CARTA CHÍDOTUNI JUDAS
Kada ntse-ini jni ndidaa ni
1
Dan kuu Judas tsa xinokuachi xi Jesucristu xiꞌin tsa kuu xani Santiagu, tsaa da carta yaꞌa xi ndidaa ñayii kána Ndios, ñayii ndada ii Ndios ia kuu ku Tata ndo, xiꞌin ñayii xito Jesucristu: 2 na taxi ia ndidaa sa kunda-ini ia, sa xinimani ia xiꞌin toꞌon kaꞌnu-ini jni ndidaa ni.Ndidaa sa naꞌntsa dadana ñaꞌan ndidaa tsa naꞌntsa
3 Xanii, ndiꞌi ntseꞌe xanaa da sa tsaa da sa kuu sa nanitaꞌvi io ku ndo ndidaa ndo, san sani-ini da san xika da sa na natavi ni xiꞌin nee xanaa ni sa xininchisa io jni, sa sáñaꞌan eni viaji xi ndidaa ñayii ndáda ii Ndios. 4 Kuan sa io ni ndidaa ni xan kuyii yuꞌu uu ñayii, ñayii nitaꞌvi sa kuita, ñayii kuiꞌia, nadiki ntsaa ni j-gracia ia kuu ku Ndios ndo, san ti na kininchisa tsa ia tastuni ndidaa ndituꞌu sa io, nisa ia kuu ku Toꞌo ndo Jesucristu.
5 Nchu dandaku nituku da jni kuan sa nitoꞌon ni ndidaa ni, na modo kineꞌen Ndios ia kuu ku Toꞌo ndo, xuun ia ñuu Egipto kuaan, san danduu dandeꞌe ia ndidaa ñayii ti xininchisa ñaꞌan xi ia. 6 Duꞌua ni táꞌan ndidaa ángel ti seniꞌno ñaꞌan xi ia, san dandoo ami io, san chintsadi ñaꞌan ia xiti sa naa xi, san yentsadi ndikii, ntsa nasaa kii kaꞌnu kada ia juiciu; 7 duꞌua ni tuku, ma d̶ana ni sa taꞌan ñuu Sodoma xiꞌin Gomorra xiꞌin ndidaa ñuu io yachi, kuan ndidaa ñayii yaꞌa xu kada nadataꞌan nadatuꞌu sa kuiꞌia, ñayii xu koo xiꞌin daguaꞌa kaa nika ñayii, ñayii yaꞌa kída kuaꞌa ntseꞌe sa ti nataꞌan xanaa Ndios, san Ndios dandeꞌe ñaꞌa ia sta ndidaa tsa ndasa duꞌu jaꞌa na dadana ñaꞌa ku ntsoo ndidaa ndo na modo kuu ñuꞌu ti ndaꞌua sa kuu juiciu Ndios.
8 San duꞌua ni kuu ndidaa tsa kuiꞌia io sa io ni xan tuku, danaꞌa s-tsa san kida tsa kuachi xiꞌin xikikoño tsa, san ti na kininchisa tsa sa tastuni Ndios san kaꞌan kuiꞌia tsa xi ndidaa sa tastuni io andivi. 9 Doko arcángel Miguela, kuenta naandodo xikikoño Moisés xiꞌin sakakuiꞌia, ti dakuidokuachi ñaꞌan sa nisa ti kaꞌan kuiꞌia maska sa sadaa: “Ndios na taxi xaꞌvi yo.” 10 Doko ndidaa tsa yaꞌa kaꞌan kuiꞌia tsa xi sa ti xini tsa, san ntsa ndeꞌe sa xini tsa kuan kaꞌan kuiꞌia tsa xi tuku, san kuu tsa kuenta en kititata ti sani-ini.
