So̱ꞌo̱ ni̱ ndo̱ꞌo̱ Caín xiinꞌ ña̱ni̱ ra̱ Abel
4
Adán xiinꞌ ñaꞌ siꞌi ra̱ Eva ndii, ni̱ kixi̱n xiinꞌ taꞌanꞌ ni̱a̱, te̱ ni̱ na̱ku̱i̱so̱ aꞌ, te̱ ni̱ sa̱kakuꞌ aꞌ Caín. Te̱ ni̱ kaꞌa̱n aꞌ ndii:
―Xa̱ yoo i̱i̱n tiaa̱ siꞌe̱ i̱, Yahvé Ndiosí ni̱ ta̱xi̱ ra̱ nda̱ꞌaꞌ i̱ ―ni̱ katyi̱ aꞌ.
2 Ni̱ yaꞌa̱ te̱ ni̱ sa̱kakuꞌ aꞌ Abel, ña̱ni̱ Caín ja̱a̱nꞌ. Te̱ Abel ndii, te̱ xitoꞌ mbe̱e̱ ni̱ nduu̱ ra̱, te̱ Caín ndii, te̱ xatyuunꞌ xaꞌa̱ꞌ kuꞌu̱ ni̱ nduu̱ ra̱.
3 Ni̱ yaꞌa̱ kivi̱ꞌ, te̱ ni̱ ki̱xi̱n na̱soko̱ꞌ Caín nuu̱ꞌ Yahvé Ndiosí ña̱ ni̱ tyi̱ꞌi̱ ra̱.
4 Te̱ ni̱ ki̱xi̱n na̱soko̱ꞌ tu̱ Abel nuu̱ꞌ Yahvé Ndiosí, siꞌe̱ nu̱uꞌ mbe̱e̱ sana̱ ra̱, tiꞌ xa̱ꞌan va̱. Te̱ ni̱ xta̱ni̱ va̱ Yahvé Ndiosí ña̱ ni̱ xa̱a̱ Abel, te̱ ni̱ xta̱ni̱ tu̱ a̱ ña̱ ni̱ na̱soko̱ꞌ ra̱ nuu̱ꞌ a̱,
5 ndisu̱ nï̱ xta̱ni̱ a̱ ña̱ ni̱ xa̱a̱ Caín ni̱ nde̱e̱ ña̱ ni̱ na̱soko̱ꞌ ra̱. Xaꞌa̱ꞌ a̱ ja̱a̱nꞌ na ni̱ na̱saa̱ꞌ va̱ ra̱, te̱ ki̱ni̱ va̱ ni̱ na̱ko̱to̱ꞌni̱ ra̱.
6 Sa̱kanꞌ te̱ ni̱ kaꞌa̱n Yahvé Ndiosí xiinꞌ Caín ndii:
―¿Ndiotyun na xiꞌé ni̱a̱ u̱nꞌ, te̱ ki̱ni̱ va̱ tu̱ ni̱ na̱ko̱to̱ꞌni̱ u̱nꞌ?
7 Naaꞌ ña̱ va̱ꞌa̱ xaaꞌ u̱nꞌ ndii na̱ti̱i̱n e̱ꞌ e̱, ndisu̱ naaꞌ ña̱ vä̱ꞌa̱ xaaꞌ u̱nꞌ ndii, xa̱ yoo tu̱ꞌva̱ ku̱a̱tyi̱ te̱ ka̱nandoo a̱ yoꞌó, nde̱e̱ sa̱a̱ ka̱ ni̱ ndii, yoꞌó kumiꞌ ndi̱e̱e̱ꞌ te̱ ka̱nandoo u̱nꞌ nuu̱ꞌ ku̱a̱tyi̱ ja̱a̱nꞌ naaꞌ kuní u̱nꞌ ―ni̱ katyi̱ a̱ xiinꞌ ra̱.
8 Untaꞌ ni̱ kaꞌa̱n Caín xiinꞌ ña̱ni̱ ra̱ Abel ndii:
―Toꞌo̱ꞌ kuꞌu̱n ka̱ka̱ sii̱ꞌ e̱ꞌ xaꞌa̱ꞌ kuꞌu̱ ―ni̱ katyi̱ ra̱.
