Yutu sañaꞌan ñuyii xi ñayii
22
Danduu ángel dadana ñaꞌan da en yutsa ndoo ntseꞌe kaa, san ñoꞌon ndutsa taxi ñuyii, sandutsa kuenta vidriu, san ntsa sa io s-trono Ndios xiꞌin Corderu kana ndutsa kuaan. 2 San ndutsa xika dagua dagua ichi io ñuu, san en ladu yutsa xiꞌin enka ladu io yutu taxi ñuyii, sa kee uxi-uu kuiꞌi, san ndiden yoo kee x-kuiꞌi xi; san vixi xi kuu sa ndadaguaꞌa ñaꞌan xi ndidaa ñayii io nada taꞌan nadatuꞌu nacion. 3 San juan ma koo sa taꞌnu ntsatu. Kuan S-trono Ndios xiꞌin Corderu koo juan, san ndidaa ñayii xinokuachi kuinokuachi xi ia, 4 san kini ñayii jnu Ndios san sa nani ia kuntsaa s-tsaan ndidaa ñayii yaꞌa. 5 Ma koo ka niñu, san ma nandeꞌe ka sa kuiko kandil, nisa sa dayeꞌe ora, kuan Ndios ia kuu ku Toꞌo ndo dayeꞌe xi ndidaa ñayii; san tastuni tsa ndidaa tsa ndidaa tiempu.Sa ndixi Jesucristu kuyachi
6 Kachi ángel kuaan d̶a:
—Toꞌon yaꞌa kuu sa ndaa xiꞌin sa ndaa, ia kuu ku Toꞌo ndo Ndios, ia tastuni x-espíritu ndidaa profeta, tsandaꞌa ia x-ángel ia, sa na dadana ñaꞌan xi ndidaa tsa xinokuachi xi ia, ndidaa sa sa io vii sa taꞌan.
7 —¡Xini yo ña, sa io vi sa ndij ntsu! Guaꞌadiko ñayii kida sa yodotuni tutu profecía yaꞌa.
San duꞌua xini Juan ndidaa jaꞌa
8 Dan Juan kuu tsa tsaku xi xiꞌin xíni da ndidaa jaꞌa. San kuenta tuꞌu tsaku da xiꞌin xini da ndidaa jaꞌa, sakuixiti da sa nontsayu da ntsa nuꞌu sa chiñuꞌu ñaꞌan da xi ángel, sa dádana ñaꞌan ndidaa jaꞌa da. 9 Doko ángel kuaan kachi d̶a:
—Ñaꞌan, ma duꞌua kada yo; kuan ntsuꞌu xinokuachi ntsu xiꞌin yo xiꞌin ndidaa xani yo profeta, xiꞌin ndidaa ñayii kida sa yodotuni tutu yaꞌa. ¡Chiñuꞌu ñaꞌan xi Ndios!
10 Kachi d̶a tuku:
—Ma nakadi yo xiꞌin sellu tutu yodotuni toꞌon xan, kuan sa io vii sa taꞌan, kuan sa kuyachi ntseꞌe tiempu. 11 Nu kida sa kuiꞌia na kada ka nu sa kuiꞌia. Nu ti io ndo, na kada kuiꞌia ka nu mee nu; san nu kida sa ndaa, na kada ka nu sa ndaa, san nu ndu ii, na ndada ii ka nu mee nu.
12 —Xini yo ña, sa io vi sa ndij ntsu, san kuneꞌe ntsu xaꞌvi ñayii ndixi, sa kuañaꞌan ntsu xi ndiden en ñayii sa saꞌa sa kída ñayii. 13 Ntsuꞌu ku Alfa xiꞌin Omegaa, ntsuꞌu kuu sa duꞌua ni io ntsa diꞌna xiꞌin ntsuꞌu kuu ia koo ntsaa na ndeꞌe ndidaa, ia kuu diꞌnanuu xiꞌin ia kuu danduu.
14 Guaꞌadiko ndidaa ñayii nakatsa d̶oꞌno xi, ndasa na nitaꞌvi tsa sa kaj s-tsa ndidaa tsa kuiꞌi kee yutu taxi ñuyii, xiꞌin na nitaꞌvi tsa sa yii tsa ndidaa tsa ndieꞌe ñuu. 15 Doko ndikeꞌe kendoo ndidaa ina, ndidaa ñatata, ndidaa ñayii sakoo xiꞌin ñayii vita tandaꞌa ka, ndidaa ñayii saꞌni ndii, ndidaa ñayii chiñuꞌu idolo xiꞌin ndidaa ñayii nchoxi xiꞌin kida sa naꞌntsa.
16 —Ntsuꞌu Jesús, tsandaꞌa ntsu ku ángel ntsu ndasa na dadana ñaꞌan ndidaa jaꞌa yo xiꞌin ndidaa x-congregación Ndios. Ntsuꞌu kuu xoꞌob raza rey David sa kendoo, xiꞌin kiti tuu sandutsa.
17 San Espíritu xiꞌin Ña tandáꞌa kachi:
—¡Naꞌa ni!
San andu tsaku xi na kachi:
—Naꞌa ni.
San andu yichi ndutsa, na kixi; sa andu nchu koꞌo ndutsa ya, na koꞌo daa ndutsa taxi ñuyii.
18 Dan kaꞌan da xi ndidaa ñayii nini ndidaa toꞌon yodotuni tutu profecía yaꞌa: Tu andu chidotuni vaa ka sa kaꞌan tutu yaꞌa, Ndios kada ia sa ndidaa sa kida uꞌu yodotuni tutu yaꞌa na taꞌan ñayii duꞌua na kada. 19 Tu andu na dita dakaa sa yodotuni tutu profecía yaꞌa, Ndios dita ia sa niꞌi ñayii sa yodotuni tutu yodotuni ñayii koo ndidaa tiempu xiꞌin ia, xiꞌin dita ia sa niꞌi ñayii yaꞌa ñuu ii xiꞌin ndidaa sa yodotuni tutu yaꞌa.
20 Ia kaꞌan ndidaa jaꞌa kachi:
—Sa io vii sa ndij ntsu.
Duꞌua na kuu; On, naꞌa ni, Toꞌo Jesús.
21 J-gracia ia kuu ku Toꞌo ndo Jesucristu na koo xiꞌin ni ndidaa ni. Duꞌua na kuu.