11 ¡Ndaꞌvi ndidaa tsa yaꞌa! Kuan kida tsa sa kída Cain. Kuenta Balaam, tsa dándaa ñaꞌan xi ñayii sa saꞌa tuini; ndeꞌe ndidaa tsa yaꞌa kuenta ndeꞌe Coré tsa naxikokagua xi Moisés. 12 Ndidaa tsa yaꞌa kuu en sa kida kuiꞌia ñaꞌan jni ndidaa ni, san ora nataka ni sa kaj ni, ndidaa tsa yaꞌa saꞌan ni tsa sa kaj s-tsa san nisa ti kukaꞌan jnu tsa; kuu tsa kuenta viko tsaꞌyu ti neꞌe ndutsa, sa saꞌan ichaꞌa ichukua kida tachi; kuenta yutu ti kee kuiꞌi, sa xíꞌi ntsa xoꞌo xi; 13 Kuu tsa kuenta x-ola naꞌnu mar, sa kineꞌen ti iñu ndidaa sa kuiꞌia kida duꞌua kuu tsa, kuenta chodini ndinoo naꞌa, ndidaa tsa yaꞌa sa ntsatu s-tsa kuu, sa kiꞌin tsa sa naa yavi.
14 San ndidaa toꞌon yaꞌa kuu sa káꞌan Enoc, tsa ku usa ío ntsa kuenta ío Adán, san kachi tsa: “Xíni ntsu kíxi Ndios xiꞌin ndidaa decena mil ángel ndada ii ia, 15 sa ndakakuachi xi ndidaa, xiꞌin sa dakuidokuachi ndidaa ñayii kuiꞌia xiꞌin ndidaa sa kuiꞌia kída tsa ndidaa tsa, xiꞌin ndidaa sa kuiꞌia káꞌan ñayii kuiꞌia yaꞌa xi ia.” 16 Ndidaa tsa yaꞌa meni sa yodondaꞌa tsa ñayii, meni sa nchu naa tsa, san meni sa kuxi mee tsa nduku tsa, guaꞌa ntseꞌe kaꞌan tsa ndasa na dadana tsa ñayii san duꞌua na niꞌi tsa sa nchoj s-tsa.
Guaꞌa ni ndidaa ni
17 Doko dini ndidaa ni vi xanii, nakaꞌan ni ndidaa toꞌon káꞌan ndidaa x-apóstol ku Toꞌo ndo Jesucristu, 18 Kuan xu kachi tsa ndidaa tsa: Ndidaa kii kixi koo ñayii dandaa ñaꞌan, san kada tsa sa kuiꞌia taꞌan xanaa tsa. 19 Ndidaa tsa yaꞌa kuu tsa chodaka sa taꞌantsa dagua ni ndidaa ni. San d̶iki ni mee tsa kida tsa kuan ti io Espíritu Santu s-tsa.
20 Doko dini ndidaa ni vi xanii, kuindaa ni xiꞌin sa xininchisa taxi Ndios jni, san kaꞌan ni xi ia xiꞌin Espíritu Santu, 21 kinimani taꞌan ni xiꞌin sa xinimani taxi Ndios, san kuntsatu ni sa kunda-ini ku toꞌo ndo Jesucristu sa niꞌi ni ñuyii ma ndeꞌe.
22 San ñayii vita tediki ndaa ka, chintsee ñaꞌan ni ndasa na tediki tsa. 23 San uu ka tsa, chintsee ñaꞌan ni s-tsa ndasa max kiꞌin tsa sa uꞌu sa ndaꞌvi; san uu ka tsa kunda-ini ni doko guaꞌa ni, nisa doꞌno níꞌno tsa ma kitu ni.
Na kadakaꞌnu ñaꞌan xi Ndios
24 San sa kuxi Ndios ia tastuni ntseꞌe sa kada sa ma kada ka ni kuachi, xiꞌin sa max ku kuiꞌia ni xiꞌin ndidaa sa kuiꞌia, tastuni ia sa kuiꞌni ntseꞌe ia kuntsaka ñaꞌa ia jni kiꞌin sa dayeꞌe io ia, 25 sa kuxi meni Ndios ia kutuni ntseꞌe xi, ia kuu ku Salvador ndo, na kukaꞌnu na kuduku ia, san sa tastuni xiꞌin sa ntsee, na kuxi ia vita xiꞌin ndidaa tiempu. Duꞌua na kuu.