Toꞌon kaꞌan Ndios xi x-congregación ia io Efeso
2
Chidotuni xi ángel io x-congregación Ndios io Efeso: “Duꞌua Kachi ia nu ndaꞌa xiꞌin ndaꞌa kuaꞌa xi ndi usa chodini, ia ndinoo dagua dagua sa io ndi usa kantileru oro: 2 Ntsuꞌu xini ndidaa sa kida yo ndidaa yo, xiꞌin nduku ntsee ntseꞌe yo ndidaa yo sa kidachiion yo xiꞌin sa kaꞌnu xanaa yo; san ti taꞌan-ini yo ndidaa yo ndidaa ñayii kuiꞌia, san xítotuni yo ndidaa yo nu kaꞌan sa kuu tsa tsandaꞌa Jesús san ti kuu nu, san xíni yo ndidaa yo sa kida naꞌntsa nu. 3 San taꞌan ntseꞌe yo, xiꞌin kaꞌnu xanaa yo, san kídachiion ntseꞌe yo ndidaa yo sa saꞌa sa xinimani ñaꞌan yo ndidaa yo ku ntsu, san ti nayúꞌu yo. 4 Doko io en sa dakuidokuachi ñaꞌan ntsu yo ndidaa yo, sa dandoo yo sa xinimani yo diꞌna. 5 Nakaꞌan ndidaa yo ncha xu ku kuu yo antika sa kada yo kuachi. San na ta uꞌu. San kada ndidaa yo sa guaꞌa xu kada yo diꞌna. Kuan tu ñaꞌan sa kij ntsu sa io yo ndidaa yo xan san dita ntsu x-kantileru yo lugar xi, tu ma nata-uꞌu yo ndidaa yo. 6 Doko jaꞌa kuu sa guaꞌa io yo, sa xini uꞌu yo ndidaa yo sa kida ñayii kuu nicolaítas, sa xini uꞌu ntsu tuku. 7 Andu tsaku xi na kada sa kaꞌan Espíritu ya xi ndidaa x-congregación Ndios. Nu na kadanar kuañaꞌan ntsu sa na kaj nu x-kuiꞌi yutu taxi vida, sa in dagua dagua x-paraíso Ndios.”Toꞌon kaꞌan Ndios xi x-congregación sa io Esmirna
8 Chidotuni xi ángel io x-congregación Ndios io Esmirna: “Duꞌua kachi ia kuu diꞌnanuu xiꞌin ia kuu danduu, ia xiꞌi san nandoto: 9 Ntsuꞌu xini ndidaa sa kida yo ndidaa yo, xiꞌin ndidaa sa taꞌan ntseꞌe yo, xiꞌin sakundaꞌvi yo (doko kuika yo ndidaa yo) xiꞌin ndidaa sa dakuidokuachi ñaꞌan duꞌua ndidaa ñayii kaꞌan sa kuu ñuu Israel yo ndidaa yo, san ti kuu nu ndidaa nu maska sa sinagoga Satanas kuu nu ndidaa nu. 10 Ma yuꞌu yo ndidaa yo sa taꞌan yo. Kuan xini ni ña, Satanas chiñaꞌan vekaa yo dagua yo ndasa na kototuni ñaꞌan yo, san taꞌan ntseꞌe yo ndidaa yo uxi kii. Kuin ndaa ndidaa yo ntsa na kuu yo, san ntsuꞌu taj ntsu kuenta premiu corona sa kunchito yo. 11 Andu tsaku xi, na kada sa kaꞌan Espíritu ya xi ndidaa x-congregación Ndios. Ñayii na kadanar, ma kuu ora kuu ñayii guelta ku uu.”a
Toꞌon kaꞌan Ndios xi x-congregación ia io Pergamo
12 Chidotuni xi ángel io x-congregación Ndios io Pergamo: “Duꞌua kachi ia neꞌe machiti deen ntseꞌe io ubi jnu xi: 13 Ntsuꞌu xini ndidaa sa kida yo ndidaa yo, xiꞌin ami io yo kuan io yo ndidaa yo sa io s-trono Satanas. Doko in ntsee yo ndidaa yo xiꞌin sa nani ntsu, san ti dana yo ndidaa yo sa xininchisa ñaꞌan yo ku ntsu, nisa kuenta saꞌni ñaꞌan xi tsa inani Antipas tsa xu kaꞌan ndaa kuan saꞌni ñaꞌan s-tsa sa io yo ndidaa yo xiꞌin sa io Satanas. 14 Doko io en sa dakuidokuachi ñaꞌan ntsu yo ndidaa yo: Sa ñotaꞌan yo xiꞌin semani yo ndidaa yo xiꞌin ñayii dakuaꞌa ñaꞌan sa xu dakuaꞌa ñaꞌan Balaam, tsa xu dakuaꞌa ñaꞌan xi Balac sa na kada tsa sa na kada ñuu Israel kuachi, sa na kaxi ñayii yaꞌa sa doko xi idolo, xiꞌin sa koo ñayii xiꞌin ñayii vita tandaꞌa ka xiꞌin. 15 San duꞌua ni semani yo ndidaa yo ñayii dakuaꞌa ñaꞌan sa dakuaꞌa ñaꞌan ndidaa nicolaítas ndidaa sa ti taꞌan-ini ntsu. 16 Juandiku, nata-uꞌu ndidaa yo. Kuan tu ñaꞌan sa kij ntsu sa io yo ndidaa yo xan san naa ntsu xiꞌin nu ndidaa ni xiꞌin machiti kee ku kiuꞌu ntsu ya. 17 Andu tsaku xi, na kada sa kaꞌan Espíritu ya xi ndidaa x-congregación Ndios. San nu na kadanar san kuañaꞌan ntsu sa kaj nu maná yedaꞌvi, san kuañaꞌan ntsu en yuu kuixi yiki san yuu yiki kuaan kuntsaa en sa saa kunani nu, sa ti xini nisa en ñayii maska sa meni ñayii na niꞌi.”
