So̱ꞌo̱ ni̱ xa̱a̱ a̱, te̱ ni̱ xa̱ꞌaꞌ ku̱a̱tyi̱ nuu̱ꞌ ñu̱ꞌuꞌ i̱i̱n yivi̱ꞌ
3
Te̱ koo̱ꞌ nduuꞌ tiꞌ ndityi ka̱ te̱ sa̱kanꞌ sa̱kuuꞌ ki̱tiꞌ, tiꞌ ni̱ xa̱ꞌa̱ Yahvé Ndiosí yoo xaꞌa̱ꞌ kuꞌu̱, sa̱kanꞌ na ni̱ nda̱tuꞌu̱nꞌ riꞌ ña̱ꞌaꞌ ja̱a̱nꞌ ndii:
―¿Ñáá ndi̱xa̱ xna̱ꞌa̱ ndii, ni̱ kaꞌa̱n Ndiosí xiinꞌ ndo̱ꞌ ña̱ kä̱xi̱ꞌ ndo̱ꞌ nduu̱ꞌ ña̱ kuunꞌ nda̱ꞌaꞌ nde̱e̱ i̱i̱n tunꞌ itaꞌ ma̱ꞌiꞌ ña̱ ta̱ta̱ kaa̱ꞌ? ―ni̱ katyi̱ riꞌ.
2 Sa̱kanꞌ te̱ ni̱ na̱ku̱i̱i̱n ñaꞌ ja̱a̱nꞌ ndii:
―Ku̱vi̱ ka̱xi̱ꞌ ndu̱ nduu̱ꞌ ña̱ kuunꞌ nda̱ꞌaꞌ sa̱kuuꞌ tunꞌ ta̱ta̱,
3 ndisu̱ nduu̱ꞌ ña̱ kuunꞌ nda̱ꞌaꞌ tunꞌ iinꞌ ma̱ꞌiꞌ ña̱ ta̱ta̱ ndii, ni̱ kaꞌa̱n Ndiosí xiinꞌ ndu̱ ndii: “Kä̱xi̱ꞌ ndo̱ꞌ nduu̱ꞌ tunꞌ kaa̱ꞌ, ni̱ nde̱e̱ töndi̱a̱ nda̱ꞌaꞌ tu̱ ndo̱ꞌ a̱, sa̱kanꞌ ña̱ naaꞌ sa̱a̱ ndo̱ꞌ ña̱ ja̱a̱nꞌ ndii, ku̱vi̱ ndo̱ꞌ,” ni̱ katyi̱ Ndiosí ―ni̱ katyi̱ aꞌ.
4 Sa̱kanꞌ te̱ ni̱ kaꞌa̱n koo̱ꞌ xiinꞌ ña̱ꞌaꞌ ja̱a̱nꞌ ndii:
―Süu̱ꞌ ña̱ ndi̱xa̱ nduuꞌ ña̱ ja̱a̱nꞌ, kü̱vi̱ xna̱ꞌa̱ ndo̱ꞌ, 
5 süu̱ꞌ ja̱a̱nꞌ ndii, xiní kaxiꞌ Ndiosí ña̱ kivi̱ꞌ ña̱ ka̱xi̱ꞌ ndo̱ꞌ nduu̱ꞌ tunꞌ kaa̱ꞌ ndii, nuni̱a̱ꞌ ndu̱tyiꞌ nuu̱ꞌ ndo̱ꞌ, te̱ ku̱ndu̱u̱ ndo̱ꞌ nde̱e̱ naa mi̱iꞌ Ndiosí xa̱tyiꞌ, te̱ ku̱vi̱ ku̱nda̱ni̱ ndo̱ꞌ ndee ña̱ nduuꞌ ña̱ va̱ꞌa̱, uun ndee ña̱ nduuꞌ ña̱ vä̱ꞌa̱ ―ni̱ katyi̱ riꞌ.
6 Te̱ ni̱ xi̱ni̱ ña̱ꞌaꞌ ja̱a̱nꞌ ña̱ nda̱tu̱nꞌ va̱ nduu̱ꞌ iinꞌ nda̱ꞌaꞌ tunꞌ ja̱a̱nꞌ, sa̱kanꞌ na ni̱ kaꞌa̱n va̱ nimá aꞌ ka̱xi̱ꞌ aꞌ a̱ te̱ ko̱o̱ ña̱ xini tuní aꞌ, sa̱kanꞌ na ni̱ ke̱ndiaa̱ꞌ aꞌ nduu̱ꞌ nda̱ꞌaꞌ nu̱ꞌ, te̱ ni̱ xa̱xi̱ꞌ aꞌ a̱, te̱ ni̱ ta̱xi̱ tu̱ aꞌ ni̱ xa̱xi̱ꞌ i̱i̱ꞌ aꞌ.