Te̱ kii̱ꞌ ñuꞌuꞌ ra̱ xaꞌa̱ꞌ kuꞌu̱ ndii, ni̱ ku̱tunꞌ uꞌvi̱ va̱ Caín ña̱ni̱ ra̱ Abel ja̱a̱nꞌ nde̱e̱ ni̱ xa̱ꞌni̱ꞌ ña̱ꞌaꞌ ra̱.
9 Sa̱kanꞌ te̱ ni̱ kaꞌa̱n Yahvé Ndiosí xiinꞌ Caín ndii:
―¿Miiꞌ kuaꞌa̱n ña̱ni̱ u̱nꞌ Abel? ―ni̱ katyi̱ a̱ xiinꞌ ra̱.
Te̱ ni̱ na̱ku̱i̱i̱n ra̱ ndii:
―Xïní i̱, ¿ñáá tuu u̱nꞌ ndii, yuꞌu̱ nduuꞌ te̱ kuní a̱ ko̱to̱ ña̱ni̱ i̱ ja̱a̱nꞌ? ―ni̱ katyi̱ ra̱.
10 Te̱ ni̱ kaꞌa̱n Ndiosí xiinꞌ ra̱ ndii:
―¿Yo̱o̱ nduuꞌ a̱ ni̱ xa̱a̱ u̱nꞌ?, ku̱ni̱ so̱ꞌo̱ u̱nꞌ, sa̱kanꞌ ña̱ tatyi̱ꞌ níiꞌ ña̱ni̱ u̱nꞌ ndii, nde̱e̱ nuu̱ꞌ ñu̱ꞌuꞌ tiakú kaꞌán ndaꞌvi tiꞌeꞌ a̱ xiinꞌ i̱ ña̱ sa̱ndutuꞌ nda̱ku i̱ kuenta xaꞌa̱ꞌ ku̱a̱tyi̱ ña̱ ni̱ xa̱a̱ u̱nꞌ.
11 Xaꞌa̱ꞌ a̱ ja̱a̱nꞌ na sa̱na̱tyaꞌanꞌ i̱ yoꞌó, te̱ xta̱ꞌniꞌ i̱ yoꞌó nuu̱ꞌ ñu̱ꞌuꞌ yoꞌoꞌ, ña̱ ni̱ xi̱ꞌi̱ níiꞌ ña̱ni̱ u̱nꞌ, te̱ ni̱ xa̱ꞌni̱ꞌ u̱nꞌ ja̱a̱nꞌ.
12 Kii̱ꞌ sa̱tyuunꞌ u̱nꞌ nuu̱ꞌ ñu̱ꞌuꞌ ndii, köo̱ꞌ ka̱ ña̱ saviꞌ ta̱xi̱ a̱ nda̱ꞌaꞌ u̱nꞌ, te̱ ka̱ka̱ ndo̱so̱ꞌ i̱i̱n yivi̱ꞌ ku̱i̱ti̱ꞌ ku̱ndu̱u̱ u̱nꞌ nuu̱ꞌ ñu̱ꞌuꞌ i̱i̱n yivi̱ꞌ, te̱ köo̱ꞌ kivi̱ꞌ ku̱nduꞌu̱ꞌ i̱i̱n xaanꞌ u̱nꞌ ―ni̱ katyi̱ a̱.
13 Sa̱kanꞌ te̱ ni̱ kaꞌa̱n Caín xiinꞌ Yahvé Ndiosí ndii:
―Tyié va̱ tu̱ndoꞌo̱ꞌ taxiꞌ u̱nꞌ ku̱ndo̱ꞌo̱ i̱, kü̱ndi̱e̱ni yuꞌu̱ nuu̱ꞌ ña̱ ja̱a̱nꞌ.
