2
Sa̱kanꞌ ni̱ xa̱a̱ a̱, te̱ ni̱ xinu̱ ña̱ ni̱ ku̱a̱ꞌa̱ ndi̱viꞌ xiinꞌ ñu̱ꞌuꞌ i̱i̱n yivi̱ꞌ xiinꞌ sa̱kuuꞌ ña̱ yoo nuu̱ꞌ ña̱ ja̱a̱nꞌ.
2 Te̱ kii̱ꞌ ni̱ xa̱a̱ kivi̱ꞌ ña̱ uxa̱ ndii, xa̱ ni̱ sa̱ndiꞌiꞌ Ndiosí sa̱kuuꞌ tyu̱u̱n nuu̱ꞌ a̱, te̱ ni̱ na̱ndiee̱ꞌ a̱ kivi̱ꞌ ja̱a̱nꞌ nuu̱ꞌ sa̱kuuꞌ tyu̱u̱n ña̱ ni̱ xa̱a̱ a̱ ja̱a̱nꞌ.
3 Te̱ ni̱ sa̱ñuꞌuꞌ Ndiosí kivi̱ꞌ ña̱ uxa̱ ja̱a̱nꞌ, te̱ ni̱ sa̱na̱nduuꞌ tu̱ a̱ kivi̱ꞌ ja̱a̱nꞌ ndi̱ti̱a̱ a̱, sa̱kanꞌ ña̱ kivi̱ꞌ ja̱a̱nꞌ ni̱ na̱ndiee̱ꞌ a̱ nuu̱ꞌ sa̱kuuꞌ tyu̱u̱n ña̱ ni̱ xa̱ꞌa̱ a̱ sa̱kuuꞌ ña̱ yoo.
So̱ꞌo̱ ni̱ xa̱a̱ a̱ kii̱ꞌ ni̱ xa̱ꞌa̱ Ndiosí tiaa̱ xiinꞌ ña̱ꞌaꞌ
4 So̱ꞌo̱ ni̱ xa̱a̱ a̱ kii̱ꞌ ni̱ ku̱a̱ꞌa̱ ndi̱viꞌ xiinꞌ ñu̱ꞌuꞌ i̱i̱n yivi̱ꞌ. Kii̱ꞌ ni̱ xa̱ꞌa̱ Yahvé Ndiosí ñu̱ꞌuꞌ i̱i̱n yivi̱ꞌ, xiinꞌ ndi̱viꞌ ndii,
5 tiäꞌa̱an naku̱n nde̱e̱ i̱i̱n kuꞌu̱ xiti̱nꞌ, ni̱ nde̱e̱ i̱i̱n i̱nga̱ nuu̱ꞌ ña̱ ta̱ta̱, sa̱kanꞌ ña̱ Yahvé Ndiosí ndii, tiäꞌa̱an sa̱kuunꞌ a̱ savi̱ꞌ nuu̱ꞌ ñu̱ꞌuꞌ i̱i̱n yivi̱ꞌ, te̱ ni̱ nde̱e̱ tiäꞌa̱an ko̱o̱ tu̱ te̱ yivi̱ꞌ, te̱ sa̱tyuunꞌ ra̱ nuu̱ꞌ ñu̱ꞌuꞌ ja̱a̱nꞌ,
6 süu̱ꞌ ja̱a̱nꞌ ndii, nuu̱ꞌ ñu̱ꞌuꞌ ni̱ xi̱xi̱n ti̱kui, te̱ ni̱ koso̱ raꞌ ka̱niiꞌ nuu̱ꞌ ñu̱ꞌuꞌ ja̱a̱nꞌ.
7 Sa̱kanꞌ te̱ ni̱ xa̱ꞌa̱ Yahvé Ndiosí i̱i̱n tiaa̱ xiinꞌ ñu̱ꞌuꞌ ki̱xinꞌ, te̱ ni̱ ti̱vi̱ a̱ xiti̱nꞌ ra̱ xiinꞌ tatyi̱ꞌ, ña̱ taxiꞌ ña̱ ku̱ti̱a̱ku̱ ra̱, te̱ ni̱ na̱ndu̱u̱ ra̱ i̱i̱n te̱ yivi̱ꞌ tiaku.
8 Te̱ ni̱ tyi̱ꞌi̱ Yahvé Ndiosí ña̱ ta̱ta̱ i̱i̱n xaanꞌ miiꞌ naniꞌ Edén, ña̱ kanduꞌu̱ꞌ xtoꞌniꞌ miiꞌ ketaꞌ ñu̱ꞌu̱, te̱ i̱kanꞌ ni̱ tyi̱nduꞌu̱ꞌ a̱ te̱ yivi̱ꞌ, te̱ ni̱ xa̱ꞌa̱ a̱ ja̱a̱nꞌ.
