APOCALIPSIS
Sa nanuu jnu Juan
Sa dadana ñaꞌan Jesucristu xi Juan
1
Jaꞌa kuu sa yeguaꞌa, san Ndios dadana ñaꞌan ia xi Jesucristu ndasa na dadana ñaꞌan ia xi ndidaa tsa xinokuachi xi ia, san tsandaꞌa ia x-ángel ia ndasa na kadaa xi Juan ndidaa sa sa io sa taꞌan, 2 Juan ya káꞌan s-toꞌon Ndios, xiꞌin sa kuu Jesucristu, xiꞌin ndidaa sa xíni tsa.3 Guaꞌadiko ñayii na kaꞌvi xiꞌin ndidaa ñayii sa kunini ndidaa toꞌon yaꞌa kuan sa io sa taꞌan, xiꞌin ñayii kida ndidaa sa yodotuni toꞌon yaꞌa; kuan sa kuyachi kii.
Chidotuni xi ndi usa x-congregación Ndios
4 Dan Juan, chidotuni da xi ndi usa x-congregación Ndios io Asiaa: Gracia xiꞌin sa io kadi na taxi, ia kuu ia kuu̱ xiꞌin ia ndixi, xiꞌin ndi usa Espíritu io jnu trono intsaku ia; 5 xiꞌin Jesucristu tuku ia kaꞌan ndaa, ia tastuni ntseꞌe ka nandoto sa io ndidaa ndii, ia kuu rey kunaꞌnu ntseꞌe ka sa kuxi ndidaa rey io ñuyii ya, ia xinimani ñaꞌan ku ndo, ia dándoo ku kuachi ndo xiꞌin j-niñi ia, 6 san kída ñaꞌan ia ku ndo rey xiꞌin dutu sa kuxi Ndios, ia kuu s-Tata ia; ia yaꞌa na kukaꞌnu xiꞌin na tastuni vita xiꞌin ndidaa tiempu. Duꞌua na kuu.
7 Xini ni ña, ndixi ia xiti viko, san ndidaa ñayii io ñuyii kini ñaꞌan xi ia, ntsa deꞌe tsa sáꞌni ñaꞌan xi ia. San ndidaa raza ñuyii ya ndaꞌyu san ta uꞌu sa saꞌa ia. Jon, duꞌua na kuu.
8 Duꞌua kachi ku Toꞌo ndo ia kuu ku Ndios ndo: “Ntsuꞌu kuu Alfa xiꞌin Omegab, ia taxisaꞌa xiꞌin ia da tuꞌu, ia kuu, ia kuu̱ xiꞌin ia ndixi, ia kuu kida ndidaa ndituꞌu.”
Sa nanuu Cristu xiꞌin gloria ia xi Juan
9 Dan kuu Juan, xani ni ndidaa ni, tsa taꞌan kuenta taꞌan ni ndidaa ni tsa io sa tastuni Ndios ñayii kuenta mee ni ndidaa ni san sa kaꞌnu xanaa Jesucristu io d̶a kuenta io xi mee ni ndidaa ni tuku. Io da isla nani Patmos sa saꞌa sa kaꞌan da s-toꞌon guaꞌa Jesús ia kuu Cristu. 10 X-kiic ia kuu ku Toꞌo ndo duꞌua taꞌan da kida Espíritu Santu, danduu tsaku d̶a sa kaꞌan en tsa kaꞌan ichi sata da kuenta kida en trompeta niꞌi ntseꞌe ndaꞌyu, 11 san kachi:
—Ntsuꞌu kuu Alfa xiꞌin Omega, ia kuu diꞌna xiꞌin ia kuu ultimo. Chidotuni en tutu sa na kini yo, san tsandaꞌa xi ndi usa x-congregación Ndios io Asiad: sa io Efeso, sa io Esmirna, sa io Pergamo, sa io Tiatira, sa io Sardis, sa io Filadelfia xiꞌin sa io Laodicea.
12 San naxikokagua da sa ntsaꞌa da andu ku sa kaꞌan d̶a kuan. San kuenta naxikokagua da, xíni da usa kantileru oro, 13 san dagua dagua ndi usa kantileru xíni da en tsa kaa kuenta kaa ia nduu ñayii ñuyii yaꞌa, san niꞌno ia en doꞌno sa saa ntsa saꞌa ia san yachi yiki nchika ia nuꞌni en cinta oro. 14 Xidi ia kuixi kachi ka, kuenta kaa yuꞌua; san nduchinuu ia kaa kuenta kaa xama ñuꞌu xiko; 15 san saꞌa ia sandutsa kuenta bronce ndu ndoo ntseꞌe, kuenta kaa sa kaniꞌno daa xiti xitu oni xiko kuaꞌa. San s-tachi ia kida kuenta kida sa xika ntseꞌe ndutsa. 16 San ndaꞌa kuaꞌa ia nundaꞌa usa chodini, san xuꞌu ia kee en espada uu jnu xi. San jnu ia kaa kuenta kaa ora ora dayeꞌe ntseꞌe.
17 San kuenta xini da, san ndugua da saꞌa ia san kuenta xiꞌi da. San saki ndodo ñaꞌan ia ndaꞌa kuaꞌa ia d̶a san kachi ia:
—Ma yuꞌu yo. Ntsuꞌu kuu tsa diꞌnanuu xiꞌin tsa danduu; 18 san nchito ntsu, kuan xiꞌi ntsu naku, doko xini ni ña, vita nchito ntsu ndidaa tiempu. Duꞌua na kuu. San ntsuꞌu neꞌe ndaka sa Saꞌni ñaꞌan xiꞌin sa Yeꞌe ndidaa ndii. 19 Chidotuni ndidaa sa xíni yo xiꞌin ndidaa sa kuu, xiꞌin ndidaa sa dika taꞌan. 20 Jaꞌa kuu sa nchukachi sa yedaꞌvi sa kuu ndi usa chodini xini yo sa nu ndaꞌa ku ndaꞌa kuaꞌa ntsu, xiꞌin ndi usa kantileru oro: Ndi usa chodini ya kuu ndidaa ángel ndi usa x-congregación Ndios, san ndi usa kantileru ya kuu ndi usa x-congregación Ndios.