̱tiꞌ, katyi ni̱a̱».
10 Te̱ miiꞌ ni̱ xa̱ꞌaꞌ xaꞌndia tyuunꞌ ra̱ ndii, ñu̱u̱ Babel, xiinꞌ ñu̱u̱ Erec, xiinꞌ ñu̱u̱ Acad, xiinꞌ ñu̱u̱ Calne, ña̱ ñuꞌuꞌ nuu̱ꞌ ñu̱ꞌuꞌ Sinar, nduuꞌ a̱.
11 Te̱ nde̱e̱ nuu̱ꞌ ñu̱ꞌuꞌ ja̱a̱nꞌ ni̱ ki̱e̱e̱ ra̱ te̱ kuaꞌa̱n ra̱ nuu̱ꞌ ñu̱ꞌuꞌ Asiria, te̱ i̱kanꞌ ni̱ ta̱ndi̱e̱e̱ ra̱ ñu̱u̱ ña̱ naniꞌ Nínive, xiinꞌ ñu̱u̱ Rehobot, xiinꞌ ñu̱u̱ Cala,
12 xiinꞌ ñu̱u̱ tyie̱ Resén, ña̱ naá i̱ꞌnu̱ te̱i̱n ñu̱u̱ Nínive xiinꞌ ñu̱u̱ Cala.
13 Mizraim ni̱ nduu̱ te̱ xii̱ꞌ ya̱taꞌ te̱ vi̱ꞌe̱ Ludim, xiinꞌ te̱ vi̱ꞌe̱ Anamim, xiinꞌ te̱ vi̱ꞌe̱ Lehabim, xiinꞌ te̱ vi̱ꞌe̱ Naftuhim,
14 xiinꞌ te̱ vi̱ꞌe̱ Patrusim, xiinꞌ te̱ vi̱ꞌe̱ Casluhim, xiinꞌ te̱ vi̱ꞌe̱ Caftoritim. Te̱ sa̱kuuꞌ te̱ ja̱a̱nꞌ tu̱ ni̱ nduu̱ te̱ xii̱ꞌ ya̱taꞌ te̱ vi̱ꞌe̱ filisteo.
15 Te̱ siꞌe̱ nu̱uꞌ Canaán ni̱ nduu̱ Sidón, te̱ siꞌe̱ tu̱ ra̱ ni̱ nduu̱ Het.
16 Te̱ Canaán ja̱a̱nꞌ nduuꞌ te̱ xii̱ꞌ ya̱taꞌ ne̱ vi̱ꞌe̱ jebuseo, xiinꞌ ne̱ vi̱ꞌe̱ amorreo, xiinꞌ ne̱ vi̱ꞌe̱ gergeseo,
17 xiinꞌ ne̱ vi̱ꞌe̱ heveo, xiinꞌ ne̱ vi̱ꞌe̱ araceo, xiinꞌ ne̱ vi̱ꞌe̱ sineo,
18 xiinꞌ ne̱ vi̱ꞌe̱ arvadeo, xiinꞌ ne̱ vi̱ꞌe̱ zemareo, xiinꞌ ne̱ vi̱ꞌe̱ hamateo. Ni̱ yaꞌa̱ te̱ ni̱ kiku̱ ndo̱o̱ ne̱ vi̱ꞌe̱ cananeo ja̱a̱nꞌ.
19 Te̱ ñu̱ꞌuꞌ ne̱ vi̱ꞌe̱ Canaán ndii, ni̱ na̱kaa̱ꞌ a̱ sa̱a̱ kuaꞌa̱n, ni̱ xa̱ꞌaꞌ a̱ nde̱e̱ nuu̱ꞌ ñu̱ꞌuꞌ Sidón, te̱ ni̱ na̱xaa̱ a̱ nde̱e̱ ñu̱u̱ Gerar xiinꞌ ñu̱u̱ Gaza, te̱ tu̱ku̱ taꞌviꞌ ndii, ni̱ na̱xaa̱ a̱ nde̱e̱ ñu̱u̱ Sodoma xiinꞌ ñu̱u̱ Gomorra, xiinꞌ ñu̱u̱ Adma, xiinꞌ ñu̱u̱ Zeboim nde̱e̱ ni̱ na̱xa̱a̱ a̱ nde̱e̱ ya̱ti̱n ñu̱u̱ Lasa.
20 Te̱ sa̱kuuꞌ ne̱ ja̱a̱nꞌ nduuꞌ si̱a̱niꞌ xikaꞌ Cam, te̱ ni̱ ndiee̱ i̱ꞌi̱n ti̱ꞌvi̱ ni̱a̱ kiꞌinꞌ xaanꞌ, te̱ i̱ꞌi̱n ti̱ꞌvi̱ ni̱a̱ ndatuꞌunꞌ tu̱ꞌu̱n mi̱iꞌ ni̱a̱, te̱ i̱ꞌi̱n ti̱ꞌvi̱ ndii, xa̱ ni̱ yoo̱, xa̱ ni̱ yoo̱ tu̱ ñu̱ꞌuꞌ mi̱iꞌ ni̱a̱, xiinꞌ ñu̱u̱ mi̱iꞌ ni̱a̱ miiꞌ ndieeꞌ ni̱a̱.