14 Vi̱ti̱n ndii, ni̱ xta̱ꞌniꞌ u̱nꞌ yuꞌu̱ nuu̱ꞌ ñu̱ꞌuꞌ yoꞌoꞌ, te̱ ku̱ndu̱u̱ i̱ te̱ ka̱ka̱ ndo̱so̱ꞌ nuu̱ꞌ ñu̱ꞌuꞌ i̱i̱n yivi̱ꞌ, te̱ ku̱ndu̱u̱ tu̱ i̱ te̱ xikaꞌ xinuꞌ nuu̱ꞌ u̱nꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ nde̱e̱ naa te̱ tukuꞌ. Te̱ kii̱ꞌ na̱taꞌanꞌ yo̱o̱ ka̱ xiinꞌ i̱ ndii, ka̱ꞌni̱ꞌ ra̱ yuꞌu̱ ―ni̱ katyi̱ ra̱.
15 Te̱ ni̱ kaꞌa̱n Yahvé Ndiosí xiinꞌ ra̱ ndii:
―Kuäsa̱ꞌ xa̱tyiꞌ sa̱kanꞌ ranꞌ, sa̱kanꞌ ña̱ yo̱o̱ ka̱ ka̱ꞌni̱ꞌ yoꞌó ndii, uxa̱ taꞌan i̱tyiꞌ ka̱ sa̱ndoꞌoꞌ ña̱ꞌaꞌ i̱ ―ni̱ katyi̱ a̱.
Te̱ ni̱ tyi̱nduꞌu̱ꞌ Yahvé Ndiosí i̱i̱n tuni̱ i̱i̱nꞌ Caín, sa̱kanꞌ te̱ yo̱o̱ ka̱ na̱taꞌanꞌ xiinꞌ ra̱ ndii, kä̱ꞌni̱ꞌ ña̱ꞌaꞌ ra̱.
16 Sa̱kanꞌ te̱ ni̱ ke̱ta̱ Caín miiꞌ ni̱ ii̱n ra̱ ndatuꞌunꞌ ra̱ xiinꞌ Yahvé Ndiosí, te̱ kuaꞌa̱n ku̱nduꞌu̱ꞌ ra̱ i̱i̱n xaanꞌ miiꞌ naniꞌ Nod, xtoꞌniꞌ miiꞌ kuaxi̱ ke̱ta̱ ñu̱ꞌu̱ xi̱i̱nꞌ ña̱ nduuꞌ Edén.
Yoꞌoꞌ kaꞌán xaꞌa̱ꞌ ne̱ i̱tyiꞌ Caín
17 Te̱ ni̱ kixi̱n Caín xiinꞌ ñaꞌ siꞌi ra̱, te̱ ni̱ na̱ku̱i̱so̱ aꞌ, te̱ ni̱ sa̱kakuꞌ aꞌ Enoc, te̱ ni̱ tyi̱ka̱nduꞌu̱ꞌ ra̱ i̱i̱n ñu̱u̱, te̱ ni̱ tyi̱nduꞌu̱ꞌ ra̱ kivi̱ꞌ a̱ Enoc naa naniꞌ siꞌe̱ ra̱ ja̱a̱nꞌ.
18 Enoc ja̱a̱nꞌ ni̱ nduu̱ yu̱vaꞌ Irad, Te̱ Irad ja̱a̱nꞌ ni̱ nduu̱ yu̱vaꞌ Mehujael, te̱ Mehujael ja̱a̱nꞌ ni̱ nduu̱ yu̱vaꞌ Metusael, te̱ Metusael ja̱a̱nꞌ ni̱ nduu̱ yu̱vaꞌ Lamec.
19 Te̱ Lamec ja̱a̱nꞌ ndii, uvi̱ taꞌan ñaꞌ siꞌi ra̱ ni̱ yoo̱, i̱i̱n aꞌ ni̱ na̱niꞌ Ada, te̱ i̱nga̱ aꞌ ni̱ na̱niꞌ Zila.
20 Ada ja̱a̱nꞌ ni̱ sa̱kakuꞌ te̱ nduuꞌ Jabal, te̱ te̱ ja̱a̱nꞌ ni̱ nduu̱ te̱ ni̱ xa̱ꞌaꞌ nduꞌu̱ꞌ vi̱ꞌe̱ toto̱, te̱ ni̱ sa̱taꞌvíꞌ tu̱ ra̱ si̱ndiki̱ꞌ.
21 Te̱ ña̱ni̱ ra̱ ndii, Jubal naniꞌ ra̱, te̱ te̱ ja̱a̱nꞌ ni̱ nduu̱ te̱ ni̱ xa̱ꞌaꞌ xandaaꞌ arpa, te̱ ni̱ ti̱vi̱ tu̱ ra̱ tu̱n yoo̱ꞌ.