9 Sa̱kanꞌ te̱ ni̱ sa̱nakún Yahvé Ndiosí sa̱kuuꞌ nuu̱ꞌ i̱tunꞌ nda̱tu̱nꞌ va̱, tunꞌ kuunꞌ nduu̱ꞌ vixi̱ asi̱nꞌ va̱ nda̱ꞌaꞌ, ña̱ va̱ꞌa̱ ka̱xi̱ꞌ e̱ꞌ, te̱ ma̱ꞌiꞌ ña̱ ta̱ta̱ ja̱a̱nꞌ iinꞌ tu̱ tunꞌ kuunꞌ nduu̱ꞌ ña̱ taxiꞌ ña̱ ku̱ti̱a̱ku̱ e̱ꞌ naaꞌ ka̱xi̱ꞌ e̱ꞌ e̱, te̱ i̱kanꞌ iinꞌ tu̱ tunꞌ taxiꞌ ña̱ ku̱nda̱ni̱ e̱ꞌ ndee ña̱ nduuꞌ ña̱ va̱ꞌa̱, uun ndee ña̱ nduuꞌ ña̱ vä̱ꞌa̱.
10 Te̱ nde̱e̱ Edén ja̱a̱nꞌ ni̱ ka̱ꞌndi̱ i̱i̱n i̱ti̱a̱ ña̱ ni̱ koso̱ ña̱ ta̱ta̱ ja̱a̱nꞌ, te̱ i̱kanꞌ ni̱ na̱taꞌvi̱ꞌ tu̱ ku̱miꞌ taꞌan nda̱ꞌaꞌ a̱.
11 I̱i̱n a̱ naniꞌ Pisón, ña̱ ja̱a̱nꞌ ndii, xkaꞌndíá ya̱kuaꞌ a̱ ka̱niiꞌ nuu̱ꞌ ñu̱ꞌuꞌ Havila, miiꞌ yoo oro.
12 Te̱ oro, ña̱ yoo i̱kanꞌ ndii, ña̱ va̱ꞌa̱ va̱ nduuꞌ a̱, te̱ yoo tu̱ su̱xa̱ xavixínꞌ xa̱va̱ꞌa̱, xiinꞌ yuu̱ꞌ nda̱tu̱nꞌ ña̱ naniꞌ ónice i̱kanꞌ.
13 Te̱ i̱ti̱a̱ ña̱ uvi̱ ndii, Gihón naniꞌ a̱, te̱ ña̱ ja̱a̱nꞌ ndii, xkaꞌndíá ya̱kuaꞌ a̱ ka̱niiꞌ nuu̱ꞌ ñu̱ꞌuꞌ Cus.
14 Te̱ i̱ti̱a̱ ña̱ uni̱ ndii, Tigris naniꞌ a̱, te̱ ña̱ ja̱a̱nꞌ ndii, xkaꞌndíá a̱ nuu̱ꞌ ñu̱ꞌuꞌ Asiria, xtoꞌniꞌ miiꞌ ketaꞌ ñu̱ꞌu̱. Te̱ i̱ti̱a̱ ña̱ ku̱miꞌ ndii, Éufrates naniꞌ a̱.
15 Sa̱kanꞌ te̱ ni̱ ki̱ꞌi̱n Yahvé Ndiosí, te̱ yivi̱ꞌ, te̱ ni̱ xa̱ꞌa̱ a̱ ja̱a̱nꞌ, te̱ ni̱ tyi̱nduꞌu̱ꞌ ña̱ꞌaꞌ a̱ xaꞌa̱ꞌ ña̱ ta̱ta̱, ña̱ kanduꞌu̱ꞌ miiꞌ naniꞌ Edén ja̱a̱nꞌ, te̱ sa̱tyuunꞌ ra̱ xaꞌa̱ꞌ a̱, te̱ ko̱to̱ tu̱ ra̱ a̱.
16 Te̱ ni̱ kaꞌa̱n tyuunꞌ Yahvé Ndiosí xiinꞌ te̱ yivi̱ꞌ ja̱a̱nꞌ ndii:
―Ku̱vi̱ ka̱xi̱ꞌ u̱nꞌ nduu̱ꞌ ña̱ kuunꞌ nda̱ꞌaꞌ sa̱kuuꞌ tunꞌ itaꞌ xaꞌa̱ꞌ ña̱ ta̱ta̱ kaa̱ꞌ,
17 ndisu̱ kä̱xi̱ꞌ u̱nꞌ nduu̱ꞌ ña̱ kuunꞌ nda̱ꞌaꞌ tunꞌ taxiꞌ ña̱ ku̱nda̱ni̱ u̱nꞌ ndee ña̱ nduuꞌ ña̱ va̱ꞌa̱, uun ndee ña̱ nduuꞌ ña̱ vä̱ꞌa̱, sa̱kanꞌ ña̱ kivi̱ꞌ ña̱ ka̱xi̱ꞌ u̱nꞌ u̱n ndii, ku̱vi̱ xna̱ꞌa̱ u̱nꞌ ―ni̱ katyi̱ a̱.
