So̱ꞌo̱ ni̱ xa̱a̱ a̱ kii̱ꞌ ni̱ xi̱kuii̱n savi̱ꞌ
8
Te̱ ni̱ na̱ka̱ꞌanꞌ Ndiosí xaꞌa̱ꞌ Noé xiinꞌ xaꞌa̱ꞌ sa̱kuuꞌ ki̱tiꞌ, tiꞌ ñuꞌuꞌ xiinꞌ ra̱ ti̱xi̱n tunꞌ ndo̱oꞌ ja̱a̱nꞌ, sa̱kanꞌ na ni̱ ti̱ꞌviꞌ a̱ i̱i̱n tatyi̱ꞌ ndi̱e̱eꞌ va̱, te̱ ni̱ xa̱ꞌaꞌ ndokoꞌ ti̱kui saviꞌ.
2 Te̱ ni̱ nda̱si̱ tu̱ yavi̱ kunu miiꞌ ñuꞌuꞌ ti̱kui, xiinꞌ yiꞌeꞌ ndi̱viꞌ, te̱ ni̱ xi̱kuii̱n tu̱ savi̱ꞌ.
3 Te̱ ni̱ xa̱ꞌaꞌ ndokoꞌ ti̱kui kuiee kuiee ni̱ nuu̱ꞌ ñu̱ꞌuꞌ i̱i̱n yivi̱ꞌ, te̱ kii̱ꞌ ni̱ xinu̱ ciento uvi̱ xi̱ko̱ uxi̱ kivi̱ꞌ ndii, xa̱ xa̱ꞌaꞌ ndokoꞌ ti̱kui nuu̱ꞌ ñu̱ꞌuꞌ.
4 Te̱ kivi̱ꞌ ña̱ xaꞌu̱n uvi̱ xikaꞌ yoo̱ꞌ, tiꞌ uxa̱ ndii, ni̱ xi̱kuii̱n tunꞌ ndo̱oꞌ xíniꞌ i̱i̱n i̱kuꞌ ña̱ na̱niꞌ Ararat.
5 Te̱ ti̱kui ndii, ndokoꞌ te̱ ndokoꞌ raꞌ nde̱e̱ ni̱ xa̱a̱ yoo̱ꞌ uxi̱, te̱ kivi̱ꞌ nu̱uꞌ xaꞌa̱ꞌ yoo̱ꞌ ja̱a̱nꞌ ni̱ na̱tuvi̱ xíniꞌ sa̱va̱ i̱kuꞌ sukun.
6 Te̱ kii̱ꞌ ni̱ xkaꞌndi̱a̱ i̱nga̱ uvi̱ xi̱ko̱ kivi̱ꞌ ndii, ni̱ nu̱niaꞌ Noé ventana ña̱ ni̱ xa̱ꞌa̱ ra̱ to̱koꞌ tunꞌ ndo̱oꞌ ja̱a̱nꞌ,
7 te̱ ni̱ sa̱ñaꞌ ra̱ i̱i̱n ti̱ka̱kaꞌ, te̱ ni̱ taꞌnu̱ riꞌ, kuaꞌa̱n riꞌ te̱ ku̱a̱xi̱ riꞌ miiꞌ kanduꞌu̱ꞌ tundo̱oꞌ ja̱a̱nꞌ nde̱e̱ ska̱tyiꞌ ni̱ na̱ya̱a̱ nuu̱ꞌ ñu̱ꞌuꞌ.
8 Ni̱ yaꞌa̱ te̱ ni̱ sa̱ñaꞌ tu̱ ra̱ i̱i̱n paloma te̱ ku̱ni̱ ra̱ naaꞌ xa̱ ni̱ na̱ya̱a̱ nuu̱ꞌ ñu̱ꞌuꞌ.
9 Ndisu̱ ni̱ na̱ndi̱koꞌ riꞌ xaꞌa̱ꞌ a̱ ña̱ nï̱ niꞌi̱ꞌ riꞌ nde̱e̱ i̱i̱n xaanꞌ miiꞌ ku̱nduꞌu̱ꞌ riꞌ, sa̱kanꞌ ña̱ kusaaꞌ yoo kuaꞌa̱ꞌ ka̱ ti̱kui ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ. Sa̱kanꞌ te̱ ni̱ sa̱na̱kaá ra̱ nda̱ꞌaꞌ ra̱, te̱ ni̱ na̱ꞌi̱ ra̱ riꞌ, te̱ ni̱ sa̱ndiꞌví ra̱ riꞌ ti̱xi̱n tunꞌ ndo̱oꞌ xiinꞌ ra̱.