7 Xa̱ numi̱ꞌ sa̱kanꞌ, te̱ ni̱ nuni̱a̱ꞌ ndu̱tyiꞌ nuu̱ꞌ uvi̱ sa̱aꞌ ni̱a̱, te̱ ni̱ xi̱ni̱ ni̱a̱ ña̱ yoo i̱i̱nꞌ vityiꞌ ni̱a̱, sa̱kanꞌ na ni̱ ke̱ndiaa̱ꞌ ni̱a̱ yuku̱ tunꞌ ndo̱koꞌ higuera, te̱ ni̱ ti̱saꞌvi̱ xiinꞌ miiꞌ ni̱a̱ xiinꞌ a̱.
8 I̱kanꞌ te̱ ni̱ xi̱ni̱ so̱ꞌo̱ ni̱a̱ tatyi̱ꞌ yu̱ꞌuꞌ Yahvé Ndiosí, ña̱ xikaꞌ sii̱ꞌ a̱ xaꞌa̱ꞌ ña̱ ta̱ta̱, kii̱ꞌ xikaꞌ tatyi̱ꞌ vi̱xi̱n xa̱kuaa̱ꞌ, sa̱kanꞌ te̱ ni̱ ti̱si̱ꞌe ni̱a̱ nuu̱ꞌ Yahvé Ndiosí te̱i̱n i̱tunꞌ xaꞌa̱ꞌ ña̱ ta̱ta̱ ja̱a̱nꞌ.
9 Ndisu̱ ni̱ ka̱na̱ Yahvé Ndiosí te̱ yivi̱ꞌ ja̱a̱nꞌ kaꞌán a̱ xiinꞌ ra̱ ndii:
―¿Miiꞌ naá u̱nꞌ? ―ni̱ katyi̱ a̱.
10 Te̱ ni̱ na̱ku̱i̱i̱n ra̱ ndii:
―Ni̱ xi̱ni̱ so̱ꞌo̱ i̱ tatyi̱ꞌ yu̱ꞌuꞌ u̱nꞌ ña̱ xikaꞌ u̱nꞌ xaꞌa̱ꞌ ña̱ ta̱ta̱, te̱ ni̱ yi̱ꞌvi i̱, sa̱kanꞌ ña̱ i̱i̱nꞌ vityiꞌ i̱, sa̱kanꞌ na kuiiꞌ ni̱ ti̱si̱ꞌe i̱ ―ni̱ katyi̱ ra̱.
11 Te̱ ni̱ nda̱tuꞌu̱nꞌ ña̱ꞌaꞌ Ndiosí ndii:
―¿Yo̱o̱ ni̱ kaꞌa̱n xiinꞌ u̱nꞌ ña̱ i̱i̱nꞌ vityiꞌ u̱nꞌ? ¿Ñáá ni̱ xa̱xi̱ꞌ u̱nꞌ nduu̱ꞌ ña̱ iinꞌ nda̱ꞌaꞌ i̱tunꞌ, tunꞌ ni̱ kaꞌa̱n tyuunꞌ i̱ xiinꞌ u̱nꞌ ña̱ kä̱xi̱ꞌ u̱nꞌ u̱n? ―ni̱ katyi̱ a̱ xiinꞌ ra̱.
12 Te̱ ni̱ na̱ku̱i̱i̱n ra̱ ndii:
―Ña̱ꞌaꞌ, ñaꞌ ni̱ ta̱xi̱ u̱nꞌ nda̱ꞌaꞌ i̱ yoꞌoꞌ nduuꞌ ñaꞌ ni̱ ta̱xi̱ nduu̱ꞌ nda̱ꞌaꞌ i̱, te̱ ni̱ xa̱xi̱ꞌ e̱ꞌ e̱ ―ni̱ katyi̱ ra̱.
13 Sa̱kanꞌ te̱ ni̱ kaꞌa̱n Yahvé Ndiosí xiinꞌ ña̱ꞌaꞌ ja̱a̱nꞌ ndii:
―¿Yo̱o̱ nduuꞌ a̱ ni̱ xa̱a̱ u̱nꞌ? ―ni̱ katyi̱ a̱.
Te̱ ni̱ na̱ku̱i̱i̱n aꞌ ndii:
―Koo̱ꞌ ni̱ xi̱ni̱ xaꞌanꞌ yuꞌu̱, te̱ ni̱ xa̱xi̱ꞌ i̱ nduu̱ꞌ kaa̱ꞌ ―ni̱ katyi̱ aꞌ.