18 Te̱ ni̱ kaꞌa̱n Yahvé Ndiosí ndii:
―Vä̱ꞌa̱ yoo a̱ ña̱ xikaꞌ i̱i̱n nda̱a̱ꞌ te̱ yivi̱ꞌ, va̱ꞌa̱ ka̱ ka̱sa̱ꞌa̱ i̱ i̱i̱n ña̱ꞌaꞌ, ñaꞌ nakuitá xiinꞌ ra̱ te̱ tyi̱ndi̱e̱eꞌ aꞌ ra̱ sa̱a̱ kuní a̱ ―ni̱ katyi̱ a̱.
19 Sa̱kanꞌ te̱ ni̱ ki̱ꞌi̱n Yahvé Ndiosí ñu̱ꞌuꞌ ki̱xinꞌ, te̱ ni̱ xa̱ꞌa̱ a̱ sa̱kuuꞌ nuu̱ꞌ ki̱tiꞌ, xiinꞌ sa̱kuuꞌ nuu̱ꞌ tiꞌ taꞌnuꞌ ndi̱viꞌ, te̱ ni̱ xaꞌa̱n ndi̱a̱ka̱ a̱ riꞌ nuu̱ꞌ Adán, te̱ ku̱ni̱ ra̱ sa̱a̱ ku̱na̱niꞌ riꞌ sa̱a̱ ra̱, te̱ xa̱ kivi̱ꞌ sa̱kuuꞌ tiꞌ ja̱a̱nꞌ, ña̱ ni̱ tyi̱nduꞌu̱ꞌ Adán ja̱a̱nꞌ ni̱ ndoo̱ nduuꞌ kivi̱ꞌ riꞌ.
20 Te̱ ni̱ tyi̱nduꞌu̱ꞌ Adán kivi̱ꞌ sa̱kuuꞌ tiꞌ i̱kuꞌ, xiinꞌ sa̱kuuꞌ sa̱a̱, xiinꞌ sa̱kuuꞌ tiꞌ ta̱ta̱, tiꞌ yoo i̱i̱n yivi̱ꞌ, ndisu̱ nde̱e̱ i̱i̱n tiꞌ ja̱a̱nꞌ nï̱ nakuitá xiinꞌ te̱ ja̱a̱nꞌ, te̱ tyi̱ndi̱e̱eꞌ ña̱ꞌaꞌ riꞌ sa̱a̱ kuní a̱.
21 Sa̱kanꞌ te̱ ni̱ sa̱kusún xiꞌí xa̱tyiꞌ Yahvé Ndiosí Adán, te̱ kii̱ꞌ kixín ra̱ ndii, ni̱ xta̱ꞌniꞌ a̱ i̱i̱n i̱kiꞌ ndikaꞌ ra̱, te̱ xiinꞌ ku̱ñu̱ ni̱ nda̱si̱ a̱ yavi̱ miiꞌ ni̱ xta̱ꞌniꞌ a̱ i̱kiꞌ ndikaꞌ ra̱ ja̱a̱nꞌ.
22 Te̱ xiinꞌ i̱kiꞌ ndikaꞌ te̱ yivi̱ꞌ ja̱a̱nꞌ, ña̱ ni̱ xta̱ꞌniꞌ Yahvé Ndiosí, ni̱ xa̱ꞌa̱ a̱ i̱i̱n ña̱ꞌaꞌ, te̱ ni̱ ki̱xi̱n ndi̱a̱ka̱ ña̱ꞌaꞌ a̱ nuu̱ꞌ ra̱.
23 Sa̱kanꞌ te̱ ni̱ kaꞌa̱n tiꞌeꞌ Adán ndii:
―Vi̱ti̱n ndii, ñaꞌ kaa̱ꞌ nduuꞌ xna̱ꞌa̱ i̱kiꞌ mi̱iꞌ i̱ xiinꞌ ku̱ñu̱ mi̱iꞌ i̱, te̱ ña̱ꞌaꞌ ku̱na̱niꞌ aꞌ, sa̱kanꞌ ña̱ i̱ni̱ tiaa̱ ni̱ ke̱ta̱ aꞌ ―ni̱ katyi̱ ra̱.