10 Te̱ ni̱ ndiatu̱ ka̱ ra̱ i̱nga̱ uxa̱ kivi̱ꞌ, te̱ ni̱ ti̱ꞌviꞌ tu̱ku̱u̱ ra̱ paloma ja̱a̱nꞌ ki̱ꞌe̱.
11 Te̱ ni̱ na̱ndi̱koꞌ riꞌ nuu̱ꞌ ra̱ xa̱kuaa̱ꞌ niꞌniꞌ i̱i̱n yuku̱ tunꞌ olivo tiꞌe̱ꞌ yu̱ꞌuꞌ riꞌ, sa̱kanꞌ te̱ ni̱ ku̱nda̱ni̱ Noé ña̱ xa̱ ni̱ xa̱ꞌaꞌ nayaaꞌ nuu̱ꞌ ñu̱ꞌuꞌ.
12 Tu̱ku̱ ni̱ ni̱ ndiatu̱ ka̱ ra̱ uxa̱ taꞌan kivi̱ꞌ, te̱ ni̱ sa̱ñaꞌ tu̱ku̱u̱ ra̱ paloma ja̱a̱nꞌ ki̱ꞌe̱, ndisu̱ nï̱ na̱ndi̱koꞌ ka̱ riꞌ nuu̱ꞌ ra̱.
13 Iñu̱ ciento i̱i̱n kuiya̱ ni̱ ku̱miꞌ Noé kii̱ꞌ ni̱ na̱ya̱a̱ nuu̱ꞌ ñu̱ꞌuꞌ i̱i̱n yivi̱ꞌ. Kivi̱ꞌ nu̱uꞌ xaꞌa̱ꞌ yoo̱ꞌ nu̱uꞌ ni̱ nu̱niaꞌ Noé vitu̱ꞌ tunꞌ ndasi xata̱ꞌ tunꞌ ndo̱oꞌ ja̱a̱nꞌ, te̱ ni̱ xi̱ni̱ ra̱ ña̱ xa̱ kuaꞌa̱n nayaaꞌ nuu̱ꞌ ñu̱ꞌuꞌ i̱i̱n yivi̱ꞌ.
14 Te̱ kivi̱ꞌ ña̱ oko̱ uxa̱ xikaꞌ yoo̱ꞌ uvi̱ ndii, ni̱ na̱ya̱a̱ va̱ꞌa̱ xa̱tyiꞌ nuu̱ꞌ ñu̱ꞌuꞌ.
15 Sa̱kanꞌ te̱ ni̱ kaꞌa̱n Ndiosí xiinꞌ Noé ndii:
16 ―Kuaꞌan ke̱ta̱ ti̱xi̱n tunꞌ ndo̱oꞌ ñaa̱ꞌ xiinꞌ ñaꞌ siꞌi u̱nꞌ, xiinꞌ siꞌe̱ u̱nꞌ, xiinꞌ ñaꞌ xa̱nu̱ u̱nꞌ.
17 Ta̱va̱ꞌ tu̱ u̱nꞌ sa̱kuuꞌ ki̱tiꞌ, tiꞌ ñuꞌuꞌ xiinꞌ u̱nꞌ ñaa̱ꞌ: Naa kuuꞌ sa̱a̱, xiinꞌ naa kuuꞌ tiꞌ sakuaꞌnuꞌ ne̱ yivi̱ꞌ, xiinꞌ naa kuuꞌ tiꞌ kañuuꞌ ti̱xi̱n nuu̱ꞌ ñu̱ꞌuꞌ, te̱ kiku̱ sa̱kuuꞌ riꞌ kuꞌu̱n riꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ, te̱ na̱taꞌvi̱ꞌ riꞌ nde̱e̱ ku̱tuꞌ ñu̱ꞌuꞌ i̱i̱n yivi̱ꞌ sa̱a̱ riꞌ ―ni̱ katyi̱ a̱ xiinꞌ ra̱.