14 Te̱ ni̱ kaꞌa̱n Yahvé Ndiosí xiinꞌ koo̱ꞌ ja̱a̱nꞌ ndii:
―Xaꞌa̱ꞌ a̱ ña̱ ni̱ xa̱a̱ u̱nꞌ ña̱ kaa̱ꞌ na nde̱e̱ vi̱ti̱n ndii, sa̱na̱tyaꞌanꞌ yaꞌa̱ ka̱ i̱ yoꞌó te̱ sa̱kanꞌ sa̱kuuꞌ nuu̱ꞌ ki̱tiꞌ i̱kuꞌ xiinꞌ tiꞌ sakuaꞌnuꞌ ne̱ yivi̱ꞌ. Nde̱e̱ vi̱ti̱n ndii, ka̱ñu̱u̱ ti̱xi̱n u̱nꞌ te̱ ka̱ka̱ u̱nꞌ, te̱ xa̱nuu̱ꞌ ñu̱ꞌuꞌ ku̱i̱ti̱ꞌ ka̱xi̱ꞌ u̱nꞌ sa̱kuuꞌ kivi̱ꞌ ña̱ tiaku u̱nꞌ.
15 Te̱ sa̱ku̱nda̱siꞌ taꞌanꞌ i̱ yoꞌó xiinꞌ ña̱ꞌaꞌ ja̱a̱nꞌ, te̱ sa̱kanꞌ tu̱ sa̱ku̱nda̱siꞌ taꞌanꞌ i̱ siꞌe̱ u̱nꞌ xiinꞌ siꞌe̱ ñaꞌ ja̱a̱nꞌ, te̱ i̱i̱n siꞌe̱ ñaꞌ ja̱a̱nꞌ kueꞌni̱ xíniꞌ u̱nꞌ, te̱ yoꞌó ndii, ti̱i̱n nu̱ꞌu̱ u̱nꞌ siꞌndi̱ xaꞌa̱ꞌ ra̱ ―ni̱ katyi̱ a̱.
16 Sa̱kanꞌ te̱ ni̱ kaꞌa̱n tu̱ a̱ xiinꞌ ña̱ꞌaꞌ ja̱a̱nꞌ ndii:
―Nda̱sa̱kuaꞌa̱ꞌ ka̱ i̱ ña̱ uꞌvi̱ ku̱ni̱ u̱nꞌ kii̱ꞌ ndisoꞌ u̱nꞌ, te̱ uꞌvi̱ xa̱va̱ꞌa̱ tu̱ ku̱ni̱ u̱nꞌ kii̱ꞌ sa̱tuví u̱nꞌ siꞌe̱ u̱nꞌ. Te̱ kuni̱ u̱nꞌ ka̱ꞌndi̱a̱ tyuunꞌ u̱nꞌ nuu̱ꞌ i̱i̱ꞌ u̱nꞌ, ndisu̱ te̱ ja̱a̱nꞌ ka̱ꞌndi̱a̱ tyuunꞌ nuu̱ꞌ yoꞌó ―ni̱ katyi̱ a̱.
17 Te̱ ni̱ kaꞌa̱n tu̱ a̱ xiinꞌ te̱ yivi̱ꞌ ndii:
―Xaꞌa̱ꞌ a̱ ña̱ ni̱ ta̱xi̱ so̱ꞌo̱ u̱nꞌ ña̱ ni̱ kaꞌa̱n ñaꞌ siꞌi u̱nꞌ, te̱ ni̱ xa̱xi̱ꞌ u̱nꞌ nduu̱ꞌ ña̱ ndikún nda̱ꞌaꞌ i̱tunꞌ, tunꞌ ni̱ kaꞌa̱n i̱ xiinꞌ ndo̱ꞌ kä̱xi̱ꞌ ndo̱ꞌ nduu̱ꞌ ndii, sa̱na̱tyaꞌanꞌ i̱ ñu̱ꞌuꞌ xaꞌa̱ꞌ ku̱a̱tyi̱ u̱nꞌ ja̱a̱nꞌ, te̱ sa̱tyuunꞌ u̱nꞌ xiinꞌ kuaꞌa̱ꞌ tu̱ndoꞌo̱ꞌ nuu̱ꞌ a̱, te̱ na̱ka̱ya̱ u̱nꞌ ña̱ ka̱xi̱ꞌ u̱nꞌ sa̱kuuꞌ kivi̱ꞌ ña̱ tiaku u̱nꞌ.
18 Te̱ ñu̱ꞌuꞌ ndii, i̱ñu̱ꞌ xiinꞌ ndi̱kiꞌi̱ꞌ ku̱i̱ti̱ꞌ naku̱n nuu̱ꞌ a̱, te̱ yu̱va̱ ku̱i̱ti̱ꞌ naku̱n nuu̱ꞌ a̱ ka̱xi̱ꞌ u̱nꞌ.