22 Te̱ i̱nga̱ ña̱ siꞌi ra̱, ñaꞌ naniꞌ Zila ndii, ni̱ sa̱kakuꞌ aꞌ te̱ nduuꞌ Tubal-caín, te̱ te̱ ja̱a̱nꞌ ni̱ nduu̱ te̱ tyu̱u̱n va̱ ni̱ xa̱ꞌaꞌ nu̱uꞌ xatyuunꞌ xiinꞌ ka̱a̱ ña̱ naniꞌ cobre, xiinꞌ ka̱a̱ ndaꞌvi so̱ꞌo̱. Te̱ ni̱ yoo̱ i̱i̱n ñaꞌ taꞌanꞌ Tubal-caín ja̱a̱nꞌ naniꞌ Naama.
23 Te̱ ni̱ kaꞌa̱n Lamec xiinꞌ uvi̱ sa̱aꞌ ñaꞌ siꞌi ra̱ ndii:
―Ada xiinꞌ Zila, ku̱ni̱ so̱ꞌo̱ ndo̱ꞌ yu̱ꞌuꞌ i̱. Ndoꞌó, ñaꞌ siꞌi yuꞌu̱, te̱ nduuꞌ Lamec, ku̱ni̱ so̱ꞌo̱ ndo̱ꞌ ña̱ kaꞌa̱n i̱ xiinꞌ ndo̱ꞌ. Ni̱ xa̱ꞌni̱ꞌ i̱ i̱i̱n te̱ yivi̱ꞌ xaꞌa̱ꞌ a̱ ña̱ ni̱ sa̱tu̱xuꞌví ra̱ yuꞌu̱, te̱ ni̱ xa̱ꞌni̱ꞌ tu̱ i̱ i̱i̱n te̱ sa̱va̱ xaꞌa̱ꞌ a̱ ña̱ ni̱ ku̱u̱n ra̱ yuꞌu̱.
24 Naaꞌ uxa̱ taꞌan i̱tyiꞌ ko̱o̱ i̱i̱n te̱ yivi̱ꞌ tu̱ndoꞌo̱ꞌ naaꞌ ka̱ꞌni̱ꞌ ra̱ Caín ndii, uni̱ xi̱ko̱ xaꞌu̱n uvi̱ i̱tyiꞌ ko̱o̱ i̱i̱n te̱ yivi̱ꞌ tu̱ndoꞌo̱ꞌ naaꞌ ka̱ꞌni̱ꞌ ra̱ yuꞌu̱, Lamec ―ni̱ katyi̱ ra̱.
25 Te̱ ni̱ kixi̱n tu̱ku̱u̱ Adán xiinꞌ ñaꞌ siꞌi ra̱, te̱ ni̱ yoo̱ tu̱ku̱u̱ i̱nga̱ tiaa̱ siꞌe̱ aꞌ, te̱ ni̱ tyi̱nduꞌu̱ꞌ aꞌ kivi̱ꞌ ra̱ Set, sa̱kanꞌ ña̱ kaꞌán aꞌ xiinꞌ miiꞌ mi̱iꞌ aꞌ ndii:
―Ni̱ ta̱xi̱ Ndiosí i̱nga̱ tiaa̱ siꞌe̱ i̱ nda̱ꞌaꞌ i̱ xaꞌa̱ꞌ Abel, te̱ ni̱ xiꞌi̱ ni̱ xa̱a̱ Caín ―ni̱ katyi̱ aꞌ.
26 Te̱ Set ja̱a̱nꞌ ndii, ni̱ yoo̱ i̱i̱n tiaa̱ siꞌe̱ ra̱, te̱ ni̱ tyi̱nduꞌu̱ꞌ ra̱ kivi̱ꞌ te̱ ja̱a̱nꞌ Enós. Te̱ nde̱e̱ kii̱ꞌ sa̱kanꞌ ni̱ xa̱ꞌaꞌ ne̱ yivi̱ꞌ xakaꞌnuꞌ ni̱a̱ Ndiosí.