Andivi saa xiꞌin nuꞌu saa
21
Xini da en andivi saa xiꞌin en ñuꞌu saa; kuan andivi diꞌna xiꞌin ñuꞌu diꞌna yaꞌia, san mar ti ío ka. 2 Dan Juan xini da ñuu ii, sa kuu Jerusalén saa, noo sa io Ndios, sa io listo kuenta en ñadeꞌe sa ndukutu xiꞌin sa io listo sa tandaꞌa xiꞌin xee xi. 3 San tsáku d̶a sa niꞌi ntseꞌe kaꞌan en tsa kaꞌan andivi san kachi:—Xini yo ña, adi s-tabernaculo Ndios ya yaꞌa sa koo ia xiꞌin ndidaa ñayii, koo ia sa io tsa ndidaa tsa; san ndidaa tsa ku kuu ñayii xuun ia, san mee ia ku kuu Ndios ndidaa ñayii yaꞌa. 4 Ndadayichi ia ndutsa jnu tsa ndidaa tsa; san ma en ka kuu, nisa ma en ka ndaꞌyu, nisa ma en ka ta uꞌu, nisa ma en ka kuꞌu xi; kuan ndidaa sa ío diꞌnanuu sa yaꞌia.
5 Danduu ia intsaku trono kachi:
—Xíni yo ña, ntsuꞌu ndidaa ndada saa̱ ntsu.
San kachi ia:
—Chidotuni; kuan ndidaa toꞌon yaꞌa kuu sa ndaa kuiti.
6 Kachi ia d̶a:
—Tuꞌu vita. Ntsuꞌu ku Alfa xiꞌin Omegaa, ntsuꞌu kuu ia duꞌua ni io ntsa diꞌna san ntsuꞌu kuu ia koo ntsaa na ndeꞌe ndidaa. San andu yichi ndutsa, ntsuꞌu kuañaꞌan daa ntsu ndutsa kana sa kuu ndutsa taxi vida. 7 Andu na kadanar san niꞌi ndidaa jaꞌa, san ntsuꞌu ku kuu j-Ndios nu san mee nu ku kuu ku daꞌa ntsu. 8 Doko, ndidaa ñayii nayuꞌu xiꞌin ndidaa ñayii ti xininchisa, ndidaa ñayii kuiꞌia xiꞌin ndidaa ñayii saꞌni ndii, ndidaa ñayii sakoo xiꞌin ñayii ti tandaꞌa xiꞌin, ndidaa ña tata, ndidaa ñayii chiñuꞌu idolo xiꞌin ndidaa ñayii naꞌntsa, ndidaa ñayii yaꞌa niꞌi sa kiꞌin laguna sa xiko ñuꞌu xiꞌin azufre, sa kuu sa xiꞌi ñayii guelta ku uu.
Jerusalén saa
9 Kíxi en ndi usa ángel nundaꞌa ndi usa copa sa ñoꞌon ndi usa sa kida uꞌu xi ñayii. San kachi d̶a:
—Naꞌa jaꞌa, san na dadana ñaꞌan ntsu nu tandaꞌa xiꞌin Corderu.
10 Danduu ángel ntsaka ñaꞌan xi x-espíritu da kuaꞌan en tinduu kaꞌnu xiꞌin duku ntseꞌe, san dadana ñaꞌan ñuu ii kaꞌnu Jerusalén, sa noo sa io Ndios, 11 neꞌe sa sandutsa ia. San diñu kaa naa en yuu xaꞌvi ntseꞌe xi, kuenta yuu nani jaspe, san diñu kuenta vidriu. 12 Sa yekorra ñuu kuaan kaꞌnu ntseꞌe xiꞌin duku ntseꞌe san io uxi-uu ndieꞌe xi; san en en ángel in ndiden en ndieꞌe, san yodotuni ndiden en ndieꞌe kuaan, sa nani ndiden en ndi uxi uu tribu raza Israel. 13 Uni ndieꞌe neꞌe nuu ichi kana ora, uni ndieꞌe neꞌe nuu ichi norte, uni ndieꞌe neꞌe nuu ichi daꞌvi ora xiꞌin uni ndieꞌe neꞌe nuu ichi sur. 14 Sa yekorra kaꞌnu kuaan dama uxi-uu yuu naꞌnu saꞌa xi, san ndiden en yuu kuaan yodotuni sa nani ndi deen en ndi uxi-uu x-apóstol Corderu.
15 Ángel ndatoꞌon xiꞌin da nundaꞌa en ndoo oro sa tekuꞌua ñaꞌan xi ñuu xiꞌin ndidaa ndieꞌe xi xiꞌin sa yekorra. 16 Ñuu kuaan kuu kuadradu kuenta ni ndeka duꞌua ni kani. San ángel kuaan tekuꞌua ñuu xiꞌin ndoo, san kuu uvi mil xiꞌi uvi cientu kilometrub, san sa ndeka xiꞌin sa kani xiꞌin sa duku eni kuu tuku. 17 San tekuꞌua sa yekorra ñuu san kuu unidiko oꞌon metruc, kuan modo tekuꞌua ñayii duꞌua tekuꞌua ángel kuaan tuku.
18 Sa kuguaꞌa xiꞌin sa yekorra ñuu kuaan ku yuu jaspe, doko ñuu kuu menina oro, san diñu kuenta vidriu io ndoo ntseꞌe. 19 Saꞌa sa yekorra ñuu ku kutu xiꞌin yuu xaꞌvi ntseꞌe xi. Diꞌna nuu saꞌa xi kuu yuu jaspe, sa ku uu kuu yuu zafiro, saku uni kuu yuu ágata, sa ku kumi kuu yuu esmeralda, 20 sa ku oꞌon kuu yuu ónice, sa ku iñu kuu yuu cornalina, sa ku usa kuu yuu crisólito, sa ku una kuu yuu berilo, sa ku een kuu yuu topaciu, sa ku uxi kuu yuu crisopraso, sa ku uxi en kuu yuu jacinto, sa ku uxi-uu kuu yuu amatistad. 21 Ndi uxi-uu ndieꞌe ku uxi-uu yuu vili nani perla; ndiden en ndieꞌe kuguaꞌa xiꞌin en yuu vili nani perla. Calle kaꞌnu kuu menina ni oro sa sandutsa kuenta vidriu io ndoo sa tuu kanda enka ladu.
22 Ti xini da ñuu yukua s-templu Ndios, kuan Ndios ia kuu ku Toꞌo ndo ia tastuni ntseꞌe xiꞌin x-Corderu ia kuu s-templu ñuu. 23 Ñuu yaꞌa ti nandeꞌe ka sa koo yoo adi ora sa dayeꞌe kuan sa sandutsa Ndios dayeꞌe, san Corderu kuu sa dayeꞌe xi ñuu ya. 24 Ndidaa ñayii kee ndiden nacion ñayii nanitaꞌvi ndinoo̱ sa dayeꞌe ñuu ya; san ndidaa rey io nuꞌu kunéꞌe ndidaa sa kuika io s-tsa xiꞌin sa kuu tsa san kunéꞌe tsa xi ñuu ya. 25 Ma ndadi ndidaa ndieꞌe xi kuan ma koo niñu. 26 Ndidaa sa kuu xiꞌin sa kuika nacion kiꞌin kuneꞌe ñuu ya. 27 Ma yii nisa en sa kuiꞌia lugar yaꞌa, adi ñayii chiñuꞌu idolo, adi ñayii naꞌntsa, maska sa ndidaa ni ñayii yodotuni tutu natuu sa yodotuni ñayii koo ndidaa tiempu xiꞌin Corderue.