21 Te̱ ni̱ yoo̱ tu̱ siꞌe̱ Sem, te̱ Sem ja̱a̱nꞌ ni̱ nduu̱ꞌ te̱ xii̱ꞌ ya̱taꞌ sa̱kuuꞌ ne̱ vi̱ꞌe̱ Heber, te̱ te̱ xkuaꞌa̱ꞌ ni̱ nduu̱ ra̱ nuu̱ꞌ ña̱ni̱ ra̱ Jafet.
22 Te̱ siꞌe̱ Sem ja̱a̱nꞌ ni̱ nduu̱ Elam, xiinꞌ Asur, xiinꞌ Arfaxad, xiinꞌ Lud, xiinꞌ Aram.
23 Te̱ siꞌe̱ Aram ni̱ nduu̱ Uz, xiinꞌ Hul, xiinꞌ Geter, xiinꞌ Mas.
24 Te̱ siꞌe̱ Arfaxad ni̱ nduu̱ꞌ Sala, te̱ siꞌe̱ Sala ni̱ nduu̱ꞌ Heber.
25 Te̱ Heber ja̱a̱nꞌ ndii, uvi̱ taꞌan tiaa̱ siꞌe̱ ra̱ ni̱ yoo̱. I̱i̱n ra̱ ni̱ naniꞌ Peleg, sa̱kanꞌ ña̱ kii̱ꞌ ni̱ xika̱ te̱ ja̱a̱nꞌ i̱i̱n yivi̱ꞌ ndii, ni̱ na̱ta̱ꞌviꞌ taꞌanꞌ ne̱ yivi̱ꞌ, te̱ ña̱ni̱ ra̱ ni̱ na̱niꞌ Joctán.
26 Te̱ siꞌe̱ Joctán ja̱a̱nꞌ ni̱ nduu̱ Almodad, xiinꞌ Selef, xiinꞌ Hazar-mavet, xiinꞌ Jera,
27 xiinꞌ Adoram, xiinꞌ Uzal, xiinꞌ Diclá,
28 xiinꞌ Obal, xiinꞌ Abimael, xiinꞌ Seba,
29 xiinꞌ Ofir, xiinꞌ Havila, xiinꞌ Jobab. Sa̱kuuꞌ te̱ yo̱ꞌo̱ ni̱ nduu̱ siꞌe̱ Joctán.
30 Te̱ sa̱kuuꞌ te̱ ja̱a̱nꞌ ni̱ ndiee̱ nde̱e̱ ya̱ti̱n nuu̱ꞌ ñu̱ꞌuꞌ Mesá, te̱ ni̱ xandi̱koꞌ a̱ nde̱e̱ nuu̱ꞌ ñu̱ꞌuꞌ Sefar, ña̱ nduuꞌ xiki̱ꞌ ña̱ kanduꞌu̱ꞌ xtoꞌniꞌ miiꞌ ketaꞌ ñu̱ꞌu̱.
31 Te̱ sa̱kuuꞌ te̱ ja̱a̱nꞌ nduuꞌ si̱a̱niꞌ xikaꞌ Sem, te̱ ni̱ ndiee̱ i̱ꞌi̱n ti̱ꞌvi̱ ra̱ kiꞌinꞌ xaanꞌ, te̱ i̱ꞌi̱n ti̱ꞌvi̱ ra̱ ndatuꞌunꞌ tu̱ꞌu̱n mi̱iꞌ ra̱, te̱ i̱ꞌi̱n ti̱ꞌvi̱ ndii, xa̱ ni̱ yoo̱, xa̱ ni̱ yoo̱ tu̱ ñu̱ꞌuꞌ mi̱iꞌ ra̱ miiꞌ ndieeꞌ ra̱ xiinꞌ ñu̱u̱ mi̱iꞌ ra̱.
32 Sa̱kuuꞌ te̱ ja̱a̱nꞌ nduuꞌ si̱a̱niꞌ xikaꞌ Noé, te̱ nduuꞌ siꞌe̱ tiaa̱ siꞌe̱ ra̱, te̱ ni̱ kiku̱ ndieeꞌ i̱ꞌi̱n xaanꞌ nuu̱ꞌ ñu̱ꞌuꞌ i̱i̱n yivi̱ꞌ. Te̱ xiinꞌ te̱ ja̱a̱nꞌ ni̱ na̱koo̱ kuaꞌa̱ꞌ ñu̱u̱ kaꞌnuꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ, kii̱ꞌ ni̱ xkaꞌndi̱a̱ ña̱ ni̱ ku̱u̱n kuiꞌe̱ savi̱ꞌ.