Toꞌon kaꞌan Ndios xi x-congregación sa io Tiatira
18 Chidotuni xi ángel io x-congregación Ndios io Tiatira: “D̶aꞌa Ndios, ia kuenta ka xama ñuꞌu ka nduchinuu xi xiꞌin ia sandutsa kuenta bronce ndu ndoo ntseꞌe saꞌa xi duꞌua kachi: 19 Xini ntsu ndidaa sa kida yo ndidaa yo, sa xinimani yo ndidaa yo, sa xininchisa yo ndidaa yo, sa xinokuachi yo ndidaa yo xiꞌin sa kaꞌnu xanaa yo, san sa kida yo vita vaaka kuu sa kuxi sa kída yo ndidaa yo diꞌna. 20 Doko io en sa dakuidokuachi ñaꞌan ntsu yo sa kída yo: Sa semani yo ndidaa yo sa nudeꞌe nani Jezabel, nu kaꞌan sa ku profetisa, na dadana ñaꞌan nu xiꞌin na dandaa ñaꞌan nu xi ndidaa nu xinokuachi ku ntsu sa na koo nu xiꞌin ñayii ti tandaꞌa xiꞌin nu xiꞌin sa na kaj nu koño doko xi idolo. 21 Sañaꞌan ntsu tiempu sa na nata-uꞌu nu ndidaa nu, san ti nchu dandoo nu ndidaa nu sa io nu xiꞌin ñayii ti tandaꞌa xiꞌin nu. 22 Xini yo ña, vita kada ntsu sa na ku kagua nu, san ndidaa nu xu chitaꞌan xiꞌin nu, taꞌan ntseꞌe nu tu ma nata-uꞌu nu sa kida nu kuenta nuyaꞌa. 23 San kuiꞌia ntseꞌe kaꞌni ntsu ndidaa d̶aꞌa nu, san ndidaa nu io ndidaa x-congregación Ndios kini sa ntsuꞌu kuu sa xini ndidaa ndi tuꞌu sa sani-ini xiꞌin sa ñoꞌon xanaa ñayii. San ndiden ndiden kuañaꞌan ntsu xaꞌvi xi ndidaa sa kída nu. 24 Doko yoꞌo ndidaa yo xiꞌin ndidaa ka nu io Tiatira, ndidaa nu ti nchiko ndidaa sa kuiꞌia yaꞌa ndidaa sa kaꞌan sa kuu sa yeguaꞌa xi Satanas, ntsuꞌu kachi ntsu: Ti xika ntsu sa na kada yo enka chiion; 25 Maska sa kuin ntsee xiꞌin ndidaa sa xini yo ndidaa yo ntsa na ndij ntsu. 26 San nu na kadanar xiꞌin nu kada sa taꞌvichiion ntsu, ntsa na ndeꞌe ñuyii ntsuꞌu kuañaꞌan ntsu sa na tastuni nu ndidaa ñuu, 27 duꞌua kuenta ku Tata ntsu taxi ia sa tastuni ntsu, duꞌua tastuni nuyaꞌa xiꞌin baston kaab, san taꞌvi nu kuenta taꞌvi ndidaa kidi ñuꞌu; 28 san kuañaꞌan ntsu chodini kana kuiꞌi ka 29 Andu tsaku xi, na kada sa kaꞌan Espíritu ya xi ndidaa x-congregación Ndios.”