19 Te̱ sa̱tyuunꞌ uꞌvi̱ va̱ u̱nꞌ te̱ ka̱xi̱ꞌ u̱nꞌ ña̱ꞌa̱ nde̱e̱ xaa̱ kivi̱ꞌ ña̱ na̱ndu̱u̱ tu̱ku̱u̱ u̱nꞌ ñu̱ꞌuꞌ miiꞌ ni̱ ke̱ta̱ u̱nꞌ, sa̱kanꞌ ña̱ ñu̱ꞌuꞌ ni̱ nduu̱ꞌ u̱nꞌ, te̱ ñu̱ꞌuꞌ ja̱a̱nꞌ na̱ndu̱u̱ tu̱ku̱u̱ u̱nꞌ ―ni̱ katyi̱ a̱.
20 Te̱ Adán ndii, Eva ni̱ tyi̱na̱niꞌ ra̱ ñaꞌ siꞌi ra̱, sa̱kanꞌ ña̱ ñaꞌ ja̱a̱nꞌ nduuꞌ si̱ꞌiꞌ sa̱kuuꞌ ne̱ yivi̱ꞌ i̱i̱n yivi̱ꞌ.
21 Te̱ Yahvé Ndiosí ndii, xiinꞌ i̱i̱nꞌ ki̱tiꞌ ni̱ xa̱ꞌa̱ a̱ toto̱ ku̱i̱ꞌnu̱ te̱ yivi̱ꞌ ja̱a̱nꞌ, xiinꞌ ña̱ ku̱i̱ꞌnu̱ ñaꞌ siꞌi ra̱, te̱ ni̱ sa̱na̱kuiꞌnú ña̱ꞌaꞌ a̱ i̱i̱nꞌ ja̱a̱nꞌ.
22 Sa̱kanꞌ te̱ ni̱ kaꞌa̱n Yahvé Ndiosí ndii:
―Ko̱to̱ ndo̱ꞌ te̱ yivi̱ꞌ ndii, xa̱ ni̱ na̱ndu̱u̱ ra̱ nde̱e̱ naa i̱i̱n yooꞌ, te̱ xa̱ xiní ra̱ nde̱e̱ ña̱ nduuꞌ ña̱ va̱ꞌa̱, uun ña̱ vä̱ꞌa̱, sa̱kanꞌ na vi̱ti̱n ndii, i̱yo̱ ke̱ndiaa̱ꞌ tu̱ ra̱ nduu̱ꞌ tunꞌ taxiꞌ kivi̱ꞌ ñu̱u̱, te̱ ka̱xi̱ꞌ ra̱ a̱, te̱ ku̱ti̱a̱ku̱ ra̱ nde̱e̱ ndiꞌiꞌ ni̱ kivi̱ꞌ ―ni̱ katyi̱ a̱.
23 Sa̱kanꞌ na ni̱ xta̱ꞌniꞌ Yahvé Ndiosí te̱ yivi̱ꞌ ja̱a̱nꞌ xaꞌa̱ꞌ ña̱ ta̱ta̱, ña̱ yoo nuu̱ꞌ Edén ja̱a̱nꞌ, te̱ sa̱tyuunꞌ ra̱ nuu̱ꞌ ñu̱ꞌuꞌ ña̱ ni̱ nduu̱ ra̱ ña̱ nu̱uꞌ.
24 Te̱ kii̱ꞌ ndi̱ꞌi̱ ni̱ xta̱ꞌniꞌ a̱ te̱ yivi̱ꞌ ja̱a̱nꞌ ndii, ni̱ xa̱ta̱ a̱ ndiaꞌviꞌ ña̱ yoo ndi̱xi̱n, ña̱ naniꞌ querubines xi̱i̱nꞌ Edén ja̱a̱nꞌ, xtoꞌniꞌ miiꞌ ketaꞌ ñu̱ꞌu̱, te̱ ni̱ xa̱ni̱ tu̱ a̱ i̱i̱n ityi̱ nii̱ꞌ ndatin i̱kanꞌ, te̱ taxiꞌ tivi̱ ña̱ ja̱a̱nꞌ sa̱a̱ kuaꞌa̱n, te̱ täxiꞌ a̱ xkaꞌndi̱a̱ ne̱ ja̱a̱nꞌ i̱tyiꞌ, ña̱ kuaꞌa̱n miiꞌ iinꞌ tunꞌ taxiꞌ kivi̱ꞌ ñu̱u̱ ja̱a̱nꞌ.