18 Sa̱kanꞌ te̱ ni̱ ke̱ta̱ Noé ti̱xi̱n tunꞌ ndo̱oꞌ ja̱a̱nꞌ xiinꞌ siꞌe̱ ra̱, xiinꞌ ñaꞌ siꞌi ra̱, xiinꞌ ña̱ siꞌi siꞌe̱ ra̱.
19 Te̱ ni̱ ki̱e̱e̱ tu̱ sa̱kuuꞌ nuu̱ꞌ ki̱tiꞌ, tiꞌ ñuꞌuꞌ xiinꞌ ra̱ i̱kanꞌ naa kuuꞌ: Tiꞌ sakuaꞌnuꞌ ne̱ yivi̱ꞌ, xiinꞌ naa kuuꞌ tiꞌ i̱kuꞌ, naa kuuꞌ tiꞌ kañuuꞌ ti̱xi̱n, xiinꞌ naa kuuꞌ tiꞌ taꞌnuꞌ.
20 Te̱ ni̱ xa̱ꞌa̱ Noé i̱i̱n altar miiꞌ na̱soko̱ꞌ ra̱ ki̱tiꞌ nuu̱ꞌ Yahvé Ndiosí, te̱ ni̱ ki̱ꞌi̱n ra̱ sa̱kuuꞌ nuu̱ꞌ tiꞌ va̱ꞌa̱ na̱soko̱ꞌ e̱ꞌ, xiinꞌ sa̱kuuꞌ nuu̱ꞌ tu̱ sa̱a̱, tiꞌ va̱ꞌa̱ na̱soko̱ꞌ e̱ꞌ, te̱ ni̱ na̱soko̱ꞌ ra̱ riꞌ nuu̱ꞌ Ndiosí.
21 Te̱ ni̱ kaꞌa̱n Yahvé Ndiosí kii̱ꞌ ni̱ xa̱a̱ xiko̱ xavixínꞌ xa̱va̱ꞌa̱ ja̱a̱nꞌ nuu̱ꞌ a̱ ndii:
―Nde̱e̱ i̱i̱n kivi̱ꞌ sä̱na̱tyaꞌanꞌ ka̱ i̱ ñu̱ꞌuꞌ i̱i̱n yivi̱ꞌ xaꞌa̱ꞌ ku̱a̱tyi̱ ne̱ yivi̱ꞌ, tee̱ꞌ ndee xa̱ nuu̱ꞌ ña̱ ni̱a̱ꞌa kuni sa̱a̱ ni̱a̱ nde̱e̱ kii̱ꞌ kualiꞌ ni̱a̱. Te̱ ni̱ nde̱e̱ sä̱ndo̱ñuꞌuꞌ ka̱ tu̱ i̱ nde̱e̱ i̱i̱n nuu̱ꞌ ña̱ tiaku naa ni̱ xa̱a̱ i̱ vi̱ti̱n.
22 Ña̱ kuuꞌ saaꞌ kanduꞌu̱ꞌ ka̱ ñu̱ꞌuꞌ i̱i̱n yivi̱ꞌ ndii, kuaꞌa̱n na kuaꞌa̱n ne̱ yivi̱ꞌ ña̱ tyi̱ꞌi̱ ni̱a̱ ña̱ꞌa̱, xiinꞌ ña̱ na̱ka̱ya̱ ni̱a̱ ña̱ saviꞌ, ña̱ ko̱o̱ ña̱ i̱ꞌniꞌ xiinꞌ ña̱ ko̱o̱ ña̱ vi̱xi̱n, ña̱ ko̱o̱ yoo̱ꞌ vi̱xi̱n, xiinꞌ yoo̱ꞌ i̱ꞌniꞌ, ña̱ ko̱o̱ kivi̱ꞌ, te̱ ko̱o̱ tu̱ ñu̱u ―ni̱ katyi̱ a̱.