Toꞌon kaꞌan Ndios xi x-congregación ia io Sardis
3
Chidotuni xi ángel io x-congregación Ndios io Sardis: “Duꞌu kachi ia neꞌe ndi usa Espíritu Ndios xiꞌin ndi usa chodini: Xini ntsu ndidaa sa kida yo ndidaa yo, kuan nani sa nchito doko xíꞌi yo. 2 Ndikuu xanaa yo ndidaa yo, san na kani ndaa sa sa io sa kuu, kuan ti naniꞌi ntsu sa kida yo sa guaꞌa sani-ini Ndios sa kada yo ndidaa yo. 3 Nakaꞌan, ndidaa sa niꞌi yo ndidaa yo xiꞌin tsaku yo; san kada xiꞌin nata-uꞌu ndidaa yo. Kuan tu ti ndikuu xanaa yo, san kij ntsu kuenta en ñaduꞌu; san ma kini yo na ora kij ntsu sa io yo ndidaa yo. 4 Doko, io uu ñayii yo Sardis ñayii ti kída kuiꞌia d̶oꞌno xi kuan ndukutu nu doꞌno kuixi kachi oni sandutsa san kaka nu xiꞌin ntsu, kuan nitaꞌvi nu. 5 Nu na kadanar duꞌua ndukutu nu doꞌno kuixi kachi oni sandutsa; san ma dandoo ntsu sa nani nu yodo tutu natuu sa yodotuni ñayii koo ndidaa tiempu xiꞌin Ndios, san kana ndodo ntsu sa nani nu jnu ku Tata ntsu xiꞌin jnu ndidaa x-ángel ia. 6 Andu tsaku xi, na kada sa kaꞌan Espíritu ya xi ndidaa x-congregación Ndios.”Toꞌon kaꞌan Ndios xi x-congregación ia io Filadelfia
7 Tsaa xi ángel io x-congregación Ndios io Filadelfia: “Duꞌua kachi ia kuu ia Ii xiꞌin ia kuu ia Nchisa, ia neꞌe Ndakaa Rey David, ia nakaan san ti en kachi nakadi, ia nakadi san ti en kachi nakaan: 8 Ntsuꞌu xini ndidaa sa kida yo ndidaa yo. Xini ni ña, Nakaan ntsu en ndieꞌe sa io yo ndidaa yo san ma en kachi nakadi; kuan kuani ti ntsee yo, kida yo sa kachi ntsu, san ti chiguaꞌa yo sa nani ntsu. 9 Xini yo ña, na nachiꞌi ntsu ndaꞌa yo ndidaa yo ndidaa nu yeꞌe sinagoga Satanas ndidaa nu kaꞌan sa kuu ñuu Israel doko sa naꞌntsa nu. Xini yo ña, kada ntsu sa na kij nu uu nu sa io yo ndidaa yo san na kukuinxiti nu jnu yo ndidaa yo, san na nakininchisa nu ndidaa nu sa yoꞌo kuu nu xinimani ntsu. 10 Kuan kida yo ndidaa yo sa kachi ntsu sa na kuyakui yo, ntsuꞌu chintsee ñaꞌan ntsu yo ndidaa yo tuku ora nasaa sa kototuni ñaꞌan, sa kixi sata ndidaa ñayii io nuꞌu ya. 11 Ntsuꞌu ma ku kuee ntsu ndij ni ntsu. Kuin ntsee xiꞌin ndidaa sa kida yo ndidaa yo, ndasa ma en dita corona niꞌi yo ndidaa yo. 12 Nu na kadanar, ntsuꞌu kadañaꞌa ntsu en poste nu s-templu ku Ndios ntsu san ma kee nu, san sata xi chidotuni ntsu sa nani ku Ndios ntsu, xiꞌin sa nani ñuu kuu Jerusalén saa, sa noo andivi, xi ku Ndios ntsu, xiꞌin sa saa nani ntsu. 13 Andu tsaku xi, na kada sa kaꞌan Espíritu ya xi ndidaa x-congregación Ndios.”
Toꞌon kaꞌan Ndios xi x-congregación sa io Laodicea
14 Chidotuni xi ángel io x-congregación Ndios io Laodicea: “Duꞌua kachi ia nani Amen, ia kaꞌan Ndaa, ia Kuu Nchisa, ia tastuni ndidaa ndituꞌu sa kídaguaꞌa Ndios, duꞌua kachi ia: 15 Ntsuꞌu xini ntsu ndidaa sa kida yo ndidaa yo, san ti vixi yo san nisa ti iꞌni yo. ¡Guaꞌa tu vixi yo adi iꞌni yo ndidaa yo! 16 San vita ndasa bidi yo, san ti vixi yo san nisa ti iꞌni yo, san ndusa ñaꞌan ntsu yo. 17 Kuan yoꞌo kaꞌan yo ndidaa yo: Kuika ntseꞌe ntsu; san ku kuika ntseꞌe ntsu san ti io ka sa nandeꞌe ku ntsu. San ti xini yo sa kuu yo en ñayii atuu dana sa io xi, nu nandeꞌe sa kunda ini ñaꞌan ñayii xi kuu yo, 18 Juandiku ntsuꞌu kachi ntsu yo ndidaa yo san guaꞌa ka tu na kueen yo menina ni oro ndundoo xiti ñuꞌu ku ntsu, ndasa na ku kuu yo ndidaa yo ñayii kuika, xiꞌin doꞌno kuixi kachi sa ndukutu yo, ndasa ma niꞌi yo ndidaa yo sakanuu sa io vichi yo; xiꞌin en gotaa sa kee nduchinuu yo kuaan na tuu sa ntsaꞌa yo ndidaa yo. 19 Ntsuꞌu nduden ntsu xiꞌin nakani ñaꞌan ndaa ntsu xi ndidaa nu xinimani ntsu; nchoj ntseꞌe sa xininchisa yo san nata-uꞌu ndidaa yo. 20 Xini yo ña, ntsuꞌu in ntsu ndieꞌe san kana ntsu sa na nakaan; san andu na tsaku xi ku tachi ntsu san na nakaan ndieꞌe, yii ntsu sa io, san kaj dini ntsu xiꞌin, san nuyaꞌa kaj dini nu xiꞌin ntsu. 21 Andu na kadanar, san ntsuꞌu kada ntsu sa na kuntsaku nu xiꞌin ntsu ku trono ntsu, duꞌua kuenta ntsuꞌu kidanar ntsu san sakuntsaku ntsu xiꞌin ku Tata s-trono ia. 22 Andu tsaku xi, na kada sa kaꞌan Espíritu ya xi ndidaa x-congregación Ndios.”